ပှၤဖးလံာ်ဖိတဖၣ် အတၢ်သံကွၢ်
တၢ်မၢဖိပီလူးတဲဝဲလၢ “ခီဖျိလၢ တၢ်သိၣ်တၢ်သီအဃိ ယသံသဒၣ်ကွံာ် တၢ်သိၣ်တၢ်သီ” န့ၣ် အဲၣ်ဒိးတဲဝဲ အခီပညီဒ်လဲၣ်.—ကလၤတံ ၂:၁၉.
စီၤပီလူးကွဲးဝဲလၢ “ခီဖျိလၢ တၢ်သိၣ်တၢ်သီအဃိ ယသံသဒၣ်ကွံာ် တၢ်သိၣ်တၢ်သီ ဒ်သိးယကမူလၢ ကစၢ်ယွၤအဂီၢ်လီၤ.”—ကလၤတံ ၂:၁၉.
တၢ်ဂ့ၢ်လၢစီၤပီလူးကွဲးဝဲန့ၣ် ဘၣ်ထွဲလိာ်အသးဒီး တၢ်ဂ့ၢ်လၢအတဲဘၣ် ကလၤတံတၢ်အိၣ်ဖှိၣ်လၢ ဝ့ၢ်ရိမ့ၤအပူၤလီၤ. တၢ်သိၣ်လိလၢ အကမၣ်တဖၣ်ဒိၣ်စိလၢ ခရံာ်ဖိတနီၤ အဖီခိၣ်လီၤ. ပှၤတနီၤသိၣ်လိဝဲလၢ ဒ်သိးပှၤတဂၤကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ် ကဘၣ်မၤထွဲ စီၤမိၤၡ့အတၢ်သိၣ်တၢ်သီဘၣ်ဃးဒီး တၢ်ကူးတရံးလီၤ. ဘၣ်ဆၣ် စီၤပီလူးသ့ၣ်ညါဝဲလၢ ကစၢ်ယွၤအခ့အပှၤတဖၣ် တလိၣ်မၤတၢ်ကူးတရံးလၢၤဘၣ်. ခီဖျိလၢ စီၤပီလူးသ့ၣ်ညါ တၢ်ဂ့ၢ်လီၤတံၢ်လီၤဆဲးအဃိ လၢတၢ်သးဆူၣ်အပူၤ အပာ်ဖျါထီၣ်ဝဲလၢ တၢ်သိၣ်လိတဖၣ်အံၤ ကမၣ်ဝဲလီၤ. ဒီးအဝဲဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်တဖၣ်လၢ ကနာ်ဝဲ ယ့ၣ်ၡူးခရံာ်အတၢ်ပှ့ၤက့ၤလီၤ.—ကလၤတံ ၂:၄; ၅:၂.
လံာ်စီဆှံတဲဝဲလၢ ပှၤလၢအသံန့ၣ် တသ့ၣ်ညါတၢ်မၤအသးလၢ အခိၣ်အဃၢၤတဖၣ် နီတမံၤလၢၤဘၣ်. (စံၣ်တဲၤတဲလီၤတၢ် ၉:၅) ဖဲစီၤပီလူး တဲဝဲလၢ “ယသံသဒၣ်ကွံာ် တၢ်သိၣ်တၢ်သီ” အခါ အအဲၣ်ဒိးတဲဝဲလၢ စီၤမိၤၡ့အတၢ်သိၣ်တၢ်သီန့ၣ် အစိကမီၤတအိၣ်လၢ အတၢ်အိၣ်မူပူၤလၢၤဘၣ်. လၢတၢ်န့ၣ်အလီၢ် စီၤပီလူးသ့ၣ်ညါဝဲလၢ ခီဖျိလၢအနာ်တၢ်ပှ့ၤက့ၤအဃိ အကဲထီၣ်ပှၤ “မူလၢ ကစၢ်ယွၤအဂီၢ်လီၤ.”
ခီဖျိလၢ စီၤမိၤၡ့အတၢ်သိၣ်တၢ်သီ အဃိ စီၤပီလူးအတၢ်အိၣ်သး ဆီတလဲဝဲလီၤ. လၢကျဲဒ်လဲၣ်. စီၤပီလူးပာ်ဖျါထီၣ်ဝဲလၢ “ပှၤတဂၤဂၤ ဘၣ်တၢ်ပာ်တီပာ်လိၤအီၤထဲလၢ တၢ်နာ်ယ့ၣ်ၡူးခရံာ်အဃိ ဒီးတမ့ၢ်လၢ တၢ်မၤလၢအဘၣ်ထွဲဒီး တၢ်သိၣ်တၢ်သီအဃိဘၣ်.” (ကလၤတံ ၂:၁၆) စီၤမိၤၡ့အတၢ်သိၣ်တၢ်သီန့ၣ် မၤလၢထီၣ်ပှဲၤထီၣ် တၢ်လၢအရ့ဒိၣ်ဝံၤလံ. စီၤပီလူးၡဲပၠး ပှၤကလၤတံဖိလၢ “တၢ်ဟ့ၣ်လီၤအါထီၣ် စီၤမိၤၡ့ အတၢ်သိၣ်တၢ်သီ ဒ်သိးကပာ်ဖျါထီၣ် ပှၤအတၢ်ကမၣ်တဖၣ် တုၤလီၤလၢ စီၤအၤဘြၤဟၣ် အချံအသၣ် လၢအဒိးန့ၢ်ဘၣ် တၢ်စံးပာ်န့ၣ် ဟဲတုၤဝဲတစုလီၤ.” (ကလၤတံ ၃:၁၉) စီၤမိၤၡ့အတၢ်သိၣ်တၢ်သီ ပာ်ဖျါထီၣ်ဝဲ ပှၤဟီၣ်ခိၣ်ဖိလၢ အအိၣ်ဒီးတၢ်ဒဲးဘး ဒီးတလၢတပှဲၤဘၣ်န့ၣ် ကမၤထွဲ တၢ်သိၣ်တၢ်သီ လၢလၢပှဲၤပှဲၤအဂီၢ် တန့ၢ်ဘၣ်. တကးဒံးဘၣ် အဝဲသ့ၣ်လိၣ်ဘၣ်ဝဲ တၢ်ဟ့ၣ်လုၢ်ထီၣ်လၢ အလၢအပှဲၤတခါလီၤ. အဃိ စီၤမိၤၡ့အတၢ်သိၣ်တၢ်သီမၤစၢၤ အဝဲသ့ၣ်လၢ ကသ့ၣ်ညါထီၣ်ဝဲ လၢယ့ၣ်ၡူးန့ၣ်မ့ၢ်ဝဲ “စီၤအၤဘြၤဟၣ် အချံအသၣ်” လီၤ. ခီဖျိလၢ ပှၤတဂၤစူၢ်က့ၤနာ်က့ၤ ယ့ၣ်ၡူးခရံာ်အဃိ အဝဲကဲထီၣ်ပှၤတီပှၤလိၤလၢ ကစၢ်ယွၤအမဲာ်ညါလီၤ. (ကလၤတံ ၃:၂၄) စီၤပီလူးသ့ၣ်ညါထီၣ် တၢ်ဂ့ၢ်အံၤခီဖျိလၢ စီၤမိၤၡ့အတၢ်သိၣ်တၢ်သီ မၤစၢၤအီၤ ဒီးအဝဲစူၢ်က့ၤနာ်က့ၤ ယ့ၣ်ၡူးလီၤ. စီၤပီလူး “သံသဒၣ်ကွံာ် တၢ်သိၣ်တၢ်သီ” ဒီး အက “မူလၢ ကစၢ်ယွၤအဂီၢ်လီၤ.” အဃိ စီၤမိၤၡ့အတၢ်သိၣ်တၢ်သီ တဒိၣ်စိလၢ စီၤပီလူးအဖီခိၣ်လၢၤဘၣ်. ဘၣ်ဆၣ် ကစၢ်ယွၤဒိၣ်စိက့ၤလၢအဖီခိၣ်လီၤ.
စီၤပီလူးပာ်ဖျါထီၣ်အတၢ်ထံၣ် လၢအလီၤဂာ်လိာ်သးဒီး အလံာ်ပရၢလၢ ရိမ့ၤအပူၤစ့ၢ်ကီးလီၤ. အဝဲတဲဝဲလၢ “ယဒီပုၢ်ဝဲၢ်သ့ၣ်ဧၢ, သုစ့ၢ်ကီးသုသံသဒၣ်ကွံာ် စီၤမိၤၡ့ အတၢ်သိၣ်တၢ်သီ ခီဖျိလၢ ခရံာ်အနီၢ်ခိ . . . ပထူၣ်ဖျဲးထီၣ်လၢ စီၤမိၤၡ့ အတၢ်သိၣ်တၢ်သီ မ့ၢ်လၢပသံသဒၣ်ကွံာ် တၢ်လၢအစၢဃာ်တ့ၢ်ပှၤ” လီၤ. (ရိမ့ၤ ၇:၄, ၆) ဒီးလံာ်စီဆှံအဆၢ ဖဲကလၤတံ ၂:၁၉ အပူၤန့ၣ် ပာ်ဖျါထီၣ်ဝဲလၢ စီၤပီလူးတအဲၣ်ဒိးတဲ ဘၣ်ဃးဒီး ပှၤတၢ်ဒဲးဘးဖိလၢအသံလၢ စီၤမိၤၡ့အတၢ်သိၣ်တၢ်သီ အဖီလာ်န့ၣ်ဘၣ်. လၢတၢ်န့ၣ်အလီၢ် စီၤပီလူးတဲဘၣ်ဃးဒီး တၢ်ထူၣ်ဖျဲးထီၣ်အဂ့ၢ်လီၤ. စီၤမိၤၡ့အတၢ်သိၣ်တၢ်သီန့ၣ် တဒိၣ်စိလၢစီၤပီလူး ဒီးပှၤလၢအဒ်သိးဒီးအီၤတဖၣ် အဖီခိၣ်လၢၤဘၣ်. အဝဲသ့ၣ်ထူၣ်ဖျဲးထီၣ်ခီဖျိလၢ အနာ်ယ့ၣ်ၡူးခရံာ်တၢ်ပှ့ၤက့ၤအဃိလီၤ.