၂ | “တၢ်မၤမုာ်ထီၣ်က့ၤလၢ ပဒိးန့ၢ်ဘၣ်အီၤလၢ တၢ်ကွဲးအသးတဖၣ်အပူၤ”
လံာ်စီဆှံတဲဝဲလၢ– “တၢ်ကွဲးအသးလၢ အပူၤကွံာ်တဖၣ်ခဲလၢာ်န့ၣ် ဘၣ်တၢ်ကွဲးအီၤလၢ ကသိၣ်လိပှၤအဂီၢ်လီၤ. အဃိ ပအိၣ်ဒီးတၢ်မုၢ်လၢ် ခီဖျိလၢ ပတၢ်တူၢ်န့ၢ်ခီၣ်ကဲ ဒီးတၢ်မၤမုာ်ထီၣ်က့ၤလၢ ပဒိးန့ၢ်ဘၣ်အီၤလၢ တၢ်ကွဲးအသးတဖၣ်အပူၤ အဃိ.”—ရိမ့ၤ ၁၅:၄.
အဲၣ်ဒိးတဲဝဲ အခီပညီဒ်လဲၣ်
လံာ်စီဆှံန့ၣ်အိၣ်ဒီး တၢ်ကတိၤလၢ အမၤမုာ်ထီၣ်ပသး, အဟ့ၣ်ပှၤတၢ်ဂံၢ်တၢ်ဘါ ဒီးတၢ်တူၢ်န့ၢ်ခီၣ်ကဲ ဖဲပအိၣ်ဒီး တၢ်ဆိမိၣ်လၢအတဂ့ၤဘၣ်အခါ. လံာ်စီဆှံ ဟ့ၣ်ပှၤတၢ်မုၢ်လၢ်လၢ တၢ်သူၣ်အုးသးအုးတဖၣ်ကလီၤမၢ်ကွံာ်.
လံာ်စီဆှံ မၤစၢၤပှၤဒ်လဲၣ်
ပဝဲကိးဂၤဒဲးန့ၣ် တဘျီတခီၣ် ပကတူၢ်ဘၣ်လၢ ပသူၣ်အုးသးအုး. ဘၣ်ဆၣ်ပှၤလၢအအိၣ်ဒီး တၢ်သးလီၤစၢ်တၢ်ဆါန့ၣ် အဝဲသ့ၣ်သူၣ်အုးသးအုး ဒီးသးကိၢ်တၢ်ထီဘိ. အဃိလံာ်စီဆှံ မၤစၢၤအဝဲသ့ၣ် ကသ့ဒ်လဲၣ်.
လၢလံာ်စီဆှံပူၤန့ၣ် အိၣ်ဒီးတၢ်ဂ့ၢ်တဖၣ်လၢ အကမၤစၢၤပှၤလၢ ပကအိၣ်ဒီးတၢ်ထံၣ်လၢအဂ့ၤ ဒီးမၤလီၤမၢ်ကွံာ် ပတၢ်ဆိမိၣ်လၢ အတဂ့ၤဘၣ်. (ဖံလံးပံၤ ၄:၈) ဒီးတၢ်သ့ၣ်တဖၣ်န့ၣ် ကမၤဂၢၢ်ထီၣ်ပသး ဒီးကမၤမုာ်ထီၣ်ပသး ဒ်သိးပပၢၤပတၢ်တူၢ်ဘၣ်ကန့ၢ်အဂီၢ်.—စံးထီၣ်ပတြၢၤ ၉၄:၁၈, ၁၉.
ဖဲပတူၢ်ဘၣ်လၢ ပလုၢ်ပပှ့ၤတအိၣ်ဘၣ်အခါ လံာ်စီဆှံဒုးသ့ၣ်နီၣ်ထီၣ်ပှၤလၢ ပမ့ၢ်ပှၤလၢအလုၢ်ပှ့ၤဒိၣ်လၢ ကစၢ်ယွၤအဂီၢ်ဒိၣ်မး.—လူၤကၣ် ၁၂:၆, ၇.
ဖဲပသူၣ်အုးသးအုးအခါ ပဆိမိၣ်လၢ ပှၤတနၢ်ပၢၢ် ပတၢ်တူၢ်ဘၣ်နီတဂၤဘၣ်. ဘၣ်ဆၣ် လံာ်စီဆှံအါဆၢ ပာ်ဖျါထီၣ်န့ၢ်ပှၤလၢ ပတၢ်ဘၣ်တ့ကစၢ်န့ၣ် နၢ်ပၢၢ်ပတၢ်တူၢ်ဘၣ် လီၤတံၢ်လီၤဆဲး.—စံးထီၣ်ပတြၢၤ ၃၄:၁၈; ၁ ယိၤဟၣ် ၃:၁၉, ၂၀.
လံာ်စီဆှံတဲပှၤလၢ ကစၢ်ယွၤ ကမၤလီၤမၢ်ကွံာ် တၢ်လဲၤခီဖျိ လၢအမၤသးအုးပှၤ. (ယၡါယၤ ၆၅:၁၇; လီၣ်ဖျါ ၂၁:၄) အဃိပတၢ်ဆိမိၣ်လၢ အပူၤကွံာ်တဖၣ် မ့ၢ်ဟဲက့ၤမၤဘၣ်ဒိပသးန့ၣ် ဒ်သိးပသးတလီၤစၢ်တဂ့ၤအဂီၢ် တၢ်အၢၣ်လီၤလၢလံာ်စီဆှံပူၤ တခါအံၤ ကဟ့ၣ်ပှၤတၢ်ဂံၢ်တၢ်ဘါ.