၃ | တၢ်အဒိအတဲာ်လၢ လံာ်စီဆှံပူၤန့ၣ် ကဲဘျုးလၢ ပဂီၢ်ဒ်လဲၣ်
လံာ်စီဆှံပာ်ဖျါထီၣ်ဝဲ . . . ပိာ်မုၣ် ဒီးပိာ်ခွါလၢ အသးတီလၢ “အအိၣ်ဒီးတၢ်တူၢ်ဘၣ် ဒ်ပှၤအသိး.”—ယၤကိာ် ၅:၁၇.
အဲၣ်ဒိးတဲဝဲ အခီပညီဒ်လဲၣ်
လံာ်စီဆှံပူၤန့ၣ် အိၣ်ဒီးပိာ်မုၣ် ဒီးပိာ်ခွါ အတၢ်လဲၤခီဖျိနီၢ်ကီၢ် လၢအဝဲသ့ၣ်အိၣ်ဒီး တၢ်တူၢ်ဘၣ်အကလုာ်ကလုာ်. ဖဲပဖးအဝဲသ့ၣ်အဂ့ၢ်အခါ ပထံၣ်ဘၣ်လၢ အဝဲသ့ၣ်တၢ်အိၣ်သး လီၤဂာ်ဒီးပှၤ.
တၢ်အဒိအတဲာ်လၢ လံာ်စီဆှံပူၤန့ၣ် မၤစၢၤပှၤဒ်လဲၣ်
ပဝဲကိးဂၤဒဲးန့ၣ် ပအဲၣ်ဒိးလၢ ပှၤကနၢ်ပၢၢ်စၢၤပှၤ လီၤဆီဒၣ်တၢ် ဖဲပတူၢ်ဘၣ် တၢ်သးလီၤစၢ်တၢ်ဆါအခါ. ဖဲပဖးဘၣ် ပှၤတၢ်လဲၤခီဖျိနီၢ်ကီၢ် လၢအအိၣ်လၢလံာ်စီဆှံပူၤအခါ ပသ့ၣ်ညါဘၣ်လၢ အဝဲသ့ၣ်အတၢ်ဆိမိၣ် ဒီးအတၢ်တူၢ်ဘၣ်န့ၣ် လီၤဂာ်ဒီးပှၤ. အဃိပနၢ်ပၢၢ်ထီၣ်လၢ ပှၤလၢအတူၢ်ဘၣ် တၢ်သးလီၤစၢ်န့ၣ် တမ့ၢ်ထဲပဝဲဘၣ်.
ပှၤလၢအသးဟးဂီၤ ဒီးပှၤလၢအတူၢ်ဘၣ်ဝဲလၢ ပှၤသူအီၤတသ့ဘၣ် အဂ့ၢ်န့ၣ် လံာ်စီဆှံ ပာ်ဖျါထီၣ်န့ၢ်ပှၤအါမး. လံာ်စီဆှံ ပာ်ဖျါထီၣ်ဝဲလၢ စီၤမိၤၡ့, စီၤအ့ၤလံယၤ ဒီးစီၤဒၤဝံးန့ၣ် သူၣ်ဟးဂီၤသးဟးဂီၤ ဒီးတအဲၣ်ဒိးဆဲးအိၣ်မူလၢၤဘၣ်.—၄ မိၤၡ့ ၁၁:၁၄; ၁ စီၤပၤ ၁၉:၄; စံးထီၣ်ပတြၢၤ ၅၅:၄.
လံာ်စီဆှံပာ်ဖျါထီၣ်ဝဲလၢ နီၢ်ဃးနၤန့ၣ် “အသးဘၣ်ဒိဒိၣ်မး” မ့ၢ်လၢအဖိတအိၣ်ဘၣ် ဒီးအဝၤအမါ လၢအဂၤတဂၤ တဲဆဲးအဲးအီၤအဃိ.—၁ ၡမူၤအ့လး ၁:၆, ၁၀.
လံာ်စီဆှံပာ်ဖျါထီၣ်န့ၢ်ပှၤလၢ စီၤယိၤဘးန့ၣ် အထံၣ်ဘၣ်တၢ်ကီတၢ်ခဲ ဒီးအတူၢ်ဘၣ်တၢ်နးဒိၣ်မးအဃိ အတဲဝဲလၢ “ယသးဟ့လီၤ ယတၢ်အိၣ်မူ အဃိ ယတအဲၣ်ဒိး ဆဲးအိၣ်မူလၢၤဘၣ်.”—ယိၤဘး ၇:၁၆.
ပမၤလိဘၣ်လၢ ပှၤလၢလံာ်စီဆှံ ပာ်ဖျါထီၣ်အဂ့ၢ်တဖၣ် အဝဲသ့ၣ်အိၣ်ဒီး တၢ်ထံၣ်လၢအတဂ့ၤဘၣ်နာ်က့ ကစၢ်ယွၤ မၤစၢၤအဝဲသ့ၣ် အဃိ အဝဲသ့ၣ်မၤလီၤမၢ်ကွံာ် အတၢ်ဆိမိၣ်လၢ အတဂ့ၤဘၣ်န့ၢ်ဝဲ. ပဝဲစ့ၢ်ကီး ပမ့ၢ်ပာ်ဂံၢ်ပာ်ဘါ ကစၢ်ယွၤန့ၣ် ပမၤလီၤမၢ်ကွံာ် တၢ်ဆိမိၣ်လၢ အတဂ့ၤဘၣ်ကန့ၢ်.