၄ | လံာ်စီဆှံတၢ်ဟ့ၣ်ကူၣ်န့ၣ် အကဲဘျုး
လံာ်စီဆှံတဲဝဲလၢ– “တၢ်ကွဲးအသးခဲလၢာ်န့ၣ် . . . ကဲဘျုး.” —၂ တံၤမသ့း ၃:၁၆.
အဲၣ်ဒိးတဲဝဲ အခီပညီဒ်လဲၣ်
လံာ်စီဆှံန့ၣ် တမ့ၢ်တၢ်အိၣ်ဆူၣ်အိၣ်ချ့ အလံာ်ဘၣ်, ဘၣ်ဆၣ် လံာ်စီဆှံ အတၢ်ဟ့ၣ်ကူၣ်န့ၣ် အကဲဘျုး ဒီးအကဲထီၣ် တၢ်မၤစၢၤလၢပဂီၢ်. တၢ်ဟ့ၣ်ကူၣ်လၢ လံာ်စီဆှံပူၤန့ၣ် မၤစၢၤစ့ၢ်ကီး ပှၤလၢအအိၣ်ဒီး တၢ်သးလီၤစၢ်တၢ်ဆါသ့. ပကကွၢ်သကီး တၢ်အဒိတနီၤ.
လံာ်စီဆှံတၢ်ဟ့ၣ်ကူၣ်န့ၣ် မၤစၢၤပှၤဒ်လဲၣ်
“ပှၤလၢ အအိၣ်ဆူၣ်အိၣ်ချ့န့ၣ် တလိၣ်ဘၣ် ကသံၣ်သရၣ်ဘၣ်. ဘၣ်ဆၣ် ပှၤလၢအဆိးက့တဖၣ် လိၣ်ဘၣ်ဝဲ.”—မးသဲ ၉:၁၂.
လံာ်စီဆှံ ပာ်ဖျါထီၣ်စ့ၢ်ကီးဝဲလၢ ပမ့ၢ်ဆိးက့န့ၣ် ပကလိၣ်ဘၣ် ကသံၣ်သရၣ်တၢ်မၤစၢၤ. ပှၤလၢအိၣ်ဒီး တၢ်သးလီၤစၢ်တၢ်ဆါအါဂၤန့ၣ် အဝဲသ့ၣ် လဲၤထံၣ်လိာ်သးဒီး ကသံၣ်သရၣ်အဃိ အဝဲသ့ၣ် သ့ၣ်ညါအါထီၣ် အတၢ်ဆါအဂ့ၢ် ဒီးကသံၣ်သရၣ် မၤစၢၤအီၤအဃိ အတၢ်ဆါကိညၢ်လီၤက့ၤ.
“နီၢ်ခိအတၢ်ဟူးတၢ်ဂဲၤ အဘျုးအိၣ်.”—၁ တံၤမသ့း ၄:၈.
ပမ့ၢ်ဟ့ၣ်တၢ်ဆၢကတီၢ် ဒီးမၤနီၢ်ခိတၢ်ဟူးတၢ်ဂဲၤန့ၣ် ပတၢ်အိၣ်ဆူၣ်အိၣ်ချ့ ဂ့ၤထီၣ်သ့. အဃိပကဘၣ် မၤနီၢ်ခိတၢ်ဟူးတၢ်ဂဲၤ ထီဘိ, အီၣ်တၢ်အီၣ်တၢ်အီလၢ အန့ၢ်ဂံၢ်န့ၢ်ဘါ ဒီးမံဘျဲဘျဲ.
“တၢ်သးခုန့ၣ် လီၤဂာ်ဒ်သိးဒီး ကသံၣ်လၢ အမၤဘျါက့ၤတၢ်.”—ကတိၤဒိ ၁၇:၂၂.
ဒ်သိး နတၢ်သးခုကအါထီၣ်အဂီၢ် ဖးလံာ်စီဆှံကိးနံၤဒဲး ဒီးပာ်လီၤဖီတၢၣ်လၢ နမၤထွဲအီၤန့ၢ်. နမ့ၢ်အိၣ်ဒီး တၢ်ထံၣ်လၢအဂ့ၤ ဒီးနမ့ၢ်နာ်လၢ ခါဆူညါ တၢ်အိၣ်သးကဂ့ၤထီၣ်န့ၣ် နလဲၤခီဖျိ တၢ်သးလီၤစၢ်တၢ်ဆါကန့ၢ်.
“ပှၤလၢအဆီၣ်လီၤသးန့ၣ် အိၣ်ဒီး တၢ်ကူၣ်သ့.”—ကတိၤဒိ ၁၁:၂.
ဘၣ်သ့ၣ်သ့ၣ် တၢ်လၢနအဲၣ်ဒိးမၤန့ၣ် အကအိၣ်ဒီဒူၣ်ညါ ဘၣ်ဆၣ်နမၤအီၤ လၢနနီၢ်ကစၢ် တသ့ခဲလၢာ်ဘၣ် အဃိတူၢ်လိာ်ပှၤဂၤတၢ်မၤစၢၤ. နသကီးဒီး နဟံၣ်ဖိဃီဖိ ကအဲၣ်ဒိးမၤစၢၤနၤ ဘၣ်ဆၣ် ဘၣ်သ့ၣ်သ့ၣ် အဝဲသ့ၣ် ကဘၣ်မၤစၢၤနၤ ဒ်လဲၣ်န့ၣ် တသ့ၣ်ညါဝဲဘၣ်. အဃိတဲပၠး အဝဲသ့ၣ်လၢ အကဘၣ် မၤစၢၤနၤဒ်လဲၣ်. တဘၣ်မုၢ်လၢ်လၢ အဝဲသ့ၣ်ကမၤန့ၢ်နၤ တၢ်ခဲလၢာ်တဂ့ၤ, ထီဘိန့ၣ် စံးဘျုးစံးဖှိၣ် တၢ်လၢအဝဲသ့ၣ်မၤန့ၢ်နၤ.
ပှၤလၢအတူၢ်ဘၣ်တၢ်တဖၣ်န့ၣ် လံာ်စီဆှံတၢ်ဟ့ၣ်ကူၣ် မၤစၢၤအဝဲသ့ၣ်ဒ်လဲၣ်
နံၤခိa လၢအတူၢ်ဘၣ် တၢ်သးလီၤစၢ်တၢ်ဆါ လၢအနးတကလုာ်န့ၣ် တဲဝဲလၢ “ဖဲတၢ်ဘၣ်ယၤတမုာ်ဘၣ်အခါ ယလဲၤထံၣ်လိာ်သးဒီး ကသံၣ်သရၣ် ဒီးကသံၣ်သရၣ်မုၣ် တဲဘၣ်ယၤလၢ ယအိၣ်ဒီး တၢ်ဆါတခါအံၤ. ယသ့ၣ်ညါထီၣ် ယတၢ်ဆါအဂ့ၢ်အဃိ ကဲထီၣ်တၢ်မၤစၢၤလၢယဂီၢ်. တကးဒံးဘၣ် ကသံၣ်သရၣ်မုၣ်တဲပၠးယၤလၢ ကသံၣ်လၢ အကမၤစၢၤယၤလၢ ယတၢ်ဆါကကိညၢ်န့ၣ် အိၣ်ဝဲ.”
ဖံထၢၤ လၢအတူၢ်ဘၣ် တၢ်သးလီၤစၢ်တၢ်ဆါန့ၣ် တဲဝဲလၢ “ယၤဒီးယမါန့ၣ် ဒ်သိးပကအိၣ်ဒီး တၢ်ထံၣ်လၢအဂ့ၤ ဒီးတၢ်ဆိမိၣ်လၢ အဂ့ၤအဂီၢ် ပဖးလံာ်စီဆှံ ကီးဂီၤဒဲး. ဘၣ်တဘျီဘျီ ဖဲယသးလီၤစၢ်အခါ လံာ်စီဆှံအဆၢလၢ ယဖးဘၣ်တဖၣ်န့ၣ် ကဲထီၣ်တၢ်ဂံၢ်တၢ်ဘါ လၢယဂီၢ်ဒိၣ်မး.”
ကၠံယူ လၢအတူၢ်ဘၣ် တၢ်အီၣ်တၢ် တဘၣ်လီၢ်ဘၣ်စးတၢ်ဆါန့ၣ် တဲဝဲလၢ “ယတဲပၠးပှၤဂၤလၢ ယတၢ်ဆါအဂ့ၢ်တဘူၣ်ဘၣ်. ဘၣ်ဆၣ် ယသကီးလၢ ယရ့အီၤဘူးဒိၣ်ကတၢၢ်တဂၤန့ၣ် အသးကညီၤယၤ ဒီးနၢ်ပၢၢ်စၢၤယၤ. အဃိဒ်သိး ယတတူၢ်ဘၣ်လၢ ယအိၣ်သယုၢ်သညိ ထဲတဂၤတဂ့ၤအဂီၢ် အဝဲမၤစၢၤယၤ ဒ်သိးယသးကမုာ်ထီၣ်က့ၤ.”
ထံမသ့း လၢအတူၢ်ဘၣ် တၢ်သးလီၤစၢ်တၢ်ဆါ လၢအနးတကလုာ်န့ၣ် တဲဝဲလၢ “လံာ်စီဆှံမၤစၢၤယၤ ဒ်သိးယကအိၣ်ဒီး တၢ်ထံၣ်အကြၢးအဘၣ် ဘၣ်ဃးဒီး တၢ်ဖံးတၢ်မၤ ဒီးတၢ်အိၣ်ဘှံးအိၣ်သါ. ဒီးအမၤစၢၤယၤလၢ ယတမၤတၢ်အါတလၢတဂ့ၤ ဒီးယကအိၣ်ဘှံးအိၣ်သါ ဒ်ယလိၣ်ဘၣ်အသိး. ဖဲယသးလီၤစၢ် အဆၢကတီၢ် လံာ်စီဆှံအတၢ်ဟ့ၣ်ကူၣ်တဖၣ် မၤစၢၤယၤ.”
a ပှၤမံၤတနီၤန့ၣ် ပှၤဆီတလဲဝဲ.