ယဟိဝၤယွၤအဲၣ်ဒိးလၢ တၢ်အိၣ်ဖှိၣ်ဖိ ကရ့ဒီး ပှၤမၤတၢ်ကမၣ်တဂၤ ဒ်လဲၣ်

၁. ယဟိဝၤယွၤ အဲၣ်ဒိးလၢ ပှၤကိးဂၤဒဲး ကမၤမနုၤလဲၣ်.

ယဟိဝၤယွၤ တ့လီၤပှၤဃုာ်ဒီး တၢ်သ့တၢ်ဘၣ်လၢ ပကဆၢတဲာ်တၢ်လၢ ပနီၢ်ကစၢ် အဃိ ပဆၢတဲာ်တၢ် ကိးနံၤဒဲး. ဘၣ်ဆၣ် တၢ်အရ့ဒိၣ်ကတၢၢ်လၢ ပကဘၣ်ဆၢတဲာ်န့ၣ် မ့ၢ်ဝဲ ပဟ့ၣ်လုၢ်ထီၣ်သးလၢ ယဟိဝၤယွၤအအိၣ် ဒီးဘူၣ်ထီၣ်ဘါထီၣ်အီၤ တပူၤဃီဒီး ပဒီပုၢ်ဝဲၢ်မုၣ်ခွါ. ဘၣ်မနုၤအဃိ ယဟိဝၤယွၤ အဲၣ်ဒိးလၢ ပှၤကိးဂၤဒဲး ကဟ့ၣ်လုၢ်ထီၣ်သး လၢအအိၣ်လဲၣ်. ယဟိဝၤယွၤ အဲၣ်ပှၤဟီၣ်ခိၣ်ဖိ ဒီးအဲၣ်ဒိးဟ့ၣ် အဝဲသ့ၣ် တၢ်အိၣ်မူလၢ အဂ့ၤကတၢၢ်. အအဲၣ်ဒိးလၢ အဝဲသ့ၣ်ကအိၣ်ဒီး တၢ်ရ့လိာ်သးဒီးအီၤလၢအဂ့ၤ ဒီးအိၣ်မူဘၣ် လီၤထူလီၤယိာ်.—၅ မိၤ ၃၀:၁၉, ၂၀; ကလၤ ၆:၇, ၈.

၂. ပှၤလၢတပီၢ်ယၢ်လီၤက့ၤသး ဒံးဘၣ်တဖၣ်န့ၣ် ယဟိဝၤယွၤ အဲၣ်ဒိးလၢ အဝဲသ့ၣ် ကမၤမနုၤလဲၣ်. (၁ ယိၤဟၣ် ၂:၁)

^၂ ယဟိဝၤယွၤ တမၢဆူၣ်ပှၤလၢ ပကဘူၣ်ထီၣ်ဘါထီၣ်အီၤဘၣ်. ယဟိဝၤယွၤ ပျဲဝဲလၢ ပကဆၢတဲာ်တၢ်လၢ ပနီၢ်ကစၢ်. အဃိ ပှၤလၢအဒိးဘျၢထံဝံၤတဂၤ မ့ၢ်မၤဘၣ် တၢ်ကမၣ်ဖးဒိၣ်န့ၣ် တၢ်အိၣ်ဖှိၣ်သးပှၢ် ကဘၣ်မၤဒ်လဲၣ်. ပှၤတဂၤအံၤ မ့ၢ်တပီၢ်ယၢ်လီၤက့ၤသးဘၣ်န့ၣ် ပှၤကထုးထီၣ်ကွံာ်အီၤလၢ တၢ်အိၣ်ဖှိၣ်အပူၤ. (၁ ကရံၣ် ၅:၁၃) သနာ်က့ ယဟိဝၤယွၤ အဲၣ်ဒိးဝဲလၢ အဝဲသ့ၣ် ကပီၢ်ယၢ်လီၤက့ၤသး ဒီးဟဲက့ၤလၢအအိၣ်. အဃိ ယဟိဝၤယွၤရဲၣ်ကျဲၤဝဲ တၢ်ပှ့ၤက့ၤ ဒ်သိး အကပျၢ်ကွံာ် ပှၤလၢအပီၢ်ယၢ်လီၤက့ၤသးတဂၤ အတၢ်ကမၣ်. (ဖး ၁ ယိၤဟၣ် ၂:၁.) ပကစၢ်ယွၤလၢ အသူၣ်အိၣ်သးအိၣ်ပှၤန့ၣ် အအဲၣ်ဒိးလၢ ပှၤမၤကမၣ်တၢ်တဖၣ် ကပီၢ်ယၢ်လီၤက့ၤသး.—ကၤ ၁:၃; ရိ ၂:၄; ယၤ ၄:၈.

၃. လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်.

^၃ ယဟိဝၤယွၤ ပာ်ဖျါထီၣ်န့ၢ်ပှၤ အတၢ်ထံၣ် ဘၣ်ဃးဒီး တၢ်ကမၣ် ဒီးပှၤလၢအမၤဘၣ် တၢ်ကမၣ်ဖးဒိၣ် ဒီးအအဲၣ်ဒိးလၢ ပကအိၣ်ဒီး တၢ်ထံၣ်ဒ်သိးဒီးအီၤ. အဃိ တၢ်မၤလိတခါအံၤ ကမၤစၢၤပှၤဒ်သိး ပကွၢ်လိ ယဟိဝၤယွၤ အဒိအတဲာ်. ဖဲနဖး တၢ်မၤလိအံၤအခါ ပာ်သူၣ်ပာ်သး တၢ်ဂ့ၢ်သၢထံၣ်အံၤ. (၁) ဖဲပှၤတဂၤမၤဘၣ် တၢ်ကမၣ်ဖးဒိၣ်အခါ တၢ်အိၣ်ဖှိၣ်ဖိလၢ ဝ့ၢ်ကရံၣ်သူးအပူၤ ကဘၣ်ရ့ဒီးအီၤဒ်လဲၣ်. (၂) တၢ်မၢဖိပီလူး ဟ့ၣ်ကူၣ် တၢ်အိၣ်ဖှိၣ်ဖိလၢ ကရ့ဒီးပှၤလၢ အပီၢ်ယၢ်လီၤက့ၤသးတဂၤဒ်လဲၣ်. (၃) ပှၤလၢအမၤဘၣ် တၢ်ကမၣ်ဖးဒိၣ်န့ၣ် ယဟိဝၤယွၤ ထံၣ်အီၤဒ်လဲၣ်.

ဖဲပှၤတဂၤမၤဘၣ် တၢ်ကမၣ်ဖးဒိၣ်အခါ တၢ်အိၣ်ဖှိၣ်ဖိ ကဘၣ်ရ့ဒီးအီၤဒ်လဲၣ်

၄. လၢတၢ်အိၣ်ဖှိၣ်လၢ ဝ့ၢ်ကရံၣ်သူးအပူၤန့ၣ် တၢ်ကဲထီၣ်သးဒ်လဲၣ်. (၁ ကရံၣ်သူး ၅:၁, ၂)

^၄ ဖး ၁ ကရံၣ်သူး ၅:၁, ၂. ဖဲစီၤပီလူးလဲၤ မံၤၡၢၤနရံၤ အတၢ်လဲၤ သၢဘျီတဘျီအခါ အနၢ်ဟူဘၣ်ဝဲ တၢ်ကဲထီၣ်သးလၢ အလီၤသးဘၣ်အၢလၢ တၢ်အိၣ်ဖှိၣ်အသီတဖျၢၣ် လၢဝ့ၢ်ကရံၣ်သူးအပူၤ. ဒီပုၢ်ဝဲၢ်ခွါတဂၤလၢ တၢ်အိၣ်ဖှိၣ်အပူၤန့ၣ် အမၤကမၣ်မုၣ်ကမၣ်ခွါဒီး အပါအမါ. တၢ်ကဲထီၣ်သးအံၤ “လၢပှၤကလုာ်တဖၣ် အကျါဒၣ်လဲာ် တအိၣ်ဘၣ်.” တၢ်အိၣ်ဖှိၣ်ဖိတဖၣ် ဆိကမိၣ်ဝဲလၢ တၢ်ကဲထီၣ်သးအံၤ တမ့ၢ်တၢ်ကမၣ်ဖးဒိၣ်ဘၣ် ဒီးပှၤမၤတၢ်ကမၣ် တဂၤအံၤ ဆဲးအိၣ်လၢ တၢ်အိၣ်ဖှိၣ်အပူၤသ့. ဘၣ်သ့ၣ်သ့ၣ် တၢ်အိၣ်ဖှိၣ်ဖိတနီၤ ကဆိကမိၣ်လၢ အဝဲသ့ၣ်ကွၢ်လိ ယဟိဝၤယွၤ ဒီးပာ်ဖျါထီၣ် တၢ်သးကညီၤလၢ ပှၤမၤတၢ်ကမၣ် တဂၤအံၤအဖီခိၣ်. ဘၣ်ဆၣ် ယဟိဝၤယွၤ တဘၣ်သးလၢ ပှၤမၤတၢ်ကမၣ်ဒ်အံၤ ကအိၣ်လၢ အပှၤဂီၢ်မုၢ်အကျါဘၣ်. ခီဖျိလၢ တၢ်ကမၣ်ဖးဒိၣ်အံၤအဃိ ပှၤတနီၤလၢ တဘူၣ်ထီၣ်ဘါထီၣ် ယဟိဝၤယွၤဘၣ်န့ၣ် ဖဲအဝဲသ့ၣ် နၢ်ဟူဘၣ် တၢ်ကဲထီၣ်သးအံၤအခါ အဝဲသ့ၣ် ဖုးဘၣ်အသး ဒီးတဲဟးဂီၤ ယဟိဝၤယွၤ အပှၤဂီၢ်မုၢ်. ဒီးပှၤတဂၤအံၤ မ့ၢ်ဆဲးအိၣ်ဒံးလၢ တၢ်အိၣ်ဖှိၣ်ပူၤန့ၣ် ဒီပုၢ်ဝဲၢ်အဂၤတဖၣ် ကကွၢ်လိအီၤ. အဃိ စီၤပီလူး ဟံးစုနဲၣ်ကျဲ တၢ်အိၣ်ဖှိၣ်ဒ်လဲၣ်.

၅. စီၤပီလူး ဟံးစုနဲၣ်ကျဲ တၢ်အိၣ်ဖှိၣ်ဖိဒ်လဲၣ် ဒီးအအဲၣ်ဒိးတဲဝဲ အခီပညီဒ်လဲၣ်. (၁ ကရံၣ်သူး ၅:၁၃) (ကွၢ်စ့ၢ်ကီးတၢ်ဂီၤ.)

^၅ ဖး ၁ ကရံၣ်သူး ၅:၁၃. ယဟိဝၤယွၤ ဟံးစုနဲၣ်ကျဲ စီၤပီလူးလၢ အကကွဲးလံာ်လၢ တၢ်အိၣ်ဖှိၣ်ဖိလၢ ဝ့ၢ်ကရံၣ်သူး ဒီးတဲဘၣ်အဝဲသ့ၣ်လၢ ပှၤမၤတၢ်ကမၣ်ဖးဒိၣ်တဂၤ မ့ၢ်တပီၢ်ယၢ်လီၤက့ၤသးဘၣ်န့ၣ် ပှၤကဘၣ် ထုးထီၣ်ကွံာ်အီၤ လၢတၢ်အိၣ်ဖှိၣ်အပူၤ. မ့မ့ၢ်ဒ်န့ၣ်န့ၣ် တၢ်အိၣ်ဖှိၣ်ဖိ ကဘၣ်ရ့ဒီးအီၤဒ်လဲၣ်. စီၤပီလူး ဟံးစုနဲၣ်ကျဲ အဝဲသ့ၣ်လၢ “တဘၣ်ရ့လိာ်သုသးဒီး အီၤတဂ့ၤ.” ဒီးအအဲၣ်ဒိး တဲစ့ၢ်ကီးဝဲလၢ တဘၣ် “အီၣ်သကိးတၢ်ဒီး ပှၤဒ်န့ၣ်တဂၤဒၣ်လဲာ်တဂ့ၤ.” (၁ ကရံၣ် ၅:၁၁) အဒိ ပမ့ၢ်အီၣ်သကိးတၢ်ဒီး ပှၤတဂၤဂၤန့ၣ် ပကတဲသကိးတၢ်ဒီးအီၤ ဒီးပတၢ်ရ့လိာ်သး ကဘူးဒိၣ်ထီၣ်. အဃိ စီၤပီလူး ပာ်ဖျါထီၣ်ဝဲ လီၤတံၢ်လီၤဆဲးလၢ တၢ်အိၣ်ဖှိၣ်ဖိ တဘၣ်ရ့ဒီး ပှၤမၤတၢ်ကမၣ်ဖးဒိၣ်တဂၤအံၤ နီတစဲးဘၣ်. အဝဲသ့ၣ် မ့ၢ်တရ့ဒီး ပှၤတဂၤအံၤ ဘူးဘူးဘၣ်န့ၣ် ကကဲထီၣ် တၢ်ဒီသဒၢလၢ အဝဲသ့ၣ်အဂီၢ်. (၁ ကရံၣ် ၅:၅-၇) တကးဒံးဘၣ် ပှၤမၤတၢ်ကမၣ်တဂၤအံၤ ကသ့ၣ်ညါလီၤအသးလၢ အမၤကမၣ်ဘၣ်တၢ် ဖးဒိၣ်ညါအဃိ ဘၣ်သ့ၣ်သ့ၣ် အကသးအုး ဒီးကပီၢ်ယၢ်လီၤက့ၤအသး.

၆. ဖဲတၢ်အိၣ်ဖှိၣ်ဖိ ဒိးန့ၢ်ဘၣ် စီၤပီလူးအလံာ်ပရၢအခါ အဝဲသ့ၣ် မၤထွဲဝဲဒ်လဲၣ် ဒီးတၢ်ဟံးစုနဲၣ်ကျဲအံၤ ကဲဘျုးလၢ ပှၤမၤတၢ်ကမၣ်တဂၤ အဂီၢ်ဒ်လဲၣ်.

^၆ စီၤပီလူး ဆှၢလီၤလံာ်ပရၢလၢ ခရံာ်ဖိလၢအအိၣ်လၢ ဝ့ၢ်ကရံၣ်သူးအပူၤ ဝံၤအလီၢ်ခံ အကဆိကမိၣ်ဘၣ်ဝဲလၢ မ့ၢ်တၢ်အိၣ်ဖှိၣ်ဖိ ကမၤထွဲ အတၢ်ဟံးစုနဲၣ်ကျဲဧါ. လၢခံ စီၤတံတူး တဲဘၣ် စီၤပီလူး တၢ်ကစီၣ်လၢ အလီၤသးခုဒိၣ်မး. တၢ်အိၣ်ဖှိၣ်ဖိတဖၣ် မၤထွဲဝဲစီၤပီလူး အတၢ်ဟံးစုနဲၣ်ကျဲအဃိ အဝဲသ့ၣ်ထုးထီၣ်ကွံာ် ပှၤမၤတၢ်ကမၣ်တဂၤအံၤလၢ တၢ်အိၣ်ဖှိၣ်အပူၤ. (၂ ကရံၣ် ၇:၆, ၇) တကးဒံးဘၣ် လၢခံ တယံာ်ဘၣ်န့ၣ် ပှၤမၤတၢ်ကမၣ်တဂၤအံၤ ပီၢ်ယၢ်လီၤက့ၤအသး. အဆီတလဲကွံာ် အလုၢ်လၢ်သကဲာ်ပဝး ဒီးအတၢ်ပာ်သူၣ်ပာ်သး ဒီးအအိၣ်မူက့ၤဒ် ယဟိဝၤယွၤ တၢ်သိၣ်တၢ်သီအသိး. (၂ ကရံၣ် ၇:၈-၁၁) ခဲအံၤ စီၤပီလူး ကဆဲးဟံးစုနဲၣ်ကျဲ တၢ်အိၣ်ဖှိၣ်ဖိဒ်လဲၣ်.

တၢ်အိၣ်ဖှိၣ်ဖိ ကဘၣ်ရ့ဒီး ပှၤလၢအပီၢ်ယၢ်လီၤက့ၤသးတဂၤ ဒ်လဲၣ်

၇. ပှၤမၤတၢ်ကမၣ်တဂၤအံၤ ပှၤထုးထီၣ်ကွံာ်အီၤလၢ တၢ်အိၣ်ဖှိၣ်အပူၤ ဝံၤအလီၢ်ခံ အသ့ၣ်ညါလီၤသးလၢ အကဘၣ်မၤ မနုၤလဲၣ်. (၂ ကရံၣ်သူး ၂:၅-၈)

^၇ ဖး ၂ ကရံၣ်သူး ၂:၅-၈. စီၤပီလူး တဲဝဲလၢ “တၢ်စံၣ်ညီၣ်လၢ သုအါတက့ၢ် ဟ့ၣ်အီၤန့ၣ် လၢပှဲၤလၢ ပှၤဒ်န့ၣ်အသိးတဂၤ အဂီၢ်လံ.” ပမ့ၢ်တဲလၢ အဂၤတမံၤန့ၣ် ပှၤမၤတၢ်ကမၣ်တဂၤအံၤ ပှၤထုးထီၣ်ကွံာ်အီၤလၢ တၢ်အိၣ်ဖှိၣ်အပူၤ ဝံၤအလီၢ်ခံ အသ့ၣ်ညါလီၤသးလၢ အကဘၣ် ပီၢ်ယၢ်လီၤက့ၤသး. ဒီးခီဖျိလၢ အပီၢ်ယၢ်လီၤက့ၤသးအဃိ ပှၤတဘၣ်ဆဲး သိၣ်က့ၤသီက့ၤအီၤလၢၤဘၣ်.—ဧ့ၤ ၁၂:၁၁.

၈. စီၤပီလူး ဆဲးဟံးစုနဲၣ်ကျဲ တၢ်အိၣ်ဖှိၣ်ဖိဒ်လဲၣ်.

^၈ ပှၤမၤတၢ်ကမၣ်တဂၤအံၤ ပီၢ်ယၢ်လီၤက့ၤသးအဃိ စီၤပီလူးတဲဘၣ် တၢ်အိၣ်ဖှိၣ်သးပှၢ်လၢ ကတူၢ်လိာ်က့ၤအီၤလၢ တၢ်အိၣ်ဖှိၣ်အပူၤ. စီၤပီလူး ဟံးစုနဲၣ်ကျဲ တၢ်အိၣ်ဖှိၣ်ဖိလၢ ပှၤလၢအပီၢ်ယၢ်လီၤက့ၤသး တဂၤန့ၣ် အဝဲသ့ၣ် “ကြၢးပျၢ်အတၢ်ကမၣ် လၢသးဒီဖျၢၣ် ဒီးမၤမုာ်ထီၣ်က့ၤအီၤ.” ဒီးအတဲစ့ၢ်ကီး အဝဲသ့ၣ်လၢ “ကပာ်ဖျါထီၣ် [အ] တၢ်အဲၣ်လၢ ပှၤတဂၤန့ၣ်အဖီခိၣ်.” စီၤပီလူး အဲၣ်ဒိးလၢ ဒီပုၢ်ဝဲၢ်မုၣ်ခွါ ကတူၢ်လိာ်က့ၤ ပှၤလၢအပီၢ်ယၢ်လီၤက့ၤသး တဂၤအံၤခီဖျိ တၢ်လၢအဝဲသ့ၣ် တဲဝဲဒီးမၤဝဲ ဒီးကပာ်ဖျါထီၣ်လၢ အဝဲသ့ၣ် အဲၣ်ဒီပုၢ်ဝဲၢ်တဂၤအံၤ ဒီးပျၢ်အတၢ်ကမၣ်နီၢ်ကီၢ်. ခီဖျိလၢ အဝဲသ့ၣ် မၤဝဲဒ်အံၤအဃိ ပှၤလၢအပီၢ်ယၢ်လီၤက့ၤသး တဂၤန့ၣ် ကသးခုလၢ အဟဲက့ၤနုာ်လီၤဘၣ်လၢ တၢ်အိၣ်ဖှိၣ်အပူၤ.

၉. ဘၣ်မနုၤအဃိ တၢ်အိၣ်ဖှိၣ်ဖိတနီၤ တဘၣ်သးပျၢ်ကွံာ် ပှၤလၢအပီၢ်ယၢ်လီၤက့ၤသးတဂၤ အတၢ်ကမၣ်ဘၣ်လဲၣ်.

^၉ ပှၤတနီၤလၢ တၢ်အိၣ်ဖှိၣ်ပူၤန့ၣ် ဖဲအဝဲသ့ၣ်ထံၣ်လၢ ပှၤတူၢ်လိာ်က့ၤ ပှၤမၤတၢ်ကမၣ်လၢ အပီၢ်ယၢ်လီၤက့ၤသး တဂၤအံၤအခါ ဘၣ်သ့ၣ်သ့ၣ် ကကီလၢအဝဲသ့ၣ် ကတူၢ်လိာ်ဝဲ. ဘၣ်မနုၤအဃိ ပတဲဒ်န့ၣ်လဲၣ်. ဘၣ်သ့ၣ်သ့ၣ် တၢ်အိၣ်ဖှိၣ်ဖိတနီၤန့ၣ် ကသးထီၣ်ဒံးအီၤ ခီဖျိလၢ အမၤဟးဂီၤ တၢ်အိၣ်ဖှိၣ်အမံၤ ဒီးတၢ်လၢအမၤဝဲန့ၣ် ဘၣ်ဒိဃုာ်ဒီး အဝဲသ့ၣ်အဃိ. ဒီးမ့မ့ၢ်အဂၤတနီၤ ကတူၢ်ဘၣ်ဝဲလၢ ဒ်သိး တၢ်အိၣ်ဖှိၣ် ကကဆှီအဂီၢ် အဝဲသ့ၣ် ဘၣ်ဂုာ်ကျဲးစၢးမၤထွဲ ကစၢ်ယွၤ အတၢ်မၤလိာ်. အဃိ ဖဲပှၤတူၢ်လိာ်က့ၤ ပှၤလၢအပီၢ်ယၢ်လီၤက့ၤသး တဂၤအံၤအခါ အဝဲသ့ၣ်တနီၤ ကဆိကမိၣ်ဝဲလၢ အတကြၢးဘၣ်. (ထိၣ်သတြီၤဒီး လူၤကၣ် ၁၅:၂၈-၃၀.) ဘၣ်မနုၤအဃိ အရ့ဒိၣ်လၢ တၢ်အိၣ်ဖှိၣ်ဖိတဖၣ် ကပာ်ဖျါထီၣ် တၢ်အဲၣ်နီၢ်ကီၢ်လၢ ဒီပုၢ်ဝဲၢ်လၢ အပီၢ်ယၢ်လီၤက့ၤသး တဂၤအံၤ အဖီခိၣ်လဲၣ်.

၁၀-၁၁. တၢ်အိၣ်ဖှိၣ်သးပှၢ်တဖၣ် မ့ၢ်တအဲၣ်ဒိးပျၢ်ကွံာ် ပှၤလၢအပီၢ်ယၢ်လီၤက့ၤသးတဂၤ အတၢ်ကမၣ်ဘၣ်န့ၣ် တၢ်ကကဲထီၣ်သးဒ်လဲၣ်.

^၁၀ တၢ်အိၣ်ဖှိၣ်သးပှၢ် မ့တမ့ၢ် တၢ်အိၣ်ဖှိၣ်ဖိ မ့ၢ်တပာ်ဖျါထီၣ်တၢ်အဲၣ် ဒီးတူၢ်လိာ်က့ၤ ပှၤလၢအပီၢ်ယၢ်လီၤက့ၤသး တဂၤအံၤဘၣ်န့ၣ် အကတူၢ်ဘၣ်ဝဲဒ်လဲၣ်. စီၤပီလူး တဲဝဲလၢ ပှၤလၢအပီၢ်ယၢ်လီၤက့ၤသး တဂၤအံၤ အက “သးအုး တုၤဒၣ်လဲာ် အတူၢ်ၡူအသး.” ဒီးအကတူၢ်ဘၣ်ဝဲလၢ အမၤ ယဟိဝၤယွၤအတၢ်မၤ တန့ၢ်လၢၤဘၣ်. အကဆိကမိၣ်ဘၣ်ဝဲလၢ ယဟိဝၤယွၤ တပျၢ်ကွံာ်အတၢ်ကမၣ်ဘၣ်အဃိ အတလိၣ် မၤဂ့ၤထီၣ်က့ၤ အတၢ်ရ့လိာ်သးဒီး ယဟိဝၤယွၤလၢၤဘၣ်.

^၁၁ ဒီပုၢ်ဝဲၢ်မုၣ်ခွါတဖၣ် မ့ၢ်တအဲၣ်ဒိးပျၢ်ကွံာ် ပှၤလၢအပီၢ်ယၢ်လီၤက့ၤသးတဂၤ အတၢ်ကမၣ်ဘၣ်န့ၣ် တၢ်ကကဲထီၣ်သးဒ်လဲၣ်. အဝဲသ့ၣ် ကမၤဟးဂီၤ အနီၢ်ကစၢ် တၢ်ရ့လိာ်သးဒီး ယဟိဝၤယွၤ. အဝဲသ့ၣ် တကွၢ်လိ ယဟိဝၤယွၤလၢ အပျၢ်ကွံာ် ပှၤလၢအပီၢ်ယၢ်လီၤက့ၤသး တဂၤန့ၣ် အတၢ်ကမၣ်ဘၣ်. အဝဲသ့ၣ် ကကွၢ်လိလၢ မုၣ်ကီၤလံၢ် ဒီးတပာ်ဖျါထီၣ် တၢ်သးကညီၤဘၣ်. အဃိ လီၤဂာ်ဒ်သိးဒီး အဝဲသ့ၣ်ပျဲလၢ မုၣ်ကီၤလံၢ် ကသူအဝဲသ့ၣ်လၢ ကမၤလီၤစၢ် ပှၤလၢအပီၢ်ယၢ်လီၤက့ၤသး တဂၤန့ၣ်အသး ဒ်သိးအတမၤ ယဟိဝၤယွၤ အတၢ်မၤလၢၤတဂ့ၤအဂီၢ်.—၂ ကရံၣ် ၂:၁၀, ၁၁; အ့း ၄:၂၇.

၁၂. တၢ်အိၣ်ဖှိၣ်ဖိတဖၣ် ကွၢ်လိယဟိဝၤယွၤ ကသ့ဒ်လဲၣ်.

^၁၂ တၢ်အိၣ်ဖှိၣ်ဖိလၢ ဝ့ၢ်ကရံၣ်သူးအပူၤန့ၣ် ကွၢ်လိယဟိဝၤယွၤ ကသ့ဒ်လဲၣ်. အဝဲသ့ၣ် ကွၢ်လိ ယဟိဝၤယွၤ သ့ခီဖျိ အပျၢ်ကွံာ် ပှၤလၢအပီၢ်ယၢ်လီၤက့ၤသးတဂၤ အတၢ်ကမၣ်. ဘၣ်ဃးဒီး ယဟိဝၤယွၤ ပျၢ်ကွံာ်တၢ်ကမၣ်အဂ့ၢ်န့ၣ် ပှၤကွဲးလံာ်စီဆှံတနီၤ တဲဝဲဒ်လဲၣ်. စီၤဒၤဝံး တဲဝဲလၢ ယဟိဝၤယွၤ “မ့ၢ်ပှၤလၢအဂ့ၤ ဒီးပျၢ်ကွံာ်တၢ်ကမၣ်ညီ.” (စံး ၈၆:၅) ဝံမံကၤ တဲဝဲလၢ “ကစၢ်ယွၤဧၢ, ယွၤလၢအလီၤဂာ်ဒီးနၤ တအိၣ်နီတဂၤဘၣ် . . . နပျၢ်ကွံာ် အဝဲသ့ၣ် အတၢ်ကမၣ် ဒီးနတသ့ၣ်နီၣ်ထီၣ် အဝဲသ့ၣ် အတၢ်ဒဲးဘးဘၣ်.” (မံ ၇:၁၈) ဒီးဝံယၡါယၤ တဲဝဲလၢ “မ်ပှၤအၢပှၤသီ ဃၣ်ကွံာ်အသးလၢ အကျဲအၢကျဲသီတက့ၢ်. မ်ပှၤအၢပှၤသီ သုတဆိကမိၣ် တၢ်အၢတၢ်သီလၢၤတဂ့ၤ. မ်အဟဲက့ၤကဒါက့ၤလၢ ယဟိဝၤယွၤ လၢအကသးကညီၤအီၤ တဂၤန့ၣ်အအိၣ်တက့ၢ်. ပကစၢ်ယွၤ ကပျၢ်ကွံာ် အဝဲသ့ၣ်အတၢ်ကမၣ် လၢာ်လၢာ်ဆ့ဆ့အဃိ မ်အဝဲသ့ၣ်ဟဲက့ၤလၢ အအိၣ်တက့ၢ်.”—ၡါ ၅၅:၇.

၁၃. ပှၤလၢအပီၢ်ယၢ်လီၤက့ၤသး တဂၤန့ၣ် ဘၣ်မနုၤအဃိ ပှၤကဘၣ် တူၢ်လိာ်က့ၤအီၤ လၢတၢ်အိၣ်ဖှိၣ်အပူၤလဲၣ်. (ကွၢ်တၢ်လွံၢ်နၢၣ် လၢအခိၣ်တီမ့ၢ် “ပိာ်ခွါလၢ အမၤဘၣ်တၢ်ကမၣ် တဂၤန့ၣ် ပှၤတူၢ်လိာ်က့ၤအီၤ လၢအခါဖဲလဲၣ်.”)

^၁၃ ဒ်သိး တၢ်အိၣ်ဖှိၣ်ဖိလၢ ဝ့ၢ်ကရံၣ်သူးအပူၤ ကကွၢ်လိ ယဟိဝၤယွၤအဂီၢ် အဝဲသ့ၣ် ကဘၣ်တူၢ်လိာ်မုာ်က့ၤ ဒီးပာ်ဖျါထီၣ်တၢ်အဲၣ်လၢ ပှၤလၢအပီၢ်ယၢ်လီၤက့ၤသး တဂၤန့ၣ်အဖီခိၣ်. အဝဲသ့ၣ် မၤထွဲ စီၤပီလူး အတၢ်ဟံးစုနဲၣ်ကျဲအဃိ အဝဲသ့ၣ် ပာ်ဖျါထီၣ်လၢ အအိၣ်ဒီး “တၢ်ဒိကနၣ်လၢ တၢ်ခဲလၢာ်အပူၤ.” (၂ ကရံၣ် ၂:၉) ပှၤလၢအမၤဘၣ် တၢ်ကမၣ်ဖးဒိၣ် တဂၤအံၤ ပှၤထုးထီၣ်ကွံာ်အီၤလၢ တၢ်အိၣ်ဖှိၣ်အပူၤ ထဲစှၤကိာ်လါ သနာ်က့ အပီၢ်ယၢ်လီၤက့ၤသးအဃိ တၢ်အိၣ်ဖှိၣ်သးပှၢ်တဖၣ် တလိၣ်ထုးယံာ် တၢ်ဆၢကတီၢ်လၢ ကတူၢ်လိာ်က့ၤအီၤလၢ တၢ်အိၣ်ဖှိၣ်အပူၤဘၣ်.

ကွၢ်လိ ယဟိဝၤယွၤ အတၢ်တီတၢ်လိၤ ဒီးအတၢ်သးကညီၤ

၁၄-၁၅. တၢ်ကဲထီၣ်သးဒီး တၢ်အိၣ်ဖှိၣ်လၢ ဝ့ၢ်ကရံၣ်သူးအပူၤ ဒီးပှၤမၤဘၣ်ဂီၢ်က့ၤဝဲ အဂ့ၢ်န့ၣ် ပဒိးန့ၢ်ဘၣ် တၢ်မၤလိဒ်လဲၣ်. (၂ ပ့းတရူး ၃:၉) (ကွၢ်စ့ၢ်ကီးတၢ်ဂီၤ.)

^၁၄ တၢ်ကဲထီၣ်သးဒီး တၢ်အိၣ်ဖှိၣ်လၢ ဝ့ၢ်ကရံၣ်သူးအပူၤ ဒီးပှၤမၤဘၣ်ဂီၢ်က့ၤဝဲ အဂ့ၢ်န့ၣ် ယဟိဝၤယွၤ မၢပှၤကွဲးလီၤဝဲလၢ လံာ်စီဆှံအပူၤ ဒ်သိး “ကသိၣ်လိပှၤအဂီၢ်.” (ရိ ၁၅:၄) ပမၤလိဘၣ်လၢ ပှၤမၤတၢ်ကမၣ်ဖးဒိၣ်လၢ အတပီၢ်ယၢ်လီၤက့ၤသးဘၣ်န့ၣ် ယဟိဝၤယွၤ တပျဲလၢ အကဆဲးအိၣ်လၢ တၢ်အိၣ်ဖှိၣ်အပူၤဘၣ်. ပှၤတနီၤ ကဆိမိၣ်ဝဲလၢ ယဟိဝၤယွၤန့ၣ် အအိၣ်ဒီး တၢ်သးကညီၤအဃိ အကပျဲလၢ ပှၤလၢတပီၢ်ယၢ်လီၤက့ၤသးဘၣ် တဂၤန့ၣ် ကဆဲးအိၣ်လၢ တၢ်အိၣ်ဖှိၣ်အပူၤ. သနာ်က့ ယဟိဝၤယွၤ တမၤဝဲ ဒ်န့ၣ်ဘၣ်. ပသ့ၣ်ညါလၢ ယဟိဝၤယွၤန့ၣ် အအိၣ်ဒီး တၢ်သးကညီၤ ဘၣ်ဆၣ် အတတူၢ်လိာ် လုၢ်လၢ်သကဲာ်ပဝး ခဲလၢာ်ဘၣ်. ဒီးအတၢ်သိၣ်တၢ်သီ ဘၣ်ဃးဒီး တၢ်အဘၣ် ဒီးတၢ်အကမၣ်န့ၣ် အတဆီတလဲဝဲ နီတဘျီဘၣ်. (ယူ ၄) ယဟိဝၤယွၤ မ့ၢ်ပျဲလၢ ပှၤလၢအတပီၢ်ယၢ်လီၤက့ၤသးတဂၤ ဆဲးအိၣ်လၢ တၢ်အိၣ်ဖှိၣ်အပူၤန့ၣ် ကကဲထီၣ် တၢ်လီၤဘၣ်ယိၣ်လၢ တၢ်အိၣ်ဖှိၣ်ဖိ အဂၤအဂီၢ် ဒီးအတပာ်ဖျါထီၣ် တၢ်သးကညီၤဘၣ်.—ကတိၤ ၁၃:၂၀; ၁ ကရံၣ် ၁၅:၃၃.

^၁၅ ပသ့ၣ်ညါဘၣ်လၢ ယဟိဝၤယွၤ တအဲၣ်ဒိးလၢ ပှၤကဟးဂီၤ နီတဂၤဘၣ်အဃိ အဂုာ်ကျဲးစၢး မၤစၢၤပှၤကိးဂၤဒဲး. ပှၤလၢအပီၢ်ယၢ်လီၤက့ၤသး ဒီးအဆီတလဲကွံာ် အလုၢ်လၢ်သကဲာ်ပဝး ဒ်သိး အကကဲထီၣ်က့ၤ ယဟိဝၤယွၤ အသကိးန့ၣ် ယဟိဝၤယွၤ ပာ်ဖျါထီၣ် တၢ်သးကညီၤလၢ အဖီခိၣ်. (ဃ့း ၃၃:၁၁; ဖး ၂ ပ့းတရူး ၃:၉.) အဒိ ဖဲပိာ်ခွါလၢ အမၤတၢ်ကမၣ်တဂၤန့ၣ် ပီၢ်ယၢ်လီၤက့ၤသး ဒီးဆီတလဲကွံာ် အလုၢ်လၢ်သကဲာ်ပဝးအခါ ယဟိဝၤယွၤ တဲဘၣ် တၢ်အိၣ်ဖှိၣ်ဖိလၢ အအိၣ်လၢ ဝ့ၢ်ကရံၣ်သူးအပူၤလၢ ကပျၢ်ကွံာ် အတၢ်ကမၣ် ဒီးတူၢ်လိာ်က့ၤအီၤလၢ တၢ်အိၣ်ဖှိၣ်အပူၤ.

၁၆. တၢ်ကဲထီၣ်သးဒီး တၢ်အိၣ်ဖှိၣ်လၢ ဝ့ၢ်ကရံၣ်သူးအပူၤန့ၣ် သိၣ်လိပှၤ ယဟိဝၤယွၤ အဂ့ၢ်ဒ်လဲၣ်.

^၁၆ တၢ်ကဲထီၣ်သးဒီး တၢ်အိၣ်ဖှိၣ်လၢ ဝ့ၢ်ကရံၣ်သူးအပူၤန့ၣ် ပာ်ဖျါထီၣ်န့ၢ်ပှၤလၢ ယဟိဝၤယွၤန့ၣ် အအိၣ်ဒီးတၢ်အဲၣ်, အမၤတၢ် တီတီလိၤလိၤ ဒီးအမၤတၢ်လၢ အဘၣ်ထီဘိ. (စံး ၃၃:၅) ပသ့ၣ်ညါဘၣ် တၢ်ဂ့ၢ်အံၤအဃိ မၤစၢၤပှၤလၢ ပကစံးထီၣ်ပတြၢၤ ယဟိဝၤယွၤ အါန့ၢ်အလီၢ်. ပကဲပှၤတၢ်ဒဲးဘးဖိ ဘၣ်ဆၣ် ယဟိဝၤယွၤ သးကညီၤပှၤ ဒီးပျၢ်ကွံာ် ပတၢ်ကမၣ်အဃိ ပသးခုဒိၣ်မး. တကးဒံးဘၣ် ဒ်သိး ယဟိဝၤယွၤ ကပျၢ်ကွံာ် ပတၢ်ဒဲးဘးအဂီၢ် အရဲၣ်ကျဲၤန့ၢ်ပှၤ တၢ်ပှ့ၤက့ၤအဃိ ပစံးဘျုးအီၤဒိၣ်မး. ပသ့ၣ်ညါဘၣ်လၢ ယဟိဝၤယွၤ အဲၣ်အပှၤဂီၢ်မုၢ် ဒီးအဲၣ်ဒိးဟ့ၣ်အဝဲသ့ၣ် တၢ်အဂ့ၤကတၢၢ်အဃိ ပသးမုာ်ညါ.

၁၇. တၢ်မၤလိ လၢခံတခါန့ၣ် ပကတဲသကိး တၢ်ဂ့ၢ်မနုၤလဲၣ်.

^၁၇ ဆၢကတီၢ်ခဲအံၤ ပှၤမ့ၢ်မၤဘၣ် တၢ်ကမၣ်ဖးဒိၣ်န့ၣ် တၢ်အိၣ်ဖှိၣ်သးပှၢ်တဖၣ် ကွၢ်လိယဟိဝၤယွၤ အတၢ်အဲၣ် ဒီးမၤစၢၤအီၤလၢ အကပီၢ်ယၢ်လီၤက့ၤသး ကသ့ဒ်လဲၣ်. ဖဲတၢ်အိၣ်ဖှိၣ်သးပှၢ်တဖၣ် ဆၢတဲာ်ဝဲလၢ ကထုးထီၣ်ကွံာ် မ့တမ့ၢ် ကတူၢ်လိာ်က့ၤ ပှၤလၢအပီၢ်ယၢ်လီၤက့ၤသး တဂၤလၢ တၢ်အိၣ်ဖှိၣ်အပူၤအခါ တၢ်အိၣ်ဖှိၣ်ဖိတဖၣ် ကဘၣ်အိၣ်ဒီး တၢ်ထံၣ်ဒ်လဲၣ်. တၢ်သံကွၢ်တဖၣ်အံၤ အတၢ်စံးဆၢန့ၣ် ပကတဲသကိးလၢ တၢ်မၤလိ လၢခံတခါ.