တၢ်မၤလိ ၃၄
တၢ်သးဝံၣ် ၁၀၇ ယွၤပာ်လီၤအဒိလၢအပှဲၤဒီးတၢ်အဲၣ်
တၢ်အိၣ်ဖှိၣ်သးပှၢ်တဖၣ် ပာ်ဖျါထီၣ်တၢ်အဲၣ် ဒီးတၢ်သးကညီၤလၢ ပှၤမၤတၢ်ကမၣ် အဖီခိၣ်ဒ်လဲၣ်
“ကစၢ်ယွၤ . . . အဲၣ်ဒိးမၤစၢၤနၤ ဒ်သိးနကပီၢ်ယၢ်လီၤက့ၤသး.”—ရိ ၂:၄.
တၢ်ဂ့ၢ်မိၢ်ပှၢ်
လၢတၢ်မၤလိအံၤ ပကသ့ၣ်ညါဘၣ်လၢ တၢ်အိၣ်ဖှိၣ်သးပှၢ်တဖၣ် ဂုာ်ကျဲးစၢးမၤစၢၤဝဲ ပှၤမၤတၢ်ကမၣ်ဖးဒိၣ်တဂၤ ကသ့ဒ်လဲၣ်.
၁. ပှၤတနီၤလၢ အမၤဘၣ် တၢ်ကမၣ်ဖးဒိၣ်န့ၣ် အတၢ်မုၢ်လၢ်အိၣ်ဒံးဧါ.
တၢ်မၤလိလၢ အပူၤကွံာ်တခါန့ၣ် ပမၤလိဘၣ်လၢ စီၤပီလူး တဲဘၣ် တၢ်အိၣ်ဖှိၣ်ဖိလၢ ဝ့ၢ်ကရံၣ်သူးအပူၤ ဘၣ်ဃးဒီး ဖဲပှၤတဂၤ မၤတၢ်ကမၣ်ဖးဒိၣ်အခါ အဝဲသ့ၣ် ကဘၣ်ရဲၣ်ကျဲၤဝဲဒ်လဲၣ်. ပှၤမၤတၢ်ကမၣ်ဖးဒိၣ်တဂၤ တပီၢ်ယၢ်လီၤက့ၤသးဘၣ်အဃိ ပှၤထုးထီၣ်ကွံာ်အီၤလၢ တၢ်အိၣ်ဖှိၣ်အပူၤ. ဘၣ်ဆၣ် ဒ်လံာ်စီဆှံအဆၢလၢ တၢ်မၤလိတခါအံၤအဂီၢ် ပာ်ဖျါဝဲအသိး ပှၤတနီၤလၢ အမၤဘၣ် တၢ်ကမၣ်ဖးဒိၣ်န့ၣ် ဒ်သိးအကပီၢ်ယၢ်လီၤက့ၤသးအဂီၢ် ကစၢ်ယွၤမၤစၢၤအီၤသ့. (ရိ ၂:၄) အဃိ ယဟိဝၤယွၤ သူတၢ်အိၣ်ဖှိၣ်သးပှၢ် ဒ်သိး ကမၤစၢၤ ပှၤမၤတၢ်ကမၣ်ဖးဒိၣ်လၢ ကပီၢ်ယၢ်လီၤက့ၤသးဒ်လဲၣ်.
၂-၃. ပမ့ၢ်သ့ၣ်ညါလၢ ဒီပုၢ်ဝဲၢ်တဂၤဂၤ မၤဘၣ်တၢ်ကမၣ်ဖးဒိၣ်န့ၣ် ပကဘၣ်မၤဒ်လဲၣ် ဒီးဘၣ်မနုၤအဃိလဲၣ်.
၂ တၢ်အိၣ်ဖှိၣ်သးပှၢ်တဖၣ် မ့ၢ်တသ့ၣ်ညါလၢ ပှၤတဂၤ မၤဘၣ်တၢ်ကမၣ်ဖးဒိၣ်ဘၣ်န့ၣ် အဝဲသ့ၣ် မၤစၢၤအီၤတသ့ဘၣ်. ပမ့ၢ်သ့ၣ်ညါလၢ ဒီပုၢ်ဝဲၢ်တဂၤဂၤ မၤဘၣ်တၢ်ကမၣ်ဖးဒိၣ် တုၤလၢ ပှၤကထုးထီၣ်ကွံာ်အီၤလၢ တၢ်အိၣ်ဖှိၣ်အပူၤန့ၣ် ပကဘၣ်မၤဒ်လဲၣ်. အဆိကတၢၢ်န့ၣ် ပကြၢးဟ့ၣ်ဂံၢ်ဟ့ၣ်ဘါအီၤလၢ အကလဲၤတဲတၢ်ဒီး တၢ်အိၣ်ဖှိၣ်သးပှၢ် ဒီးဃ့တၢ်မၤစၢၤ.—ၡါ ၁:၁၈; မၤတၢ် ၂၀:၂၈; ၁ ပ့း ၅:၂.
၃ ဘၣ်ဆၣ် အဝဲသ့ၣ် မ့ၢ်တဘၣ်သး လဲၤတဲတၢ်ဒီး တၢ်အိၣ်ဖှိၣ်သးပှၢ် ဒီးဃ့တၢ်မၤစၢၤဘၣ်မီၤ, ပကဘၣ်မၤဒ်လဲၣ်. ဒ်သိး ပှၤမၤတၢ်ကမၣ်ဖးဒိၣ်တဂၤအံၤ ကဒိးန့ၢ်ဘၣ် တၢ်မၤစၢၤအဂီၢ် ပကဘၣ်လဲၤတဲပၠး တၢ်အိၣ်ဖှိၣ်သးပှၢ်. ပမၤဒ်အံၤ ခီဖျိလၢ ပသ့ၣ်ညါလၢ တၢ်အိၣ်ဖှိၣ်သးပှၢ်တဖၣ် မၤစၢၤအီၤသ့ ဒီးပအဲၣ်အီၤ. တကးဒံးဘၣ် ပှၤမၤတၢ်ကမၣ်ဖးဒိၣ်တဂၤ မ့ၢ်တဆီတလဲအသးဘၣ်န့ၣ် အတၢ်ရ့လိာ်သးဒီး ယဟိဝၤယွၤ ကဟးဂီၤဒိၣ်ထီၣ်. ဒီးပှၤတၢ်ချၢ မ့ၢ်သ့ၣ်ညါ ဘၣ်ဃးဒီး တၢ်လၢအမၤဝဲန့ၣ် ဘၣ်သ့ၣ်သ့ၣ် အဝဲသ့ၣ် ကတဲဟးဂီၤ ယဟိဝၤယွၤ ဒီးအပှၤဂီၢ်မုၢ်အဂ့ၢ်. ခီဖျိလၢ ပအဲၣ်ယဟိဝၤယွၤ ဒီးပဒီပုၢ်ဝဲၢ်လၢ အမၤဘၣ်တၢ်ကမၣ်အဃိ မ့ၢ်တညီလၢပဂီၢ်ဘၣ် သနာ်က့ ပဘၣ်အိၣ်ဒီး တၢ်သးဒူ ဒီးလဲၤတဲဘၣ် တၢ်အိၣ်ဖှိၣ်သးပှၢ်.—စံး ၂၇:၁၄.
ပှၤလၢ အမၤတၢ်ကမၣ်ဖးဒိၣ်န့ၣ် တၢ်အိၣ်ဖှိၣ်သးပှၢ်တဖၣ် ကဘၣ်မၤစၢၤအီၤဒ်လဲၣ်
၄. ဖဲတၢ်အိၣ်ဖှိၣ်သးပှၢ် ကမံးတံာ် ထံၣ်လိာ်အသးဒီး ပှၤမၤတၢ်ကမၣ်ဖးဒိၣ် တဂၤအခါ အဝဲသ့ၣ် အတၢ်တိာ်ပာ် မ့ၢ်မနုၤလဲၣ်.
၄ လၢတၢ်အိၣ်ဖှိၣ်အပူၤ ပှၤတဂၤ မ့ၢ်မၤတၢ်ကမၣ်ဖးဒိၣ်န့ၣ် တၢ်အိၣ်ဖှိၣ်သးပှၢ်ကရူၢ် ကဃုထၢဝဲ တၢ်အိၣ်ဖှိၣ်သးပှၢ်သၢဂၤ လၢကကဲ တၢ်အိၣ်ဖှိၣ်သးပှၢ် ကမံးတံာ်. ဒီးအဝဲသ့ၣ် ကလဲၤထံၣ်လိာ်သးဒီး ပှၤမၤတၢ်ကမၣ်တဂၤန့ၣ်.a တၢ်အိၣ်ဖှိၣ်သးပှၢ် ကမံးတံာ်အံၤ ကဘၣ်အိၣ်ဒီး တၢ်ဆီၣ်လီၤသး ဒီးကဘၣ် ဂုာ်ကျဲးစၢးမၤစၢၤ ပှၤမၤတၢ်ကမၣ်တဂၤ ဒ်သိးအကပီၢ်ယၢ်လီၤက့ၤသးအဂီၢ်. ဘၣ်ဆၣ် အဝဲသ့ၣ် သ့ၣ်ညါစ့ၢ်ကီးလၢ အတဘၣ်မၢဆူၣ် ပှၤတဂၤအံၤလၢ ကဆီတလဲအသးဘၣ်. (၅ မိၤ ၃၀:၁၉) အဝဲသ့ၣ် သ့ၣ်ညါဝဲလၢ ပှၤမၤတၢ်ကမၣ်တဖၣ်န့ၣ် တပီၢ်ယၢ်လီၤက့ၤသး ဒ်စီၤပၤဒၤဝံးအသိး ကိးဂၤဒဲးဘၣ်. (၂ မူၤ ၁၂:၁၃) ပှၤမၤတၢ်ကမၣ်တနီၤန့ၣ် တအဲၣ်ဒိးတူၢ်လိာ် တၢ်ဟ့ၣ်ကူၣ် လၢအဟဲလၢ ယဟိဝၤယွၤအအိၣ်ဘၣ်. (၁ မိၤ ၄:၆-၈) ဘၣ်ဆၣ် တၢ်အိၣ်ဖှိၣ်သးပှၢ်တဖၣ် အတၢ်တိာ်ပာ်န့ၣ် မ့ၢ်ဝဲဒ်သိး အကဂုာ်ကျဲးစၢးမၤစၢၤ ပှၤမၤတၢ်ကမၣ်တဂၤလၢ ကပီၢ်ယၢ်လီၤက့ၤသးအဂီၢ်. အဃိ ဖဲတၢ်အိၣ်ဖှိၣ်သးပှၢ် ကမံးတံာ် ထံၣ်လိာ်သးဒီး ပှၤမၤတၢ်ကမၣ်တဂၤအခါ အဝဲသ့ၣ် ကဘၣ်သ့ၣ်နီၣ်ထီၣ် တၢ်ဂ့ၢ်မနုၤလဲၣ်.
၅. ဖဲတၢ်အိၣ်ဖှိၣ်သးပှၢ် ကမံးတံာ် ထံၣ်လိာ်သးဒီး ပှၤမၤတၢ်ကမၣ်တဂၤအခါ အဝဲသ့ၣ် ကဘၣ်ပာ်ဖျါထီၣ် တၢ်ပာ်သူၣ်ပာ်သးဒ်လဲၣ်. (၂ တံၤမသ့း ၂:၂၄-၂၆.) (ကွၢ်စ့ၢ်ကီးတၢ်ဂီၤ.)
၅ တၢ်အိၣ်ဖှိၣ်သးပှၢ် ကမံးတံာ် ထံၣ်ဝဲပှၤမၤတၢ်ကမၣ်တဂၤ ဒ်သိဖိလၢ အလီၤမၢ်တဒု ဒီးအလုၢ်ဒိၣ်ပှ့ၤဒိၣ်လၢ ယဟိဝၤယွၤအဂီၢ်. (လူၤ ၁၅:၄, ၆) အဃိ ဖဲတၢ်အိၣ်ဖှိၣ်သးပှၢ် ကမံးတံာ် ထံၣ်လိာ်သးဒီးအီၤအခါ အဝဲသ့ၣ် တတဲတၢ်ဒီးအီၤ ဆူၣ်ဆူၣ်ကိၤကိၤဘၣ်, ဘၣ်ဆၣ် ကရ့ဒီးအီၤလၢ တၢ်အဲၣ်တၢ်ကွံအပူၤ. ဒီးတမ့ၢ်ထဲ အဝဲသ့ၣ် ကသံကွၢ်အီၤ တၢ်သံကွၢ်လဲလဲဘၣ်. အဝဲသ့ၣ် ကတဲသကိးတၢ်ဒီးအီၤ ဒီးကဂုာ်ကျဲးစၢးပာ်ဖျါထီၣ် တၢ်ဂ့ၤတၢ်ဝါဖဲ ၂ တံၤမသ့း ၂:၂၄-၂၆. (ဖး.) တကးဒံးဘၣ် တၢ်အိၣ်ဖှိၣ်သးပှၢ် ကမံးတံာ် ကပာ်ဖျါထီၣ် တၢ်သးစူၤ, တၢ်သူၣ်ကပုာ်လုးသးကဖီလီ ဒီးတၢ်သူၣ်ဂ့ၤသးဝါ ဒ်သိးကမၤစၢၤ ပှၤတဂၤန့ၣ်လၢ အကဆီတလဲ အသးအဂီၢ်.
ဒ်ပှၤကွၢ်သိလၢပျၢၤအသိး တၢ်အိၣ်ဖှိၣ်သးပှၢ်စ့ၢ်ကီး ဂုာ်ကျဲးစၢး မၤစၢၤ သိဖိလၢအလီၤမၢ် ဒ်သိးအကဟဲက့ၤ (ကွၢ်လံာ်အဆၢ ၅)
၆. တချုးလၢ တၢ်အိၣ်ဖှိၣ်သးပှၢ် ကမံးတံာ် ထံၣ်လိာ်သးဒီး ပှၤမၤတၢ်ကမၣ်တဂၤဒံးဘၣ်အခါ အဝဲသ့ၣ် ကဘၣ်မၤဆိ မနုၤလဲၣ်. (ရိမ့ၤ ၂:၄)
၆ တၢ်အိၣ်ဖှိၣ်သးပှၢ် ကမံးတံာ် ကဘၣ်ဆိကမိၣ်ဆိ ယဟိဝၤယွၤ အတၢ်ထံၣ်. အဝဲသ့ၣ် ကွၢ်လိယဟိဝၤယွၤ ဒီးရ့ဒီးပှၤမၤတၢ်ကမၣ်ဖးဒိၣ် ဒ်ယဟိဝၤယွၤရ့ဝဲအသိး. ဒီးအဝဲသ့ၣ် ကဘၣ်သ့ၣ်နီၣ်ထီၣ် စီၤပီလူး အတၢ်ကတိၤ လၢအတဲဝဲလၢ “ကစၢ်ယွၤန့ၣ် အသူၣ်ဂ့ၤသးဝါ ဒီးအဲၣ်ဒိးမၤစၢၤနၤ ဒ်သိးနကပီၢ်ယၢ်လီၤက့ၤသးန့ၣ် မ့ၢ်နတသ့ၣ်ညါဘၣ်ဧါ.” (ဖး ရိမ့ၤ ၂:၄.) တၢ်အိၣ်ဖှိၣ်သးပှၢ်တဖၣ် ကဘၣ်သ့ၣ်နီၣ်ထီၣ်လၢ အဝဲသ့ၣ် ကဲပှၤကွၢ်သိလၢ အအိၣ်လၢ ယ့ၣ်ၡူး အတၢ်ဟံးစုနဲၣ်ကျဲအဖီလာ် ဒီးအဝဲသ့ၣ် ကဘၣ်ကွၢ်လိယ့ၣ်ၡူး. (ၡါ ၁၁:၃, ၄; မး ၁၈:၁၈-၂၀) တချုးလၢ တၢ်အိၣ်ဖှိၣ်သးပှၢ် ကမံးတံာ် ထံၣ်လိာ်သးဒီး ပှၤမၤတၢ်ကမၣ်ဖးဒိၣ် တဂၤဒံးဘၣ်အခါ အဝဲသ့ၣ် ဃ့ထုကဖၣ် ဒီးတဲသကိးတၢ် ဒ်သိးကမၤစၢၤ ပှၤတဂၤန့ၣ်လၢ ကပီၢ်ယၢ်လီၤက့ၤသးအဂီၢ်. အဝဲသ့ၣ် ကဃုသ့ၣ်ညါ တၢ်ဂ့ၢ်တၢ်ကျိၤလၢ လံာ်စီဆှံအပူၤ ဒီးလၢပတၢ်ကရၢကရိ လံာ်လဲၢ်တဖၣ်အပူၤ. တကးဒံးဘၣ် အဝဲသ့ၣ် ကဃ့စ့ၢ်ကီး တၢ်မၤစၢၤလၢ ယဟိဝၤယွၤအအိၣ် ဒ်သိး ကသ့ၣ်ညါပဲာ်ထံနီၤဖးဝဲ ပှၤမၤတၢ်ကမၣ်တဂၤန့ၣ် အတၢ်ပာ်သူၣ်ပာ်သး, အတၢ်ထံၣ် ဒီးအတၢ်အိၣ်သး.—ကတိၤ ၂၀:၅.
၇-၈. ဖဲတၢ်အိၣ်ဖှိၣ်သးပှၢ် ကမံးတံာ် ထံၣ်လိာ်သးဒီး ပှၤမၤတၢ်ကမၣ်တဂၤအခါ အဝဲသ့ၣ် ကွၢ်လိယဟိဝၤယွၤ သ့ဒ်လဲၣ်.
၇ တၢ်အိၣ်ဖှိၣ်သးပှၢ် ကမံးတံာ် ကွၢ်လိ ယဟိဝၤယွၤ အတၢ်ဝံသးစူၤ. အဝဲသ့ၣ် သ့ၣ်နီၣ်ထီၣ်က့ၤ ဘၣ်ဃးဒီး ယဟိဝၤယွၤ မၤစၢၤတ့ၢ် ပှၤမၤတၢ်ကမၣ် လၢအပူၤကွံာ်တဖၣ်အဂ့ၢ်. အဒိ ယဟိဝၤယွၤ အိၣ်ဒီးတၢ်ဝံသးစူၤလၢ စီၤကၤယံၣ်အဖီခိၣ်အဃိ ယဟိဝၤယွၤ တဲဘၣ်အီၤလၢ အမ့ၢ်တဆီတလဲ အသးဘၣ်န့ၣ် တၢ်ကကဲထီၣ်သးဒီးအီၤဒ်လဲၣ်. ဘၣ်ဆၣ် အမ့ၢ်ဆီတလဲအသး ဒီးဒိကနၣ် ယဟိဝၤယွၤ အကလုၢ်န့ၣ် အကဒိးန့ၢ်ဘၣ် တၢ်ဆိၣ်ဂ့ၤ. (၁ မိၤ ၄:၆, ၇) ပထံၣ်ဘၣ်စ့ၢ်ကီးလၢ ယဟိဝၤယွၤ ဆှၢလီၤ ဝံနၤသၣ်လၢ ကလဲၤသိၣ်က့ၤသီက့ၤ စီၤဒၤဝံး. ဒီးဝံနၤသၣ် တဲဝဲတၢ်အဒိတခါလၢ ကမၤစၢၤ စီၤဒၤဝံး ဒ်သိးအကပီၢ်ယၢ်လီၤက့ၤအသး. (၂ မူၤ ၁၂:၁-၇) တကးဒံးဘၣ် ဖဲပှၤအံၣ်စရ့လးဖိ တဒိကနၣ် ယဟိဝၤယွၤ အကလုၢ်ဘၣ်အခါ ယဟိဝၤယွၤ ဆဲး “ဆှၢလီၤ” အဝံတဖၣ် လၢပှၤအံၣ်စရ့လးဖိအအိၣ် “တဘျီဝံၤတဘျီ.” (ယံး ၇:၂၄, ၂၅) ယဟိဝၤယွၤ တအိၣ်ခိးတုၤလၢ အပှၤဂီၢ်မုၢ် ကပီၢ်ယၢ်လီၤသးဝံၤမး အကမၤစၢၤအဝဲသ့ၣ်ဘၣ်. အဃိ ဖဲအဝဲသ့ၣ် မၤတၢ်အၢတၢ်သီဒံးအခါ ယဟိဝၤယွၤ ဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကပီၢ်ယၢ်လီၤက့ၤသး.
၈ ဖဲတၢ်အိၣ်ဖှိၣ်သးပှၢ် ကမံးတံာ် ဂုာ်ကျဲးစၢးမၤစၢၤ ပှၤမၤတၢ်ကမၣ်ဖးဒိၣ်အခါ အဝဲသ့ၣ်ကွၢ်လိ ယဟိဝၤယွၤ အဒိအတဲာ်. အဃိ အဝဲသ့ၣ် ပာ်ဖျါထီၣ် “တၢ်ဝံသးစူၤလၢအအါ” ဒ် ၂ တံၤမသ့း ၄:၂ ဟ့ၣ်ကူၣ်ဝဲအသိး. ဒီးဒ်သိး တၢ်အိၣ်ဖှိၣ်သးပှၢ် ကမံးတံာ် ကမၤစၢၤ ပှၤမၤတၢ်ကမၣ်တဂၤလၢ အကဘၣ်သး မၤက့ၤတၢ်လၢ အဘၣ်အဂီၢ် အဝဲသ့ၣ် ကဘၣ်ပာ်သးမုာ်မုာ် ဒီးအိၣ်ဒီး တၢ်ဝံသးစူၤ. ပှၤမၤတၢ်ကမၣ်တဂၤန့ၣ် မ့ၢ်ထံၣ်လၢ တၢ်အိၣ်ဖှိၣ်သးပှၢ်တဖၣ် သးဒိၣ်ထီၣ်တၢ်န့ၣ် ဘၣ်သ့ၣ်သ့ၣ် အတဘၣ်သး မၤထွဲတၢ်ဟ့ၣ်ကူၣ်ဘၣ် ဒီးအတဘၣ်သး ပီၢ်ယၢ်လီၤက့ၤအသးဘၣ်.
၉-၁၀. ဒ်သိး ပှၤမၤတၢ်ကမၣ်ဖးဒိၣ်တဂၤ ကဆိကမိၣ်ထံက့ၤ တၢ်လၢအမၤတ့ၢ်ဝဲအဂီၢ် တၢ်အိၣ်ဖှိၣ်သးပှၢ်တဖၣ် မၤစၢၤအီၤဒ်လဲၣ်.
၉ တၢ်အိၣ်ဖှိၣ်သးပှၢ် ကမံးတံာ် ဂုာ်ကျဲးစၢး ဃုသ့ၣ်ညါဝဲလၢ တချုးလၢ ပှၤတဂၤမၤတၢ်ကမၣ် ဒံးဘၣ်အခါ အမၤဆိမနုၤလဲၣ်. အဒိ တၢ်လၢအမၤလီၤစၢ် ပှၤတဂၤအံၤ အတၢ်ရ့လိာ်သးဒီး ယဟိဝၤယွၤန့ၣ် မ့ၢ်မနုၤလဲၣ်. အမၤနီၢ်ကစၢ် တၢ်မၤလိလံာ်စီဆှံ ဒီးအဟးစံၣ်တဲၤတဲလီၤတၢ်ဒံးဧါ. အဃ့ထုကဖၣ်လၢ ယဟိဝၤယွၤ အအိၣ်ဒံးဧါ ဒီးအမ့ၢ်ဃ့ဝဲန့ၣ် မ့ၢ်အဃ့ဝံၤတၢ်မံၤဧါ. ဖဲအတၢ်သူၣ်လီသးကွံ လၢအတဂ့ၤဘၣ် အိၣ်ထီၣ်အခါ မ့ၢ်အဂ့ၢ်လိာ်ကွံာ်ဝဲဧါ. အရ့လိာ်သးဒီး မတဂၤလဲၣ် ဒီးအဃုထၢ တၢ်မၤမုာ်မၤဖှံသး ဒ်လဲၣ်တကလုာ်လဲၣ်. အတၢ်ဃုထၢတဖၣ်အံၤ ဒုးအိၣ်ထီၣ် အတၢ်ဆိကမိၣ် ဒီးအတၢ်သူၣ်လီသးကွံ လၢအတဂ့ၤဘၣ်ဒ်လဲၣ်. တၢ်လၢအမၤဝဲတဖၣ် မၤဘၣ်ဒိ အပၢ်ယဟိဝၤယွၤအသး ဒ်လဲၣ်န့ၣ် မ့ၢ်အနၢ်ပၢၢ်ဝဲစ့ၢ်ကီးဧါ.
၁၀ ဒ်သိး တၢ်အိၣ်ဖှိၣ်သးပှၢ် ကမံးတံာ် ကမၤစၢၤ ပှၤမၤတၢ်ကမၣ်တဂၤအဂီၢ် အဝဲသ့ၣ် ကသံကွၢ်အီၤ တၢ်သံကွၢ်တဖၣ်လၢ ကမၤစၢၤအီၤ ဒ်သိး အကဆိကမိၣ်ထံက့ၤ တၢ်လၢအမၤတ့ၢ်ဝဲ. အဒိ တၢ်လၢအမၤလီၤစၢ် အတၢ်ရ့လိာ်သးဒီး ယဟိဝၤယွၤန့ၣ် မ့ၢ်မနုၤလဲၣ်. ဘၣ်မနုၤအဃိ အမၤဘၣ်တၢ်ကမၣ်ဖးဒိၣ်လဲၣ်. (ကတိၤ ၂၀:၅) ဖဲတၢ်အိၣ်ဖှိၣ်သးပှၢ် ကမံးတံာ် တဲတၢ်ဒီးအီၤအခါ အဝဲသ့ၣ် ပာ်ဖျါထီၣ် တၢ်အဲၣ်တၢ်ကွံ ဒီးတၢ်လၢ အဝဲသ့ၣ်တကြၢးသ့ၣ်ညါဘၣ်န့ၣ် အတသံကွၢ်အီၤဘၣ်. တကးဒံးဘၣ် ဒ်ဝံနၤသၣ် သူဝဲတၢ်အဒိလၢ ကမၤစၢၤစီၤဒၤဝံးအသိး ဘၣ်သ့ၣ်သ့ၣ် တၢ်အိၣ်ဖှိၣ်သးပှၢ်တဖၣ် ကသူစ့ၢ်ကီးတၢ်အဒိ. တၢ်အဒိန့ၣ် ကမၤစၢၤ ပှၤတဂၤန့ၣ်လၢ အကဆိကမိၣ်က့ၤဝဲလၢ ဘၣ်မနုၤအဃိ တၢ်လၢအမၤဝဲတဖၣ်န့ၣ် အကမၣ်လဲၣ်. ဖဲတၢ်အိၣ်ဖှိၣ်သးပှၢ် ကမံးတံာ် ထံၣ်လိာ်သးဒီး ပှၤမၤတၢ်ကမၣ်ဖးဒိၣ် အဆိကတၢၢ် တဘျီအခါ ဘၣ်သ့ၣ်သ့ၣ် ပှၤတနီၤန့ၣ် ကဆီတလဲအသးတစဲး ဒီးအဂၤတနီၤန့ၣ် ဘၣ်သ့ၣ်သ့ၣ် ကပီၢ်ယၢ်လီၤက့ၤအသး.
၁၁. ပှၤမၤတၢ်ကမၣ်တဖၣ်န့ၣ် ယ့ၣ်ၡူး ဂုာ်ကျဲးစၢး မၤစၢၤအီၤဒ်လဲၣ်.
၁၁ တၢ်အိၣ်ဖှိၣ်သးပှၢ် ကမံးတံာ် ဂုာ်ကျဲးစၢး ကွၢ်လိယ့ၣ်ၡူး အဒိအတဲာ်. ယ့ၣ်ၡူး မၤစၢၤ စီၤစီလူး ဒီးသံကွၢ်အီၤလၢ “စီၤစီလူးဧၢ, စီၤစီလူးဧၢ, နမၤအၢမၤနးယၤ ဘၣ်လဲၣ်.” ယ့ၣ်ၡူးသံကွၢ် စီၤစီလူး ဒ်အံၤအဃိ အမၤစၢၤစီၤစီလူးလၢ အကနၢ်ပၢၢ်ထီၣ် တၢ်လၢအမၤဝဲန့ၣ် မ့ၢ်တၢ်လၢအကမၣ်. (မၤတၢ် ၉:၃-၆) မ့မ့ၢ်လၢ “ပိာ်မုၣ်နီၢ်အံၤစ့ဘ့ၤလး” န့ၣ် ယ့ၣ်ၡူးတဲဝဲလၢ “ယဟ့ၣ်အီၤ တၢ်ဆၢကတီၢ်လၢ အကပီၢ်ယၢ်လီၤက့ၤအသး.”—လီၣ် ၂:၂၀, ၂၁.
၁၂-၁၃. ပှၤမၤတၢ်ကမၣ်ဖးဒိၣ်တနီၤ မ့ၢ်လိၣ်ဘၣ်အါထီၣ် တၢ်ဆၢကတီၢ်လၢ ကပီၢ်ယၢ်လီၤက့ၤသးန့ၣ် တၢ်အိၣ်ဖှိၣ်သးပှၢ် ကမံးတံာ် ကမၤဝဲဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၂ တၢ်အိၣ်ဖှိၣ်သးပှၢ် ကမံးတံာ် ကွၢ်လိယ့ၣ်ၡူး အဒိအတဲာ် ဒီးအဝဲသ့ၣ် တကရီဆိကမိၣ်ဝဲလၢ ပှၤတဂၤန့ၣ် တအဲၣ်ဒိး ပီၢ်ယၢ်လီၤက့ၤအသးဘၣ်န့ၣ်ဘၣ်. ပှၤတနီၤန့ၣ် ဖဲတၢ်အိၣ်ဖှိၣ်သးပှၢ် ထံၣ်လိာ်သးဒီးအီၤ တၢတဘျီအခါ အဝဲသ့ၣ် ပီၢ်ယၢ်လီၤက့ၤအသး, မ့မ့ၢ် ပှၤအဂၤတနီၤန့ၣ် ကလိၣ်ဘၣ်အါထီၣ် တၢ်ဆၢကတီၢ်. အဃိ တၢ်အိၣ်ဖှိၣ်သးပှၢ် ကမံးတံာ် ရဲၣ်ကျဲၤဝဲလၢ ကထံၣ်လိာ်သးဒီး ပှၤမၤတၢ်ကမၣ်တဂၤန့ၣ် အါန့ၢ်ဒံးတဘျီသ့. ဖဲတၢ်အိၣ်ဖှိၣ်သးပှၢ် ကမံးတံာ် ထံၣ်လိာ်သးဒီးအီၤ တၢတဘျီဝံၤအလီၢ်ခံ ဘၣ်သ့ၣ်သ့ၣ် အကဆိကမိၣ်ထံက့ၤ တၢ်လၢ တၢ်အိၣ်ဖှိၣ်သးပှၢ် တဲအီၤ လီၤတံၢ်လီၤဆဲး. ဒီးဘၣ်သ့ၣ်သ့ၣ် အကပာ်ဖျါထီၣ် တၢ်ဆီၣ်လီၤသး ဒီးဃ့ပျၢ် အတၢ်ကမၣ်လၢ ယဟိဝၤယွၤအအိၣ်. (စံး ၃၂:၅; ၃၈:၁၈) အဃိ ဖဲတၢ်အိၣ်ဖှိၣ်သးပှၢ် ကမံးတံာ် ထံၣ်လိာ်သးဒီးအီၤ လၢခံတဘျီအခါ ဘၣ်သ့ၣ်သ့ၣ် အတၢ်ပာ်သူၣ်ပာ်သး ကလီၤဆီဒိၣ်န့ၢ်ဒံး တၢတဘျီ.
၁၃ ဒ်သိး တၢ်အိၣ်ဖှိၣ်သးပှၢ် ကမံးတံာ် ကမၤစၢၤ ပှၤမၤတၢ်ကမၣ်တဂၤ လၢကပီၢ်ယၢ်လီၤက့ၤသးအဂီၢ် အဝဲသ့ၣ်ပာ်ဖျါထီၣ် တၢ်ဒိသူၣ်ဒိသး ဒီးတၢ်အဲၣ် လၢအဖီခိၣ်. အဝဲသ့ၣ် ဃ့ထုကဖၣ်လၢ ယဟိဝၤယွၤ ကဆိၣ်ဂ့ၤ အဝဲသ့ၣ် အတၢ်ထဲးဂံၢ်ထဲးဘါ ဒီးမုၢ်လၢ်ဝဲလၢ ဒီပုၢ်ဝဲၢ်လၢ အမၤတၢ်ကမၣ် တဂၤအံၤ ကပီၢ်ယၢ်လီၤက့ၤသး.—၂ တံၤ ၂:၂၅, ၂၆.
ဒ်သိး ပှၤမၤကမၣ်တၢ်တဂၤ ကပီၢ်ယၢ်လီၤက့ၤသးအဂီၢ် တၢ်အိၣ်ဖှိၣ်သးပှၢ် ကမံးတံာ် ထံၣ်လိာ်သးဒီးအီၤ အါန့ၢ်ဒံးတဘျီသ့ (ကွၢ်လံာ်အဆၢ ၁၂)
၁၄. ပှၤလၢအမၤစၢၤ ပှၤမၤတၢ်ကမၣ်ဖးဒိၣ်လၢ ကပီၢ်ယၢ်လီၤက့ၤသး နီၢ်ကီၢ်ကီၢ်န့ၣ် မ့ၢ်မတဂၤလဲၣ် ဒီးဘၣ်မနုၤအဃိ ပတဲဒ်န့ၣ်လဲၣ်.
၁၄ ဖဲပှၤမၤတၢ်ကမၣ်တဂၤ ပီၢ်ယၢ်လီၤက့ၤသးအခါ ပသးခုဒိၣ်မး. (လူၤ ၁၅:၇, ၁၀) တၢ်အိၣ်ဖှိၣ်သးပှၢ်တဖၣ် ဂုာ်ကျဲးစၢးမၤစၢၤ ပှၤမၤတၢ်ကမၣ်ဖးဒိၣ်တဂၤ ဘၣ်ဆၣ် ပှၤလၢအမၤစၢၤအီၤ နီၢ်ကီၢ်ကီၢ်န့ၣ် မ့ၢ်မတဂၤလဲၣ်. ဘၣ်ဃးဒီး ပှၤမၤတၢ်ကမၣ်တဖၣ်န့ၣ် စီၤပီလူး တဲဝဲလၢ “ဘၣ်တဘၣ် ကစၢ်ယွၤ ကဟ့ၣ် အဝဲသ့ၣ် တၢ်ခွဲးတၢ်ယာ် ဒ်သိး ကပီၢ်ယၢ်လီၤက့ၤအသး.” (၂ တံၤ ၂:၂၅) အဃိ ပှၤလၢအမၤစၢၤ ပှၤမၤတၢ်ကမၣ်တဂၤလၢ ကဆီတလဲကွံာ် အတၢ်ဆိကမိၣ် ဒီးအတၢ်ပာ်သူၣ်ပာ်သးန့ၣ် တမ့ၢ်ပှၤဟီၣ်ခိၣ်ဖိ နီတဂၤဘၣ်, မ့ၢ်ဝဲ ယဟိဝၤယွၤဟီ. ဒီးစီၤပီလူး ၡဲပၠးဝဲလၢ ဖဲပှၤတဂၤ ပီၢ်ယၢ်လီၤက့ၤသးအခါ အကဒိးန့ၢ်ဘၣ် အဘျုးလၢအဂၤစ့ၢ်ကီး. အဒိ အကအိၣ်ဒီး တၢ်သ့ၣ်ညါ တၢ်မ့ၢ်တၢ်တီ လီၤတံၢ်လီၤဆဲး, အကသ့ၣ်ညါလီၤက့ၤသး ဒီးကထူၣ်ဖျဲးထီၣ်ကွံာ်လၢ မုၣ်ကီၤလံၢ်အပျံၤသကွီၤ.—၂ တံၤ ၂:၂၆.
၁၅. ပှၤမၤတၢ်ကမၣ်လၢ အပီၢ်ယၢ်လီၤက့ၤသးန့ၣ် တၢ်အိၣ်ဖှိၣ်သးပှၢ် ကမံးတံာ် ဆဲးမၤစၢၤအီၤ ကသ့ဒ်လဲၣ်.
၁၅ ဖဲပှၤမၤတၢ်ကမၣ်တဂၤ ပီၢ်ယၢ်လီၤက့ၤသးအခါ တၢ်အိၣ်ဖှိၣ်သးပှၢ် ကမံးတံာ် ကလဲၤဟးအိၣ်သကိးအီၤ ဒီးမၤစၢၤအီၤ ဒ်သိး အကမၤဂၢၢ်ကျၢၤထီၣ်အတၢ်နာ်, ကဆဲး တြီဆၢကွံာ် မုၣ်ကီၤလံၢ် အတၢ်လ့ပစီ ဒီးမၤစၢၤအီၤလၢ အကမၤတၢ်လၢအဘၣ်. (ဧ့ၤ ၁၂:၁၂, ၁၃) ပှၤမၤတၢ်ကမၣ်ဖးဒိၣ်တဂၤ အဂ့ၢ်အကျိၤ ဒီးတၢ်လၢအမၤဝဲတဖၣ်န့ၣ် တၢ်အိၣ်ဖှိၣ်သးပှၢ်တဖၣ် တတဲပၠးပှၤဂၤဘၣ်. ဘၣ်ဆၣ် တၢ်အိၣ်ဖှိၣ်ဖိတဖၣ် ကြၢးသ့ၣ်ညါ တၢ်ဂ့ၢ်မနုၤလဲၣ်.
“သိၣ်ဃီၣ်အီၤလၢ ပှၤခဲလၢာ် အမဲာ်ညါ”
၁၆. စီၤပီလူး တဲဘၣ်ဃး “ပှၤခဲလၢာ်” ဖဲ ၁ တံၤမသ့း ၅:၂၀ န့ၣ် အဲၣ်ဒိးတဲဝဲ မတဂၤလဲၣ်.
၁၆ ဖး ၁ တံၤမသ့း ၅:၂၀. စီၤတံၤမသ့း လၢအကဲစ့ၢ်ကီး တၢ်အိၣ်ဖှိၣ်သးပှၢ်န့ၣ် စီၤပီလူး တဲဘၣ်အီၤလၢ “ပှၤလၢအဆဲးမၤတၢ်ဒဲးဘးန့ၣ်” သိၣ်ဃီၣ်အီၤလၢ ပှၤခဲလၢာ်အမဲာ်ညါ. စီၤပီလူး အတၢ်ကတိၤအံၤ အဲၣ်ဒိးတဲဝဲလၢ ပှၤကဘၣ် သိၣ်ဃီၣ်အီၤလၢ တၢ်အိၣ်ဖှိၣ်ဖိခဲလၢာ် အမဲာ်ညါဧါ. တမ့ၢ်ဒ်န့ၣ်ဘၣ်. အအဲၣ်ဒိးတဲဝဲ ဘၣ်ဃးဒီး ပှၤတနီၤလၢ အသ့ၣ်ညါဘၣ် တၢ်ကမၣ်လၢ ပှၤမၤတၢ်ကမၣ်တဂၤ မၤတ့ၢ်ဝဲ. ဘၣ်သ့ၣ်သ့ၣ် ပှၤတနီၤ ထံၣ်ဘၣ်ဝဲ ပှၤမၤတၢ်ကမၣ်တဂၤန့ၣ် မၤကမၣ်တၢ် မ့တမ့ၢ် ပှၤမၤတၢ်ကမၣ်တဂၤန့ၣ် တဲပၠးအီၤ အတၢ်ကမၣ်အဂ့ၢ်. အဃိ ပှၤတနီၤလၢ အသ့ၣ်ညါပာ်စၢၤ တၢ်ဂ့ၢ်အံၤန့ၣ် တၢ်အိၣ်ဖှိၣ်သးပှၢ် ကဘၣ်တဲပၠး အဝဲသ့ၣ် သ့သ့ဘၣ်ဘၣ်လၢ အဝဲသ့ၣ် မၤစၢၤ ဒီးဘှီဘၣ်ထီၣ်က့ၤ ပှၤမၤတၢ်ကမၣ်တဂၤအံၤလံ.
၁၇. တဘျီတခီၣ် တၢ်အိၣ်ဖှိၣ်သးပှၢ်တဖၣ် ကဘၣ်ဘိးဘၣ်သ့ၣ်ညါလီၤ တၢ်ဂ့ၢ်မနုၤလဲၣ် ဒီးဘၣ်မနုၤအဃိလဲၣ်.
၁၇ တဘျီတခီၣ် တၢ်အိၣ်ဖှိၣ်ဖိအါဂၤ သ့ၣ်ညါဘၣ်ဝဲလၢ ပှၤတဂၤ မၤဘၣ်တၢ်ကမၣ်ဖးဒိၣ် မ့တမ့ၢ် လၢခံန့ၣ် အဝဲသ့ၣ် ကသ့ၣ်ညါဘၣ်ဝဲ. တၢ်မ့ၢ်ကဲထီၣ်သး ဒ်အံၤန့ၣ် တၢ်အိၣ်ဖှိၣ်သးပှၢ် ကဘၣ်ဘိးဘၣ်သ့ၣ်ညါလီၤဝဲလၢ “ပှၤခဲလၢာ်” အမဲာ်ညါလၢ ဒီပုၢ်ဝဲၢ်တဂၤအံၤ ပှၤသိၣ်ဃီၣ်အီၤ. ဒီးပှၤခဲလၢာ်န့ၣ် အဲၣ်ဒိးတဲဝဲ တၢ်အိၣ်ဖှိၣ်ဖိခဲလၢာ်. ဘၣ်မနုၤအဃိ တၢ်အိၣ်ဖှိၣ်သးပှၢ် ဘၣ်မၤဝဲဒ်န့ၣ်လဲၣ်. ဒ်စီၤပီလူး တဲဝဲအသိး ဖဲတၢ်အိၣ်ဖှိၣ်သးပှၢ် မၤဝဲဒ်အံၤအခါ အ “ကကဲထီၣ် တၢ်ဟ့ၣ်ပလီၢ်လၢ ပှၤအဂၤတဖၣ်အဂီၢ်” ဒ်သိးအဝဲသ့ၣ် စ့ၢ်ကီးတမၤဘၣ် တၢ်ကမၣ်ဖးဒိၣ်တဂ့ၤအဂီၢ်.
၁၈. ပှၤသးစၢ်လၢ အသးနံၣ် စှၤန့ၢ်ဒံး ၁၈ နံၣ် မ့ၢ်မၤတၢ်ကမၣ်ဖးဒိၣ်န့ၣ် တၢ်အိၣ်ဖှိၣ်သးပှၢ် ကဘၣ်မၤဝဲဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၈ ပှၤသးစၢ်တဂၤလၢ အဒိးဘျၢထံဝံၤ ဒီးအသးနံၣ် မ့ၢ်တပှဲၤဒံးဘၣ် မ့တမ့ၢ် အသးနံၣ် စှၤန့ၢ်ဒံး ၁၈ နံၣ်န့ၣ် ဖဲအဝဲသ့ၣ် မၤတၢ်ကမၣ်ဖးဒိၣ်အခါ တၢ်အိၣ်ဖှိၣ်သးပှၢ်တဖၣ် ကဘၣ်မၤဒ်လဲၣ်. တၢ်အိၣ်ဖှိၣ်သးပှၢ်ကရူၢ် ကရဲၣ်ကျဲၤဝဲလၢ တၢ်အိၣ်ဖှိၣ်သးပှၢ်ခံဂၤ ကထံၣ်လိာ်သးဒီးအီၤ ဃုာ်ဒီးအမိအပါ.b တၢ်အိၣ်ဖှိၣ်သးပှၢ် ခံဂၤအံၤ ကသံကွၢ် အဝဲသ့ၣ်လၢ ဒ်သိးအဝဲသ့ၣ် ကမၤစၢၤ ဖိသၣ်တဂၤအံၤလၢ ကပီၢ်ယၢ်လီၤက့ၤသး ဒီးကဆီတလဲအသးအဂီၢ် အဝဲသ့ၣ် မၤဝဲဒ်လဲၣ်. ဖိသၣ်တဂၤ မ့ၢ်ဒိကနၣ်ဒီးမၤထွဲ အမိအပါ တၢ်ဟ့ၣ်ကူၣ် ဒီးဆီတလဲ အတၢ်ဆိကမိၣ် ဒီးအတၢ်ပာ်သူၣ်ပာ်သးန့ၣ် တၢ်အိၣ်ဖှိၣ်သးပှၢ် ခံဂၤအံၤ ဆၢတဲာ်ဝဲလၢ အမိအပါ ဆဲးမၤစၢၤအီၤသ့. နီၢ်ကီၢ်န့ၣ် ယဟိဝၤယွၤ ဟ့ၣ်လီၤ မိပါတဖၣ်မူဒါလၢ ကသိၣ်က့ၤသီက့ၤအဖိ လၢတၢ်အဲၣ်တၢ်ကွံအပူၤန့ၣ် တၢ်အိၣ်ဖှိၣ်သးပှၢ် သ့ၣ်ညါဝဲ. (၅ မိၤ ၆:၆, ၇; ကတိၤ ၆:၂၀; ၂၂:၆; အ့း ၆:၂-၄) ဒီးဒ်သိး တၢ်အိၣ်ဖှိၣ်သးပှၢ်တဖၣ် ကသ့ၣ်ညါလၢ ပှၤသးစၢ်တဂၤအံၤ ဒိးန့ၢ်ဘၣ် တၢ်မၤစၢၤလၢ အလိၣ်ဘၣ်ဝဲလံဧါအဂီၢ် တဘျီတခီၣ်န့ၣ် အဝဲသ့ၣ် ကတဲသကိးတၢ်ဒီး မိပါတဖၣ်. သနာ်က့ ပှၤသးစၢ်လၢ အဒိးဘျၢထံဝံၤတဂၤ မ့ၢ်တပီၢ်ယၢ်လီၤက့ၤသး ဒီးတအဲၣ်ဒိး ဆီတလဲသးဘၣ်န့ၣ် တၢ်အိၣ်ဖှိၣ်သးပှၢ် ခံဂၤအံၤ ကဘၣ်မၤဒ်လဲၣ်. တၢ်မ့ၢ်ကဲထီၣ်သး ဒ်န့ၣ်န့ၣ် တၢ်အိၣ်ဖှိၣ်သးပှၢ် ကမံးတံာ် ကဘၣ် ထံၣ်လိာ်သးဒီးအီၤ ဃုာ်ဒီးအမိအပါ.
ဖဲပှၤသးစၢ်လၢ အဘျၢထံဝံၤတဂၤ မၤဘၣ်တၢ်ကမၣ်အခါ တၢ်အိၣ်ဖှိၣ်သးပှၢ်ခံဂၤ ကထံၣ်လိာ်သးဒီးအီၤ ဃုာ်ဒီးအမိအပါ (ကွၢ်လံာ်အဆၢ ၁၈)
“ယဟိဝၤယွၤန့ၣ် ပှဲၤဝဲဒီးတၢ်အဲၣ် တၢ်ကဟုကယာ် ဒီးတၢ်သးကညီၤ”
၁၉. ဖဲတၢ်အိၣ်ဖှိၣ်သးပှၢ် ကမံးတံာ် ထံၣ်လိာ်သးဒီး ပှၤမၤတၢ်ကမၣ်ဖးဒိၣ် တဂၤအခါ အဝဲသ့ၣ် ဂုာ်ကျဲးစၢးကွၢ်လိ ယဟိဝၤယွၤ ဒ်လဲၣ်.
၁၉ ဒ်သိး တၢ်အိၣ်ဖှိၣ် ကကဆှီလၢ ယဟိဝၤယွၤ အမဲာ်ညါအဂီၢ် တၢ်အိၣ်ဖှိၣ်သးပှၢ် ကမံးတံာ် အိၣ်ဒီးမူဒါလၢ ကဒီသဒၢ တၢ်အိၣ်ဖှိၣ်. (၁ ကရံၣ် ၅:၇) တကးဒံးဘၣ် အဝဲသ့ၣ် သးအိၣ်ကွၢ်လိ ယဟိဝၤယွၤလၢအ “ပှဲၤဝဲဒီးတၢ်အဲၣ် တၢ်ကဟုကယာ် ဒီးတၢ်သးကညီၤ.” (ယၤ ၅:၁၁) အဃိ တၢ်အိၣ်ဖှိၣ်သးပှၢ် ကမံးတံာ် ကဂုာ်ကျဲးစၢး မၤစၢၤအီၤလၢ အဂ့ၤကတၢၢ် ဒီးမုၢ်လၢ်စ့ၢ်ကီးဝဲလၢ ပှၤမၤတၢ်ကမၣ်တဂၤ ကပီၢ်ယၢ်လီၤက့ၤသး. ပမ့ၢ်ကွၢ် တၢ်မၢဖိယိၤဟၣ်စ့ၢ်ကီး အပာ်ဖျါထီၣ် တၢ်ပာ်သူၣ်ပာ်သးဒ်န့ၣ်. အတဲဝဲလၢ “ယဖိဆံးသ့ၣ်ဧၢ, ယကွဲးန့ၢ်သု တၢ်ဂ့ၢ်တဖၣ်အံၤ ဒ်သိး သုသုတမၤဘၣ် တၢ်ဒဲးဘးတခါခါတဂ့ၤ အဂီၢ်လီၤ. ဘၣ်ဆၣ် ပှၤတဂၤဂၤ မ့ၢ်မၤဘၣ် တၢ်ဒဲးဘးတခါန့ၣ် ပအိၣ်ဒီး ပှၤမၤစၢၤတၢ်တဂၤ လၢအမ့ၢ် ပှၤတီပှၤလိၤ ယ့ၣ်ၡူးခရံာ်လၢ အအိၣ်ဒီးပၢ်လီၤ.”—၁ ယိၤ ၂:၁.
၂၀. တၢ်မၤလိ အလီၢ်ခံကတၢၢ်တခါန့ၣ် ပကတဲသကိး တၢ်ဂ့ၢ်မနုၤလဲၣ်.
၂၀ တဘျီတခီၣ်န့ၣ် ခရံာ်ဖိတနီၤ ပာ်လီၤအသးလၢ အတပီၢ်ယၢ်လီၤက့ၤသးဘၣ်အဃိ လီၤသးအုးဒိၣ်မး. တၢ်မ့ၢ်ကဲထီၣ်သး ဒ်န့ၣ်န့ၣ် ပှၤကဘၣ် ထုးထီၣ်ကွံာ်အီၤလၢ တၢ်အိၣ်ဖှိၣ်အပူၤ. အဃိ တၢ်အိၣ်ဖှိၣ်သးပှၢ်တဖၣ် ကဘၣ်မၤဝဲဒ်လဲၣ်. ပကတဲသကိး တၢ်ဂ့ၢ်အံၤလၢ တၢ်မၤလိ အလီၢ်ခံကတၢၢ်တခါ.
တၢ်သးဝံၣ် ၁၀၃ ပှၤကွၢ်သိ—ပှၤပိာ်ခွါလၢအမ့ၢ်တၢ်ဟ့ၣ်တဖၣ်
a တၢ်အိၣ်ဖှိၣ်သးပှၢ် ကမံးတံာ်အံၤ လၢညါပကိးလၢ တၢ်စံၣ်ညီၣ် ကမံးတံာ်. ဘၣ်ဆၣ် တၢ်အိၣ်ဖှိၣ်သးပှၢ် ကမံးတံာ် အမူဒါန့ၣ် တမ့ၢ်ထဲ အကဘၣ်စံၣ်ညီၣ်တၢ်ဘၣ်အဃိ ပတကိးလၢ တၢ်စံၣ်ညီၣ် ကမံးတံာ်လၢၤဘၣ်. ပကကိးက့ၤလၢ တၢ်အိၣ်ဖှိၣ်သးပှၢ် ကမံးတံာ်.
b တၢ်မၤလိအံၤန့ၣ် တဲဝဲလၢ မိပါ ဘၣ်ဆၣ် အပၣ်ဃုာ်စ့ၢ်ကီးဒီး ပှၤလၢပဒိၣ်ဟ့ၣ်အီၤအခွဲး မ့တမ့ၢ် အအိၣ်ဒီး မူဒါလၢ ကကွၢ်ထွဲဖိသၣ်.