တၢ်ဟ့ၣ်ကူၣ်လၢ နကမၤ နီၢ်ကစၢ် တၢ်မၤလိလံာ်စီဆှံထီဘိ
နကမၤ နီၢ်ကစၢ် တၢ်မၤလိလံာ်စီဆှံ ထီဘိအဂီၢ် တၢ်ကၢၣ်နသးဧါ. တဘျီတခီၣ် တၢ်ကကၢၣ်ပသး. ဘၣ်ဆၣ် ဆိကမိၣ်ကွၢ် တၢ်လၢ ပကဘၣ်မၤ ကိးနံၤဒဲး ဒ်သိးဒီး ပကဘၣ်လုၢ်ထံ. ပကလုၢ်ထံအဂီၢ် တၢ်ဆၢကတီၢ်ကလၢာ်ဝဲ ဘၣ်ဆၣ် ဖဲပလုၢ်ထံဝံၤအခါ ခီဖျိလၢ ပကဆှီထီၣ်အဃိ ပအိၣ်မုာ်ဒိၣ်ထီၣ်. ဒ်န့ၣ်အသိး ပကမၤ နီၢ်ကစၢ် တၢ်မၤလိလံာ်စီဆှံအဂီၢ် ပတၢ်ဆၢကတီၢ် ကလၢာ်ဝဲ. ဘၣ်ဆၣ် ဖဲပမၤနီၢ်ကစၢ် တၢ်မၤလိလံာ်စီဆှံအခါ လီၤဂာ်ဒ်သိးဒီး ပသ့စီပသးလၢထံ “ခီဖျိ ယွၤအကလုၢ်ကထါ” အဃိ ပအိၣ်ကမုာ်ဒိၣ်ထီၣ်. (အ့း ၅:၂၆) အဃိ ဒ်သိး နကမၤနီၢ်ကစၢ် တၢ်မၤလိလံာ်စီဆှံ ထီဘိအဂီၢ် မၤကွၢ် တၢ်ဟ့ၣ်ကူၣ်တဖၣ်အံၤ–
ပာ်လီၤတၢ်ရဲၣ်တၢ်ကျဲၤ လီၤတံၢ်လီၤဆဲး. နီၢ်ကစၢ် တၢ်မၤလိလံာ်စီဆှံန့ၣ် အပၣ်ဃုာ်လၢ “တၢ်လၢအရ့ဒိၣ်ကတၢၢ်တဖၣ်” အကျါ လၢခရံာ်ဖိကိးဂၤဒဲး ကဘၣ်မၤဝဲ. (ဖံလံး ၁:၁၀) ဒ်သိး နကမၤထွဲ နတၢ်ရဲၣ်တၢ်ကျဲၤ ကိးနွံဒဲးအဂီၢ် ကွဲးလီၤမုၢ်နံၤမုၢ်သီ ဒီးတၢ်ဆၢကတီၢ်လၢ နကမၤ နီၢ်ကစၢ် တၢ်မၤလိလံာ်စီဆှံအဂီၢ် လၢလံာ်က့ပူၤ. ဒီးကျးလီၤအီၤလၢ တၢ်လီၢ်လၢ နထံၣ်အီၤညီ. မ့တမ့ၢ် မၤသီၣ်ဃာ် နၣ်ရံၣ်လၢ နလီတဲစိပူၤ ဒ်သိးကဒုးသ့ၣ်နီၣ်ထီၣ်နၤလၢ နကဘၣ်မၤ နီၢ်ကစၢ် တၢ်မၤလိလံာ်စီဆှံ.
ဃုထၢ တၢ်ဆၢကတီၢ် ဒီးတၢ်မၤလိ အကျိၤအကျဲလၢ အဂ့ၤကတၢၢ်လၢနဂီၢ်. နအဲၣ်ဒိးမၤ နီၢ်ကစၢ် တၢ်မၤလိလံာ်စီဆှံဒ်လဲၣ်. အဒိ နဆ့ၣ်နီၤမၤ နီၢ်ကစၢ် တၢ်မၤလိလံာ်စီဆှံ ဖးယံာ်မုာ်ဧါ. မ့တမ့ၢ် နသးစၢၢ်ဆၢတၢ် န့ၢ်ထဲတစိၢ်ဖိဧါ. နသ့ၣ်ညါ နနီၢ်ကစၢ် တၢ်အိၣ်သး ဂ့ၤကတၢၢ်အဃိ ဃုထၢ တၢ်ဆၢကတီၢ် ဒီးတၢ်မၤလိ အကျိၤအကျဲလၢ အဂ့ၤကတၢၢ်လၢနဂီၢ်. တဘျီတခီၣ် နမ့ၢ်တူၢ်ဘၣ်လၢ နတဘၣ်သး မၤလိလံာ်စီဆှံ ဖဲနပာ်ပနီၣ်ဃာ် တၢ်ဆၢကတီၢ်ဘၣ်န့ၣ် မၤကွၢ်အီၤထဲ အမံးနံး ၁၀. နမ့ၢ်မၤအီၤထဲ အမံးနံး ၁၀ သနာ်က့ နကမၤလိန့ၢ်တၢ်ဒီဒူၣ်. အဃိ အဂ့ၤဒိၣ်န့ၢ် နတမၤအီၤဘၣ်ဒံး. နမ့ၢ်စးထီၣ်မၤအီၤဒ်အံၤန့ၣ် ဘၣ်သ့ၣ်သ့ၣ် အမံးနံး ၁၀ ဝံၤအလီၢ်ခံ နကအဲၣ်ဒိး ဆဲးမၤလိအါထီၣ်.—ဖံလံး ၂:၁၃.
ဃုထၢဆိ တၢ်ဂ့ၢ်လၢနကမၤလိ. တချုးလၢ နကဆ့ၣ်နီၤ မၤလိတၢ်ဒံးဘၣ်န့ၣ် ဆိကမိၣ်ပာ်စၢၤ တၢ်ဂ့ၢ်လၢ နကမၤလိအီၤ. နမ့ၢ်မၤဒ်န့ၣ်န့ၣ် မ့ၢ်ဝဲနသူန “တၢ်ဆၢကတီၢ်လၢ . . . အဂ့ၤကတၢၢ်.” (အ့း ၅:၁၆) ကွဲးလီၤပာ်စၢၤ တၢ်ဂ့ၢ်လၢ နဘၣ်သး မၤလိအီၤ. အဒိ နမ့ၢ်တနၢ်ပၢၢ် တၢ်ဂ့ၢ်တခါခါ ဒီးနတၢ်သံကွၢ် မ့ၢ်အိၣ်ထီၣ်န့ၣ် ကွဲးနီၣ်ဃာ်အီၤ. ဒီးဖဲနမၤနီၢ်ကစၢ် တၢ်မၤလိလံာ်စီဆှံ ဝံၤအလီၢ်ခံ ကွဲးလီၤ တၢ်ဂ့ၢ်အဂၤလၢ နဘၣ်သးမၤလိအီၤ.
မၤတၢ်ဆီတလဲ ဒ်တၢ်အိၣ်သးအိၣ်ဝဲအသိး. ဒ်သိး နကမၤဘၣ် နီၢ်ကစၢ် တၢ်မၤလိလံာ်စီဆှံ ထီဘိအဂီၢ် မၤတၢ်ဆီတလဲ ဒ်နတၢ်အိၣ်သးအိၣ်ဝဲအသိး. အဒိ နမ့ၢ်ဘၣ် ဆီတလဲ မုၢ်နံၤမုၢ်သီမ့ၢ်ဂ့ၤ, နကမၤလိတၢ် ယံာ်ထဲလဲၣ်မ့ၢ်ဂ့ၤ, နကမၤလိ တၢ်ဂ့ၢ်မနုၤလဲၣ်မ့ၢ်ဂ့ၤ ဆီတလဲဟီ. ဘၣ်ဆၣ် အရ့ဒိၣ်လၢ နကမၤ နီၢ်ကစၢ် တၢ်မၤလိလံာ်စီဆှံ ထီဘိ.
ပမ့ၢ်မၤ နီၢ်ကစၢ် တၢ်မၤလိလံာ်စီဆှံ ထီဘိန့ၣ် ပတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်, ပကဆၢတဲာ် တၢ်လၢအဘၣ် ဒီးပဂံၢ်ပဘါကဆူၣ်ထီၣ်.—ၡူ ၁:၈.