ဘၣ်မနုၤအဃိ တၢ်ဒုးတၢ်ယၤ ဒီးတၢ်ထီဒုၣ်ထီဒါ ဆဲးအိၣ်ဒံးလဲၣ်
ဘၣ်မနုၤအဃိ တၢ်ဒုးတၢ်ယၤ အိၣ်ထီၣ်လဲၣ် ဒီးဘၣ်မနုၤအဃိ အဆဲးအိၣ်ဒံးလဲၣ်န့ၣ် လံာ်စီဆှံ ပာ်ဖျါထီၣ်ဝဲ.
တၢ်ဒဲးဘး
ကစၢ်ယွၤတ့လီၤ ပမိပပါ အဆိကတၢၢ်ခံဂၤ လၢအမ့ၢ် နီၢ်အံၣ်အု ဒီးစီၤအၤဒၣ် ဒ်အက့ၢ်အဂီၤအသိး. (၁ မိၤၡ့ ၁:၂၇) အဃိ အဝဲသ့ၣ် အိၣ်ဒီးတၢ်သ့တၢ်ဘၣ်လၢ ကပာ်ဖျါထီၣ်က့ၤ ကစၢ်ယွၤ အတၢ်ဂ့ၤတၢ်ဝါ လၢအမ့ၢ် တၢ်ဃူတၢ်ဖိး ဒီးတၢ်အဲၣ်. (၁ ကရံၣ်သူး ၁၄:၃၃; ၁ ယိၤဟၣ် ၄:၈) သနာ်က့ နီၢ်အံၣ်အု ဒီးစီၤအၤဒၣ် တဒိကနၣ် ကစၢ်ယွၤ အကလုၢ်ဘၣ် ဒီးမၤတၢ်ဒဲးဘး. အဃိ ပဝဲခဲလၢာ်န့ၣ် ပန့ၢ်သါဘၣ် တၢ်ဒဲးဘး ဒီးပဘၣ်သံ. (ရိမ့ၤ ၅:၁၂) ခီဖျိလၢ ပန့ၢ်သါဘၣ် တၢ်ဒဲးဘးအဃိ ညီနုၢ်န့ၣ် ပဆိကမိၣ်တၢ်လၢ အတဂ့ၤဘၣ် ဒီးမၤတၢ်လၢ အတဂ့ၤဘၣ်.—၁ မိၤၡ့ ၆:၅; မၢ်ကူး ၇:၂၁, ၂၂.
ပှၤဟီၣ်ခိၣ်ဖိ အပဒိၣ်တဖၣ်
ကစၢ်ယွၤ တတ့လီၤပှၤဒ်သိး ပကပၢလီၤ ပနီၢ်ကစၢ်သးအဂီၢ်ဘၣ်. လံာ်စီဆှံ တဲဝဲလၢ “ပှၤဟီၣ်ခိၣ်ဖိ တဒိးန့ၢ်ဘၣ် တၢ်ခွဲးတၢ်ယာ်လၢ ကဟံးစုနဲၣ်ကျဲလီၤ အနီၢ်ကစၢ် အခီၣ်ခါဘၣ်.” (ယံးရမံယၤ ၁၀:၂၃) အဃိ ပှၤဟီၣ်ခိၣ်ဖိ အပဒိၣ်တဖၣ် မၤကတၢၢ်ကွံာ် တၢ်ဒုးတၢ်ယၤ ဒီးတၢ်ထီဒုၣ်ထီဒါ တန့ၢ်ဘၣ်.
မုၣ်ကီၤလံၢ် ဒီးအတၢ်ဝံတၢ်နါတဖၣ်
လံာ်စီဆှံ ပာ်ဖျါထီၣ်ဝဲလၢ “ဟီၣ်ခိၣ်ခဲလၢာ်န့ၣ် အိၣ်ဝဲလၢ မုၣ်ကီၤလံၢ် အစုပူၤလီၤ.” (၁ ယိၤဟၣ် ၅:၁၉) ပှၤအၢပှၤသီ လၢအမ့ၢ် “မုၣ်ကီၤလံၢ်” အံၤ အကဲပှၤလၢ အမၤသံပှၤကညီ. (ယိၤဟၣ် ၈:၄၄) မုၣ်ကီၤလံၢ် ဒီးအတၢ်ဝံတၢ်နါလၢ ပထံၣ်အီၤတသ့ဘၣ်န့ၣ် အဝဲသ့ၣ်ဆီၣ်ထွဲ ပှၤဟီၣ်ခိၣ်ဖိလၢ ကဒုးတၢ် ဒီးထီဒါလိာ်သး.—လီၣ်ဖျါ ၁၂:၉, ၁၂.
တၢ်ဂ့ၢ်အကလုာ်ကလုာ်လၢ အဒုးအိၣ်ထီၣ် တၢ်ဒုးတၢ်ယၤ ဒီးတၢ်ထီဒုၣ်ထီဒါန့ၣ် ပှၤဟီၣ်ခိၣ်ဖိ မၤလီၤမၢ်ကွံာ်ဝဲ တန့ၢ်ဘၣ်, ဘၣ်ဆၣ် ကစၢ်ယွၤ မၤဝဲန့ၢ်.