တၢ်ဒုးတၢ်ယၤ ဒီးတၢ်ထီဒုၣ်ထီဒါ ကကတၢၢ်ကွံာ် ဒ်လဲၣ်

ကစၢ်ယွၤ ကမၤဟးဂီၤကွံာ် ပှၤဟီၣ်ခိၣ်ဖိ အပဒိၣ်တဖၣ်

ဖဲအၢ်မက့းဒိၣ်a တၢ်ဒုးအဆၢကတီၢ်န့ၣ် ကစၢ်ယွၤ ကမၤဟးဂီၤကွံာ် ပှၤဟီၣ်ခိၣ်ဖိ အပဒိၣ်တဖၣ်. (လီၣ်ဖျါ ၁၆:၁၆) ဖဲန့ၣ်အခါ “စီၤပၤတဖၣ်လၢ အအိၣ်လၢဟီၣ်ခိၣ်ဒီဘ့ၣ်” ကပာ်ဖှိၣ်ထီၣ် အသးလၢ “တၢ်ဒုးလၢ အကမၤအသး ဖဲသ့တၢ်လၢာ်ကစၢ်ယွၤ အမုၢ်နံၤဖးဒိၣ်အခါလီၤ.” (လီၣ်ဖျါ ၁၆:၁၄) အၢ်မက့းဒိၣ် တၢ်ဒုးန့ၣ် အကဲဝဲ ကစၢ်ယွၤအတၢ်ဒုး လၢကမၤကတၢၢ်ကွံာ် တၢ်ဒုးတၢ်ယၤခဲလၢာ် လၢဟီၣ်ခိၣ်ချၢ.

ယွၤအဘီအမုၢ် လၢမူခိၣ်န့ၣ် ကပၢက့ၤတၢ်လၢ ပှၤဟီၣ်ခိၣ်ဖိ အတၢ်ပၢအလီၢ် ဒီးကစၢ်ယွၤ အတၢ်ပၢအံၤ တဟးဂီၤ နီတဘျီဘၣ်. (ဒၤနံးယ့လး ၂:၄၄) ဖဲယ့ၣ်ၡူး သိၣ်လိအပျဲၢ်အဘီၣ်လၢ ကဃ့လၢ ယွၤအဘီအမုၢ် ကဟဲအခါ အအဲၣ်ဒိးတဲဝဲ ဘၣ်ဃးဒီး ကစၢ်ယွၤ အတၢ်ပၢb တခါအံၤအဂ့ၢ်. (မးသဲ ၆:၉, ၁၀) တကးဒံးဘၣ် ကစၢ်ယွၤ ဃုထၢထီၣ်ဝဲ အဖိခွါ ယ့ၣ်ၡူးခရံာ် ဒ်ဘီမုၢ်အံၤအစီၤပၤ. (ယၡါယၤ ၉:၆, ၇; မးသဲ ၂၈:၁၈) ယ့ၣ်ၡူး လၢအပၢတၢ်လၢ ယွၤအဘီအမုၢ်န့ၣ် ကပၢဝဲ ပှၤဟီၣ်ခိၣ်ဖိခဲလၢာ် လၢဟီၣ်ခိၣ်ဒီဘ့ၣ်ညါ ဒီးလၢအတၢ်ပၢဖီလာ်န့ၣ် ပှၤခဲလၢာ် ကအိၣ်ဘၣ် ဃူဃူဖိးဖိး.

ယ့ၣ်ၡူးန့ၣ် အတလီၤဂာ် ဒ်သိးဒီး ပှၤဟီၣ်ခိၣ်ဖိလၢ အပၢတၢ်ဘၣ် ဒီးအတသူ အတၢ်စိတၢ်ကမီၤလၢ အနီၢ်ကစၢ် အဘျုးအဂီၢ်ဘၣ်. ယ့ၣ်ၡူးန့ၣ် အမၤတၢ် တီတီလိၤလိၤ ဒီးအတကွၢ်ဒိၣ်ဆံးအါစှၤတၢ်ဘၣ်. အဃိ ပှၤဟီၣ်ခိၣ်ဖိ အကလုာ်ဒူၣ်, အတၢ်ဆဲးတၢ်လၤ ဒီးအဒိၣ်ထီၣ်တၢ်လီၢ် မ့ၢ်လီၤဆီ သနာ်က့ အဝဲသ့ၣ် တလိၣ်ဘၣ်ယိၣ်လၢ ပှၤကကွၢ်ကပာ် အဝဲသ့ၣ်ဘၣ်. (ယၡါယၤ ၁၁:၃, ၄) ဒီးဒ်သိး ပှၤဟီၣ်ခိၣ်ဖိ ကဒိးန့ၢ်ဘၣ် တၢ်ခွဲးတၢ်ယာ် ဒ်သိးသိးအဂီၢ် အဝဲသ့ၣ် တလိၣ်ဒုးတၢ်လၢၤဘၣ်. ဘၣ်မနုၤအဃိ ပတဲဒ်န့ၣ်လဲၣ်. ခီဖျိလၢ ယ့ၣ်ၡူး ကပာ်သူၣ်ပာ်သးဝဲ ပှၤတဂၤဘၣ်တဂၤ အတၢ်လိၣ်ဘၣ်. တကးဒံးဘၣ် “ပှၤဖှီၣ်ဖိယာ်ဖိလၢ အကိးပသူထီၣ်လၢ တၢ်မၤစၢၤအဂီၢ်, ပှၤလၢအပတီၢ်ဖုၣ် ဒီးပှၤလၢ ပှၤမၤစၢၤအီၤ တအိၣ်နီတဂၤဘၣ်န့ၣ် အဝဲကမၤပူၤဖျဲးဝဲလီၤ. . . . အဝဲကမၤပူၤဖျဲး အဝဲသ့ၣ်လၢ တၢ်ဆီၣ်တံၢ်မၤနၢၤ ဒီးတၢ်မၤဆူၣ်မၤစိး.”—စံးထီၣ်ပတြၢၤ ၇၂:၁၂-၁၄.

ယွၤအဘီအမုၢ် ကမၤဟးဂီၤကွံာ် တၢ်စုကဝဲၤခဲလၢာ်. (မံကၤ ၄:၃) တကးဒံးဘၣ် ကမၤဟးဂီၤကွံာ်ဝဲ ပှၤအၢပှၤသီလၢ အအဲၣ်တၢ်ဒုးတၢ်ယၤ ဒီးမၤဆါပှၤဂၤ. (စံးထီၣ်ပတြၢၤ ၃၇:၉, ၁၀) ပှၤကိးဂၤဒဲး လၢအမ့ၢ် ပိာ်မုၣ်မ့ၢ်ဂ့ၤ, ပိာ်ခွါမ့ၢ်ဂ့ၤ, ဖိသၣ်မ့ၢ်ဂ့ၤ မ့ၢ်အိၣ်ဖဲလဲၣ် သနာ်က့ အဝဲသ့ၣ် တလိၣ်ပျံၤတၢ်ဘၣ် ဒီးကအိၣ်ဘၣ် ဘံၣ်ဘံၣ်ဘၢဘၢ.—ယဃ့းစက့လး ၃၄:၂၈.

ကစၢ်ယွၤ အဘီအမုၢ် ကမၤလီၤမၢ်ကွံာ် တၢ်ကီတၢ်ခဲ လၢအဒုးအိၣ်ထီၣ် တၢ်ဒုးတၢ်ယၤ ဒ်သိးဒီး တၢ်သၣ်ဝံၤလီၤဒိ, တၢ်ဖှီၣ်တၢ်ယာ် ဒီးပှၤလၢအဟံၣ်အဃီ တအိၣ်ဘၣ်. အဃိ လၢကစၢ်ယွၤ အဘီမုၢ် တၢ်ပၢဖီလာ်န့ၣ် ပှၤဟီၣ်ခိၣ်ဖိ ကိးဂၤဒဲး ကအိၣ်ဘၣ် မုာ်မုာ်ခုၣ်ခုၣ်. ပှၤကိးဂၤဒဲး ကအီၣ်ဘၣ် တၢ်အီၣ်လၢ အန့ၢ်ဂံၢ်န့ၢ်ဘါ အါအါဂီၢ်ဂီၢ် ဒီးကအိၣ်ဘၣ် တၢ်လီၢ်လၢအမုာ်.—စံးထီၣ်ပတြၢၤ ၇၂:၁၆; ယၡါယၤ ၆၅:၂၁-၂၃.

ဖဲယွၤအဘီအမုၢ် ပၢတၢ်အခါ တၢ်နးတၢ်ဖှီၣ်လၢ အဟဲကဲထီၣ်သး ခီဖျိလၢ တၢ်ဒုးတၢ်ယၤ အဃိန့ၣ် တအိၣ်လၢၤဘၣ်. ဒီးဖဲတၢ်ဒုးကဲထီၣ်အခါ တၢ်ကီတၢ်ခဲလၢ ပှၤတူၢ်ဘၣ်ဝဲ လၢအပၣ်ဃုာ်ဒီး တၢ်ဆူးတၢ်ဆါလၢ နီၢ်ခိ ဒီးသးအတၢ်တူၢ်ဘၣ် တကပၤန့ၣ် တအိၣ်စ့ၢ်ကီးလၢၤဘၣ်. တကးဒံးဘၣ် ပှၤလၢအသံတဖၣ် ကဂဲၤဆၢထၢၣ် သမူထီၣ်က့ၤ. (ယၡါယၤ ၂၅:၈; ၂၆:၁၉; ၃၅:၅, ၆) ဟံၣ်ဖိဃီဖိတဖၣ် ကအိၣ်ဘၣ်က့ၤ ဒ်သိးသိး ဒီးခီဖျိလၢ “တၢ်အလီၢ်လံၤလၢ အမၤသးအုးတ့ၢ်ပှၤန့ၣ် ဒံကွံာ်ဝဲလံ” အဃိ တၢ်အၢတၢ်သီလၢ အကဲထီၣ်သးလၢ တၢ်ဒုးတၢ်ယၤအဃိန့ၣ် ပှၤတသ့ၣ်နီၣ်ထီၣ်လၢၤဘၣ်.—လီၣ်ဖျါ ၂၁:၄.

ကစၢ်ယွၤ ကမၤလီၤမၢ်ကွံာ် တၢ်ဒဲးဘး

ဖဲယွၤအဘီအမုၢ် ပၢဟီၣ်ခိၣ်ဒီဘ့ၣ်အခါ ပှၤဟီၣ်ခိၣ်ဖိခဲလၢာ် ကဘူၣ်ထီၣ်ဘါထီၣ် ယဟိဝၤယွၤc လၢအမ့ၢ် “တၢ်အဲၣ်တၢ်ကွံ ဒီးတၢ်ဃူတၢ်ဖိးကစၢ်.” (၂ ကရံၣ်သူး ၁၃:၁၁) ပှၤကိးဂၤဒဲး ကမၤလိအသး ဒ်သိး ကအိၣ်ဃူဃူဖိးဖိး. (ယၡါယၤ ၂:၃, ၄; ၁၁:၉) ဒီးပှၤခဲလၢာ်လၢ အဒိကနၣ် ကစၢ်ယွၤ အကလုၢ်န့ၣ် ကထူၣ်ဖျဲးထီၣ်လၢ တၢ်ဒဲးဘး ဒီးကကဲထီၣ် ပှၤလၢပှၤပှဲၤ.—ရိမ့ၤ ၈:၂၀, ၂၁.

ကစၢ်ယွၤ ကမၤဟးဂီၤကွံာ် မုၣ်ကီၤလံၢ် ဒီးအတၢ်ဝံတၢ်နါတဖၣ်

ယွၤအဘီအမုၢ် ကမၤဟးဂီၤကွံာ် မုၣ်ကီၤလံၢ် ဒီးအတၢ်ဝံတၢ်နါတဖၣ်လၢ အဆီၣ်ထွဲ ပှၤဟီၣ်ခိၣ်ဖိလၢ ကဒုးတၢ် ဒီးထီဒါလိာ်သး. (လီၣ်ဖျါ ၂၀:၁-၃, ၁၀) ခီဖျိလၢ အဝဲသ့ၣ် တအိၣ်လၢၤဘၣ် အဃိ “တၢ်မုာ်တၢ်ခုၣ် ကအိၣ်ဝဲအါအါဂီၢ်ဂီၢ်.”—စံးထီၣ်ပတြၢၤ ၇၂:၇.

ကစၢ်ယွၤ အတၢ်အၢၣ်လီၤလၢ အကမၤကတၢၢ်ကွံာ် တၢ်ဒုးတၢ်ယၤ ဒီးတၢ်ထီဒုၣ်ထီဒါန့ၣ် ပနာ်လၢ အကဟဲလၢပှဲၤထီၣ် နီၢ်ကီၢ်. တကးဒံးဘၣ် ကစၢ်ယွၤန့ၣ် အမၤကတၢၢ်ကွံာ် တၢ်ဒုးတၢ်ယၤ သ့နီၢ်ကီၢ် ဒီးအသးအိၣ် မၤဝဲသပှၢ်တၢၢ်.

• ကစၢ်ယွၤ အိၣ်ဒီးတၢ်ကူၣ်သ့ ဒီးတၢ်စိတၢ်ကမီၤလၢ ကမၤကတၢၢ်ကွံာ် တၢ်ဒုးတၢ်ယၤ ဒီးတၢ်ထီဒုၣ်ထီဒါ. (ယိၤဘး ၉:၄) ဒီးဒ်သိး အကမၤလၢပှဲၤထီၣ် အတၢ်အၢၣ်လီၤအဂီၢ် တၢ်လၢ အတြီဃာ်အီၤသ့န့ၣ် တအိၣ်နီတမံၤဘၣ်.—ယိၤဘး ၄၂:၂.

• ပှၤဟီၣ်ခိၣ်ဖိ ထံၣ်ဘၣ် တၢ်နးတၢ်ဖှီၣ်န့ၣ် ကစၢ်ယွၤ တဘၣ်သးဝဲ နီတစဲးဘၣ်. (ယၡါယၤ ၆၃:၉) ဒီး “ပှၤတဂၤဂ့ၤ တဂၤဂ့ၤလၢ အအဲၣ်တၢ်မၤဆူၣ်မၤစိးန့ၣ် အဝဲသးဟ့ဝဲလီၤ.”—စံးထီၣ်ပတြၢၤ ၁၁:၅.

• ကစၢ်ယွၤန့ၣ် အတီဒီး အတၢ်ကတိၤထီဘိ ဒီးအလံၣ်တၢ် တသ့ဘၣ်.—ယၡါယၤ ၅၅:၁၀, ၁၁; တံတူး ၁:၂.