သူလံာ်စီဆှံဒ် မဲာ်ထံကလၤအသိး

ယ့ၣ်ၡူး အပျဲၢ်အဘီၣ် စီၤယၤကိာ်န့ၣ် အထိၣ်သတြီၤဝဲ လံာ်စီဆှံ ဒ်သိးဒီး မဲာ်ထံကလၤလၢ အမၤစၢၤပှၤဒ်သိး ပကသ့ၣ်ညါလီၤပသးလၢ ပကဲပှၤဒ်လဲၣ်တဂၤလဲၣ်. (ယၤ ၁:၂၂-၂၅) အဃိ ပသူလံာ်စီဆှံ ဒ်မဲာ်ထံကလၤအသိး ကသ့ဒ်လဲၣ်.

ဖးအီၤလီၤတံၢ်လီၤဆဲး. ပမ့ၢ်ကွၢ်လီၤပသးလၢ မဲာ်ထံကလၤ ထဲတဘျးဖိန့ၣ် ပကဘၣ် ဘှီဘၣ်ထီၣ်ပသးဖဲလဲၣ်န့ၣ် ဘၣ်သ့ၣ်သ့ၣ် ပတထံၣ်ဘၣ်. ဒ်န့ၣ်အသိး ဖဲပဖးလံာ်စီဆှံအခါ ပမ့ၢ်ဖးအီၤချ့ချ့န့ၣ် ဘၣ်သ့ၣ်သ့ၣ် ပကကွၢ်ကပာ်ဘၣ် တၢ်ဂ့ၢ်လၢ ကမၤစၢၤပှၤဒ်သိး ပကဘှီဘၣ်ထီၣ်ပသး. အဃိ ဒ်သိး ပကထံၣ် တၢ်ဂ့ၢ်လၢ ကမၤစၢၤပှၤအဂီၢ် အရ့ဒိၣ်ဒိၣ်မးလၢ ပဖးလံာ်စီဆှံ လီၤတံၢ်လီၤဆဲး.

ဆိကမိၣ်ထီၣ်လၢ ပကဘၣ် ဘှီဘၣ်ထီၣ်ပသး ဒီးတမ့ၢ်လၢ ပကဘှီဘၣ်ပှၤဂၤဘၣ်. ညီနုၢ်န့ၣ် ပကွၢ်လီၤပသးလၢ မဲာ်ထံကလၤ ဒ်သိး ပကသ့ၣ်ညါလၢ ပကဘှီဘၣ်ထီၣ်က့ၤ ပသးဒ်လဲၣ်အဂီၢ် ဒီးပတဟးကွၢ်လၢ ပှၤဂၤ ကဘၣ်ဘှီဘၣ်ထီၣ်သး ဒ်လဲၣ်ဘၣ်. ဒ်န့ၣ်အသိး ဖဲပဖးလံာ်စီဆှံအခါ ပမ့ၢ်ဆိကမိၣ်ထီၣ်လၢ ပှၤဂၤ ကဘၣ်ဘှီဘၣ်ထီၣ်က့ၤ အသးအဂ့ၢ်န့ၣ် တမၤစၢၤပှၤလၢ ပကဘှီဘၣ်ထီၣ်က့ၤ ပသးဘၣ်.

ပတဘၣ်ကဲပှၤလၢ အခိၣ်ကိၤဘၣ်. ပမ့ၢ်ကွၢ်လီၤပသးလၢ မဲာ်ထံကလၤ ဒီးထံၣ်ထဲတၢ်လၢ ပတဘၣ်သးဘၣ်န့ၣ် ပသးကဟးဂီၤ. ဒ်န့ၣ်အသိး ဖဲပဖးလံာ်စီဆှံအခါ ပကဘၣ်အိၣ်ဒီး တၢ်ထံၣ်အကြၢးအဘၣ်. ပတဘၣ်ကဲပှၤလၢ အခိၣ်ကိၤဘၣ် ဒီးပကဘၣ် သ့ၣ်နီၣ်ထီၣ်လၢ တၢ်လၢပမၤ တန့ၢ်ဘၣ်န့ၣ် ယဟိဝၤယွၤ တမၢပှၤဘၣ်.—ယၤ ၃:၁၇.