ဘၣ်မနုၤအဃိ ပကြၢးဃ့ တၢ်ဟ့ၣ်ကူၣ် လၢပှၤဂၤအအိၣ်လဲၣ်

၁. ဒ်သိး ပကဆၢတဲာ် တၢ်လၢအဘၣ် ဒီးပတၢ်ရဲၣ်တၢ်ကျဲၤ ကကဲထီၣ်လိၣ်ထီၣ်အဂီၢ် ပကဘၣ်မၤဒ်လဲၣ်. (ကတိၤဒိ ၁၃:၁၀; ၁၅:၂၂)

ပဝဲခဲလၢာ်န့ၣ် ပအဲၣ်ဒိးဆၢတဲာ် တၢ်လၢအဘၣ်. ဒီးတၢ်လၢ ပရဲၣ်ကျဲၤ ပာ်စၢၤန့ၣ် ပအဲၣ်ဒိးလၢ အကကဲထီၣ်လိၣ်ထီၣ်. ပမၤဒ်အံၤ ကသ့အဂီၢ် ကစၢ်ယွၤ အကလုၢ်ကထါ တဲဘၣ်ပှၤလၢ ပကဘၣ် ဃ့တၢ်ဟ့ၣ်ကူၣ်.—ဖး ကတိၤဒိ ၁၃:၁၀; ၁၅:၂၂.

၂. ယဟိဝၤယွၤ အၢၣ်လီၤပှၤဒ်လဲၣ်.

^၂ ပှၤလၢအဟ့ၣ်ကူၣ်ပှၤ သ့အဂ့ၤကတၢၢ်န့ၣ် ကဲဝဲပပၢ် ယဟိဝၤယွၤ. အဃိ ပကဘၣ် ဃ့အီၤလၢ အကဟ့ၣ်ပှၤ တၢ်ကူၣ်သ့. ယဟိဝၤယွၤ အၢၣ်လီၤပှၤလၢ အကမၤစၢၤပှၤ ဒီးအတဲဝဲလၢ “ယကကွၢ်နၤ လီၤတံၢ်လီၤဆဲး ဒီးယကဟ့ၣ်ကူၣ်ဟ့ၣ်ဖးနၤ.” (စံး ၃၂:၈) ခီဖျိလၢ ယဟိဝၤယွၤသးအိၣ် ပဝဲတဂၤဘၣ်တဂၤအဃိ အဟ့ၣ်ကူၣ်ပှၤ. ထဲန့ၣ်တကးဒံးဘၣ် အမၤစၢၤပှၤဒ်သိး ပကမၤထွဲ အတၢ်ဟ့ၣ်ကူၣ်.

၃. လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်.

^၃ လၢတၢ်မၤလိအံၤ ပကတဲသကိး ဘၣ်ဃးဒီး ကစၢ်ယွၤ အကလုၢ်ကထါ မၤစၢၤပှၤဒ်သိး ပကသ့ၣ်ညါဘၣ် တၢ်သံကွၢ် လွံၢ်ဖျၢၣ်အံၤ အတၢ်စံးဆၢ. (၁) ဖဲပှၤဟ့ၣ်ကူၣ်ယၤအခါ ဒ်သိး အကကဲဘျုးအဂီၢ် ယကဘၣ်အိၣ်ဒီး တၢ်ဂ့ၤတၢ်ဝါ မနုၤလဲၣ်. (၂) မတဂၤဟ့ၣ်ယၤ တၢ်ဟ့ၣ်ကူၣ်လၢ အဂ့ၤသ့လဲၣ်. (၃) ယလိၣ်ဘၣ် တၢ်ဟ့ၣ်ကူၣ်နီၢ်ကီၢ်န့ၣ် ယပာ်ဖျါထီၣ် ကသ့ဒ်လဲၣ်. (၄) ဘၣ်မနုၤအဃိ ယတဘၣ်မၢ ပှၤဂၤဆၢတဲာ်န့ၢ်တၢ်လၢ ယဂီၢ်လဲၣ်.

ယကဘၣ်အိၣ်ဒီး တၢ်ဂ့ၤတၢ်ဝါ မနုၤလဲၣ်

၄. ဖဲပှၤဟ့ၣ်ကူၣ်ပှၤအခါ ဒ်သိး အကကဲဘျုးအဂီၢ် ပကဘၣ်အိၣ်ဒီး တၢ်ဂ့ၤတၢ်ဝါ မနုၤလဲၣ်.

^၄ ဖဲပှၤဂၤ ဟ့ၣ်ကူၣ်ပှၤအခါ ဒ်သိး အကကဲဘျုးအဂီၢ် ပကဘၣ်အိၣ်ဒီး တၢ်ဆီၣ်လီၤသး ဒီးတူၢ်လိာ်လၢ ပတသ့ၣ်ညါ တၢ်ခဲလၢာ်ဘၣ်. ပမ့ၢ်ဘၣ်ဆၢတဲာ်တၢ် ဘၣ်ဃးဒီး တၢ်အိၣ်သးလၢ ပတလဲၤခီဖျိဘၣ် နီတဘျီဒံးဘၣ်န့ၣ် ပကဘၣ် သ့ၣ်ညါလီၤသးလၢ ပလိၣ်ဘၣ် ပှၤဂၤအတၢ်မၤစၢၤ. ပမ့ၢ်တအိၣ်ဒီး တၢ်ဆီၣ်လီၤသးဘၣ်န့ၣ် ယဟိဝၤယွၤ တမၤစၢၤပှၤဘၣ်. ဒီးဖဲပဖး အကလုၢ်ကထါအခါ တၢ်ဟ့ၣ်ကူၣ် တမံၤဂ့ၤ တမံၤဂ့ၤလၢ အဟ့ၣ်ပှၤန့ၣ် ပကဆိကမိၣ်လၢ ပတလိၣ် မၤထွဲအီၤဘၣ်. (မံ ၆:၈; ၁ ပ့း ၅:၅) ဘၣ်ဆၣ် ပမ့ၢ်အိၣ်ဒီး တၢ်ဆီၣ်လီၤသး ဒီးတူၢ်လိာ်လၢ ပတသ့ၣ်ညါတၢ် ခဲလၢာ်ဘၣ်န့ၣ် ပကအဲၣ်ဒိး ဒိကနၣ်ဒီးမၤထွဲ တၢ်ဟ့ၣ်ကူၣ်လၢ လံာ်စီဆှံပူၤ.

၅. စီၤဒၤဝံး ကပာ်ထီၣ်ထီဘၣ်အသးလၢ တၢ်ဂ့ၢ်မနုၤအဃိလဲၣ်.

^၅ ဆိကမိၣ်ကွၢ် တၢ်မၤလိလၢ ပဒိးန့ၢ်ဘၣ်လၢ စီၤပၤဒၤဝံးအအိၣ်. စီၤဒၤဝံးန့ၣ် အမၤတၢ် ကဲထီၣ်လိၣ်ထီၣ် ဒီဒူၣ်ညါ ဘၣ်ဆၣ် အတပာ်ထီၣ်ထီ အသးဘၣ်. တချုးလၢ အကဲထီၣ် စီၤပၤဒံးဘၣ် တဘျုးနံၣ်န့ၣ် ပှၤအါဂၤ သ့ၣ်ညါအီၤလၢ အကဲပှၤလၢ အဖၠဲးလၢ တၢ်သူၣ်ဝံၣ်သးဆၢ တကပၤ. တကးဒံးဘၣ် စီၤပၤ မၢစ့ၢ်ကီးအီၤလၢ အကဒ့န့ၢ်တၢ် လၢအဂီၢ်. (၁ မူၤ ၁၆:၁၈, ၁၉) ယဟိဝၤယွၤ ဃုထၢထီၣ် စီၤဒၤဝံးလၢ ကကဲထီၣ် စီၤပၤလၢခံတဂၤ ဝံၤအလီၢ်ခံ ယဟိဝၤယွၤ ဟ့ၣ်အီၤ သးစီဆှံ. (၁ မူၤ ၁၆:၁၁-၁၃) ဒီးခီဖျိလၢ အမၤနၢၤဝဲ ပှၤအံၣ်စရ့လးဖိ အဒုၣ်အဒါတဖၣ် ဒီးမၤသံဝဲ ပှၤနီၢ်ဒိၣ်ဖိ စီၤကၤလယး လၢအကဲ ပှၤဖလ့ၡသးဖိအဃိ ပှၤအါဂၤ ပတြၢၤအီၤ. (၁ မူၤ ၁၇:၃၇, ၅၀; ၁၈:၇) စီၤဒၤဝံး မ့ၢ်ကဲပှၤလၢ အပာ်ထီၣ်ထီသးန့ၣ် ဘၣ်သ့ၣ်သ့ၣ် အကဆိကမိၣ်ဝဲလၢ အမၤတၢ် ကဲထီၣ်လိၣ်ထီၣ် အါမးအဃိ အတလိၣ်ပှၤဂၤ အတၢ်ဟ့ၣ်ကူၣ်ဘၣ်. ဘၣ်ဆၣ် ပထံၣ်ဘၣ်လၢ စီၤဒၤဝံးန့ၣ် အအိၣ်ဒီး တၢ်ဆီၣ်လီၤသး.

၆. စီၤဒၤဝံး သးအိၣ်တူၢ်လိာ် ပှၤဂၤအတၢ်ဟ့ၣ်ကူၣ်န့ၣ် ပသ့ၣ်ညါဘၣ်ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၆ စီၤဒၤဝံး ကဲထီၣ်စီၤပၤ သနာ်က့ အရ့လိာ်သး ဘူးဘူးဒီး ပှၤလၢ ကဟ့ၣ်ကူၣ်ဟ့ၣ်ဖးအီၤ. (၁ ကွဲး ၂၇:၃၂-၃၄) စီၤဒၤဝံး မၤဝဲဒ်အံၤန့ၣ် တလီၤကမၢကမၣ်ဘၣ်. ပမ့ၢ်ကွၢ် တချုးဖဲ စီၤဒၤဝံး ကဲထီၣ်စီၤပၤ ဒံးဘၣ်ဒၣ်လဲာ် အသးအိၣ် ဒိကနၣ် ပှၤဂၤအတၢ်ဟ့ၣ်ကူၣ်. အတူၢ်လိာ် ပှၤပိာ်ခွါ အတၢ်ဟ့ၣ်ကူၣ် တကးဒံးဘၣ် အတူၢ်လိာ်စ့ၢ်ကီး ပှၤပိာ်မုၣ်တဂၤ လၢအမံၤမ့ၢ် နီၢ်အဘံၤကါယံးလး အတၢ်ဟ့ၣ်ကူၣ်. နီၢ်အဘံၤကါယံးလးန့ၣ် အကဲဝဲ စီၤနၤဘလးအမါ. ဒီးစီၤနၤဘလးန့ၣ် အကဲပှၤလၢ အတပာ်ကဲပှၤဂၤဘၣ်, အတသ့ၣ်ညါ စံးဘျုးတၢ်ဘၣ် ဒီးအကဲပှၤလၢ အပာ်ထီၣ်ထီသး. မ့မ့ၢ်စီၤဒၤဝံးန့ၣ် အကဲပှၤလၢ အဆီၣ်လီၤသး ဒီးအမၤထွဲ နီၢ်အဘံၤကါယံးလး အတၢ်ဟ့ၣ်ကူၣ် လၢအဂ့ၤအဃိ အတမၤကမၣ်တၢ်ဘၣ်.—၁ မူၤ ၂၅:၂, ၃, ၂၁-၂၅, ၃၂-၃၄.

၇. လၢစီၤဒၤဝံးအအိၣ်န့ၣ် ပဒိးန့ၢ်ဘၣ် တၢ်မၤလိဒ်လဲၣ်. (စံၣ်တဲၤတဲလီၤတၢ် ၄:၁၃) (ကွၢ်စ့ၢ်ကီးတၢ်ဂီၤ.)

^၇ လၢစီၤဒၤဝံးအအိၣ်န့ၣ် ပဒိးန့ၢ်ဘၣ် တၢ်မၤလိဒ်လဲၣ်. အဒိ ဘၣ်သ့ၣ်သ့ၣ် ပကဖၠဲးလၢ တၢ်ဂ့ၢ်တမံၤမံၤ မ့တမ့ၢ် ပအိၣ်ဒီး တၢ်စိကမီၤ တနီၤလၢ ပှၤဂၤအဖီခိၣ်. ဘၣ်ဆၣ် ပတဘၣ် ဆိကမိၣ်လၢ ပသ့ၣ်ညါတၢ်ခဲလၢာ် ဒီးပှၤဂၤတလိၣ် ဟ့ၣ်ကူၣ်ပှၤန့ၣ်ဘၣ်. ဒ်စီၤဒၤဝံးအသိး ပှၤတဂၤဂ့ၤ တဂၤဂ့ၤ မ့ၢ်ဟ့ၣ်ကူၣ်ပှၤန့ၣ် ပကြၢးသးအိၣ် တူၢ်လိာ်ဒီးဒိကနၣ် တၢ်ဟ့ၣ်ကူၣ်လၢအဂ့ၤ. (ဖး စံၣ်တဲၤတဲလီၤတၢ် ၄:၁၃.) ပမ့ၢ်ဒိကနၣ် ပှၤဂၤတၢ်ဟ့ၣ်ကူၣ်န့ၣ် ကမၤစၢၤပှၤဒ်သိး ပတမၤတၢ်လၢ ကကဲထီၣ် တၢ်ကီတၢ်ခဲ လၢပနီၢ်ကစၢ် ဒီးပှၤဂၤအဂီၢ်ဘၣ်.

မတဂၤဟ့ၣ်ယၤ တၢ်ဟ့ၣ်ကူၣ်လၢ အဂ့ၤသ့လဲၣ်

၈. ဘၣ်မနုၤအဃိ စီၤယိနၤသၣ် ကဲပှၤဟ့ၣ်ကူၣ်တၢ်အဂ့ၤလၢ စီၤဒၤဝံးအဂီၢ်လဲၣ်.

^၈ ဆိကမိၣ်ကွၢ် တၢ်မၤလိ အဂၤတခါလၢ ပဒိးန့ၢ်ဘၣ်လၢ စီၤဒၤဝံးအအိၣ်. စီၤဒၤဝံးန့ၣ် အဃ့တၢ်ဟ့ၣ်ကူၣ်လၢ ပှၤလၢအအိၣ်ဒီး တၢ်ရ့လိာ်သး လၢအဂ့ၤဒီး ယဟိဝၤယွၤ. ထဲန့ၣ်တကးဒံးဘၣ် အဃ့စ့ၢ်ကီး တၢ်ဟ့ၣ်ကူၣ်လၢ ပှၤလၢအသ့ၣ်ညါ တၢ်အိၣ်သး ဂ့ၤဂ့ၤအအိၣ်. အဒိ ဖဲစီၤဒၤဝံး အဲၣ်ဒိးသ့ၣ်ညါလၢ မ့ၢ်စီၤပၤစီလူး အဲၣ်ဒိး အိၣ်ဃူအိၣ်ဖိးက့ၤဒီး အီၤဧါအခါ စီၤဒၤဝံး ဃ့တၢ်ဟ့ၣ်ကူၣ်လၢ စီၤစီလူးအဖိခွါ စီၤယိနၤသၣ်အအိၣ်. ဘၣ်မနုၤအဃိ စီၤယိနၤသၣ် ကဲပှၤဟ့ၣ်ကူၣ်တၢ်လၢ အဂ့ၤလဲၣ်. ခီဖျိလၢ စီၤယိနၤသၣ်န့ၣ် အအိၣ်ဒီး တၢ်ရ့လိာ်သးဒီး ယဟိဝၤယွၤ လၢအဂ့ၤ တကးဒံးဘၣ် အသ့ၣ်ညါ အပါအဂ့ၢ်ဂ့ၤမး. (၁ မူၤ ၂၀:၉-၁၃) ပန့ၢ်ဘၣ် တၢ်မၤလိဒ်လဲၣ်.

၉. ပကြၢးဃ့ တၢ်ဟ့ၣ်ကူၣ်လၢ မတဂၤအအိၣ်လဲၣ်. တဲဖျါထီၣ် တၢ်အဒိ. (ကတိၤဒိ ၁၃:၂၀)

^၉ ဖဲပလိၣ်ဘၣ် တၢ်ဟ့ၣ်ကူၣ်အခါ ပဃ့တၢ်ဟ့ၣ်ကူၣ်လၢ ပှၤလၢအအိၣ်ဒီး တၢ်ရ့လိာ်သး လၢအဂ့ၤဒီး ယဟိဝၤယွၤသ့. ထဲန့ၣ်တကးဒံးဘၣ် ပဃ့ တၢ်ဟ့ၣ်ကူၣ်လၢ ပှၤလၢ အသ့ၣ်ညါ တၢ်အိၣ်သး ဂ့ၤဂ့ၤသ့.a (ဖး ကတိၤဒိ ၁၃:၂၀.) အဒိ ဒီပုၢ်ဝဲၢ်ခွါ သးစၢ်တဂၤ ကဘၣ်သး ဆီဟံၣ်ဆီဃီ. အဃိ မတဂၤဟ့ၣ်အီၤ တၢ်ဟ့ၣ်ကူၣ်လၢ အဂ့ၤသ့လဲၣ်. အဃ့တၢ်ဟ့ၣ်ကူၣ်လၢ အသကိးလၢ တဆီဟံၣ်ဆီဃီဘၣ် အအိၣ်သ့. ဒီးအသကိး မ့ၢ်ဟ့ၣ်အီၤ တၢ်ဟ့ၣ်ကူၣ်လၢ အဒိးသန့ၤထီၣ်သးလၢ လံာ်စီဆှံန့ၣ် ဘၣ်သ့ၣ်သ့ၣ် အကဒိးန့ၢ်ဘၣ် တၢ်ဟ့ၣ်ကူၣ်လၢအဂ့ၤ. ဘၣ်ဆၣ် အဃ့တၢ်ဟ့ၣ်ကူၣ်လၢ ပှၤဒီမိၢ်ဝၤလၢ အဒိၣ်တုာ်ခိၣ်ပှဲၤ လၢနီၢ်သးတခီ ဒီးအသ့ၣ်ညါအီၤဂ့ၤဂ့ၤ အအိၣ်သ့စ့ၢ်ကီး. အမ့ၢ်မၤဝဲဒ်အံၤန့ၣ် ဘၣ်သ့ၣ်သ့ၣ် အကဒိးန့ၢ်ဘၣ် တၢ်ဟ့ၣ်ကူၣ် လီၤလီၤဆီဆီလၢ အလိၣ်ဘၣ်ဝဲ ဒီးကကဲဘျုး ဒိၣ်တစဲး.

၁၀. ခဲအံၤ ပကတဲသကိး တၢ်ဂ့ၢ်မနုၤလဲၣ်.

^၁၀ ဘၣ်ဃးဒီး တၢ်ဂ့ၤတၢ်ဝါခံခါ လၢပလိၣ်ဘၣ် ဒီးမတဂၤဟ့ၣ်ပှၤ တၢ်ဟ့ၣ်ကူၣ်လၢ အဂ့ၤသ့လဲၣ်န့ၣ် ပသ့ၣ်ညါဘၣ် တၢ်စံးဆၢလံ. ခဲအံၤ ပကတဲသကိး တၢ်သံကွၢ် အဂၤခံဖျၢၣ်. ပလိၣ်ဘၣ် တၢ်ဟ့ၣ်ကူၣ်နီၢ်ကီၢ်န့ၣ် ပပာ်ဖျါထီၣ် ကသ့ဒ်လဲၣ် ဒီးဘၣ်မနုၤအဃိ ပတဘၣ်မၢ ပှၤဂၤဆၢတဲာ်န့ၢ်တၢ် လၢပဂီၢ်လဲၣ်.

ယလိၣ်ဘၣ် တၢ်ဟ့ၣ်ကူၣ်နီၢ်ကီၢ်န့ၣ် ယပာ်ဖျါထီၣ် ကသ့ဒ်လဲၣ်

၁၁-၁၂. (က) ပတကြၢးမၤ မနုၤဘၣ်လဲၣ်. (ခ) ဖဲစီၤပၤရဃၤဘၣ် ဘၣ်ဆၢတဲာ်တၢ်လၢ အရ့ဒိၣ်အခါ အမၤဝဲဒ်လဲၣ်.

^၁၁ တဘျီတခီၣ်န့ၣ် ဖျါလၢပှၤတဂၤ ကဃ့ပှၤဂၤ အတၢ်ဟ့ၣ်ကူၣ်. ဘၣ်ဆၣ် အဆၢတဲာ် ပာ်စၢၤအသးလၢ အကမၤတၢ်တမံၤမံၤ မ့ၢ်ဝံၤလံန့ၣ် အဃ့ပှၤဂၤ တၢ်ဟ့ၣ်ကူၣ် သနာ်က့ ပှၤဂၤကတူၢ်လိာ် အတၢ်ဆၢတဲာ်ဧါန့ၣ် အိၣ်ဒၣ် အဘၣ်သးသ့ၣ်ညါဝဲ ဒ်န့ၣ်လီၤ. အမ့ၢ်မၤဝဲ ဒ်အံၤန့ၣ် ဖျါလၢအတလိၣ်ဘၣ် တၢ်ဟ့ၣ်ကူၣ်နီၢ်ကီၢ်ဘၣ်. အဃိ အကြၢး သ့ၣ်နီၣ်ထီၣ်က့ၤ စီၤပၤရဃၤဘၣ် အဒိအတဲာ် လၢအကဲထီၣ် တၢ်ဟ့ၣ်ပလီၢ်.

^၁၂ စီၤပၤၡလိၤမိၤ သံဝံၤအလီၢ်ခံ စီၤရဃၤဘၣ် ကဲထီၣ်က့ၤ အံၣ်စရ့လး အစီၤပၤ. ဖဲစီၤရဃၤဘၣ် ကဲထီၣ်စီၤပၤအခါ ပှၤအံၣ်စရ့လးဖိတဖၣ် အတၢ်အိၣ်မူ လဲၤထီၣ်လဲၤထီပာ်စၢၤ အါမးလံ. ဘၣ်ဆၣ် အဝဲသ့ၣ် တူၢ်ဘၣ်လၢ စီၤၡလိၤမိၤ မၢအဝဲသ့ၣ် မၤတၢ်နးတလၢ. ပှၤအံၣ်စရ့လးဖိတဖၣ် ဟဲဃ့ကညး စီၤရဃၤဘၣ်လၢ ကမၤညီထီၣ်န့ၢ် အဝဲသ့ၣ်တၢ်မၤ. အဃိ စီၤရဃၤဘၣ် မၢအဝဲသ့ၣ်ဟ့ၣ်အီၤ တၢ်ဆၢကတီၢ်လၢ ကဆိကမိၣ်ထံဝဲ တၢ်ဂ့ၢ်အံၤ. အဆိကတၢၢ်န့ၣ် အဃ့တၢ်ဟ့ၣ်ကူၣ်လၢ ပှၤသူၣ်က့သးပှၢ်တဖၣ်လၢ အမၤစၢၤဘၣ် စီၤၡလိၤမိၤ ဒီးအမၤဝဲဒ်န့ၣ်ဂ့ၤမး. (၁ စီၤပၤ ၁၂:၂-၇) သနာ်က့ အတတူၢ်လိာ် ပှၤသူၣ်က့သးပှၢ်တဖၣ်အံၤ အတၢ်ဟ့ၣ်ကူၣ်ဘၣ်. ဘၣ်မနုၤအဃိလဲၣ်. မ့ၢ်စီၤရဃၤဘၣ် ဆၢတဲာ် ပာ်စၢၤအသးလၢ အကမၤတၢ်တမံၤမံၤ ဝံၤလံဧါ ဒီးအဃ့တၢ်ဟ့ၣ်ကူၣ်န့ၣ် မ့ၢ်ဒၣ်ဒ်သိး အကသ့ၣ်ညါလၢ ပှၤဂၤကတူၢ်လိာ် အတၢ်ဆၢတဲာ်လီၤဧါ. ပမ့ၢ်ကွၢ် ဖဲအတဲတၢ်ဒီး ပိာ်ခွါသးစၢ်တဖၣ်လၢ အဒိၣ်ထီၣ်ဒီးအီၤ ဒ်သိးသိးအခါ အသကိးတဖၣ်အံၤ တူၢ်လိာ်ဝဲ အတၢ်ဆၢတဲာ် ဒီးအသကိးတဖၣ်အံၤ အတၢ်ဟ့ၣ်ကူၣ်န့ၣ် အဘၣ်သးဝဲ. (၁ စီၤပၤ ၁၂:၈-၁၄) စီၤရဃၤဘၣ် တဲဘၣ် ပှၤအံၣ်စရ့လးဖိတဖၣ် ဒ်သိးဒီး အသကိးသးစၢ်တဖၣ် ဟ့ၣ်ကူၣ်အီၤ. အဃိ ပှၤအံၣ်စရ့လးဖိတဖၣ် ထီဒါက့ၤအီၤ ဒီးဃုထၢထီၣ် စီၤပၤလၢအသီ. စးထီၣ်ဖဲန့ၣ်န့ၣ် စီၤရဃၤဘၣ် ထံၣ်ဘၣ်တၢ်ကီတၢ်ခဲ တလီၢ်လီၢ်.—၁ စီၤပၤ ၁၂:၁၆-၁၉.

၁၃. ပလိၣ်ဘၣ် တၢ်ဟ့ၣ်ကူၣ်နီၢ်ကီၢ်န့ၣ် ပပာ်ဖျါထီၣ် ကသ့ဒ်လဲၣ်.

^၁၃ လၢစီၤရဃၤဘၣ် အအိၣ်န့ၣ် ပဒိးန့ၢ်ဘၣ် တၢ်မၤလိဒ်လဲၣ်. ဖဲပဃ့ ပှၤဂၤ အတၢ်ဟ့ၣ်ကူၣ်အခါ ပကဘၣ် ပာ်ဖျါထီၣ်လၢ ပလိၣ်ဘၣ် တၢ်ဟ့ၣ်ကူၣ်နီၢ်ကီၢ် ဒီးသးအိၣ် ဒိကနၣ် ပှၤဂၤအတၢ်ဟ့ၣ်ကူၣ်. အဃိ ပသံကွၢ်လီၤပသး ဒ်အံၤသ့. ‘ယဃ့ပှၤဂၤ အတၢ်ဟ့ၣ်ကူၣ် ဝံၤဒီး ခီဖျိလၢ ယတဘၣ်သး အတၢ်ဟ့ၣ်ကူၣ် ဘၣ်အဃိ မ့ၢ်ယဂ့ၢ်လိာ်ကွံာ် အတၢ်ဟ့ၣ်ကူၣ် တဘျီဃီဧါ.’ ပကကွၢ်သကိး တၢ်အဒိတခါ.

၁၄. ဖဲပဒိးန့ၢ်ဘၣ် တၢ်ဟ့ၣ်ကူၣ်အခါ ပကဘၣ် သ့ၣ်နီၣ်ထီၣ် မနုၤလဲၣ်. တဲဖျါထီၣ်တၢ်အဒိ. (ကွၢ်စ့ၢ်ကီးတၢ်ဂီၤ.)

^၁၄ အဒိ ဒီပုၢ်ဝဲၢ်ခွါတဂၤ ကန့ၢ်ဘၣ် တၢ်မၤတခါလၢ အကဒိးန့ၢ်ဘၣ် လါလဲဂ့ၤမး. တချုးလၢ အတူၢ်လိာ်ဝဲ ဒံးဘၣ်န့ၣ် အဃ့တၢ်ဟ့ၣ်ကူၣ်လၢ တၢ်အိၣ်ဖှိၣ်သးပှၢ် တဂၤအအိၣ်. ဒီပုၢ်ဝဲၢ်ခွါ တဂၤအံၤ တဲဘၣ် တၢ်အိၣ်ဖှိၣ်သးပှၢ်လၢ အမ့ၢ်မၤ တၢ်မၤတခါအံၤန့ၣ် ဘၣ်သ့ၣ်သ့ၣ် အကဘၣ် အိၣ်ယံၤဒီး အဟံၣ်ဖိဃီဖိ ဖးယံာ်ညါ. တၢ်အိၣ်ဖှိၣ်သးပှၢ် တဂၤအံၤ တဲသ့ၣ်နီၣ်အီၤလၢ အမူဒါ အရ့ဒိၣ်ကတၢၢ်လၢ အဟံၣ်ဖိဃီဖိ အဂီၢ်န့ၣ်မ့ၢ်ဝဲ အကဘၣ်မၤစၢၤ အဟံၣ်ဖိဃီဖိလၢ နီၢ်သးတခီ. (အ့း ၆:၄; ၁ တံၤ ၅:၈) တၢ်အိၣ်ဖှိၣ်သးပှၢ် တဂၤအံၤ အတၢ်ဟ့ၣ်ကူၣ်န့ၣ် အတဘၣ်သး တူၢ်လိာ်ဝဲဘၣ်. အဃိ အဃ့တၢ်ဟ့ၣ်ကူၣ်လၢ ဒီပုၢ်ဝဲၢ်မုၣ်ခွါ အဂၤအအိၣ် တုၤလၢအန့ၢ်ဘၣ် တၢ်ဟ့ၣ်ကူၣ်လၢ အဘၣ်သး နၢ်ဟူဝဲ. မ့ၢ်ဒီပုၢ်ဝဲၢ်ခွါအံၤ ပာ်ဖျါထီၣ်လၢ အလိၣ်ဘၣ် ပှၤဂၤအတၢ်ဟ့ၣ်ကူၣ် နီၢ်ကီၢ်ဧါ. မ့တမ့ၢ် မ့ၢ်အဆၢတဲာ် ပာ်စၢၤအသးလၢ အကမၤတၢ်တမံၤမံၤ ဒီးအိၣ်ဒၣ် အအဲၣ်ဒိး သ့ၣ်ညါလၢ ပှၤဂၤကတူၢ်လိာ် အတၢ်ဆၢတဲာ်လီၤဧါ. ပကဘၣ် သ့ၣ်နီၣ်ထီၣ်လၢ ပသးန့ၣ် အကွဲန့ၢ်လွဲန့ၢ်တၢ်. (ယံး ၁၇:၉) ဒီးတဘျီတခီၣ် တၢ်ဟ့ၣ်ကူၣ်လၢ ပတဘၣ်သး နၢ်ဟူဘၣ်န့ၣ် အကဲဝဲ တၢ်ဟ့ၣ်ကူၣ်လၢ ပလိၣ်ဘၣ် အဒိၣ်ကတၢၢ်.

ယကဘၣ်မၢ ပှၤဂၤဆၢတဲာ်န့ၢ်တၢ်လၢ ယဂီၢ်ဧါ

၁၅. ပတကြၢးမၤ မနုၤဘၣ်လဲၣ် ဒီးဘၣ်မနုၤအဃိလဲၣ်.

^၁၅ ယဟိဝၤယွၤ အဲၣ်ဒိးလၢ ပဝဲတဂၤဘၣ်တဂၤန့ၣ် ကဆၢတဲာ်တၢ်လၢ ပနီၢ်ကစၢ်. (ကလၤ ၆:၄, ၅) ဒ်ပသ့ၣ်ညါဘၣ်အသိး တချုးလၢ ပဆၢတဲာ်တၢ် တမံၤမံၤ ဒံးဘၣ်န့ၣ် ပကြၢးဃု တၢ်ဟ့ၣ်ကူၣ်လၢ လံာ်စီဆှံပူၤ ဒီးဃ့တၢ်ဟ့ၣ်ကူၣ်လၢ ပှၤလၢ အဒိၣ်တုာ်ခိၣ်ပှဲၤလၢ နီၢ်သးတခီအအိၣ်. သနာ်က့ ပတဘၣ်မၢ ပှၤဂၤဆၢတဲာ်န့ၢ်တၢ်လၢ ပဂီၢ်ဘၣ်. ဘၣ်သ့ၣ်သ့ၣ် ပှၤတနီၤန့ၣ် ကသံကွၢ်ဝဲ ပှၤလၢ အဝဲသ့ၣ်နာ်န့ၢ်ဝဲ ဒီးပာ်ကဲဝဲလၢ “နမ့ၢ်အိၣ်ဘၣ် လၢယလီၢ်န့ၣ် နကမၤဒ်လဲၣ်.” ပှၤအဂၤတနီၤန့ၣ် ဘၣ်သ့ၣ်သ့ၣ် အတသံကွၢ်ဝဲ ဒ်န့ၣ်ဘၣ် ဘၣ်ဆၣ် အကဆၢတဲာ်တၢ် ဒ်သိးဒီး ပှၤဂၤဆၢတဲာ်ဝဲ ဒီးအတဆိကမိၣ်ထံတၢ်ဘၣ်.

၁၆. ဘၣ်ဃးဒီး တၢ်ညၣ်လၢ ပှၤလုၢ်ထီၣ်ဝဲလၢ တၢ်ဂီၤတၢ်ဖှီၣ်အအိၣ်န့ၣ် ခရံာ်ဖိလၢ ကရံၣ်သူး အတၢ်အိၣ်ဖှိၣ် ဘၣ်ဆၢတဲာ်တၢ်ဒ်လဲၣ်. (၁ ကရံၣ်သူး ၈:၇; ၁၀:၂၅, ၂၆)

^၁၆ ဆိကမိၣ်ကွၢ် တၢ်ကဲထီၣ်သးတခါလၢ အဘၣ်ဃးဒီး ခရံာ်ဖိလၢ ကရံၣ်သူး အတၢ်အိၣ်ဖှိၣ်. ခရံာ်ဖိတဖၣ်န့ၣ် အဘၣ်ဆၢတဲာ်တၢ် ဘၣ်ဃးဒီး တၢ်ညၣ်လၢ ပှၤလုၢ်ထီၣ်ဝဲလၢ တၢ်ဂီၤတၢ်ဖှီၣ်အအိၣ်. အဃိ စီၤပီလူး တဲဘၣ်အဝဲသ့ၣ်လၢ “ပသ့ၣ်ညါလၢ တၢ်ဂီၤတၢ်ဖှီၣ်တဖၣ်အံၤ တမ့ၢ်တၢ်နီတမံၤဘၣ်. ဒီးပသ့ၣ်ညါလၢ ကစၢ်ယွၤန့ၣ် အိၣ်ထဲတဂၤဒီး ကစၢ်ယွၤလၢအဂုၤအဂၤ တအိၣ်ဘၣ်.” (၁ ကရံၣ် ၈:၄) ခီဖျိလၢ စီၤပီလူး အတၢ်ကတိၤအံၤအဃိ ပှၤလၢ တၢ်အိၣ်ဖှိၣ်ပူၤတနီၤ ဆိကမိၣ်ဝဲလၢ တၢ်ညၣ်လၢ ပှၤဆါဝဲလၢ တၢ်ဆါတၢ်ပှ့ၤအလီၢ်န့ၣ် ပှၤမ့ၢ်လုၢ်ထီၣ်ဝဲလၢ တၢ်ဂီၤတၢ်ဖှီၣ် အအိၣ်သနာ်က့ အဝဲသ့ၣ်အီၣ်ဝဲန့ၢ်. ဘၣ်ဆၣ် ခရံာ်ဖိတဂၤတနီၤန့ၣ် ခီဖျိလၢ အသးလၢ အသ့ၣ်ညါဒၣ်တၢ်အဃိ အဝဲသ့ၣ် ဆၢတဲာ်လီၤသးလၢ အတအီၣ် တၢ်ညၣ်လၢ ပှၤလုၢ်ထီၣ်ဝဲဘၣ်. (ဖး ၁ ကရံၣ်သူး ၈:၇; ၁၀:၂၅, ၂၆.) တၢ်ဂ့ၢ်အံၤ အကဲဝဲ ခရံာ်ဖိတဂၤ အနီၢ်ကစၢ် တၢ်ဆၢတဲာ်. တကးဒံးဘၣ် စီၤပီလူး တဟ့ၣ်ကူၣ် ပှၤကရံၣ်သူးဖိတဖၣ်လၢ ကဆၢတဲာ်တၢ် ဒ်သိးဒီးပှၤဂၤ မ့တမ့ၢ် ဆၢတဲာ်န့ၢ်တၢ်လၢ ပှၤဂၤအဂီၢ် နီတဘျီဘၣ်. အဝဲသ့ၣ် တဂၤဘၣ်တဂၤ ကဘၣ်ဟ့ၣ် “တၢ်စံးဆၢလၢ ကစၢ်ယွၤအအိၣ်လၢ [အ] နီၢ်ကစၢ်လီၤ.”—ရိ ၁၄:၁၀-၁၂.

၁၇. ပမ့ၢ်ဆၢတဲာ်တၢ် ဒ်သိးဒီး ပှၤဂၤဆၢတဲာ်ဝဲန့ၣ် တၢ်ကကဲထီၣ်သးဒ်လဲၣ်. တဲဖျါထီၣ်တၢ်အဒိ. (ကွၢ်စ့ၢ်ကီးတၢ်ဂီၤ.)

^၁၇ ဆၢကတီၢ်ခဲအံၤ ပထံၣ်ဘၣ် တၢ်အိၣ်သးလၢ အလီၤဂာ် ဒ်သိးဒီး ခရံာ်ဖိလၢ ကရံၣ်သူး အတၢ်အိၣ်ဖှိၣ် သ့ဒ်လဲၣ်. အဒိ ဆိကမိၣ်ကွၢ် ပတၢ်ဆၢတဲာ် ဘၣ်ဃးဒီး တၢ်သွံၣ်အကူာ်အခီ ဆံးဆံးဖိတဖၣ်အဂ့ၢ်. ခရံာ်ဖိတဂၤ ကတူၢ်လိာ် မ့တမ့ၢ် တတူၢ်လိာ် တၢ်သွံၣ်အကူာ်အခီ ဆံးဆံးဖိဧါန့ၣ် အနီၢ်ကစၢ် ကဘၣ်ဆၢတဲာ်ဝဲ.b တၢ်ဂ့ၢ်ဘၣ်ဃးဒီး တၢ်သွံၣ်အကူာ်အခီ ဆံးဆံးဖိန့ၣ် ဘၣ်သ့ၣ်သ့ၣ် ပတနၢ်ပၢၢ်အီၤခဲလၢာ် လီၤတံၢ်လီၤဆဲးဘၣ်, ဘၣ်ဆၣ် ဘၣ်ဃးဒီး တၢ်ဂ့ၢ်အံၤန့ၣ် ပကဘၣ် ဆၢတဲာ်တၢ်လၢ ပနီၢ်ကစၢ်. (ရိ ၁၄:၄) ပမ့ၢ်ဆၢတဲာ်တၢ် ဒ်သိးဒီး ပှၤဂၤဆၢတဲာ်ဝဲန့ၣ် ပဆၢတဲာ်တၢ်လၢ ပနီၢ်ကစၢ် တသ့ထီၣ် နီတဘျီလၢၤဘၣ်. ဘၣ်ဆၣ် ပမ့ၢ်ဆၢတဲာ်တၢ်လၢ ပနီၢ်ကစၢ် ဒီးပတၢ်ဆၢတဲာ် မ့ၢ်ဘၣ်လိာ်သးဒီး လံာ်စီဆှံ အတၢ်ဟံးစုနဲၣ်ကျဲန့ၣ် ပဆၢတဲာ်တၢ်လၢအဂ့ၤ ကသ့ထီၣ်. (ဧ့ၤ ၅:၁၄) အဃိ ပကြၢးဃ့ တၢ်ဟ့ၣ်ကူၣ်လၢ ခရံာ်ဖိလၢ အဒိၣ်တုာ်ခိၣ်ပှဲၤလၢ နီၢ်သးတခီအအိၣ် လၢအခါဖဲလဲၣ်. ပဃုသ့ၣ်ညါ တၢ်ဂ့ၢ်တၢ်ကျိၤလၢ ပနီၢ်ကစၢ်ဝံၤလံ ဘၣ်ဆၣ် ပမ့ၢ်လိၣ်ဘၣ်ဒံး တၢ်မၤစၢၤလၢ ပကနၢ်ပၢၢ် လံာ်စီဆှံ အတၢ်ဟံးစုနဲၣ်ကျဲ လၢအဘၣ်ထွဲဒီး ပတၢ်အိၣ်သးန့ၣ် ပဃ့တၢ်ဟ့ၣ်ကူၣ်သ့.

ဆဲးဃ့တၢ်ဟ့ၣ်ကူၣ်ထီဘိ

၁၈. ယဟိဝၤယွၤ ဟ့ၣ်ပှၤမနုၤလဲၣ်.

^၁၈ ယဟိဝၤယွၤပျဲလၢ ပကဆၢတဲာ်တၢ်လၢ ပနီၢ်ကစၢ်အဃိ အပာ်ဖျါထီၣ်လၢ အနာ်န့ၢ်ပှၤနီၢ်ကီၢ်. အဟ့ၣ်ပှၤ အကလုၢ်ကထါ လံာ်စီဆှံ. အဟ့ၣ်ပှၤ ပသကိးလၢ အဒိၣ်တုာ်ခိၣ်ပှဲၤ လၢကမၤစၢၤပှၤဒ်သိး ပကဆိကမိၣ်ထံ လံာ်စီဆှံ အတၢ်ဟံးစုနဲၣ်ကျဲ. တၢ်ဂ့ၢ်တဖၣ်အံၤ ပာ်ဖျါထီၣ်န့ၢ်ပှၤလၢ ယဟိဝၤယွၤန့ၣ် အလီၤဂာ်ဒ်သိးဒီး ပါလၢအပှဲၤဒီးတၢ်အဲၣ် ဒီးအကွၢ်ထွဲပှၤဂ့ၤဂ့ၤ. (ကတိၤ ၃:၂၁-၂၃) အဃိ ပစံးဘျုးက့ၤအီၤ ကသ့ဒ်လဲၣ်.

၁၉. ပမၤသးခု ယဟိဝၤယွၤအသး ထီဘိကသ့ဒ်လဲၣ်.

^၁၉ ဖဲမိပါတဖၣ် ထံၣ်ဘၣ်ဝဲ အဖိတဖၣ်ဒိၣ်ထီၣ် ဒီးကဲထီၣ် ယဟိဝၤယွၤ အခ့အပှၤလၢ အဒိၣ်တုာ်ခိၣ်ပှဲၤ လၢနီၢ်သးတခီ ဒီးသးအိၣ်မၤစၢၤ ပှၤဂၤအခါ အဝဲသ့ၣ် သးခုဒိၣ်မး. ဒ်န့ၣ်အသိး ဖဲယဟိဝၤယွၤ ထံၣ်ဝဲလၢ ပဆဲးလဲၤထီၣ်လဲၤထီလၢ နီၢ်သးတခီ, ပဃ့ပှၤဂၤ အတၢ်ဟ့ၣ်ကူၣ် ဒီးပဆၢတဲာ်တၢ် ခီဖျိလၢ ပအဲၣ်အီၤအဃိန့ၣ် အသးခုဒိၣ်မး.