ပကဘၣ်ဟ့ၣ်ကူၣ် ပှၤဂၤဒ်လဲၣ်

၁. မတဂၤ ကဘၣ်ဟ့ၣ်ကူၣ်တၢ်လဲၣ် ဒီးဘၣ်မနုၤအဃိလဲၣ်.

နဟ့ၣ်ကူၣ်ပှၤဂၤမုာ်ဧါ. ပှၤတနီၤန့ၣ် အဟ့ၣ်ကူၣ်ပှၤဂၤမုာ်မး. ဘၣ်ဆၣ် ပှၤအဂၤတနီၤန့ၣ် အဟ့ၣ်ကူၣ်ပှၤဂၤ တဘူၣ်အါအါဘၣ် မ့တမ့ၢ် အပျံၤတၢ်. ဒ်လဲၣ်ဂ့ၤဒ်လဲၣ်ဂ့ၤ, တဘျီတခီၣ်န့ၣ် အလီၢ်အိၣ်လၢ ပကဘၣ် ဟ့ၣ်ကူၣ်ပှၤဂၤ. ဘၣ်မနုၤအဃိလဲၣ်. ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ သုမ့ၢ်ပာ်ဖျါထီၣ် တၢ်အဲၣ် လၢတဂၤဒီးတဂၤ အဖီခိၣ်န့ၣ် ပှၤကသ့ၣ်ညါသုလၢ သုမ့ၢ်ယပျဲၢ်ယဘီၣ်. (ယိၤ ၁၃:၃၅) ဒီးကျဲတဘိလၢ ပပာ်ဖျါထီၣ် တၢ်အဲၣ်လၢ ပဒီပုၢ်ဝဲၢ်မုၣ်ခွါ အဖီခိၣ်န့ၣ်မ့ၢ်ဝဲ ပဟ့ၣ်ကူၣ်အဝဲသ့ၣ် ဖဲအလိၣ်ဘၣ်ဝဲအခါ. လံာ်စီဆှံ တဲဝဲလၢ “သကိး” လၢအ “ဟ့ၣ်ကူၣ်တၢ်လၢ တၢ်သူၣ်ဘျၢသးဘျၢအပူၤ” န့ၣ် အမၤဂ့ၤထီၣ် အတၢ်ရ့လိာ်သး ဒီးအသကိး.—ကတိၤ ၂၇:၉.

၂. တၢ်အိၣ်ဖှိၣ်သးပှၢ်တဖၣ် ကဘၣ်မၤမနုၤလဲၣ် ဒီးဘၣ်မနုၤအဃိလဲၣ်. (ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “တၢ်ဟ့ၣ်ကူၣ်လၢ ပန့ၢ်ဘၣ်ဖဲ နွံဖးဖီတၢ်အိၣ်ဖှိၣ်.”)

^၂ ယဟိဝၤယွၤ ဒီးယ့ၣ်ၡူး ဟ့ၣ်လီၤဝဲ တၢ်အိၣ်ဖှိၣ်သးပှၢ်တဖၣ် မူဒါလၢ ကကွၢ်ထွဲ တၢ်အိၣ်ဖှိၣ်ဖိ. အဃိ တၢ်အိၣ်ဖှိၣ်သးပှၢ်တဖၣ် အတၢ်ဟ့ၣ်ကူၣ်န့ၣ် ကဘၣ်ကဲဘျုးလၢ ပှၤဂၤအဂီၢ်. (၁ ပ့း ၅:၂, ၃) ဖဲတၢ်အိၣ်ဖှိၣ်သးပှၢ်တဖၣ် ဟ့ၣ်တၢ်စံၣ်တဲၤတဲလီၤအခါ အဝဲသ့ၣ် သူဝဲလံာ်စီဆှံ အတၢ်ဟ့ၣ်ကူၣ်လၢ အကဲဘျုးလၢ ပဂီၢ်အဃိ အဝဲသ့ၣ် ပာ်ဖျါထီၣ်လၢ အကွၢ်ထွဲပှၤ. ဒီးဖဲပဝဲ တဂၤဘၣ်တဂၤ လိၣ်ဘၣ် တၢ်ဟ့ၣ်ကူၣ်အခါ အဝဲသ့ၣ် ဟ့ၣ်ကူၣ်ပှၤ. တကးဒံးဘၣ် ပှၤလၢအပာ်တ့ၢ်ကွံာ် ယဟိဝၤယွၤန့ၣ် တၢ်အိၣ်ဖှိၣ်သးပှၢ် မၤစၢၤအီၤလၢ ကဟဲက့ၤကဒါလၢ တၢ်အိၣ်ဖှိၣ်ပူၤ. အဃိ ဖဲတၢ်အိၣ်ဖှိၣ်သးပှၢ် မ့တမ့ၢ် ပဝဲခဲလၢာ် ဟ့ၣ်ကူၣ်ပှၤဂၤအခါ ဒ်သိးပတၢ်ဟ့ၣ်ကူၣ် ကကဲဘျုးအဂီၢ် ပကဘၣ်မၤဒ်လဲၣ်.

၃. (က) ဒ်သိး ပဟ့ၣ်ကူၣ်ပှၤဂၤ ကသ့ဒိၣ်ထီၣ်အဂီၢ် ပကဘၣ်မၤဒ်လဲၣ်. (ယၡါယၤ ၉:၆; ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “ဖဲပဟ့ၣ်ကူၣ်တၢ်အခါ ပကြၢးကွၢ်လိ ယ့ၣ်ၡူးအဒိအတဲာ်.”) (ခ) လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်.

^၃ ဒ်သိး ပဟ့ၣ်ကူၣ်ပှၤဂၤ ကသ့ဒိၣ်ထီၣ်အဂီၢ် ပမၤလိ ပှၤတနီၤအဂ့ၢ်လၢ လံာ်စီဆှံ အပူၤသ့. အဒိ ယ့ၣ်ၡူးန့ၣ် အကဲပှၤလၢ အဟ့ၣ်ကူၣ်တၢ်လၢအဂ့ၤ တဂၤ. ဒီးလၢအမံၤလၤသၣ်ကပီၤ အကျါတဖျၢၣ်န့ၣ် လံာ်စီဆှံ ကိးဝဲလၢ “ပှၤဟ့ၣ်ကူၣ်တၢ်လၢအဂ့ၤ.” (ဖး ယၡါယၤ ၉:၆.) လၢတၢ်မၤလိအံၤ ပကတဲသကိး ဘၣ်ဃးဒီး ဖဲပှၤဂၤဃ့ပှၤ တၢ်ဟ့ၣ်ကူၣ်အခါ ပကဘၣ်မၤဒ်လဲၣ်. ဒီး ပှၤမ့ၢ်တဃ့ပှၤ တၢ်ဟ့ၣ်ကူၣ်ဘၣ် သနာ်က့ အလီၢ်မ့ၢ်အိၣ်လၢ ပကဘၣ်ဟ့ၣ်ကူၣ် အဝဲသ့ၣ်န့ၣ် ပကဘၣ်မၤဒ်လဲၣ်. တကးဒံးဘၣ် ပကတဲသကိးစ့ၢ်ကီး ဘၣ်ဃးဒီး ပကဘၣ်ဟ့ၣ်ကူၣ်ပှၤဂၤ လၢအခါဖဲလဲၣ် ဒီးပကဘၣ်ဟ့ၣ်ကူၣ် အဝဲသ့ၣ်ဒ်လဲၣ်.

ဖဲပှၤဂၤဃ့ပှၤ တၢ်ဟ့ၣ်ကူၣ်အခါ

၄-၅. ဖဲပှၤတဂၤ ဟဲဃ့ပှၤ တၢ်ဟ့ၣ်ကူၣ်အခါ အဆိကတၢၢ်န့ၣ် ပကဘၣ် သံကွၢ်လီၤပသး ဒ်လဲၣ်. တဲဖျါထီၣ် တၢ်အဒိ.

^၄ ဖဲပှၤတဂၤ ဟဲဃ့ပှၤ တၢ်ဟ့ၣ်ကူၣ်အခါ ဘၣ်သ့ၣ်သ့ၣ် ပကတူၢ်ဘၣ်လၢ အနာ်န့ၢ်ပှၤအဃိ ပကသးခု. ဒီးဘၣ်သ့ၣ်သ့ၣ် ပကဘၣ်သး မၤစၢၤအီၤတဘျီဃီ. ဘၣ်ဆၣ် အဆိကတၢၢ်န့ၣ် ပကဘၣ် သံကွၢ်လီၤပသးလၢ ‘ဒ်သိး ယကဟ့ၣ်ကူၣ်အီၤအဂီၢ် မ့ၢ်ယအိၣ်ဒီး တၢ်လဲၤခီဖျိ ဒီးသ့ၣ်ညါတၢ်ဂ့ၢ် ဂ့ၤဂ့ၤဧါ.’ တဘျီတခီၣ် ကျဲအဂ့ၤကတၢၢ်လၢ ပမၤစၢၤ ပသကိးသ့န့ၣ်မ့ၢ်ဝဲ ပတဟ့ၣ်ကူၣ်အီၤ တဘျီဃီဘၣ်, ဘၣ်ဆၣ် ပမၢအလဲၤဃ့ တၢ်ဟ့ၣ်ကူၣ်လၢ ပှၤတဂၤဂၤလၢ အအိၣ်ဒီး တၢ်လဲၤခီဖျိ ဒီးအသ့ၣ်ညါတၢ်ဂ့ၢ် ဂ့ၤဂ့ၤအအိၣ်.

^၅ ဆိကမိၣ်ကွၢ် တၢ်အဒိအံၤ. နသကိးလၢ နမုာ်ဒီးအီၤတဂၤ အိၣ်တဆူၣ်ဘၣ် နးဒိၣ်မး. အတဲဘၣ်နၤလၢ အဃုသ့ၣ်ညါ တၢ်ကူစါယါဘျါ အကျိၤအကျဲ တဘျုးခါ ဒီးအမၢ နတဲဘၣ်အီၤ နတၢ်ထံၣ်လၢ အကဘၣ်ဃုထၢဝဲ ဖဲလဲၣ်တခါလဲၣ်. ဘၣ်သ့ၣ်သ့ၣ် နဘၣ်သူၣ်ဘၣ်သး တၢ်ကူစါယါဘျါ အကျိၤအကျဲတခါ ဘၣ်ဆၣ် နတကဲ ကသံၣ်သရၣ်ဘၣ် ဒီးနတဒိးန့ၢ်ဘၣ် တၢ်သိၣ်လိလၢ ကကူစါ တၢ်ဆူးတၢ်ဆါအံၤဘၣ်. ဖဲပထံၣ်ဘၣ် တၢ်အိၣ်သးဒ်အံၤအခါ ကျဲအဂ့ၤကတၢၢ်လၢ ပမၤစၢၤ ပသကိးသ့န့ၣ်မ့ၢ်ဝဲ ပဃုစၢၤအီၤ ပှၤတဂၤဂၤလၢ အသ့ၣ်ညါနၢ်ပၢၢ် တၢ်ဆူးတၢ်ဆါအံၤ ဒီးတၢ်ကူစါယါဘျါ အကျိၤအကျဲ အဂ့ၢ်ဂ့ၤဂ့ၤ.

၆. တချုးလၢ ပဟ့ၣ်ကူၣ်ပှၤဂၤဒံးဘၣ်န့ၣ် ပကဘၣ်မၤဆိ မနုၤလဲၣ်.

^၆ တဘျီတခီၣ်န့ၣ် ပကဆိကမိၣ်လၢ ပဟ့ၣ်ကူၣ်ပသကိးသ့. ဘၣ်ဆၣ် ပမ့ၢ်တဟ့ၣ်ကူၣ်အီၤ တဘျီဃီဘၣ်န့ၣ် ကဂ့ၤဒိၣ်တစဲး. ကတိၤဒိ ၁၅:၂၈ တဲဝဲလၢ “ပှၤတီပှၤလိၤန့ၣ် တချုးလၢ အစံးဆၢတၢ်ဒံးဘၣ်အခါ ဆိကမိၣ်ထံဝဲ.” အဃိ တၢ်ဂ့ၢ်လၢ ပကတဲန့ၣ် ပမ့ၢ်ဆိကမိၣ်လၢ ပသ့ၣ်ညါလံ သနာ်က့ ပမ့ၢ်ဃုသ့ၣ်ညါဆိ တၢ်ဂ့ၢ်တၢ်ကျိၤ, ဃ့ထုကဖၣ် ဒီးဆိကမိၣ်ထံလၢ ပကဟ့ၣ်ကူၣ် ပသကိး ဒ်လဲၣ်န့ၣ် ကဂ့ၤဒိၣ်တစဲး. ပမ့ၢ်မၤဒ်အံၤန့ၣ် ပတၢ်ဟ့ၣ်ကူၣ် ကဘၣ်လိာ်သးဒီး ယဟိဝၤယွၤ အတၢ်ထံၣ်. ပကကွၢ်သကိး ဝံနၤသၣ် အဒိအတဲာ်.

၇. လၢဝံနၤသၣ် အဒိအတဲာ်န့ၣ် ပန့ၢ်ဘၣ် တၢ်မၤလိဒ်လဲၣ်.

^၇ စီၤပၤဒၤဝံး တဲဘၣ်ဝံနၤသၣ်လၢ အဘၣ်သးတ့ထီၣ် တၢ်လုၢ်ဟံၣ်လၢ ယဟိဝၤယွၤအဂီၢ်. ဝံနၤသၣ် ဟ့ၣ်ကူၣ်စီၤဒၤဝံး တဘျီဃီလၢ ကတ့ထီၣ်ဝဲ တၢ်လုၢ်ဟံၣ်. ဘၣ်ဆၣ် နီၢ်ကီၢ်န့ၣ် ယဟိဝၤယွၤ တအဲၣ်ဒိးလၢ စီၤဒၤဝံး ကတ့ထီၣ်ဝဲဘၣ်. အဃိ တချုးလၢ ဝံနၤသၣ်ဟ့ၣ်ကူၣ် စီၤဒၤဝံး ဒံးဘၣ်န့ၣ် အကြၢးသံကွၢ်ဆိ ယဟိဝၤယွၤ အတၢ်ဘၣ်သး. (၁ ကွဲး ၁၇:၁-၄) တၢ်ကဲထီၣ်သး တခါအံၤ ပမၤလိဘၣ်လၢ ဖဲပှၤဃ့ပှၤ တၢ်ဟ့ၣ်ကူၣ်အခါ ပပာ်ဖျါထီၣ် တၢ်ကူၣ်သ့ သ့ခီဖျိ ပတ “ကရီတဲတၢ်ဘၣ်.”—ယၤ ၁:၁၉.

၈. တချုးလၢ ပဟ့ၣ်ကူၣ်ပှၤဂၤ ဒံးဘၣ်အခါ ဘၣ်မနုၤအဃိ ပကဘၣ် ဆိကမိၣ်ထံဆိ လီၤတံၢ်လီၤဆဲးလဲၣ်.

^၈ တချုးလၢ ပဟ့ၣ်ကူၣ်ပှၤဂၤ ဒံးဘၣ်အခါ ဘၣ်မနုၤအဃိ ပကဘၣ် ဆိကမိၣ်ထံဆိ လီၤတံၢ်လီၤဆဲးလဲၣ်န့ၣ် တၢ်ဂ့ၢ်အိၣ်တခါဒံး. ခီဖျိလၢ ပတၢ်ဟ့ၣ်ကူၣ်အဃိ ပှၤတဂၤ မ့ၢ်ဆၢတဲာ်ကမၣ်ဘၣ်တၢ် ဒီးတၢ်ကီတၢ်ခဲ မ့ၢ်ကဲထီၣ်သး တမံၤမံၤန့ၣ် ကကဲစ့ၢ်ကီး ပတၢ်ကမၣ်. အဃိ တချုးလၢ ပဟ့ၣ်ကူၣ်ပှၤဂၤ ဒံးဘၣ်အခါ အရ့ဒိၣ်ဒိၣ်မးလၢ ပကဆိကမိၣ်ထံဆိ လီၤတံၢ်လီၤဆဲး.

ဖဲပှၤတဃ့ပှၤ တၢ်ဟ့ၣ်ကူၣ်ဘၣ်အခါ

၉. တချုးလၢ တၢ်အိၣ်ဖှိၣ်သးပှၢ်တဖၣ် ဟ့ၣ်ကူၣ်ပှၤဂၤ ဒံးဘၣ်န့ၣ် အဝဲသ့ၣ် ကဘၣ်သ့ၣ်ညါဆိဝဲ မနုၤလဲၣ်. (ကလၤတံ ၆:၁)

^၉ ဒီပုၢ်ဝဲၢ်ခွါ မ့တမ့ၢ် ဒီပုၢ်ဝဲၢ်မုၣ် တဂၤဂၤ “အခီၣ်ခါ မ့ၢ်ကမၣ်” န့ၣ် တၢ်အိၣ်ဖှိၣ်သးပှၢ်တဖၣ် ကဘၣ်လဲၤဆိ လၢအအိၣ် ဒီးဟ့ၣ်ကူၣ်အီၤ. (ဖး ကလၤတံ ၆:၁.) ဘၣ်ဃးဒီး လံာ်စီဆှံ တဆၢအံၤန့ၣ် တၢ်တဲဖျါထီၣ် လံာ်စီဆှံအခီပညီ တဲဝဲလၢ “တဘျီတခီၣ်န့ၣ် ပှၤတဂၤ ကဆၢတဲာ် ကမၣ်ဘၣ်တၢ် ဒီးလၢခံန့ၣ် ဘၣ်သ့ၣ်သ့ၣ် အကမၤဘၣ် တၢ်ကမၣ်ဖးဒိၣ်.” အဃိ ဒ်သိး အကဆဲးဘူၣ်ထီၣ်ဘါထီၣ် ယဟိဝၤယွၤ ဒီးအိၣ်မူဘၣ် လီၤထူလီၤယိာ်အဂီၢ် တၢ်အိၣ်ဖှိၣ်သးပှၢ်တဖၣ် သးအိၣ်မၤစၢၤအီၤ. (ယၤ ၅:၁၉, ၂၀) သနာ်က့ ဒ်သိး တၢ်အိၣ်ဖှိၣ်သးပှၢ်တဖၣ် အတၢ်ဟ့ၣ်ကူၣ် ကကဲဘျုးအဂီၢ် အဆိကတၢၢ်န့ၣ် အဝဲသ့ၣ် ကဘၣ်သ့ၣ်ညါဆိဝဲလၢ ပှၤတဂၤန့ၣ် အခီၣ်ခါကမၣ်နီၢ်ကီၢ်. ဒီးတၢ်အိၣ်ဖှိၣ်သးပှၢ်တဖၣ် ကဘၣ်သ့ၣ်နီၣ်ထီၣ်လၢ ပှၤတဂၤဘၣ်တဂၤန့ၣ် အသးလၢအသ့ၣ်ညါဒၣ်တၢ် တဒ်သိးဘၣ်အဃိ တဘျီတခီၣ် အတၢ်ဆၢတဲာ် ကလီၤဆီဝဲ. (ရိ ၁၄:၁-၄) ဘၣ်ဆၣ် တၢ်အိၣ်ဖှိၣ်သးပှၢ်တဖၣ် မ့ၢ်သ့ၣ်ညါဝဲလၢ ဒီပုၢ်ဝဲၢ်တဂၤဂၤ မၤတၢ်တမံၤမံၤလၢ ကမၤဘၣ်ဒိ အနီၢ်ကစၢ်တၢ်ရ့လိာ်သးဒီး ယဟိဝၤယွၤန့ၣ် အဝဲသ့ၣ် ကဘၣ်ဟ့ၣ်ကူၣ်အီၤဒ်လဲၣ်.

၁၀-၁၂. ပှၤတဂၤ မ့ၢ်တဃ့တၢ်ဟ့ၣ်ကူၣ်ဘၣ် သနာ်က့ မ့ၢ်လိၣ်လၢ တၢ်အိၣ်ဖှိၣ်သးပှၢ် ကဘၣ်ဟ့ၣ်ကူၣ်အီၤန့ၣ် တၢ်အိၣ်ဖှိၣ်သးပှၢ် ကြၢးမၤမနုၤလဲၣ်. တဲဖျါထီၣ် တၢ်အဒိ. (ကွၢ်စ့ၢ်ကီးတၢ်ဂီၤ.)

^၁၀ ပှၤတဂၤ မ့ၢ်တဃ့ တၢ်ဟ့ၣ်ကူၣ်ဘၣ်န့ၣ် တၢ်အိၣ်ဖှိၣ်သးပှၢ် ဟ့ၣ်ကူၣ်အီၤ တညီစ့ၢ်ကီးဘၣ်. ဘၣ်မနုၤအဃိလဲၣ်. တၢ်မၢဖိပီလူး တဲဝဲလၢ ပှၤတဂၤ ခါထီၣ်အခီၣ်ခါ ကမၣ်န့ၣ် ဘၣ်သ့ၣ်သ့ၣ် အတသ့ၣ်ညါလီၤ အသးဘၣ်အဃိ တၢ်အိၣ်ဖှိၣ်သးပှၢ် မ့ၢ်ဟ့ၣ်ကူၣ်အီၤန့ၣ် ဘၣ်သ့ၣ်သ့ၣ် အတအဲၣ်ဒိး တူၢ်လိာ်ဝဲဘၣ်. အဃိ တချုးလၢ တၢ်အိၣ်ဖှိၣ်သးပှၢ်တဖၣ် ဟ့ၣ်ကူၣ်အီၤဒံးဘၣ်န့ၣ် ဒ်သိးအတူၢ်လိာ် တၢ်ဟ့ၣ်ကူၣ် ကညီအဂီၢ် တၢ်အိၣ်ဖှိၣ်သးပှၢ် ကြၢးမၤဆိဝဲ မနုၤလဲၣ်.

^၁၁ ထံၣ်တမှံကွၢ်လၢ ပှၤသူၣ်အီၣ်ဖျးအီၣ်တၢ်တဂၤ ဂုာ်ကျဲးစၢး သူၣ်လီၤတၢ်ချံလၢ ဟီၣ်ခိၣ်ညၣ်လၢ အကိၤဒိၣ်မးအဖီခိၣ်. တချုးလၢ အဖှံလီၤတၢ်ချံ ဒံးဘၣ်န့ၣ် အကဘၣ် မၤကဖူၣ်ထီၣ်ဆိ ဟီၣ်ခိၣ် ဝံၤဒီးသူၣ်လီၤတၢ်ချံ. ဒီးဒ်သိး တၢ်ချံကမဲထီၣ်အဂီၢ် အကဘၣ် လူန့ၢ်တၢ်ချံ အထံ. ဒ်န့ၣ်အသိး ဖဲတၢ်အိၣ်ဖှိၣ်သးပှၢ်တဂၤ ဟ့ၣ်ကူၣ် ဒီပုၢ်ဝဲၢ်တဂၤအခါ ဒ်သိးဒီပုၢ်ဝဲၢ်တဂၤအံၤ တူၢ်လိာ် အတၢ်ဟ့ၣ်ကူၣ် ကညီအဂီၢ် အမၤဝဲဒ် ပှၤသူၣ်အီၣ်ဖျးအီၣ်တၢ်ဖိ မၤဝဲအသိးသ့. အဒိ အအိၣ်ခိးဝဲလၢ တၢ်ဆၢကတီၢ် အကြၢးအဘၣ် ဒီးတဲဘၣ် ဒီပုၢ်ဝဲၢ်တဂၤအံၤလၢ အသးအိၣ်အီၤအဃိ အအဲၣ်ဒိး တဲသကိးတၢ်ဒီးအီၤ ဘၣ်ဃးဒီး တၢ်ဂ့ၢ်တမံၤ. ပှၤဟ့ၣ်ကူၣ်တၢ်တဂၤ မ့ၢ်အိၣ်ဒီး မံၤဂ့ၤသၣ်ဂ့ၤလၢ အကဲပှၤလၢ အသးဂ့ၤ ဒီးအအိၣ်ဒီး တၢ်အဲၣ်န့ၣ် ကညီလၢ ပှၤကတူၢ်လိာ် အတၢ်ဟ့ၣ်ကူၣ်.

^၁၂ ဖဲတၢ်အိၣ်ဖှိၣ်သးပှၢ်တဂၤ တဲသကိးတၢ်ဒီး ဒီပုၢ်ဝဲၢ်လၢ အဟ့ၣ်ကူၣ်ဝဲ တဂၤအခါ ဒ်သိးဒီပုၢ်ဝဲၢ်တဂၤအံၤ တူၢ်လိာ်အတၢ်ဟ့ၣ်ကူၣ် ကညီအဂီၢ် “အမၤကဖူၣ်ထီၣ်ဆိ ဟီၣ်ခိၣ်” သ့ခီဖျိ အဒုးသ့ၣ်နီၣ်ထီၣ်အီၤလၢ ပဝဲခဲလၢာ်န့ၣ် ပမၤကမၣ်ဘၣ်တၢ် ဒီးတဘျီတခီၣ်န့ၣ် ပလိၣ်ဘၣ် တၢ်ဟ့ၣ်ကူၣ်. (ရိ ၃:၂၃) ဒီးဖဲတၢ်အိၣ်ဖှိၣ်သးပှၢ် တဂၤအံၤ တဲတၢ်ဒီးအီၤအခါ အကြၢးတဲတၢ်ဒီးအီၤပျီပျီ လၢကလုၢ်မုာ်မုာ် ဒီးလၢတၢ်ပာ်ကဲအပူၤ ဒီးပၠးအီၤ လံာ်စီဆှံအဆၢလၢ အပာ်ဖျါထီၣ်လၢ အခါထီၣ်အခီၣ်ခါကမၣ်လံ. ဖဲဒီပုၢ်ဝဲၢ်တဂၤအံၤ သ့ၣ်ညါလီၤအသးလၢ အမၤကမၣ်တၢ်အခါ တၢ်အိၣ်ဖှိၣ်သးပှၢ်အံၤ “သူၣ်လီၤတၢ်ချံ” သ့ခီဖျိ အတဲနၢ်ပၢၢ်အီၤ လီၤတံၢ်လီၤဆဲး ဘၣ်ဃးဒီး တၢ်လၢအကဘၣ် မၤဂ့ၤထီၣ်က့ၤဝဲ. လၢခံ တၢ်အိၣ်ဖှိၣ်သးပှၢ်အံၤ “လူန့ၢ်တၢ်ချံ အထံ” သ့ခီဖျိ အပတြၢၤအီၤ ဒီးဃ့ထုကဖၣ်ဒီးအီၤ.—ယၤ ၅:၁၅.

၁၃. ဒ်သိး ပှၤတဂၤ ကနၢ်ပၢၢ် တၢ်ဟ့ၣ်ကူၣ်အဂီၢ် တၢ်အိၣ်ဖှိၣ်သးပှၢ် မၤဝဲမနုၤသ့လဲၣ်.

^၁၃ တဘျီတခီၣ် တၢ်အိၣ်ဖှိၣ်သးပှၢ်တဂၤ အဲၣ်ဒိး တဲဝဲတမံၤ ဒီးပှၤလၢအန့ၢ်ဘၣ် တၢ်ဟ့ၣ်ကူၣ်တဂၤ နၢ်ဟူဝဲတမၠိ. အဃိ ဒ်သိး တၢ်တကဲထီၣ်သး ဒ်အံၤတဂ့ၤအဂီၢ် တၢ်အိၣ်ဖှိၣ်သးပှၢ် မၤဝဲမနုၤသ့လဲၣ်. အတဲသကိးတၢ်ဒီး ပှၤလၢအဟ့ၣ်ကူၣ်ဝဲတဂၤ ဒီးသံကွၢ်အီၤ တၢ်သံကွၢ် သ့သ့ဘၣ်ဘၣ်သ့. အမ့ၢ်မၤဝဲဒ်အံၤန့ၣ် အကသ့ၣ်ညါဘၣ်ဝဲလၢ ပှၤတဂၤအံၤ နၢ်ပၢၢ်အတၢ်ဟ့ၣ်ကူၣ် ဒီးအကဘၣ် မၤထွဲဝဲဒ်လဲၣ်န့ၣ် အသ့ၣ်ညါထီၣ်ဝဲလံ.—စံၣ် ၁၂:၁၁.

ပကဘၣ် ဟ့ၣ်ကူၣ်တၢ် လၢအခါဖဲလဲၣ် ဒီးပကဘၣ် ဟ့ၣ်ကူၣ်တၢ်ဒ်လဲၣ်

၁၄. ဖဲပသးထီၣ်တၢ်အခါ ဘၣ်မနုၤအဃိ ပတကြၢး ဟ့ၣ်ကူၣ်တၢ်ဘၣ်လဲၣ်.

^၁၄ ပတကဲ ပှၤလၢပှၤပှဲၤဘၣ်အဃိ တဘျီတခီၣ်န့ၣ် ပတဲတၢ် ဒီးမၤတၢ်လၢ အမၤဘၣ်ဒိ ပှၤဂၤအသး. (ကလီး ၃:၁၃) လံာ်စီဆှံ တဲစ့ၢ်ကီးဝဲလၢ တဘျီတခီၣ်န့ၣ် ပှၤတဂၤဂၤ ကတဲတၢ် မ့တမ့ၢ် မၤတၢ်တမံၤမံၤလၢ အမၤသးထီၣ်ပှၤ. (အ့း ၄:၂၆) ဘၣ်ဆၣ် ဖဲပသးဒိၣ်ထီၣ်တၢ်အခါ ပတဘၣ် ဟ့ၣ်ကူၣ်တၢ်ဘၣ်. ဘၣ်မနုၤအဃိလဲၣ်. ခီဖျိလၢ “ပှၤဟီၣ်ခိၣ်ဖိ မ့ၢ်သးဒိၣ်ထီၣ်တၢ်န့ၣ် အတမၤတၢ်လၢ အတီအလိၤလၢ ကစၢ်ယွၤ အမဲာ်ညါဘၣ်.” (ယၤ ၁:၂၀) အဃိ ဖဲပသးဒိၣ်ထီၣ်တၢ်အခါ ပမ့ၢ်ဟ့ၣ်ကူၣ်တၢ်န့ၣ် ဘၣ်သ့ၣ်သ့ၣ် ပကမၤနးထီၣ်ဘၣ် တၢ်အိၣ်သး. သနာ်က့ ပှၤလၢ အမၤသးထီၣ်ပှၤန့ၣ် ပတဲဘၣ်အီၤလၢ ပတၢ်ထံၣ် ဒီးတၢ်တူၢ်ဘၣ် ဘၣ်ဃးဒီး တၢ်လၢအမၤဝဲသ့. ဘၣ်ဆၣ် ပကြၢးအိၣ်ခိး တုၤလၢ ပသးခုၣ်လီၤ ဝံၤဒီးတဲတၢ်ဒီးအီၤ. ပကကွၢ်သကိး စီၤယိၤဘးအသကိး စီၤအလံဟူၤ လၢအကဲ ပှၤဟ့ၣ်ကူၣ်တၢ် လၢအဂ့ၤတဂၤ အဒိအတဲာ်.

၁၅. လၢစီၤအလံဟူၤ အဒိအတဲာ်န့ၣ် ပန့ၢ်ဘၣ် တၢ်မၤလိဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၅ ဖဲစီၤယိၤဘး အသကိးတဖၣ် တဲအၢတဲသီ အဂ့ၢ်အခါ စီၤယိၤဘး ဂုာ်ကျဲးစၢး တဲတၢ်လၢ အပာ်ဖျါထီၣ်လၢ အတၢ်ကမၣ် တအိၣ်ဘၣ်န့ၣ် တဘျုးသီညါ. ဒီးတၢ်လၢအတဲဝဲန့ၣ် စီၤအလံဟူၤ ဒိကနၣ်ဝဲ ဒီးအသးကညီၤဘၣ်အီၤ. ဘၣ်ဆၣ် ခီဖျိလၢ စီၤယိၤဘး ပာ်တီပာ်လိၤအသး ဒီးတဲကမၣ် ယဟိဝၤယွၤ အဂ့ၢ်အဃိ စီၤအလံဟူၤ သးဒိၣ်ထီၣ်တၢ်. သနာ်က့ စီၤအလံဟူၤ အိၣ်ခိးဝဲလၢ အကတဲတၢ် ဒီးဖဲအဟ့ၣ်ကူၣ် စီၤယိၤဘးအခါ အပာ်အသးမုာ်မုာ် ဒီးတဲတၢ်လၢ တၢ်ပာ်ကဲနီၢ်ကီၢ်. (ဘး ၃၂:၂; ၃၃:၁-၇) စီၤအလံဟူၤ အဒိအတဲာ် လၢအဂ့ၤအံၤ ပာ်ဖျါထီၣ်န့ၢ်ပှၤ တၢ်မၤလိအရ့ဒိၣ် ဘၣ်ဃးဒီး တၢ်ဆၢကတီၢ်လၢ ပကြၢးဟ့ၣ်ကူၣ်တၢ်. ဖဲပဟ့ၣ်ကူၣ်တၢ်အခါ ပမ့ၢ်ပာ်ပသးမုာ်မုာ် ဒီးတဲတၢ်လၢ တၢ်အဲၣ်ဒီးတၢ်ပာ်ကဲန့ၣ် မ့ၢ်ဝဲ ပဟ့ၣ်ကူၣ်တၢ်လၢ အဆၢကတီၢ်ဘၣ်.—စံၣ် ၃:၁, ၇.

ဆဲးဟ့ၣ်ကူၣ်တၢ် ဒီးဆဲးတူၢ်လိာ် တၢ်ဟ့ၣ်ကူၣ်

၁၆. ဖဲ စံးထီၣ်ပတြၢၤ ၃၂:၈ န့ၣ် ပန့ၢ်ဘၣ် တၢ်မၤလိဒ်လဲၣ်.

^၁၆ ယဟိဝၤယွၤ တဲဝဲလၢ “ယကကွၢ်နၤ လီၤတံၢ်လီၤဆဲး ဒီးယကဟ့ၣ်ကူၣ်ဟ့ၣ်ဖးနၤ.” (ဖး စံးထီၣ်ပတြၢၤ ၃၂:၈.) တၢ်ကတိၤအံၤ အဲၣ်ဒိးတဲဝဲလၢ အကဆဲးသိၣ်လိပှၤ. ယဟိဝၤယွၤ ဟ့ၣ်ကူၣ်ပှၤ တကးဒံးဘၣ် အမၤစၢၤပှၤဒ်သိး ပကမၤထွဲ အတၢ်ဟ့ၣ်ကူၣ်. ယဟိဝၤယွၤပာ်လီၤ တၢ်ဒိတၢ်တဲာ် လၢအဂ့ၤဒိၣ်မး တမ့ၢ်ဧီၤ. အဃိ ဖဲပန့ၢ်ဘၣ် တၢ်ခွဲးတၢ်ယာ်လၢ ပကဟ့ၣ်ကူၣ် ပှၤဂၤအခါ မ်ပကွၢ်လိ ယဟိဝၤယွၤ အဒိအတဲာ်, ဆဲးဟ့ၣ်ဂံၢ်ဟ့ၣ်ဘါ ပဒီပုၢ်ဝဲၢ်မုၣ်ခွါ ဒီးမၤစၢၤအဝဲသ့ၣ်လၢ အကဆၢတဲာ်တၢ် လၢအဘၣ်.

၁၇. တၢ်အိၣ်ဖှိၣ်သးပှၢ်တဖၣ် မ့ၢ်ဟ့ၣ်ကူၣ်တၢ်လၢ အဒိးသန့ၤထီၣ်သးလၢ လံာ်စီဆှံန့ၣ် ပကတူၢ်ဘၣ်ဒ်လဲၣ်. (ယၡါယၤ ၃၂:၁, ၂)

^၁၇ ခဲအံၤ ပကဘၣ် ဟ့ၣ်ပှၤဂၤ တၢ်ဟ့ၣ်ကူၣ်လၢအဂ့ၤ ဒီးတူၢ်လိာ် တၢ်ဟ့ၣ်ကူၣ်လၢအဂ့ၤ အါန့ၢ်ဒံး လၢညါ. (၂ တံၤ ၃:၁) တၢ်အိၣ်ဖှိၣ်သးပှၢ်လၢ အဟ့ၣ်ကူၣ်တၢ် လီၤတံၢ်လီၤဆဲးလၢ အဒိးသန့ၤထီၣ်သးလၢ လံာ်စီဆှံန့ၣ် အဝဲသ့ၣ် “လီၤဂာ် ဒ်သိးဒီး ထံကျိဖိတဖၣ်လၢ အအိၣ်လၢ ကီၢ်လၢထံတအိၣ်ဘၣ်” အပူၤ. (ဖး ယၡါယၤ ၃၂:၁, ၂.) ဒီးပသကိးလၢ အဟ့ၣ်ပှၤ တၢ်ဟ့ၣ်ကူၣ်လၢ ပလိၣ်ဘၣ်နီၢ်ကီၢ်န့ၣ် ပပာ်လုၢ်ပာ်ပှ့ၤ အဝဲသ့ၣ်ဒိၣ်မး. အဝဲသ့ၣ် အတၢ်ကတိၤန့ၣ် လီၤဂာ်ဒ်သိးဒီး “ဖီသၣ်ထူတဖၣ်လၢ အအိၣ်လၢ လီခီစ့အပူၤ.” (ကတိၤ ၂၅:၁၁) အဃိ မ်ပဝဲခဲလၢာ် မၤလိအါထီၣ်ပသး ဒ်သိး ပဟ့ၣ်ကူၣ်တၢ် ကသ့ဒိၣ်ထီၣ် ဒီးကတူၢ်လိာ် တၢ်ဟ့ၣ်ကူၣ်လၢအဂ့ၤ ထီဘိ.