“ကနၣ်ပှၤကူၣ်တၢ်သ့ အတၢ်ကတိၤ”

၁. ပဒိးန့ၢ်ဘၣ်​ တၢ်ဟ့ၣ်ကူၣ်သ့လၢ ကျဲဒ်လဲၣ်​ ဒီးဘၣ်မနုၤအဃိ ပလိၣ်ဘၣ်အီၤလဲၣ်.

တဘျီတခီၣ်​ ပဝဲခဲလၢာ် ပလိၣ်ဘၣ်​ တၢ်ဟ့ၣ်ကူၣ်လီၤ. ဘၣ်တဘျီဘျီန့ၣ်​ ပလဲၤဃ့ တၢ်ဟ့ၣ်ကူၣ်လၢ ပှၤလၢပပာ်ကဲအီၤတဖၣ်အအိၣ်. ဘၣ်ဆၣ်​ ဘၣ်တဘျီဘျီန့ၣ်​ ဖဲပ “ခီၣ်ခါ” ဘူးက “ကမၣ်” အခါ ပဒီပုၢ်ဝဲၢ်လၢ အဘၣ်ယိၣ်တၢ်လၢပဂီၢ်န့ၣ်​ ကဟဲဟ့ၣ်ပလီၢ်ပှၤ. (ကလၤတံ ၆:၁) ဒီးအဂၤတခါန့ၣ်​ ဖဲပမၤကမၣ်တၢ်ဖးဒိၣ်​ ဝံၤအလီၢ်ခံ ပှၤလၢအဘှီဘၣ်ထီၣ်က့ၤပှၤတဂၤ ကဟ့ၣ်ကူၣ်ပှၤ. တမံၤဂ့ၤတမၠိဂ့ၤ ပကြၢးဒိကနၣ်​ တၢ်ဟ့ၣ်ကူၣ်လီၤ. ပမ့ၢ်ဒိကနၣ်​ တၢ်ဟ့ၣ်ကူၣ်န့ၣ်​ ကကဲဘျုးလၢပဂီၢ် ဒီးကမၤပူၤဖျဲးပသးသမူလီၤ.—ကတိၤဒိ ၆:၂၃.

၂. ဒ် ကတိၤဒိ ၁၂:၁၅ ပာ်ဖျါထီၣ်ဝဲအသိး ဘၣ်မနုၤအဃိ ပကြၢးဒိကနၣ်​ တၢ်ဟ့ၣ်ကူၣ်လဲၣ်.

^၂ လံာ်စီဆှံအဆၢလၢ တၢ်မၤလိအခီၣ်ထံးန့ၣ်​ ဟ့ၣ်ဂံၢ်ဟ့ၣ်ဘါပှၤလၢ ပက “ကနၣ်ပှၤကူၣ်တၢ်သ့ အတၢ်ကတိၤ” လီၤ. (ကတိၤဒိ ၂၂:၁၇) ပှၤဟီၣ်ခိၣ်ဖိလၢ အသ့ၣ်ညါတၢ်ခဲလၢာ်န့ၣ်​ တအိၣ်နီတဂၤဘၣ်. ဘၣ်ဆၣ်​ ပှၤလၢအသ့ၣ်ညါတၢ် အါန့ၢ်ဒံးပှၤ ဒီးအတၢ်လဲၤခီဖျိ အိၣ်အါန့ၢ်ဒံးပှၤန့ၣ်​ အိၣ်ဝဲထီဘိ. (ဖး ကတိၤဒိ ၁၂:၁၅.) ပမ့ၢ်ဒိကနၣ်​ တၢ်ဟ့ၣ်ကူၣ်န့ၣ်​ မ့ၢ်ဒၣ်ပပာ်ဖျါထီၣ်လၢ ပအိၣ်ဒီး တၢ်ဆီၣ်လီၤသး. တကးဒံးဘၣ်​ မ့ၢ်ဒၣ်ပအၢၣ်လီၤတူၢ်လိာ်လၢ ပမၤတၢ်တသ့ခဲလၢာ်ဘၣ်​ ဒီးပသ့ၣ်ညါလီၤပသးလၢ ပကတုၤလၢ ပဖီတၢၣ်အဂီၢ် ပလိၣ်ဘၣ်တၢ်မၤစၢၤ. ခီဖျိလၢ သးစီဆှံ ထိၣ်ဟူးထိၣ်ဂဲၤထီၣ်အီၤအဃိ စီၤပၤၡလိၤမိၤကွဲးဝဲလၢ “ပှၤဒုးကူၣ်တၢ်အိၣ်အါဂၤန့ၣ်​ ဂၢၢ်ဝဲကျၢၤဝဲလီၤ.”—ကတိၤဒိ ၁၅:၂၂.

၃. ဘၣ်သ့ၣ်သ့ၣ်​ ပကဒိးန့ၢ်ဘၣ်​ တၢ်ဟ့ၣ်ကူၣ်လၢ ကျဲဒ်လဲၣ်.

^၃ ပဒိးန့ၢ်ဘၣ်​ တၢ်ဟ့ၣ်ကူၣ်လိၤလိၤသ့ မ့တမ့ၢ် ပဒိးန့ၢ်ဘၣ်အီၤလၢ ကျဲလၢအဂၤသ့. တၢ်ဟ့ၣ်ကူၣ်လိၤလိၤန့ၣ်​ အဲၣ်ဒိးတဲဝဲ တၢ်မနုၤလဲၣ်. အဲၣ်ဒိးတဲဝဲ တၢ်အိၣ်ဖှိၣ်သးပှၢ် မ့တမ့ၢ် ပဒီပုၢ်ဝဲၢ်လၢ အတုၤထီၣ်ထီၣ်ဘးတဂၤ ကဟဲတဲဘၣ်ပှၤ တၢ်လၢပကဘၣ်မၤဂ့ၤထီၣ်တဖၣ်. ဖဲအဝဲသ့ၣ်​ ဟဲတဲပှၤဒ်န့ၣ်အခါ လီၤဂာ်ဒ်သိး ပဒိးန့ၢ်ဘၣ်​ တၢ်ဟ့ၣ်ကူၣ်လိၤလိၤ. ပှၤမ့ၢ်ဟ့ၣ်ကူၣ်ပှၤ လၢလံာ်စီဆှံ ခီဖျိလၢ အအဲၣ်ပှၤအဃိန့ၣ်​ ပကြၢးပာ်ဖျါထီၣ်​ တၢ်စံးဘျုးစံးဖှိၣ်ခီဖျိ ပဒိကနၣ်အဝဲသ့ၣ်​ ဒီးမၤထွဲအတၢ်ဟ့ၣ်ကူၣ်လီၤ. တၢ်ဟ့ၣ်ကူၣ်လၢ အဟဲလၢကျဲအဂၤန့ၣ်​ အဲၣ်ဒိးတဲဝဲ မနုၤလဲၣ်. ဘၣ်သ့ၣ်သ့ၣ်​ ပကဖးဘၣ်​ တၢ်ဂ့ၢ်တၢ်ကျိၤတမံၤမံၤလၢ လံာ်စီဆှံပူၤ မ့တမ့ၢ် လံာ်လဲၢ်လၢ ပတၢ်ကရၢကရိထုးထီၣ်ဝဲ လၢအမၤစၢၤပှၤဒ်သိး ပကဆိကမိၣ်ထံလီၤပသး ဒီးဘှီဘၣ်ထီၣ်က့ၤပသး. (ဧ့ၤဘြံၤ ၄:၁၂) တၢ်အဝဲန့ၣ်​ ပကိးအီၤလၢ တၢ်ဟ့ၣ်ကူၣ်လၢ ကျဲလၢအဂၤတခါ.

၄. ဒ် စံၣ်တဲၤတဲလီၤတၢ် ၇:၉ ပာ်ဖျါထီၣ်ဝဲအသိး ဖဲပဒိးန့ၢ်ဘၣ်​ တၢ်ဟ့ၣ်ကူၣ်အခါ ပတကြၢးအိၣ်ဒီး တၢ်ပာ်သူၣ်ပာ်သးဒ်လဲၣ်ဘၣ်လဲၣ်.

^၄ ဘၣ်သ့ၣ်သ့ၣ်​ တၢ်ဟ့ၣ်ကူၣ်လၢ အဟဲလိၤလိၤန့ၣ်​ ကကီလၢ ပကဒိကနၣ်​ ဒီးမၤထွဲအီၤအဂီၢ် တကးဒံးဘၣ်​ ပသးဘၣ်ဒိသ့. ဘၣ်မနုၤအဃိလဲၣ်. ပသ့ၣ်ညါလီၤပသးလၢ ပတလၢတပှဲၤဘၣ်ဒၣ်လဲာ် ဖဲပှၤဟဲတဲဘၣ်ပှၤ တၢ်လၢပကဘၣ်​ ဘှီဘၣ်ထီၣ်က့ၤပသးအခါ ကီလၢပကတူၢ်လိာ်အီၤဒံး. (ဖး စံၣ်တဲၤတဲလီၤတၢ် ၇:၉.) ဒီးအဂၤတခါန့ၣ်​ ဘၣ်သ့ၣ်သ့ၣ်​ ပတဘၣ်သူၣ်ဘၣ်သး ပှၤလၢအဟ့ၣ်ကူၣ်ပှၤတဂၤ အတၢ်ပာ်သူၣ်ပာ်သး ဒီးကျဲလၢအဟ့ၣ်ကူၣ်ပှၤဘၣ်. ဒီးဘၣ်သ့ၣ်သ့ၣ်​ ပကဃု ပှၤလၢအဟဲဟ့ၣ်ကူၣ်ပှၤတဂၤ အတၢ်ကမၣ်​ ဒီးပကဆိကမိၣ်လၢ ‘အဟဲဟ့ၣ်ကူၣ်ယၤဘၣ်လဲၣ်, အတလီၤဆီဒီးယၤဒၢး.’ ဒီးအဂၤတခါန့ၣ်​ ပမ့ၢ်တဘၣ်သူၣ်ဘၣ်သး တၢ်ဟ့ၣ်ကူၣ်လၢ ပဒိးန့ၢ်ဘၣ်အီၤဘၣ်န့ၣ်​ ဘၣ်သ့ၣ်သ့ၣ်​ ပတဒိကနၣ်အီၤဘၣ်​ ဒီးပကလဲၤဃ့တၢ်ဟ့ၣ်ကူၣ်လၢ ပှၤအဂၤတဂၤအအိၣ်, မ့ၢ်လၢပမုၢ်လၢ်လၢ အဝဲကတဲပှၤ ဒ်ပအဲၣ်ဒိးနၢ်ဟူအသိးအဃိ.

၅. လၢတၢ်မၤလိအံၤအပူၤ ပကတဲသကိး တၢ်မနုၤလဲၣ်.

^၅ လၢတၢ်မၤလိအံၤအပူၤ ပကတဲသကိး ပှၤလၢအတတူၢ်လိာ်တၢ်ဟ့ၣ်ကူၣ်​ ဒီးပှၤလၢအတူၢ်လိာ် တၢ်ဟ့ၣ်ကူၣ်တဖၣ်​ အဒိအတဲာ်လၢ အအိၣ်လၢ လံာ်စီဆှံပူၤ. ဒီးပကတဲသကိး ဒ်သိးပကတူၢ်လိာ် တၢ်ဟ့ၣ်ကူၣ်​ ဒီးကကဲဘျုးလၢပဂီၢ် အဂီၢ် ပကဘၣ်မၤဒ်လဲၣ်.

ပှၤလၢအတတူၢ်လိာ် တၢ်ဟ့ၣ်ကူၣ်ဘၣ်

၆. ပဒိးန့ၢ်ဘၣ်တၢ်မၤလိလၢ စီၤပၤရဃၤဘၣ်အအိၣ်​ ဒ်လဲၣ်.

^၆ ပကတဲသကိး စီၤရဃၤဘၣ်​ အဒိအတဲာ်. ဖဲအဝဲကဲထီၣ်​ ပှၤအံၣ်စရ့လးဖိ အစီၤပၤအခါ ပှၤဂီၢ်မုၢ်တဖၣ်​ ဟဲလၢအအိၣ်ဒီး ဃ့အီၤလၢ အကမၤဖှံလီၤ တၢ်ဝံတၢ်ယိးလၢ အပါစီၤၡလိၤမိၤ ပာ်ထီၣ်လၢ ပှၤဂီၢ်မုၢ်အလိၤ. ဒီးစီၤရဃၤဘၣ်​ တၢၣ်ပီၣ်သကိးဝဲဒီး ပှၤအံၣ်စရ့လး အပှၤသူၣ်က့သးပှၢ်တဖၣ်​ အဃိ လီၤပတြၢၤဒိၣ်မး. ဒီးပှၤသူၣ်က့သးပှၢ်တဖၣ်အံၤ ဟ့ၣ်ကူၣ်အီၤလၢ ကမၤဝဲဒ် ပှၤဂီၢ်မုၢ်တဖၣ်​ ဃ့ထီၣ်ဝဲ, ဒ်သိးဒီး ပှၤဂီၢ်မုၢ်တဖၣ်​ ကဆဲးဒိးပၢအသးလၢ အဖီလာ်အဂီၢ်. (၁ စီၤပၤ ၁၂:၃-၇) ဘၣ်ဆၣ်​ စီၤရဃၤဘၣ်​ တဘၣ်သူၣ်ဘၣ်သးဝဲ တၢ်ဟ့ၣ်ကူၣ်တခါအံၤ အါအါဘၣ်အဃိ အဝဲလဲၤတၢၣ်ပီၣ်ဒီး ပှၤတရွဲၣ်ဃီဒီးအီၤတဖၣ်. ဒီးပှၤသ့ၣ်တဖၣ်အံၤန့ၣ်​ အသးနံၣ်ကအိၣ်​ ၄၀ အဃိ အတၢ်လဲၤခီဖျိဒု ကအိၣ်တစဲးဖိလံ. (၂ ကွဲးနီၣ်တၢ် ၁၂:၁၃) ဘၣ်ဆၣ်​ ပှၤသ့ၣ်တဖၣ်အံၤ ဟ့ၣ်ကူၣ်စီၤရဃၤဘၣ်လၢ အတဂ့ၤဘၣ်တကပၤ. အဝဲသ့ၣ်​ ဟ့ၣ်ကူၣ်အီၤဒ်သိး အကမၤဃၢထီၣ်​ ပှၤဂီၢ်မုၢ်တဖၣ်​ အတၢ်ဝံတၢ်ယိး. (၁ စီၤပၤ ၁၂:၈-၁၁) စီၤရဃၤဘၣ်​ ဒိးန့ၢ်ဘၣ်တၢ်ဟ့ၣ်ကူၣ်​ လၢအလီၤဆီလိာ်သးအဃိ ဒ်သိး အကသ့ၣ်ညါဝဲလၢ အကြၢးမၤထွဲဝဲ ဖဲလဲၣ်တခါလဲၣ်အဂီၢ် အမ့ၢ်ဃ့တၢ်မၤစၢၤလၢ ယဟိဝၤယွၤအအိၣ်န့ၣ်သ့. ဘၣ်ဆၣ်​ အတမၤဝဲဒ်န့ၣ်ဘၣ်. လၢတၢ်န့ၣ်အလီၢ် အတူၢ်လိာ်ဝဲလၢ ပှၤတရွဲၣ်ဃီဒီးအီၤတဖၣ်​ အတၢ်ဟ့ၣ်ကူၣ်​ လၢအဘၣ်သူၣ်ဘၣ်သးဝဲ ဒိၣ်တစဲး. အဃိ စီၤရဃၤဘၣ်​ ဒီးအံၣ်စရ့လး အပှၤဂီၢ်မုၢ်တဖၣ်​ ထံၣ်ဘၣ်ဒီး တၢ်ကီတၢ်ခဲတဖၣ်. ပဝဲသ့ၣ်စ့ၢ်ကီး တၢ်ဟ့ၣ်ကူၣ်လၢ ပဒိးန့ၢ်ဘၣ်အီၤန့ၣ်​ တမ့ၢ်လၢ ပကဘၣ်သူၣ်ဘၣ်သးအီၤ ထီဘိဘၣ်. ဘၣ်ဆၣ်​ တၢ်ဟ့ၣ်ကူၣ်တဖၣ်​ မ့ၢ်ဒိးသန့ၤထီၣ်အသးလၢ ကစၢ်ယွၤ အကလုၢ်ကထါန့ၣ်​ ပကြၢးတူၢ်လိာ်အီၤလီၤ.

၇. စီၤပၤဧူးစံယါ အဒိအတဲာ်န့ၣ်​ သိၣ်လိပှၤ တၢ်မနုၤလဲၣ်.

^၇ စီၤပၤ ဧူးစံယါ တတူၢ်လိာ် တၢ်ဟ့ၣ်ကူၣ်ဘၣ်. အဝဲလဲၤနုာ်လီၤဝဲလၢ တၢ်လီၢ်တတီၤလၢ ယဟိဝၤယွၤ အတၢ်လုၢ်ဟံၣ်ပူၤ ဒီးပာ်လီၤအသးလၢ အကလုၢ်ထီၣ်​ တၢ်နၢမူ. ထဲဒၣ်ပှၤလုၢ်တၢ်ဒိၣ်တဖၣ်န့ၣ်​ ကစၢ်ယွၤ ဟ့ၣ်အခွဲးလၢကလဲၤနုာ်လီၤ လၢတၢ်လီၢ်အဝဲန့ၣ်. အဃိ ဖဲစီၤပၤဧူးစံယါ လဲၤလၢတၢ်လီၢ်ဖဲန့ၣ်အခါ ပှၤလုၢ်တၢ်ဒိၣ်တဖၣ်​ တဲအီၤလၢ “စီၤဧူးစံယါဧၢ, တၢ်ဘၣ်ဃးဒီးနၤလၢ နကဆိၣ်ကဲၤတၢ်နၢမူလၢ ယွၤအဂီၢ်တမ့ၢ်ဘၣ်, မ့ၢ်အဘၣ်ဃးဒီးပှၤလုၢ်တၢ်အဒိၣ်” လီၤ. ဖဲပှၤလုၢ်တၢ်ဒိၣ်​ တဲအီၤဒ်န့ၣ်အခါ “စီၤဧူးစံယါအသးထီၣ်” တၢ်လီၤ. အမ့ၢ်ဆီၣ်လီၤအသးဒီး တူၢ်လိာ်တၢ်ဟ့ၣ်ကူၣ်​ ဒီးဟးထီၣ်ဖဲန့ၣ်​ တဘျီဃီန့ၣ်​ ဘၣ်သ့ၣ်သ့ၣ်​ ယဟိဝၤယွၤ ကပျၢ်ကွံာ် အတၢ်ကမၣ်. ဘၣ်ဆၣ်​ ဘၣ်မနုၤအဃိ အတတူၢ်လိာ် တၢ်ဟ့ၣ်ကူၣ်ဘၣ်လဲၣ်. မ့ၢ်လၢအကဲစီၤပၤအဃိ အကဆိကမိၣ်ဘၣ်ဝဲလၢ တၢ်လၢအအဲၣ်ဒိးမၤဝဲန့ၣ်​ မၤဝဲသ့. ဘၣ်ဆၣ်​ ယဟိဝၤယွၤ တဘၣ်သး တၢ်လၢအမၤဝဲဘၣ်. မ့ၢ်လၢအဝဲ ပာ်ထီၣ်ထီအသးအဃိ အဘၣ်တၢ်စံၣ်ညီၣ်အီၤလၢ တၢ်ဆါအၢ ဒီးအ “ဘၣ်တၢ်ဆါအၢ တုၤမုၢ်နံၤလၢအသံဝဲ” လီၤ. (၂ ကွဲးနီၣ်တၢ် ၂၆:၁၆-၂၁) စီၤပၤဧူးစံယါ အဒိအတဲာ်န့ၣ်​ သိၣ်လိပှၤလၢ ပမ့မ့ၢ် ပှၤဒ်လဲၣ်ဂ့ၤဒ်လဲၣ်ဂ့ၤ ပမ့ၢ်တတူၢ်လိာ် တၢ်ဟ့ၣ်ကူၣ်လၢ အဒိးသန့ၤထီၣ်အသးလၢ လံာ်စီဆှံဘၣ်န့ၣ်​ ပတဒိးန့ၢ်ဘၣ်​ ယဟိဝၤယွၤ အတၢ်ဘၣ်သးလၢၤဘၣ်.

ပှၤလၢအတူၢ်လိာ် တၢ်ဟ့ၣ်ကူၣ်

၈. ဖဲစီၤယိၤဘး ဒိးန့ၢ်ဘၣ်​ တၢ်ဟ့ၣ်ကူၣ်အခါ အမၤဝဲဒ်လဲၣ်.

^၈ လံာ်စီဆှံ ပာ်ဖျါထီၣ်ဝဲ ပှၤအဒိအတဲာ်လၢ အကဲထီၣ်​ တၢ်ဟ့ၣ်ပလီၢ်လၢပဂီၢ် တကးဒံးဘၣ်​ အပာ်ဖျါထီၣ်ဝဲ ပှၤဒိဂ့ၤတဲာ်ဘၣ်​ လၢအန့ၢ်ဘၣ်​ တၢ်ဆိၣ်ဂ့ၤ ခီဖျိအတူၢ်လိာ် တၢ်ဟ့ၣ်ကူၣ်အဃိလီၤ. ပကဆိကမိၣ်ကွၢ် စီၤယိၤဘး အဂ့ၢ်. အဝဲမ့ၢ်ပှၤလၢ အပျံၤကစၢ်ယွၤ ဘၣ်ဆၣ်​ အတလၢတပှဲၤဘၣ်. စီၤယိၤဘးတူၢ်ဘၣ်​ တၢ်ဆီၣ်သနံးအါမးအဃိ အဝဲဟးတဲကြီတၢ်. အဃိ စီၤအလံဟူၤ ဒီးယဟိဝၤယွၤ ဟ့ၣ်ကူၣ်အီၤလိၤလိၤလီၤ. ဖဲန့ၣ်အဆၢကတီၢ် စီၤယိၤဘးမၤဝဲဒ်လဲၣ်. အဝဲတူၢ်လိာ် တၢ်ဟ့ၣ်ကူၣ်လၢ တၢ်ဆီၣ်လီၤသးအပူၤ ဒီးတဲဝဲလၢ “တၢ်လၢယတသ့ၣ်ညါဘၣ်န့ၣ်​ ယကတိၤတၢ် . . . ယသးဘၣ်အၢလီၤယသး, [“ယပီၢ်ယၢ်လီၤက့ၤယသး လၢတၢ်လၢ ယတဲအဃိ,” NWT] ဒီးပီၢ်ယၢ်လီၤက့ၤယသးလၢ ဟီၣ်ခိၣ်အကမူၣ်​ ဒီးဖၣ်ဆါအကျါလီၤ.” မ့ၢ်လၢစီၤယိၤဘး အိၣ်ဒီးတၢ်ဆီၣ်လီၤသးအဃိ ယဟိဝၤယွၤ ဆိၣ်ဂ့ၤအီၤလီၤ.—ယိၤဘး ၄၂:၃-၆, ၁၂-၁၇.

၉. ဖဲစီၤမိၤၡ့ ဒိးန့ၢ်ဘၣ်​ တၢ်ဟ့ၣ်ကူၣ်အခါ အပာ်လီၤဒိဂ့ၤတဲာ်ဘၣ်ဒ်လဲၣ်.

^၉ ဖဲစီၤမိၤၡ့ မၤကမၣ်တၢ်ဖးဒိၣ်​ ဝံၤအလီၢ်ခံ အတူၢ်လိာ် တၢ်သိၣ်က့ၤသီက့ၤအဃိ အပာ်လီၤ ဒိဂ့ၤတဲာ်ဘၣ်လီၤ. ဘၣ်တဘျီန့ၣ်​ စီၤမိၤၡ့ အသးထီၣ်တၢ် ဒီးတမၤလၤကပီၤဘၣ်​ ယဟိဝၤယွၤဘၣ်. အဃိ အတလဲၤနုာ်လီၤဘၣ်လၢ ကီၢ်တၢ်စံးပာ်အပူၤလၢၤဘၣ်. (၄ မိၤၡ့ ၂၀:၁-၁၃) ဖဲစီၤမိၤၡ့ မၢယဟိဝၤယွၤ က့ၤဆိကမိၣ်က့ၤ အတၢ်ဆၢတဲာ်အခါ ယဟိဝၤယွၤတဲအီၤလၢ “လၢတၢ်တမံၤန့ၣ်အဂ့ၢ်အကျိၤ ကတိၤလၢၤဒီးယၤတဂ့ၤ.” (၅ မိၤၡ့ ၃:၂၃-၂၇) ဘၣ်ဆၣ်​ စီၤမိၤၡ့ တသးဒိၣ်ထီၣ်တၢ်ဘၣ်. လၢတၢ်န့ၣ်အလီၢ် အဝဲတူၢ်လိာ် ယဟိဝၤယွၤ အတၢ်ဆၢတဲာ် အဃိ ယဟိဝၤယွၤ ဟ့ၣ်အခွဲးလၢ စီၤမိၤၡ့ ကဆဲးတီခိၣ်ရိၤမဲ ပှၤအံၣ်စရ့လးဖိတဖၣ်. (၅ မိၤၡ့ ၄:၁) ခီဖျိလၢ စီၤယိၤဘး ဒီးစီၤမိၤၡ့ တူၢ်လိာ်တၢ်ဟ့ၣ်ကူၣ်အဃိ အဝဲသ့ၣ်​ ပာ်လီၤဒိဂ့ၤတဲာ်ဘၣ်​ လၢပဂီၢ်လီၤ. စီၤယိၤဘး ဆီတလဲအတၢ်ထံၣ်​ ဒီးတတဲပူၤဖျဲးအသးဘၣ်. မ့မ့ၢ် စီၤမိၤၡ့န့ၣ်​ တၢ်ခွဲးတၢ်ယာ်လၢ အပာ်လုၢ်ပာ်ပှ့ၤဝဲန့ၣ်​ တဒိးန့ၢ်ဘၣ်ဝဲလၢၤဘၣ်​ သနာ်က့ အဝဲတူၢ်လိာ် ယဟိဝၤယွၤအတၢ်ဟ့ၣ်ကူၣ်​ ဒီးဆဲးတီဒီး ယဟိဝၤယွၤ.

၁၀. (က) ပမ့ၢ်တူၢ်လိာ် တၢ်ဟ့ၣ်ကူၣ်န့ၣ်​ ပကဒိးန့ၢ်ဘၣ်အဘျုး ဒ်လဲၣ်န့ၣ်​ ကတိၤဒိ ၄:၁၀-၁၃ ပာ်ဖျါထီၣ်ဝဲဒ်လဲၣ်. (ခ) ပဒီပုၢ်ဝဲၢ်တနီၤလၢ အဒိးန့ၢ်ဘၣ်​ တၢ်ဟ့ၣ်ကူၣ်န့ၣ်​ အိၣ်ဒီးတၢ်ပာ်သူၣ်ပာ်သး လၢအဂ့ၤဒ်လဲၣ်.

^၁၀ ပမ့ၢ်ကွၢ်လိမၤဒိး စီၤယိၤဘး ဒီးစီၤမိၤၡ့ လၢအအိၣ်ဒီး တၢ်သးတီန့ၣ်​ ပကဒိးန့ၢ်ဘၣ်​ အဘျုး. (ဖး ကတိၤဒိ ၄:၁၀-၁၃.) ပဒီပုၢ်ဝဲၢ်မုၣ်ခွါအါဂၤန့ၣ်​ မၤဝဲဒ်န့ၣ်လီၤ. ပကဆိကမိၣ်ကွၢ် ဒီပုၢ်ဝဲၢ်ခွါ အ့ၤမဲနူၤ လၢအအိၣ်လၢ ခိကိၣ်န့ၣ်​ ဘၣ်ဃးဒီး တၢ်ဟ့ၣ်ကူၣ်လၢ အဒိးန့ၢ်ဘၣ်ဝဲန့ၣ်​ အတဲဝဲလၢ “ဒီပုၢ်ဝဲၢ်ခွါလၢ အဒိၣ်တုာ်ခိၣ်ပှဲၤ လၢတၢ်အိၣ်ဖှိၣ်ပူၤတဖၣ်န့ၣ်​ အဝဲသ့ၣ်​ ထံၣ်ဝဲလၢ ယကမၤဘၣ်​ တၢ်လၢအကမၤဘၣ်ဒိ ယတၢ်ရ့လိာ်သးဒီး ယဟိဝၤယွၤ ဒီးအဝဲသ့ၣ်​ ဟဲမၤစၢၤယၤ. ဒီးယမၤထွဲ အဝဲသ့ၣ်အတၢ်ဟ့ၣ်ကူၣ်အဃိ ယဟးဆှဲး တၢ်ကီတၢ်ခဲတဖၣ်န့ၢ်ဝဲ.”b ဒီပုၢ်ဝဲၢ်မုၣ်မဲကၢၤ လၢအအိၣ်လၢ ကီၢ်ခဲနဒၣ်​ ဒီးအမၤပှၤလဲၤလၢညါတဂၤန့ၣ်​ တဲဝဲလၢ “တၢ်ဟ့ၣ်ကူၣ်လၢ ယန့ၢ်ဘၣ်အီၤတဖၣ်န့ၣ်​ ယတအဲၣ်ဒိး ဒိကနၣ်အီၤ ကိးခါဒဲးဘၣ်, ဘၣ်ဆၣ်​ နီၢ်ကီၢ်န့ၣ်​ တၢ်ဟ့ၣ်ကူၣ်တဖၣ်အံၤ အကဲတၢ်လၢယလိၣ်ဘၣ်အီၤ.” ဒီပုၢ်ဝဲၢ်ခွါ မါကိၤ လၢအအိၣ်လၢ ကီၢ်ခရိၣ်အ့ၡၢၣ်န့ၣ်​ တဲဝဲလၢ “ယတၢ်ခွဲးတၢ်ယာ်လၢ တၢ်အိၣ်ဖှိၣ်အပူၤ လီၤမၢ်ကွံာ် ဒီးယဆိကမိၣ်ထံက့ၤ တၢ်ဆၢကတီၢ်ဖဲန့ၣ်အခါ ယသ့ၣ်ညါလၢ တၢ်ဟ့ၣ်ကူၣ်လၢ ယဒိးန့ၢ်အီၤတဖၣ်န့ၣ်​ မၤစၢၤယၤဒ်သိး ယတၢ်ရ့လိာ်သးဒီးယဟိဝၤယွၤ ကဂ့ၤထီၣ်က့ၤအဂီၢ်.”

၁၁. ဘၣ်ဃးဒီး တၢ်တူၢ်လိာ် တၢ်ဟ့ၣ်ကူၣ်န့ၣ်​ ဒီပုၢ်ဝဲၢ်ခွါ ခါချဲ(န်) က့ၤတဲက့ၤဝဲဒ်လဲၣ်.

^၁၁ ဒီပုၢ်ဝဲၢ်ခွါ ခါချဲ(န်) လၢအမ့ၢ် ပှၤပၢဆှၢတၢ်ကမံးတံာ်န့ၣ်​ အိၣ်ဒီးတၢ်ဒိဂ့ၤတဲာ်ဘၣ်​ လၢအတူၢ်လိာ်ဝဲ တၢ်ဟ့ၣ်ကူၣ်လီၤ. လၢအတၢ်အိၣ်မူ အတၢ်လဲၤခီဖျိအဂ့ၢ်ပူၤန့ၣ်​ အတဲဖျါထီၣ်ဝဲလၢ ဘၣ်တဘျီ အသကိးလၢ အဘူးဒီးအီၤ ဒီပုၢ်ဝဲၢ်ခွါ ကၠိစဲး ရၢၤသဖၢၤန့ၣ်​ ဟ့ၣ်ကူၣ်အီၤ ဆူၣ်တစဲး. ဒီပုၢ်ဝဲၢ်ခါချဲ(န်) တဲဝဲလၢ ဖဲပှၤဟ့ၣ်ကူၣ်အီၤသီသီခါဒု အသးဘၣ်ဒိတစဲး. ဒီးအတဲဝဲလၢ “လၢခံဖဲဒီပုၢ်ဝဲၢ် ရၢၤသဖၢၤ ထံၣ်ယၤအခါ လၢတၢ်မဲာ်မုာ်နါဆၢအပူၤ အတဲယၤလၢ ‘အိၣ်ဆူၣ်ဧါ ခါ.’ မ့ၢ်လၢ ယသးဘၣ်ဒိဒံးအဃိ ယက့ၤစံးဆၢက့ၤအီၤ မုာ်မုာ်တမုာ်မုာ်. အဃိ အဝဲတဲယၤလၢ ‘ခါဧၢ, ပလီၢ်နသးနီၤ. မုၣ်ကီၤလံၢ် ကွၢ်နခီၣ်ခါ.’ ယပာ်ယသးတဘၣ်လၢၤအဃိ ယတဲဆၢက့ၤအီၤလၢ ‘ဒီပုၢ်ဝဲၢ် ရၢၤသဖၢၤ, ဘၣ်နီမံၤဘၣ်.’ ဘၣ်ဆၣ်​ ယသးထီၣ်ဒံးအီၤန့ၣ်​ အသ့ၣ်ညါဝဲ ဒီးအတဲကဒီးဝဲလၢ ‘တဘၣ်နီမံၤဘၣ်နာ်က့ ပလီၢ်သးနီၤ, မုၣ်ကီၤလံၢ်ကွၢ်နခီၣ်ခါ.’ အတဲတၢ်န့ၣ်​ ဖးဘၣ်ညါ. ပဒီပုၢ်ဝဲၢ်တဂၤ တဲတၢ်မ့ၢ်ဘၣ်သနာ်က့ ပမ့ၢ်ဆဲးသးထီၣ်အီၤဒံးန့ၣ်​ မ့ၢ်ဒၣ်ပအိးထီၣ်န့ၢ် မုၣ်ကီၤလံၢ်အကျဲလၢ ကလ့ပစီပှၤအဂီၢ်.”c (အ့းဖ့းစူး ၄:၂၅-၂၇) ဒီပုၢ်ဝဲၢ်ခါချဲ(န်) တူၢ်လိာ်ဝဲ ဒီပုၢ်ဝဲၢ် ရၢၤသဖၢၤ အတၢ်ဟ့ၣ်ကူၣ်အဃိ အဝဲသ့ၣ်​ က့ၤမုာ်လိာ်ကဒါက့ၤအသး ဒ်အလီၢ်လီၢ်အသိးလီၤ.

ပကသးအိၣ်တူၢ်လိာ် တၢ်ဟ့ၣ်ကူၣ်အဂီၢ် ပကဘၣ်မၤဒ်လဲၣ်

၁၂. တၢ်ဆီၣ်လီၤသးန့ၣ်​ ကမၤစၢၤပှၤလၢ ပကမၤထွဲ တၢ်ဟ့ၣ်ကူၣ်ဒ်လဲၣ်. (စံးထီၣ်ပတြၢၤ ၁၄၁:၅)

^၁၂ ဒ်သိး ပကသးအိၣ်တူၢ်လိာ် တၢ်ဟ့ၣ်ကူၣ်အဂီၢ် ပကဘၣ်မၤဒ်လဲၣ်. ပကဘၣ်​ အိၣ်ဒီးတၢ်ဆီၣ်လီၤသး ဒီးသ့ၣ်နီၣ်ထီၣ်လၢ ပမ့ၢ်ပှၤတလၢတပှဲၤဘၣ်​ ဒီးပဟးမၤဘၣ်တၢ် တကျးဒးသ့. ဒ်ပတဲသကိးတ့ၢ်အသိး လၢအခီၣ်ထံးခါန့ၣ်​ စီၤယိၤဘး အိၣ်ဒီးတၢ်ထံၣ်လၢအကမၣ်. ဘၣ်ဆၣ်​ လၢခံအဘှီဘၣ်ထီၣ်က့ၤ အတၢ်ထံၣ်​ ဒီးယဟိဝၤယွၤ ဆိၣ်ဂ့ၤအီၤ. ဘၣ်မနုၤအဃိလဲၣ်. မ့ၢ်လၢအဆီၣ်လီၤအသးအဃိ. အဝဲအိၣ်ဒီး တၢ်ဆီၣ်လီၤသးခီဖျိ စီၤအလံဟူၤ မ့ၢ်ပှၤလၢ အညါဘီၣ်န့ၢ်အီၤ သနာ်က့ အတူၢ်လိာ်ဝဲ အတၢ်ဟ့ၣ်ကူၣ်. (ယိၤဘး ၃၂:၆, ၇) ဖဲပတူၢ်ဘၣ်လၢ ပှၤတကြၢးဟ့ၣ်ကူၣ်ပှၤဘၣ်​ မ့တမ့ၢ် ပှၤလၢအဟ့ၣ်ကူၣ်ပှၤတဂၤ အသးစၢ်န့ၢ်ဒံးပှၤအခါဒၣ်လဲာ် ပမ့ၢ်အိၣ်ဒီး တၢ်ဆီၣ်လီၤသးန့ၣ်​ ကညီလၢပကဒိကနၣ်​ တၢ်ဟ့ၣ်ကူၣ်လီၤ. တၢ်အိၣ်ဖှိၣ်သးပှၢ်တဂၤ လၢအအိၣ်လၢ ကီၢ်ခဲနဒၣ်န့ၣ်​ တဲဝဲလၢ “ပတထံၣ်လီၤပသးဒ် ပှၤဂၤထံၣ်ပှၤအသိးဘၣ်​ အဃိ ပှၤဟ့ၣ်ကူၣ်ပှၤ မ့ၢ်တအိၣ်ဘၣ်န့ၣ်​ ပတလဲၤထီၣ်လဲၤထီဘၣ်.” ပဝဲခဲလၢာ်န့ၣ်​ ပကဘၣ်မၤဒိၣ်ထီၣ်အါထီၣ်​ နီၢ်သးအတၢ်ဂ့ၤတၢ်ဝါတဖၣ်​ ဒီးပကဘၣ်ကဲထီၣ်​ ပှၤသိၣ်လိတၢ် ဒီးစံၣ်တဲၤတဲလီၤ တၢ်သးခုကစီၣ်​ လၢအဂ့ၤတဂၤလီၤ.—ဖး စံးထီၣ်ပတြၢၤ ၁၄၁:၅.

၁၃. တၢ်ဟ့ၣ်ကူၣ်လၢ ပဒိးန့ၢ်ဘၣ်အီၤန့ၣ်​ ပကြၢးထံၣ်အီၤဒ်လဲၣ်.

^၁၃ တၢ်ဟ့ၣ်ကူၣ်န့ၣ်​ ပကဘၣ်ထံၣ်အီၤဒ် အမ့ၢ်ကစၢ်ယွၤအတၢ်အဲၣ်. ယဟိဝၤယွၤ ဘၣ်သးဝဲလၢ ပကန့ၢ်ဘၣ်​ တၢ်လၢအဂ့ၤကတၢၢ် လၢပဂီၢ်. (ကတိၤဒိ ၄:၂၀-၂၂) အဃိ ဖဲအဟ့ၣ်ကူၣ်ပှၤ ခီဖျိလၢ အကလုၢ်ကထါ, လံာ်လဲၢ်လၢ အဒိးသန့ၤထီၣ်အသးလၢ လံာ်စီဆှံ မ့တမ့ၢ် ပဒီပုၢ်ဝဲၢ်ခွါတဖၣ်အခါ မ့ၢ်ဒၣ်အပာ်ဖျါထီၣ်တၢ်အဲၣ်​ လၢပဖီခိၣ်လီၤ. ဧ့ၤဘြံၤ ၁၂:၉, ၁၀ တဲဝဲလၢ “ကစၢ်ယွၤန့ၣ်​ အဝဲသိၣ်က့ၤသီက့ၤပှၤ လၢပကန့ၢ်ဘျုးအဂီၢ်” လီၤ.

၁၄. ဖဲပှၤဟ့ၣ်ကူၣ်ပှၤအခါ ပကဘၣ်​ သးစၢၢ်ဆၢ တၢ်မနုၤလဲၣ်.

^၁၄ သးစၢၢ်ဆၢလၢ တၢ်ဂ့ၢ်တၢ်ကျိၤ, တဘၣ်သးစၢၢ်ဆၢ လၢကျဲလၢပှၤဟဲတဲနၤ ဒ်လဲၣ်ဒ်လဲၣ်တဂ့ၤ. တဘျီတခီၣ်​ ပကတူၢ်ဘၣ်လၢ ပှၤဟဲဟ့ၣ်ကူၣ်ပှၤ အကျိၤအကျဲန့ၣ်​ တဘၣ်ဘၣ်. ပှၤလၢအဟ့ၣ်ကူၣ်တၢ်တဂၤန့ၣ်​ ကြၢးဂုာ်ကျဲးစၢး အဂ့ၤကတၢၢ် ဒ်သိးပှၤတူၢ်လိာ် အတၢ်ဟ့ၣ်ကူၣ်​ ကညီအဂီၢ်.d (ကလၤတံ ၆:၁) ဒီးဖဲပှၤဟ့ၣ်ကူၣ်ပှၤအခါ ပမ့ၢ်တူၢ်ဘၣ်လၢ ပှၤကြၢးဟ့ၣ်ကူၣ်ပှၤလၢ ကျဲအဂၤတဘိသနာ်က့ ပကဘၣ်သးစၢၢ်ဆၢ တၢ်ဂ့ၢ်တၢ်ကျိၤ လၢအတဲပှၤလီၤ. ပသံကွၢ်လီၤပသး ဒ်အံၤသ့. ‘ယမ့ၢ်တဘၣ်သူၣ်ဘၣ်သး ကျဲလၢအဟဲဟ့ၣ်ကူၣ်ယၤ သနာ်က့ တၢ်လၢအတဲဝဲန့ၣ်​ မ့ၢ်အဘၣ်​ အိၣ်တမံၤမံၤဧါ. မ့ၢ်ယကွၢ်ကပာ် ပှၤလၢအဟ့ၣ်ကူၣ်ယၤတဂၤ အတၢ်ဂံၢ်စၢ်ဘါစၢ် ဒီးယဟံးန့ၢ်တၢ်မၤလိလၢအအိၣ်​ ကသ့ဧါ.’ ဖဲပှၤဟ့ၣ်ကူၣ်ပှၤ တဘျီဂ့ၤတဘျီဂ့ၤအခါ ပမ့ၢ်ဂုာ်ကျဲးစၢးဟံးန့ၢ် တၢ်မၤလိန့ၣ်​ မ့ၢ်ဒၣ်ကျဲလၢ ပအိၣ်ဒီး တၢ်ကူၣ်သ့လီၤ.—ကတိၤဒိ ၁၅:၃၁.

နမ့ၢ်ဃ့ တၢ်ဟ့ၣ်ကူၣ်န့ၣ်​ နကဒိးန့ၢ်ဘၣ်အဘျုး

၁၅. ဘၣ်မနုၤအဃိ ပဘၣ်ဃ့ တၢ်ဟ့ၣ်ကူၣ်လဲၣ်.

^၁၅ လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ ပကဃ့တၢ်ဟ့ၣ်ကူၣ်. ကတိၤဒိ ၁၃:၁၀ တဲဝဲလၢ “တၢ်ကူၣ်သ့အိၣ်ဝဲဒီး ပှၤလၢအဒိးန့ၢ် တၢ်ဒုးကူၣ်တၢ်န့ၣ်လီၤ.” ပှၤလၢအဃ့ တၢ်ဟ့ၣ်ကူၣ်န့ၣ်​ ညီနုၢ်လဲၤထီၣ်လဲၤထီ လၢနီၢ်သးတခီ ဒိၣ်န့ၢ်ဒံး ပှၤလၢအအိၣ်ခိးလၢ ပှၤကဟဲဟ့ၣ်ကူၣ်အီၤလီၤ. အဃိ လဲၤဃ့ဆိ တၢ်ဟ့ၣ်ကူၣ်တက့ၢ်.

၁၆. ပကဘၣ်ဃ့ တၢ်ဟ့ၣ်ကူၣ်လၢ ဆၢကတီၢ်ဖဲလဲၣ်.

^၁၆ ဘၣ်သ့ၣ်သ့ၣ်​ ပကဃ့ တၢ်ဟ့ၣ်ကူၣ်လၢ ဒီပုၢ်ဝဲၢ်မုၣ်ခွါတဖၣ်အအိၣ်​ လၢအခါဖဲလဲၣ်. ပကကွၢ်သကိး တၢ်အိၣ်သးတနီၤ. (၁) ဒီပုၢ်ဝဲၢ်မုၣ်တဂၤ ကသံကွၢ် ပှၤစံၣ်တဲၤတဲလီၤတၢ်ဖိလၢ အတၢ်လဲၤခီဖျိအါတဂၤ ကလဲၤပိာ်အခံလၢ အတၢ်မၤလိလံာ်စီဆှံ ဝံၤဒီး ကသံကွၢ်အီၤလၢ မ့ၢ်အမၤဂ့ၤထီၣ်​ အတၢ်သိၣ်လိအကျိၤအကျဲ ကသ့ဒ်လဲၣ်. (၂) ဒီပုၢ်ဝဲၢ်မုၣ်သဘျ့တဂၤ ကအဲၣ်ဒိးပှ့ၤဝဲ တၢ်ကူတၢ်ကၤအဃိ ကသံကွၢ်ဝဲ ဒီပုၢ်ဝဲၢ်မုၣ်လၢ အဒိၣ်တုာ်ခိၣ်ပှဲၤတဂၤ ဘၣ်ဃးဒီး တၢ်ကူတၢ်ကၤလၢ အကပှ့ၤဝဲန့ၣ်​ ဒီပုၢ်ဝဲၢ်မုၣ်တဂၤအံၤ အတၢ်ထံၣ်အိၣ်ဒ်လဲၣ်. (၃) ဒီပုၢ်ဝဲၢ်ခွါတဂၤ ဒိးန့ၢ်ဘၣ်မူဒါလၢ ကဘၣ်ဟ့ၣ်ကမျၢၢ်တၢ်စံၣ်တဲၤတဲလီၤ အဆိကတၢၢ်တဘျီ. အဃိ သံကွၢ်ဝဲ ဒီပုၢ်ဝဲၢ်လၢအတၢ်လဲၤခီဖျိအိၣ်လၢ အဟ့ၣ်တၢ်စံၣ်တဲၤတဲလီၤတၢ်တဂၤ ကကနၣ်န့ၢ်အီၤ လီၤတံၢ်လီၤဆဲး ဒ်သိး အကသ့ၣ်ညါဝဲလၢ အကဘၣ်မၤဂ့ၤထီၣ်ဝဲဖဲလဲၣ်. ဒီးဒီပုၢ်ဝဲၢ်ခွါတဂၤ အဟ့ၣ်တၢ်စံၣ်တဲၤတဲလီၤတၢ် အနံၣ်မ့ၢ်အိၣ်အါမးသနာ်က့ အဃ့တၢ်ဟ့ၣ်ကူၣ်သ့ ဒီးအမၤထွဲဝဲ တၢ်ဟ့ၣ်ကူၣ်လၢ အဒိးန့ၢ်ဘၣ်ဝဲသ့လီၤ.

၁၇. ဒ်သိး ပကဒိးန့ၢ်ဘၣ်အဘျုးလၢ တၢ်ဟ့ၣ်ကူၣ်အဂီၢ် ပကဘၣ်မၤဒ်လဲၣ်.

^၁၇ ပဝဲကိးဂၤဒဲးန့ၣ်​ နွံလၢအကဟဲမ့ၢ်ဂ့ၤ လါလၢအကဟဲမ့ၢ်ဂ့ၤ ဘၣ်သ့ၣ်သ့ၣ်​ ပကဒိးန့ၢ်ဘၣ်​ တၢ်ဟ့ၣ်ကူၣ်လိၤလိၤ မ့တမ့ၢ် လၢကျဲလၢအဂၤလီၤ. ပမ့ၢ်ဒိးန့ၢ်ဘၣ်​ တၢ်ဟ့ၣ်ကူၣ်​ ဒ်လဲၣ်ဂ့ၤဒ်လဲၣ်ဂ့ၤန့ၣ်​ ပကသ့ၣ်နီၣ်ထီၣ်​ တၢ်ဂ့ၢ်လၢ ပတဲသကိးတ့ၢ်အီၤတဖၣ်အံၤ. ပကအိၣ်ဒီး တၢ်ဆီၣ်လီၤသး, ပကသးစၢၢ်ဆၢလၢ တၢ်ဂ့ၢ်တၢ်ကျိၤ ဒီးပတသးစၢၢ်ဆၢလၢ ကျဲလၢပှၤဟဲဟ့ၣ်ကူၣ်ပှၤဘၣ်, ဒီးပကမၤထွဲ တၢ်ဟ့ၣ်ကူၣ်တဖၣ်. ပဝဲခဲလၢာ်န့ၣ်​ ပတအိၣ်ဖျဲၣ်ထီၣ်ဃုာ်ဒီး တၢ်ကူၣ်သ့ဘၣ်. ကစၢ်ယွၤ အကလုၢ်ကထါတဲဝဲလၢ ပမ့ၢ် “ကနၣ်တၢ်ဒုးကူၣ်တၢ်, ဒီးကနၣ်တၢ်သိၣ်လိတၢ်” န့ၣ်ပကကဲထီၣ်ပှၤ “ကူၣ်တၢ်သ့” လီၤ.—ကတိၤဒိ ၁၉:၂၀.