တၢ်လၢနမၤလိဘၣ်န့ၣ် တဲပၠးက့ၤပှၤဂၤ

ဖဲပမၤ နီၢ်ကစၢ် တၢ်မၤလိလံာ်စီဆှံအခါ အမၤဆူၣ်ထီၣ် ပဂံၢ်ပဘါ. တကးဒံးဘၣ် ပမ့ၢ်တဲပၠးက့ၤပှၤဂၤ နီၢ်သး အတၢ်လုၢ်ဒိၣ်ပှ့ၤဒိၣ်တဖၣ် လၢပမၤလိဘၣ်န့ၣ် ပကဒိးန့ၢ်ဘၣ် တၢ်ဂံၢ်တၢ်ဘါ အါန့ၢ်ဒံးအလီၢ်. ကတိၤဒိ ၁၁:၂၅ တဲဝဲလၢ “ပှၤလၢအမၤဆူၣ်ထီၣ် ပှၤဂၤအဂံၢ်အဘါန့ၣ် အနီၢ်ကစၢ် အဂံၢ်အဘါ ကဆူၣ်ထီၣ်ဝဲ စ့ၢ်ကီးလီၤ.”

ပမ့ၢ်တဲပၠးက့ၤပှၤဂၤ တၢ်ဂ့ၢ်လၢ ပမၤလိဘၣ်တဖၣ်န့ၣ် ကမၤစၢၤပှၤဒ်သိး ပတသးပ့ၤနီၣ်အီၤဘၣ် ဒီးပကနၢ်ပၢၢ်အါထီၣ် တၢ်ဂ့ၢ်တၢ်ကျိၤ. ဒီးခီဖျိလၢ တၢ်ဂ့ၢ်လၢ ပမၤလိဘၣ်တဖၣ်န့ၣ် ကဲဘျုးလၢ ပှၤဂၤအဂီၢ် သ့စ့ၢ်ကီးအဃိ ပမ့ၢ်တဲပၠးက့ၤ ပှၤဂၤ တၢ်လုၢ်ဒိၣ်ပှ့ၤဒိၣ် လၢပဃုထံၣ်န့ၢ် တဖၣ်န့ၣ် ပကဒိးန့ၢ်ဘၣ် တၢ်သးခု.—မၤတၢ် ၂၀:၃၅.

မၤကွၢ်ဒ်အံၤ– လၢနွံလၢကဟဲန့ၣ် ဃုတၢ်ခွဲးတၢ်ယာ်ဒ်သိး နကတဲပၠး ပှၤတဂၤဂၤ တၢ်ဂ့ၢ်လၢ နမၤလိဘၣ်. ဘၣ်သ့ၣ်သ့ၣ် နတဲပၠး နဟံၣ်ဖိဃီဖိ, ပှၤတဂၤဂၤလၢ နတၢ်အိၣ်ဖှိၣ်ပူၤ, လၢနတၢ်မၤလီၢ်, လၢကၠိ, လၢနဟံၣ်ခိၣ်ဟံၣ်ဃၢၤ မ့တမ့ၢ် ပှၤလၢနထံၣ်အီၤ ဖဲနလဲၤစံၣ်တဲၤတဲလီၤတၢ်အခါသ့. ဒီးတဲပၠးတၢ်ဂ့ၢ်လၢ နနီၢ်ကစၢ် တၢ်ကတိၤ ယိယိဖိ ဒီးတဲအီၤၡဲၡဲ.

သ့ၣ်နီၣ်ထီၣ်– ဖဲနတဲပၠးက့ၤပှၤဂၤ တၢ်ဂ့ၢ်လၢ နမၤလိဘၣ်အခါ ကဘၣ်မ့ၢ်ဒ်သိး နကဟ့ၣ်ဂံၢ်ဟ့ၣ်ဘါ ပှၤဂၤအဂီၢ် ဒီးတဘၣ်မ့ၢ်ဒ်သိး နကပာ်ဖျါထီၣ်လၢ နသ့ၣ်ညါ တၢ်ဂ့ၢ်အါအါ အဃိဘၣ်.—၁ ကရံၣ် ၈:၁.