တၢ်မၤလိ ၄၀
တၢ်သးဝံၣ် ၁၁၁ တၢ်ဂ့ၢ်လၢ အမၤသးခုပှၤ
ပကအိၣ်ဒီး တၢ်သးခုနီၢ်ကီၢ်အဂီၢ် ယဟိဝၤယွၤ မၤစၢၤပှၤသ့
“ယကသူၣ်ဖှံသးညီလၢ ယကစၢ်ယွၤအပူၤ.”—စံး ၄၃:၄.
တၢ်ဂ့ၢ်မိၢ်ပှၢ်
တၢ်လၢအမၤလီၤမၢ် ပတၢ်သးခုန့ၣ် မ့ၢ်မနုၤလဲၣ်. ဒီးဒ်သိး ပတၢ်သးခု ကအိၣ်ထီၣ်က့ၤအဂီၢ် ပကဘၣ်မၤဒ်လဲၣ်.
၁-၂. (က) ဆၢကတီၢ်ခဲအံၤ ပှၤအါဂၤထံၣ်ဘၣ် တၢ်အိၣ်သးဒ်လဲၣ်. (ခ) လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်.
ဆၢကတီၢ်ခဲအံၤ ဒ်သိး ပှၤအါဂၤ ကအိၣ်ဒီး တၢ်သးခုအဂီၢ် အဝဲသ့ၣ် ဂုာ်ကျဲးစၢး မၤဝဲတၢ်အါမံၤ. အဝဲသ့ၣ် ဂုာ်ကျဲးစၢးဝဲ ထဲလဲၣ်ဘၣ်ဆၣ် အတသးခုနီၢ်ကီၢ်ဘၣ်. အဃိ ပှၤအါဂၤ အသးဟးဂီၤဒိၣ်မး ဒီးဆိကမိၣ်ဝဲလၢ အတၢ်အိၣ်သး ဂ့ၤထီၣ်က့ၤတသ့ နီတဘျီလၢၤဘၣ်. ယဟိဝၤအခ့အပှၤတနီၤ တူၢ်ဘၣ်ဝဲ ဒ်န့ၣ်စ့ၢ်ကီး. ဘၣ်မနုၤအဃိလဲၣ်. ခီဖျိလၢ ပအိၣ်မူဘၣ်လၢ “မုၢ်နံၤခံကတၢၢ်တဖၣ်” အဃိ ပထံၣ်ဘၣ် တၢ်ကီတၢ်ခဲ, တၢ်သူၣ်ကိၢ်သးဂီၤ ဒီးတၢ်သးအုး.—၂ တံၤ ၃:၁.
၂ လၢတၢ်မၤလိအံၤ ပကတဲသကိး ဘၣ်ဃးဒီး တၢ်လၢအမၤလီၤမၢ် ပတၢ်သးခုန့ၣ် မ့ၢ်မနုၤလဲၣ်. ဒီးဒ်သိး ပတၢ်သးခု ကအိၣ်ထီၣ်က့ၤအဂီၢ် ပကဘၣ်မၤဒ်လဲၣ်. အဆိကတၢၢ်န့ၣ် ပကတဲသကိး ဘၣ်ဃးဒီး ဒ်သိး ပကအိၣ်ဒီး တၢ်သးခုနီၢ်ကီၢ်အဂီၢ် ယဟိဝၤယွၤ ကမၤစၢၤပှၤဒ်လဲၣ်.
ပကအိၣ်ဒီး တၢ်သးခုနီၢ်ကီၢ်အဂီၢ် ယဟိဝၤယွၤ မၤစၢၤပှၤသ့
၃. တၢ်ဘၣ်တ့လၢ ပထံၣ်ဘၣ်တဖၣ်န့ၣ် ဒုးသ့ၣ်ညါပှၤ ယဟိဝၤယွၤ အဂ့ၢ်ဒ်လဲၣ်. (ကွၢ်စ့ၢ်ကီးတၢ်ဂီၤ.)
၃ ယဟိဝၤယွၤန့ၣ် အသးခုထီဘိ ဒီးအအဲၣ်ဒိးလၢ ပကသးခုစ့ၢ်ကီး. အဃိ ဒ်သိး ပကသးခုအဂီၢ် အတ့လီၤန့ၢ်ပှၤ တၢ်အါမံၤ. အဒိ ဖဲပထံၣ်ဘၣ် တၢ်ဘၣ်တ့ဃံလၤ ဃုာ်ဒီး တၢ်အလွဲၢ် အကလုာ်ကလုာ်, ဖဲပထံၣ်ဘၣ် ဆၣ်ဖိကီၢ်ဖိ ဂဲၤလိာ်ကွဲ ဒီးဖဲပအီၣ်ဘၣ် တၢ်အီၣ်လၢ ပအီၣ်ဝံၣ်ဒိၣ်မးအခါ ပသးခုဒိၣ်မး. ပသ့ၣ်ညါဘၣ်လၢ ယဟိဝၤယွၤ အဲၣ်ပှၤဒိၣ်မး ဒီးအအဲၣ်ဒိးလၢ ပတၢ်အိၣ်မူ ကပှဲၤဒီးတၢ်သးခု.
Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images
ဖဲပထံၣ်ဘၣ် ဆၣ်ဖိကီၢ်ဖိ ဂဲၤလိာ်ကွဲ ဒီးသးခုအခါ ပသ့ၣ်ညါဘၣ်လၢ ယဟိဝၤယွၤန့ၣ် အကဲပှၤလၢ အသးခု (ကွၢ်လံာ်အဆၢ ၃)
၄. (က) ယဟိဝၤယွၤ ထံၣ်ဝဲ တၢ်ကီတၢ်ခဲ လၢဟီၣ်ခိၣ်ချၢ အါမးသနာ်က့ ဘၣ်မနုၤအဃိ အသးခုဒံးလဲၣ်. (ခ) ယဟိဝၤယွၤ ဟ့ၣ်ပှၤတၢ်ဟ့ၣ် မနုၤလဲၣ်. (စံးထီၣ်ပတြၢၤ ၁၆:၁၁)
၄ တၢ်ကီတၢ်ခဲလၢ ပှၤဟီၣ်ခိၣ်ဖိ ထံၣ်ဘၣ်ဝဲန့ၣ် ယဟိဝၤယွၤ သ့ၣ်ညါဝဲ ဂ့ၤဂ့ၤ ဒီးအသးတမုာ် နီတစဲးဘၣ်. ဘၣ်ဆၣ် လံာ်စီဆှံတဲဝဲလၢ ယဟိဝၤယွၤန့ၣ် အကဲ “ကစၢ်ယွၤလၢ အသးခု.” (၁ တံၤ ၁:၁၁) ဘၣ်မနုၤအဃိ ယဟိဝၤယွၤန့ၣ် အကဲပှၤလၢ အသးခုလဲၣ်. ခီဖျိလၢ အကမၤကတၢၢ်ကွံာ် တၢ်ကီတၢ်ခဲ ဒီးတၢ်သူၣ်အုးသးအုး လီၤထူလီၤယိာ်အဂီၢ် အပာ်ပနီၣ်ဝဲ မုၢ်နံၤမုၢ်သီဝံၤလံ. ဘၣ်ဆၣ် တၢ်ကီတၢ်ခဲလၢ ပထံၣ်ဘၣ်န့ၣ် အထံၣ်ဝဲ ဒီးသ့ၣ်ညါဝဲ, အသးအိၣ်ပှၤ ဒီးအအဲၣ်ဒိး မၤစၢၤပှၤဒိၣ်မး. အမၤစၢၤပှၤဒ်လဲၣ်. အဟ့ၣ်ပှၤ တၢ်ဟ့ၣ်လၢအမ့ၢ် တၢ်သးခု. (ဖး စံးထီၣ်ပတြၢၤ ၁၆:၁၁.) တၢ်ဟ့ၣ်အံၤ မၤစၢၤစ့ၢ်ကီးယ့ၣ်ၡူးလၢ အကအိၣ်ဒီး တၢ်သးခု ဒ်လဲၣ်န့ၣ် ပကကွၢ်သကိး.
၅-၆. ဘၣ်မနုၤအဃိ ယ့ၣ်ၡူးသးခုလဲၣ်.
၅ လၢယဟိဝၤယွၤ အတၢ်ဘၣ်တ့ ခဲလၢာ်အကျါန့ၣ် ယ့ၣ်ၡူးကဲဝဲ ပှၤလၢအသးခု ဒိၣ်ကတၢၢ်. ဘၣ်မနုၤအဃိလဲၣ်. ဆိကမိၣ်ကွၢ် တၢ်ဂ့ၢ်ခံထံၣ်. (၁) “ဖိခွါအံၤ မ့ၢ်ဝဲ ကစၢ်ယွၤလၢ ပှၤထံၣ်အီၤ တသ့ဘၣ်တဂၤ အက့ၢ်အဂီၤ” ဒီးအပာ်ဖျါထီၣ်က့ၤ အပါအတၢ်ပာ်သူၣ်ပာ်သး လၢလၢပှဲၤပှဲၤ. (ကလီး ၁:၁၅, ၁ တံၤ ၆:၁၅) (၂) ယ့ၣ်ၡူး အိၣ်ဘၣ်ဒီးအပါ ယံာ်န့ၢ်ဒံး တၢ်ဘၣ်တ့ အဂၤခဲလၢာ်.
၆ ယ့ၣ်ၡူးန့ၣ် အမၤအပါတၢ်ဘၣ်သး ထီဘိအဃိ အအိၣ်ဒီး တၢ်သးခု. (ကတိၤ ၈:၃၀, ၃၁; ယိၤ ၈:၂၉) အဃိ ယဟိဝၤယွၤ ဘၣ်သူၣ်ဘၣ်သးအီၤဒိၣ်မး.—မး ၃:၁၇.
၇. ပကအိၣ်ဒီး တၢ်သးခုနီၢ်ကီၢ်အဂီၢ် ပကဘၣ်မၤ မနုၤလဲၣ်.
၇ ပမ့ၢ်ဆဲးမၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤန့ၣ် ပကအိၣ်ဒီး တၢ်သးခုနီၢ်ကီၢ်. အဃိ ဖဲပမၤလိအါထီၣ် ယဟိဝၤယွၤအဂ့ၢ်အခါ ပကသ့ၣ်ညါအါထီၣ် အတၢ်ထံၣ် ဒီးအတၢ်တူၢ်ဘၣ်. ဒီးပကွၢ်လိအီၤ ကသ့အါထီၣ်အဃိ ပကသးခုဒိၣ်ထီၣ်. တကးဒံးဘၣ် ဖဲပမၤတၢ်လၢအဘၣ် ယဟိဝၤယွၤအသး ဒီးပသ့ၣ်ညါလၢ အဘၣ်သူၣ်ဘၣ်သးပှၤအခါ ပကသးခုဒိၣ်မး.a (စံး ၃၃:၁၂) ဘၣ်ဆၣ် တဘျီတခီၣ်န့ၣ် ပတသးခုလၢၤဘၣ် ဒီးဘၣ်သ့ၣ်သ့ၣ် ပကတူၢ်ဘၣ်ဒ်န့ၣ် စှၤကိာ်သီ မ့တမ့ၢ် တူၢ်ဘၣ်ဒ်န့ၣ်ဖးယံာ်. ပတူၢ်ဘၣ်ဒ်န့ၣ်အဃိ မ့ၢ်ယဟိဝၤယွၤ တဘၣ်သူၣ်ဘၣ်သးပှၤ လၢၤဘၣ်ဧါ. တမ့ၢ်ဒ်န့ၣ်ဘၣ်. ယဟိဝၤယွၤ သ့ၣ်ညါဝဲလၢ ပတကဲ ပှၤလၢပှၤပှဲၤဘၣ်အဃိ ပကတူၢ်ဘၣ် တၢ်လၢအဆါ, တၢ်သူၣ်အုးသးအုး ဒီးတၢ်သးလီၤစၢ်. (စံး ၁၀၃:၁၄) အဃိ ပကတဲသကိး တၢ်ဂ့ၢ်တနီၤလၢ အမၤလီၤမၢ် ပတၢ်သးခု ဒီးဒ်သိး ပတၢ်သးခု ကအိၣ်ထီၣ်က့ၤအဂီၢ် ပကဘၣ်မၤဒ်လဲၣ်.
ပလီၢ်သးဘၣ်ဃးဒီး တၢ်လၢအကမၤလီၤမၢ် နတၢ်သးခု
၈. ဖဲပထံၣ်ဘၣ် တၢ်ကီတၢ်ခဲအခါ ပကတူၢ်ဘၣ်ဒ်လဲၣ်.
၈ နီၣ်ဂံၢ် ၁– ဖဲပထံၣ်ဘၣ် တၢ်ကီတၢ်ခဲအခါ. မ့ၢ်နထံၣ်ဘၣ် တၢ်ကီတၢ်ခဲ ခီဖျိလၢ တၢ်မၤအၢမၤနး, န့ဆၢၣ်တၢ်ဘၣ်ဒိဘၣ်ထံး, တၢ်ဖှီၣ်တၢ်ယာ်, တၢ်ဆူးတၢ်ဆါ မ့တမ့ၢ် နသးပှၢ်ထီၣ်အဃိဧါ. ပမ့ၢ်ထံၣ်ဘၣ် တၢ်ကီတၢ်ခဲဒ်အံၤ ဒီးလီၤဆီဒၣ်တၢ် ပဆီတလဲ ပတၢ်အိၣ်သး မ့ၢ်တသ့ နီတမံၤဘၣ်န့ၣ် ပတသးခုလၢၤဘၣ်. လံာ်စီဆှံ တဲဝဲလၢ “တၢ်သးအုးန့ၣ် မၤဟးဂီၤ ပှၤသးအဂံၢ်အဘါ.” (ကတိၤ ၁၅:၁၃) ဒီပုၢ်ဝဲၢ်ခွါဘါဘ့း လၢအကဲ တၢ်အိၣ်ဖှိၣ်သးပှၢ်န့ၣ် လၢလွံၢ်နံၣ်အတီၢ်ပူၤ အကၠီဒီးအမိအပါ သံသဒၣ်အီၤ. အတဲဝဲလၢ “ယတူၢ်ဘၣ်လၢ ယအိၣ်ထဲတဂၤ ဒီးပှၤမၤစၢၤယၤ တသ့နီတဂၤဘၣ်. ဖဲအဝဲသ့ၣ် အိၣ်မူဒံးအခါ ယတရ့လိာ်ဘၣ်သးဒီး အဝဲသ့ၣ်အါအါဘၣ်. ဒီးဖဲယဆိကမိၣ်ထီၣ် တၢ်ဂ့ၢ်အံၤအခါ ယသးလီၤဘှံး ဒီးသးဘၣ်ဒိဒိၣ်မး.” ဒ်န့ၣ်အသိး တၢ်ကီတၢ်ခဲ လၢပထံၣ်ဘၣ်န့ၣ် တဘျီတခီၣ် အနးဒိၣ်မးအဃိ ပသးလီၤဘှံး ဒီးပဂံၢ်ဘါလီၤစၢ်ဒိၣ်မး.
၉. ဒ်သိး ပတၢ်သးခု ကအိၣ်ထီၣ်က့ၤအဂီၢ် ပကဘၣ်မၤဒ်လဲၣ်. (ယံးရမံယၤ ၂၉:၄-၇, ၁၀)
၉ ဒ်သိး ပတၢ်သးခု ကအိၣ်ထီၣ်က့ၤအဂီၢ် ပကဘၣ်မၤဒ်လဲၣ်. ပဆီတလဲ ပတၢ်အိၣ်သး မ့ၢ်တသ့ဘၣ် သနာ်က့ ပမ့ၢ်တူၢ်လိာ် ပတၢ်အိၣ်သး ဒီးအိၣ်ဒီး တၢ်သးမံန့ၣ် ပကဒိးန့ၢ်ဘၣ်က့ၤ ပတၢ်သးခု. ပှၤဟီၣ်ခိၣ်ဖိလၢ ဆၢကတီၢ်ခဲအံၤ ဆိကမိၣ်ဝဲလၢ ပတၢ်အိၣ်သး မ့ၢ်တအိၣ်ဒ်သိးဒီး ပအဲၣ်ဒိးဘၣ်န့ၣ် ပတသးခုလၢၤဘၣ်. ဘၣ်ဆၣ် အတမ့ၢ်ဒ်န့ၣ်ဘၣ်. အဒိ ပှၤယူဒၤဖိလၢ ပှၤက့ၤဖီၣ်အီၤလၢ ဘၤဘူၤလိၣ်န့ၣ် ယဟိဝၤယွၤ တဲဘၣ်အဝဲသ့ၣ်လၢ အကတူၢ်လိာ် အတၢ်အိၣ်သး ဒီးဂုာ်ကျဲးစၢး အိၣ်ဒီးတၢ်သးခုဖဲန့ၣ်. (ဖး ယံးရမံယၤ ၂၉:၄-၇, ၁၀.) ပဒိးန့ၢ်ဘၣ် တၢ်မၤလိဒ်လဲၣ်. ဂုာ်ကျဲးစၢး အိၣ်ဒီးတၢ်ထံၣ် လၢအဂ့ၤ ဒီးအိၣ်ဒီး တၢ်သးခု. သ့ၣ်နီၣ်ထီၣ်လၢ ယဟိဝၤယွၤ တပာ်တ့ၢ်ပှၤဘၣ် ဒီးဖဲပလဲၤခီဖျိ တၢ်အိၣ်သးကီခဲအခါ အကမၤစၢၤပှၤ. (စံး ၆၃:၇; ၁၄၆:၅) ဆိကမိၣ်ကွၢ် ဒီပုၢ်ဝဲၢ်မုၣ် အံဖံၤ အတၢ်လဲၤခီဖျိ. အံဖံၤန့ၣ် အဘၣ်ဒိနးမးအဃိ အဟးတသ့လၢၤဘၣ်. အတဲဝဲလၢ “ယဟိဝၤယွၤ, ယဟံၣ်ဖိဃီဖိ ဒီးဒီပုၢ်ဝဲၢ်မုၣ်ခွါလၢ ယတၢ်အိၣ်ဖှိၣ်ပူၤန့ၣ် မၤစၢၤယၤ ဒီးဟ့ၣ်ဂံၢ်ဟ့ၣ်ဘါယၤ. ယအဲၣ်ဒိး စံးဘျုး အဝဲသ့ၣ်လၢ အတၢ်မၤစၢၤအဃိ ဒီးတၢ်လၢအဝဲသ့ၣ် မၤန့ၢ်လၢယဂီၢ်. ယတၢ်အိၣ်သး မ့ၢ်ကီသနာ်က့ ယဂုာ်ကျဲးစၢး အိၣ်ဒီးတၢ်သးခု.”
၁၀. ပထံၣ်ဘၣ် တၢ်အိၣ်သးကီခဲ ဘၣ်ဆၣ် ဘၣ်မနုၤအဃိ ပအိၣ်ဒီးတၢ်သးခု သ့ဒံးလဲၣ်.
၁၀ ပဝဲ မ့တမ့ၢ် ပဟံၣ်ဖိဃီဖိ မ့ၢ်ထံၣ်ဘၣ် တၢ်အိၣ်သးကီခဲ ဘၣ်ဆၣ် ပအိၣ်ဒီး တၢ်သးခုသ့ဒံး.b (စံး ၁၂၆:၅) ဘၣ်မနုၤအဃိလဲၣ်. ပတၢ်သးခုန့ၣ် တဒိးသန့ၤထီၣ်သးလၢ ပတၢ်အိၣ်သးဘၣ်. ဒီပုၢ်ဝဲၢ်မုၣ် မရံယၤ လၢအကဲ ပှၤလဲၤလၢညါန့ၣ် တဲဝဲလၢ “ပထံၣ်ဘၣ် တၢ်အိၣ်သးကီခဲ သနာ်က့ ခီဖျိလၢ ပသ့ၣ်နီၣ်ထီၣ် ယဟိဝၤယွၤ အတၢ်အၢၣ်လီၤအဃိ ပသးခုဒံး. ဘၣ်ဆၣ် တဘျီတခီၣ်န့ၣ် ပသးအုး ဒီးပဟီၣ်. ပမ့ၢ်ထံၣ်ဘၣ် တၢ်အိၣ်သးကီခဲ ဒ်လဲၣ်သနာ်က့ ဒ်သိးပကဆဲးအိၣ်ဒီး တၢ်သးခုအဂီၢ် ပပၢ်ယဟိဝၤယွၤ မၤစၢၤပှၤသ့.” သ့ၣ်နီၣ်ထီၣ်စ့ၢ်ကီးလၢ ပတၢ်အိၣ်သးကီခဲန့ၣ် အလီၤဂာ်ဒီး ခီၣ်လီၢ်လၢ အအိၣ်လၢပီၣ်လဲၣ်နံၤ ဒီးဖဲထံဟဲဘၣ်အီၤအခါ အလီၤမၢ်ကွံာ်ဝဲ. ဒ်န့ၣ်အသိး တယံာ်လၢၤဘၣ်န့ၣ် ယဟိဝၤယွၤ ကမၤလီၤမၢ်ကွံာ် တၢ်နးတၢ်ဖှီၣ် ဒီးတၢ်လၢအမၤသးအုးပှၤ ခဲလၢာ်.
၁၁. တၢ်မၢဖိပီလူး အဒိအတဲာ်န့ၣ် ကဲထီၣ်တၢ်ဂံၢ်တၢ်ဘါ လၢနဂီၢ်ဒ်လဲၣ်.
၁၁ တဘျီတခီၣ် ပကဆိကမိၣ်လၢ ခီဖျိလၢ ယဟိဝၤယွၤ တဘၣ်သူၣ်ဘၣ်သးပှၤဘၣ်အဃိ ပထံၣ်ဘၣ် တၢ်ကီတၢ်ခဲ. ဖဲပတူၢ်ဘၣ် ဒ်အံၤအခါ ပမၤမနုၤသ့လဲၣ်. ပဆိကမိၣ်ထီၣ်က့ၤ ယဟိဝၤယွၤ အခ့အပှၤ လၢအသးတီ လၢအထံၣ်ဘၣ် တၢ်အိၣ်သးကီခဲနးမး အဒိအတဲာ်သ့. အဒိ တၢ်မၢဖိပီလူးန့ၣ် ယ့ၣ်ၡူး ဃုထၢထီၣ်အီၤလၢ အက စံၣ်တဲၤတဲလီၤ တၢ်သးခုကစီၣ် “လၢပှၤကလုာ်တဖၣ်, စီၤပၤတဖၣ်, ဒီးပှၤအံၣ်စရ့လးဖိတဖၣ် အအိၣ်.” (မၤတၢ် ၉:၁၅) မူဒါလၢ စီၤပီလူး ဒိးန့ၢ်ဘၣ်အံၤ အလီၤသးခုဒိၣ်မး. သနာ်က့ အထံၣ်ဘၣ်ဒံး တၢ်ကီတၢ်ခဲ အါမး. (၂ ကရံၣ် ၁၁:၂၃-၂၇) စီၤပီလူး ထံၣ်ဘၣ် တၢ်အိၣ်သးကီခဲ သနာ်က့ ပထံၣ်ဘၣ်လၢ ယဟိဝၤယွၤ ဘၣ်သူၣ်ဘၣ်သးအီၤဒံး. နီၢ်ကီၢ်န့ၣ် ခီဖျိလၢ ယဟိဝၤယွၤ အတၢ်မၤစၢၤအဃိ စီၤပီလူး လဲၤခီဖျိ အတၢ်အိၣ်သးကီခဲန့ၢ်. (ရိ ၅:၃-၅) နၤစ့ၢ်ကီး နထံၣ်ဘၣ် တၢ်အိၣ်သးကီခဲ သနာ်က့ နဆဲးတီဒီး ယဟိဝၤယွၤ ဒီးနမၤအတၢ်မၤဒံး. အဃိ နာ်လၢ ယဟိဝၤယွၤ ကဆဲးမၤစၢၤနၤ ဒီးအဘၣ်သူၣ်ဘၣ်သးနၤ သပှၢ်တၢၢ်.
၁၂. ဖဲပတၢ်မုၢ်လၢ် တဟဲလၢပှဲၤထီၣ်ဘၣ်အခါ ပကတူၢ်ဘၣ်ဒ်လဲၣ်.
၁၂ နီၣ်ဂံၢ် ၂– ဖဲပတၢ်မုၢ်လၢ် တဟဲလၢပှဲၤထီၣ်ဘၣ်အခါ. (ကတိၤ ၁၃:၁၂) ပအဲၣ် ယဟိဝၤယွၤ ဒီးအဲၣ်ဒိး စံးဘျုးအီၤအဃိ ပဂုာ်ကျဲးစၢး ဃုတၢ်ခွဲးတၢ်ယာ်လၢ ပကဟ့ၣ်အီၤ တၢ်လၢအဂ့ၤကတၢၢ်. ဘၣ်ဆၣ် ခီဖျိလၢ ပတၢ်အိၣ်သးအဃိ ပဖီတၢၣ်လၢ ပကမၤ တၢ်တမံၤမံၤ မ့ၢ်တဟဲလၢပှဲၤထီၣ်ဘၣ်န့ၣ် ပသးကဟးဂီၤ. (ကတိၤ ၁၇:၂၂) ဒီပုၢ်ဝဲၢ်မုၣ် ဟီလံၤ လၢအကဲ ပှၤလဲၤလၢညါန့ၣ် တဲဝဲလၢ “ယအဲၣ်ဒိးလဲၤထီၣ် ပှၤစိာ်ဘီမုၢ်တၢ်သးခုကစီၣ်ဖိ အကၠိ, လဲၤစံၣ်တဲၤတဲလီၤတၢ်လၢ ထံကီၢ်အဂၤ ဒီးလဲၤမၤစၢၤတၢ်လၢ ရမဖိၤ တၢ်သူၣ်ထီၣ်ဘှီထီၣ်. ဘၣ်ဆၣ် ယတၢ်အိၣ်သး ဆီတလဲ ဒီးယမၤလၢပှဲၤထီၣ် ယဖီတၢၣ်တဖၣ်အံၤ တန့ၢ်လၢၤဘၣ်. အဃိ ယသးဟးဂီၤ ဖးဒိၣ်ညါ.” ယဟိဝၤယွၤ အခ့အပှၤအါဂၤ တူၢ်ဘၣ်ဝဲ ဒ်အံၤစ့ၢ်ကီး.
၁၃. ပမၤယဟိဝၤယွၤ အတၢ်မၤ မ့ၢ်တန့ၢ်အါအါဘၣ် သနာ်က့ ပဂုာ်ကျဲးစၢးမၤ မနုၤသ့လဲၣ်.
၁၃ ဒ်သိး ပတၢ်သးခု ကအိၣ်ထီၣ်က့ၤအဂီၢ် ပကဘၣ်မၤဒ်လဲၣ်. သ့ၣ်နီၣ်ထီၣ်လၢ တၢ်လၢ ပမၤတန့ၢ်ဘၣ်န့ၣ် ယဟိဝၤယွၤ တမၢပမၤဘၣ်. ပမၤအတၢ်မၤ မ့ၢ်တန့ၢ် ဒ်သိးဒီး ပှၤဂၤမၤဝဲဘၣ် သနာ်က့ အပာ်လုၢ်ပာ်ပှ့ၤပှၤဒံး. ယဟိဝၤယွၤ အဲၣ်ဒိးလၢ ပကအိၣ်ဒီး တၢ်ဆီၣ်လီၤသး ဒီးတၢ်သးတီ. (မံ ၆:၈; ၁ ကရံၣ် ၄:၂) ယဟိဝၤယွၤန့ၣ် အကွၢ်ဝဲ ပတၢ်ပာ်သူၣ်ပာ်သး အါန့ၢ် တၢ်လၢပမၤဒံးအဃိ ပကဘၣ် အိၣ်ဒီးတၢ်ထံၣ် ဒ်သိးဒီးအီၤ.c ဒီးပမၤအတၢ်မၤ မ့ၢ်တန့ၢ်အါအါဘၣ် သနာ်က့ ပကဂုာ်ကျဲးစၢးမၤ ဖဲပမၤသ့. အဒိ နမၤစၢၤ ဒီးသိၣ်လိ ပှၤသးစၢ် မ့တမ့ၢ် ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါ လၢအသးပှၢ်တဖၣ်သ့. နကိးဒီပုၢ်ဝဲၢ်မုၣ်ခွါ တဂၤဂၤ လၢလီတဲစိ, ဆှၢန့ၢ်အီၤမဲးစ့း မ့တမ့ၢ် လဲၤဟးအိၣ်သကိးအီၤ ဒီးဟ့ၣ်ဂံၢ်ဟ့ၣ်ဘါအီၤသ့. ဖဲနဂုာ်ကျဲးစၢးမၤ တၢ်လၢနမၤသ့အခါ ယဟိဝၤယွၤ ဘၣ်သူၣ်ဘၣ်သးဝဲ, အကဆိၣ်ဂ့ၤက့ၤနၤ ဒီးကမၤစၢၤနၤဒ်သိး နကအိၣ်ဒီး တၢ်သးခု. သ့ၣ်နီၣ်ထီၣ်လၢ ခါဆူညါ လၢဟီၣ်ခိၣ်သီန့ၣ် ပကမၤဘၣ် ယဟိဝၤယွၤ အတၢ်မၤလၢ ပတဆိကမိၣ်ဘၣ် နီတဘျီဘၣ်. ဒီပုၢ်ဝဲၢ်မုၣ် ဟီလံၤ လၢပတဲသကိးအဂ့ၢ်န့ၣ် အတဲဝဲလၢ “ဖဲယသးလီၤစၢ်အခါ ယဆိကမိၣ်ထီၣ်လၢ ခါဆူညါန့ၣ် ယအိၣ်ဒီး တၢ်ခွဲးတၢ်ယာ်လၢ ကအိၣ်မူဘၣ် လီၤထူလီၤယိာ်. ဒီးခီဖျိလၢ ယဟိဝၤယွၤ အတၢ်မၤစၢၤအဃိ ယကမၤဘၣ် အတၢ်မၤ လၢယအဲၣ်ဒိးမၤအီၤဒီဒူၣ်.”
၁၄. တၢ်အဂၤလၢ ကမၤလီၤမၢ် ပတၢ်သးခုန့ၣ် မ့ၢ်မနုၤလဲၣ်.
၁၄ နီၣ်ဂံၢ် ၃– ဖဲပမၤလၢပှဲၤ ပနီၢ်ကစၢ်တၢ်ဘၣ်သး. လၢအ့ၤထၢၤနဲၣ် စိၤၡၢၤမံဒံယါ အပူၤန့ၣ် ပကထံၣ်ဘၣ် ပှၤတနီၤလၢ အပာ်ဖျါထီၣ်လၢ ပမ့ၢ်မၤလၢပှဲၤ ပနီၢ်ကစၢ် တၢ်ဘၣ်သးန့ၣ် ပကအိၣ်ဒီး တၢ်သးခု. အဃိ ဘၣ်သ့ၣ်သ့ၣ် ပကဆိကမိၣ်လၢ ပမ့ၢ်မၤတၢ်လၢ ပအဲၣ်ဒိးမၤ, ပှ့ၤတၢ်လၢ ပလီကီ ဒီးလဲၤဟးလိာ်ကွဲလၢ တၢ်လီၢ်အါတီၤန့ၣ် ပကသးခုနီၢ်ကီၢ်. ယဟိဝၤယွၤ အဲၣ်ဒိးလၢ ပကအိၣ်ဒီး တၢ်သးခုအဃိ ပမၤတၢ်လၢ အမၤမုာ်မၤဖှံပသးန့ၣ် အတကမၣ်ဘၣ်. ဘၣ်ဆၣ် ပှၤအါဂၤလၢ အမၤလၢပှဲၤ အနီၢ်ကစၢ် တၢ်ဘၣ်သးန့ၣ် လၢခံ အသ့ၣ်ညါထီၣ်ဝဲလၢ အတအိၣ်ဒီး တၢ်သးခုနီၢ်ကီၢ်ဘၣ်. ဒီပုၢ်ဝဲၢ်မုၣ် အံဖၤ လၢအကဲ ပှၤလဲၤလၢညါန့ၣ် တဲဝဲလၢ “နမ့ၢ်ဆိကမိၣ်ထဲလၢ နအဲၣ်ဒိး မၤမုာ်မၤဖှံသး ဒီးဟးလိာ်ကွဲန့ၣ် နကအဲၣ်ဒိး ဆဲးမၤအီၤထီဘိ.” ပမ့ၢ်ဂုာ်ကျဲးစၢး မၤထဲပနီၢ်ကစၢ် တၢ်ဘၣ်သး ထီဘိန့ၣ် ပကသးအုး ဒီးပသးတမံ နီတဘျီလၢၤဘၣ်.
၁၅. ပဟံးန့ၢ် တၢ်မၤလိလၢ စီၤပၤၡလိၤမိၤ အအိၣ်သ့ဒ်လဲၣ်.
၁၅ ဖဲပအဲၣ်ဒိး မၤလၢပှဲၤ ပနီၢ်ကစၢ် တၢ်ဘၣ်သးအခါ ပဟံးန့ၢ် တၢ်မၤလိလၢ စီၤပၤၡလိၤမိၤ အတၢ်လဲၤခီဖျိ သ့ဒ်လဲၣ်. စီၤပၤၡလိၤမိၤန့ၣ် အဂုာ်ကျဲးစၢး မၤတၢ်အါမံၤ ဒ်သိး အကသးခုအဂီၢ်. အဒိ အအီၣ် တၢ်အီၣ်လၢ အဝံၣ်အဘဲ အကလုာ်ကလုာ်, ကနၣ်တၢ်ဒ့တၢ်အူ လၢအမုာ်တဖၣ် ဒီးအပှ့ၤတၢ်လုၢ်ဒိၣ်ပှ့ၤဒိၣ် တမံၤဂ့ၤတမံၤဂ့ၤ လၢအပှ့ၤဝဲန့ၢ်. ဘၣ်ဆၣ် အတဒိးန့ၢ်ဘၣ် တၢ်သးမံဘၣ်. အဃိ အတဲဝဲလၢ တၢ်လၢ “ပှၤထံၣ်လၢ ပှၤမဲာ် သနာ်က့ ပှၤသးတမံဒံးဘၣ်. ဒီးပှၤနၢ်ဟူဘၣ်အီၤ သနာ်က့ ပှၤသးတမံဒံးဘၣ်.” (စံၣ် ၁:၈; ၂:၁-၁၁) ပှၤတနီၤ ဆိကမိၣ်ဝဲလၢ အစ့မ့ၢ်အိၣ် ဒီးပှ့ၤတၢ်လၢ အသးလီဝဲမ့ၢ်န့ၢ်န့ၣ် အကသးခု. ဘၣ်ဆၣ် အဝဲသ့ၣ် တၢ်ဆိကမိၣ်န့ၣ် တဘၣ်ဘၣ်. ဒီးတၢ်သ့ၣ်တဖၣ်န့ၣ် တမၤသးခုအသး နီၢ်ကီၢ်ဘၣ်.
၁၆. ပမ့ၢ်မၤန့ၢ်တၢ်လၢ ပှၤဂၤအဂီၢ်န့ၣ် ပကဒိးန့ၢ်ဘၣ် အဘျုးဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၆ ဒ်သိး ပတၢ်သးခု ကအိၣ်ထီၣ်က့ၤအဂီၢ် ပကဘၣ်မၤဒ်လဲၣ်. ယ့ၣ်ၡူး သိၣ်လိပှၤလၢ “ဟ့ၣ်တၢ်န့ၣ် ဒုးအိၣ်ထီၣ် တၢ်သးခုအါန့ၢ်ဒံး ဒိးန့ၢ်ဘၣ်တၢ်ဒံး.” (မၤတၢ် ၂၀:၃၅) တၢ်အိၣ်ဖှိၣ်သးပှၢ် လၢအမံၤမ့ၢ် အလဲးကိၤန့ၣ် တဲဝဲလၢ “ယဂုာ်ကျဲးစၢး မၤတၢ်ယိယိဖိလၢ ယကမၤစၢၤ ပှၤဂၤအဂီၢ်. ဖဲယမၤစၢၤ ပှၤဂၤအခါ ယတဆိကမိၣ် ထဲလၢ ယနီၢ်ကစၢ်တၢ်ဘၣ်သး လၢၤဘၣ်အဃိ ယသးခုဒိၣ်မး.” နၤစ့ၢ်ကီး နမၤစၢၤပှၤဂၤ သ့ဒ်လဲၣ်. အဒိ နမ့ၢ်ထံၣ်ပှၤတဂၤဂၤ သးအုးန့ၣ် နဂုာ်ကျဲးစၢး ဟ့ၣ်ဂံၢ်ဟ့ၣ်ဘါအီၤသ့. နမ့ၢ်ဒိကနၣ်အီၤဂ့ၤဂ့ၤ ဒီးဂုာ်ကျဲးစၢး နၢ်ပၢၢ်စၢၤ အတၢ်တူၢ်ဘၣ်န့ၣ် ဘၣ်သ့ၣ်သ့ၣ် အသးကမုာ်ထီၣ်က့ၤ. ဒီးဒုးသ့ၣ်နီၣ်ထီၣ်အီၤလၢ ယဟိဝၤယွၤ သးအိၣ်အီၤ ဒီးတဲအီၤလၢ အကတဲဖျါထီၣ် အတၢ်တူၢ်ဘၣ်လၢ ယဟိဝၤယွၤအအိၣ်. (စံး ၅၅:၂၂; ၆၈:၁၉) တကးဒံးဘၣ် မၤစၢၤစ့ၢ်ကီးအီၤဒ်သိး အကသ့ၣ်နီၣ်ထီၣ်လၢ ယဟိဝၤယွၤန့ၣ် တပာ်တ့ၢ်အီၤဘၣ်. (စံး ၃၇:၂၈; ၡါ ၅၉:၁) ဘၣ်သ့ၣ်သ့ၣ် နကဘၣ်မၤန့ၢ်တၢ်လၢ အဂီၢ်တမံၤမံၤ ဒ်သိးဒီး ဖီဒုးအီၣ်အီၤတၢ်အီၣ် မ့တမ့ၢ် ဟးလိာ်ကွဲဒီးအီၤ. တကးဒံးဘၣ် တၢ်စံၣ်တဲၤတဲလီၤ တၢ်မၤန့ၣ် အမၤသးခုပသးအဃိ ဖဲနလဲၤစံၣ်တဲၤတဲလီၤတၢ်အခါ ကွဲမုာ်အီၤလၢ အကလဲၤဒီးနၤ. ဒီးပျဲလၢယဟိဝၤယွၤ ကသူနၤလၢ နကဟ့ၣ်ဂံၢ်ဟ့ၣ်ဘါ ပှၤဂၤအဂီၢ်. ပမ့ၢ်သူ ပတၢ်ဆၢကတီၢ်လၢ ကမၤစၢၤပှၤဂၤန့ၣ် ပကသးခုနီၢ်ကီၢ်.—ကတိၤ ၁၁:၂၅.
လၢပကဆိကမိၣ်တၢ် ထဲလၢပနီၢ်ကစၢ် တၢ်လိၣ်ဘၣ်အလီၢ် ပကဘၣ် ဆိကမိၣ်ဆိန့ၢ်တၢ်လၢ ပှၤဂၤအဂီၢ် (ကွၢ်လံာ်အဆၢ ၁၆)d
၁၇. ဒ်သိး ပကအိၣ်ဒီး တၢ်သးခုနီၢ်ကီၢ်အဂီၢ် ပကဘၣ်မၤမနုၤလဲၣ်. (စံးထီၣ်ပတြၢၤ ၄၃:၄)
၁၇ လံာ်စီဆှံ အၢၣ်လီၤပှၤလၢ ယဟိဝၤယွၤန့ၣ် အကဲပတၢ် “သူၣ်ဖှံသးညီ.” (ဖး စံးထီၣ်ပတြၢၤ ၄၃:၄.) ပမ့ၢ်ဆဲး ဃုသ့ၣ်ညါအါထီၣ် ပပၢ်ယဟိဝၤယွၤအဂ့ၢ် ဒီးမၤတၢ်လၢ အဘၣ်အသးန့ၣ် ပကသးခုနီၢ်ကီၢ်. အဃိ ပမ့ၢ်ထံၣ်ဘၣ် တၢ်ကီတၢ်ခဲ သနာ်က့ ပတလိၣ်ပျံၤတၢ် ဒီးသူၣ်ကိၢ်သးဂီၤတၢ်ဘၣ်. ပမ့ၢ်ဆဲးမၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤန့ၣ် အကမၤစၢၤပှၤဒ်သိး ပကအိၣ်ဒီး တၢ်သးခုနီၢ်ကီၢ်.—စံး ၁၄၄:၁၅.
တၢ်သးဝံၣ် ၁၅၅ ပတၢ်သးခုလီၤစိၤ
a ကွၢ်တၢ်လွံၢ်နၢၣ် လၢအမ့ၢ် “ယဟိဝၤယွၤဟ့ၣ်ပှၤ တၢ်သးခုဒ်လဲၣ်.”
b အဒိ လၢ jw.org ဝဲးပဆဲးန့ၣ် ကွၢ် ၂၀၂၃ ပှၤပၢဆှၢတၢ်ကမံးတံာ် ပာ်ဖျါထီၣ်တၢ်ကစီၣ်အသီ—၅ လၢအပၣ်ဃုာ်ဒီး ပှၤမၤတၢ်သံကွၢ်စံးဆၢဒီး ဒီပုၢ်ဝဲၢ်ခွါ ဒဲနံၤ ခရံာ်ၡၢၢ်စၢၤ ဒီးအမါအရံၣ်နၣ်.
c ဃုသ့ၣ်ညါအါထီၣ် တၢ်ဂ့ၢ်အံၤလၢ “Cultivate Reasonable Expectations, and Be Joyful” in the July 15, 2008, issue of The Watchtower.
d တၢ်ဂီၤ အခီပညီ– ဒီပုၢ်ဝဲၢ်မုၣ်သးစၢ်တဂၤ ပှ့ၤတၢ်လၢ အနီၢ်ကစၢ်အဂီၢ် အါမး. ဘၣ်ဆၣ် ဖဲအပှ့ၤန့ၢ်ဖီလၢ ဒီပုၢ်ဝဲၢ်မုၣ်သးပှၢ်လၢ အလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါအခါ ဒီပုၢ်ဝဲၢ်မုၣ်သးစၢ်အံၤ သးခုဒိၣ်မး.