သးဝံၣ်တၢ်လၢ သူၣ်ဒီဖျၢၣ်သးဒီဖျၢၣ်တက့ၢ်
“တၢ်သးဝံၣ်စံးထီၣ်ပတြၢၤ ပကစၢ်န့ၣ် မ့ၢ်တၢ်ဂ့ၤလီၤ.” —စံးထီၣ်ပတြၢၤ ၁၄၇:၁, ခ့ခါစှီၤကျိာ်.
၁. ပမ့ၢ်သးဝံၣ်တၢ်န့ၣ် ကမၤစၢၤပှၤဒ်လဲၣ်.
ပှၤကွဲးတၢ်သးဝံၣ်လၢ အမံၤဟူသၣ်ဖျါတဂၤ တဲဝဲဒ်အံၤ– “ဖဲနနၢ်ဟူတၢ်သးဝံၣ်အဖျၢၣ်အခါ ဒုးအိၣ်ထီၣ်နတၢ်ဆိကမိၣ် ဒီးဖဲနနၢ်ဟူတၢ်ဒ့တၢ်အူအခါ ထိၣ်ဟူးထိၣ်ဂဲၤထီၣ် နတၢ်တူၢ်ဘၣ်. ဘၣ်ဆၣ် ဖဲနသးဝံၣ်တၢ်အခါ တၢ်သးဝံၣ်အခီပညီန့ၣ် ကထိးဘၣ်နသးလီၤ.” ပသးဝံၣ်တၢ်န့ၣ် ပပာ်ဖျါထီၣ်လၢ ပစံးထီၣ်ပတြၢၤ ပပၢ်အိၣ်လၢမူခိၣ် ယဟိဝၤယွၤ ဒီးပအဲၣ်အီၤန့ၣ်လီၤ. ပမ့ၢ်သးဝံၣ်တၢ်န့ၣ် ပတူၢ်ဘၣ်လၢ ပဘူးဒိၣ်ထီၣ်ဒီးအီၤလီၤ. လၢတၢ်န့ၣ်အဃိ ဖဲပသးဝံၣ်တၢ်တဂၤအခါမ့ၢ်ဂ့ၤ, ပသးဝံၣ်တၢ်ဒီး ဒီပုၢ်ဝဲၢ်တဖၣ်အခါမ့ၢ်ဂ့ၤ ပနၢ်ပၢၢ်လၢတၢ်သးဝံၣ်န့ၣ် မ့ၢ်တၢ်အရ့ဒိၣ်တခါလၢ တၢ်ဘူၣ်တၢ်ဘါ အမ့ၢ်အတီအဂီၢ်န့ၣ်လီၤ.
၂, ၃. (က) ဘၣ်ဃးဒီးတၢ်သးဝံၣ်တၢ်လၢ တၢ်အိၣ်ဖှိၣ်အပူၤန့ၣ် ပှၤတနီၤနီၤ တူၢ်ဘၣ်ဝဲဒ်လဲၣ်. (ခ) တၢ်မၤလိအံၤအပူၤ ပကတဲသကိး တၢ်သံကွၢ်မနုၤတဖၣ်လဲၣ်.
၂ ဖဲနသးဝံၣ်တၢ်လၢ နကလုၢ်ဖးဒိၣ် လၢတၢ်အိၣ်ဖှိၣ်ပူၤအခါ နတူၢ်ဘၣ်ဒ်လဲၣ်. မ့ၢ်နမဲာ်ဆှးဧါ. တၢ်ဆဲးတၢ်လၤတနီၤနီၤန့ၣ် ပိာ်ခွါတဖၣ် သးဝံၣ်တၢ်လၢပှၤအါဂၤအမဲာ်ညါ တဘူၣ်ဘၣ်. လၢပှၤတနီၤနီၤ အတၢ်ဆဲးတၢ်လၤအဃိ မၤဘၣ်ဒိဝဲတၢ်အိၣ်ဖှိၣ်သ့လီၤ. လီၤဆီဒၣ်တၢ် တၢ်အိၣ်ဖှၣ်သးပှၢ်တဖၣ် သးဝံၣ်တၢ်မ့ၢ်တဘူၣ်ဘၣ် မ့တမ့ၢ် ဖဲပှၤသးဝံၣ်တၢ်အခါ အဝဲသ့ၣ်အတၢ်မၤမ့ၢ်အါ တုၤဒၣ်လဲာ်သးဝံၣ်တၢ် မ့ၢ်တချုးဘၣ်န့ၣ် မၤဘၣ်ဒိတၢ်အိၣ်ဖှိၣ်သ့လီၤ.—စံးထီၣ်ပတြၢၤ ၃၀:၁၂.
၃ တၢ်သူၣ်ဝံၣ်သးဆၢန့ၣ် မ့ၢ်စ့ၢ်ကီးကျဲတဘိလၢ ပကဘူၣ်ထီၣ်ဘါထီၣ် ယဟိဝၤယွၤန့ၣ်လီၤ. လၢတၢ်န့ၣ်အဃိ ဖဲပှၤသးဝံၣ်တၢ်အခါ ပတအဲၣ်ဒိးဟးထီၣ်လၢတၢ်ချၢဘၣ် ဒီးပတအဲၣ်ဒိးဟဲတုၤစဲၤခံဘၣ်. အဃိပဝဲကိးဂၤဒဲး ပကြၢးသံကွၢ်လီၤပသးလၢ– ‘ဘၣ်ဃးဒီးတၢ်သးဝံၣ်တၢ်လၢ တၢ်အိၣ်ဖှိၣ်အပူၤန့ၣ် ယထံၣ်အီၤဒ်လဲၣ်. ယသးဝံၣ်တၢ်လၢ ပှၤဂၤအမဲာ်ညါ မ့ၢ်တဘူၣ်ဘၣ်န့ၣ် ယဘၣ်မၤဒ်လဲၣ်. ယသးဝံၣ်တၢ်လၢ သူၣ်ဒီဖျၢၣ်သးဒီဖျၢၣ်ကသ့ဒ်လဲၣ်.’
တၢ်သးဝံၣ်န့ၣ် မ့ၢ်တၢ်အရ့ဒိၣ်တခါလၢ တၢ်ဘူၣ်တၢ်ဘါအမ့ၢ်အတီအဂီၢ်
၄, ၅. လၢပျၢၤန့ၣ် ပှၤအံၣ်စရ့လးဖိတဖၣ် ရဲၣ်ကျဲၤဝဲလၢ ကသူၣ်ဝံၣ်သးဆၢတၢ်လၢ တၢ်လုၢ်ဟံၣ်အပူၤဒ်လဲၣ်.
၄ လၢပျၢၤလံၤလံၤ ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် သူဝဲတၢ်ဒ့တၢ်အူလၢ ကစံးထီၣ်ပတြၢၤယွၤအဂီၢ်လီၤ. ဖဲပှၤအံၣ်စရ့လးဖိတဖၣ် အသးတီဒီး ယဟိဝၤယွၤအခါ တၢ်သူၣ်ဝံၣ်သးဆၢန့ၣ် မ့ၢ်တၢ်လၢအရ့ဒိၣ်တခါလၢ အဝဲသ့ၣ်အတၢ်ဘူၣ်ထီၣ်ဘါထီၣ်အဂီၢ်လီၤ. အဒိ, ဖဲစီၤဒၤဝံး ကတဲာ်ကတီၤတၢ်လၢ တၢ်သူၣ်ထီၣ်တၢ်လုၢ်ဟံၣ်အဂီၢ်အခါ အဝဲရဲၣ်ကျဲၤဝဲ ဒ်သိးပှၤလ့ၤဝံဖိအဂၤ ၄,၀၀၀ ကစံးထီၣ်ပတြၢၤ ယဟိဝၤယွၤလၢ တၢ်ဒ့တၢ်အူန့ၣ်လီၤ. ဒီးလၢအဝဲသ့ၣ်အကျါ ၂၈၈ ဂၤန့ၣ် “မ့ၢ်ပှၤလၢအဘၣ်တၢ်သိၣ်လိတ့ၢ်အီၤလၢ တၢ်သူၣ်ဝံၣ်သးဆၢ လီၤတံၢ်လီၤဆဲး” လီၤ.—၁ ကွဲးနီၣ်တၢ် ၂၃:၅; ၂၅:၇, ခ့ခါစှီၤကျိာ်.
၅ ဖဲပှၤပာ်စီဆှံ တၢ်လုၢ်ဟံၣ်အခါ တၢ်ဒ့တၢ်အူ ဒီးတၢ်သူၣ်ဝံၣ်သးဆၢန့ၣ် မ့ၢ်တၢ်လၢအရ့ဒိၣ်တခါစ့ၢ်ကီးလီၤ. လံာ်စီဆှံ စံးဝဲလၢ– “တုၤပှၤအူကွဲၤ, ဒီးပှၤသးဝံၣ်တၢ်ဖိန့ၣ် မၤသီၣ်ထီၣ်တၢ်ဒ် ပှၤတဂၤဃီအသိး, လၢအအူးထီၣ်, ဒီးစံးထီၣ်ပတြၢၤယွၤသတးဒီး ဒုးနၢ်ဟူတၢ်, ဒီးထုထီၣ်အကလုၢ်ဒီးကွဲၤ, ဒီးစှၢၣ်စှံး, ဒီးဒံၣ်ဒၢပီၤဒွါ, ဒီးစံးထီၣ်ပတြၢၤယွၤ, . . . ယွၤအလၤအကပီၤပှဲၤယွၤအဟံၣ်ပူၤလီၤ.” ဆိကမိၣ်ကွၢ် တၢ်မၤအသးတဖၣ်အံၤ ကဒုးဆူၣ်ထီၣ်ဝဲ ပှၤအံၣ်စရ့လးဖိတဖၣ် အတၢ်နာ်ထဲလဲၣ်န့ၣ်တက့ၢ်.—၂ ကွဲးနီၣ်တၢ် ၅:၁၃, ၁၄; ၇:၆.
၆. ဖဲစီၤနဃ့မယၤ တီခိၣ်ရိၤမဲတၢ်လၢ တၢ်က့ၤတ့ထီၣ် ဝ့ၢ်ယရူၤၡလ့ၣ်အခိၣ်ဒူအခါ အဝဲရဲၣ်ကျဲၤဝဲ ဘၣ်ဃးဒီးတၢ်ဒ့တၢ်အူ ဒီးတၢ်သူၣ်ဝံၣ်သးဆၢဒ်လဲၣ်.
၆ ဖဲစီၤနဃ့မယၤ တီခိၣ်ရိၤမဲတၢ်လၢ တၢ်က့ၤတ့ထီၣ်က့ၤ ဝ့ၢ်ယရူၤၡလ့ၣ်အခိၣ်ဒူအခါ အဝဲရဲၣ်ကျဲၤဝဲလၢ ပှၤလ့ၤဝံဖိတဖၣ် ကသးဝံၣ်တၢ် ဒီးကဒ့တၢ်အူတၢ်လီၤ. ဖဲပှၤပာ်စီဆှံ ဝ့ၢ်ခိၣ်ဒူအခါ တၢ်သူၣ်ဝံၣ်သးဆၢန့ၣ် ဒုးသူၣ်ခုသးခုအဝဲသ့ၣ်ဒိၣ်မးလီၤ. စီၤနဃ့မယၤ ကတဲာ်ကတီၤပာ်ဝဲ “ပှၤသးဝံၣ်တၢ်ဖိခံဖုဖးဒိၣ်လီၤ.” ပှၤသးဝံၣ်တၢ်ဖိတဖုန့ၣ် လဲၤဝဲလၢဝ့ၢ်ခိၣ်ဒူ အထွဲတကပၤဒီးအဂၤတဖုန့ၣ် လဲၤဝဲလၢအစ့ၣ်တကပၤ ဒီးအဝဲသ့ၣ်ခံဖုအံၤ လဲၤထံၣ်လိာ်အသးဖဲ ဝ့ၢ်ခိၣ်ဒူလၢအဘူးဒီး တၢ်လုၢ်ဟံၣ်န့ၣ်လီၤ. အဝဲသ့ၣ်အကလုၢ်န့ၣ် သီၣ်ဝဲဒိၣ်မးအဃိ ပှၤလၢအအိၣ်လၢအယံၤတဖၣ်ဒၣ်လဲာ် နၢ်ဟူဘၣ်ဝဲလီၤ. (နဃ့မယၤ ၁၂:၂၇, ၂၈, ၃၁, ၃၈, ၄၀, ၄၃) လၢတၢ်န့ၣ်အဃိ ပနာ်သ့သပှၢ်ကတၢၢ်လၢ ဖဲပှၤလၢအဘူၣ်ထီၣ်ဘါထီၣ်တၢ်တဖၣ် သးဝံၣ်စံးထီၣ်ပတြၢၤအီၤလၢ သူၣ်ဒီးဖျၢၣ်သးဒီဖျၢၣ်အခါ ယဟိဝၤယွၤ ကသးခုဝဲဒိၣ်မးလီၤ.
၇. တၢ်သူၣ်ဝံၣ်သးဆၢ မ့ၢ်တၢ်အရ့ဒိၣ်တခါလၢ တၢ်ဘူၣ်တၢ်ဘါအဂီၢ်န့ၣ် ယ့ၣ်ၡူးပာ်ဖျါထီၣ်ဝဲဒ်လဲၣ်.
၇ လၢယ့ၣ်ၡူးအစိၤစ့ၢ်ကီး တၢ်သူၣ်ဝံၣ်သးဆၢန့ၣ် မ့ၢ်တၢ်အရ့ဒိၣ်တခါလၢ တၢ်ဘူၣ်ထီၣ်ဘါထီၣ်အဂီၢ်စ့ၢ်ကီးလီၤ. အဒိ, ဆိကမိၣ်ကွၢ် တၢ်ကဲထီၣ်အသးဖဲမုၢ်နံၤလၢ အရ့ဒိၣ်ကတၢၢ်လၢ ပှၤဟီၣ်ခိၣ်ဖိတဖၣ်အဂီၢ်န့ၣ်တက့ၢ်. ဖဲယ့ၣ်ၡူးဒီးအပျဲၢ်အဘီၣ်တဖၣ် မၤဝဲကစၢ်အတၢ်အီၣ်လၢဟါအီၣ် ဝံၤအလီၢ်ခံ အဝဲသ့ၣ်ခဲလၢာ် သးဝံၣ်စံးထီၣ်ပတြၢၤ ယဟိဝၤယွၤလီၤ.—ဖး မးသဲ ၂၆:၃၀ တက့ၢ်.
၈. တၢ်စံးထီၣ်ပတြၢၤယွၤလၢ တၢ်သးဝံၣ်န့ၣ် ခရံာ်ဖိလၢတၢ်မၢဖိအစိၤတဖၣ် ပာ်လီၤတ့ၢ်ဝဲအဒိအတဲာ်ဒ်လဲၣ်.
၈ ခရံာ်ဖိလၢတၢ်မၢဖိအစိၤတဖၣ် ပာ်လီၤဝဲတၢ်ဒိဂ့ၤတဲာ်ဘၣ်လၢ ဘၣ်ဃးဒီးတၢ်စံးထီၣ်ပတြၢၤယွၤ လၢတၢ်သးဝံၣ်န့ၣ်လီၤ. အဝဲသ့ၣ်န့ၣ် တလဲၤဘူၣ်ထီၣ်ဘါထီၣ်ဘၣ် ယဟိဝၤယွၤလၢ တၢ်လုၢ်ဟံၣ်အပူၤဒ် ပှၤအံၣ်စရ့လးဖိတဖၣ်အသိးဘၣ်. အဝဲသ့ၣ် ဘၣ်အိၣ်ဖှိၣ်ရိဖှိၣ်လၢဟံၣ်လီၤ. အဝဲသ့ၣ်အဟံၣ်န့ၣ် တဃံတလၤဒ် တၢ်လုၢ်ဟံၣ်အသိးသနာ်က့ အဝဲသ့ၣ်သးဝံၣ်တၢ်လၢ တၢ်သူၣ်ဆူၣ်သးဆူၣ်အပူၤလီၤ. စီၤပီလူးတဲဘၣ် ဒီပုၢ်ဝဲၢ်ခရံာ်ဖိတဖၣ်လၢ– “သိၣ်လိလိာ်သုသးဒီး သဆၣ်ထီၣ်လိာ်သုခံ လၢထါစံးထီၣ်ပတြၢၤ, ဒီးတၢ်သးဝံၣ်, ဒီးအုၣ်တၢ်ဘၣ်ဃးဒီးသးန့ၣ်, ဒီးသးဝံၣ်ထီၣ်ယွၤ, အိၣ်ဒီးတၢ်ဘျုးတၢ်ဖှိၣ်လၢ သုသးကံၢ်ပူၤတက့ၢ်.” (ကလီးစဲ ၃:၁၆) လၢတၢ်န့ၣ်အဃိ တၢ်သးဝံၣ်လၢ ပလံာ်သးဝံၣ်အပူၤတဖၣ်န့ၣ် ပကြၢးသးဝံၣ်အီၤပှဲၤဒီး ‘တၢ်စံးဘျုးစံးဖှိၣ်’ လီၤ. တၢ်အီၣ်တၢ်အီလၢ “အဆၢအကတီၢ်ဘၣ်” လၢ “တၢ်အကုၢ်အပှၤလၢအကလုၢ်တီ, ဒီးအကူၣ်တၢ်သ့” ကတဲာ်ကတီၤန့ၢ်ပှၤန့ၣ် ပၣ်ဃုာ်ဒီး တၢ်သးဝံၣ်လီၤ.—မးသဲ ၂၄:၄၅.
နသးဝံၣ်တၢ်ဒူဒူကသ့ဒ်လဲၣ်
၉. (က) လၢတၢ်အိၣ်ဖှိၣ်ရိဖှိၣ် ဒီးတၢ်အိၣ်ဖှိၣ်ဖးဒိၣ်န့ၣ် ဘၣ်မနုၤအဃိ ပှၤတနီၤနီၤသးဝံၣ်ထီၣ်တၢ်လၢ အသးဒီဖျၢၣ်တဘူၣ်ဘၣ်လဲၣ်. (ခ) ပဘၣ်သးဝံၣ်စံးထီၣ်ပတြၢၤ ယဟိဝၤယွၤဒ်လဲၣ် ဒီးမတၤကြၢးတီခိၣ်ရိၤမဲ တၢ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၉ ပှၤတနီၤနီၤန့ၣ် သးဝံၣ်တၢ်တဘူၣ်ဘၣ် မ့ၢ်လၢတၢ်ဂ့ၢ်လၢလာ်တဖၣ်အံၤအဃိလီၤ. ဘၣ်သ့ၣ်သ့ၣ် ကမ့ၢ်လၢအဝဲသ့ၣ် အဟံၣ်ဖိဃီဖိ မ့တမ့ၢ် အတၢ်ဆဲးတၢ်လၤအဃိ တသးဝံၣ်တၢ်ကြီကြီဘၣ်. မ့တမ့ၢ် မ့ၢ်လၢအဝဲသ့ၣ်ဒိကနၣ် ဒီးထိၣ်သတြီၤဝဲအကလုၢ် ဒီးပှၤလၢအမံၤဟူသၣ်ဖျါတဖၣ် အကလုၢ်အဃိ အဝဲသ့ၣ်မဲာ်ဆှး ဒီးသးဝံၣ်တၢ်တဘူၣ်ဘၣ်. ဘၣ်ဆၣ် ပဝဲခဲလၢာ် ပအိၣ်ဒီးမူဒါလၢ ကသးဝံၣ်စံးထီၣ်ပတြၢၤ ယဟိဝၤယွၤလီၤ. လၢတၢ်န့ၣ်အဃိ စိာ်ထီထီၣ်နလံာ်သးဝံၣ် ဒီးမိာ်ထီၣ်နခိၣ် ဒီးသးဝံၣ်တၢ်လၢ တၢ်သူၣ်ဆူၣ်သးဆူၣ်အပူၤတက့ၢ်. (ဧ့စြၤ ၃:၁၁; ဖး စံးထီၣ်ပတြၢၤ ၁၄၇:၁ တက့ၢ်.) မုၢ်မဆါတနံၤအံၤ လၢဘီမုၢ်ဘျီၣ်ဒိၣ်အါဖျၢၣ်န့ၣ် ပှၤအိးထီၣ်ပၠး တၢ်သးဝံၣ်အလံာ်မဲာ်ဖျၢၣ် လၢတၢ်မဲာ်ညါအဃိ မၤစၢၤပှၤလၢ ပသးဝံၣ်တၢ် ဒိၣ်ဒိၣ်ကသ့အဂီၢ်လီၤ. ဘီမုၢ်တၢ်မၤအကၠိ လၢတၢ်အိၣ်ဖှိၣ်သးပှၢ်အဂီၢ်န့ၣ် ပၣ်ဃုာ်ဒီး တၢ်သူၣ်ဝံၣ်သးဆၢအဂ့ၢ်လီၤ. လၢတၢ်န့ၣ်အဃိ အရ့ဒိၣ်ဒိၣ်မးလၢ တၢ်အိၣ်ဖှိၣ်သးပှၢ်တဖၣ် ကဘၣ်တီခိၣ်ရိၤမဲ တၢ်သူၣ်ဝံၣ်သးဆၢ လၢတၢ်အိၣ်ဖှိၣ်အပူၤန့ၣ်လီၤ.
၁၀. ပသးဝံၣ်တၢ်ဒိၣ်ဒိၣ် မ့ၢ်တဘူၣ်ဘၣ်န့ၣ် ပကြၢးသ့ၣ်နီၣ်ထီၣ်တၢ်မနုၤလဲၣ်.
၁၀ ပှၤအါဂၤန့ၣ် သးဝံၣ်တၢ်တဘူၣ်ဘၣ် မ့ၢ်လၢအဝဲသ့ၣ်ဆိကမိၣ်ဝဲလၢ အကလုၢ်ကသီၣ်ဒိၣ်တလၢ မ့တမ့ၢ် အကလုၢ်တမုာ်ဘၣ်အဃိလီၤ. ဘၣ်ဆၣ် ဆိကမိၣ်ကွၢ်ဒ်အံၤတက့ၢ်. ဖဲပကတိၤတၢ်အခါ ပဝဲခဲလၢာ် “ပမၤကမၣ်တၢ်အါမံၤ” လီၤ. ဘၣ်ဆၣ် ပတဲကမၣ်ဘၣ်တၢ်အဃိ ပတကတိၤတၢ်လၢၤဘၣ်ဧါ. တမ့ၢ်ဒ်န့ၣ်ဘၣ်. (ယၤကိာ် ၃:၂) လၢတၢ်န့ၣ်အဃိ ပကလုၢ်မ့ၢ်တမုာ်ဘၣ်သနာ်က့ ပကြၢးသးဝံၣ်စံးထီၣ်ပတြၢၤ ယဟိဝၤယွၤလီၤ.
၁၁, ၁၂. ဒ်သိးပသးဝံၣ်တၢ်ကသ့အဂီၢ် ပကဘၣ်မၤဒ်လဲၣ်.
၁၁ ပကဘၣ်သးဝံၣ်တၢ်ဒ်လဲၣ်န့ၣ် ပတသ့ၣ်ညါဘၣ်အဃိ ဘၣ်သ့ၣ်သ့ၣ် ပသးဝံၣ်တၢ်တဘူၣ်ဘၣ်. ဘၣ်ဆၣ် ဒ်သိးပသးဝံၣ်တၢ်ကသ့အဂီၢ် တၢ်ဟ့ၣ်ကူၣ်အိၣ်ဝဲတနီၤလီၤ.a—ကွၢ်တၢ်ဂ့ၢ်အဘျဲၣ်တက့ၢ်.
၁၂ ဖဲနသးဝံၣ်တၢ်အခါ နမ့ၢ်သ့ၣ်ညါလၢ နဘၣ်သါထီၣ်သါလီၤ ဒ်လဲၣ်ဒ်လဲၣ်န့ၣ် ကကဲဘျုးဒ်သိး နသးဝံၣ်တၢ်လၢ နကလုၢ်ဆူၣ်ဆူၣ်ဒီး ဒိၣ်ဒိၣ်ကသ့အဂီၢ်လီၤ. ဒ်လီမ့ၣ်အူအသဟီၣ် မၤကပီၤထီၣ်ဝဲ မ့ၢ်အူအသိး ဖဲနကတိၤတၢ် မ့တမ့ၢ် နသးဝံၣ်တၢ်အခါ နသါထီၣ်သါလီၤန့ၣ် ကမၤဆူၣ်ထီၣ် နကလုၢ်လီၤ. နကြၢးသးဝံၣ်တၢ်ဒိၣ်ဒိၣ် ဒ်နကတိၤတၢ်အသိး မ့တမ့ၢ် ဒိၣ်န့ၢ်ဒံးနကတိၤတၢ်န့ၣ်လီၤ. (ကွၢ်တၢ်ဟ့ၣ်ကူၣ်လၢ Benefit From Theocratic Ministry School Education, pages 181 to 184, လၢအခိၣ်တီမ့ၢ်ဝဲ “Properly Control your Air Supply” တက့ၢ်.) လံာ်စီဆှံဟံးစုနဲၣ်ကျဲဝဲ ပှၤလၢအဘူၣ်ထီၣ်ဘါထီၣ် ယဟိဝၤယွၤလၢ အဝဲသ့ၣ်ကဘၣ်သးဝံၣ် စံးထီၣ်ပတြၢၤတၢ်လၢ တၢ် “သူၣ်ဖှံသးညီ” အပူၤလီၤ.—စံးထီၣ်ပတြၢၤ ၃၃:၁-၃.
၁၃. ပသးဝံၣ်တၢ် ဒူဒူကသ့ဒ်လဲၣ်. တဲနၢ်ပၢၢ်တက့ၢ်.
၁၃ ဖဲနမၤဟံၣ်ဖိဃီဖိ တၢ်မၤလိလံာ်စီဆှံအခါ မ့တမ့ၢ် နမၤနီၢ်ကစၢ်တၢ်မၤလိလံာ်စီဆှံအခါ နမၤကွၢ်တၢ်ဟ့ၣ်ကူၣ်လၢ လာ်တဖၣ်အံၤသ့ဝဲလီၤ. လၢပလံာ်သးဝံၣ်အပူၤန့ၣ် ဃုထၢတၢ်သးဝံၣ်လၢနကနၣ်မုာ် အဒိၣ်ကတၢၢ်တယုၢ်တက့ၢ်. အဆိကတၢၢ်န့ၣ် ဖးထီၣ်တၢ်သးဝံၣ် အလံာ်မဲာ်ဖျၢၣ်ဒီတယုၢ် လၢနကလုၢ်ဒိၣ်ဒိၣ်ဒီး ဖးအီၤဒူဒူတက့ၢ်. ဝံၤဒီးဖးထီၣ်လံာ်မဲာ်ဖျၢၣ်တကရူၢ် လၢနကလုၢ်ဒိၣ်ဒိၣ်တက့ၢ်. နဖးလံာ်မဲာ်ဖျၢၣ်တကရူၢ် မ့ၢ်တကတၢၢ်ဒံးဘၣ်န့ၣ် ကသါတဂ့ၤ. ဒ်နဖးလံာ်နကလုၢ်သီၣ်ဒိၣ်ဒိၣ်အသိး သးဝံၣ်အီၤလၢ နကလုၢ်ဒိၣ်ဒိၣ်ဒ်န့ၣ်အသိးတက့ၢ်. (ယၡါယၤ ၂၄:၁၄) နမ့ၢ်မၤဒ်န့ၣ်န့ၣ် ဖဲနသးဝံၣ်တၢ်အခါ နထုးနကလုၢ်ကန့ၢ်လီၤ. နကမၤဒ်န့ၣ်အဂီၢ် တဘၣ်မဲာ်ဆှးဒီး ပျံၤတၢ်တဂ့ၤ.
၁၄. (က) ဖဲပသးဝံၣ်တၢ်အခါ ပမ့ၢ်အိးထီၣ်ပကိာ်ပူၤ လဲၢ်လဲၢ်န့ၣ် ကမၤစၢၤပှၤဒ်လဲၣ်. (ကွၢ်တၢ်လွံၢ်နၢၣ်လၢ “ဒ်သိးနသးဝံၣ် နကလုၢ်ကမုာ်အဂီၢ် နကဘၣ်မၤဒ်လဲၣ်”) (ခ) ဒ်သိးနသးဝံၣ်တၢ် နကလုၢ်ကမုာ်အဂီၢ် တၢ်ဟ့ၣ်ကူၣ်လၢအမၤစၢၤနၤန့ၣ် မ့ၢ်မနုၤလဲၣ်.
၁၄ ဒ်သိးနသးဝံၣ်တၢ် နကလုၢ်ကန့ၢ်အဂီၢ် နကဘၣ်အိးထီၣ် နကိာ်ပူၤမ့ၢ်လဲၢ်လီၤ. လၢတၢ်န့ၣ်အဃိ ဖဲနသးဝံၣ်တၢ်အခါ အိးထီၣ်နကိာ်ပူၤလဲၢ်န့ၢ် ဖဲနကတိၤတၢ်အခါန့ၣ်တက့ၢ်. ဘၣ်ဆၣ် နမ့ၢ်တူၢ်ဘၣ်လၢ နကလုၢ်လီၤတလၢ မ့တမ့ၢ် ထီၣ်တလၢန့ၣ် နကြၢးမၤဒ်လဲၣ်. နဃုထံၣ်န့ၢ်တၢ်ဟ့ၣ်ကူၣ်လၢ တၢ်လွံၢ်နၢၣ်အပူၤ လၢအမ့ၢ် “Overcoming Specific Problems,” လၢအအိၣ်လၢ Benefit From Theocratic Ministry School Education, page 184 အပူၤသ့ဝဲလီၤ.
သးဝံၣ်စံးထီၣ်ပတြၢၤလၢ သးဒီဖျၢၣ်တက့ၢ်
၁၅. (က) လၢ ၂၀၁၆ တနံၣ်တဘျီတၢ်အိၣ်ဖှိၣ်ရိဖှိၣ်န့ၣ် ပှၤဘိးဘၣ်သ့ၣ်ညါလီၤဝဲ တၢ်မနုၤလဲၣ်. (ခ) ဘၣ်မနုၤအဃိ လံာ်သးဝံၣ်ဘၣ်တၢ်မၤဂ့ၤထီၣ်က့ၤအီၤလဲၣ်.
၁၅ ဖဲ ၂၀၁၆ တနံၣ်တဘျီတၢ်အိၣ်ဖှိၣ်ရိဖှိၣ်န့ၣ် ဒီပုၢ်ဝဲၢ်စတံၤဖ့ၣ် လဲးထ် လၢအပၣ်ဃုာ်လၢ ပှၤပၢဆှၢတၢ်ကမံးတံာ်အကျါန့ၣ် ဘိးဘၣ်သ့ၣ်ညါဝဲ လံာ်သးဝံၣ်အသီတဘ့ၣ် လၢအခိၣ်တီမ့ၢ်ဝဲ “သးဝံၣ်စံးထီၣ်ပတြၢၤ ယဟိဝၤယွၤ လၢသးဒီဖျၢၣ်” န့ၣ်လီၤ. ဒီပုၢ်ဝဲၢ်စတံၤဖ့ၣ် လဲးထ် တဲနၢ်ပၢၢ်ဝဲလၢ ပဘှီဂ့ၤထီၣ်က့ၤလံာ်သးဝံၣ်အသီတဘ့ၣ်အံၤန့ၣ် ဒ်သိးကလီၤပလိာ်လိာ်အသးဒီး ဟီၣ်ခိၣ်သီတၢ်ကွဲးကျိာ်ထံလံာ်စီဆှံ လၢဘၣ်တၢ်ဘှီဂ့ၤထီၣ်က့ၤအီၤ အဂီၢ်န့ၣ်လီၤ. လၢ ဟီၣ်ခိၣ်သီတၢ်ကွဲးကျိာ်ထံလံာ်စီဆှံ အပူၤတၢ်ကတိၤတနီၤ ဘၣ်တၢ်ဆီတလဲအီၤအဃိ တၢ်သးဝံၣ်အလံာ်မဲာ်ဖျၢၣ်တနီၤစ့ၢ်ကီး ဘၣ်တၢ်ဆီတလဲက့ၤအီၤလီၤ. တကးဒံးဘၣ် တၢ်ဖၢနုာ်အါထီၣ် တၢ်သးဝံၣ်လၢ ဘၣ်ဃးဒီးတၢ်စံၣ်တဲၤတဲလီၤတၢ်မၤ ဒီးတၢ်ပှ့ၤက့ၤအဂ့ၢ်လီၤ. ဒီးမ့ၢ်လၢတၢ်သူၣ်ဝံၣ်သးဆၢန့ၣ် မ့ၢ်ဝဲတၢ်အရ့ဒိၣ်တခါလၢ တၢ်ဘူၣ်ထီၣ်ဘါထီၣ်အဂီၢ်အဃိ ပှၤပၢဆှၢတၢ်ကမံးတံာ် အဲၣ်ဒိးထုးထီၣ်ဝဲ လံာ်သးဝံၣ်လၢအဂ့ၤတဘ့ၣ်လီၤ. လၢတၢ်န့ၣ်အဃိ လံာ်သးဝံၣ်အကုခိၣ်န့ၣ် အလွဲၢ်လီၤဂာ်ဒီး ဟီၣ်ခိၣ်သီတၢ်ကွဲးကျိာ်ထံလံာ်စီဆှံ န့ၣ်လီၤ.
၁၆, ၁၇. လၢလံာ်သးဝံၣ်အသီအပူၤန့ၣ် တၢ်ဆီတလဲမနုၤအိၣ်ဝဲလဲၣ်.
၁၆ ဒ်သိးပဃုတၢ်သးဝံၣ်ကညီအဂီၢ် တၢ်သးဝံၣ်လၢအဘၣ်ထွဲလိာ်အသးတဖၣ် ဘၣ်တၢ်ပာ်ဖှိၣ်အီၤတကရူၢ်ဘၣ်တကရူၢ်လီၤ. အဒိ, တၢ်သးဝံၣ်အဆိကတၢၢ် ၁၂ ယုၢ်န့ၣ်ဘၣ်ဃးဒီး ယဟိဝၤယွၤဒီးလၢခံ ၈ ယုၢ်န့ၣ်ဘၣ်ဃးဒီး ယ့ၣ်ၡူးဒီးတၢ်ပှ့ၤက့ၤအဂ့ၢ်လီၤ. ဒ်သိးဒီပုၢ်ဝဲၢ်လၢ ကဘၣ်ဟ့ၣ်တၢ်စံၣ်တဲၤတဲလီၤတၢ်လၢ ကမျၢၢ်အဂီၢ်တဂၤ ဃုထၢဝဲတၢ်သးဝံၣ်ကညီအဂီၢ် လံာ်သးဝံၣ်အဆိကတၢၢ်တကဘျံးန့ၣ် အိၣ်ဒီးတၢ်သးဝံၣ်အခိၣ်တီတဖၣ်လီၤ.
၁၇ တၢ်သးဝံၣ်အလံာ်မဲာ်ဖျၢၣ်တနီၤန့ၣ် ဘၣ်တၢ်ဆီတလဲအီၤ ဒ်သိးတၢ်သးဝံၣ်အခီပညီတဖၣ် ကဖျါၡဲဒီးပှၤကိးဂၤဒဲး သးဝံၣ်တၢ်လၢသူၣ်ဒီဖျၢၣ်သးဒီဖျၢၣ် ကသ့အဂီၢ်လီၤ. တၢ်ကတိၤလၢပှၤတသူအီၤလၢၤဘၣ်တဖၣ် ဘၣ်တၢ်ထုးထီၣ်ကွံာ်အီၤ ဒီးတၢ်ကတိၤတနီၤနီၤန့ၣ် ဘၣ်တၢ်ဆီတလဲအီၤလီၤ. တၢ်သးဝံၣ်အခိၣ်တီတနီၤန့ၣ် ဘၣ်တၢ်ဆီတလဲအီၤစ့ၢ်ကီးလီၤ. အဒိ, တၢ်သးဝံၣ်အခိၣ်တီလၢ “ပၢၤနသး” န့ၣ် ခဲအံၤဘၣ်တၢ်ဆီတလဲက့ၤအီၤလၢ “ပဘၣ်ပၢၤပသး” လီၤ. ဘၣ်မနုၤအဃိလဲၣ်. လၢညါန့ၣ် ဖဲပသးဝံၣ်တၢ်သးဝံၣ်အံၤအခါ လီၤဂာ်ဒ်သိး ပတဲပှၤဂၤလၢ အကဘၣ်ပၢၤအသးန့ၣ်လီၤ. လၢတၢ်န့ၣ်အဃိ ကဲထီၣ်တၢ်မဲာ်ဆှးလၢ ပှၤအသီ, ပှၤလၢအသးအိၣ်တၢ်မ့ၢ်တၢ်တီ, ပှၤသးစၢ်, ဒီပုၢ်ဝဲၢ်မုၣ်တဖၣ်အဂီၢ် ဖဲအဝဲသ့ၣ် ဟဲထီၣ်တၢ်အိၣ်ဖှိၣ်ရိဖှိၣ် ဒီးတၢ်အိၣ်ဖှိၣ်ဖးဒိၣ်အခါသ့ဝဲလီၤ. လၢတၢ်ဂ့ၢ်တဖၣ်အံၤအဃိ တၢ်သးဝံၣ်တယုၢ်အံၤအခိၣ်တီ ဒီးတၢ်သးဝံၣ်အမဲာ်ဖျၢၣ်တနီၤ ဘၣ်တၢ်ဆီတလဲအီၤလီၤ.
ဖဲနမၤဟံၣ်ဖိဃီဖိ တၢ်မၤလိလံာ်စီဆှံအခါ ကၠီးလိနသးလၢ တၢ်သးဝံၣ်တက့ၢ် (ကွၢ်လံာ်အဆၢ ၁၈)
၁၈. ဘၣ်မနုၤအဃိ ပကဘၣ်ကၠီးလိပသးလၢ တၢ်သးဝံၣ်အသီတဖၣ်န့ၣ်လဲၣ်. (ကွၢ်တၢ်ဂ့ၢ်အဘျဲၣ်တက့ၢ်.)
၁၈ လံာ်သးဝံၣ်လၢအမ့ၢ် “သးဝံၣ်စံးထီၣ်ပတြၢၤ ယဟိဝၤယွၤ လၢသးဒီဖျၢၣ်” အပူၤတၢ်သးဝံၣ်အါယုၢ်န့ၣ် လီၤဂာ်ဒ်တၢ်ဃ့ဘါထုကဖၣ်လီၤ. တၢ်သးဝံၣ်တဖၣ်အံၤ မၤစၢၤပှၤဒ်သိး ပကတဲဖျါထီၣ် ယဟိဝၤယွၤလၢ ပတၢ်တူၢ်ဘၣ်န့ၣ်လီၤ. တၢ်သးဝံၣ်အဂၤတနီၤန့ၣ် ကဲထီၣ်တၢ်မၤစၢၤဒ်သိးပ ‘ကအိၣ်ဒီးတၢ်အဲၣ်တၢ်ကွံ ဒီးကမၤတၢ်ဂ့ၤ’ အဂီၢ်လီၤ. (ဧ့ၤဘြံၤ ၁၀:၂၄) ဒ်သိးပသးဝံၣ်တၢ်ကသ့ထီၣ်အဂီၢ် ပကဘၣ်ဒိကနၣ် တၢ်ဒ့တၢ်အူ ဒီးတၢ်သးဝံၣ်အမဲာ်ဖျၢၣ် ဒီးတၢ်သးဝံၣ်အထီၣ်အလီၤန့ၣ်လီၤ. ဒီးတၢ်သးဝံၣ်တဖၣ်န့ၣ် ပဃုထံၣ်န့ၢ်အီၤလၢ jw.org အပူၤသ့ဝဲလီၤ. နမ့ၢ်သးဝံၣ်ကၠီးလိနသးလၢဟံၣ်န့ၣ် နသးဝံၣ်တၢ်ဒူဒူ ဒီးလၢသးဒီဖျၢၣ်ကသ့ဝဲလီၤ.b—ကွၢ်တၢ်ဂ့ၢ်အဘျဲၣ်တက့ၢ်.
၁၉. ပှၤလၢတၢ်အိၣ်ဖှိၣ်အပူၤကိးဂၤဒဲး ပၣ်ဃုာ်လၢ တၢ်ဘူၣ်ထီၣ်ဘါထီၣ် ယဟိဝၤယွၤ ကသ့လၢကျဲဒ်လဲၣ်.
၁၉ သ့ၣ်နီၣ်ထီၣ်လၢ တၢ်သူၣ်ဝံၣ်သးဆၢန့ၣ် မ့ၢ်တၢ်အရ့ဒိၣ်တခါလၢ ပတၢ်ဘူၣ်ထီၣ်ဘါထီၣ်အဂီၢ်န့ၣ်တက့ၢ်. ဒီးမ့ၢ်စ့ၢ်ကီး ကျဲတဘိလၢ ပကပာ်ဖျါထီၣ်ပတၢ်အဲၣ် ယဟိဝၤယွၤ ဒီးစံးဘျုးစံးဖှိၣ်အီၤလၢ တၢ်လၢအမၤန့ၢ်ပှၤတဖၣ်အဃိလီၤ. (ဖး ယၡါယၤ ၁၂:၅ တက့ၢ်.) နမ့ၢ်သးဝံၣ်တၢ်လၢ တၢ်သူၣ်ဆူၣ်သးဆူၣ်န့ၣ် မ့ၢ်ဒၣ်နဟ့ၣ်ဂံၢ်ဟ့ၣ်ဘါပှၤဂၤလၢ ကသးဝံၣ်ဝဲဒ်န့ၣ်စ့ၢ်ကီးလီၤ. လၢတၢ်အိၣ်ဖှိၣ်အပူၤ ပှၤသးစၢ်မ့ၢ်ဂ့ၤ, ပှၤသးပှၢ်မ့ၢ်ဂ့ၤ, ပှၤအသီမ့ၢ်ဂ့ၤ, ပှၤခဲလၢာ်ပၣ်ဃုာ်လၢ တၢ်ဘူၣ်ထီၣ်ဘါထီၣ် ယဟိဝၤယွၤ လၢကျဲဒ်အံၤသ့ဝဲလီၤ. လၢတၢ်န့ၣ်အဃိ တဘၣ်မဲာ်ဆှးလၢ နကသးဝံၣ်တၢ်အဂီၢ်တဂ့ၤ. ဒ်ပှၤကွဲးထါစံးထီၣ်ပတြၢၤ တဲဝဲအသိး– “သးဝံၣ်ထီၣ်ယွၤ” လၢသးဒီဖျၢၣ်တက့ၢ်.—စံးထီၣ်ပတြၢၤ ၉၆:၁.
a ဒ်သိးနသးဝံၣ်တၢ်ကသ့ထီၣ်အဂီၢ် နကဘၣ်မၤဒ်လဲၣ်န့ၣ် ကွၢ်လၢ December 2014 monthly program on JW Broadcasting (video category FROM OUR STUDIO) လၢကီၤလၤဝါကျိာ်န့ၣ်တက့ၢ်.
b လၢကဝီၤတၢ်အိၣ်ဖှိၣ် ဒီးတၢ်အိၣ်ဖှိၣ်ဖးဒိၣ် ဂီၤခီဒီးမုၢ်ဆါခီ အတၢ်ရဲၣ်တၢ်ကျဲၤန့ၣ် ဘၣ်တၢ်စးထီၣ်အီၤလၢ တၢ်ဒ့တၢ်အူလၢအယံာ်ဝဲ အမံးနံးတဆံလီၤ. တၢ်ရဲၣ်တၢ်ကျဲၤအံၤ မၤစၢၤပှၤဒ်သိး ပသးကဆူၣ်ထီၣ်လၢ ပကသးဝံၣ်တၢ် ဒီးဒ်သိးပကအိၣ် ကတဲာ်ကတီၤပသးလၢ ပကဒိကနၣ်တၢ်အဂီၢ်လီၤ. လၢတၢ်န့ၣ်အဃိ ဖဲတၢ်ဒ့တၢ်အူ စးထီၣ်အခါ ပဝဲခဲလၢာ် ပကြၢးဆ့ၣ်နီၤလၢပလီၢ် ဒီးဒိကနၣ်အီၤန့ၣ်လီၤ.