အဝဲတန့ၢ်ဘၣ် ယွၤအတၢ်ဘၣ်သးလၢၤဘၣ်

လၢအခီၣ်ထံး တဂ့ၤဘၣ်

စီၤရဃၤဘၣ်အပၢ် စီၤပၤၡလိၤမိၤန့ၣ်​ ကဲဝဲစီၤပၤလၢ ကီၢ်အံၣ်စရ့လးန့ၢ်ဝဲ အနံၣ်​ ၄၀ ညါလီၤ. (၁ စီၤပၤ ၁၁:၄၂) ဘၣ်ဆၣ်​ ဖဲအပၢ်သံဝံၤအလီၢ်ခံ စီၤရဃၤဘၣ်အိၣ်လၢ ဝ့ၢ်ယရူၤၡလ့ၣ်​ ဒီးလဲၤဝဲဆူ ၡက့ၣ်​ ဒ်သိးကကဲထီၣ်စီၤပၤလၢ အပၢ်အလီၢ်လီၤ. (၂ ကွဲးနီၣ်တၢ် ၁၀:၁) အပၢ်န့ၣ်​ မ့ၢ်ဝဲစီၤပၤလၢအိၣ်ဒီး တၢ်ကူၣ်သ့အါမးလီၤ. လၢတၢ်န့ၣ်အဃိ အဝဲကကဲထီၣ်စီၤပၤန့ၣ်​ မ့ၢ်အဘၣ်ယိၣ်တၢ်ဧါ. တယံာ်လၢၤဘၣ်​ စီၤရဃၤဘၣ်​ ကဘၣ်ပာ်ဖျါထီၣ်ဝဲလၢ မ့ၢ်အအိၣ်ဒီးတၢ်ကူၣ်သ့လၢ ကမၤဘၣ်ဂီၢ်က့ၤဝဲ တၢ်ကီတၢ်ခဲတဖၣ်န့ၣ်ဧါ.

ပှၤအံၣ်စရ့လးဖိလၢ ဘၣ်တၢ်ဆီၣ်တံၢ်မၤနၢၤအီၤတဖၣ်​ ဆှၢထီၣ်ဝဲအပှၤခၢၣ်စးလၢ စီၤရဃၤဘၣ်အအိၣ်​ ဒီးတဲဘၣ်အီၤလၢ “နပၢ်မၤကီပနီၣ်ယိးဘိ, ဒီးနဲဒၣ်ခဲကနံၣ်အံၤ နပၢ်အတၢ်မၤကီ, ဒီးအနီၣ်ယိးဘိဃၢလၢ အပာ်လၢပလိၤအံၤ, မၤဖှံထီၣ်တက့ၢ်. ဒီးပကမၤနတၢ်လီၤ.”—၂ ကွဲးနီၣ်တၢ် ၁၀:၃, ၄.

စီၤရဃၤဘၣ်​ ကဘၣ်ဆၢတဲာ်တၢ်န့ၣ်​ ကီဒိၣ်မးလီၤ. အဝဲမ့ၢ်မၤဝဲဒ် ပှၤဂီၢ်မုၢ်တဖၣ်ဃ့ထီၣ်ဝဲအသိးန့ၣ်​ အဝဲဒီးအဟံၣ်ဖိဃီဖိတဖၣ်​ တအိၣ်ဘၣ်ဝဲ ဘီၣ်ဘီၣ်ညီညီဒ် အအိၣ်ညီနုၢ်ဝဲအသိးဘၣ်. ဘၣ်ဆၣ်​ အဝဲမ့ၢ်ဂ့ၢ်လိာ်ဝဲ ပှၤဂီၢ်မုၢ်တဖၣ်အတၢ်ဃ့န့ၣ်​ ဘၣ်သ့ၣ်သ့ၣ်အဝဲသ့ၣ်​ ကပူထီၣ်ထီဒါအီၤလီၤ. အဝဲမၤဝဲဒ်လဲၣ်. အဆိကတၢၢ်န့ၣ်​ အဝဲဃ့တၢ်ဟ့ၣ်ကူၣ်လၢ အပၢ်အပှၤဟ့ၣ်ကူၣ်တၢ်လၢ အသးပှၢ်တဖၣ်အအိၣ်လီၤ. အဝဲသ့ၣ်တဲဘၣ်အီၤလၢ ဒိကနၣ်ပှၤဂီၢ်မုၢ်တဖၣ်​ အတၢ်ဃ့တက့ၢ်. ဘၣ်ဆၣ်လၢခံ အဝဲလဲၤဃ့တၢ်ဟ့ၣ်ကူၣ်လၢ အသကိးလၢအသးနံၣ်​ ထဲသိးဒီးအီၤတဖၣ်အအိၣ်​ ဒီးဆၢတဲာ်ဝဲလၢ ကမၤဝဲပှၤဂီၢ်မုၢ်တဖၣ်​ ဆူၣ်ဆူၣ်ကိၤကိၤလီၤ. စီၤရဃၤဘၣ်​ တဲဘၣ်ဝဲပှၤဂီၢ်မုၢ်တဖၣ်လၢ “ယပၢ်ပာ်လီၤတၢ်ဝံတၢ်ယိး အဃၢတဖၣ်လၢသုဖီခိၣ်လီၤ. ယကမၤဃၢဒိၣ်ထီၣ်​ ဒၣ်လဲာ်အီၤန့ၣ်လီၤ. အဝဲဖျ့သုလၢနီၣ်ဖျ့တဖၣ်​ ယဲ, ယကတီၢ်သုလၢ နီၢ်တီၢ်တဖၣ်လၢ ပှၤတီၢ်ဂီၤဖံးတဖၣ်န့ၣ်လီၤ.”—၂ ကွဲးနီၣ်တၢ် ၁၀:၆-၁၄, ခ့ခါစှၤကျိာ်.

ပဟံးန့ၢ်တၢ်မၤလိကသ့ဒ်လဲၣ်. လၢပစိၤခဲအံၤန့ၣ်​ ပအိၣ်ဒီးပှၤသးပှၢ်တဖၣ်လၢ အမၤတ့ၢ်ယဟိဝၤယွၤ အတၢ်မၤန့ၢ်အနံၣ်အါမးန့ၣ်လီၤ. ဒ်သိးပဆၢတဲာ်တၢ်လၢ အဘၣ်ကသ့အဂီၢ် အဝဲသ့ၣ်မၤစၢၤပှၤသ့လီၤ. ပမ့ၢ်အဲၣ်ဒိးကဲထီၣ်ပှၤလၢ အကူၣ်တၢ်သ့န့ၣ်​ ဒိကနၣ်​ ပှၤသးပှၢ်တဖၣ်အကလုၢ်တက့ၢ်.—ယိၤဘး ၁၂:၁၂.

“ဒိကနၣ်ယွၤ အကလုၢ်”

စီၤရဃၤဘၣ်​ ရဲၣ်လီၤကျဲၤလီၤဝဲ အသုးမုၢ်သံၣ်ဘိတဖၣ်​ ဒ်သိးကလဲၤဒုးဝဲ ပှၤလၢအပူထီၣ်ထီဒါတၢ်တဖၣ်န့ၣ်လီၤ. ဘၣ်ဆၣ်​ ယဟိဝၤယွၤဆှၢလီၤဝဲ ဝံစီၤၡမၤဒ်သိး ကတဲဘၣ်အဝဲသ့ၣ်လၢ “သုတလဲၤထီၣ်, ဒီးသုတဒုးသုးဒီး သုဒီပုၢ်ဝဲၢ်ပှၤအံၣ်စရ့လးဖိတဂ့ၤ. က့ၤက့ၤတဂၤဆူအဟံၣ်ဒၣ်ဝဲ, တဂၤဆူအဟံၣ်ဒၣ်ဝဲတက့ၢ်. အဂ့ၢ်ဒ်အံၤ, တၢ်တမံၤအံၤ ဟဲလၢယၤလီၤ.”—၁ စီၤပၤ ၁၂:၂၁-၂၄.a—ကွၢ်တၢ်ဂ့ၢ်အဘျဲၣ်တက့ၢ်.

စီၤရဃၤဘၣ်​ ကဒိကနၣ်​ ယဟိဝၤယွၤအကလုၢ်အဂီၢ် မ့ၢ်တၢ်ညီလၢအဂီၢ်ဧါ. ပှၤကထံၣ်​ စီၤပၤအသီတဂၤအံၤဒ်လဲၣ်. လၢအခီၣ်ထံးန့ၣ်​ အဝဲတဲဝဲလၢ ကစံၣ်ညီၣ်ပှၤဂၤခီဖျိ ကတီၢ်ဝဲလၢ “နီၢ်တီၢ်တဖၣ်” ဘၣ်ဆၣ်ခဲအံၤ အဝဲတမၤဆၢ ပှၤလၢပူထီၣ်ထီဒါတၢ်တဖၣ်​ တၢ်နီတမံၤဘၣ်အဃိ ပှၤကထံၣ်အီၤဒ်လဲၣ်. (ထိၣ်သတြီၤဒီး ၂ ကွဲးနီၣ်တၢ် ၁၃:၇ တက့ၢ်.) ဒ်လဲၣ်ဂ့ၤဒ်လဲၣ်ဂ့ၤ စီၤပၤဒီးအသုးမုၢ်သံၣ်ဘိတဖၣ်​ “ဒိကနၣ်ယွၤအကလုၢ်, ဒီးက့ၤက့ၤဝဲဒ်သိးကဟးထီၣ်, ဒ်ယွၤအကလုၢ်အသိးန့ၣ်လီၤ.”

ပန့ၢ်ဘၣ်တၢ်မၤလိဒ်လဲၣ်. ပှၤဂၤမ့ၢ်ထံၣ်ပှၤ ဒ်လဲၣ်ဂ့ၤဒ်လဲၣ်ဂ့ၤ ပမ့ၢ်ဒိကနၣ်​ ယွၤအကလုၢ်န့ၣ်​ ပကမ့ၢ်ပှၤကူၣ်တၢ်သ့လီၤ. ပမ့ၢ်ဒိကနၣ်ယွၤအကလုၢ်န့ၣ်​ အဝဲကဆိၣ်ဂ့ၤပှၤထီဘိလီၤ.—၅ မိၤၡ့ ၂၈:၂.

စီၤရဃၤဘၣ်​ အိၣ်ဒီးတၢ်ဒိကနၣ်အဃိ ဒိးန့ၢ်ဘၣ်တၢ်ဆိၣ်ဂ့ၤဧါ. အဝဲကဲဘၣ်ဒံးစီၤပၤလၢ ယူဒၤဒီးဘံၣ်ယၤမံၣ်​ အကလုာ်ဒူၣ်အဖီခိၣ်လီၤ. တကးဒံးဘၣ်​ အဝဲဆၢတဲာ်လီၤအသးလၢ ကသူၣ်ထီၣ်ဝဲ ဝ့ၢ်အသီတဖၣ်လီၤ. အဝဲမၤဂၢၢ်ကျၢၤထီၣ်ဝဲဝ့ၢ်တဖၣ်​ “ဆူၣ်ဆူၣ်ကလဲာ်” လီၤ. (၂ ကွဲးနီၣ်တၢ် ၁၁:၅-၁၂) ဒီးအဝဲဒိကနၣ်ဝဲ ယဟိဝၤယွၤအတၢ်သိၣ်တၢ်သီ တစိၢ်တလီၢ်လီၤ. လၢတၢ်န့ၣ်အဃိ ပှၤအံၣ်စရ့လးဖိ အဒူၣ်တဆံလၢ အဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်တဖၣ်န့ၣ်​ ဟဲက့ၤကဒါက့ၤဝဲဆူ ဝ့ၢ်ယရူၤၡလ့ၣ်​ ဒ်သိးကဆီၣ်ထွဲဝဲ စီၤရဃၤဘၣ်​ ဒီးတၢ်ဘူၣ်တၢ်ဘါလၢ အမ့ၢ်အတီန့ၣ်လီၤ. (၂ ကွဲးနီၣ်တၢ် ၁၁:၁၆, ၁၇) မ့ၢ်လၢစီၤရဃၤဘၣ်​ ဒိကနၣ်ဝဲယဟိဝၤယွၤ အကလုၢ်အဃိ အဘီအမုၢ်ဆူၣ်ထီၣ်ဝဲလီၤ.

စီၤရဃၤဘၣ်​ မၤကမၣ်တၢ် ဘၣ်ဆၣ်​ ပီၢ်ယၢ်လီၤက့ၤအသး

ဖဲစီၤရဃၤဘၣ်​ အဘီအမုၢ်ဆူၣ်ထီၣ်ဝဲအခါ အဝဲမၤဘၣ်ဝဲ တၢ်ကမၣ်လီၤ. အဝဲတဒိကနၣ်​ ယဟိဝၤယွၤအတၢ်သိၣ်တၢ်သီလၢၤဘၣ်. ဒီးဘူၣ်ထီၣ်ဘါထီၣ်ဝဲ ယွၤလၢအကမၣ်တဖၣ်လီၤ. ဘၣ်မနုၤအဃိလဲၣ်. ဘၣ်သ့ၣ်သ့ၣ်​ ခီဖျိလၢအမိၢ်မ့ၢ် ပှၤဧၣ်မိၣ်ဖိအဃိလီၤ. (၁ စီၤပၤ ၁၄:၂၁) လၢတၢ်န့ၣ်အဃိ ဘၣ်သ့ၣ်သ့ၣ်​ အမိၢ်ကဆီၣ်သနံးအီၤ ဒ်သိးကဆၢတဲာ်တၢ်လၢ ကမၣ်န့ၣ်လီၤ. ပတသ့ၣ်ညါလီၤတံၢ်လီၤဆဲးဘၣ်. ဘၣ်ဆၣ်​ စီၤရဃၤဘၣ်မၤတၢ်ကမၣ်​ ဒီးပှၤဂီၢ်မုၢ်တဖၣ်မၤပိာ်အခံလီၤ. လၢတၢ်န့ၣ်အဃိ ယဟိဝၤယွၤပျဲ အဲၤကူပတူးအစီၤပၤၡံၡး ဒုးနၢၤဝဲဝ့ၢ်အါဖျၢၣ်လၢ ယူဒၤအဘီအမုၢ်အပူၤလီၤ. စီၤရဃၤဘၣ်သူၣ်ထီၣ်ဝဲ ဝ့ၢ်ကျၢၤကျၢၤဘၣ်ဆၣ်​ ဒုၣ်ဒါတဖၣ်ဒုးနၢၤ အဝဲသ့ၣ်လီၤ.—၁ စီၤပၤ ၁၄:၂၂-၂၄; ၂ ကွဲးနီၣ်တၢ် ၁၂:၁-၄.

လၢခံစီၤၡံၡးဟဲဒုးဝဲ ဝ့ၢ်လၢယရူၤၡလ့ၣ်​ လၢစီၤရဃၤဘၣ်​ ပၢဝဲအံၤန့ၣ်လီၤ. ဖဲန့ၣ်အခါ စီၤၡမါယၤ လၢအမ့ၢ်ဝံန့ၣ်​ ဟဲတဲဘၣ်စီၤပၤရဃၣ်ဘၣ်​ ဒီးခိၣ်နၢ်ဖဲန့ၣ်တဖၣ်​ တၢ်ကစီၣ်လၢယွၤအအိၣ်​ ဒီးတဲဝဲလၢ “သုလဲၤသဒၣ်လံယၤလံ, ဒီးယဲဒၣ်အံၤ ယလဲၤသဒၣ်စ့ၢ်ကီးသုလၢ စီၤၡံၡးအစုပူၤလံ.” ဘၣ်ဆၣ်​ စီၤပၤရဃၤဘၣ်​ မၤဝဲဒ်လဲၣ်. အဝဲသ့ၣ်​ မၤဝဲတၢ်တမံၤလီၤ. လံာ်စီဆှံတဲဝဲလၢ “အံၣ်စရ့လးအပဒိၣ်ဖးဒိၣ်တဖၣ်, ဒီးစီၤပၤဆီၣ်လီၤအသး ဒီးစံးဝဲဒၣ်, ယွၤမ့ၢ်တၢ်တီတၢ်လိၤလီၤ.” လၢတၢ်န့ၣ်အဃိ ယဟိဝၤယွၤ မၤပူၤဖျဲးဝဲ စီၤရဃၤဘၣ်​ ဒီးဝ့ၢ်ယရူၤၡလ့ၣ်စ့ၢ်ကီး တဘၣ်တၢ်မၤဟးဂီၤအီၤလၢၤဘၣ်.— ၂ ကွဲးနီၣ်တၢ် ၁၂:၅-၇, ၁၂.

လၢခံ စီၤပၤရဃၤဘၣ်န့ၣ်​ ဆဲးပၢတၢ်လၢ ယူဒၤအဘီအမုၢ်ပူၤလီၤ. တချုးလၢအသံဒံးဘၣ်န့ၣ်​ ဟ့ၣ်လီၤဝဲအဖိခွါလၢအဂၤတဖၣ်​ တၢ်ဟ့ၣ်အါမးလီၤ. အဝဲမၤဝဲဒ်အံၤန့ၣ်​ ကမ့ၢ်ဒ်သိးအဖိတဖၣ်အံၤ သုတထီဒါ အဖိခွါစီၤအဘံယၤ လၢကကဲထီၣ်​ စီၤပၤလၢအလီၢ်တဂ့ၤအဂီၢ်န့ၣ်လီၤ. (၂ ကွဲးနီၣ်တၢ် ၁၁:၂၁-၂၃) စီၤပၤရဃၤဘၣ်​ ရဲၣ်ကျဲၤဝဲဒ်အံၤန့ၣ်​ ပာ်ဖျါထီၣ်ဝဲလၢ အအိၣ်ဒီးတၢ်ကူၣ်သ့ အါန့ၢ်ဒံးဖဲအသးစၢ် အဆၢကတီၢ်န့ၣ်လီၤ.

စီၤရဃၤဘၣ်​ မ့ၢ်ပှၤအဂ့ၤဧါ မ့တမ့ၢ် ပှၤအၢဧါ

စီၤရဃၤဘၣ်​ မၤဝဲတၢ်ဂ့ၤတနီၤ ဘၣ်ဆၣ်​ လံာ်စီဆှံတဲဝဲလၢအဝဲ “မၤတၢ်အၢလီၤ.” ဘၣ်မနုၤအဃိ လံာ်စီဆှံတဲဝဲဒ်န့ၣ်လဲၣ်. မ့ၢ်လၢ “အတကတဲာ်ကတီၤဘၣ်အသး ဒ်သိးအကဃုယွၤဘၣ်” အဃိလီၤ. လၢတၢ်န့ၣ်အဃိ တဒိးန့ၢ်ဘၣ်ယဟိဝၤယွၤ အတၢ်ဘၣ်သးလၢၤဘၣ်.—၂ ကွဲးနီၣ်တၢ် ၁၂:၁၄.

ပဟံးန့ၢ်တၢ်မၤလိလၢ စီၤပၤရဃၤဘၣ်အအိၣ်​ ကသ့ဒ်လဲၣ်. တဘျီတခီၣ်န့ၣ်​ အဝဲဒိကနၣ်ယွၤအကလုၢ်လီၤ. အဝဲမၤတၢ်ဂ့ၤတနီၤလၢ ယွၤအပှၤဂီၢ်မုၢ်အဂီၢ်စ့ၢ်ကီးလီၤ. ဘၣ်ဆၣ်​ အဝဲအတၢ်ရ့လိာ်သးဒီး ယဟိဝၤယွၤတဂ့ၤအါအါဘၣ်​ ဒီးအသးတဆူၣ်လၢ ကမၤတၢ်ဘၣ်ယွၤအသး စ့ၢ်ကီးဘၣ်. တကးဒံးဘၣ်​ အဝဲပတုာ်မၤ တၢ်လၢအဘၣ်​ ဒီးအဝဲဘူၣ်ထီၣ်ဘါထီၣ်ဝဲ ယွၤလၢအကမၣ်တဖၣ်လီၤ. ဘၣ်သ့ၣ်သ့ၣ်​ နကဆိကမိၣ်ဘၣ်လၢ ‘စီၤပၤရဃၤဘၣ်​ တူၢ်လိာ်ဝဲယဟိဝၤယွၤ အတၢ်သိၣ်ဃီၣ်​ ဒီးပီၢ်ယၢ်လီၤက့ၤအသးန့ၣ်​ မ့ၢ်လၢအအဲၣ်ဒိးဒိးန့ၢ်ဘၣ်​ ယွၤအတၢ်ဘၣ်သးအဃိဧါ မ့တမ့ၢ် ပှၤတဲအီၤအဃိ အမၤဝဲဧါ.’ (၂ ကွဲးနီၣ်တၢ် ၁၁:၃, ၄; ၁၂:၆) လၢခံပထံၣ်ဘၣ်လၢ အမၤကဒီးတၢ်အၢတၢ်သီတဖၣ်လီၤ. အဝဲလီၤဆီဒီး အဖုဖးဒိၣ်​ စီၤဒၤဝံးန့ၣ်လီၤ. ပသ့ၣ်ညါလၢ စီၤပၤဒၤဝံးန့ၣ်​ မၤဘၣ်တၢ်ကမၣ်ဖးဒိၣ်တဖၣ်လီၤ. ဘၣ်ဆၣ်​ ဖဲအမၤဘၣ်တၢ်ကမၣ်ဖးဒိၣ်ဝံၤအခါ အဝဲပီၢ်ယၢ်လီၤက့ၤအသးနီၢ်ကီၢ်လီၤ. တကးဒံးဘၣ်​ အဝဲအဲၣ်ယဟိဝၤယွၤ ဒီးတၢ်ဘူၣ်တၢ်ဘါလၢ အမ့ၢ်အတီလၢ အတၢ်အိၣ်မူအပူၤတစိၤအသးလီၤ.—၁ စီၤပၤ ၁၄:၈; စံးထီၣ်ပတြၢၤ ၅၁:၁, ၁၇; ၆၃:၁.

ဘၣ်ဃးဒီးတၢ်ဂ့ၢ်အံၤန့ၣ်​ ပဟံးန့ၢ်တၢ်မၤလိသ့အါမးလီၤ. ပလုၢ်အီၣ်လုၢ်အီ ပဟံၣ်ဖိဃီဖိတဖၣ်​ ဒီးပမၤစၢၤပှၤဂၤန့ၣ်​ မ့ၢ်တၢ်လၢအလီၤစံးပတြၢၤလီၤ. ဘၣ်ဆၣ်​ ဒ်သိးပကဒိးန့ၢ်ဘၣ်​ ယွၤအတၢ်ဘၣ်သးအဂီၢ် ပကဘၣ်ဘူၣ်ထီၣ်ဘါထီၣ်​ ယဟိဝၤယွၤလၢ ကျဲလၢအဘၣ်​ ဒီးအိၣ်ဒီးတၢ်ရ့လိာ်သးဒီးအီၤ ဘူးဘူးတံၢ်တံၢ်န့ၣ်လီၤ.

ဒ်သိးပမၤဒ်န့ၣ်ကသ့အဂီၢ် ပတၢ်အဲၣ်ယဟိဝၤယွၤ ကဘၣ်ဒိၣ်ဝဲလီၤ. ဒ်သိးမ့ၣ်အူသုတလီၤပံာ်တဂ့ၤအဂီၢ် ပကဘၣ်ထၢနုာ်အါထီၣ်​ သ့ၣ်မုၣ်လီၤ. ဒ်န့ၣ်အသိး ဒ်သိးပတၢ်အဲၣ်ယွၤကအါထီၣ်အဂီၢ် ပကဘၣ်ဖးလံာ်စီဆှံ, ဆိကမိၣ်ထံတၢ်လၢပဖးအီၤတဖၣ်​ ဒီးဃ့ထုကဖၣ်လၢ ပသးဒီဖျၢၣ်န့ၣ်လီၤ. (စံးထီၣ်ပတြၢၤ ၁:၂; ရိမ့ၤ ၁၂:၁၂) ပတၢ်အဲၣ်ယွၤန့ၣ်​ ကထိၣ်ဟူးထိၣ်ဂဲၤထီၣ်ပှၤလၢ ပကမၤ တၢ်ဘၣ်ယဟိဝၤယွၤအသးထီဘိလီၤ. တကးဒံးဘၣ်​ တၢ်အဲၣ်ယွၤန့ၣ်​ ကမၤစၢၤစ့ၢ်ကီးပှၤလၢ ဖဲပမၤကမၣ်ဘၣ်တၢ်အခါ ပကပီၢ်ယၢ်လီၤက့ၤပသးနီၢ်ကီၢ် ဒီးဃ့ပျၢ်ပတၢ်ကမၣ်လၢ ယဟိဝၤယွၤအအိၣ်လီၤ. ပမ့ၢ်မၤဒ်အံၤန့ၣ်​ ပတလီၤဂာ်ဒီး စီၤရဃၤဘၣ်ဘၣ်. ဒီးပကအိၣ်ဂၢၢ်ဆိးကျၢၤလၢ တၢ်ဘူၣ်တၢ်ဘါ အမ့ၢ်အတီအပူၤလီၤ.—ယူဒၤ ၂၀, ၂၁.