ဟီၣ်ခိၣ်အံၤအကတၢၢ် ဘူးထီၣ်လံဧါ. လံာ်စီဆှံ တဲဆိပာ်ဝဲ တၢ်ခဲလၢာ် ကဟးဂီၤကွံာ်ဝဲအဂ့ၢ်ဧါ
နဆိကမိၣ် ဟီၣ်ခိၣ်အံၤ ကဟးဂီၤကွံာ်ဝဲဧါ. ဘၣ်သ့ၣ်သ့ၣ် နကဆိကမိၣ်ဘၣ်လၢ ဟီၣ်ခိၣ်အံၤ ကဟးဂီၤကွံာ်ဝဲ သတူၢ်ကလာ် ဒီးတၢ်သးသမူတဖၣ် ကဟးဂီၤကွံာ်ဝဲခဲလၢာ်လီၤ. ပှၤတနီၤ ဖဲအဖးဝဲ တၢ်ကစီၣ်လၢ လာ်တဖၣ်အံၤအခါ အဝဲသ့ၣ် နာ်ဝဲလၢ တယံာ်လၢၤဘၣ်န့ၣ် ဟီၣ်ခိၣ်အံၤ ကဟးဂီၤကွံာ်ဝဲလီၤ–
“ခီဖျိလၢ တၢ်ကူၣ်ထီၣ်ဖးလီၤပာ်အဃိမ့ၢ်ဂ့ၤ, လၢတၢ်တပာ်သူၣ်ပာ်သးအပူၤမ့ၢ်ဂ့ၤ, လၢတၢ်နၢ်ပၢၢ်ကမၣ်လိာ်သးအဃိမ့ၢ်ဂ့ၤ နယူခလံယါ တၢ်ဒုးစးထီၣ်အသးသ့လီၤ.”—Bulletin of the Atomic Scientists.
“ပူၤကွံာ် အနံၣ်တဆံအတီၢ်ပူၤ လၢဟီၣ်ခိၣ်ဒီဘ့ၣ်န့ၣ် ကလံၤမုၢ်လီၤ, မ့ၣ်အူအီၣ်ပှၢ်, တၢ်ယီၤဃ့, လၢၢ်ဖီလၢပီၣ်လဲၣ်ပူၤတဖၣ် ဝါထီၣ်, တၢ်ကိၢ်ဆူၣ်, ထံဒိၣ်ထီၣ်တဖၣ် ဟဲအါထီၣ်.”—National Geographic.
“အနံၣ်တဆံ အတီၢ်ပူၤ ဒွဲၣ်မၤဟးဂီၤတၢ်ဒိၣ်ဒိၣ်မုၢ်မုၢ်လၢ ကီၢ်အၤဖြံၤကၤအပူၤ.”—The Associated Press.
ခါဆူညါန့ၣ် ဟီၣ်ခိၣ်အံၤ ကဟးဂီၤကွံာ်ဝဲဧါ. လံာ်စီဆှံ တဲဝဲဒ်လဲၣ်.
ဟီၣ်ခိၣ်ဖျၢၣ်အံၤ ကဟးဂီၤကွံာ်ဝဲဧါ
တဟးဂီၤဘၣ်. ကစၢ်ယွၤ အကလုၢ်ကထါ ပာ်ဖျါထီၣ်ဝဲလၢ ဟီၣ်ခိၣ်အံၤ ကအိၣ်လီၤထူလီၤယိာ်. (စံၣ်တဲၤတဲလီၤ ၁:၄) ကစၢ်ယွၤ တမၤဟးဂီၤကွံာ်ဝဲ ဟီၣ်ခိၣ်လၢ အတ့လီၤဝဲအံၤဘၣ်. လၢတၢ်န့ၣ်အလီၢ် အဝဲ “ကမၤဟးဂီၤပှၤလၢအမၤဟးဂီၤဟီၣ်ခိၣ်” တဖၣ်လီၤ.—လီၣ်ဖျါ ၁၁:၁၈.
ဟီၣ်ခိၣ်အံၤ ကဟးဂီၤကွံာ်ဝဲဧါ
လံာ်စီဆှံ ပာ်ဖျါဝဲ “ဟီၣ်ခိၣ်” လၢကဟးဂီၤကွံာ်ဝဲန့ၣ် အဲၣ်ဒိးတဲဝဲ ပှၤဟီၣ်ခိၣ်ဖိလၢ အတဒိကနၣ် ကစၢ်ယွၤ အတၢ်ဟံးစုနဲၣ်ကျဲဘၣ် ဒီးမၤဖဲအသးတဖၣ်လီၤ. ဒ်လၢစီၤနိအၤအစိၤအသိး ကစၢ်ယွၤ ကမၤဟးဂီၤကွံာ် “ပှၤလၢအတယူးတယီၣ်ယွၤ” တဖၣ်လီၤ.—၂ ပ့း. ၂:၅; ၃:၇.
ဒ် ၁ ယိၤဟၣ် ၂:၁၇ ပာ်ဖျါထီၣ်ဝဲအသိး, “ဟီၣ်ခိၣ်အံၤ ဒီးဟီၣ်ခိၣ် အတၢ်သူၣ်လီသးကွံန့ၣ် ကလီၤမၢ်ကွံာ်ဝဲလီၤ.” လံာ်စီဆှံအဆၢအံၤ ဒုးသ့ၣ်ညါပှၤလၢ ကစၢ်ယွၤ တမၤဟးဂီၤဝဲ ဟီၣ်ခိၣ်ဖျၢၣ်အံၤဘၣ်, ကမၤဟးဂီၤဒၣ် ပှၤလၢအဆဲးမၤတၢ်လၢအတဂ့ၤတဘၣ်တဖၣ်န့ၣ်လီၤ.
တၢ်အကတၢၢ် ကဘၣ်ဆံးယံာ်လဲၣ်
တၢ်အကတၢၢ် ကဘၣ်ဆံးယံာ်လဲၣ်န့ၣ် လံာ်စီဆှံ တပာ်ဖျါထီၣ်န့ၢ်ပှၤ လီၤတံၢ်လီၤဆဲးဘၣ်. (မးသဲ ၂၄:၃၆) ဘၣ်ဆၣ် လံာ်စီဆှံ ပာ်ဖျါန့ၢ်ပှၤလၢ တၢ်အကတၢၢ်န့ၣ် ကဘၣ်ဘူးထီၣ်လံ. လံာ်စီဆှံ တဲဆိပာ်ဝဲ တၢ်ဂ့ၢ်တဖၣ်အံၤလီၤ–
တၢ်မၤအသးဒ်သိးဒီး တၢ်ဒုးတၢ်ယၤ, တၢ်သၣ်ဝံၤလီၤဒိ, တၢ်ဆါသံသတြိာ်, ဟီၣ်ခိၣ်ဟူး တဖၣ် ကကဲထီၣ် “တၢ်လီၢ်တတီၤဝံၤတတီၤ”လီၤ.—မးသဲ ၂၄:၃, ၇, ၁၄; လူၤကၣ် ၂၁:၁၀, ၁၁; လီၣ်ဖျါ ၆:၁-၈.
ပှၤဟီၣ်ခိၣ်ဖိ အါတက့ၢ်န့ၣ် ကအဲၣ်လီၤထဲအသး တလၢကွံာ်အခၢး. အဒိ, အဝဲသ့ၣ် “ကအဲၣ်ကျိၣ်အဲၣ်စ့,” “တသ့ၣ်ညါ တၢ်စံးဘျုးစံးဖှိၣ်ဘၣ်” ဒီး “တအိၣ်ဒီး တၢ်ပၢၤသူၣ်ပၢၤသးဘၣ်”—၂ တံၤမသ့း ၃:၁-၅.
ပှၤအါတက့ၢ်န့ၣ် အၢၣ်လီၤတူၢ်လိာ်ဝဲလၢ စးထီၣ်လၢ ၁၉၁၄ နံၣ်န့ၣ် ဟီၣ်ခိၣ်တၢ်အိၣ်သးတဖၣ် လီၤပလိာ်လိာ်အသးဒီး တၢ်လၢလံာ်စီဆှံ တဲဆိပာ်ဝဲတဖၣ် ဒီးတၢ်အကတၢၢ်န့ၣ် ဘူးထီၣ်လံလီၤ. နကသ့ၣ်ညါအါထီၣ်အဂီၢ် ကွၢ်တၢ်ဂ့ၢ်လၢ “What Does Bible Chronology Indicate About the Year 1914?” ဒီး “What Is the Sign of ‘the Last Days,’ or ‘End Times’?”
လံာ်စီဆှံ အလီၢ်ခံကတၢၢ် တကတြူၢ် တဲဆိပာ်ဝဲ တၢ်ခဲလၢာ် ကဟးဂီၤကွံာ်ဝဲအဂ့ၢ်ဧါ
လံာ်စီဆှံ အလီၢ်ခံကတၢၢ် တကတြူၢ် ပာ်ဖျါဝဲ “တၢ်လီၣ်ဖျါထီၣ် ယ့ၣ်ၡူးခရံာ် အခါ,” ဖဲယ့ၣ်ၡူး ဟဲဒီးအစိအကမီၤ လၢကမၤဟးဂီၤကွံာ် တၢ်အၢတၢ်သီ ဒီးကဟ့ၣ်လီၤ ခိၣ်ဖးလၢ ပှၤလၢအဘူၣ်ထီၣ်ဘါထီၣ် ယွၤတဖၣ်လီၤ.—၂ သ့းစၤလနံ ၁:၆, ၇; ၁ ပ့းတရူး ၁:၇, ၁၃.
လံာ်စီဆှံလၢ အလီၢ်ခံကတၢၢ် တကတြူၢ် ပာ်ဖျါဝဲ တၢ်ကမၤအသးလၢ ခါဆူညါတဖၣ်အဂ့ၢ်လီၤ. (လီၣ်ဖျါ ၁:၁) လံာ်တကတြူၢ်အံၤ ပၣ်ဃုာ်ဒီး တၢ်သးခုကစီၣ်တဖၣ် ဒီးတၢ်ကစီၣ်လၢ ဟ့ၣ်ပှၤတၢ်မုၢ်လၢ်လီၤ. (လီၣ်ဖျါ ၁:၃) တကးဒံးဘၣ် ပာ်ဖျါထီၣ်ဝဲလၢ ကစၢ်ယွၤ ကမၤလီၤမၢ်ကွံာ် တၢ်တတီတလိၤ ဒီးကမၤဃံမၤလၤ ဒီးကမၤဂ့ၤထီၣ်က့ၤဟီၣ်ခိၣ်. ဖဲန့ၣ်အခါ ပှၤဟီၣ်ခိၣ်ဖိတဖၣ် တထံၣ်ဘၣ် တၢ်ဆူးတၢ်ဆါ, တၢ်နးတၢ်ဖှီၣ် ဒီးတၢ်သံလၢၤဘၣ်.—လီၣ်ဖျါ ၂၁:၃, ၄.
နအဲၣ်ဒိးသ့ၣ်ညါအါထီၣ် လံာ်စီဆှံ အတၢ်အၢၣ်လီၤလၢ အဂ့ၤဒိၣ်မးတဖၣ်ဧါ. နကမၤလိ လံာ်စီဆှံအဂီၢ် ယဟိဝၤပှၤအုၣ်အသးတဖၣ် အဲၣ်ဒိးမၤစၢၤနၤလီၤ. တလိၣ်နဟ့ၣ် အဘူးအလဲဘၣ်. ဆဲးကျိးဒီး အဝဲသ့ၣ်ခဲအံၤတက့ၢ်.