နလဲၤခီဖျိ မူခိၣ်ကလံၤသီၣ်ဂီၤ တဘၣ်လီၢ်ဘၣ်စးကန့ၢ်အဂီၢ် လံာ်စီဆှံ မၤစၢၤနၤသ့
ပှၤအကကွဲၢ်လၢ အလဲၤခီဖျိဘၣ် တၢ်ကီတၢ်ခဲ ခီဖျိ မူခိၣ်ကလံၤသီၣ်ဂီၤ တဘၣ်လီၢ်ဘၣ်စးအကျါ နပၣ်စ့ၢ်ကီးဧါ. မူခိၣ်ကလံၤသီၣ်ဂီၤ တဘၣ်လီၢ်ဘၣ်စး ဒီးတၢ်ဘၣ်ဒိဘၣ်ထံးလၢ အဟဲကဲထီၣ်လၢ မူခိၣ်ကလံၤသီၣ်ဂီၤအဃိန့ၣ် အိၣ်ဝဲအါမး. ဟၣ်ရံၣ်က့ ကလံၤမုၢ်ဖးဒိၣ်, တဲၣ်ဖိ ကလံၤမုၢ်ဖးဒိၣ်, ကလံၤမုၢ်သဝံးတဖၣ်အဃိ ညီနုၢ် ထံဒိၣ်နိယွၤ မ့တမၢ် တၢ်ဟးဂူာ်ဂီၤအါအါဂီၢ်ဂီၢ်လီၤ. မူခိၣ်စူၤဖးဒိၣ်အဃိ ဟီၣ်ခိၣ်လာ်လီၤ, ကလံၤမုၢ်အဃိ လီဖျးတၢ် ဒီးမ့ၣ်အူအီၣ်ပှၢ်သ့. တၢ်ယီၤဃ့, တၢ်ကိၢ်ဆူၣ် ဒီးကလံၤမုၢ်လၢ အလီၤလၢ တၢ်ဂိၢ်ခါ အဆၢကတီၢ်အဃိ တၢ်ဟးဂူာ်ဟးဂီၤအါမးလီၤ.
လၢတၢ်လီၢ်အါတီၤန့ၣ် မူခိၣ်ကလံၤသီၣ်ဂီၤ တဘၣ်လီၢ်ဘၣ်စးအဃိ န့ဆၢၣ်တၢ်ဘၣ်ဒိဘၣ်ထံး ဟဲကဲထီၣ်အသး တလီၢ်လီၢ်ဒီး တၢ်ဟးဂူာ်ဟးဂီၤ အါန့ၢ်ဒံးလၢညါလီၤ. တၢ်ကရၢကရိတခါ (International Federation of Red Cross and Red Crescent Societies) ပာ်ဖျါဝဲလၢ “ပှၤလၢအထံၣ်ဘၣ် တၢ်ကီတၢ်ခဲ ခီဖျိ န့ဆၢၣ် တၢ်ဘၣ်ဒိဘၣ်ထံးစ့ၢ်ကီး အါထီၣ်ကွ့ၢ်ကွ့ၢ်လီၤ. မ့ၢ်လၢ ကိးနံၣ်ဒဲး ထံဒိၣ်နိယွၤ, ကလံၤမုၢ်ဖးဒိၣ်လီၤဒီး တၢ်ယီၤဃ့တဖၣ် ဟဲကဲထီၣ်အသးအါထီၣ်အဃိ ပှၤအါတက့ၢ်န့ၣ် ကဆဲးအိၣ်မူအဂီၢ် ကီခဲထီၣ် ဒီးပှၤလၢအကကွဲၢ်တဖၣ် အဟံၣ်အဃီလီၢ်မၢ်ကွံာ်ဝဲ ကိးနံၣ်ဒဲးလီၤ.”
ခီဖျိလၢ တၢ်ကဲထီၣ်အသးတဖၣ်အံၤအဃိ ပှၤဟီၣ်ခိၣ်ဖိတဖၣ် အသူၣ်လီၤဘှံးသးလီၤတီၤ တကးဒံးဘၣ် ခီဖျိလၢ အဟံၣ်အဃီ ဒီးတၢ်စုလီၢ်ခီၣ်ခိၣ်တဖၣ် လီၤမၢ်ကွံာ် မ့တမ့ၢ် ပှၤလၢအအဲၣ်ဘၣ်ဝဲတဖၣ် သံကွံာ်ဝဲအဃိ အဝဲသ့ၣ် အသးဘၣ်ဒိဒိၣ်မး.
နၤစ့ၢ်ကီး နထံၣ်ဘၣ်ဒီး တၢ်အိၣ်သးဒ်သိးအံၤတဖၣ်ဧါ. နမ့ၢ်ထံၣ်ဘၣ်န့ၣ် လံာ်စီဆှံ မၤစၢၤနၤသ့. လံာ်စီဆှံန့ၣ် မၤမုာ်ထီၣ်ပသး, ဟ့ၣ်ပှၤတၢ်မုၢ်လၢ်ဒီး တၢ်ဟ့ၣ်ကူၣ်လၢ အဘျုးအိၣ်တဖၣ် လၢကဲထီၣ်တၢ်မၤစၢၤလၢ ပှၤလၢအထံၣ်ဘၣ် တၢ်ကီတၢ်ခဲ ခီဖျိ န့ဆၢၣ် တၢ်ဘၣ်ဒိဘၣ်ထံးတဖၣ်အဃိ. (ရိမ့ၤ ၁၅:၄) တၢ်သံကွၢ်လၢ အရ့ဒိၣ် ဒ်သိးဒီး ဘၣ်မနုၤအဃိ ကစၢ်ယွၤဟ့ၣ်အခွဲးလၢ တၢ်ကကဲထီၣ်အသးဒ်အံၤလဲၣ်. မ့ၢ်အစံၣ်ညီၣ်ယၤဧါ. တၢ်သံကွၢ်တဖၣ်အံၤ အတၢ်စံးဆၢန့ၣ် နထံၣ်န့ၢ်သ့လၢ လံာ်စီဆှံအပူၤလီၤ.
မုၢ်မဆါတနံၤညါအံၤ မူခိၣ်ကလံၤသီၣ်ဂီၤ တဘၣ်လီၢ်ဘၣ်စးန့ၣ် တမ့ၢ်ကစၢ်ယွၤ အတၢ်စံၣ်ညီၣ်ဘၣ်
လံာ်စီဆှံ သိၣ်လိဝဲလၢ တၢ်နးတၢ်ဖှီၣ်လၢ ပှၤဟီၣ်ခိၣ်ဖိတဖၣ်ထံၣ်ဘၣ်ဝဲန့ၣ် တမ့ၢ်ကစၢ်ယွၤ ဒုးအိၣ်ထီၣ်ဝဲဘၣ်. လံာ်စီဆှံ ဒုးသ့ၣ်ညါပှၤလၢ “ပှၤမၤကွၢ် ကစၢ်ယွၤလၢ တၢ်အၢတၢ်သီတသ့ဘၣ် ဒီးအဝဲတမၤကွၢ်ပှၤဂၤလၢ တၢ်အၢတၢ်သီနီတဂၤ စ့ၢ်ကီးဘၣ်.” (ယၤကိာ် ၁:၁၃) အခီပညီန့ၣ် မူခိၣ်ကလံၤသီၣ်ဂီၤ တဘၣ်လီၢ်ဘၣ်စး လၢပထံၣ်ဘၣ်လၢ မုၢ်မဆါနံၤအံၤတဖၣ်န့ၣ် ကစၢ်ယွၤ တဒုးအိၣ်ထီၣ်ဝဲဘၣ်.
ကစၢ်ယွၤသူဝဲ န့ဆၢၣ်အသဟီၣ်တဖၣ် ဒီးစံၣ်ညီၣ် ပှၤအၢပှၤသီတဖၣ်အဂ့ၢ်န့ၣ် လံာ်စီဆှံ ပာ်ဖျါထီၣ်ဝဲ. ဘၣ်ဆၣ် ကစၢ်ယွၤ အတၢ်စံၣ်ညီၣ်တဖၣ်န့ၣ် တလီၤဂာ်ဒီး မူခိၣ်ကလံၤသီၣ်ဂီၤလၢ အမၤဟးဂီၤတၢ် ဒ်မုၢ်မဆါတနံၤအံၤအသိးဘၣ်. မူခိၣ်ကလံၤသီၣ်ဂီၤလၢ အမၤဟးဂီၤတၢ်တဖၣ်န့ၣ် ဟဲသတူၢ်ကလာ်ဒီး မၤဘၣ်ဒိ ပှၤဂ့ၤ, ပှၤအၢခဲလၢာ်လီၤ. မ့မ့ၢ် တၢ်မၤအသးလၢ လံာ်စီဆှံပူၤတဖၣ်န့ၣ် ပာ်ဖျါထီၣ်ဝဲလၢ ထီဘိန့ၣ် ကစၢ်ယွၤ ဒီသဒၢဝဲ ပှၤလၢအတၢ်ကမၣ်တအိၣ်တဖၣ်, ဟ့ၣ်ပလီၢ်ပာ်စၢၤ အဝဲသ့ၣ် တချုးတၢ်ကဲထီၣ်အသးဒံးဘၣ်, ဒီးဘၣ်မနုၤအဃိ ဘၣ်မၤဝဲလဲၣ်န့ၣ် ဒုးသ့ၣ်ညါဝဲစ့ၢ်ကီး. အဒိ, ဖဲစီၤနိအၤအစိၤ ဘၣ်မနုၤအဃိ ကစၢ်ယွၤ ဘၣ်ဒုးလုၣ်ဘၢ ထံလၢဟီၣ်ခီၣ်ဒီဘ့ၣ်လဲၣ်န့ၣ် တဲနၢ်ပၢၢ်ဝဲလီၤ. ဒီးတချုးလၢ ထံလုၣ်ဘၢတၢ်ဒံးဘၣ်န့ၣ် အဝဲဟ့ၣ်ပလီၢ်ဆိပာ်ဝဲ ဒီးဒီသဒၢဝဲ စီၤနိအၤဒီး အဟံၣ်ဖိဃီဖိတဖၣ်လီၤ.—၁ မိၤၡ့ ၆:၁၃; ၂ ပ့းတရူး ၂:၅.
နမ့ၢ်အဲၣ်ဒိးသ့ၣ်ညါအါထီၣ် ဘၣ်ဃး န့ဆၢၣ် တၢ်ဘၣ်ဒိဘၣ်ထံးလၢ မုၢ်မဆါတနံၤအံၤတဖၣ် တမ့ၢ်ကစၢ်ယွၤ စံၣ်ညီၣ်ပှၤဘၣ်န့ၣ် ဖးတၢ်ဂ့ၢ်လၢ “What Does the Bible Say About Natural Disasters?”
ပှၤလၢအဘၣ်ဒိဘၣ်ထံးလၢ မူခိၣ်ကလံၤသီၣ်ဂီၤ တဘၣ်လီၢ်ဘၣ်စးအဃိတဖၣ်န့ၣ် ကစၢ်ယွၤ ကဟုကယာ်အဝဲသ့ၣ်
လံာ်စီဆှံ ပာ်ဖျါဝဲလၢ ယဟိဝၤယွၤa ကဟုကယာ်ပှၤဒီး ဒိသူၣ်ဒိသးပှၤ. ဆိကမိၣ်ကွၢ် လံာ်စီဆှံအဆၢ လၢအမၤမုာ်ထီၣ်ပသးတဖၣ်အံၤ.
ယၡါယၤ ၆၃:၉– “ဖဲအဝဲသ့ၣ် ဘၣ်ကိၢ်ဘၣ်ဂီၤ ဒီတကတီၢ်ညါန့ၣ် ကစၢ်ယွၤ ဘၣ်ကိၢ်ဘၣ်ဂီၤ စ့ၢ်ကီးလီၤ.” NWT.
အခီပညီ– ဖဲယဟိဝၤယွၤ ထံၣ်ဘၣ်ဝဲ ပှၤဘၣ်နးဘၣ်ဖှီၣ်အခါ အသးဘၣ်ဒိဒိၣ်မး.
၁ ပ့းတရူး ၅:၇– “အသးအိၣ်သု.”
အခီပညီ– ယဟိဝၤယွၤ အဲၣ်ဒိးမၤစၢၤနၤ.
ယဟိဝၤယွၤ အတၢ်သူၣ်အိၣ်သးအိၣ်ဒီး အတၢ်ဒိသူၣ်ဒိသး ထိၣ်ဟူးထိၣ်ဂဲၤထီၣ်အီၤလၢ ကမၤန့ၢ်တၢ်လၢပဂီၢ်. အဝဲမၤမုာ်ထီၣ်ပှၤ ခီဖျိ တၢ်ဟ့ၣ်ကူၣ်လၢ အကဲဘျုးလၢ လံာ်စီဆှံပူၤ ဒီးတၢ်မုၢ်လၢ်လၢ ပနာ်န့ၢ်အီၤသ့ လၢအမ့ၢ်ဝဲ ခါဆူညါ ပတထံၣ်ဘၣ်လၢၤ န့ဆၢၣ် တၢ်ဘၣ်ဒိဘၣ်ထံးလၢၤဘၣ်.—၂ ကရံၣ်သူး ၁:၃, ၄.
တၢ်ကီတၢ်ခဲလၢ ဟဲအိၣ်ထီၣ်ခီဖျိ မူခိၣ်ကလံၤသီၣ်ဂီၤ တဘၣ်လီၢ်ဘၣ်စးတဖၣ် တအိၣ်လၢၤဘၣ်အဆၢကတီၢ်
လံာ်စီဆှံ ပာ်ဖျါထီၣ်ဝဲ ယဟိဝၤယွၤ အတၢ်အၢၣ်လီၤလၢ “ယကဟ့ၣ်သုကတၢၢ် အိၣ်ဒီးတၢ်မုၢ်လၢ်.” (ယံးရမံယၤ ၂၉:၁၁) ကစၢ်ယွၤ တိာ်ပာ်ဝဲလၢ ပှၤဟီၣ်ခိၣ်ဖိတဖၣ် ကအိၣ်မူဘၣ် မုာ်မုာ်ခုၣ်ခုၣ်လၢ ဟီၣ်ခိၣ်ပၤရဒံစူးအပူၤ ဒီးတလိၣ်ကဘၣ်ပျံၤဘၣ်ဖုး တၢ်ကီတၢ်ခဲလၢ ဟဲအိၣ်ထီၣ် ခီဖျိမူခိၣ်ကလံၤသီၣ်ဂီၤအဃိဘၣ်.—၁ မိၤၡ့ ၁:၂၈; ၂:၁၅; ယၡါယၤ ၃၂:၁၈.
ကစၢ်ယွၤ ကသူဝဲ အဘီမုၢ်လၢအမ့ၢ် တၢ်ပၢတၢ်ပြးလၢမူခိၣ် လၢအစီၤပၤမ့ၢ် ယ့ၣ်ၡူး ဒီးကမၤလၢပှဲၤထီၣ်ဝဲ တၢ်မုၢ်လၢ်အံၤ. (မးသဲ ၆:၁၀) ယ့ၣ်ၡူး အိၣ်ဒီးတၢ်ကူၣ်သ့ ဒီးတၢ်စိတၢ်ကမီၤလၢ ကတြီဆၢဝဲ တၢ်ဘၣ်ဒိဘၣ်ထံး လၢဟဲအိၣ်ထီၣ်ခီဖျိ မူခိၣ်ကလံၤသီၣ်ဂီၤအဃိ. ဖဲယ့ၣ်ၡူး အိၣ်လၢဟီၣ်ခိၣ် အဆၢကတီၢ် ပာ်ဖျါထီၣ်ဝဲလၢ အဝဲအိၣ်ဒီး တၢ်စိတၢ်ကမီၤလၢ မူခိၣ်ကလံၤသီၣ်ဂီၤအဖီခိၣ်. (မၢ်ကူး ၄:၃၇-၄၁) အဝဲ ကပၢတၢ်လၢ တၢ်သ့ၣ်ညါနၢ်ပၢၢ်ဒီး တၢ်ကူၣ်သ့အပူၤ ဒီးကသိၣ်လိ ပှၤဟီၣ်ခိၣ်ဖိတဖၣ်လၢ ခိၣ်ဃၢၤန့ဆၢၣ်သုတဟးဂီၤတဂ့ၤအဂီၢ် ကဘၣ်ကွၢ်ထွဲဝဲဒ်လဲၣ်. (ယၡါယၤ ၁၁:၂) ဖဲယ့ၣ်ၡူး ပၢတၢ်အခါ ပှၤဟီၣ်ခိၣ်ဖိတဖၣ် တဘၣ်ဒိဘၣ်ထံး ခီဖျိ မူခိၣ်ကလံၤသီၣ်ဂီၤ တဘၣ်လီၢ်ဘၣ်စးအဃိလၢၤဘၣ်.
ဘၣ်သ့ၣ်သ့ၣ် နကဆိကမိၣ်ဘၣ်လၢ ‘ယ့ၣ်ၡူး ကသူအစိကမီၤလၢ မူခိၣ်ကလံၤသီၣ်ဂီၤ အဖီခိၣ် လၢအခါဖဲလဲၣ်’ ဒ်သိး နကသ့ၣ်ညါ တၢ်သံကွၢ်အံၤ အတၢ်စံးဆၢအဂီၢ် ကွၢ်တၢ်ဂ့ၢ်လၢ “ယွၤအဘီအမုၢ် ကပၢဝဲဟီၣ်ခိၣ် အခါဖဲလဲၣ်.”
ကွၢ်ဆၢၣ်မဲာ်ဒီး လဲၤခီဖျိ မူခိၣ်ကလံၤသီၣ်ဂီၤ တဘၣ်လီၢ်ဘၣ်စး လၢဆၢကတီၢ်ခဲအံၤ
လံာ်စီဆှံ အတၢ်ဟ့ၣ်ကူၣ်န့ၣ် ကမၤစၢၤနၤ တချုးဖဲ နထံၣ်ဘၣ်ဒီး မူခိၣ်ကလံၤသီၣ်ဂီၤ တဘၣ်လီၢ်ဘၣ်စးအခါ မ့ၢ်ဂ့ၤ, ဖဲနထံၣ်ဘၣ်အခါမ့ၢ်ဂ့ၢ်, နထံၣ်ဘၣ်ဝံၤအလီၢ်ခံမ့ၢ်ဂ့ၤ.
တချုးဖဲ နထံၣ်ဘၣ်– ကတဲာ်ကတီၤပာ် တၢ်လၢအရ့ဒိၣ်တဖၣ်.
လံာ်စီဆှံတဲဝဲဒ်လဲၣ်– “ပှၤကူၣ်တၢ်ဘၣ်န့ၣ်, ထံၣ်ဘၣ်တၢ်အၢ, ဒီးပာ်တဒၢအသးလီၤ. မ့မ့ၢ်ပှၤအတမၤလိဘၣ်တၢ်ဘၣ်န့ၣ် လဲၤဒၣ်တၢ်, ဒီးဘၣ်တၢ်နးတၢ်ဖှီၣ်လီၤ.”—ကတိၤဒိ ၂၂:၃.
အခီပညီ– ဆိကမိၣ်ထီၣ် န့ဆၢၣ်တၢ်ဘၣ်ဒိဘၣ်ထံးမနုၤတဖၣ် ဟဲကဲထီၣ်အသးသ့လဲၣ်. နမ့ၢ်မၤဒ်န့ၣ်န့ၣ် နဒီသဒၢ နဟံၣ်ဖိဃီဖိလၢ အဆိအချ့ကန့ၢ်ဝဲလီၤ.
တၢ်လဲၤခီဖျိ– “ဖဲပပူၤဖျဲးထီၣ်လၢ မ့ၣ်အူအီၣ်ပှၢ်အခါန့ၣ် ပအိၣ်ကတဲာ်ကတီၤပာ်စၢၤပသးလံ. မ့ၢ်လၢပအိၣ်ဒီး ထၢၣ်လၢ ဂ့ၢ်ဂီၤအူအဂီၢ်. ကသံၣ်ကသီတဖၣ် ဒီးပတၢ်ကူတၢ်သိးတဖၣ်အိၣ်ပာ်စၢၤလံ. ပှၤလၢပဃၢၤတဖၣ်န့ၣ် ပျံၤတၢ်ဖုးတၢ်ဒီး မၤတၢ်တဘၣ်နီတမံၤလၢၤဘၣ်. မ့မ့ၢ်ပဝဲသ့ၣ်တဖၣ်န့ၣ် တၢ်လၢအလိၣ်ဒီးပှၤ အိၣ်ခဲလၢာ်လီၤ. အဃိယသးခုဒိၣ်မး.”—ထၤမၤရၤ, ခဲၤလံၤဖိနံယါ, ကီၢ်အမဲရကၤ.
ဖဲနထံၣ်ဘၣ်အခါ– သးစၢၢ်ဆၢ တၢ်လၢအရ့ဒိၣ်.
လံာ်စီဆှံတဲဝဲဒ်လဲၣ်– “ပှၤတဂၤ အတၢ်ထူးတၢ်တီၤ မ့ၢ်အိၣ်အါအါ သနာ်က့ တၢ်လၢ အအိၣ်ဒီးအီၤတဖၣ်န့ၣ် ဟ့ၣ်အီၤ တၢ်မူတသ့ဘၣ်.”—လူၤကၣ် ၁၂:၁၅.
အခီပညီ– သးသမူန့ၣ် အရ့ဒိၣ်န့ၢ်ဒံး ပတၢ်စုလီၢ်ခီၣ်ခိၣ်တဖၣ်.
တၢ်လဲၤခီဖျိ– “တဲၣ်ဖိ လၤဝ့b မၤဟးဂီၤပဟံၣ်အခါ ယကဘၣ်မၤတၢ်မနုၤလဲၣ်န့ၣ် ယတသ့ၣ်ညါလၢၤဘၣ်. တၢ်လၢယမၤတမံၤန့ၣ် ယဃ့ဘါထုကဖၣ်လၢ ယဟိဝၤယွၤအအိၣ်လၢ တၢ်သူၣ်အိၣ်သးအိၣ်အပူၤ. ယသ့ၣ်ညါဘၣ်လၢ တၢ်လၢယဘၣ်တူၢ်ၡူကွံာ်န့ၣ် မ့ၢ်ဒၣ်တၢ်စုလီၢ်ခီၣ်ခိၣ်တဖၣ်လီၤ. တမ့ၢ်ပသးသမူဘၣ်.”—လံးစလံၤ, ကီၢ်ဖံးလံးဖံ(စ်).
နထံၣ်ဘၣ်ဝံၤအလီၢ်ခံ– ဆိကမိၣ်တၢ်လၢ တနံၤအဂီၢ် ဒီးတဘၣ်ဘၣ်ယိၣ်တၢ်လၢ ခဲမုၢ်ဆ့ၣ်အဂီၢ်တဂ့ၤ.
လံာ်စီဆှံတဲဝဲဒ်လဲၣ်– “ဘၣ်ယိၣ်တၢ်လၢ ခဲဂီၤအဂီၢ်နီတဘျီတဂ့ၤ, မ့ၢ်လၢခဲဂီၤန့ၣ် အတၢ်ဘၣ်ယိၣ်ဘၣ်ဘှီ ကအိၣ်ဝဲအဃိလီၤ.”—မးသဲ ၆:၃၄.
အခီပညီ– တဘၣ် ဘၣ်ယိၣ်တၢ်လၢ ခါဆူညါအဂီၢ် အါတလၢတဂ့ၤ.
တၢ်လဲၤခီဖျိ– “ဟၣ်ရံၣ်က့ အၤမၤ လီၤဝံၤအလီၢ်ခံ ယဟံၣ်လီၤဘျၢဒီး ယဘၣ်မၤတၢ်ဆၢတဲာ် အိၣ်အါမးအဃိ ယသူၣ်ကိၢ်သးဂီၤတၢ်ဒိၣ်မး. ယဂုာ်ကျဲးစၢးမၤထွဲ လံာ်စီဆှံအတၢ်ဟ့ၣ်ကူၣ်လၢ ဆိကမိၣ်တၢ်ထဲ တနံၤအဂီၢ် ဒီးတဘၣ်ဘၣ်ယိၣ်တၢ်လၢ ခဲမုၢ်ဆ့ၣ်အဂီၢ်တဂ့ၤ. ယသ့ၣ်ညါဘၣ်လၢ ခီဖျိ ယဟိဝၤယွၤ အတၢ်မၤစၢၤအဃိ ယအိၣ်ဒီးတၢ်တူၢ်န့ၢ်ခီၣ်ကဲ အါန့ၢ်ဒံး ယဆိကမိၣ်ပာ်ဒံး.”—စဲလ့ၤ, ဖလိၤရံၤဒၤ, ကီၤအမဲရကၤ.
နကသ့ၣ်ညါအါထီၣ်တၢ်ဂ့ၢ်အဂီၢ် ကွၢ်တၢ်ဂ့ၢ်လၢ “When Disaster Strikes—Steps That Can Save Lives.”
a ယဟိဝၤန့ၣ် မ့ၢ်ကစၢ်ယွၤအမံၤ.—စံးထီၣ်ပတြၢၤ ၈၃:၁၈.
b ပှၤသ့ၣ်ညါစ့ၢ်ကီးလၢ ထဲၣ်ဖိ ဟ့မၤ.