အိၣ်ပလီၢ်သးထီဘိ
လၢတၢ်လီၢ်အါတီၤန့ၣ် ပှၤသူကျိ ဒီးဟးခးသံပှၤဂၤအါထီၣ်—ဘၣ်ဃးဒီးတၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်
ဖဲလါယူၤလံ ၂၀၂၂ န့ၣ်ပှၤသူကျိ ဒီးဟးခးသံပှၤဂၤအါထီၣ် လၢတၢ်လီၢ်အါတီၤညါ–
ဖဲလါယူၤလံ ၂၀, ၂၀၂၂ န့ၣ်ကီၢ်ယပၣ် အတၢ်ကစီၣ် ပာ်ဖျါထီၣ်ဝဲလၢ “လၢကီၢ်ယပၣ် အပူၤန့ၣ် တၢ်မၤဆူၣ်မၤစိး တအိၣ်အါအါဘၣ် ဒီးပှၤဖီၣ်ကျိခွဲးယာ် တအိၣ်အါအါဘၣ် အဃိ ဖဲပှၤခးသံကွံာ် ၡ့စိၤ အါပ့ၤ လၢအမ့ၢ် ကီၢ်ယပၣ် အကီၢ်ခိၣ်လၢညါတဂၤအခါ အထံဖိကီၢ်ဖိ ဒီးပှၤလၢထံကီၢ်အဂၤန့ၣ် ဖုးဘၣ်အသး ဒီးကမၢကမၣ်ဒိၣ်မး.”
ဖဲလါယူၤလံ ၄, ၂၀၂၂ န့ၣ်ရီထၢၤ အတၢ်ကစီၣ် ပာ်ဖျါထီၣ်ဝဲလၢ “ပှၤဖီၣ်ကျိတဂၤ ခးသံဝဲ ပှၤသၢဂၤ လၢဝ့ၢ်ခိၣ်ဖဟဲကဲ အတၢ်ဆါတၢ်ပှ့ၤလီၢ် အဃိ ကီၢ်ဒဲမး အထံဖိကီၢ်ဖိ ဖုးဘၣ်အသး ဒီးပျံၤတၢ်ဒိၣ်မး.”
ဖဲလါယူၤလံ ၁၀, ၂၀၂၂ န့ၣ်သၢၤကါဒံယဲ အတၢ်ကစီၣ် ပာ်ဖျါထီၣ်ဝဲ “လၢကလံၤထံး ကီၢ်အၤဖြံၤကၤန့ၣ် ပှၤဖီၣ်ကျိတဖၣ် ခးသံဝဲ ပှၤ ၁၅ ဂၤ လၢပှၤဆါသံးလီၢ် လၢဝ့ၢ်စဝ့ထိၤအပူၤ.”
ဖဲလါယူၤလံ ၅, ၂၀၂၂ န့ၣ်စံၤဘံၤအဲး အတၢ်ကစီၣ် ပာ်ဖျါထီၣ်ဝဲလၢ “ဖဲပှၤမၤ လါယူၤလံ ၄ သီအနံၤသဘျ့ လၢကီၢ်အမဲရကၤ အဆၢကတီၢ်န့ၣ် ပှၤခးတၢ်အဃိ ပှၤသံဝဲအဂၤ ၂၂၀ ဘျဲၣ်ညါ.”
တၢ်အၢတၢ်သီတဖၣ်အံၤ ကလီၤမၢ်ကွံာ်ဝဲ နီၢ်ကီၢ်ဧါ. ဘၣ်ဃးဒီးတၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်.
တၢ်အၢတၢ်သီ ကလီၤမၢ်ကွံာ်ဝဲ
လံာ်စီဆှံ တဲဝဲလၢ ပအိၣ်မူဘၣ်လၢ “မုၢ်နံၤခံကတၢၢ်တဖၣ်” အဆၢကတီၢ် အဃိ ပှၤဟီၣ်ခိၣ်ဖိ မၤအၢမၤသီတၢ်, မၤဆူၣ်မၤစိးတၢ် ဒီးတသးကညီၤပှၤဂၤဘၣ်. (၂ တံၤမသ့း ၃:၁, ၃) ခီဖျိလၢ ပှၤမၤအၢမၤသီတၢ် အါထီၣ်အဃိ ပှၤအါဂၤဘၣ်ပျံၤတၢ်. (လူၤကၣ် ၂၁:၁၁) ဘၣ်ဆၣ် လံာ်စီဆှံ ပာ်ဖျါထီၣ်ဝဲလၢ မုၢ်ကအိၣ်ဝဲတနံၤန့ၣ် တၢ်အၢတၢ်သီ တအိၣ်လၢၤဘၣ်ဒီး “ပှၤဂီၢ်မုၢ် ကအိၣ်ဘၣ်လၢ တၢ်လီၢ်လၢ အပှဲၤဒီးတၢ်ဃူတၢ်ဖိး ဒီးကအိၣ်ဘၣ် ဘံၣ်ဘံၣ်ဘၢဘၢလၢ တၢ်အိၣ်တၢ်ဆိးအလီၢ်လၢ အဝဲသ့ၣ် ကအိၣ်ဘှံးဘၣ် မုာ်မုာ်လီၤ.” (ယၡါယၤ ၃၂:၁၈) မ့မ့ၢ်ဒ်န့ၣ်န့ၣ် တၢ်အၢတၢ်သီ ကလီၤမၢ်ကွံာ်ဝဲ ဒ်လဲၣ်.
ကစၢ်ယွၤ ကမၤဟးဂီၤကွံာ်ဝဲ ပှၤအၢပှၤသီ ဒီးတၢ်စုကဝဲၤခဲလၢာ်
“မ့မ့ၢ် ပှၤအၢပှၤသီန့ၣ် ကလီၤမၢ်ကွံာ်ဝဲလၢ ဟီၣ်ခိၣ်ချၢ.”—ကတိၤဒိ ၂:၂၂.
“[ကစၢ်ယွၤ] ကမၤကတၢၢ်ကွံာ် တၢ်ဒုးတၢ်ယၤလၢ ဟီၣ်ခိၣ်ချၢလီၤ.အဝဲမၤကၢ်ကွံာ်ချံၣ် ဒီးမၤဟးဂီၤကွံာ်ဘီ ဒီးအဝဲ ဒွဲၣ်အူထီၣ်ကွံာ် လ့ၣ်ကဟၣ်သုးတဖၣ်လီၤ.”—စံးထီၣ်ပတြၢၤ ၄၆:၉.
ခါဆူညါန့ၣ် ကစၢ်ယွၤ ကမၤလီၤမၢ်ကွံာ်ဝဲ တၢ်အၢတၢ်သီအဃိ ခဲအံၤန့ၣ် အသိၣ်လိ ပှၤဟီၣ်ခိၣ်ဖိ လၢကအိၣ်ဃူဃူဖိးဖိး.
“အဝဲသ့ၣ် တမၤအၢတၢ်နီတမံၤဘၣ် ဒီးအဝဲသ့ၣ် တမၤဟးဂီၤတၢ်လၢ ယကစၢၢ် စီဆှံအလိၤ နီတမံၤဘၣ်, မ့ၢ်လၢ ဟီၣ်ခိၣ်န့ၣ် ကပှဲၤဝဲဒီး တၢ်သ့ၣ်ညါ ယဟိဝၤယွၤ သပှၢ်တၢၢ် ဒ်ထံအိၣ်ဘၢ ပီၣ်လဲၣ်အသိးလီၤ.”—ယၡါယၤ ၁၁:၉.
ခဲအံၤနာ်က့ ပှၤအိၣ်လၢ ဟီၣ်ခိၣ်ဒီဘ့ၣ်ညါန့ၣ် ကစၢ်ယွၤ သိၣ်လိအဝဲသ့ၣ်လၢ ကဟးဆှဲး တၢ်မၤဆူၣ်မၤစိး ဒီးတဘၣ်သူ တၢ်စုကဝဲၤဘၣ်. အဃိ ကစၢ်ယွၤ သိၣ်လိ အဝဲသ့ၣ်လၢ “ကပိာ်က့ၤအနးလၢ ထဲၣ်ကနၣ် ဒီးကပိာ်က့ၤ အဘီလၢ ထါဂဲာ်လီၤ.”—မံကၤ ၄:၃.
လံာ်စီဆှံ ပာ်ဖျါထီၣ်ဝဲလၢ ခါဆူညါ လၢဟီၣ်ခိၣ်ချၢန့ၣ် တၢ်လၢကမၤပျံၤမၤဖုးပှၤ တအိၣ်လၢၤဘၣ်. နမ့ၢ်ဘၣ်သး သ့ၣ်ညါအါထီၣ် တၢ်ဂ့ၢ်အံၤန့ၣ် ဖးကွၢ်တၢ်ဂ့ၢ်လၢ အခိၣ်တီမ့ၢ်ဝဲ “Freedom From Fear—Is It Possible?”
နမ့ၢ်ဘၣ်သး သ့ၣ်ညါအါထီၣ် ဘၣ်ဃးဒီး တၢ်အၢတၢ်သီ ကလီၤမၢ်ကွံာ် လီၤထူလီၤယိာ်ဒ်လဲၣ်န့ၣ် ဖးကွၢ်တၢ်ဂ့ၢ်လၢ အခိၣ်တီမ့ၢ်ဝဲ “Peace on Earth at Last!”