လၢဟီၣ်ခိၣ်ဒီဘ့ၣ်န့ၣ် တၢ်ကိၢ်ဒိၣ်ထီၣ်နးမး​—⁠ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်

ဖဲလါယူၤလံ ၂၀၂၂ န့ၣ် ပှၤပာ်ဖျါထီၣ်ဝဲလၢ တၢ်ကိၢ်ဒိၣ်ထီၣ်လၢ တၢ်လီၢ်ဝးဝး.

• ဖဲလါယူၤလံ ၂၅, ၂၀၂၂ န့ၣ် စံၤအဲအဲ အတၢ်ကစီၣ် ပာ်ဖျါထီၣ်ဝဲလၢ “ဖဲတလါညါအံၤန့ၣ် ပှၤဘၣ်မူဘၣ်ဒါလၢ တရူးကီၢ်ဟ့ၣ်ပလီၢ်ဝဲ ခံဘျီလၢ ဝ့ၢ်အဖျၢၣ် ၇၀ ဃၣ်ဃၣ်န့ၣ် တၢ်ကကိၢ်ဒိၣ်ထီၣ်ဖၣ်နးညါ.”

• ဖဲလါယူၤလံ ၁၇, ၂၀၂၂ န့ၣ် သၢၤကါဒံယဲ အတၢ်ကစီၣ် ပာ်ဖျါထီၣ်ဝဲလၢ “လၢကီၢ်ယူရပၤအပူၤန့ၣ် ခီဖျိလၢမ့ၣ်အူအီၣ်ပှၢ် အဃိ တၢ်ကိၢ်ဒိၣ်ထီၣ်ဝဲနးမး.”

• ဖဲလါယူၤလံ ၂၄, ၂၀၂၂ န့ၣ် နူယီး တၢ်ကစီၣ် ပာ်ဖျါထီၣ်ဝဲလၢ “ဖဲမုၢ်အိၣ်ဘှံးနံၤန့ၣ် ဝ့ၢ်အါဖျၢၣ်လၢ ကီၢ်အမဲရကၤအပူၤ တၢ်ကိၢ်ဒိၣ်ထီၣ်ဒ်အံၤ ပတထံၣ်ဘၣ်နီဘျီဘၣ်. တကးဒံးဘၣ် လၢကီၢ်အမဲရကၤမုၢ်ထီၣ် ဒီးကလံၤထံး ဒီးလၢမုၢ်နုာ်တကပၤစ့ၢ်ကီး တၢ်ကိၢ်နးမး.”

မူခိၣ်ကလံၤသီၣ်ဂီၤ တဂ့ၤလၢၤဘၣ်အဃိ ခါဆူညါန့ၣ် မ့ၢ်ဟီၣ်ခိၣ်တဖျၢၣ်အံၤ ပှၤဟီၣ်ခိၣ်ဖိအိၣ်လၢအပူၤ ကသ့ဒံးဧါ. ဘၣ်ဃးဒီးတၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်.

တၢ်ကိၢ်ဒိၣ်ထီၣ်အဂ့ၢ်န့ၣ် မ့ၢ်လံာ်စီဆှံတဲဆိပာ်စၢၤဝဲစ့ၢ်ကီးဧါ.

မ့ၢ်, လံာ်စီဆှံတဲဆိပာ်စၢၤဝဲ တၢ်ကမၤသးလၢ ပစိၤခဲအံၤန့ၣ် အပၣ်ဃုာ်ဒီး တၢ်ဂ့ၢ်အဝဲအံၤ. အဒိ ယ့ၣ်ၡူးတဲဆိပာ်စၢၤဝဲလၢ ပကထံၣ်ဘၣ် “တၢ်လၢ အလီၤပျံၤလီၤဖုးတဖၣ်.” (လူၤကၣ် ၂၁:၁၁) တၢ်ကိၢ်ဒိၣ်ထီၣ်ဒ်အံၤန့ၣ် ပှၤအါဂၤထံၣ်ဝဲလၢ ပှၤဟီၣ်ခိၣ်ဖိမၤဝဲ, အဃိဆၢကတီၢ်ခဲအံၤန့ၣ် ပှၤအါဂၤ ဘၣ်ယိၣ်ဝဲလၢ ခါဆူညါန့ၣ် ပှၤဟီၣ်ခိၣ်ဖိ အိၣ်မူလၢဟီၣ်ခိၣ် တသ့လၢၤဘၣ်.

ခါဆူညါန့ၣ် မ့ၢ်ပဟီၣ်ခိၣ်တဖျၢၣ်အံၤ ပှၤအိၣ်လၢအပူၤ တသ့လၢၤဘၣ်ဧါ.

ခါဆူညါန့ၣ် ဟီၣ်ခိၣ်တဖျၢၣ်အံၤ ပှၤအိၣ်မူလၢအပူၤသ့. မ့ၢ်လၢကစၢ်ယွၤတ့လီၤ ဟီၣ်ခိၣ်လၢ ပှၤကအိၣ်မူလၢအပူၤ လီၤထူလီၤယိာ်အဂီၢ်အဃိ. (စံးထီၣ်ပတြၢၤ ၁၁၅:၁၆; စံၣ်တဲၤတဲလီၤတၢ် ၁:⁠၄) ကစၢ်ယွၤန့ၣ် တပျဲလၢ ပှၤဟီၣ်ခိၣ်ဖိ ကမၤဟးဂီၤဟီၣ်ခိၣ်ဘၣ်. လၢတၢ်န့ၣ်အလီၢ် အဝဲအၢၣ်လီၤဝဲလၢ အက “မၤဟးဂီၤ ပှၤလၢအမၤဟးဂီၤ ဟီၣ်ခိၣ်.”​—⁠လီၣ်ဖျါ ၁၁:⁠၁၈.

အခဲအံၤ ပကတဲသကီး ဝံအတၢ်စံးပာ်ခံခါလၢ အဘၣ်ဃးဒီး တၢ်လၢကစၢ်ယွၤ ကမၤဝဲလၢ ဟီၣ်ခိၣ်အဂီၢ်.

• “ပှၢ်မုၢ်ကနၢ ဒီးကီၢ်ဃ့ထီန့ၣ် ကသးခု ဒီးမဲးမုၢ်ပျီန့ၣ် ကသူၣ်ဖှံသးညီ ဒီးကပှဲၤဒီး ဖီတဖၣ်လီၤ.” (ယၡါယၤ ၃၅:⁠၁) ကစၢ်ယွၤတပျဲဝဲလၢ ဟီၣ်ခိၣ်တဖျၢၣ်အံၤ ကကဲထီၣ်ဒ်သိးဒီး မဲးမုၢ်ခိၣ်လၢ ပှၤအိၣ်တသ့ဘၣ်န့ၣ်ဘၣ်. လၢတၢ်န့ၣ်အလီၢ် ကစၢ်ယွၤကမၤဂ့ၤထီၣ် ဟီၣ်ခိၣ်လၢ အဘၣ်ဒိဘၣ်ထံးတဖျၢၣ်အံၤ.

• “နအံးထွဲကွၢ်ထွဲဟီၣ်ခိၣ်, နဒုးကဲထီၣ်အီၤလၢ ဟီၣ်ခိၣ်ညၣ်လၢအဂ့ၤ ဒီးဒုးမဲထီၣ်သၣ်ထီၣ်တၢ် အါအါဂီၢ်ဂီၢ်လီၤ.” (စံးထီၣ်ပတြၢၤ ၆၅:⁠၉) ကစၢ်ယွၤကဆိၣ်ဂ့ၤ ဟီၣ်ခိၣ်အဃိ ဟီၣ်ခိၣ်အံၤကကဲထီၣ် ပၤရဒံစူး.

နမ့ၢ်အဲၣ်ဒိး သ့ၣ်ညါအါထီၣ် ဘၣ်ဃးဒီး မူခိၣ်ကလံၤသီၣ်ဂီၤ အတၢ်ဆီတလဲ မၤလၢပှဲၤထီၣ်လံာ်စီဆှံ အတၢ်စံးပာ်ဒ်လဲၣ်န့ၣ် ဖးတၢ်ဂ့ၢ်လၢ အခိၣ်တီမ့ၢ်ဝဲ “ဘၣ်ဃးဒီး မူခိၣ်ကလံၤသီၣ်ဂီၤ ဆီတလဲ ဒီးပတၢ်အိၣ်မူခါဆူညါအဂ့ၢ်န့ၣ် လံာ်စီဆှံတဲဝဲဒ်လဲၣ်.”

နမ့ၢ်အဲၣ်ဒိး သ့ၣ်ညါအါထီၣ် ဘၣ်ဃးဒီး လံာ်စီဆှံအတၢ်အၢၣ်လီၤလၢ ခိၣ်ဃၢၤန့ဆၢၣ် ကဂ့ၤထီၣ်အဂ့ၢ်န့ၣ် ဖးတၢ်ဂ့ၢ်လၢ အခိၣ်တီမ့ၢ်ဝဲ “မတဂၤ ကမၤဂ့ၤထီၣ်က့ၤ ဟီၣ်ခိၣ်လဲၣ်.”