မတဂၤ ကမၤပူၤဖျဲး ပှၤကမျၢၢ်တဖၣ်လဲၣ်—ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်

ဘီမုၢ်စၢဖှိၣ်ကရၢ ပာ်ဖျါထီၣ်ဝဲလၢ–

• ခီဖျိလၢ ကၤစၤ ဒီးအံၣ်စရ့ အတၢ်ဒုးအဃိ ပှၤသံဝဲအါမး. စးထီၣ်ဖဲ ၂၀၂၃, လါအီးကထိဘၢၣ် ၇ သီ တုၤလၢ လါအီးကထိဘၢၣ် ၂၃ သီန့ၣ် ပှၤသံအိၣ်ဝဲ အဂၤ ၆,၄၀၀ ဒီးပှၤဘၣ်ဒိအိၣ်ဝဲ အဂၤ ၁၅,၂၀၀ ဒီးပှၤတဖၣ်အံၤ အါတက့ၢ်န့ၣ် အကဲဝဲ ပှၤကမျၢၢ်တဖၣ်. တကးဒံးဘၣ် ပှၤလၢအဘၣ် ပာ်တ့ၢ်ကွံာ် အဟံၣ်အဃီ ဒီးဃ့ၢ်မှံဟးဖျိးန့ၣ် အိၣ်ဝဲလၢ အကလီၢ်တဖၣ်ညါ.

• ဖဲ ၂၀၂၃ လါစဲးပတ့ဘၢၣ်, ၂၄ သီန့ၣ် တၢ်ကစီၣ်ပာ်ဖျါထီၣ်ဝဲလၢ ခီဖျိလၢ ရၢၡါ ဒီးယူၣ်ခြ့ တၢ်ဒုးအဃိ လၢယူၣ်ခြ့ၣ်န့ၣ် ပှၤကမျၢၢ်သံဝဲ အဂၤ ၉,၇၀၁ ဒီးပှၤလၢအဘၣ်ဒိ အိၣ်ဝဲ အဂၤ ၁၇,၇၄၈.

ပှၤလၢအထံၣ်ဘၣ် တၢ်နးတၢ်ဖှီၣ် ခီဖျိလၢတၢ်ဒုးအဃိန့ၣ် လံာ်စီဆှံ ဟ့ၣ်အီၤ တၢ်မုၢ်လၢ်ဒ်လဲၣ်

ပတၢ်မုၢ်လၢ်အိၣ်ဒံး

လံာ်စီဆှံ တဲဆိပာ်စၢၤဝဲလၢ ကစၢ်ယွၤ “ကမၤကတၢၢ်ကွံာ် တၢ်ဒုးတၢ်ယၤလၢ ဟီၣ်ခိၣ်ချၢ.” (စံးထီၣ်ပတြၢၤ ၄၆:⁠၉) ကစၢ်ယွၤကသူဝဲ အဘီအမုၢ် လၢအမ့ၢ် တၢ်ပၢတၢ်ပြးလၢ မူခိၣ် ဒ်သိးကပၢက့ၤတၢ်လၢ ဟီၣ်ခိၣ်ပဒိၣ်ပပှၢ်တဖၣ်အလီၢ်. (ဒၤနံးယ့လး ၂:၄၄) ကစၢ်ယွၤ အဘီအမုၢ် ကမၤဂ့ၤထီၣ်က့ၤ ဟီၣ်ခိၣ်တၢ်အိၣ်သးလၢ ပှၤဟီၣ်ခိၣ်ဖိတဖၣ်အဂီၢ်.

ကစၢ်ယွၤအဘီအမုၢ် အစီၤပၤ ယ့ၣ်ၡူးခရံာ် ကမၤန့ၢ်ပှၤ တၢ်မနုၤလဲၣ်

• “ပှၤဖှီၣ်ဖိယာ်ဖိလၢ အကိးပသူထီၣ်လၢ တၢ်မၤစၢၤအဂီၢ်, ပှၤလၢအပတီၢ်ဖုၣ် ဒီးပှၤလၢ ပှၤမၤစၢၤအီၤ တအိၣ်နီတဂၤဘၣ်န့ၣ် အဝဲကမၤပူၤဖျဲးဝဲလီၤ. အဝဲကသးကညီၤ ပှၤလၢအပတီၢ်ဖုၣ် ဒီးပှၤဖှီၣ်ဖိယာ်ဖိ ဒီးအဝဲ ကမၤပူၤဖျဲး ပှၤဖှီၣ်ဖိယာ်ဖိ အသးသမူလီၤ. အဝဲကမၤပူၤဖျဲး အဝဲသ့ၣ်လၢ တၢ်ဆီၣ်တံၢ်မၤနၢၤ ဒီးတၢ်မၤဆူၣ်မၤစိး.”—စံးထီၣ်ပတြၢၤ ၇၂:​၁၂-၁၄.

ကစၢ်ယွၤအဘီအမုၢ် ကမၤလီၤမၢ်ကွံာ်ဝဲ တၢ်ကိၢ်တၢ်ဂီၤ ဒီးတၢ်ကီတၢ်ခဲကိးမံၤဒဲးလၢ အကဲထီၣ်ခီဖျိလၢ တၢ်ဒုးတၢ်ယၤ ဒီးတၢ်မၤဆူၣ်မၤစိး.

• “ကစၢ်ယွၤကထွါကွံာ် အဝဲသ့ၣ် အမဲာ်ထံခဲလၢာ် ဒီးတၢ်သံတအိၣ်လၢၤဘၣ်. ဒီးတၢ်သူၣ်အုးသးအုးမ့ၢ်ဂ့ၤ, တၢ်ဟီၣ်တၢ်ယၢၤမ့ၢ်ဂ့ၤ, တၢ်လၢအဆါမ့ၢ်ဂ့ၤ တအိၣ်လၢၤဘၣ်. တၢ်အလီၢ်လံၤလၢ အမၤသးအုးတ့ၢ်ပှၤန့ၣ် ဒံကွံာ်ဝဲလံ.”—လီၣ်ဖျါ ၂၁:⁠၄.

တယံာ်လၢၤဘၣ်န့ၣ် ကစၢ်ယွၤအဘီအမုၢ် ကမၤဂ့ၤထီၣ်က့ၤ ဟီၣ်ခိၣ်တၢ်အိၣ်သးခဲလၢာ်. လံာ်စီဆှံ တဲဆိပာ်စၢၤဝဲလၢ “သုကနၢ်ဟူဘၣ် တၢ်ဒုးတၢ်ယၤအသီၣ် ဒီးတၢ်ဒုးတၢ်ယၤ အကစီၣ်.” ဒီးခဲအံၤ တၢ်ကဲထီၣ်အသး ဒ်လံာ်စီဆှံတဲဝဲအသိး. (မးသဲ ၂၄:⁠၆) တၢ်ပနီၣ်တဖၣ်အံၤ ဒီးတၢ်ပနီၣ်လၢ အဂၤတဖၣ်န့ၣ် ပာ်ဖျါထီၣ်န့ၢ်ပှၤလၢပအိၣ်မူဘၣ်လၢ “မုၢ်နံၤခံကတၢၢ်တဖၣ်” ဒီးပှၤဟီၣ်ခိၣ်ဖိအတၢ်ပၢ ကကတၢၢ်ဘူးထီၣ်လံ.—၂ တံၤမသ့း ၃:⁠၁.