ယ့ၣ်ၡူး ကမၤကတၢၢ်ကွံာ် တၢ်ဒုးတၢ်ယၤ

ဖဲယ့ၣ်ၡူး အိၣ်လၢဟီၣ်ခိၣ်ချၢအခါ အပာ်ဖျါထီၣ်လၢ အအဲၣ်ပှၤဟီၣ်ခိၣ်ဖိ တုၤဒၣ်လဲာ် အဟ့ၣ်လီၤ အသးသမူလၢ အဝဲသ့ၣ်အဂီၢ်. (မးသဲ ၂၀:၂၈; ယိၤဟၣ် ၁၅:၁၃) တယံာ်လၢၤဘၣ်န့ၣ် ယ့ၣ်ၡူးကပာ်ဖျါထီၣ်ကဒီး လၢအအဲၣ် ပှၤဟီၣ်ခိၣ်ဖိ. အဝဲကဲထီၣ် ယွၤအဘီအမုၢ် အစီၤပၤ ဒီးအအိၣ်ဒီး တၢ်န့ၢ်စိန့ၢ်ကမီၤလံအဃိ အဝဲကသူဝဲ အတၢ်န့ၢ်စိန့ၢ်ကမီၤအံၤ ဒီးက “မၤကတၢၢ်ကွံာ် တၢ်ဒုးတၢ်ယၤလၢ ဟီၣ်ခိၣ်ချၢလီၤ.”—စံးထီၣ်ပတြၢၤ ၄၆:၉.

ပကကွၢ်သကိး လံာ်စီဆှံ ပာ်ဖျါထီၣ်ဝဲ တၢ်လၢယ့ၣ်ၡူး ကမၤဝဲတဖၣ်–

• “ပှၤဖှီၣ်ဖိယာ်ဖိလၢ အကိးပသူထီၣ်လၢ တၢ်မၤစၢၤအဂီၢ်, ပှၤလၢအပတီၢ်ဖုၣ် ဒီးပှၤလၢ ပှၤမၤစၢၤအီၤ တအိၣ်နီတဂၤဘၣ်န့ၣ် အဝဲကမၤပူၤဖျဲးဝဲလီၤ. အဝဲကသးကညီၤ ပှၤလၢအပတီၢ်ဖုၣ် ဒီးပှၤဖှီၣ်ဖိယာ်ဖိ ဒီးအဝဲ ကမၤပူၤဖျဲး ပှၤဖှီၣ်ဖိယာ်ဖိ အသးသမူလီၤ. အဝဲကမၤပူၤဖျဲး အဝဲသ့ၣ်လၢ တၢ်ဆီၣ်တံၢ်မၤနၢၤ ဒီးတၢ်မၤဆူၣ်မၤစိး.”—စံးထီၣ်ပတြၢၤ ၇၂:၁၂-၁၄.

ဘၣ်ဃးဒီး တၢ်လၢယ့ၣ်ၡူးမၤန့ၢ်ပှၤတဖၣ် ဒီးကမၤန့ၢ်ပှၤတဖၣ်န့ၣ် ပပာ်ဖျါထီၣ် တၢ်စံးဘျုးစံးဖှိၣ် ကသ့ဒ်လဲၣ်. ကျဲတဘိလၢ ပမၤဒ်န့ၣ်သ့န့ၣ် မ့ၢ်ဝဲ ပမၤလိအါထီၣ် “ယွၤအဘီအမုၢ် တၢ်သးခုကစီၣ်” လၢယ့ၣ်ၡူး စံၣ်တဲၤတဲလီၤတ့ၢ်ဝဲ. (လူၤကၣ် ၄:၄၃) ဖးတၢ်ဂ့ၢ် လၢအမ့ၢ် “ယွၤအဘီအမုၢ်န့ၣ် မ့ၢ်မနုၤလဲၣ်.”