တၢ်မၤဆူၣ်မၤစိးလိာ်သးလၢ ထံဂ့ၢ်ကီၢ်ဂ့ၢ်အဃိ—ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်

ပှၤမၤအၢမၤသီ ပှၤခိၣ်ပှၤနၢ်လၢ ထံဂ့ၢ်ကီၢ်ဂ့ၢ် တကပၤန့ၣ် အိၣ်အါထီၣ်မးအါထီၣ်.

တၢ်မၤဆူၣ်မၤစိးလၢ ထံဂ့ၢ်ကီၢ်ဂ့ၢ်အဃိန့ၣ် ဘၣ်မနုၤအဃိ အိၣ်ဝဲအါထဲအံၤလဲၣ်. တၢ်မၤအသးတဖၣ်အံၤ ကကတၢၢ်ကွံာ် တဘျီဘျီဧါ. ဘၣ်ဃးဒီးတၢ်ဂ့ၢ်အံၤ လံာ်စီဆှံ တဲဝဲဒ်လဲၣ်.

လံာ်စီဆှံ တဲဆိပာ်စၢၤဝဲလၢ ပှၤကလီၤမုၢ်လီၤဖး ခီဖျိလၢ ထံဂ့ၢ်ကီၢ်ဂ့ၢ်အဃိ

လံာ်စီဆှံ တဲဆိပာ်စၢၤဝဲလၢ ဖဲ “မုၢ်နံၤခံကတၢၢ်တဖၣ်” လၢအမ့ၢ် ပအိၣ်မူတၢ်အဆၢကတီၢ်န့ၣ် ပှၤအါဂၤ ကအိၣ်ဒီး တၢ်ပာ်သူၣ်ပာ်သးလၢ အဒုးအိၣ်ထီၣ် တၢ်မၤဆူၣ်မၤစိး ဒီးတၢ်လီၤမုၢ်လီၤဖး.

• “လၢမုၢ်နံၤခံကတၢၢ်တဖၣ်အပူၤန့ၣ် တၢ်ဆၢကတီၢ်လီၤဆီလၢ အကီအခဲသပှၢ်တၢၢ်န့ၣ် ကဘၣ်ဝဲလီၤ. ပှၤဟီၣ်ခိၣ်ဖိ . . . တသ့ၣ်ညါ စံးဘျုးစံးဖှိၣ်တၢ်ဘၣ်, အသးတတီဘၣ်, . . . ကမ့ၢ်ပှၤလၢအခိၣ်ကိၤ, . . . ကမ့ၢ်ပှၤလၢ အမၤဆူၣ်မၤစိးတၢ်, . . . ကမ့ၢ်ပှၤလၢ အဟ့ၣ်လီၤကွံာ်ပှၤဂၤ, ပှၤလၢအမၤဖဲအသး, ပှၤလၢ အပာ်ကဖၢလၢအသး.”—၂ တံၤမသ့း ၃:၁-၄.

လံာ်စီဆှံ တဲစ့ၢ်ကီးဝဲလၢ တၢ်တၢထီၣ်တၢလီၤ ဒ်သိးဒီး ပှၤထီဒါ ပဒိၣ်ပပှၢ် ဒီးထံကီၢ်တၢ်သဘံၣ်သဘူၣ်တဖၣ်န့ၣ် ကအိၣ်ထီၣ်ဝဲလၢ မုၢ်နံၤခံကတၢၢ်တဖၣ် အတီၢ်ပူၤ. (လူၤကၣ် ၂၁:၉) ဘၣ်ဆၣ် တၢ်မၤဆူၣ်မၤစိးလၢ ထံဂ့ၢ်ကီၢ်ဂ့ၢ်အဃိ ဒီးတၢ်လီၤမုၢ်လီၤဖးတဖၣ်န့ၣ် တအိၣ်ဝဲထီဘိဘၣ်.

တၢ်မၤဆူၣ်မၤစိးလၢ ထံဂ့ၢ်ကီၢ်ဂ့ၢ်အဃိန့ၣ် ကကတၢၢ်ကွံာ်ဝဲ

လံာ်စီဆှံတဲဝဲလၢ ကစၢ်ယွၤ ကမၤဟးဂီၤကွံာ် ဟီၣ်ခိၣ်အတၢ်ပၢတၢ်ပြးခဲလၢာ် ဒီးယွၤအဘီအမုၢ်လၢ မူခိၣ်န့ၣ် ကပၢက့ၤတၢ်လၢအလီၢ်.

• “ကစၢ်ယွၤ လၢမူခိၣ် ကသူၣ်ထီၣ်ဘီမုၢ် တဘ့ၣ်လၢ . . . ကမၤသဘှံး ဒီးကမၤဟးဂီၤဝဲ ဘီမုၢ်သ့ၣ်တဖၣ်အံၤခဲလၢာ် ဒီးထဲဒၣ် ဘီမုၢ်တဘ့ၣ်အံၤန့ၣ် ကအိၣ်ဂၢၢ်ကျၢၤဝဲ လီၤထူလီၤယိာ်.”—ဒၤနံးယ့လး ၂:၄၄.

ယွၤအဘီအမုၢ် ကမၤဃူမၤဖိး ပှၤခဲလၢာ် ဒီးကဒုးအိၣ်ထီၣ် တၢ်မုာ်တၢ်ခုၣ် လၢဟီၣ်ခိၣ်ဒီဘ့ၣ်.

• ယွၤအဘီအမုၢ် အစီၤပၤ လၢအမ့ၢ် ယ့ၣ်ၡူးခရံာ်န့ၣ် မ့ၢ်ဝဲ “တၢ်ဃူတၢ်ဖိး အပဒိၣ်ဖးဒိၣ်” ဒီးအဝဲ ကမၤဝဲဒ်သိး “တၢ်မုာ်တၢ်ခုၣ် အကတၢၢ်တအိၣ်ဘၣ်.”—ယၡါယၤ ၉:၆,၇.

• ဆၢကတီၢ်ခဲအံၤဒၣ်လဲာ် ပှၤလၢအဒိးပၢအသး လၢယွၤအဘီအမုၢ် တၢ်ပၢန့ၣ် ဂုာ်ကျဲးစၢး အိၣ်ဝဲ ဃူဃူဖိးဖိး. အဃိ ဘၣ်ဃးဒီး အဝဲသ့ၣ်န့ၣ် လံာ်စီဆှံ တဲဆိပာ်စၢၤဝဲလၢ “အဝဲသ့ၣ် ကပိာ်က့ၤအနးလၢ ထဲၣ်ကနၣ် ဒီးကပိာ်က့ၤ အဘီလၢ ထါဂဲာ်လီၤ. ပှၤတကလုာ်ဒီး တကလုာ်န့ၣ် တကျီလိာ်အသးလၢ နးလၢၤဘၣ်. ဒီးအဝဲသ့ၣ် တမၤလိအသး လၢတၢ်ဒုးလၢၤဘၣ်.”—ယၡါယၤ ၂:၃,၄.

နမ့ၢ်အဲၣ်ဒိး သ့ၣ်ညါအါထီၣ်န့ၣ် ဖးကွၢ်တၢ်ဂ့ၢ် လၢအမ့ၢ် “ယွၤအဘီအမုၢ် ကမၤလၢထီၣ်ပှဲၤထီၣ်ဝဲ တၢ်မနုၤလဲၣ်” ဒီးကွၢ် တၢ်ဂီၤမူ လၢအမ့ၢ် ယွၤအဘီအမုၢ်န့ၣ် မ့ၢ်မနုၤလဲၣ်.