ထံဂ့ၢ်ကီၢ်ဂ့ၢ် အတၢ်ဂ့ၢ်ကီ လၢအမၤလၢပှဲၤထီၣ် လံာ်စီဆှံ အတၢ်စံးပာ်

ပှၤအါဂၤလၢ ပစိၤခဲအံၤန့ၣ် အတၢ်ထံၣ် ဘၣ်ဃးဒီး ထံဂ့ၢ်ကီၢ်ဂ့ၢ် ဒီးထံကီၢ် အတၢ်သိၣ်တၢ်သီန့ၣ် လီၤဆီလိာ်သးဒိၣ်မး. တကးဒံးဘၣ် အဝဲသ့ၣ် ပာ်ဖျါထီၣ်အတၢ်ထံၣ် ဆူၣ်ဆူၣ်ကိၤကိၤ. ပဒိၣ်ပပှၢ်တဖၣ် ဒီးပှၤလၢအပာ်လီၤ တၢ်သိၣ်တၢ်သီတဖၣ်န့ၣ် အဝဲသ့ၣ် ကဒဲကဒဲနာ်က့ တတူၢ်လိာ်လိာ်သး အတၢ်ထံၣ်ဘၣ် ဒီးတဘၣ်သးတူၢ်လိာ် ပှၤဂၤအတၢ်ထံၣ်စ့ၢ်ကီးဘၣ်. ခီဖျိလၢ တၢ်သဘံၣ်သဘုၣ်တဖၣ်အံၤအဃိ ပဒိၣ်ပပှၢ်တဖၣ် မၤတၢ်လၢ အကဘၣ်မၤဝဲတဖၣ် တသ့ဂ့ၤဂ့ၤဘၣ်.

လီၤဆီဒၣ်တၢ် ထံဂ့ၢ်ကီၢ်ဂ့ၢ် တၢ်ဂ့ၢ်ကီ ဒ်အံၤန့ၣ် ကဲထီၣ်အသးလၢ အမဲရကၤ ဒီးဘြံးတၢၣ်အပူၤ. လံာ်စီဆှံ တဲဆိပာ်စၢၤဝဲလၢ တၢ်ဂ့ၢ်ကီဒ်အံၤန့ၣ် ကကဲထီၣ်အသးလၢ ထံကီၢ်ခံဘ့ၣ်အံၤအပူၤ. တကးဒံးဘၣ် အတဲစ့ၢ်ကီးဝဲလၢ ဖဲအဝဲသ့ၣ် ပၢဒံးတၢ်အဆၢကတီၢ်န့ၣ် ယွၤအဘီအမုၢ်ကဟဲ မၤလီၤမၢ်ကွံာ် တၢ်သဘံၣ်သဘူၣ် လၢဟီၣ်ခိၣ်ဒီဘ့ၣ်.

ထံဂ့ၢ်ကီၢ်ဂ့ၢ် အတၢ်ဂ့ၢ်ကီလၢ “မုၢ်နံၤအကတၢၢ်တဖၣ်”

လံာ်စီဆှံ ပာ်ဖျါထီၣ်ဝဲလၢ ကစၢ်ယွၤ ဒုးမံမီၢ် ဘၤဘူၤလိၣ်အစီၤပၤလၢ ဝံအတၢ်စံးပာ် ဘၣ်ဃးဒီး “တၢ်ကမၤအသးလၢ မုၢ်နံၤအကတၢၢ်တဖၣ်” ဒီးအမၢ ဝံဒၤနံးယ့လး ကွဲးလီၤဝဲ တၢ်ဂ့ၢ်တဖၣ်အံၤ. တၢ်လၢဝံဒၤနံးယ့လး ကွဲးလီၤအီၤန့ၣ် ဘၣ်ဃးဒီး တၢ်ဆၢကတီၢ် လၢကဟဲလၢ ခါဆူညါ ဒီးတၢ်ဆီတလဲလၢ အရ့ဒိၣ်ကအိၣ်ဝဲ အဆၢကတီၢ်.—ဒၤနံးယ့လး ၂:၂၈.

လၢတၢ်မံမီၢ်အပူၤန့ၣ် ဘၤဘူၤလိၣ်အစီၤပၤ ထံၣ်ဘၣ်ဝဲ တၢ်ဂီၤဖးဒိၣ်တဒု လၢဘၣ်တၢ်တ့အီၤဒီး ထူ, စ့, တိၢ်ဘီ, ထး ဒီးကပံာ်. စီၤဒၤနံးယ့လး တဲဖျါထီၣ်ဝဲလၢ တၢ်ဂီၤအံၤ အခိၣ်တုၤလၢအခီၣ်န့ၣ် ဒိလီၤဝဲ တၢ်ပၢတၢ်ပြးလၢ အဒိၣ်စိဒိၣ်ကမီၤ လၢအကဟဲအိၣ်ထီၣ် ဒီးအကလီၤမၢ်ကွံာ် တခါဝံၤတခါ.a ဒီးလၢခံကတၢၢ်န့ၣ် လၢၢ်တဖျၢၣ်လၢ အဒိလီၤဝဲ ယွၤအဘီအမုၢ်န့ၣ် ကမၤသဘှံးဝဲ တၢ်ဂီၤတဒုအံၤ.—ဒၤနံးယ့လး ၂:၃၆-၄၅.

ဒ်ဝံအတၢ်စံးပာ်အံၤ ပာ်ဖျါထီၣ်ဝဲအသိး ကစၢ်ယွၤအဘီမုၢ် ကမၤဟးဂီၤ ဟီၣ်ခိၣ်တၢ်ပၢခဲလၢာ် ဒီးအကပၢက့ၤ ဟီၣ်ခိၣ်ဒီဘ့ၣ်. ယ့ၣ်ၡူးမၢဝဲ အပျဲၢ်အဘီၣ်တဖၣ် ဃ့ထုကဖၣ်လၢ ယွၤအဘီအမုၢ်အံၤ ကဟဲအဂီၢ်. အဝဲမၢ အဝဲသ့ၣ် ဃ့ထုကဖၣ်လၢ “နဘီနမုၢ်န့ၣ် မ်အဟဲတက့ၢ်.”—မးသဲ ၆:၁၀.

ဘၣ်ဆၣ် လၢဝံအတၢ်စံးပာ်အံၤန့ၣ် အတဲဆိပာ်စၢၤဝဲ ထံဂ့ၢ်ကီၢ်ဂ့ၢ် အတၢ်ဂ့ၢ်ကီ ဒ်လဲၣ်. အတဲဝဲလၢ တၢ်ဂီၤဖးဒိၣ်တဒု အခီၣ်လၣ်န့ၣ် ဘၣ်တၢ်တ့အီၤဒီး “ထးတနီၤ ဒီးကပံာ် တနီၤ.” (ဒၤနံးယ့လး ၂:၃၃) ခီဖျိလၢ အကျဲၣ်ကျီလိာ်အသး ခံမံၤအဃိ အလီၤဆီလိာ်အသးဒီး တၢ်ဂီၤဖးဒိၣ်တဒုန့ၣ် အက့ၢ်အဂီၤ လၢအဂၤတဖၣ်. အဃိ တၢ်ပၢတၢ်ပြးတခါအံၤ ကလီၤဆီဒီး တၢ်ပၢတၢ်ပြးလၢ အဒိၣ်စိလၢ အပူၤကွံာ်တဖၣ်. အလီၤဆီ လၢကျဲဒ်လဲၣ်. ဝံဒၤနံးယ့လး တဲဝဲလၢ

ဒ်ဝံအတၢ်စံးပာ်အံၤ တဲဝဲအသိး ဘီမုၢ်လၢ အဘၣ်တၢ်ဒိလီၤအီၤ လၢတၢ်ဂီၤဖးဒိၣ်တဒုအံၤ အခီၣ်လၣ်န့ၣ် ကအိၣ်ဒီး ထံဂ့ၢ်ကီၢ်ဂ့ၢ် အတၢ်ဂ့ၢ်ကီ. အထံဖိကီၢ်ဖိတဖၣ် ကအိၣ်ဒီး တၢ်စိတၢ်ကမီၤလၢ အဖီခိၣ်အဃိ ဘီမုၢ်အံၤန့ၣ် အတၢ်စိတၢ်ကမီၤ ကစၢ်ဝဲလီၤ.

ဝံဒၤနံးယ့လး အတၢ်စံးပာ် လၢထီၣ်ပှဲၤထီၣ် လၢပစိၤခဲအံၤ

တၢ်ဂီၤဖးဒိၣ်တဒု အခီၣ်လၣ်န့ၣ် ဒိလီၤဝဲ တၢ်ပၢတၢ်ပြးလၢ အစိကမီၤဒိၣ်ကတၢၢ် လၢပစိၤခဲအံၤ လၢအမ့ၢ်ဝဲ ဘြံးတၢၣ်ဒီးအမဲရကၤလၢ အဖီၣ်လိာ်သးစု. ပသ့ၣ်ညါအီၤ ကသ့ဒ်လဲၣ်.

တၢ်ဂီၤဖးဒိၣ်တဒု အခီၣ်လၣ်န့ၣ် ဘၣ်တၢ်တ့အီၤဒီး “ထးတနီၤ ဒီးကပံာ်တနီၤ.” (ဒၤနံးယ့လး ၂:၄၂) ထးဒီးကပံာ် မ့ၢ်ကျဲၣ်ကျီလိာ်အသးန့ၣ် အတကျၢၤဝဲ အါအါဘၣ်. ဒ်န့ၣ်အသိး ဘြံးတၢၣ်ဒီးအမဲရကၤန့ၣ် ခီဖျိလၢ အထံဖိကီၢ်ဖိတဖၣ် တအိၣ်ဃူဃူဖိးဖိးဘၣ်အဃိ အတၢ်စိတၢ်ကမီၤ လီၤစှၤဝဲ. အဒိ အဝဲသ့ၣ် အနီၢ်ကစၢ် အထံဖိကီၢ်ဖိတဖၣ်န့ၣ် ထီဒါလိာ်အသး. ဒီးထံဖိကီၢ်ဖိတဖၣ် ထီဒါပဒိၣ်ပပှၢ် ဆူၣ်ဆူၣ်ကိၤကိၤ လၢအနီၢ်ကစၢ်ခွဲးယာ်အဂီၢ်. ဒီးအါဘျီန့ၣ် ပှၤခိၣ်ပှၤနၢ်လၢ အဝဲသ့ၣ် ဃုထၢထီၣ်ဝဲတဖၣ်န့ၣ် ဆီၣ်ထွဲမၤစၢၤလိာ်သး တသ့ဘၣ်. တကးဒံးဘၣ် ထံဖိကီၢ်ဖိတဖၣ် အတၢ်ထံၣ် လီၤဆီလိာ်သးဒိၣ်မးအဃိ ပဒိၣ်ပပှၢ်တဖၣ် မၤတၢ်ဒ် အတၢ်ဆၢတဲာ်အသိး တသ့ဘၣ်.

ခဲအံၤ ပကဆိကမိၣ်အါထီၣ် ဝံဒၤနံးယ့လး အတၢ်စံးပာ်အံၤ ဒီးအဟဲလၢပှဲၤထီၣ်လၢ ပစိၤခဲအံၤ ဒ်လဲၣ်.

ဝံအတၢ်စံးပာ်– “ဘီမုၢ်အံၤ တဃူဖိးဝဲဘၣ်, ဘၣ်ဆၣ် ထးလၢအကိၤ ကအိၣ်လၢအပူၤ တနီၤလီၤ.”—ဒၤနံးယ့လး ၂:၄၁.

အခီပညီ– ဘြံးတၢၣ် ဒီးအမဲရကၤန့ၣ် အထံကီၢ်တၢ်ဃူတၢ်ဖိး တအိၣ်ဘၣ် သနာ်က့ အဝဲသ့ၣ် အသုးန့ၣ် အဂံၢ်ဆူၣ်ဒိၣ်မး. အဃိ အဝဲသ့ၣ် အစိကမီၤ ဒိၣ်န့ၢ်ဒံး ထံကီၢ်အဂၤတဖၣ် ဒီးလီၤဂာ်ဒ် ထးလၢအကျၢၤ.

တၢ်လၢထီၣ်ပှဲၤထီၣ်

၂၀၂၃ လံာ်စရီတဘ့ၣ် ပာ်ဖျါထီၣ်ဝဲလၢ ဘြံးတၢၣ် ဒီးအမဲရကၤန့ၣ် သူစ့လၢ အသုးအဂီၢ် အါန့ၢ်ဒံး ထံကီၢ်အဂၤ ၁၂ ဘ့ၣ်သူစ့လၢ အသုးအဂီၢ်ဒံး.—Stockholm International Peace Research Institute.

“ဘြံးတၢၣ် ဒီးအမဲရကၤန့ၣ် ဆီၣ်ထွဲမၤစၢၤလိာ်သးလၢ အဂ့ၤကတၢၢ် ဒီးထံကီၢ်ခံဘ့ၣ်လၢ အဆီၣ်ထွဲလိာ်သး ထဲထဲအံၤန့ၣ် တအိၣ်ဘၣ်. ပသူဝဲ စဲးဖီကဟၣ် တၢ်လဲၤထီၣ်လဲၤထီ လၢအဂ့ၤကတၢၢ်, ပမၤသကိးတၢ်, အိၣ်ဃူလိာ်သး ဒီးပဆီၣ်ထွဲမၤစၢၤလိာ်သး.”—Strategic Command, U.K. Ministry of Defence, April 2024.

ဝံအတၢ်စံးပာ်– “ဒ်အခီၣ်မုၢ်ခီၣ်ဘိတဖၣ် မ့ၢ်ဝဲ ထးတနီၤ ဒီးကပံာ်တနီၤအသိး ဘီမုၢ်အံၤ ကဆူၣ်ဝဲ သနာ်က့ ကစၢ်ဝဲစ့ၢ်ကီးလီၤ.”—ဒၤနံးယ့လး ၂:၄၂.

အခီပညီ– ဘြံးတၢၣ် ဒီးအမဲရကၤန့ၣ် အသုးအဂံၢ်ဆူၣ် သနာ်က့ မ့ၢ်လၢအတၢ်ပၢန့ၣ် မ့ၢ်ဝဲ ဒံၣ်မိၣ်ခြ့ၣ်စံၣ် (democracy) အတၢ်ပၢအဃိ ဖဲအဝဲသ့ၣ် ဘၣ်သးမၤ တၢ်တမံၤမံၤအခါ ပှၤအါဂၤ မ့ၢ်တတူၢ်လိာ်ဘၣ်န့ၣ် အဝဲသ့ၣ် မၤဝဲတသ့ဘၣ်.

တၢ်လၢထီၣ်ပှဲၤထီၣ်

“အမဲရကၤ ပှၤခိၣ်ပှၤနၢ်လၢ အမၤထံဂ့ၢ်ကီၢ်ဂ့ၢ်တဖၣ်န့ၣ် အတၢ်ထံၣ် တလီၤပလိာ်လိာ်အသးဘၣ်. အဃိ ဖဲအဝဲသ့ၣ် အၢၣ်လီၤတၢ် ဘၣ်ဃးဒီး တၢ်ဘံၣ်တၢ်ဘၢ ဒီးကျိၣ်စ့တကပၤအခါ အဝဲသ့ၣ် မၤလၢပှဲၤ အတၢ်အၢၣ်လီၤ တန့ၢ်ထီဘိဘၣ်.”—“The Wall Street Journal.”

“လၢဘြံးတၢၣ်န့ၣ် ပှၤမၤထံဂ့ၢ်ကီၢ်ဂ့ၢ်တဖၣ် အတၢ်ထံၣ် တလီၤပလိာ်လိာ်သးဘၣ် ဒီးတဲအါလိာ်သး အါန့ၢ်ဒံးလၢညါ. အဃိ အဝဲသ့ၣ် မၤစၢၤပှၤမၤပဒိၣ် အတၢ်ဖံးတၢ်မၤ လၢကမၤတၢ်ဆီတလဲ လၢအလိၣ်ဘၣ်တဖၣ် တသ့ဝဲအါအါဘၣ်.”—Institute for Government.

ဝံအတၢ်စံးပာ်– “အဝဲသ့ၣ် ကကျဲၣ်ကျီလိာ်အသးဒီး ပှၤမုၢ်ဆ့ၣ်မုၢ်ဂီၤဖိတဖၣ် ဘၣ်ဆၣ် တဘုးတာ်လိာ်အသးဘၣ်.”—ဒၤနံးယ့လး ၂:၄၃, တၢ်ဂ့ၢ်အဘျဲၣ်.

အခီပညီ– ဒံၣ်မိၣ်ခြ့ၣ်စံၣ် အတၢ်ပၢပူၤန့ၣ် ထံဖိကီၢ်ဖိတဖၣ် အိၣ်ဒီးတၢ်ခွဲးတၢ်ယာ် လၢကတဲဖျါထီၣ် အနီၢ်ကစၢ်တၢ်ထံၣ်. သနာ်က့ ဖဲပဒိၣ်ပပှၢ် ဆၢတဲာ်တၢ်အခါ ထံဖိကီၢ်ဖိမ့ၢ်ဂ့ၤ, ပဒိၣ်ပပှၢ်မ့ၢ်ဂ့ၤ အသးတမံနီ တကပၤဘၣ်.

တၢ်လၢထီၣ်ပှဲၤထီၣ်

“ဆၢကတီၢ်ခဲအံၤ ပှၤအမဲရကၤဖိ အါဂၤန့ၣ် တအိၣ်ဒီး တၢ်ထံၣ်အဂ့ၤလၢ ပဒိၣ်ပပှၢ်တဖၣ် ဒီးအဝဲသ့ၣ် အတၢ်ဖံးတၢ်မၤတဖၣ် အဖီခိၣ်ဘၣ်.”—Pew Research Center.

“မုၢ်မဆါတနံၤအံၤ ဘြံးတၢၣ် အထံဖိကီၢ်ဖိတဖၣ်န့ၣ် အဝဲသ့ၣ် တနာ်အီၣ် အထံကီၢ်ခိၣ်နၢ်တဖၣ် ဒီးအတၢ်မၤတဖၣ် ထဲသိးဒီး လၢအပူၤကွံာ် အနံၣ် ၅၀ အတီၢ်ပူၤန့ၣ်ဘၣ်.”—“National Centre for Social Research.”

ခါဆူညါန့ၣ် ဝံဒၤနံးယ့လး အတၢ်စံးပာ် ကဟဲလၢထီၣ်ပှဲၤထီၣ် ဒ်လဲၣ်

ဒ်ဝံဒၤနံးယ့လး အတၢ်စံးပာ် ပာ်ဖျါထီၣ်ဝဲအသိး ဖဲဘြံးတၢၣ် ဒီးအမဲရကၤလၢ အဖီၣ်လိာ်သးစု ဒိၣ်စိဒံးဝဲ အဆၢကတီၢ် ယွၤအဘီအမုၢ် ကမၤဟးဂီၤ ဟီၣ်ခိၣ်အတၢ်ပၢခဲလၢာ် ဒီးအကပၢက့ၤ ဟီၣ်ခိၣ်ဒီဘ့ၣ်.—ဒၤနံးယ့လး ၂:၄၄.

ဖဲန့ၣ်အဆၢကတီၢ် တၢ်ကကဲထီၣ်အသး ဒ်လဲၣ်န့ၣ် လံာ်လီၣ်ဖျါ ပာ်ဖျါထီၣ် စ့ၢ်ကီးဝဲလၢ “စီၤပၤတဖၣ်လၢ အအိၣ်လၢဟီၣ်ခိၣ်ဒီဘ့ၣ်” ကပာ်ဖှိၣ်ထီၣ်အသး လၢကထီဒါဝဲ ယဟိဝၤယွၤb အဂီၢ် အဃိ အၢ်မက့းဒိၣ်တၢ်ဒုး ကကဲထီၣ်ဝဲ. တၢ်ဒုးအံၤ မ့ၢ်ဝဲ “တၢ်ဒုးလၢ အကမၤအသး ဖဲသ့တၢ်လၢာ်ကစၢ်ယွၤ အမုၢ်နံၤဖးဒိၣ်အခါလီၤ.” (လီၣ်ဖျါ ၁၆:၁၄, ၁၆; ၁၉:၁၉-၂၁) ဖဲအၢ်မက့းဒိၣ်တၢ်ဒုးန့ၣ် ယဟိဝၤယွၤ ကမၤဟးဂီၤကွံာ် ဟီၣ်ခိၣ်အတၢ်ပၢတၢ်ပြး ခဲလၢာ်. အဃိ တၢ်ပၢတၢ်ပြးတဖၣ်လၢ ဝံဒၤနံးယ့လး အတၢ်စံးပာ်အပူၤန့ၣ် တအိၣ်ဝဲ နီတစဲးလၢၤဘၣ်.

ဒ်သိး နကသ့ၣ်ညါ အါထီၣ်အဂီၢ် ဖးကွၢ်တၢ်ဂ့ၢ် လၢအမ့ၢ် “အၢ်မက့းဒိၣ် အတၢ်ဒုးန့ၣ် မ့ၢ်မနုၤလဲၣ်.”

ပမ့ၢ်သ့ၣ်ညါထီၣ် ဝံဒၤနံးယ့လး အတၢ်စံးပာ် ဘၣ်ဃးဒီး ထံဂ့ၢ်ကီၢ်ဂ့ၢ် အတၢ်ဂ့ၢ်ကီန့ၣ် ကကဲဘျုးလၢပဂီၢ်

လံာ်စီဆှံ တဲဆိပာ်စၢၤဝဲ ဘၣ်ဃးဒီး ဘြံးတၢၣ် ဒီးအမဲရကၤ အထံဂ့ၢ်ကီၢ်ဂ့ၢ် တၢ်ဂ့ၢ်ကီ လီၤတံၢ်လီၤဆဲး. နမ့ၢ်နၢ်ပၢၢ်ထီၣ် တၢ်ဂ့ၢ်အံၤန့ၣ် နတၢ်ထံၣ်ဘၣ်ဃးဒီး တၢ်ကဲထီၣ်အသးလၢ ဆၢကတီၢ်ခဲအံၤန့ၣ် ကဆီတလဲထီၣ်. အဒိ ပကကွၢ်သကိး တၢ်ဂ့ၢ်လၢ တၢ်ဖီလာ်တဖၣ်အံၤ.

• နကနၢ်ပၢၢ်ထီၣ်လၢ ဘၣ်မနုၤအဃိ ယ့ၣ်ၡူးအဲၣ်ဒိးလၢ အပျဲၢ်အဘီၣ်တဖၣ် ကအိၣ်ဘၢၣ်စၢၤ လၢထံဂ့ၢ်ကီၢ်ဂ့ၢ်လဲၣ်. (ယိၤဟၣ် ၁၇:၁၆) ဒီးနကနၢ်ပၢၢ်ထီၣ် ယွၤအဘီအမုၢ် အစီၤပၤ ယ့ၣ်ၡူး အတၢ်ကတိၤလၢအမ့ၢ် “ယဘီယမုၢ်န့ၣ် တဘၣ်ဃးဒီး ဟီၣ်ခိၣ်အံၤဘၣ်.”—ယိၤဟၣ် ၁၈:၃၆.

• နတၢ်နာ် ကဟဲအါထီၣ်လၢ ယွၤအဘီအမုၢ် ကဒုးအိၣ်ထီၣ် တၢ်ဆီတလဲလၢ ဟီၣ်ခိၣ်ချၢ ဒီးအကမၤလၢပှဲၤ ကစၢ်ယွၤ အတၢ်အၢၣ်လီၤအီလီၤ လၢပှၤဟီၣ်ခိၣ်ဖိအဂီၢ် ဘူးထီၣ်လံ.—လီၣ်ဖျါ ၂၁:၃, ၄.

• နတၢ်ဘၣ်ယိၣ်လၢ ခါဆူညါအဂီၢ် ကလီၤစှၤ ဒီးတလိၣ်ပျံၤလၢ ပှၤကမၤဟးဂီၤ ဟီၣ်ခိၣ်ဘၣ်.—စံးထီၣ်ပတြၢၤ ၃၇:၁၁, ၂၉.

ဝံဒၤနံးယ့လး အတၢ်စံးပာ် ပာ်ဖျါထီၣ်ဝဲလၢ တၢ်ဂီၤဖးဒိၣ်တဒု အခီၣ်လၣ်လၢ အဒိလီၤဝဲ ဘြံးတၢၣ် ဒီးအမဲရကၤန့ၣ် မ့ၢ်ဝဲ တၢ်ပၢတၢ်ပြး အလီၢ်ခံကတၢၢ်တခါ လၢအဒိၣ်စိလၢ ဟီၣ်ခိၣ်ဒီဘ့ၣ်. ဖဲတၢ်ပၢတၢ်ပြးအံၤ ဟးဂီၤဝံၤအလီၢ်ခံ ယွၤအဘီအမုၢ်လၢမူခိၣ် လၢအမ့ၢ် တၢ်ပၢတၢ်ပြး လၢအဂ့ၤကတၢၢ်န့ၣ် ကပၢတၢ်ခဲလၢာ်.

ဒ်သိး နကသ့ၣ်ညါအါထီၣ် ဘၣ်ဃးဒီး တၢ်လၢယွၤအဘီအမုၢ် ကမၤန့ၢ် ပှၤဟီၣ်ခိၣ်ဖိတဖၣ်အဂီၢ် ကွၢ်တၢ်ဂီၤမူ လၢအမ့ၢ် ယွၤအဘီအမုၢ်န့ၣ် မ့ၢ်မနုၤလဲၣ်.