ဖဲပထီၣ်တၢ်အိၣ်ဖှိၣ်လၢ ခိၤရိၤနၤတၢ်ဆါ (COVID-19) အိၣ်ဒံးအခါ ဒ်သိးတၢ်ဆါ တဘၣ်ကူပှၤတဂ့ၤအဂီၢ် ပှၤကတဲာ်ကတီၤပာ်စၢၤ တၢ်အိၣ်ဖှိၣ်လီၢ်ဒ်လဲၣ်

ဖဲ ၂၀၂၂, လါမၢ်ၡးထီၣ်န့ၣ်​ တၢ်ကစီၣ်လၢ jw.org အပူၤပာ်ဖျါထီၣ်ဝဲလၢ “ပှၤပၢဆှၢတၢ်ကမံးတံာ် ဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်ကိးဖျၢၣ်ဒဲးလၢ ပဒိၣ်အတၢ်တြီမ့ၢ်တအိၣ်ဘၣ်န့ၣ်​ ဖဲလါအ့ဖြ့ၣ်ထီၣ်အနွံန့ၣ်​ အဝဲသ့ၣ်​ ကထီၣ်က့ၤဝဲ တၢ်အိၣ်ဖှိၣ်လၢ တၢ်အိၣ်ဖှိၣ်လီၢ်.” အဃိ ယဟိဝၤပှၤအုၣ်အသးလၢ ဟီၣ်ခိၣ်ဒီဘ့ၣ်န့ၣ်​ သးခုဝဲဒိၣ်မး. ဘၣ်ဆၣ်​ ဖဲန့ၣ်အခါ ခိၤရိၤနၤတၢ်ဆါ တလီၤမၢ်ဒံးဘၣ်.a အဃိ ပှၤမ့ၢ်ဟဲထီၣ်တၢ်အိၣ်ဖှိၣ်န့ၣ်​ ဒ်သိးတၢ်ဆါ တဘၣ်ကူပှၤတဂ့ၤအဂီၢ် ပကတဲာ်ကတီၤထီၣ်​ တၢ်ပီးတၢ်လီမနုၤတဖၣ်လဲၣ်. ဒီးပှၤတထီၣ်တၢ်အိၣ်ဖှိၣ်​ အိၣ်ခံနံၣ်လံအဃိ ပှၤထီၣ်က့ၤ တၢ်အိၣ်ဖှိၣ်​ ကသ့အဂီၢ် ပကတဲာ်ကတီၤတၢ်အိၣ်ဖှိၣ်လီၢ်ဒ်လဲၣ်.

နီၢ်ကီၢ်န့ၣ်​ ဒ်သိးပှၤထီၣ်က့ၤတၢ်အိၣ်ဖှိၣ်​ လၢတၢ်အိၣ်ဖှိၣ်လီၢ် ကသ့အဂီၢ်ဒီပုၢ်ဝဲၢ်တဖၣ်​ ရဲၣ်ကျဲၤဆိပာ်စၢၤတၢ် တဘျုးလါလံ.

ပှၤရဲၣ်လီၤကျဲၤလီၤတၢ်ဒ် တၢ်လီၢ်တတီၤဘၣ်တတီၤ တၢ်လိၣ်ဘၣ်အိၣ်ဝဲအသိး

ဖဲ ၂၀၂၀ န့ၣ်​ ပတလဲၤထီၣ်တၢ်အိၣ်ဖှိၣ်လၢ တၢ်အိၣ်ဖှိၣ်လီၢ်ဘၣ်​ တလါဝံၤအလီၢ်ခံ ဟီၣ်ခိၣ်ဒီဘ့ၣ်​ တၢ်သူၣ်ထီၣ်ဘှီထီၣ်တၢ်မၤ ဝဲၤကျိၤ (WDC) လၢ ဝီဝံး, နူယီးန့ၣ်​ အဝဲသ့ၣ်​ စးထီၣ်​ တဲသကီးဝဲ ဘၣ်ဃးဒီး ဖဲခိၤရိၤနၤတၢ်ဆါလီၤအခါ ကကွၢ်ထွဲဝဲ တၢ်အိၣ်ဖှိၣ်လီၢ် ဒီးကကတဲာ်ကတီၤဝဲ တၢ်အိၣ်ဖှိၣ်လီၢ် ဒ်လဲၣ်.

တၢ်လီၢ်တတီၤဒီးတတီၤန့ၣ်​ တၢ်လိၣ်ဘၣ်တဒ်သိးလိာ်သးဘၣ်. ဒီပုၢ်ဝဲၢ် မဲၣ်သယူၤ ဒံၤ စးထံၤ လၢအမၤတၢ်လၢ WDC န့ၣ်​ တဲဝဲလၢ “လၢတၢ်လီၢ်တနီၤနီၤန့ၣ်​ တၢ်ကီတၢ်ခဲအိၣ်ဝဲလၢ ပှၤသ့စုအလီၢ်အဂီၢ်. လၢဘီမုၢ်ဘျီၣ်ဒိၣ်န့ၣ်​ ထံလဲၤမ့ၢ်တတုၤဘၣ်န့ၣ်​ ပှၤဘၣ်ပှ့ၤန့ၢ်ထံ မ့တမ့ၢ် ပှၤဘၣ်လဲၤဒၢၣ်န့ၢ်ထံလၢ ထံကျိၤပူၤ မ့တမ့ၢ် လၢထံကမျၢပူၤ. ဒီးလၢထံကီၢ်အဂၤတနီၤနီၤန့ၣ်​ ပဒိၣ်ပပှၢ်ဟ့ၣ်လီၤတၢ်ကလုၢ်လၢ အဝဲသ့ၣ်​ ကဘၣ်အိၣ်ဝဲဒီး အဲခီ (air-con) မ့တမ့ၢ် စဲးလၢအဒုးအိၣ်ထီၣ်​ ကလံၤလၢအကဆှီ ဒီးကဘၣ်ပာ်လီၤ တၢ်ပနီၣ်တဖၣ်လၢ ဘၣ်ဃးဒီး တၢ်အိၣ်ဆူၣ်အိၣ်ချ့ ဒီးတၢ်ကဆှဲကဆှီ.”

တၢ်ကီတၢ်ခဲတဖၣ်အံၤန့ၣ်​ ပဒီပုၢ်ဝဲၢ်တဖၣ်​ ဘှါၡဲဝဲဒ်လဲၣ်. ဒီပုၢ်ဝဲၢ်မဲၣ်သယူၤ တဲဝဲလၢ ပဒီပုၢ်ဝဲၢ်တဖၣ်​ ထံၣ်ဘၣ်ဝဲလၢ လၢဘီမုၢ်ဘျီၣ်ဒိၣ်အဂီၢ်န့ၣ်​ ပှၤသူဝဲ တၢ်ပီးတၢ်လီ ယိယိဖိ ဒီးအပှ့ၤတဒိၣ်ဘၣ်အဃိ ကဲဘျုးဝဲဒိၣ်မး. အဒိ လၢကီၢ်ဖးပူၣ်အၣ်​ နယူကံၣ်နံၣ်န့ၣ်​ လၢတၢ်သ့စုအလီၢ်န့ၣ်​ အဝဲသ့ၣ်သူဝဲထံဒၢလၢ အတြီၢ်ဝဲ ထံအလံၤထၢၤ ၂၀ (၅.၃-ကါလၣ်) ဒီးအအိၣ်ဒီး တၢ်ဝံာ်လီၤထံလၢ ကသ့စု. မ့မ့ၢ်တၢ်အိၣ်ဖှိၣ်လၢ အအိၣ်ယံၤဒီးဝ့ၢ်ပူၤန့ၣ်​ ပဒီပုၢ်ဝဲၢ်တဖၣ်သူဝဲ အမဲရကၤ စ့ဒီၤလၤထဲ ၄၀ သနာ်က့ အဝဲသ့ၣ်ပှ့ၤဝဲ တၢ်ပီးတၢ်လီလၢ တၢ်သ့စုအဂီၢ်သ့. အဒိ ကီၢ်အၤဖြံၤကၤန့ၣ်​ ပှၤမာ်လိာ်န့ၢ်အဝဲသ့ၣ်​ တၢ်သ့စုလၢ အဂ့ၤဒိၣ်ထီၣ်​ အဖျၢၣ်​ ၆,၀၀၀ လၢကီၢ်အ့ၡၢၣ်.

ဒီးတၢ်ဆီတလဲအဂၤတနီၤန့ၣ်​ လၢဘီမုၢ်ဘျီၣ်ဒိၣ်န့ၣ်​ ပှၤထီထီၣ်တၢ်ပီးတၢ်လီအသီတနီၤ မ့တမ့ၢ် ပှၤဘှီဂ့ၤထီၣ်က့ၤ တၢ်ပီးတၢ်လီတနီၤ ဒ်သိးဒီး ပှၤကန့ၢ်ဘၣ်ကလံၤလၢ အဂ့ၤအဂီၢ်. ဒီးလၢတၢ်အိၣ်ဖှိၣ်အါဖျၢၣ်န့ၣ်​ ပှၤပှ့ၤန့ၢ်ဝဲ တၢ်ကလုၢ်ဒၢ လၢအဘိထီ ဒ်သိး ပှၤတလိၣ်ဟ့ၣ်လိာ်သး တၢ်ကလုၢ်ဒၢလၢစု တဆီဘၣ်တဆီတဂ့ၤအဂီၢ်. ဒီးလၢတၢ်လီၢ်လၢ ပှၤဖီၣ်ဘၣ်အီၤအါ ဒီးတၢ်ဆါဘၣ်ကူဘၣ်ဂာ်တၢ်သ့ ဒ်သိးဒီး ပဲတြီအစုဖီၣ်​ ဒီးပှၤဝံာ်ထီၣ်ဝံာ်လီၤထံအလီၢ်န့ၣ်​ ဒီပုၢ်ဝဲၢ်တဖၣ်​ မၤဝဲဒ်သိးဒီး ပှၤတဖီၣ်ဘၣ်အီၤတဂ့ၤအဂီၢ်. တကးဒံးဘၣ်​ အဝဲသ့ၣ်​ မၤကဆှီဝဲဒီး ကသံၣ်မၤသံတၢ်ဃၢ်ထီဘိ. အဒိ လၢတၢ်အိၣ်ဖှိၣ်တနီၤန့ၣ်​ လၢတၢ်ဟးလီၢ်န့ၣ်​ အဝဲသ့ၣ်မၤဝဲ ဒ်သိးဒီး ထံကဟဲလီၤလၢ အနီၢ်ကစၢ်အဂီၢ်. လၢတၢ်အိၣ်ဖှိၣ်လီၢ်လၢ ကီၢ်ခၠံၢ်လံၣ်ပူၤန့ၣ်​ ဒီပုၢ်ဝဲၢ်တဖၣ်​ ကတ့ထီၣ်ဝဲ တၢ်လၢအလိၣ်ဘၣ်တဖၣ်အဂီၢ် အဝဲသ့ၣ်သူဝဲ အမဲရကၤ စ့ဒီၤလၤ ၁,၄၀၀ လၢတၢ်အိၣ်ဖှိၣ်​ တဖျၢၣ်ဘၣ်တဖျၢၣ်အဂီၢ်.

ပဒီပုၢ်ဝဲၢ်တဖၣ်​ ဂုာ်ကျဲးစၢးမၤဝဲဒ်သိး ပှၤမ့ၢ်ဟဲထီၣ်တၢ်အိၣ်ဖှိၣ်န့ၣ်​ တၢ်ဆါသုတဘၣ်ကူပှၤတဂ့ၤ. တကးဒံးဘၣ်​ တကတီၢ်ဃီန့ၣ်​ အဝဲသ့ၣ်သူစ့ၢ်ကီးဝဲ တၢ်မၤဘူၣ်သ့သ့ဘၣ်ဘၣ်. လၢထံကီၢ်တနီၤန့ၣ်​ အဝဲသ့ၣ်​ တူၢ်လိာ်ဝဲ ပဒိၣ်အတၢ်မၤစၢၤ ဒ်သိးဒီးကပှ့ၤဝဲ တၢ်သ့စုအလီၢ် ဒီးတၢ်ကလုၢ်ဒၢ အဘိဖးထီအဂီၢ်. ဒီးဝဲၤတြၢ်တဖၣ်န့ၣ်​ မၤသကီးတၢ် ဒီးမၤလိာ်ဖှိၣ်ဝဲ တၢ်ဖိတၢ်လံၤဖးအါတပူၤဃီ ဒ်သိးဒီး စ့ကလၢာ်စှၤအဂီၢ်. ဝဲၤတြၢ်ဒီး ဟီၣ်ခိၣ်ဒီဘ့ၣ်​ တၢ်ပှ့ၤတၢ်ဝဲၤကျိၤ ရဲၣ်ကျဲၤဝဲဒ်သိးဒီး အဝဲသ့ၣ်ကပှ့ၤန့ၢ်ဝဲ တၢ်ဖိတၢ်လံၤလၢ ခီပနံၣ်​ အခီၣ်ထံး ဒ်သိးဒီးအပှ့ၤကလီၤစှၤ ဒီးတၢ်ဖိတၢ်လံၤ ကတုၤချ့အဂီၢ်.

“ယတဘၣ်ယိၣ်တၢ်လၢၤဘၣ်”

ပှၤကတဲာ်ကတီၤထီၣ်​ တၢ်အိၣ်ဖှိၣ်အလီၢ် ဒ်သိးဒီး တၢ်ဆါတဘၣ်ကူဘၣ်ဂာ် ပှၤတဂ့ၤအဂီၢ်အဃိ ပှၤလၢဟဲထီၣ်တၢ်အိၣ်ဖှိၣ်တဖၣ်​ တဘၣ်ယိၣ်တၢ်လၢၤဘၣ်. ဒီပုၢ်ဝဲၢ်မုၣ်​ ဒီၤစံနံၤ လၢအအိၣ်လၢ ဖရူန့ၣ်​ ဖဲအသ့ၣ်ညါဝဲလၢ ပှၤကဘၣ်ထီၣ်က့ၤတၢ်အိၣ်ဖှိၣ်လၢ တၢ်အိၣ်ဖှိၣ်လီၢ်အခါ အဝဲတဲဝဲလၢ “ခိၤရိၤနၤတၢ်ဆါလီၤဝံၤ တယံာ်ဘၣ်န့ၣ်​ ယဘၣ်ခိၤရိၤနၤ အဃိ ယဘၣ်ယိၣ်တၢ်တစဲး. ယတအဲၣ်ဒိးလဲၤထီၣ်တၢ်အိၣ်ဖှိၣ်လၢ တၢ်အိၣ်ဖှိၣ်လီၢ်ဒံးဘၣ်​ ယဘၣ်ယိၣ်လၢ တၢ်ဆါကဘၣ်ကဒီးယၤတဘျီ. ဘၣ်ဆၣ်​ ဖဲယလဲၤတုၤလၢ တၢ်အိၣ်ဖှိၣ်လီၢ်အခါ ယထံၣ်ဘၣ်လၢ တၢ်အိၣ်ဖှိၣ်သးပှၢ်တဖၣ်​ ကတဲာ်ကတီၤဆိပာ်စၢၤဝဲ တၢ်အိၣ်ဖှိၣ်လီၢ် ဒ်သိးဒီး တၢ်သ့စုလီၢ် ဒီးတၢ်ကလုၢ်ဒၢ နာ်က့ ပှၤမၤဝဲလၢအဘိဖးထီ. ဒီးအိၣ်ဒီးတၢ်ရဲၣ်တၢ်ကျဲၤလၢ ပှၤကမၤကဆှီ တၢ်အိၣ်ဖှိၣ်လီၢ် တချုးလၢ တၢ်အိၣ်ဖှိၣ်ထီၣ်​ ဒီးတၢ်အိၣ်ဖှိၣ်ဝံၤအခါ. အဃိ ယတဘၣ်ယိၣ်တၢ်လၢၤဘၣ်.”b

မ့မ့ၢ်ဒီပုၢ်ဝဲၢ်မုၣ်​ စၤရါ လၢအအိၣ်လၢ စၣ်ဘံၣ်ယၣ်န့ၣ်​ အဘၣ်ယိၣ်တၢ်လၢ အဂၤတမံၤ. အဝဲတဲဝဲလၢ “ယဝၤသံလၢ ခိၤရိၤနၤတၢ်ဆါန့ၣ်​ အိၣ်ထဲစှၤကိးလါဒံးလီၤ. အဃိ ယမ့ၢ်လဲၤထီၣ်တၢ်အိၣ်ဖှိၣ်လၢ တၢ်အိၣ်ဖှိၣ်လီၢ်န့ၣ်​ အဝဲတပၣ်လၢၤဘၣ်အဃိ ယဘၣ်ယိၣ်လၢ ယပၢၤယသးတန့ၢ်ဘၣ်.” ဘၣ်ဆၣ်​ ဖဲဒီပုၢ်ဝဲၢ်မုၣ်တဂၤအံၤ လဲၤထီၣ်တၢ်အိၣ်ဖှိၣ်အခါ အတူၢ်ဘၣ်ဝဲဒ်လဲၣ်. အဝဲတဲဝဲလၢ “ယလဲၤထီၣ်တၢ်အိၣ်ဖှိၣ်လၢ တၢ်အိၣ်ဖှိၣ်လီၢ်အဃိ ယထံၣ်ဘၣ်လၢ ယဟိဝၤယွၤန့ၣ်​ အိၣ်ဒီးပှၤ ဖဲမုၢ်နံၤခံကတၢၢ်အတီၢ်ပူၤ ဒီတကတီၢ်. တကးဒံးဘၣ်​ ယဒိးန့ၢ်ဘၣ်​ တၢ်အိၣ်ဖှိၣ်သးပှၢ်တဖၣ်​ ဒီးဒီပုၢ်ဝဲၢ်မုၣ်ခွါလၢ အအိၣ်တ့ၢ်တဖၣ်​ အတၢ်ဆီၣ်ထွဲမၤစၢၤ အဃိ ယဂံၢ်ယဘါထီၣ်.”

ပဒီပုၢ်ဝဲၢ်မုၣ်ခွါလၢ ဟီၣ်ခိၣ်ဒီဘ့ၣ်န့ၣ်​ အဝဲသ့ၣ်​ က့ၤထီၣ်ဘၣ်က့ၤ တၢ်အိၣ်ဖှိၣ်လၢ တၢ်အိၣ်ဖှိၣ်လီၢ်အဃိ အဝဲသ့ၣ်သးခုဒိၣ်မး. သုဟ့ၣ်တၢ်မၤဘူၣ်​ ဒီးသုဟ့ၣ်တၢ်မၤဘူၣ်လၢ online လၢ donate.jw.org အဃိ ပစံးဘျုးဘၣ်သုဒိၣ်မး. တၢ်မၤဘူၣ်တဖၣ်အံၤန့ၣ်​ ဆီၣ်ထွဲဝဲ တၢ်ဘူၣ်တၢ်ဘါလၢအမ့ၢ်အတီ ဒီးမၤစၢၤဝဲ ပှၤထီၣ်တၢ်အိၣ်ဖှိၣ်တဖၣ်​ ဒ်သိးကထီၣ်ဘၣ်​ တၢ်အိၣ်ဖှိၣ်မုာ်မုာ် ဒီးဒ်သိးတၢ်ဆါ သုတဘၣ်ကူဘၣ်ဂာ်အဝဲသ့ၣ်တဂ့ၤအဂီၢ်.