တၢ်မၤလိ ၁၈
ကဲယွၤအတံၤသကိး လီၤထူလီၤယိာ်တက့ၢ်!
ဒ်သိးကဒီတံၤဒီသကိးလိာ်သးအဂီၢ် ဘၣ်ဂုာ်ကျဲးစၢး; တၢ်ရ့လိာ်မုာ်လိာ်ကဂၢၢ်ကျၢၤအဂီၢ် ဘၣ်ဂုာ်ကျဲးစၢး. နဂုာ်ကျဲးစၢးကဲထီၣ်ယွၤအတံၤသကိးဒီး ဒုးအိၣ်ဂၢၢ်ကျၢၤတၢ်ရ့လိာ်မုာ်လိာ်အဃိ နကဒိးန့ၢ်ဘၣ် တၢ်ဆိၣ်ဂၤအထူးအတီၤလီၤ. ယ့ၣ်ၡူးစံးဘၣ်ပှၤလၢ အစူၢ်က့ၤနာ်က့ၤအီၤတဖၣ်လၢ, “တၢ်မ့ၢ်တၢ်တီန့ၣ် ကမၤထူၣ်ဖျဲးသုလီၤ.” (ယိၤဟၣ် ၈:၃၂) တၢ်န့ၣ် အဲၣ်ဒိးစံးဝဲမနုၤလဲၣ်?
နဒိးန့ၢ်တၢ်သဘျ့သ့ခဲအံၤလီၤ. နထူၣ်ဖျဲးနဲသ့လၢ တၢ်သိၣ်လိသီလိအကမၣ် ဒီးတၢ်ကဘျံးကဘျၣ်တဖၣ် လၢမုၣ်ကီၤလံၢ်ရၤလီၤအီၤန့ၣ်လီၤ. နထူၣ်ဖျဲးနဲသ့လၢ တၢ်မၤအသးဒီးပှၤအကကွဲၢ် လၢတသ့ၣ်ညါယဟိဝၤ ဒီးအတၢ်မုၢ်လၢ်တအိၣ်တဖၣ်န့ၣ်လီၤ. (ရိမ့ၤ ၈:၂၂) ယွၤအတံၤသကိးတဖၣ်န့ၣ် ထူၣ်ဖျဲးလၢ ‘တၢ်ပျံၤတၢ်သံ’ ဒၣ်လဲာ်န့ၣ်လီၤ.—ဧ့ၤဘြံၤ ၂:၁၄, ၁၅.
လၢကစၢ်ယွၤအဟီၣ်ခိၣ်အသီပူၤန့ၣ် နကဒိးန့ၢ်တၢ်သဘျ့. တၢ်သဘျ့လၢ နကဒိးန့ၣ်ဘၣ် လၢခါဆူညါန့ၣ် ဂ့ၤဝဲမုာ်ဝဲဒိၣ်မးနာ်လဲၣ်! လၢဟီၣ်ခိၣ်အပၤရဒံစူးအပူၤန့ၣ် နကပူၤဖျဲးနဲလၢ တၢ်ဒုးတၢ်ယၤ, တၢ်ဆူးတၢ်ဆါ, တၢ်အၢတၢ်သီန့ၣ်လီၤ. ဖဲန့ၣ် တၢ်ပူၤဖျဲးလၢ တၢ်ဖှီၣ်တၢ်ယာ်ဒီးတၢ်သၣ်ဝံၤလီၤဒိ, တၢ်ပူၤဖျဲးလၢ တၢ်သူၣ်ပှၢ်သးပှၢ်ဒီးတၢ်သံ, တၢ်ပူၤဖျဲးလၢ တၢ်ပျံၤတၢ်ဖုး, တၢ်ဆီၣ်ဘံၣ်ဆီၣ်ဘၢ ဒီးတၢ်တတီတလိၤတဖၣ် ကအိၣ်ထီၣ်ဝဲလီၤ. ဘၣ်ဃးဒီးကစၢ်ယွၤန့ၣ် လံာ်စီဆှံပာ်ဖျါထီၣ်ဒ်အံၤလီၤ. “နသလၣ်ထီၣ်နစု, ဒီးကယဲၢ်တၢ်သးအဆၢတၢ်န့ၣ် နဟ့ၣ်လီၤလီၤ.”—စံးထီၣ်ပတြၢၤ ၁၄၅:၁၆.
ယွၤအတံၤသကိးတဖၣ် ကမူဝဲလီၤထူလီၤယိာ်လီၤ. တၢ်မူအထူအယိာ်စံးတၢ်န့ၣ် မ့ၢ်တၢ်ဆိၣ်ဂ့ၤအထူးအတီၤတခါလၢ ယွၤကဟ့ၣ်ပှၤခဲလၢာ် လၢအဂုာ်ကျဲးစၢးကဲထီၣ်အတံၤသကိးန့ၣ်လီၤ. (ရိမ့ၤ ၆:၂၃) သးသမူလၢအကတၢၢ်တအိၣ် ကဒုးအိၣ်ထီၣ်တၢ်မနုၤတဖၣ် လၢနဂီၢ်လဲၣ်န့ၣ် ကွၢ်ဆိကမိၣ်အီၤတက့ၢ်.
တၢ်ဆၢကတီၢ်ကအိၣ်ဝဲလၢ နကမၤတၢ်အါမံၤအဂီၢ်န့ၣ်လီၤ. ဘၣ်တဘၣ် နသးကအိၣ်မၤလိတၢ်ဒ့တၢ်အူတမၠိမၠိန့ၣ်လီၤ. နကသးအိၣ်မၤလိ နထုးတၢ်ဂီၤကသ့အဂီၢ်, မ့တမ့ၢ်, နကကဲထီၣ်ပှၤစုသ့အိၣ်တဂၤလၢအဘှီတၢ် စ့ၢ်ကီးလီၤ. ဘၣ်တဘၣ် နကသးအိၣ်ဂုာ်မၤလိ ဆၣ်ဖိကီၢ်ဖိတဖၣ်, မ့တမ့ၢ်, သ့ၣ်ထူၣ်ဝၢ်ထူၣ်တဖၣ် အဂ့ၢ်လီၤ. ဒ်န့ၣ်မးမ့တမ့ၢ်သၢပျၢၤ, တၢ်မၤအသးသ့တမံၤန့ၣ် နကအဲၣ်ဒိးဟးဝ့ၤဝီၤကွၢ် ထံကီၢ်ဒီးပှၤကလုာ်တဖၣ်န့ၣ်လီၤ. နမ့ၢ်မၤန့ၢ်ဃာ်တၢ်မူအထူအယိာ်န့ၣ် တၢ်တဖၣ်အံၤ နမၤကသ့ခဲလၢာ်န့ၣ်လီၤ!
တၢ်ဆၢကတီၢ်ကအိၣ်ဝဲလၢ နကရ့လိာ်နသးဒီးပှၤအါဂၤလီၤ. လၢတၢ်အိၣ်မူလီၤထူလီၤယိာ်အပူၤန့ၣ် နသ့ၣ်ညါသ့ၣ်ခိးပှၤလၢအဟဲကဲထီၣ် ကစၢ်ယွၤအတံၤသကိးတဖၣ် ကသ့လီၤ. နကသ့ၣ်ညါထီၣ် အဝဲသ့ၣ်အတၤလၣ်ဒီး အတၢ်သ့တၢ်ဘၣ်တဖၣ် ဒီးအဝဲသ့ၣ်တဖၣ်စ့ၢ်ကီး ကကဲထီၣ်နတံၤသကိးလီၤ. နကအဲၣ်အဝဲသ့ၣ်ဒီး အဝဲသ့ၣ်စ့ၢ်ကီး ကအဲၣ်နၤလီၤ. (၁ ကရံၣ်သူး ၁၃:၈) တၢ်ဒိးန့ၣ် သးသမူလၢအကတၢၢ်တအိၣ်ဘၣ်အဃိ နကန့ၢ်ဘၣ် တၢ်ရ့တံၤရ့သကိးဒီး ပှၤအိၣ်လၢဟီၣ်ခိၣ်ချၢခဲလၢာ်န့ၣ်လီၤ. အဂ့ၤကတၢၢ်တခီမ့ၢ်ဝဲ နတၢ်ကဲထီၣ်ဘၣ်ယဟိဝၤအတံၤသကိးအံၤ ကယၤနံၣ်တဖၣ်လဲၤပူၤကွံာ်ဒၣ်လဲာ် ကဒံးယံာ်ဒံးဂၢၤကျၢၤဝဲန့ၣ်လီၤ. မ်နကမ့ၢ်ယွၤအတံၤသကိး လီၤထူလီၤယိာ်တက့ၢ်!