ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါမၢ်ၡး ၆–၁၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယံးရမံယၤ ၁-၄
“ယအိၣ်ဒီးနၤ ဒ်သိးယကမၤပူၤဖျဲးနၤ”
(ယံးရမံယၤ ၁:၆) ဒီးယစံး, အၣ်လါ, ကစၢ်ဧၢ, ကွၢ်ကွၢ်, ယကတိၤတၢ်တသ့ဘၣ်. အဂ့ၢ်ဒ်အံၤ, ယမ့ၢ်ဖိသၣ်တဂၤလီၤ.
တၢး၁၁ ၃/၁၅ ကဘျံးပၤ ၂၉ အဆၢ ၄
အိၣ်ဒီးတၢ်သူၣ်ဆူၣ်သးဆူၣ် ဒ်ဝံယံးရမံယၤအသိး
၄ ဖဲယဟိဝၤယွၤ ဃုထၢထီၣ်ဝဲ ဝံယံးရမံယၤ ဒ်ပှၤခိးတၢ်ဖိတဂၤအသိးအခါ အဝဲအသးကအိၣ်ဒံးဒၣ်ထဲ ၂၅ နံၣ်ဃၣ်ဃၣ်လီၤ. (ယံးရမံယၤ ၁:၁, ၂) ဘၣ်ဆၣ် အဝဲတူၢ်ဘၣ်ဝဲလၢအမ့ၢ် ပိာ်ခွါသးစၢ်တဂၤလၢ တအိၣ်ဒီး တၢ်သ့တၢ်ဘၣ်လၢ အကကတိၤတၢ်ဒီး အံၣ်စရ့လးပှၤသးပှၢ်တဖၣ် ဒီးပှၤလၢအအိၣ်ဒီး တၢ်စိတၢ်ကမီၤတဖၣ်န့ၣ်ဘၣ်. (ယံးရမံယၤ ၁:၆) အဝဲ ကဘၣ် စံၣ်တဲၤတဲလီၤ တၢ်စံၣ်ညီၣ် အကစီၣ်လၢ အလီၤပျံၤလီၤဖုး ဒီးကဘၣ်တဲဖျါထီၣ်ဝဲ ပှၤလုၢ်တၢ်အဒိၣ်တဖၣ်. ဝံအဘျၣ်တဖၣ် ဒီးစီၤပၤတဖၣ်လၢအ “ဃၣ်ဃီၤအသးဆူ အကျဲဒၣ်ဝဲ” ဒီးအမ့ၢ်ပှၤ “လီတၢ်” ဖိတဖၣ် အတၢ်ကမၣ်န့ၣ်လီၤ. (ယံးရမံယၤ ၆:၁၃, ၈:၅, ၆) အဝဲကဘၣ် တဲဝဲ တၢ်ကစီၣ်န့ၣ်မ့ၢ်ဝဲ စီၤပၤစီၤၡလိၤမိၤ အတၢ်လုၢ်ဟံၣ်လၢ တၢ်ဘူၣ်တၢ်ဘါ အမ့ၢ်အတီ အဝဲၤလီၢ်ခိၣ်သ့ၣ်လၢ အအိၣ်ဂၢၢ်ဆိးကျၢၤတ့ၢ်ဝဲ အနံၣ် ၄၀၀ ဃၣ်ဃၣ်န့ၣ် ကဘၣ်တၢ်မၤဟးဂီၤကွံာ်အီၤလီၤ. ဒီးယရူၤၡလ့ၣ်ဒီး ယူဒၤ ကအိၣ်သယုၢ် ဒီးပှၤဝ့ၢ်ဖိတဖၣ် ကဘၣ်တၢ်စိာ်မၢကဲကုၢ်အီၤန့ၣ်လီၤ. တၢ်ကစီၣ်အံၤန့ၣ် ဝံယံးရမံယၤ ကဘၣ် ဘိးဘၣ်သ့ၣ်ညါဝဲလၢ အဆိအချ့န့ၣ်လီၤ.
(ယံးရမံယၤ ၁:၇-၁၀) ဒီးယွၤစံးဘၣ်ယၤ, စံးလၢယမ့ၢ်ဖိသၣ်န့ၣ်တဂ့ၤ. အဂ့ၢ်ဒ်အံၤ, နဘၣ်လဲၤဆူကယဲၢ်ပှၤလၢ ယမၢလီၤနၤဆူအအိၣ်, ဒီးနဘၣ်ကတိၤကယဲၢ် တၢ်လၢယမၤလိာ်နၤလီၤ. ၈ ပျံၤအမဲာ်တဂ့ၤ. အဂ့ၢ်ဒ်အံၤ, ယအိၣ်ဒီးနၤဒ်သိးယကမၤ ပူၤဖျဲးနၤလီၤ, ယွၤစံးဝဲဒၣ်. ၉ ဒီးယွၤယူာ်ထီၣ်အစု, ဒီးထိးဘၣ်ယထးခိၣ်, ဒီးယွၤစံးဘၣ်ယၤ, ကွၢ်ကွၢ်, ယပာ်တၢ်ကတိၤလၢနထးခိၣ်လံ. ၁၀ ကွၢ်ကွၢ်, တၢ်လၢမုၢ်မဆါတနံၤအံၤ, ယပာ်လီၤနၤလၢ ပှၤကလုာ်တဖၣ်အဖီခိၣ်ဒီး လၢဘီမုၢ်တဖၣ်အဖီခိၣ်, ဒ်သိးနကထဲးထီၣ်တၢ်, ဒီးမၤလီၤပှီၢ်တၢ်, ဒီးမၤဟးဂီၤတၢ်, ဒီးရူၢ်လီၤတၢ်, ဒ်သိးနကမၤထီၣ်က့ၤတၢ်, ဒီးသူၣ်တၢ်ဖျးတၢ်လီၤ.
(ယံးရမံယၤ ၁:၁၇-၁၉) ဒီးနဲဒၣ်အံၤကံၢ်တူာ်နယီၢ်ဒ့, ဒီးဂဲၤဆၢထၢၣ်, ဒီးစံးဘၣ်အီၤလၢ ကယဲၢ်တၢ်လၢ ယမၤလိာ်နၤတက့ၢ်. ပျံၤအမဲာ်တဂ့ၤ. ယကပာ်မဲာ်ဆှးဘၣ်ဖုးနၤ လၢအမဲာ်ညါလီၤ. ၁၈ ဒီးကွၢ်ကွၢ်, လၢမုၢ်မဆါတနံၤအံၤ ယပာ်နၤလၢဝ့ၢ်အိၣ်ဒီး အခိၣ်ဒူတဖျၢၣ်, ဒီးထူၣ်ထးတကျီၣ်, ဒီးအဒူၣ် တိၢ်တဒူၣ်ထီဒါ ကီၢ်ဒီဘ့ၣ်ညါ, ဒီးထီဒါယူဒၤအစီၤပၤ, ဒီးထီဒါအပဒိၣ်ဖးဒိၣ်တဖၣ်, ထီဒါအပှၤလုၢ်တၢ်အဒိၣ်, ဒီးထီဒါထံဧိၤကီၢ်ဧိၤ အပှၤဂီၢ်မုၢ်လီၤ. ၁၉ ဒီးကဒုးတၢ်ဒီးနၤ, ဒီးတမၤဃၣ်ဘၣ်နၤဘၣ်. အဂ့ၢ်ဒ်အံၤ, ယအိၣ်ဒီးနၤဒ်သိး ယကမၤပူၤဖျဲးနၤလီၤ, ယွၤစံးဝဲဒၣ်.
တၢး၀၅ ၁၂/၁၅ ကဘျံးပၤ ၂၃ အဆၢ ၁၈
နကစူၢ်ယွၤအကလုၢ်ဧါ မ့တမ့ၢ် ပှၤကညီဧါ
၁၈ ယွၤစံးဘၣ် ဝံယံးရမံယၤလၢ– “ယအိၣ်ဒီးနၤ ဒ်သိးယကမၤပူၤဖျဲးနၤလီၤ.” (ယံးရမံယၤ ၁:၈) မုၢ်မဆါတနံၤအံၤ ယဟိဝၤယွၤ ကမၤပူၤဖျဲးပှၤလၢ တၢ်နးတၢ်ဖှီၣ်အပူၤ ဒ်လဲၣ်. ဘၣ်သ့ၣ်သ့ၣ် အဝဲကဒုးအိၣ်ထီၣ် ပှၤစံၣ်ညီၣ်ကွီၢ်လၢ အစံၣ်ညီၣ်တၢ် တီတီလိၤလိၤ ဒ်စီၤကမၤလ့လးအသိးလီၤ. မ့တမ့ၢ် ကစၢ်ယွၤကမၤဝဲ ဒ်သိးပဒိၣ်လၢအဂ့ၤတဂၤ ကထီၣ်လၢပဒိၣ်လၢအအၢတဂၤအလီၢ်လီၤ. ဘၣ်ဆၣ် တဘျီတခီၣ် ယဟိဝၤယွၤ ဟ့ၣ်ဝဲအခွဲးလၢ အပှၤဂီၢ်မုၢ်တဖၣ် ကဆဲးတူၢ်ဘၣ် တၢ်နးတၢ်ဖှီၣ်လီၤ. (၂ တံၤမသ့း ၃:၁၂) ကစၢ်ယွၤ မ့ၢ်ဟ့ၣ်ဝဲအခွဲးဒ်အံၤ သနာ်က့ ထီဘိန့ၣ် အဝဲကဟ့ၣ်ပှၤ တၢ်ဂံၢ်တၢ်ဘါလၢ ပတူၢ်တၢ်ကန့ၢ်အဂီၢ်လီၤ. (၁ ကရံၣ်သူး ၁၀:၁၃) ကစၢ်ယွၤ မ့ၢ်ဟ့ၣ်အခွဲး ဒ်လဲၣ်ဒ်လဲၣ်သနာ်က့ ပှၤလၢအထီဒါ ကစၢ်ယွၤ အပှၤဂီၢ်မုၢ်န့ၣ် မ့ၢ်ဒၣ်အထီဒါ ကစၢ်ယွၤအဃိ ပနာ်သ့သပှၢ်ကတၢၢ်လၢ အကတၢၢ်န့ၣ် အဝဲသ့ၣ်ကၡူဝဲလီၤ.
jr ကဘျံးပၤ ၈၈ အဆၢ ၁၄-၁၅
“ယဒုးကျၢၤထီၣ် ကယဲၢ်ပှၤအသးလၢ တၢ်ဘှံးအသး”
မ့ၢ်နကဒုးကျၢၤထီၣ် ပှၤလၢတၢ်ဘှံးအသးတဖၣ်ဧါ
၁၄ ပာ်သူၣ်ပာ်သးလၢ ဝံယံးရမံယၤ ဘၣ်တၢ်ဟ့ၣ်ဂံၢ်ဟ့ၣ်ဘါအီၤဒ်လဲၣ် ဒီးအဝဲ ဟ့ၣ်ဂံၢ်ဟ့ၣ်ဘါ ပှၤလၢ “တၢ်ဘှံးအသး” ဒ်လဲၣ်န့ၣ်တက့ၢ်. (ယံးရမံယၤ ၃၁:၂၅) ဝံယံးရမံယၤ ဒိးန့ၢ်ဘၣ်ဝဲ တၢ်ဟ့ၣ်ဂံၢ်ဟ့ၣ်ဘါ လီၤလီၤဆီဆီလၢ ယဟိဝၤယွၤအအိၣ်လီၤ. ဆိကမိၣ်ကွၢ် ယဟိဝၤယွၤ မ့ၢ်စံးဘၣ်နၤလၢ– “ယပာ်နၤလၢ ဝ့ၢ်အိၣ်ဒီး အခိၣ်ဒူတဖျၢၣ် . . . ဒီးကဒုးတၢ်ဒီးနၤ, ဒီးတမၤဃၣ်ဘၣ်နၤဘၣ်. အဂ့ၢ်ဒ်အံၤ, ယအိၣ်ဒီးနၤ ဒ်သိးယကမၤပူၤဖျဲးနၤလီၤ” န့ၣ်တက့ၢ်. (ယံးရမံယၤ ၁:၁၈, ၁၉) အဃိ ဝံယံးရမံယၤ စံးဝဲလၢ ယဟိဝၤယွၤမ့ၢ် “ယဂံၢ်ယဘါ, ယတိာ်ယတာ်, ယအိၣ်တဒၢအလီၢ်လၢ တၢ်မၤကိၢ်မၤဂီၤအမုၢ်နံၤ” န့ၣ်မ့ၢ်တၢ်လၢ အကြၢးဝဲဘၣ်ဝဲန့ၣ်လီၤ.—ယံးရမံယၤ ၁၆:၁၉.
၁၅ ဖဲယဟိဝၤစံးဘၣ် ယံးရမံယၤလၢ “ယအိၣ်ဒီးနၤ” အခါ အဝဲကသးခု ဆံးဒိၣ်လဲၣ်. ဒ်တၢ်ကတိၤအံၤ ပာ်ဖျါဝဲအသိး ဖဲပဒီပုၢ်ဝဲၢ်တဖၣ် လိၣ်ဘၣ်တၢ်ဟ့ၣ်ဂံၢ်ဟ့ၣ်ဘါအခါ ပမၤစၢၤအီၤကသ့ဒ်လဲၣ်. နကသ့ၣ်ညါလၢ နဒီပုၢ်ဝဲၢ်မုၣ် ဒီပုၢ်ဝဲၢ်ခွါတဖၣ် ကလိၣ်ဘၣ် တၢ်မၤစၢၤလီၤ. တမ့ၢ်ထဲ ပကဘၣ်သ့ၣ်ညါ အတၢ်လိၣ်ဘၣ်ဧိၤဘၣ်, ပကဘၣ် မၤစၢၤအနီၢ်ကီၢ်လီၤ. ဖဲဝံယံးရမံယၤ ထံၣ်ဘၣ်တၢ်ကီတၢ်ခဲ အါဘျီန့ၣ် ယဟိဝၤယွၤ အိၣ်ဒီးအီၤအဃိ အဝဲအိၣ်ဒီး တၢ်ဂံၢ်တၢ်ဘါလီၤ. ဒ်န့ၣ်အသိး ပဝဲစ့ၢ်ကီး ပကြၢးအိၣ်လၢ ပှၤလၢအလိၣ်ဘၣ် တၢ်မၤစၢၤ အကပၤလီၤ. ဝံၤဒီး ပဟ့ၣ်ဂံၢ်ဟ့ၣ်ဘါအီၤ လၢတၢ်ကတိၤ တထံၣ် ခံထံၣ်သ့ဝဲလီၤ. ပမ့ၢ်ဆိကမိၣ်ထံတၢ် ဝံၤမး ပမ့ၢ်တဲအီၤန့ၣ် ကကဲထီၣ်တၢ်ဂံၢ်တၢ်ဘါလီၤ. တမ့ၢ်လၢ နကဘၣ်တဲတၢ်အါအါဘၣ်. သူတၢ်ကတိၤ ယိယိဖိတဖၣ်လၢ အပာ်ဖျါထီၣ် တၢ်သးအိၣ်အီၤ, သူၣ်ကိၢ်သးဂီၤန့ၢ်တၢ်လၢအဂီၢ် ဒီးပာ်ဖျါထီၣ် ခရံာ်ဖိတၢ်အဲၣ်တၢ်ကွံန့ၣ်တက့ၢ်. တၢ်ကတိၤ ဒ်အံၤန့ၣ် အဘျုးအိၣ်ဝဲဒိၣ်မးလီၤ.—ဖး ကတိၤဒိ ၂၅:၁၁ တက့ၢ်.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယံးရမံယၤ ၂:၁၃) အဂ့ၢ်ဒ်အံၤ, ယပှၤဂီၢ်မုၢ်မၤတၢ်အၢခံမံၤ, လဲၤသဒၣ်ယၤ, ထံမူအထံထီၣ်ပၢၢ်, ဒီးကျိးန့ၢ်ကမါလၢအဂီၢ်ဒၣ်ဝဲ, ကမါသ့ၣ်ဖးလၢအဟံးဃာ်ထံတသ့ဘၣ်.
(ယံးရမံယၤ ၂:၁၈) ဒီးခဲကနံၣ်အံၤ, တၢ်ဘၣ်ဃးဒီးနၤလၢ အဲၤကူပတူးအကျဲဒ်သိး နကအီၡံဃိၢ်အထံန့ၣ် မ့ၢ်မနုၤတမံၤလဲၣ်. ဒီးတၢ်ဘၣ်ဃးဒီးနၤလၢအၤၡူၢ်အကျဲ, ဒ်သိးနကအီထံမိၢ်ပှၢ်အထံန့ၣ် မ့ၢ်မနုၤတမံၤလဲၣ်.
တၢး၀၇ ၃/၁၅ ကဘျံးပၤ ၉ အဆၢ ၈
လံာ်စီဆှံ အတၢ်ပာ်ဖျါလၢ လံာ်ယံးရမံယၤ
၂:၁၃, ၁၈. ပှၤအံၣ်စရ့လးဖိလၢ အတအိၣ်ဒီးတၢ်သးတီတဖၣ် မၤကမၣ်တၢ်ခံမံၤလီၤ. အဝဲသ့ၣ် ပာ်တ့ၢ်ကွံာ်ဝဲ ယဟိဝၤယွၤလၢ အဆိၣ်ဂ့ၤအီၤ, ဟံးစုနဲၣ်ကျဲအီၤ ဒီးဒီသဒၢအီၤန့ၣ်လီၤ. အဝဲသ့ၣ် လဲၤမၤဃူမၤဖိးတၢ်ဒီး အဲၤကူပတူး ဒီးအၤၡူၢ်န့ၣ် လီၤဂာ်ဒ် အခူၣ်ဝဲ ကမါလၢ အနီၢ်ကစၢ်အဂီၢ်ဒၣ်ဝဲန့ၣ်လီၤ. မုၢ်မဆါတနံၤအံၤ ပှၤအါဂၤ ပာ်တ့ၢ်ကွံာ်ယွၤ မ့ၢ်လၢ ဟီၣ်ခိၣ်ဖိ အတၢ်ကူၣ်ဘၣ်ကူၣ်သ့, အတၢ်ထံၣ်ဒီး ထံဂ့ၢ်ကီၢ်ဂ့ၢ်အဃိလီၤ. အဝဲသ့ၣ် လီၤဂာ်ဒ် ပာ်တ့ၢ်ကွံာ် “ထံမူအထံထီၣ်ပၢၢ်” ဒီးခူၣ်ဝဲ “ကမါသ့ၣ်ဖးလၢ အဟံးဃာ်ထံတသ့ဘၣ်” အသိးန့ၣ်လီၤ.
(ယံးရမံယၤ ၄:၁၀) တုၤနုၤတစုယစံး, အၣ်လါ, ကစၢ်ယွၤဧၢ, မ့ၢ်မးနလီန့ၢ်ပှၤဂီၢ်မုၢ်အံၤ ဒီးပှၤယရူၤၡလ့ၣ်ဖိဒိၣ်မးလီၤ. နစံးသုကအိၣ်ဒီးတၢ်ဃူတၢ်ဖိးဘၣ်ဆၣ်ဒီး, နးဧိၤဘီဧိၤနုာ်ပၢၢ်လၢအသးလီၤ.
တၢး၀၇ ၃/၁၅ ကဘျံးပၤ ၉ အဆၢ ၄
လံာ်စီဆှံ အတၢ်ပာ်ဖျါလၢ လံာ်ယံးရမံယၤ
၄:၁၀; ၁၅:၁၈— ယဟိဝၤယွၤ လီန့ၢ်အပှၤဂီၢ်မုၢ်န့ၣ် အဲၣ်ဒိးစံးဝဲတၢ်မနုၤလဲၣ်. လၢဝံယံးရမံယၤ အစိၤန့ၣ် “ဝံတဖၣ်လၢ အကတိၤတၢ်လၢဝံကျိာ် ကဘျံးကဘျၣ်” အိၣ်ဝဲလီၤ. (ယံးရမံယၤ ၅:၃၁; ၂၀:၆; ၂၃:၁၆, ၁၇, ၂၅-၂၈, ၃၂) ဖဲအဝဲသ့ၣ် စံၣ်တဲၤတဲလီၤတၢ်ကစီၣ် ကဘျံးကဘျၣ်အခါ ယဟိဝၤယွၤ တတြီအဝဲသ့ၣ်ဘၣ်.
တၢ်ဖးလံာ်စီဆှံ
(ယံးရမံယၤ ၄:၁-၁၀) နမ့ၢ်ဟဲက့ၤကဒါက့ၤ, အံၣ်စရ့လးဧၢ, ယွၤစံးဝဲဒၣ်, ဟဲက့ၤဆူယအိၣ်တက့ၢ်. ဒီးနမ့ၢ်ပာ်ကွံာ် နတၢ်သးဘၣ်အၢလၢယမဲာ်ညါဒီး, တၢ်တသုးကွံာ်နလီၢ်ဘၣ်. ၂ ဒီးနကဆိၣ်တၢ်, ယွၤမူဝဲ, လၢတၢ်မ့ၢ်တၢ်တီ, လၢတၢ်စံၣ်ညီၣ်တီ, ဒီးလၢတၢ်တီတၢ်လိၤအပူၤ, ဒီးပှၤကလုာ်တဖၣ်န့ၣ် ကဆိၣ်ဂ့ၤလီၤအသးလၢ ယွၤအပူၤ, ဒီးကပာ်ကဖိအသးလၢအပူၤလီၤ. ၃ အဂ့ၢ်ဒ်အံၤ, ယွၤစံးလၢယူဒၤဒီး ယရူၤၡလ့ၣ်အပှၤကညီဒ်အံၤ, ထဲၣ်ထီၣ်သုဟီၣ်ခိၣ်လၢ အဘၣ်တၢ်ထဲၣ်အီၤတက့ၢ်. ဒီးဖှံတၢ်လၢတၤဆှုၣ်အကျါတဂ့ၤ. ၄ ကူးတရံးလီၤသုသးလၢယွၤအဂီၢ်, ဒီးသုးကွံာ်သုသးအဖံးန့ၣ်တက့ၢ်. ယူဒၤအပှၤကညီ, ဒီးယရူၤၡလ့ၣ်အဝ့ၢ်ဖိသ့ၣ်ဧၢ, ယသးထီၣ် ကဟဲဘၣ်ဖုးဒ် မ့ၣ်အူအသိး, ဒီးကအီၣ်တၢ်တုၤ ပှၤမၤလီၤပံာ်အီၤ တသ့ဘၣ်နီတဂၤဘၣ်, လၢသုမၤတၢ်အၢအဃိလီၤ. ၅ ဒုးစံၣ်တဲၤတဲလီၤတၢ်လၢယူဒၤအပူၤ, ဒီးဒုးနၢ်ဟူတၢ်လၢယရူၤၡလ့ၣ်အပူၤ, ဒီးစံး, အူကွဲၤလၢကီၢ်ပူၤ, ကိးပသူထီၣ်, ဒီးစံး, အိၣ်ဖှိၣ်ရိဖှိၣ်, ဒီးလဲၤသကိးဆူဝ့ၢ်လၢ အအိၣ်ဝဲဒီးအခိၣ်ဒူတဖၣ်အပူၤတက့ၢ်. ၆ ယူာ်ထီၣ်သုးဖိအလၣ်လၢ စံယိၣ်တက့ၢ်. ဃ့ၢ်ထီၣ်ကွံာ်, အိၣ်ကတီၢ်တဂ့ၤ. အဂ့ၢ်ဒ်အံၤ, ယကဒုးဟဲတၢ်အၢလၢ ကလံၤစိး, ဒီးတၢ်မၤဟးဂီၤဖးဒိၣ်လီၤ. ၇ ခ့ယုၢ်ဟဲထီၣ်လၢ သဃာ်ကျါ, ဒီးပှၤမၤဟးဂီၤ ပှၤကလုာ်တဖၣ်ဟဲဝဲ, ဟးထီၣ်လံလၢအလီၢ်န့ၣ် ဒ်သိးအကမၤသယုၢ်နကီၢ်လီၤ. နခူနဝ့ၢ်ကအိၣ်သယုၢ်တုၤ ပှၤတအိၣ်ဘၣ်လၢအပူၤဘၣ်လီၤ. ၈ လၢတၢ်အံၤအဃိန့ၣ် ကံၢ်တူာ်သုယီၢ်ဒ့လၢ ထၢၣ်အတၢ်ကံးညာ်, ဒဲသုသးနါပှၢ်ဒီးဟီၣ်ပသူထီၣ်တက့ၢ်. အဂ့ၢ်ဒ်အံၤ, ယွၤအသးကဲၤထီၣ်န့ၣ် တဃၣ်ကွံာ်အသးလၢပအိၣ်ဘၣ်. ၉ ဒီးတၢ်ကမၤအသးလၢမုၢ်တနံၤန့ၣ် ယွၤစံးဝဲဒၣ်, စီၤပၤအသးကဟးဂီၤ, ဒီးပဒိၣ်ဖးဒိၣ်အသး, ဒီးပှၤလုၢ်တၢ်အဒိၣ်အသးကကတုၤ, ဒီးဝံတဖၣ်ကပာ်အသးကမၢကမၣ်လီၤ. ၁၀ တုၤနုၤတစုယစံး, အၣ်လါ, ကစၢ်ယွၤဧၢ, မ့ၢ်မးနလီန့ၢ်ပှၤဂီၢ်မုၢ်အံၤ ဒီးပှၤယရူၤၡလ့ၣ်ဖိဒိၣ်မးလီၤ. နစံးသုကအိၣ်ဒီးတၢ်ဃူတၢ်ဖိးဘၣ်ဆၣ်ဒီး, နးဧိၤဘီဧိၤနုာ်ပၢၢ်လၢအသးလီၤ.
လါမၢ်ၡး ၁၃–၁၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယံးရမံယၤ ၅-၇
“အဝဲသ့ၣ် တမၤကစၢ်ယွၤ အတၢ်ဘၣ်သးလၢၤဘၣ်”
(ယံးရမံယၤ ၆:၁၃-၁၅) အဂ့ၢ်ဒ်အံၤ, လၢအဆံးကတၢၢ် ပၢၢ်လၢအဒိၣ်ကတၢၢ်န့ၣ် ပှၤသးကွံတၢ်ကိးဂၤဒဲး, ဒီးလၢဝံဧိၤမီၣ်ဧိၤပၢၢ်လၢ ပှၤလုၢ်တၢ်အဒိၣ်န့ၣ် ပှၤမၤဒီးလီတၢ်ကိးဂၤဒဲးလီၤ. ၁၄ ဒီးမၤဘျါက့ၤကလီကလီ ယပှၤဂီၢ်မုၢ်အဖိမုၣ်အပူၤလီၢ်, ဒီးစံးဝဲ, တၢ်ဃူတၢ်ဖိး, တၢ်ဃူတၢ်ဖိးလီၤ. ဒီးတၢ်ဃူတၢ်ဖိးတအိၣ်ဘၣ်. ၁၅ တုၤအမၤတၢ်သးဘၣ်အၢဒီး, အမဲာ်ဆှးစ့ၢ်ကီးဧါ. တမ့ၢ်ဘၣ်, အမဲာ်တဆှးဘၣ်လ့ၤတက့ၤဘၣ်. ဒီးပာ်မဲာ်ဆှးအသးန့ၣ် တသ့ၣ်ညါဘၣ်ဝဲဘၣ်. မၤသးဒ်န့ၣ်ဒီး ကလီၤဃံၤလၢ ပှၤအလီၤဃံၤအကျါလီၤ. အဆၢကတီၢ်လၢ ယအိၣ်သကိးအီၤန့ၣ် အခီၣ်ကဘၣ်တိၢ်လီၤ, ယွၤစံးဝဲဒၣ်.
တၢး၈၈ ၄/၁ ကဘျံးပၤ ၁၁-၁၂ အဆၢ ၇-၈
ယံးရမံယၤ—ဝံတဂၤလၢ အဟးစံၣ်တဲၤတဲလီၤ ကစၢ်ယွၤ အတၢ်စံၣ်ညီၣ်အကစီၣ် ဒီးပှၤတဘၣ်သူၣ်ဘၣ်သးအီၤ
၇ ယဟိဝၤယွၤ စံးဝဲဒၣ်– “ကဒုးတၢ်ဒီးနၤ, ဒီးတမၤဃၣ်ဘၣ်နၤဘၣ်. အဂ့ၢ်ဒ်အံၤ, ယအိၣ်ဒီးနၤ ဒ်သိးယကမၤပူၤဖျဲးနၤလီၤ.” (ယံးရမံယၤ ၁:၁၉) ခဲအံၤ, ဘၣ်မနုၤအဃိ ပှၤယူဒၤဖိတဖၣ် ဒီးပဒိၣ်တဖၣ် အဲၣ်ဒိးဒုးတၢ်ဒီး ဝံတဂၤအံၤန့ၣ်လဲၣ်. မ့ၢ်လၢ အဝဲအတၢ်ကစီၣ်န့ၣ် ပာ်ဖျါထီၣ် အဝဲသ့ၣ် အတၢ်ကမၣ်ဒီး တၢ်ဘူၣ်တၢ်ဘါ အလုၢ်အလၢ်လၢ အမၤညီနုၢ်ဝဲ အဃိလီၤ. ဝံယံးရမံယၤ တဲဘၣ်အဝဲသ့ၣ်လိၤလိၤလၢ– “ကွၢ်ကွၢ်, ယွၤအကလုၢ် မ့ၢ်တၢ်ဒုၣ်ဒွဲၣ်အလီၢ်လၢအဂီၢ်, တဘၣ်ဘၣ်အသးလၢအီၤဘၣ်. အဂ့ၢ်ဒ်အံၤ, လၢအဆံးကတၢၢ် ပၢၢ်လၢအဒိၣ်ကတၢၢ်န့ၣ် ပှၤသးကွံတၢ်ကိးဂၤဒဲး, ဒီးလၢဝံဧိၤမီၣ်ဧိၤပၢၢ်လၢ ပှၤလုၢ်တၢ်အဒိၣ်န့ၣ် ပှၤမၤဒီးလီတၢ်ကိးဂၤဒဲးလီၤ.”—ယံးရမံယၤ ၆:၁၀, ၁၃.
၈ အဝဲသ့ၣ် တီခိၣ်ရိၤမဲဝဲ တၢ်လုၢ်ထီၣ်တၢ်လၢ ပှၤဂီၢ်မုၢ်အဂီၢ် ဘၣ်ဆၣ် မၤဝဲလၢ တၢ်သူၣ်တအိၣ် သးတအိၣ်အပူၤလီၤ. အဝဲသ့ၣ် ပာ်ဒိၣ်ဝဲတၢ်အလုၢ်အလၢ် ဒ်သိးပှၤကဘၣ်သူၣ်ဘၣ်သးန့ၣ်လီၤ. တကတီၢ်ဃီန့ၣ် တၢ်ဃူတၢ်ဖိးတအိၣ်ဝဲဘၣ်ဆၣ် ယူဒၤတၢ်ဘူၣ်တၢ်ဘါ ခိၣ်နၢ်တဖၣ် မၤဒံဝ့ၤဒံဝီၤကွံာ် ပှၤကလုာ်တဖၣ်အသး ခီဖျိစံးဝဲလၢ ပအိၣ်ဒီး “တၢ်ဃူတၢ်ဖိး, တၢ်ဃူတၢ်ဖိးလီၤ.” (ယံးရမံယၤ ၆:၁၄; ၈:၁၁) ဒီးအဝဲသ့ၣ် ဒုးနာ်န့ၢ် ပှၤဂီၢ်မုၢ်လၢ ယွၤအတၢ်ဃူတၢ်ဖိး အိၣ်ဒီးအဝဲသ့ၣ်န့ၣ်လီၤ. အဝဲသ့ၣ် ဆိကမိၣ်ဝဲလၢ တၢ်ဘၣ်ယိၣ်အလီၢ် တအိၣ်နီတမံၤဘၣ်, မ့ၢ်လၢပအိၣ်ဒီး ဝ့ၢ်စီဆှံဒီး တၢ်လုၢ်ဟံၣ်အဃိ ယွၤကဒီသဒၢပှၤလီၤ. ဘၣ်ဆၣ် ယဟိဝၤယွၤ ထံၣ်ဝဲဒ် အဝဲသ့ၣ်အသိးန့ၣ်ဧါ.
(ယံးရမံယၤ ၇:၁-၇) ယွၤအကလုၢ်လၢအဘၣ် စီၤယံးရမံယၤဒီးစံးဝဲဒၣ်, ဆၢထၢၣ်လၢယွၤအဟံၣ်အကျဲစၢၤ, ဒီးကိးထီၣ်ဖဲန့ၣ် လၢတၢ်ကတိၤအံၤ, ဒီးစံး, ၂ ကနၣ်ယွၤအကလုၢ်, ပှၤယူဒၤဖိလၢအလဲၤနုာ်ပဲတရီအံၤ ဒ်သိးသုကဘါထီၣ်ယွၤ ခဲလၢာ်သ့ၣ်ဧၢ. ၃ တၢ်သုးမုၢ်ဂီၢ်မုၢ်အယွၤ, အံၣ်စရ့လးအကစၢ်စံးဒ်အံၤ, မၤဂ့ၤထီၣ်က့ၤသုကျဲ ဒီးသုမၤတၢ်တက့ၢ်. ၄ ဒီးယကဒုးအိၣ်ဒုးဆိးသုလၢ အလီၢ်အံၤလီၤ. သန့ၤသုသးလၢတၢ်ကတိၤ ကဘျံးကဘျၣ်လၢအစံး, ယွၤအနူၢ်, ယွၤအနူၢ်, ယွၤအနူၢ်မ့ၢ်အဝဲအံၤန့ၣ်တဂ့ၤ. ၅ အဂ့ၢ်ဒ်အံၤ, သုမ့ၢ်မၤဂ့ၤထီၣ်က့ၤသုကျဲ ဒီးသုမၤတၢ်ဂ့ၤဂ့ၤကလဲာ်, သုမ့ၢ်မၤတၢ်စံၣ်ညီၣ်ပှၤတဂၤ ဒီးပှၤလၢအဃၢၤအကွီၢ်တီတီ, ၆ ဒီးသုမ့ၢ်တမၤအၢဘၣ် ပှၤတခီဘီမုၢ်ဖိ, ပှၤဖိၣ်ဃဲ, ဒီးပှၤမုၣ်ကမဲ, ဒီးမ့ၢ်တလူလီၤ တၢ်သွံၣ်လၢ အတၢ်ဒဲးဘး တအိၣ်ဘၣ်ဖဲအံၤ, ဒီးမ့ၢ်တပိာ်ဘၣ် ကစၢ်အဂၤအခံလၢ သုတၢ်အၢဒၣ်သုဝဲအဂီၢ်ဘၣ်ဒီး, ၇ ယကဒုးအိၣ်ဒုးဆိးသုလၢအလီၢ်ဖဲအံၤ, လၢကီၢ်ပူၤလၢယဟ့ၣ်လီၤ သုပၢ်လီၤစိၤလီၤထီလီၤ.
တၢး၈၈ ၄/၁ ကဘျံးပၤ ၁၂ အဆၢ ၉-၁၀
ယံးရမံယၤ—ဝံတဂၤလၢ အဟးစံၣ်တဲၤတဲလီၤ ကစၢ်ယွၤ အတၢ်စံၣ်ညီၣ်အကစီၣ် ဒီးပှၤတဘၣ်သူၣ်ဘၣ်သးအီၤ
၉ ယဟိဝၤယွၤမၢ ဝံယံးရမံယၤ အိၣ်လၢ တၢ်လုၢ်ဟံၣ်အကျဲစၢၤ ဒ်သိး အကစံးဘၣ်တဲဘၣ် ယွၤအတၢ်ကစီၣ်လၢ ပှၤလၢအဟဲလၢ တၢ်လုၢ်ဟံၣ်န့ၣ်လီၤ. အဝဲစံးဘၣ်ဝဲဒ်အံၤ– “ယကဒုးအိၣ်ဒုးဆိးသုလၢ အလီၢ်အံၤလီၤ. သန့ၤသုသးလၢ တၢ်ကတိၤ ကဘျံးကဘျၣ်လၢအစံး, ယွၤအနူၢ်, ယွၤအနူၢ်, ယွၤအနူၢ် မ့ၢ်အဝဲအံၤန့ၣ်တဂ့ၤ. . . . အတဂိာ်တသီၣ်ဘၣ်တၢ်ဘၣ်.” ပှၤယူဒၤဖိတဖၣ် ပာ်ကဖၢလၢအသးလၢ တၢ်လုၢ်ဟံၣ် တကးဘၣ် မၤတၢ်လၢ တၢ်ထံၣ်အဖီခိၣ်, တမ့ၢ်လၢ တၢ်နာ်အဃိဘၣ်. အဝဲသ့ၣ် သးပ့ၤနီၣ်ကွံာ်ဝဲ ယဟိဝၤယွၤ အတၢ်ကတိၤလၢအမ့ၢ် “မူခိၣ်မ့ၢ် ယလီၢ်ပစိာ်, ဒီးဟီၣ်ခိၣ်မ့ၢ် ယခီၣ်ယီၢ်အလီၢ်လီၤ. ဟံၣ်လၢ သုကသူၣ်လၢ ယဂီၢ်န့ၣ် မ့ၢ်အအိၣ်ဖဲလဲၣ်.” အဝဲသ့ၣ် အတၢ်လုၢ်ဟံၣ်န့ၣ် ဖျါလီၤဘီလီၤမုၢ်သနာ်က့ မ့မ့ၢ်မူဟီၣ်ကယၢ တၢ်ထီကတၢၢ်ကစၢ် ယဟိဝၤယွၤအဂီၢ် တမ့ၢ်တၢ်နီတမံၤဘၣ်လီၤ.—ယံးရမံယၤ ၇:၁-၈; ယၡါယၤ ၆၆:၁.
၁၀ ဝံယံးရမံယၤ ဆဲးတဲဝဲဒ်အံၤ “မ့ၢ်သုကဟုၣ်တၢ်, ဒီးမၤသံပှၤကညီ, ဒီးအဲၣ်ဘၢမါအဲၣ်ဘၢဝၤဒီး ဆိၣ်တၢ်တတီဘၣ်, ဒီးဆိၣ်ကဲၤတၢ်နၢမူလၢ ဘဧၤလးအဂီၢ်, ဒီးပိာ်ကစၢ်အဂၤတဖၣ် အခံလၢ သုတသ့ၣ်ညါဘၣ်အီၤ, . . . ဒီးစံး, ပပူၤဖျဲးလံ, ဒ်သိး သုကမၤတၢ်သးဘၣ်အၢအံၤ ခဲလၢာ်န့ၣ်ဧါ.” အဝဲသ့ၣ် ဆိကမိၣ်လီၤအသးလၢ အမ့ၢ်ပှၤယူဒၤဖိလၢ ယွၤဃုထၢပာ်ဝဲအဃိ မ့ၢ်မၤတၢ် ဒ်လဲၣ်ဒ်လဲၣ်သနာ်က့ ယွၤကဝံသးစူၤအီၤ ဒီးမ့ၢ်ဟ့ၣ်လုၢ်ထီၣ်တၢ်လၢ တၢ်လုၢ်ဟံၣ်န့ၣ် ယွၤဘၣ်သးအီၤ ဒီတဖုလံ. အဝဲသ့ၣ် မ့ၢ်ပာ်ဝဲ ကစၢ်ယွၤဒ် ပၢ်လၢအလူၤဘၣ် အဖိအသးအါတလၢတဂၤန့ၣ် အတၢ်ဆိကမိၣ် တပျၢ်လံန့ၣ်လီၤ.—ယံးရမံယၤ ၇:၉, ၁၀; ၂ မိၤၡ့ ၁၉:၅, ၆.
(ယံးရမံယၤ ၇:၈-၁၅) ကွၢ်ကွၢ်, သုသန့ၤသုသးလၢ တၢ်ကတိၤကဘျံးကဘျၣ် လၢအတဂိာ်တသီၣ်ဘၣ်တၢ်ဘၣ်. ၉ မ့ၢ်သုကဟုၣ်တၢ်, ဒီးမၤသံပှၤကညီ, ဒီးအဲၣ်ဘၢမါအဲၣ်ဘၢဝၤ ဒီးဆိၣ်တၢ်တတီဘၣ်, ဒီးဆိၣ်ကဲၤတၢ်နၢမူလၢ ဘဧၤလးအဂီၢ်, ဒီးပိာ်ကစၢ်အဂၤတဖၣ်အခံ လၢသုတသ့ၣ်ညါဘၣ်အီၤ, ၁၀ ဒီးဟဲဆၢထၢၣ်လၢ ယမဲာ်ညါလၢဟံၣ်ပူၤအံၤ, လၢတၢ်ကိးအီၤလၢယမံၤဒီးစံး, ပပူၤဖျဲးလံ, ဒ်သိးသုကမၤတၢ်သးဘၢအၢအံၤ ခဲလၢာ်န့ၣ်ဧါ. ၁၁ ဟံၣ်အံၤလၢတၢ်ကိးအီၤလၢ ယမံၤကဲထီၣ်တမျိၤတမျၣ် အပူၤလၢသုမဲာ်ညါစ့ၢ်ကီးဧါ. ကွၢ်ကွၢ်, ယဲဒၣ်အံၤယထံၣ်စ့ၢ်ကီးလံ, ယွၤစံးဝဲဒၣ်. ၁၂ ဒီးလဲၤတၢ်ဆူယလီၢ်လၢၡံလိၤအပူၤ, ဖဲယပာ်ယမံၤလၢအခီၣ်ထံး, ဒီးတၢ်လၢယမၤအီၤ, လၢယပှၤဂီၢ်မုၢ်အံၣ်စရ့လး အတၢ်အၢတၢ်သီအဃိန့ၣ်ကွၢ်တက့ၢ်. ၁၃ ဒီးခဲကနံၣ်အံၤ မ့ၢ်သုမၤတၢ်အံၤခဲလၢာ်ဒီး, ယွၤစံးဝဲဒၣ်, ဒီးယကတိၤတၢ်ဒီးသု, ယဂဲၤဆၢထၢၣ်ဂီၤဂီၤ, ဒီးကတိၤတၢ်, ဒီးသုတကနၣ်ဘၣ်တၢ်ဘၣ်. ဒီးယကိးထီၣ်သု, ဒီးသုတစံးဆၢဘၣ်. ၁၄ မၤသးဒ်န့ၣ်ဒီး ယကမၤဟံၣ်အံၤလၢ တၢ်ကိးလၢယမံၤ, ဖဲသုသန့ၤသုသးလၢအီၤ, တၢ်အလီၢ်လၢယဟ့ၣ်လီၤသု ဒီးသုပၢ်တဖၣ်န့ၣ်, ဒ်ယမၤၡံလိၤအသိးန့ၣ်လီၤ. ၁၅ ဒီးယကညိကွံာ်သုလၢယမဲာ်ညါ, ဒ်ယညိကွံာ်သုဒီပုၢ်ဝဲခဲလၢာ်, အ့ဖရဲၣ်အချံအသၣ် ခဲလၢာ်အသိးန့ၣ်လီၤ.
jr ကဘျံးပၤ ၂၁ အဆၢ ၁၂
တၢ်မၤကစၢ်ယွၤ အတၢ်မၤလၢ ‘မုၢ်နံၤလၢခံတဖၣ်’ အပူၤ
၁၂ စီၤယဟိၤယါကံၣ် စးထီၣ်ပၢတၢ်အခါ ယဟိဝၤယွၤမၢ ဝံယံးရမံယၤ လဲၤဆူတၢ်လုၢ်ဟံၣ်ဒီး သိၣ်ဃီၣ်ပှၤယူဒၤဖိတဖၣ်လၢ အမၤတၢ်အၢအဃိန့ၣ်လီၤ. အဝဲသ့ၣ် ပာ်ဝဲယဟိဝၤယွၤ အတၢ်လုၢ်ဟံၣ်ဒ် တၢ်လၢအဒီသဒၢအဝဲသ့ၣ်လီၤ. ဘၣ်ဆၣ် အဝဲသ့ၣ် မ့ၢ်တပာ်တ့ၢ်ကွံာ် ‘တၢ်ဟုၣ်တၢ်, တၢ်မၤသံပှၤကညီ, တၢ်အဲၣ်ဘၢမါအဲၣ်ဘၢဝၤ, တၢ်ဆိၣ်တၢ်တတီဘၣ်, တၢ်ဆိၣ်ကဲၤတၢ်နၢမူလၢ ဘဧၤလးအဂီၢ် ဒီးပိာ်ကစၢ်အဂၤတဖၣ်အခံ လၢကသ့ၣ်ညါဝဲ’ ယဟိဝၤယွၤ ကစူးကွံာ်ညိကွံာ် အတၢ်လုၢ်ဟံၣ်လီၤ. ဒ်ယဟိဝၤယွၤ စူးကွံာ်ညိကွံာ်ဝဲ ဒဲစီဆှံလၢၡံလိၤဖဲ ဝံဧ့လံၤအစိၤအသိး ပှၤလၢအပာ်မၤအသးလၢ အဘူၣ်ထီၣ်ဘါထီၣ်တၢ် ဖဲန့ၣ်တဖၣ်စ့ၢ်ကီး ကစၢ်ယွၤကမၤအီၤဒ်န့ၣ်လီၤ. ကီၢ်ယူဒၤ “ကအိၣ်သယုၢ်” ဝဲလီၤ. (ယံး. ၇:၁-၁၅, ၃၄; ၂၆:၁-၆) ဒ်သိးဝံယံးရမံယၤ ကစံၣ်တဲၤတဲလီၤ တၢ်ကစီၣ်အံၤအဂီၢ် အဝဲကလိၣ်ဘၣ် တၢ်သူၣ်ဒူသးဒူထဲလဲၣ်န့ၣ် ဆိကမိၣ်ကွၢ်တက့ၢ်. ဘၣ်သ့ၣ်သ့ၣ် အဝဲ ကဘၣ်စံၣ်တဲၤတဲလီၤ တၢ်ကစီၣ်အံၤလၢ ပှၤလၢအအိၣ်ဒီး အစိအကမီၤတဖၣ် အမဲာ်ညါလီၤ. ဒီပုၢ်ဝဲၢ်မုၣ် ဒီပုၢ်ဝဲၢ်ခွါတနီၤ တူၢ်ဘၣ်ဝဲလၢ ဖဲအစံၣ်တဲၤတဲလီၤတၢ်လၢ ကျဲဖီခိၣ်, ပှၤကဲဒိၣ်ကဲပှၢ်ဒီး ပှၤခိၣ်ဒိၣ်နၢ်လဲၢ်တဖၣ် အမဲာ်ညါအခါ အဝဲသ့ၣ်လိၣ်ဘၣ် တၢ်သူၣ်ဒူသးဒူလီၤ. ဘၣ်ဆၣ် ပနာ်သ့သပှၢ်ကတၢၢ်လၢ ဒ်ယဟိဝၤယွၤ မၤစၢၤဝံယံးရမံယၤအသိး အဝဲကမၤစၢၤပှၤစ့ၢ်ကီးလီၤ.—ဧ့ၤဘြံၤ ၁၀:၃၉; ၁၃:၆.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယံးရမံယၤ ၆:၁၆) ယွၤစံးဒ်အံၤ, ဆၢထၢၣ်လၢကျဲပူၤ, ဒီးကွၢ်တၢ်, ဒီးသံကွၢ်တၢ်လၢကျဲလီၢ်လံၤတဖၣ်အဂ့ၢ်, ကျဲအဂ့ၤန့ၣ် မ့ၢ်အအိၣ်ဖဲလဲၣ်န့ၣ်တက့ၢ်. ဒီးပိာ်ကျဲန့ၣ်တက့ၢ်. ဒီးသုကထံၣ်န့ၢ် တၢ်အိၣ်ဘှံးလၢသုသးအဂီၢ်လီၤ. ဒီးအဝဲသ့ၣ်စံးဝဲဒၣ်, ပတပိာ်ဘၣ်.
တၢး၀၅ ၁၁/၁ ကဘျံးပၤ ၂၃ အဆၢ ၁၁
မ့ၢ်နကလဲၤတၢ်ဒီးယွၤဧါ
၁၁ မ့ၢ်ယလဲၤတၢ်ဒ် ကစၢ်ယွၤ အကလုၢ်ကထါ အတၢ်ဟံးစုနဲၣ်ကျဲအသိး ကစီဒီဧါ. တဘျီတခီၣ် ပမ့ၢ်သံကွၢ်လီၤက့ၤပသး ဒ်အံၤန့ၣ် အဘျုးကအိၣ်လၢပဂီၢ်လီၤ. ပကသမံသမိးကွၢ် လံာ်စီဆှံအဆၢလၢ ကမၤစၢၤပှၤလၢအမ့ၢ်– “ယွၤစံးဒ်အံၤ, ဆၢထၢၣ်လၢကျဲပူၤ, ကွၢ်တၢ်, ဒီးသံကွၢ်တၢ်လၢ ကျဲလီၢ်လံၤတဖၣ်အဂ့ၢ်, ကျဲအဂ့ၤန့ၣ် မ့ၢ်အအိၣ်ဖဲလဲၣ်န့ၣ်တက့ၢ်. ဒီးပိာ်ကျဲန့ၣ်တက့ၢ်. ဒီးသုကထံၣ်န့ၢ် တၢ်အိၣ်ဘှံးလၢသုသးအဂီၢ်လီၤ.” (ယံးရမံယၤ ၆:၁၆) လံာ်စီဆှံတဆၢအံၤ ဒုးထံၣ်တမှံပှၤလၢ ပှၤတဂၤအိၣ်ကတီၢ်လၢ ကျဲအသဂၢၢ်ဒီး သံကွၢ်သံဒိးတၢ်လၢ အတၢ်လဲၤကျဲအဂီၢ်လီၤ. ပမ့ၢ်ကွၢ်လၢ နီၢ်သးတကပၤန့ၣ် ပှၤအံၣ်စရ့လးဖိလၢ အပူထီၣ်ယွၤတဖၣ် ကြၢးမၤဝဲဒ်န့ၣ်စ့ၢ်ကီးလီၤ. အဝဲသ့ၣ် ကဘၣ်ဃုက့ၤဝဲ “ကျဲလီၢ်လံၤတဖၣ်” လီၤ. အဝဲသ့ၣ် အဖံအဖုတဖၣ်လဲၤလၢ “ကျဲအဂ့ၤ” ဘၣ်ဆၣ် မ့မ့ၢ်အဝဲသ့ၣ်န့ၣ် ဟးဆှဲးဝဲကျဲအံၤလီၤ. လီၤသးအုးဒိၣ်မးလၢ ပှၤအံၣ်စရ့လးဖိတဖၣ်န့ၣ် အခိၣ်ကိၤဒိၣ်မးဒီး တဒိကနၣ် ကစၢ်ယွၤအတၢ်ဟ့ၣ်ပလီၢ်ဘၣ်. လံာ်စီဆှံအဆၢဖိအံၤ ဆဲးတဲဝဲလၢ– “ဒီးအဝဲသ့ၣ်စံးဝဲဒၣ် ပတပိာ်ဘၣ်.” ဘၣ်ဆၣ် မ့မ့ၢ်မုၢ်မဆါတနံၤအံၤ ကစၢ်ယွၤ အပှၤဂီၢ်မုၢ်တဖၣ်န့ၣ် တမ့ၢ်ဒ်န့ၣ်ဘၣ်.
(ယံးရမံယၤ ၆:၂၂, ၂၃) ယွၤစံးဒ်အံၤ, ကွၢ်ကွၢ်, ပှၤဂီၢ်မုၢ်ကဟဲဝဲလၢကလံၤစိး, ဒီးပှၤတကလုာ်ဖးဒိၣ် ကဂဲၤဆၢထၢၣ်လၢ ဟီၣ်ခိၣ်အကပၤလီၤ. ၂၃ ဟံးဃာ်ဝဲဒီးချံၣ်ဧိၤပျၢ်ဧိၤဒီးဘီဧိၤနးဧိၤ, အသူၣ်ကိၤအသးကိၤ, ဒီးတသးကညီၤဘၣ်တၢ်ဘၣ်. အကလုၢ်သီၣ်ရုၢ်ရုၢ်ဒ် ပီၣ်လဲၣ်အသိးန့ၣ်, ဒီးဒိးကသ့ၣ်, ကတဲာ်ကတီၤ, ဒ်ပှၤသုးဖိအသိး, ထီဒါနၤ, စံယိၣ်အဖိမုၣ်ဧၢ.
တၢး၈၈ ၄/၁ ကဘျံးပၤ ၁၃ အဆၢ ၁၅
ယံးရမံယၤ—ဝံတဂၤလၢ အဟးစံၣ်တဲၤတဲၤလီၤ ကစၢ်ယွၤ အတၢ်စံၣ်ညီၣ်အကစီၣ် ဒီးပှၤ တဘၣ်သူၣ်ဘၣ်သးအီၤ
ယူဒၤတူၢ်ဘၣ်က့ၤ တၢ်လၢအမၤဝဲ
၁၅ ဖဲ ချ.ခ.န ၆၃၂ န့ၣ်အၤၡူၢ်လီၤလၢ မၤဒဲဒီး ပှၤက့ၤစ့းဖိအစုပူၤ ဒီးကီၢ်အဲၤကူပတူးလၢ အအိၣ်လၢ ကီၢ်ယူဒၤကလံၤထံးစ့ၢ်ကီး တအိၣ်ဒီးတၢ်စိတၢ်ကမီၤလၢ ကီၢ်ယူဒၤအဖီခိၣ်လၢၤဘၣ်. လၢတၢ်န့ၣ်အဃိ တၢ်မၤပျံၤမၤဖုး ကီၢ်ယူဒၤန့ၣ် ကဟဲလၢ ကလံၤထံးတခီ သတူၢ်ကလာ်လီၤ. ဝံယံးရမံယၤ ကဘၣ်တဲဝဲ ပှၤယူဒၤဖိတဖၣ်လၢ တၢ်ကစီၣ်လၢအတမုာ်အံၤလီၤ– “ပှၤဂီၢ်မုၢ်ကဟဲဝဲလၢ ကလံၤစိး, . . . အသူၣ်ကိၤအသးကိၤ, ဒီးတသးကညီၤဘၣ်တၢ်ဘၣ်. . . . ဒီးဒိးကသ့ၣ်, ကတဲာ်ကတီၤ, ဒ်ပှၤသုးဖိအသိး, ထီဒါနၤ, စံယိၣ်အဖိမုၣ်ဧၢ.” ဖဲန့ၣ်အဆၢကတီၢ် ဘီမုၢ်လၢ အဒိၣ်စိလၢ ဟီၣ်ခိၣ်ဒီဘ့ၣ်န့ၣ် မ့ၢ်ဝဲဘၤဘူၤလိၣ်လီၤ. ယဟိဝၤယွၤ သူဝဲဘၤဘူၤလိၣ် ဒ်သိးကစံၣ်ညီၣ် ပှၤယူဒၤဖိလၢ တအိၣ်ဒီးတၢ်သးတီတဖၣ်အဂီၢ်န့ၣ်လီၤ.—ယံးရမံယၤ ၆:၂၂, ၂၃; ၂၅:၈, ၉.
တၢ်ဖးလံာ်စီဆှံ
(ယံးရမံယၤ ၅:၁-၂၆) အဂ့ၢ်ဒ်အံၤ, ပှၤတတီတလိၤဘၣ်တဖၣ် အိၣ်ဝဲလၢယပှၤဂီၢ်မုၢ်အကျါလီၤ. ခိးခူသူၣ်ဝဲဒ် ပှၤမၤန့ၢ်ထိၣ်ဧိၤလံၣ်ဧိၤအသိးန့ၣ်, ပာ်ပျံၤသကွီၤဒ်သိး အကဖီၣ်န့ၢ်ပှၤကညီလီၤ. ၂၇ ဒ်ထိၣ်အဒၢပှဲၤဝဲဒီး ထိၣ်ဧိၤလံၣ်ဧိၤအသိးန့ၣ်, အဟံၣ်ပှဲၤဝဲဒီး လီတၢ်ဝ့ၤတၢ်ဒ်န့ၣ်သိးလီၤ. မၤသးဒ်န့ၣ်ဒီးဒိၣ်ထီၣ်ဝဲ, ဒီးထူးထီၣ်တီၤထီၣ်ဝဲလီၤ. ၂၈ ဘီၣ်ထီၣ်ဝဲ, ဘျ့ကဆှၣ်ထီၣ်ဝဲ, မ့ၢ်မးအမၤတၢ်အၢန့ၣ်လုၣ်ကွံာ်လီၤ. တစံၣ်ညီၣ်ဘၣ်ပှၤအကွီၢ်, ပှၤဖိၣ်ဃဲအကွီၢ်ဘၣ်. ဘၣ်ဆၣ်ဒီးဘီၣ်ထီၣ်ညီထီၣ်ဝဲလီၤ. ဒီးပှၤဖှီၣ်ဖိယာ်ဖိအကွီၢ်န့ၣ် တစံၣ်ညီၣ်ဘၣ်ဝဲဘၣ်. ၂၉ ယကအိၣ်သကိး တၢ်လၢတၢ်န့ၣ်တဖၣ်အဃိ တမ့ၢ်ဘၣ်ဧါ. ယွၤစံးဝဲဒၣ်, ဒီးယသးကမၤဆၢတၢ်အၢလၢ ပှၤတကလုာ်ဒ်အံၤသိး, တမ့ၢ်ဘၣ်ဧါ. ၃၀ တၢ်ဒုးကတုၤပှၤသး, ဒီးတၢ်ဒုးကနိးကစုာ်တၢ်န့ၣ်မၤ အသးလၢကီၢ်ပူၤလီၤ. ၃၁ ဝံၤဧိၤမီၣ်ဧိၤကတိၤတၢ်လၢ ဝံကျိာ်ကဘျံးကဘျၣ်, ဒီးပှၤလုၢ်တၢ်အဒိၣ်ပၢတၢ်လၢအစုပူၤ, ဒီးယပှၤဂီၢ်မုၢ်အဲၣ်ဒိးတၢ်ဒ်န့ၣ်သိး, ဒီးလၢအကတၢၢ်န့ၣ်သုကမၤဒ်လဲၣ်.
(ယံးရမံယၤ ၆:၁-၅) ပှၤဘံၣ်ယၤမံၣ်ဖိသ့ၣ်ဧၢ, ဃ့ၢ်ထီၣ်ကွံာ်လၢယရူၤၡလ့ၣ်အပူၤ, ဒီးအူထီၣ်ကွဲၤလၢတကိၤအပူၤ, ဒီးပာ်တၢ်ပနီၣ်မ့ၣ်အူလၢ ဘ့ၤသဟးကၤရ့ၣ်အပူၤတက့ၢ်. အဂ့ၢ်ဒ်အံၤ, တၢ်အၢကွၢ်လီၤဝဲလၢကလံၤစိးတခီ, ဒီးတၢ်မၤဟးဂီၤဖးဒိၣ်လီၤ. ၂ ယကမၤဟးဂီၤကွံာ်စံယိၣ်အဖိမုၣ်, ပှၤအိၣ်ဒီးအဃံအလၤ, ပှၤအစၢ်လီၤ. ၃ ပှၤကွၢ်သိဖိအိၣ်ဒီး အသိအမဲာ်တဲးလဲးတဖၣ် ကဟဲဆူအအိၣ်, ကသူၣ်အဒဲအိၣ်ဝးတရံးအီၤ, ကဒုးအီၣ်အဆၣ်တဂၤလၢအလီၢ်ဒၣ်ဝဲ, တဂၤလၢအလီၢ်ဒၣ်ဝဲန့ၣ်လီၤ. ၄ ကတဲာ်ကတီၤတၢ်ဒုးသုးထီဒါအီၤ, ဂဲၤဆၢထၢၣ်, လဲၤထီၣ်သကိးဖဲမုၢ်ထူၣ်တက့ၢ်. ပဘၣ်အဖှီၣ်လီၤ. အဂ့ၢ်ဒ်အံၤ, မုၢ်ဃ့ၢ်လီၤ, မုၢ်ဟါအကဒုထုးထီထီၣ်အသးလီၤ. ၅ ဂဲၤဆၢထၢၣ်, လဲၤသကိးလၢမုၢ်နၤ, ဒီးမၤဟးဂီၤသကိး အနူၢ်ဧိၤစီၤဧိၤတဖၣ်တက့ၢ်.
လါမၢ်ၡး ၂၀–၂၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယံးရမံယၤ ၈-၁၁
“ပှၤဟီၣ်ခိၣ်ဖိတဖၣ် အတၢ်အိၣ်မူပှဲၤဒီး အခီပညီသ့ထဲလၢ ယဟိဝၤယွၤ အတၢ်ဟံးစုနဲၣ်ကျဲအဃိ”
(ယံးရမံယၤ ၁၀:၂-၅) မၤလိ ပှၤကလုာ်တဖၣ်အကျဲတဂ့ၤ. ဒီးမူခိၣ်အတၢ်လီၤလးန့ၣ် ပှၤကလုာ်တဖၣ်ပျံၤအီၤနာ်သက့ဒီး, ပျံၤသုဝဲတဂ့ၤ. ၃ အဂ့ၢ်ဒ်အံၤ, ပှၤဂီၢ်မုၢ်အလုၢ်အလၢ်န့ၣ် မ့ၢ်တၢ်ကလီကလီလီၤ. အဂ့ၢ်ဒ်အံၤ, ကူာ်လီၤဝဲလၢသ့ၣ်တထူၣ်လၢပှၢ်ကျါ, ပှၤမၤတၢ်သ့ဖိအစုစိးဝဲလၢကွါလီၤ. ၄ ဒီးကယၢကယဲဝဲလၢကျိၣ်ဧိၤစ့ဧိၤ, ဒီးထူဧိၤလွဲဧိၤ, မၤဃာ်ဝဲလၢပနဲာ်ထးဒီးခံၣ်ခူၣ်, ဒ်သိးအသုတဟူးဝးတဂ့ၤ. ၅ အိၣ်ထူၣ်ကလာ်ဒ် သ့ၣ်စူၣ်ပလိၣ်အသိးဘၣ်ဆၣ်ဒီး, ကတိၤတၢ်တသ့ဘၣ်, ပှၤဘၣ်စိာ်အီၤလီၤ. အဂ့ၢ်ဒ်အံၤ, လဲၤတၢ်တသ့ဘၣ်. ပျံၤအီၤတဂ့ၤ. အဂ့ၢ်ဒ်အံၤ, မၤအၢတၢ်တသ့ဘၣ်, ဒီးမၤဂ့ၤတၢ်န့ၣ်တသ့စ့ၢ်ကီးဘၣ်.
(ယံးရမံယၤ ၁၀:၁၄, ၁၅) တသ့ၣ်ညါဘၣ်တၢ်ဘၣ်ဒီး, ပှၤကညီခဲလၢာ်လီၤဂာ်ဒီး ဆၣ်ဖိကီၢ်ဖိလီၤ. ကယဲၢ်ပှၤသိတၢ်ဖိအတၢ်ဂီၤန့ၣ် ဒုးမဲာ်ဆှးအမဲာ်လီၤ. အဂ့ၢ်ဒ်အံၤ, အတၢ်ဂီၤသိအသး မ့ၢ်တၢ်ကဘျံးကဘျၣ်, ဒီးအသါတအိၣ်ဘၣ် လၢအပူၤဘၣ်. ၁၅ မ့ၢ်တၢ်ကလီကလီ, တၢ်ဒုၣ်ဒွဲၣ်အလီၢ်လီၤ. တုၤတၢ်အိၣ်သကိးအီၤဒီး, ကဟးဂီၤဝဲလီၤ.
it-1 ကဘျံးပၤ ၅၅၅
ဒံမုၢ်သၣ်
ပှၤဘါတၢ်ဂီၤတၢ်ဖှီၣ်တဖၣ် အတၢ်ဂီၤန့ၣ် ဝံယံးရမံယၤ ထိၣ်သတြီၤဝဲဒီး တၢၣ်အထူၣ်, ဝၣ်ဘိ, “တၢ်ဂီၤတဖၣ်လၢ အမၤပျံၤထိၣ်ဧိၤလံၣ်ဧိၤ လၢတၢ်ပာ်လီၤအီၤလၢ ဒံမုၢ်သၣ်အပျီ” န့ၣ်လီၤ.—ယံးရမံယၤ ၁၀:၅, ခ့ခါစှီၤကျိာ်.
(ယံးရမံယၤ ၁၀:၆, ၇) မ့ၢ်မးတၢ်လီၤဂာ်လၢနၤတအိၣ်ဘၣ်, ယွၤဧၢ, နမ့ၢ်တၢ်အဒိၣ်, ဒီးနမံၤဒိၣ်ဝဲလၢ တၢ်အစိကမီၤအဃိလီၤ. ၇ ပှၤလၢအတပျံၤဘၣ်နၤ, ပှၤကလုာ်တဖၣ်အစီၤပၤဧၢ, မ့ၢ်မတၤတဂၤလဲၣ်. အဂ့ၢ်ဒ်အံၤ, တၢ်ပျံၤကြၢးဒီးနၤလီၤ. အဂ့ၢ်ဒ်အံၤ, လၢပှၤကူၣ်တၢ်သ့ခဲလၢာ် လၢပှၤကလုာ်တဖၣ်အကျါ, ဒီးလၢအဘီအမုၢ်ခဲလၢာ်အပူၤန့ၣ် တၢ်လီၤဂာ်ဒီးနၤတအိၣ်ဘၣ်.
(ယံးရမံယၤ ၁၀:၁၀-၁၃) မ့မ့ၢ်ယွၤမ့ၢ်ကစၢ်အမ့ၢ်အတီလီၤ. အဝဲဒၣ်မ့ၢ်ကစၢ်လၢအမူဝဲ, ဒီးစီၤပၤအထူအယိာ်လီၤ. ဟီၣ်ခိၣ်ကဟူးဝးလၢအသးထီၣ်အဃိ, ဒီးပှၤကလုာ်တဖၣ် အိၣ်ဝဲလၢ အသးကဲၤထီၣ်အမဲာ်ညါတကဲဘၣ်. ၁၁ သုဘၣ်စံးဘၣ်အီၤဒ်အံၤ, ကစၢ်တဖၣ်လၢ အတတ့လီၤ မူခိၣ်ဒီးဟီၣ်ခိၣ်န့ၣ် ကဟါမၢ်လၢဟီၣ်ခိၣ်ချၢ, ဒီးလၢမူခိၣ်အံၤအဖီလာ်လီၤ. ၁၂ တ့လီၤဝဲဟီၣ်ခိၣ်လၢအစိကမီၤ, မၤကျၢၤလၢာ်ခိၣ်လၢအတၢ်ကူၣ်သ့, ဒီးသလၣ်ထီၣ်မူခိၣ်လၢ အတၢ်ကူၣ်တၢ်ဆးလီၤ. ၁၃ တုၤအကလုၢ်သီၣ်ဒီး, ထံဂီၢ်မုၢ်အိၣ်ဝဲလၢမူကပိာ်လိၤ, ဒီးဒုးဟဲထီၣ်တၢ်ဘှ့ၣ်လၢ ဟီၣ်ခိၣ်အကတၢၢ်န့ၣ်လီၤ. တ့လီဝၢ်ဒံးအိၣ်ဒီးတၢ်စူၤ, ဒီးဟဲစိာ်ကလံၤလၢ အတၢ်ပာ်ဖှိၣ်အလီၢ်လီၤ.
တၢး၀၄ ၁၀/၁ ကဘျံးပၤ ၁၁ အဆၢ ၁၀
မုၢ်မဆါတနံၤအံၤ မတၤတဖၣ် မၤလၤကပီၤ ယဟိဝၤယွၤလဲၣ်
၁၀ နမ့ၢ်ကွၢ်ထီၣ်တၢ်ဆူ မူခိၣ်မ့ၢ်ဂ့ၤ, တၢ်ဘၣ်တ့လၢ ဟီၣ်ခိၣ်ချၢမ့ၢ်ဂ့ၤ တၢ်အုၣ်အသးအိၣ်ဖျါဝဲလၢ တၢ်ဘၣ်တ့ကစၢ်အိၣ်ဝဲလီၤ. (ယံးရမံယၤ ၁၀:၁၂) ပကြၢးတူၢ်လိာ် တၢ်ဘၣ်တ့လၢမူခိၣ်တဖၣ် အတၢ်ကတိၤလၢ အစံးဝဲ “ယွၤပကစၢ်ဧၢ, နဂ့ၤဒိးန့ၢ်တၢ်လၤကပီၤ, ဒီးတၢ်ယူးတၢ်ယီၣ်, ဒီးတၢ်စိတၢ်ကမီၤလီၤ. အဂ့ၢ်ဒ်အံၤ, နတ့လီၤတၢ်ခဲလၢာ်, ဒီးမ့ၢ်နသးအိၣ်ဒီး, ကဲထီၣ်ဝဲ, ဒီးဘၣ်တၢ်တ့လီၤအီၤလီၤ.” (လီၣ်ဖျါ ၄:၁၁) ဘၣ်ဆၣ် ပှၤစဲအ့ၣ်ဖိအါဂၤန့ၣ် ထံၣ်ဘၣ်ဝဲ ကစၢ်ယွၤအစုတၢ်ဘၣ်တ့ လၢအလီၤလိၢ်လီၤလးလၢ အမဲာ်ချံသနာ်က့ တၢ်အုၣ်အသးလၢ တၢ်ဘၣ်တ့ကစၢ်အိၣ်ဝဲန့ၣ် တထံၣ်ဝဲလၢ “သးအမဲာ်” ဘၣ်. (အ့းဖ့းစူး ၁:၁၈) ပဟ့ၣ်တၢ်အဒိ ဒ်အံၤသ့လီၤ. ပကမၢကမၣ်လၢ န့ဆၢၣ်အတၢ်ဃံတၢ်လၤအဃိ ဘၣ်ဆၣ် ပမ့ၢ်တနာ်လၢ တၢ်ဘၣ်တ့ကစၢ်အိၣ်ဝဲန့ၣ် လီၤဂာ်ဒ် ပကွၢ် တၢ်ဂီၤတဘ့ၣ်လၢ ပှၤတ့အီၤလၢစးခိအလိၤ ဒီးပတနာ်လၢ ပှၤတ့အီၤအိၣ်ဘၣ်န့ၣ်လီၤ. အဃိပှၤလၢ အတနာ်ကစၢ်ယွၤန့ၣ် ဘၣ်တၢ်ကိးအီၤလၢ ပှၤလၢ ‘ကတိၤပူၤဖျဲးအသးအလီၢ်တအိၣ်’ ဘၣ်န့ၣ် တလီၤကမၢကမၣ်ဘၣ်.
(ယံးရမံယၤ ၁၀:၂၁-၂၃) အဂ့ၢ်ဒ်အံၤ, ပှၤကွၢ်သိခဲလၢာ်န့ၣ် ကဲထီၣ်တၢ်လီၤဂာ်ဆၣ်ဖိကီၢ်ဖိ, ဒီးတဃုဘၣ်ယွၤဘၣ်, မၤသးဒ်န့ၣ်ဒီး တဘီၣ်ထီၣ်ညီထီၣ်ဘၣ်, ဒီးအသိတဖုလီၤပြံလီၤပြါခဲလၢာ်လီၤ. ၂၂ တၢ်အကစီၣ်သီၣ်ထီၣ်, ကွၢ်ကွၢ်, ဟဲဝဲ, ဒီးတၢ်တၢထီၣ်တၢလီၤဖးဒိၣ် လၢကီၢ်လၢကလံၤစိး ဒ်သိးအကမၤသယုၢ် ယူဒၤအဝ့ၢ်တဖၣ်, ဒီးဒုးကဲအီၤလၢထွံၣ်ဟီၣ်ခိၣ် အအိၣ်အဆိးအလီၢ်လီၤ. ၂၃ ယွၤဧၢ, ယသ့ၣ်ညါလၢပှၤကညီ တပၢဘၣ်အကျဲဘၣ်, ဒီးပှၤလၢအလဲၤတၢ်န့ၣ် စံၣ်ညီၣ်အထွဲတၢ်တသ့ဘၣ်ဝဲဘၣ်.
မ့ၢ်နသးထီၣ် ကစၢ်ယွၤဧါ
ဟီၣ်ခိၣ်အတၢ်အိၣ်အသးလၢ အလီၤသးအုးတဖၣ်အံၤ ပာ်ဖျါထီၣ်ဝဲလၢ ပှၤဟီၣ်ခိၣ်ဖိအတၢ်ပၢန့ၣ် အဘျုးတအိၣ် နီတစဲးဘၣ်. ဟီၣ်ခိၣ်အတၢ်ပၢတၢ်ပြးတဖၣ် တဒုးအိၣ်ထီၣ် တၢ်မုာ်တၢ်ခုၣ် တၢ်ဘံၣ်တၢ်ဘၢဒီး တၢ်သူၣ်ခုသးခုဘၣ်. တကးဒံးဘၣ်အမဲာ်ညါ အဝဲသ့ၣ် မၤဟးဂီၤဟီၣ်ခိၣ်လီၤ. တၢ်သ့ၣ်တဖၣ်အံၤ ပာ်ဖျါထီၣ် လံာ်စီဆှံ အတၢ်မ့ၢ်တၢ်တီလၢ အမ့ၢ် “ပှၤကညီတပၢဘၣ်အကျဲဘၣ်, ဒီးပှၤလၢအလဲၤတၢ်န့ၣ် စံၣ်ညီၣ်အထွဲတၢ် တသ့ဘၣ်ဝဲဘၣ်.” (ယံးရမံယၤ ၁၀:၂၃) ထဲဒၣ်ကစၢ်ယွၤ အတၢ်ပၢတခါဧိၤ ကဒုးအိၣ်ထီၣ် တၢ်ဃူတၢ်ဖိး, တၢ်သူၣ်ခုသးခုဒီး တၢ်ဘံၣ်တၢ်ဘၢလီၤ. မ့ၢ်လၢတၢ်အံၤ မ့ၢ်ကစၢ်ယွၤ အတၢ်တိာ်ပာ်အဃိလီၤ.—ယၡါယၤ ၄၅:၁၈.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယံးရမံယၤ ၉:၂၄) မ့မ့ၢ်ပှၤလၢအစံးထီၣ်ပတြၢၤလီၤအသးန့ၣ် မ်အစံးထီၣ်ပတြၢၤလီၤအသးလၢ အအံၤအဃိ, လၢအနၢ်ပၢၢ်ဒီး သ့ၣ်ညါယၤလၢယမ့ၢ်ယွၤ လၢအမၤတၢ်ဘျုးတၢ်ဖှိၣ်, ဒီးတၢ်စံၣ်ညီၣ်တီ, ဒီးတၢ်တီတၢ်လိၤလၢဟီၣ်ခိၣ်ချၢန့ၣ်တက့ၢ်. အဂ့ၢ်ဒ်အံၤ, ဘၣ်ယသးလၢတၢ်န့ၣ်တဖၣ်လီၤ, ယွၤစံးဝဲဒၣ်.
တၢး၁၃ ၁/၁၅ ကဘျံးပၤ ၂၀ အဆၢ ၁၆
ဆဲးသုးဘူးနသးဆူ ယဟိဝၤယွၤအအိၣ်
၁၆ ပမ့ၢ်အိၣ်ဒီး တၢ်ပာ်ကဖၢလၢသးလၢ ကျဲလၢအဘၣ်န့ၣ် ဂ့ၤဝဲလီၤ. အဒိ, ပကြၢးပာ်ကဖၢလၢ ပသးလၢ ပမ့ၢ်ယဟိဝၤပှၤအုၣ်အသးအဃိလီၤ. (ယံးရမံယၤ ၉:၂၄) ပမ့ၢ်အိၣ်ဒီး တၢ်ပာ်ကဲလီၤပသးန့ၣ် ပကဆၢတဲာ်တၢ်လၢအဂ့ၤဒီး ပကဟးဆှဲးတၢ်လၢ ကမၤလီၤရၢၢ်ပသကဲာ်ပဝးလီၤ. ဘၣ်ဆၣ် ပတၢ်ထံၣ်ဒီး ပလီၢ်ပလၤတဖၣ် ပမ့ၢ်ပာ်အီၤလၢ အရ့ဒိၣ်ကတၢၢ်န့ၣ် ပယံၤထီၣ်ဒီး ယဟိဝၤယွၤသ့ဝဲလီၤ.—စံးထီၣ်ပတြၢၤ ၁၃၈:၆; ရိမ့ၤ ၁၂:၃.
(ယံးရမံယၤ ၁၁:၁၀) က့ၤကဒါက့ၤဝဲဆူ အပၢ်လၢအခီၣ်ထံးအတၢ်ကမၣ်, လၢအတဒိကနၣ်ဘၣ် ယတၢ်ကတိၤဘၣ်, ဒီးပိာ်ကစၢ်အဂၤတဖၣ်အခံ ဒ်သိးအကမၤအတၢ်လီၤ. အံၣ်စရ့လးအပှၤဟံၣ်ဖိ, ဒီးယူဒၤအပှၤဟံၣ်ဖိ, မၤဟးဂီၤလံတၢ်အၢၣ်လီၤအီလီၤ လၢယအၢၣ်လီၤအီလီၤဒီးအပၢ်လံ.
တၢး၀၇ ၃/၁၅ ကဘျံးပၤ ၉ အဆၢ ၂
လံာ်စီဆှံ အတၢ်ပာ်ဖျါလၢ လံာ်ယံးရမံယၤ
၃:၁၁-၂၂; ၁၁:၁၀-၁၂, ၁၇— ဝ့ၢ်ၡၤမရံ ပှၤဒုးအီၤလီၤဖဲ ချ.ခ.န ၇၄၀ သနာ်က့ ဖဲဝံယံးရမံယၤ ဘိးဘၣ်သ့ၣ်ညါတၢ်အခါ ဘၣ်မနုၤအဃိ တဲဃုာ်ဝဲ ကလံၤထံးအံၣ်စရ့လး အဒူၣ်တဆံအဂ့ၢ်န့ၣ်လဲၣ်. ဝ့ၢ်ယရူၤၡလ့ၣ် ဘၣ်တၢ်မၤဟးဂီၤအီၤဖဲ ချ.ခ.န ၆၀၇ န့ၣ်တမ့ၢ်ထဲ ယဟိဝၤယွၤ စံၣ်ညီၣ် ပှၤယူဒၤဖိတဖၣ်ဘၣ်, ပၣ်ဃုာ်ဒီး ပှၤအံၣ်စရ့လးဖိ ဒီတကလုာ်လီၤ. (ယဃ့းစက့လး ၉:၉, ၁၀) တကးဒံးဘၣ် ဖဲပှၤအံၣ်စရ့လးဖိ အဒူၣ်တဆံလီၤဝံၤ အလီၢ်ခံ လၢဝ့ၢ်ယရူၤၡလ့ၣ်အပူၤ ပှၤအံၣ်စရ့လးဖိ အဒူၣ်တဆံအကျါတနီၤ အိၣ်တ့ၢ်ဒံးဝဲအဃိ ကစၢ်ယွၤအဝံ တဲဃုာ်ဝဲဒီးအဝဲသ့ၣ်လီၤ.
တၢ်ဖးလံာ်စီဆှံ
(ယံးရမံယၤ ၁၁:၆-၁၆) ဒီးယွၤစံးဘၣ်ယၤ, ကိးထီၣ်တၢ်ကတိၤခဲလၢာ်အံၤ, လၢယူဒၤအဝ့ၢ်တဖၣ်အပူၤ, ဒီးလၢယရူၤၡလ့ၣ်အကျဲပူၤ. ဒီးစံး, တၢ်အၢၣ်လီၤအီလီၤ အကလုၢ်အံၤကနၣ်, ဒီးမၤအီၤတက့ၢ်. ၇ အဂ့ၢ်ဒ်အံၤ, ယအုၣ်ယသးသပှၢ်တၢၢ် ဒီးသုပၢ်လၢမုၢ်တနံၤလၢ ယဒုးဟးထီၣ်အီၤလၢ ကီၢ်အဲၤကူပတူးပၢၢ်လၢ မုၢ်မဆါတနံၤအံၤ, ယဂဲၤဆၢထၢၣ်ဂီၤဂီၤဒီး အုၣ်ယသးဒီးစံး, ကနၣ်ယကလုၢ်တက့ၢ်. ၈ ဘၣ်ဆၣ်ဒီးတကနၣ်ဘၣ်ဝဲဘၣ်, ဒီးတဒိးဘၣ်အနၢ်ဘၣ်, ဒီးလဲၤထွဲဝဲတဂၤ အသးအၢအနၢ်က့ၣ် အခံစုာ်စုာ်လီၤ. မၤသးဒ်န့ၣ်ဒီး ယဒုးဟဲဘၣ်အီၤလၢ တၢ်အၢၣ်လီၤအီလီၤ အကလုၢ်အံၤခဲလၢာ်လၢ ယမၤလိာ်လၢအဘၣ်မၤ, မ့မ့ၢ်တမၤဘၣ်ဝဲဘၣ်. ၉ ဒီးယွၤစံးဘၣ်ယၤ, တၢ်အုၣ်လီၤအအၢ အိၣ်ဝဲလၢ ယူဒၤအပှၤကညီ ဒီးပှၤယရူၤၡလ့ၣ်ဖိအကျါလီၤ. ၁၀ က့ၤကဒါက့ၤဝဲဆူ အပၢ်လၢအခီၣ်ထံး အတၢ်ကမၣ်, လၢအတဒိကနၣ်ဘၣ် ယတၢ်ကတိၤဘၣ်, ဒီးပိာ်ကစၢ်အဂၤတဖၣ်အခံ ဒ်သိးအကမၤအတၢ်လီၤ. အံၣ်စရ့လးအပှၤဟံၣ်ဖိ, ဒီးယူဒၤအပှၤဟံၣ်ဖိ, မၤဟးဂီၤလံတၢ်အၢၣ်လီၤအီလီၤ လၢယအၢၣ်လီၤအီလီၤဒီး အပၢ်လံ. ၁၁ မၤသးဒ်န့ၣ်ဒီးယွၤစံးဒ်အံၤ, ကွၢ်ကွၢ်, ယကဒုးဘၣ်အီၤလၢတၢ်အၢ, လၢအပူၤဖျဲးဝဲတသ့ဘၣ်, ဒီးမ့ၢ်ကိးထီၣ်ယၤဘၣ်ဆၣ်ဒီး, ယတကနၣ်ဘၣ်အကလုၢ်ဘၣ်. ၁၂ ဒီးယူဒၤအဝ့ၢ်တဖၣ်, ဒီးပှၤယရူၤၡလ့ၣ်ဖိ ကလဲၤကိးထီၣ်ဆူ အကစၢ်တဖၣ်လၢ အဆိၣ်ကဲၤတၢ်နၢမူလၢအဂီၢ်လီၤ. ဘၣ်ဆၣ်ဒီး လၢအတၢ်အၢအကတီၢ်န့ၣ် တအုၣ်က့ၤခီၣ်က့ၤဘၣ်အီၤဘၣ်. ၁၃ အဂ့ၢ်ဒ်အံၤ, နကစၢ်တဖၣ်အိၣ်ဝဲ ပှဲၤသိးသိးဒီးနဝ့ၢ်တဖၣ်, ယူဒၤဧၢ, ဒီးသုမၤထီၣ်တၢ်လုၢ်အလီၢ်, တၢ်မဲာ်ဆှးအလီၢ်ပှဲၤသိးသိးဒီး ယရူၤၡလ့ၣ်အကျဲတဖၣ်, တၢ်လုၢ်အလီၢ်ဒ်သိး သုကဆိၣ်ကဲၤတၢ်နၢမူလၢ ဘဧၤလးအဂီၢ်လီၤ. ၁၄ မၤသးဒ်န့ၣ်ဒီးဘါထုကဖၣ်န့ၢ် ပှၤဂီၢ်မုၢ်အံၤအဂီၢ်တဂ့ၤ. ဒီးထုထီၣ်နကလုၢ်လၢတၢ်ဃ့ကညး, ဒီးလၢတၢ်ထုကဖၣ်န့ၢ်အဂီၢ်တဂ့ၤ. အဂ့ၢ်ဒ်အံၤ, အကတီၢ်လၢအကိးထီၣ်ယၤ လၢအဘၣ်တၢ်ကိၢ်တၢ်ဂီၤအဃိဒီး, ယတကနၣ်ဘၣ်အကလုၢ်ဘၣ်. ၁၅ ပှၤလၢယအဲၣ်အီၤကမၤတၢ်လၢ ယဟံၣ်ပူၤဘၣ်မနုၤလဲၣ်. မ့ၢ်အမၤကမၣ်တၢ်ဒီးပှၤအါဂၤလီၤ. ဒီးတၢ်ညၣ်စီဆှံလဲၤပူၤကွံာ်လံလၢနအိၣ်လံ. တုၤနမၤတၢ်အၢဒီး, နသူၣ်ဖှံသးညီလီၤ. ၁၆ ယွၤကိးနမံၤလၢ သ့ၣ်စၤယံးသံကစဲာ်အဃံအလၤ, ဒီးအတၤသၣ်ဂ့ၤလီၤ. ဆိၣ်ကဲၤထီၣ်မ့ၣ်အူလၢအဖီခိၣ် အိၣ်ဒီးတၢ်အသီၣ်ဖးဒိၣ်, ဒီးအဒ့ကၢ်လီၤဝဲလီၤ.
လါမၢ်ၡး ၂၇–လါအ့ဖြ့ၣ် ၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယံးရမံယၤ ၁၂-၁၆
“ပှၤအံၣ်စရ့လးဖိတဖၣ် သးပ့ၤနီၣ်ကွံာ် ယဟိဝၤယွၤ”
(ယံးရမံယၤ ၁၃:၁-၅) ယွၤစံးဘၣ်ယၤဒ်အံၤ, လဲၤမၤန့ၢ်နဂီၢ်လၢ ယီၢ်တကိးဖှီဝါကဆှၣ် ဒီးကံၢ်တူာ်နယီၢ်ဒ့တက့ၢ်. ဒီးပာ်အီၤလၢထံကျါတဂ့ၤ. ၂ ဒီးယမၤန့ၢ်ယီၢ်တကိးတဘိ ဒ်ယွၤအကလုၢ်အသိး, ဒီးကံၢ်တူာ်ယယီၢ်ဒ့လီၤ. ၃ ဒီးယွၤအကလုၢ်ဘၣ်ယၤ ပှဲၤထီၣ်ခံဘျီတဘျီ, ဒီးစံးဝဲဒၣ်. ၄ ဟံးန့ၢ်နယီၢ်တကိးလၢ နန့ၢ်ဘၣ်အီၤလၢအအိၣ်ဝဲလၢ နယီၢ်ဒ့အလိၤ, ဒီးဂဲၤဆၢထၢၣ်လဲၤဆူဖရၤသး, ဒီးပာ်ခူသူၣ်အီၤလၢ လၢၢ်အိပူၤဖဲန့ၣ်တက့ၢ်. ၅ ဒီးယလဲၤပာ်ခူသူၣ်အီၤလၢဖရၤသး ဒ်ယွၤမၤလိာ်ယၤအသိးန့ၣ်လီၤ.
jr ကဘျံးပၤ ၅၁ အဆၢ ၁၇
ဒီသဒၢ နသးလၢအလီန့ၢ်တၢ်
၁၇ ဝံယံးရမံယၤ အမူဒါန့ၣ် ပၣ်ဃုာ်ဒီး တၢ်ဒိကနၣ် ယဟိဝၤယွၤ အတၢ်ဟံးစုနဲၣ်ကျဲစ့ၢ်ကီးလီၤ. နမ့မ့ၢ်ဘၣ်ဖုး ဝံယံးရမံယၤန့ၣ် နကတူၢ်လိာ် တၢ်ဟံးစုနဲၣ်ကျဲ ကိးမံၤဒဲးဧါ. ဘၣ်တဘျီ ယဟိဝၤယွၤမၢ ဝံယံးရမံယၤ ဟံးန့ၢ်ယီၢ်တကိးဒီး စၢထီၣ်ဝဲလၢ အယီၢ်ဒ့အလိၤဝံၤ ကစၢ်ယွၤ မၢအလဲၤဆူ ထံကျိဖရၤသးလီၤ. ပမ့ၢ်ကွၢ်လၢ ဟီၣ်ခိၣ်ဂီၤန့ၣ် အဝဲကဘၣ်လဲၤတၢ် အမံးလာ် ၃၀၀ ဃၣ်ဃၣ် (၅၀၀ ကံလိမံထၢၣ်) လီၤ. ဒီးဖဲန့ၣ် အဝဲကဘၣ်လဲၤပာ်ခူသူၣ်ဝဲ ယီၢ်တကိးလၢ လၢၢ်ကအိအပူၤဝံၤ ကဘၣ်ဟဲက့ၤဝဲဆူ ဝ့ၢ်ယရူၤၡလ့ၣ်လီၤ. ဒီးလၢခံကစၢ်ယွၤ မၢအလဲၤဟံးန့ၢ်ကဒါက့ၤ ယီၢ်တကိးအံၤလီၤ. (ဖး ယံးရမံယၤ ၁၃:၁-၉ တက့ၢ်.) လၢတၢ်န့ၣ်အဃိ အဝဲအတၢ်လဲၤခဲလၢာ်န့ၣ် ကအိၣ်ဝဲ အမံးလာ် ၁,၂၀၀ ဃၣ်ဃၣ် (၁,၉၀၀ ကံလိမံထၢၣ်) လီၤ. ဝံယံးရမံယၤ လဲၤတၢ်ယံာ်လၢအလါထဲအံၤန့ၣ် ပှၤလၢအဃု လံာ်စီဆှံအတၢ်ကမၣ်တဖၣ် ကမၢကမၣ်ဝဲလီၤ. (ဧ့စြၤ ၇:၉) ဘၣ်ဆၣ် ဝံယံးရမံယၤ မၤဝဲဒ် ကစၢ်ယွၤ တဲအီၤအသိးလီၤ.
(ယံးရမံယၤ ၁၃:၆, ၇) ဒီးအါနံၤအါသီအလီၢ်ခံန့ၣ်, ယွၤစံးဘၣ်ယၤ, ဂဲၤဆၢထၢၣ်လဲၤဆူဖရၤသး, ဒီးဟံးန့ၢ်ယီၢ်တကိးဖဲန့ၣ် လၢယမၤလိာ်နၤလၢ နကပာ်ခူသူၣ်အီၤဖဲန့ၣ်တက့ၢ်. ၇ ဒီးယလဲၤဆူဖရၤသး, ဒီးယခူၣ်လီၤ, ဒီးဟံးထီၣ်ယီၢ်တကိးတဘိန့ၣ် လၢအလီၢ်ဖဲယပာ်ခူသူၣ်အီၤ, ဒီးကွၢ်ကွၢ်, ယီၢ်တကိးန့ၣ်ဟးဂီၤလံ, တဂိာ်တသီၣ်ဘၣ်နီတမံၤဘၣ်.
jr ကဘျံးပၤ ၅၂ အဆၢ ၁၈
ဒီသဒၢ နသးလၢအလီန့ၢ်တၢ်
၁၈ ထံၣ်တမှံကွၢ်လၢ ဝံယံးရမံယၤ လဲၤခီဂာ်ဝဲ ယူဒၤကစၢၢ်တဖၣ် ကီကီခဲခဲဒီး ခီဃီၤဝဲ မဲးမုၢ်ခိၣ် ဒီးလဲၤဝဲဆူ ထံကျိဖရၤသးန့ၣ်တက့ၢ်. အဝဲလဲၤဝဲ တၢ်ဒ့ၣ်စၢၤ ဖးယံၤအံၤ ဒ်သိးကလဲၤပာ်ခူသူၣ်ဝဲ ယီၢ်တကိးအဂီၢ်လီၤ. ပှၤလၢအဟံၣ်အဃၢၤတဖၣ် တထံၣ်ဘၣ်အီၤ ဖးယံာ်လံအဃိ ကဆိကမိၣ်ဝဲလၢ မ့ၢ်အဝဲလဲၤတုၤဖဲလဲၣ်. ဖဲအဝဲဟဲက့ၤတုၤလၢဟံၣ်အခါ အယီၢ်တကိးတအိၣ်လၢ အယီၢ်ဒ့အလိၤလၢၤဘၣ်. တၢ်န့ၣ်အလီၢ်ခံ ကစၢ်ယွၤမၢအလဲၤကဒီးတဘျီ ဒ်သိးကလဲၤဟံးန့ၢ်ဝဲ ယီၢ်တကိးလၢ အကျၣ်လၢအ “တဂိာ်တသီၣ်ဘၣ်တၢ်နီတမံၤဘၣ်” န့ၣ်လီၤ. ဘ့ၣ်သ့ၣ်သ့ၣ် အတၢ်ဆိကမိၣ် ကဟဲထီၣ်လၢ ‘တၢ်တခါဒု တမ့ၢ်တၢ်လၢၤဘၣ်, အခီပညီတအိၣ် စ့ၢ်ကီးဘၣ်.’ ဘၣ်ဆၣ် မ့ၢ်လၢအဝဲပျဲဝဲလၢ ကစၢ်ယွၤကဘှီအီၤအဃိ တတဲဝဲဒ်န့ၣ်ဘၣ်. အဝဲတတဲအါတဲစှၤတၢ်ဘၣ်, မၤဝဲဒ် ကစၢ်ယွၤမၢအီၤအသိးလီၤ.
(ယံးရမံယၤ ၁၃:၈-၁၁) တုၤနုၤတစု ယွၤအကလုၢ်ဘၣ်ယၤ ဒီးစံးဝဲဒၣ်, ၉ ယွၤစံးဒ်အံၤ, ယူဒၤအသးထီၣ်ထီ, ဒီးယရူၤၡလ့ၣ် အသးထီၣ်ထီဒိၣ်ဒိၣ်ကလဲာ်န့ၣ် ယကမၤဟးဂီၤအီၤ ဒ်န့ၣ်သိးလီၤ. ၁၀ ပှၤဂီၢ်မုၢ်အအၢအံၤ လၢအဒိကနၣ်ယကလုၢ်န့ၣ် အသးတအိၣ်ဘၣ်, လၢအလဲၤထွဲအသးအနၢ်က့ၣ်အခံ, ဒီးပိာ်ကစၢ်အဂၤတဖၣ်အခံ, ဒ်သိးအကမၤအတၢ်, ဒီးဘူၣ်ထီၣ်ဘါထီၣ်အီၤန့ၣ် ကမၤသးဒ်ယီၢ်တကိးတဘိအံၤ လၢအတဂိာ်တသီၣ်ဘၣ် တၢ်နီတမံၤဘၣ် အသိးန့ၣ်လီၤ. ၁၁ အဂ့ၢ်ဒ်အံၤ, ဒ်ယီၢ်တကိးစဲဘူးဒီး ပှၤကညီအယီၢ်ဒ့အသိးန့ၣ် ယဒုးစဲဘူးအံၣ်စရ့လးအပှၤဟံၣ်ဖိခဲလၢာ် ဒီးယူဒၤအပှၤဟံၣ်ဖိခဲလၢာ် ဒီးယၤဒ်န့ၣ်အသိး, ယွၤစံးဝဲဒၣ်, ဒ်သိးအကကဲထီၣ် ပှၤဂီၢ်မုၢ်တပူၤလၢယဂီၢ်, ဒီးလၢတၢ်အမံၤအဂီၢ်, ဒီးလၢတၢ်စံးထီၣ်ပတြၢၤအလီၢ်အဂီၢ်, ဒီးလၢတၢ်လၤကပီၤအလီၢ်အဂီၢ်လီၤ. ဘၣ်ဆၣ်ဒီးတကနၣ်ဘၣ်ဝဲဘၣ်.
jr ကဘျံးပၤ ၅၂ အဆၢ ၁၉-၂၀
ဒီသဒၢ နသးလၢအလီန့ၢ်တၢ်
၁၉ အဝဲလဲၤတၢ် ခံဘျီတဘျီဝံၤအလီၢ်ခံ ကစၢ်ယွၤတဲနၢ်ပၢၢ်အီၤ တၢ်ဂ့ၢ်တၢ်ကျိၤလီၤ. တၢ်လၢဘၣ်မၤဝဲအံၤ ကဲထီၣ်တၢ်မၤစၢၤလၢ အဝဲကတဲဘၣ်ပှၤဂၤလၢ အတၢ်ကစီၣ်လၢအမ့ၢ်– “ပှၤဂီၢ်မုၢ်အအၢအံၤ လၢအဒိကနၣ် ယကလုၢ်န့ၣ် အသးတအိၣ်ဘၣ်, လၢအလဲၤထွဲအသးအနၢ်က့ၣ်အခံ, ဒီးပိာ်ကစၢ်အဂၤတဖၣ်အခံ, ဒ်သိးအကမၤအတၢ်, ဒီးဘူၣ်ထီၣ်ဘါထီၣ်အီၤန့ၣ် ကမၤသးဒ်ယီၢ်တကိးတဘိအံၤ လၢအတဂိာ်တသီၣ်ဘၣ် တၢ်နီတမံၤဘၣ် အသိးန့ၣ်လီၤ.” (ယံးရမံယၤ ၁၃:၁၀) ကစၢ်ယွၤသိၣ်လိ အပှၤဂီၢ်မုၢ် တုၤလီၤတီၤလီၤဒိၣ်မးလီၤ. တမ့ၢ်တၢ်ဂ့ၢ်လၢ အဒိၣ်အမုၢ်သနာ်က့ ဝံယံးရမံယၤ ဒိကနၣ်ယဟိဝၤယွၤ အကလုၢ်လၢ အသးဒီဖျၢၣ်အဃိ ကဲထီၣ်တၢ်မၤစၢၤလၢ ကစၢ်ယွၤ အတၢ်သိၣ်က့ၤသီက့ၤ ကနုာ်လီၤဆူ အပှၤဂီၢ်မုၢ်အသးပူၤ အဂီၢ်လီၤ.—ယံးရမံယၤ ၁၃:၁၁.
၂၀ မုၢ်မဆါတနံၤအံၤ ကစၢ်ယွၤတမၢဝဲ ခရံာ်ဖိတဖၣ်လၢ ကလဲၤတၢ်အမံးလာ်လၢ အကယၤဒ်သိး ကသိၣ်အခ့အပှၤအဂီၢ်ဘၣ်. ဘၣ်ဆၣ် မ့ၢ်လၢနအိၣ်မူဒ် ခရံာ်ဖိအတၢ်အိၣ်မူအသိးအဃိ ပှၤလၢနဃၢၤဒီး နတံၤသကိးတဖၣ်ဒၣ်လဲာ် ကကမၢကမၣ်ဝဲ မ့တမ့ၢ် ကကတိၤဒုၣ်ဒွဲၣ်နၤလီၤ. နတၢ်ကူတၢ်သိး, တၢ်ကူၣ်ဘၣ်ကူၣ်သ့ဒီး တၢ်ဖံးတၢ်မၤလၢ နဃုထၢဒီး နတၢ်ထံၣ်ဘၣ်ဃးဒီး သံးဧိၤဂာ်ဧိၤတဖၣ်န့ၣ် ကလီၤကမၢကမၣ်လၢ အဝဲသ့ၣ်အဂီၢ် ဒီးအဝဲသ့ၣ် ကတဲအၢနၤလီၤ. နကဆၢတဲာ်လီၤနသးလၢ နကမၤထွဲ ကစၢ်ယွၤ အတၢ်ဟံးစုနဲၣ်ကျဲဒ် ဝံယံးရမံယၤအသိးဧါ. မ့ၢ်လၢနပျဲကစၢ်ယွၤ ဘှီနၤအဃိ နတၢ်ဃုထၢတဖၣ် ဒုးအိၣ်ထီၣ် တၢ်ခွဲးတၢ်ယာ်လၢ နကပာ်ဖျါထီၣ် တၢ်အုၣ်အသးလၢအဂ့ၤလီၤ. လၢတၢ်ကိးမံၤဒဲးအပူၤ နမ့ၢ်ဒိကနၣ် ယဟိဝၤယွၤ အတၢ်ဟံးစုနဲၣ်ကျဲဒီး တူၢ်လိာ်အတၢ်ဟ့ၣ်ကူၣ်လၢ အဟဲခီဖျိ ကုၢ်လၢအကလုၢ်တီဒီး အကူၣ်တၢ်သ့န့ၣ် အဘျုးကအိၣ်လၢနဂီၢ်ထီဘိလီၤ. တဘၣ်ပျဲ နသးလီန့ၢ်နၤတဂ့ၤ. နမၤဒ် ဝံယံးရမံယၤအသိး သ့စ့ၢ်ကီးလီၤ. ဆၢတဲာ်လီၤနသးလၢ နကတူၢ်လိာ် ကစၢ်ယွၤအတၢ်ဘှီနၤတက့ၢ်. ပျဲလၢကစၢ်ယွၤ ကမၤကဲထီၣ်နၤလၢ သပၢၤလၢအဂ့ၤ လၢအသူဝဲသ့ ထီဘိန့ၣ်တက့ၢ်.
it-1 ကဘျံးပၤ ၁၁၂၁ အဆၢ ၂
ယီၢ်ဒ့
ယဟိဝၤယွၤ တဲဝဲလၢ ပှၤအံၣ်စရ့လးဖိ ဒီးပှၤယူဒၤဖိတဖၣ်န့ၣ် လီၤဂာ်ဒ် ယီၢ်တကိးတဘိလၢ အဝဲအယီၢ်ဒ့အလိၤ ဒီးအဝဲဒၣ် ဟံးဃာ်အီၤဒီး ဒုးကဲထီၣ်အီၤလၢ တၢ်လၤကပီၤဒီး တၢ်ဃံတၢ်လၤလီၤ. (ယံးရမံယၤ ၁၃:၁၁) ဘၣ်ဃးဒီး ယ့ၣ်ၡူးန့ၣ် ဝံအတၢ်စံးပာ် ကွဲးဝဲလၢ အဝဲစၢဃာ် တၢ်တီတၢ်လိၤဒီး တၢ်သးတီအယီၢ်တကိးလၢ အယီၢ်ဒ့အလိၤလီၤ. အဲၣ်ဒိးစံးဝဲ ယ့ၣ်ၡူး ကစံၣ်ညီၣ်တၢ်လၢ တၢ်တီတၢ်လိၤ ဒီး တၢ်သးတီအပူၤလီၤ. ဒ်ယီၢ်တကိးကဲထီၣ် တၢ်မၤစၢၤလၢ ပှၤတဂၤအဂီၢ်အသိး တၢ်တီတၢ်လိၤ ကဲထီၣ်တၢ်ဂံၢ်တၢ်ဘါလၢ ယ့ၣ်ၡူး ကကဲဝဲယဟိဝၤယွၤ အပှၤစံၣ်ညီၣ်ကွီၢ်အဂီၢ်လီၤ.—ယၡါယၤ ၁၁:၁, ၅.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယံးရမံယၤ ၁၂:၁, ၂) တုၤယလိာ်ကွီၢ်ဒီးနၤဒီး, နတီနလိၤလီၤ, ယွၤဧၢ. ဘၣ်ဆၣ်ဒီး, ဒုးကတိၤယၤလၢ နစံၣ်ညီၣ်တၢ်အဂ့ၢ်အကျိၤတက့ၢ်. ပှၤတတီတလိၤအကျဲ ဘီၣ်ထီၣ်ညီထီၣ် မ့ၢ်အဘၣ်မနုၤလဲၣ်. ပှၤလၢအမၤ အကလုၢ်တတီဘၣ်ခဲလၢာ်န့ၣ် အိၣ်မုာ်မ့ၢ်အဘၣ်မနုၤလဲၣ်. ၂ နသူၣ်လီၤအီၤ, ဒီးအဂံၢ်စဲၤလီၤ, ဒိၣ်ထီၣ်ဝဲ, ဒီးသၣ်ထီၣ်ဝဲလီၤ. နအိၣ်ဘူးလၢအထးခိၣ်, ဒီးယံၤလၢအသးလီၤ.
(ယံးရမံယၤ ၁၂:၁၄) ယွၤစံးထီဒါပှၤအအၢအိၣ်လၢ ယဃၢၤလၢအထိးဘၣ် တၢ်န့ၢ်သါလၢယဒုးန့ၢ်သါ ယပှၤဂီၢ်မုၢ်အံၣ်စရ့လးဒ်အံၤ, ကွၢ်ကွၢ်, ယကထဲးကွံာ်အီၤလၢအကီၢ်ပူၤ ဒီးယကထဲးကွံာ်ယူဒၤ အပှၤဟံၣ်ဖိလၢအကျါလီၤ.
jr ကဘျံးပၤ ၁၁၈ အဆၢ ၁၁
ကိးနံၤဒဲး မ့ၢ်နသံကွၢ်လၢ “ယွၤအိၣ်ဖဲလဲၣ်” န့ၣ်ဧါ
၁၁ ဖဲဝံယံးရမံယၤ ထံၣ်ဘၣ်ဝဲ ပှၤအၢပှၤသီတဖၣ် ဘီၣ်ထီၣ်ညီထီၣ်အခါ အဝဲသံကွၢ်ဝဲ တၢ်သံကွၢ်တခါလီၤ. (ဖး ယံးရမံယၤ ၁၂:၁, ၃ တက့ၢ်.) တမ့ၢ်လၢ အဝဲတနာ် ယဟိဝၤယွၤ အတၢ်တီတၢ်လိၤဘၣ်, မ့ၢ်လၢအဝဲ အဲၣ်ဒိးသ့ၣ်ညါဝဲအဃိ သံကွၢ်ဝဲလီၤ. ပမ့ၢ်ကွၢ် အဝဲသံကွၢ် ယဟိဝၤယွၤ ပျီပျီန့ၣ် ပသ့ၣ်ညါဘၣ်လၢ အဝဲအိၣ်ဒီး တၢ်ရ့လိာ်သးဒီး ယဟိဝၤယွၤ ဘူးဘူးတံၢ်တံၢ် ဒ်သိးပှၤဒီဖိပၢ်ခံဂၤ အတၢ်ရ့လိာ်သးလီၤ. ပှၤယူဒၤဖိအါဂၤ မၤတၢ်အၢတၢ်သီ ဘၣ်ဆၣ် ဘၣ်မနုၤအဃိ အဝဲသ့ၣ် ဘီၣ်ထီၣ်ညီထီၣ်ဝဲလဲၣ်န့ၣ် ဝံယံးရမံယၤ တနၢ်ပၢၢ်ဘၣ်. မ့ၢ်အဝဲ ဒိးန့ၢ်ဘၣ်ဝဲ တၢ်စံးဆၢလၢ အလီၤသူၣ်မံသးမံဧါ. ယဟိဝၤယွၤ အၢၣ်လီၤအီၤလၢ ကထဲးထီၣ်ကွံာ်ဝဲ ပှၤအၢပှၤသီတဖၣ်လီၤ. (ယံးရမံယၤ ၁၂:၁၄) ဖဲဝံယံးရမံယၤ ထံၣ်ဘၣ်ဝဲ အတၢ်ထုကဖၣ် ဟဲလၢပှဲၤထီၣ်အခါ အတၢ်နာ်န့ၢ်လၢ ယဟိဝၤယွၤ အတၢ်တီတၢ်လိၤအဖီခိၣ်န့ၣ် ဟဲအါထီၣ်ဝဲလီၤ. လၢတၢ်န့ၣ်အဃိ အဝဲကဃ့ဘါထုကဖၣ်ဒီး တဲဖျါထီၣ် အတၢ်တူၢ်ဘၣ်လၢ အပၢ်ယဟိဝၤယွၤအအိၣ် အါန့ၢ်ဒံးအလီၢ်လီၤ.
(ယံးရမံယၤ ၁၅:၁၇) ယတဆ့ၣ်နီၤလၢ ပှၤဒုၣ်ဒွဲၣ်တၢ်အတၢ်အိၣ်ဖှိၣ်အပူၤဘၣ်. ဒီးယတသးခုဘၣ်. ယဆ့ၣ်နီၤတဂၤဃီလၢနစုအဃိလီၤ. အဂ့ၢ်ဒ်အံၤ, နမၤပှဲၤယသးဒီးတၢ်ကိၢ်တၢ်ဂီၤလီၤ.
တၢး၀၄ ၅/၁ ကဘျံးပၤ ၁၂ အဆၢ ၁၆
အိၣ်ဒီးတၢ်သူၣ်ဒူသးဒူ ဒ်ယံးရမံယၤအသိး
ပကဘၣ် ပလီၢ်ပသးလၢ တၢ်ရ့တံၤရ့သကိး
၁၆ ဝံယံးရမံယၤ ပာ်ဖျါထီၣ် တၢ်ဂ့ၢ်လၢအမၤစၢၤအီၤ ဒ်သိးကအိၣ်ဒီး တၢ်သူၣ်ဒူသးဒူအဂီၢ်န့ၣ်လီၤ. အဝဲစံးဝဲလၢ– “ယတဆ့ၣ်နီၤလၢ ပှၤဒုၣ်ဒွဲၣ်တၢ်အတၢ်အိၣ်ဖှိၣ်အပူၤဘၣ်. ဒီးယတသးခုဘၣ်. ယဆ့ၣ်နီၤတဂၤဃီလၢ နစုအဃိလီၤ. အဂ့ၢ်ဒ်အံၤ, နမၤပှဲၤယသးဒီးတၢ်ကိၢ်တၢ်ဂီၤလီၤ.” (ယံးရမံယၤ ၁၅:၁၇) ဝံယံးရမံယၤ တအဲၣ်ဒိးရ့ဒီး တံၤသကိးလၢ ကမၤဟးဂီၤအီၤဘၣ်. လၢတၢ်န့ၣ်အလီၢ် အဝဲအဲၣ်ဒိးအိၣ်ဝဲ ထဲတဂၤလီၤ. တၢ်မၢဖိပီလူး အတၢ်ဟ့ၣ်ပလီၢ်လၢ အစံးဝဲ “တၢ်ရ့လိာ်လၢ အအၢအသီန့ၣ်, မၤအၢလီၤတၢ်အလုၢ်အလၢ်လၢ အဂ့ၤတဖၣ်”န့ၣ်ပတသးပ့ၤနီၣ် နီတဘျီဘၣ်.—၁ ကရံၣ်သူး ၁၅:၃၃.
တၢ်ဖးလံာ်စီဆှံ
(ယံးရမံယၤ ၁၃:၁၅-၂၇) ကနၣ်, ဒီးဒိကနၣ်တက့ၢ်. ပာ်ထီၣ်ထီသုသးတဂ့ၤ. အဂ့ၢ်ဒ်အံၤ, ယွၤကတိၤတၢ်လီၤ. ၁၆ လၢအတချုးမၤဒံးဘၣ်တၢ်ခံး, လၢသုခီၣ်တချုးဘၣ်တိၢ်ဒံးဘၣ် လၢကစၢၢ်ခံးအလိၤ, ဒီးသုကွၢ်လၢ်တၢ်ကပီၤအကျဲအဖၢမုၢ်ဒီး, ဒုးကဲထီၣ်က့ၤဝဲလၢတၢ်သံအကဒု, ဒီးပာ်ဝဲလၢတၢ်ခံးသူဒံးဘၣ်ဒီး, မၤလၤကပီၤယွၤသုကစၢ်တက့ၢ်. ၁၇ မ့မ့ၢ်သုမ့ၢ်တကနၣ်ဘၣ်ဒီး, ယသးအမဲာ်ထံကလီၤလၢ အလီၢ်အိၣ်တဒၢပူၤ လၢသုသးထီၣ်ထီအဃိလီၤ. ယမဲာ်ထံကလီၤနးနးကလဲာ်, ဒီးယမဲာ်ထံကယွၤလီၤလီၤ. အဂ့ၢ်ဒ်အံၤ, ယွၤအသိတဖုန့ၣ် တၢ်ကစိာ်မၢကဲကုၢ်အီၤလီၤ. ၁၈ စံးဘၣ်စီၤပၤဒီးနီၢ်ပၤမုၣ်, ဆ့ၣ်နီၤလၢ အလီၢ်ဖုၣ်သုဝဲန့ၣ်တက့ၢ်. အဂ့ၢ်ဒ်အံၤ, သုလၤကပီၤအခိၣ်သလုး ကလီၤတဲာ်လၢသုခိၣ်လိၤလီၤ. ၁၉ ခူဧိၤဝ့ၢ်ဧိၤလၢကလံၤထံးတဖၣ် အတြဲၤကးတံာ်ဃာ်အသးလံ, ဒီးပှၤတအိးထီၣ်ဘၣ်အီၤနီတဂၤဘၣ်. ပှၤစိာ်ထီၣ်မၢကဲကုၢ်ယူဒၤခဲလၢာ်လီၤ. ပှၤစိာ်ထီၣ်မၢကဲကုၢ် အီၤတုၤအလၢာ်လံ. ၂၀ ကျ့ထီၣ်သုမဲာ်, ဒီးကွၢ်ပှၤဟဲလၢကလံၤစိးတခီတက့ၢ်. သိတဖုလၢတၢ်ဟ့ၣ်လီၤနၤ, နသိတဖုအိၣ်ဒီးအဃံအလၤန့ၣ် မ့ၢ်အအိၣ်ဖဲလဲၣ်. ၂၁ တုၤအအိၣ်သကိးနၤဒီး, နကစံးမနုၤလဲၣ်. အဂ့ၢ်ဒ်အံၤ, နသိၣ်လိအီၤဒ်သိးအကကဲထီၣ် ပဒိၣ်ဖးဒိၣ်လၢနဖီခိၣ်လီၤ. တၢ်သူၣ်အုးသးအုးကဟံးဃာ်နၤ ဒ်ပိာ်မုၣ်လၢအဘၣ်ဟုးဆါအသိးန့ၣ် တမ့ၢ်ဘၣ်ဧါ. ၂၂ ဒီးနမ့ၢ်စံးလၢနသးကံၢ်ပူၤ, တၢ်အံၤတဖၣ်ဘၣ်ယၤ မ့ၢ်အဘၣ်မနုၤလဲၣ်န့ၣ်ဒီး, လၢနတၢ်ဒဲးဘးအဒိၣ်အဃိန့ၣ် တၢ်သလဲထီၣ်နခံ, ဒီးနခီၣ်နၢၣ်ခံအိၣ်ဘ့ၣ်ခီၣ်လီၤ. ၂၃ ပှၤကူၡးဖိလဲလိာ်အဖံး, ခ့စံၣ်ပိၣ်လဲလိာ်အဖံးအကံၣ်ဃ့ အဖျၢၣ်န့ၣ်ဘၣ်ကသ့ဧါ. မ့မ့ၢ်ဒ်န့ၣ်ဒီးသုဝဲစ့ၢ်ကီး လၢအမၤညီနုၢ်ဒၣ်တၢ်အၢန့ၣ် ကမၤတၢ်ဂ့ၤလီၤ. ၂၄ မၤသးဒ်န့ၣ်ဒီး ယကမၤလီၤပြံလီၤပြါအီၤ ဒ်လီၢ်အကမူၣ်လၢ အဒံကွံာ်လၢပှၢ်မုၢ်ကနၢ အကလံၤအမဲာ်ညါအသိးန့ၣ်လီၤ. ၂၅ အန့ၣ်မ့ၢ်နဂီၢ်, တၢ်လၢယဃီၣ်န့ၢ်နၤ, ယွၤစံးဝဲဒၣ်. အဂ့ၢ်ဒ်အံၤ, နသးပ့ၤနီၣ်ယၤ, ဒီးသန့ၤနသးလၢတၢ်ကဘျံးကဘျၣ်လီၤ. ၂၆ ဒီးယကဘ့ၣ်သဘျံးထီၣ် နဆ့ဆူနခိၣ်တခီ, ဒီးနတၢ်မဲာ်ဆှးကအိၣ်ဖျါထီၣ်လီၤ. ၂၇ ယထံၣ်နတၢ်အဲၣ်ဘၢမါအဲၣ်ဘၢဝၤဒီး နတၢ်သးကလုာ်ကလိၤ, နမၤကမၣ်မုၣ်ကမၣ်ခွါ အတၢ်သးဘၣ်အၢအလီၢ်လၢကစၢၢ်လိၤ, လၢပျီပူၤလီၤ. ယရူၤၡလ့ၣ်ဧၢ, နဘၣ်အဖှီၣ်လီၤ. နတဒိးတၢ်မၤကဆှီနၤဘၣ်န့ၣ် နကအိၣ်ဆံးယံာ်လဲၣ်.