အဆၢဒိၣ် ၁၉
ယ့ၣ်ၡူးအတၢ်စံးပာ်လၢ ဘၣ်ထွဲလိာ်သးဒီးဟီၣ်ခိၣ်ဒီဘ့ၣ်
ယ့ၣ်ၡူးဟ့ၣ်ဝဲတၢ်ပနီၣ်လၢဘၣ်ဃးဒီး မုၢ်နံၤခံကတၢၢ် ဒီးကစၢ်အတၢ်ဟဲက့ၤအဆၢကတီၢ်န့ၣ်လီၤ
ယ့ၣ်ၡူးဒီး အတၢ်မၢဖိလွံၢ်ဂၤအိၣ်ဝဲလၢ ကစၢၢ်သ့ၣ်စၤယံးအလိၤ ဖဲတၢ်လီၢ်လၢပှၤထံၣ်စိဝဲ ဝ့ၢ်ယရူၤၡလ့ၣ်အတၢ်ဃံတၢ်လၤ ဒီးတၢ်လုၢ်ဟံၣ်သ့န့ၣ်လီၤ. ပူၤကွံာ်တစိၢ်ဖိန့ၣ် ယ့ၣ်ၡူးစံးတ့ၢ်ဝဲလၢ တၢ်လုၢ်ဟံၣ်လၢ ဝ့ၢ်ယရူၤၡလ့ၣ်အပူၤ ကဘၣ်တၢ်မၤဟးဂီၤအီၤလီၤ. ဒီးလၢညါတဘျီန့ၣ် ကစၢ်စံးတ့ၢ်အဝဲသ့ၣ်လၢ “ဟီၣ်ခိၣ်အစိၤကတၢၢ်” အဂ့ၢ်အဃိအဝဲသ့ၣ်သံကွၢ်ယ့ၣ်ၡူးဘၣ်ဃးဒီး တၢ်ဂ့ၢ်လၢကစၢ်စံးတ့ၢ်ဝဲတဖၣ်န့ၣ်လီၤ. (မးသဲ ၁၃:၄၀, ၄၉) တဘျီညါအံၤ ယ့ၣ်ၡူးအတၢ်မၢဖိတဖၣ် သံကွၢ်အီၤလၢ “နဟဲလီၤဒီး ဟီၣ်ခိၣ်အကတၢၢ်န့ၣ် အတၢ်ပနီၣ်, ကမၤအသးလၢ မနုၤတမံၤလဲၣ်.”—မးသဲ ၂၄:၃.
တၢ်ကမၤအသးဖဲ တချုးဝ့ၢ်ယရူၤၡလ့ၣ်ဘၣ်တၢ်မၤဟးဂီၤအီၤဒံးဘၣ်အခါန့ၣ် ယ့ၣ်ၡူးပာ်ဖျါထီၣ်ဝဲလၢအတၢ်စံးဆၢအပူၤလီၤ. ဘၣ်ဆၣ် ကစၢ်အတၢ်ကတိၤတဖၣ်န့ၣ် ကလၢပှဲၤထီၣ်ဝဲ ဖဲန့ၣ်အဆၢကတီၢ်တကးဒံးဘၣ် လၢခံကဟဲလၢပှဲၤထီၣ်ဝဲလၢဟီၣ်ခိၣ်ဒီဘ့ၣ်လီၤ. ယ့ၣ်ၡူးတဲဆိပာ်ဝဲ တၢ်မၤအသးတဖၣ်ဒီး ဟီၣ်ခိၣ်တၢ်အိၣ်အသးတဖၣ် လၢကဟဲကဲထီၣ်အသး တကတီၢ်ဃီအဂ့ၢ်န့ၣ်လီၤ. တၢ်ပနီၣ်အဝဲအံၤ ကဒုးသ့ၣ်ညါ ပှၤဟီၣ်ခိၣ်ဖိတဖၣ်လၢ ယ့ၣ်ၡူးဟဲက့ၤလံဒ် စီၤပၤတဂၤအသိး လၢမူခိၣ်လံ. ပမ့ၢ်စံးကဒီးတမံၤန့ၣ် တၢ်ပနီၣ်အံၤ ပာ်ဖျါထီၣ်န့ၢ်ပှၤလၢယဟိဝၤယွၤ ပာ်ထီၣ်ယ့ၣ်ၡူးဒ်စီၤပၤလၢ အဘီမုၢ်အပူၤလၢ ဘၣ်တၢ်စံးပာ်အီၤယံာ်တ့ၢ်လံန့ၣ်လီၤ. တၢ်ပနီၣ်အံၤပာ်ဖျါထီၣ်ဝဲလၢ တၢ်ဆၢကတီၢ်ဘူးထီၣ်လံလၢ ဘီမုၢ်အံၤကမၤဟါမၢ်ကွံာ် တၢ်အၢတၢ်သီခဲလၢာ်ဒီး ကဒုးအိၣ်ထီၣ်ဝဲတၢ်ဃူတၢ်ဖိးနီၢ်နီၢ်လၢ ပှၤဟီၣ်ခိၣ်ဖိတဖၣ်အဂီၢ်န့ၣ်လီၤ. တၢ်လၢယ့ၣ်ၡူးတဲဆိပာ်ဝဲတဖၣ်န့ၣ် မ့ၢ်တၢ်ပနီၣ်လၢအပာ်ဖျါထီၣ်ဝဲလၢ တၢ်ရဲၣ်တၢ်ကျဲၤအံၤ လၢအမ့ၢ် တၢ်ဘူၣ်တၢ်ဘါ, ထံဂ့ၢ်ကီၢ်ဂ့ၢ် ဒီးတၢ်ရ့လိာ်မုာ်လိာ်န့ၣ် ကကတၢၢ်ကွံာ်ဝဲဘူးထီၣ်လံဒီး တၢ်ရဲၣ်တၢ်ကျဲၤလၢအသီကစးထီၣ်ဝဲလီၤ.
ဖဲယ့ၣ်ၡူး ကဲထီၣ်စီၤပၤလၢမူခိၣ်အဆၢကတီၢ် တၢ်ကမၤအသးလၢ ဟီၣ်ခိၣ်ချၢဒ်လဲၣ်န့ၣ် ကစၢ်တဲဖျါထီၣ်ဝဲလီၤ. အဝဲစံးဝဲလၢ တၢ်ဒုးတၢ်ယၤလၢဟီၣ်ခိၣ်ဒီဘ့ၣ်, တၢ်သၣ်ဝံၤသၣ်စ့ၤ, ဒီးတၢ်ဆူးတၢ်ဆါကအိၣ်ထီၣ်ဝဲ, ဟီၣ်ခိၣ်ကဟူးဖးဒိၣ် ဒီးတၢ်တတီတလိၤတဖၣ် ကအါထီၣ်ဝဲလီၤ. ယ့ၣ်ၡူးအပျဲၢ်အဘီၣ် နီၢ်နီၢ်တဖၣ်န့ၣ် ကစံၣ်တဲၤတဲလီၤ ယွၤအဘီအမုၢ် တၢ်သးခုကစီၣ်လၢ ဟီၣ်ခိၣ်ဒီဘ့ၣ်လီၤ. တၢ်မၤအသးလၢထးတဖၣ်အံၤ ကတုၤလၢအပတီၢ်ထီကတၢၢ် ဖဲ “တၢ်နးတၢ်ဖှီၣ်ဖးဒိၣ်” လၢအတကဲထီၣ်နီတဘျီဒံးဘၣ် မ့ၢ်ကဲထီၣ်ဝဲအဆၢကတီၢ်န့ၣ်လီၤ.—မးသဲ ၂၄:၂၁.
တၢ်နးတၢ်ဖှီၣ်ဖးဒိၣ်အံၤ မ့ၢ်ဘူးထီၣ်အခါန့ၣ် ယ့ၣ်ၡူးအပျဲၢ်အဘီၣ်တဖၣ် ကသ့ၣ်ညါဝဲဒ်လဲၣ်. ယ့ၣ်ၡူးစံးဝဲလၢ “မၤလိတၢ်အဒိအတဲာ်လၢ ချၢၣ်ဒၢန့ၣ်တက့ၢ်.” (မးသဲ၂၄:၃၂) ချၢၣ်ဒၢအဒ့တဖၣ် မ့ၢ်ဒိးစၢ်ထီၣ်န့ၣ် မ့ၢ်တၢ်ပနီၣ်လၢ အပာ်ဖျါထီၣ်ဝဲလၢတၢ်ကိၢ်အကတီၢ် ဘူးထီၣ်လံန့ၣ်လီၤ. ဒ်န့ၣ်အသိး တၢ်လၢယ့ၣ်ၡူးတဲဆိပာ်ဝဲကိးခါဒဲး မ့ၢ်ကဲထီၣ်အသးလၢ တၢ်ဆၢကတီၢ် တကတီၢ်ဃီအပူၤန့ၣ် တၢ်အံၤမ့ၢ်တၢ်ပနီၣ်လၢ အပာ်ဖျါထီၣ်ဝဲလၢတၢ်အကတၢၢ် ဘူးထီၣ်လံန့ၣ်လီၤ. ဘၣ်ဆၣ် ယ့ၣ်ၡူးစံးဝဲလၢ မုၢ်နံၤမုၢ်သီ ဒီးနၣ်ရံၣ်လၢ တၢ်နးတၢ်ဖှီၣ်ဖးဒိၣ်အံၤ ကစးထီၣ်အသးန့ၣ် ပှၤတသ့ၣ်ညါနီတဂၤဘၣ်. သ့ၣ်ညါဝဲထဲ ပၢ်အိၣ်လၢမူခိၣ် တဂၤဧိၤန့ၣ်လီၤ. လၢတၢ်န့ၣ်အဃိ ယ့ၣ်ၡူးဟ့ၣ်ပလီၢ်ဝဲအပျဲၢ်အဘီၣ်တဖၣ်လၢ– “ဆိးသီဒီးဘါထုကဖၣ်တၢ်တက့ၢ်. အဂ့ၢ်ဒ်အံၤ, အမုၢ်အလါကဘၣ်ဝဲ ခဲလဲၣ်ခဲလဲၣ်န့ၣ်, သုတသ့ၣ်ညါဘၣ်လီၤ.” —မၢ်ကူး ၁၃:၃၃.
—ဘၣ်တၢ်ဒိးသန့ၤထီၣ်အီၤလၢ မးသဲ အဆၢဒိၣ် ၂၄ ဒီး ၂၅; မၢ်ကူး အဆၢဒိၣ် ၁၃; လူၤကၣ် အဆၢဒိၣ် ၂၁ န့ၣ်လီၤ.
a နမ့ၢ်အဲၣ်ဒိးသ့ၣ်ညါအါထီၣ် ယ့ၣ်ၡူးအတၢ်စံးပာ်အဂ့ၢ်န့ၣ် ကွၢ်လံာ်လၢ ယဟိဝၤပှၤအုၣ်အသးတဖၣ်ထုးထီၣ်ဝဲ လံာ်စီဆှံသိၣ်လိတၢ် နီၢ်နီၢ်မ့ၢ် မနုၤလဲၣ်, လံာ်ကဘျံးပၤ ၈၆–၉၅ တက့ၢ်.