ယဟိဝၤပှၤအုၣ်အသးတဖၣ်​ အကွဲၤဟူဖျါ အတၢ်ရဲၣ်တၢ်ကျဲၤ လၢအ့ထၢၣ်နဲး တအိၣ်အလီၢ်

ကိးလါဒဲး ပခိးကွၢ်လၢ် JW တၢ်ဂီၤမူ အတၢ်ရဲၣ်တၢ်ကျဲၤတဖၣ်လၢ အဟ့ၣ်ဂံၢ်ဟ့ၣ်ဘါပှၤလီၤ. ဘၣ်ဆၣ်​ ပဒီပုၢ်ဝဲၢ်လၢ အၤဖြံၤကၤအပူၤတဖၣ်​ အါတက့ၢ်န့ၣ်​ ကွၢ်ဝဲတၢ်ရဲၣ်တၢ်ကျဲၤအံၤလၢ အ့ထၢၣ်နဲးအပူၤတသ့ဘၣ်. ဘၣ်မနုၤအဃိလဲၣ်.

လၢအၤဖြံၤကၤ တၢ်လီၢ်အါတီၤန့ၣ်​ အ့ထၢၣ်နဲး တအိၣ်ဘၣ်. တၢ်လီၢ်လၢအ့ထၢၣ်နဲး အိၣ်အလီၢ်စ့ၢ်ကီး အ့ထၢၣ်နဲး ကဘှၢ မ့တမ့ၢ် အပှ့ၤဒိၣ်ဒိၣ်မး. အဒိ, ဘၣ်တဘျီ ကဝီၤအပှၤကွၢ်တၢ်တဂၤလၢ အအိၣ်လၢ မၤဒၤကါစကၤန့ၣ်​ လဲၤဒီလိးဝဲ JW တၢ်ဂီၤမူ အတၢ်ရဲၣ်တၢ်ကျဲၤလၢ ကျး ဒီးဘၣ်ဟ့ၣ်ဝဲ ၁၆ ဒီၤလၤညါ. အဃိ ဘၣ်ဟ့ၣ်ဝဲစ့န့ၣ်​ လီၤလၢဝဲထဲသိးဒီး ပှၤတနီၤမၤတၢ်လၢ ဒီတနွံဘျဲၣ်အဂီၢ်ညါလီၤ.a

တၢ်ကီတၢ်ခဲအိၣ်ဒ်အံၤ သနာ်က့ ပှၤအကကွဲၢ်လၢ အအိၣ်လၢ အၤဖြံၤကၤန့ၣ်​ ကွၢ်ဘၣ်ဝဲ JW တၢ်ဂီၤမူ တၢ်ရဲၣ်တၢ်ကျဲၤလၢ တလိၣ်သူဝဲ အ့ထၢၣ်နဲးဘၣ်လီၤ. ကွၢ်ဝဲသ့ဒ်လဲၣ်.

စးထီၣ်လၢ ၂၀၁၇ န့ၣ်​ ပှၤအိၣ်လၢ အၤဖြံၤကၤ ဆၣ်ဟၤရၤတဖၣ်​ ကွၢ်ဘၣ်ဝဲ JW တၢ်ဂီၤမူ အတၢ်ရဲၣ်တၢ်ကျဲၤလၢ ကွဲၤဟူဖျါအပူၤသ့ဝဲလီၤ. ပှၤကကွၢ် ကွဲၤဟူဖျါ အတၢ်ရဲၣ်တၢ်ကျဲၤတခါအံၤအဂီၢ် တလိၣ်ပှၤဟ့ၣ်စ့ဘၣ်. ဒီးပှၤကွၢ်သ့လၢကျိာ် ၁၆ ကျိာ်, တနွံနွံသီ, ၂၄ နၣ်ရံၣ်န့ၣ်လီၤ.

ပှၤကွၢ်ဝဲ ကွဲၤဟူဖျါ အတၢ်ရဲၣ်တၢ်ကျဲၤတခါအံၤကန့ၢ်အဂီၢ် ယဟိဝၤပှၤအုၣ်အသးတဖၣ်​ ဘၣ်ဟ့ၣ်စ့လၢ ပှၤသုးကျဲၤ ကွဲၤဟူဖျါ အတၢ်ရဲၣ်တၢ်ကျဲၤတခါအံၤအအိၣ်လီၤ. ပှၤအိၣ်လၢ အၤဖြံၤကၤ ဆၣ်ဟၤရၤကလံၤထံး ထံကီၢ် ၃၅ ဘ့ၣ်န့ၣ်​ ကွၢ်ဝဲတၢ်ရဲၣ်တၢ်ကျဲၤတခါအံၤသ့လီၤ. တလါန့ၣ်​ ပှၤဘၣ်ဟ့ၣ်စ့ ဒီၤလၤ​ ၁၂,၀၀၀ ဘျဲၣ်ညါလီၤ. တဘျီတခီၣ်န့ၣ်​ ဒ်သိးပှၤကွၢ်ဝဲ တၢ်ရဲၣ်တၢ်ကျဲၤ တဘျီဃီကသ့အဂီၢ် ပှၤဘၣ်ဟ့ၣ်အါထီၣ်စ့လၢ ကွဲၤဟူဖျါ အတၢ်ရဲၣ်တၢ်ကျဲၤ (channel) အဂၤတခါအဂီၢ်လီၤ. မ့ၢ်လၢပှၤရဲၣ်ကျဲၤဒ်န့ၣ်အဃိ ဒီပုၢ်ဝဲၢ်တဖၣ်​ ကွၢ်ဘၣ်ဝဲ တၢ်အိၣ်ဖှိၣ်ဖးဒိၣ်​ အတၢ်ရဲၣ်တၢ်ကျဲၤ တကးဒံးဘၣ်​ ပၣ်ဃုာ်ဒီး တၢ်လဲၤဟးအိၣ်သကိး ဝဲၤတြၢ် အတၢ်ရဲၣ်တၢ်ကျဲၤလီၤဆီ တဖၣ်လီၤ.

ပှၤအါအါဂီၢ်ဂီၢ် ဃုာ်ဒီးပှၤလၢ တမ့ၢ်ယဟိဝၤယွၤ အခ့အပှၤတဖၣ်​ ကွၢ်ဝဲကွဲၤဟူဖျါ အတၢ်ရဲၣ်တၢ်ကျဲၤအံၤလၢ အဟံၣ်သ့န့ၣ်လီၤ. ဘၣ်ဆၣ်​ ပဒီပုၢ်ဝဲၢ်တနီၤန့ၣ်​ ကကွၢ်ဝဲ တၢ်ရဲၣ်တၢ်ကျဲၤတခါအံၤအဂီၢ် ပှ့ၤဝဲတၢ်ပီးတၢ်လီလၢ အလိၣ်ဘၣ်ဝဲတဖၣ်တန့ၢ်ဘၣ်. ဒ်သိးအဝဲသ့ၣ်​ ကကွၢ်ဘၣ်ဝဲအဂီၢ် လၢဘီမုၢ်ဘျီၣ်ဒိၣ်​ ၃,၆၇၀ ဘျဲၣ်န့ၣ်​ ပှၤဘၣ်ပှ့ၤ ဒီးထီထီၣ်တၢ်ပီးတၢ်လီတဖၣ်လီၤ. အဃိအဝဲသ့ၣ်​ ကွၢ်ဝဲလၢဘီမုၢ်ဘျီၣ်ဒိၣ်သ့ဝဲလီၤ. ဘီမုၢ်ဘျီၣ်ဒိၣ်လၢ အိၣ်ဒီးကွဲၤဟူဖျါ မ့တမ့ၢ် ဖရီကၠဲးထၢၣ်​ တဖၣ်န့ၣ်​ ပှၤကထီထီၣ်​ တၢ်ပီးတၢ်လီအဂီၢ်ဒီး ပှၤဆှၢတၢ်အလဲအဂီၢ်န့ၣ်​ လၢာ်ဝဲ ဒီၤလၤ​ ၇၀ ဃၣ်ဃၣ်လီၤ. ကွဲၤဟူဖျါ မ့တမ့ၢ် ဖရီကၠဲးထၢၣ်​ မ့ၢ်တအိၣ်ဘၣ်န့ၣ်​ တၢ်လၢာ်ဘူၣ်လၢာ်စ့ၤ ကအိၣ်ဝဲ ဒီၤလၤ​ ၅၃၀ လီၤ.

ပဒီပုၢ်ဝဲၢ်တဖၣ်​ စံးဘျုးစံးဖှိၣ်​ ဒီးပာ်လုၢ်ပာ်ပှ့ၤဝဲ တၢ်ရဲၣ်တၢ်ကျဲၤအံၤဒိၣ်မးလီၤ. တၢ်အိၣ်ဖှိၣ်သးပှၢ်လၢ ကီၢ်ခဲမရူတဂၤ တဲဝဲလၢ “လၢပဟံၣ်ဖိဃီဖိအဂီၢ်န့ၣ်​ တၢ်ရဲၣ်တၢ်ကျဲၤတခါအံၤ လီၤဂာ်ဒ် ကိၣ်မၤနၤလၢ မဲးမုၢ်ပျီအပူၤလီၤ.” ပဒီပုၢ်ဝဲၢ် အိၤဒံဘိး လၢအအိၣ်လၢ နဲးကၠံရံယါန့ၣ်​ တဲဝဲလၢ “ပဟံၣ်ဖိဃီဖိန့ၣ်​ ပကွၢ်ဝဲတၢ်ရဲၣ်တၢ်ကျဲၤတခါအံၤ တနွံသၢဘျီလီၤ. ထီဘိန့ၣ်​ ယဖိခွါတဖၣ်​ အိၣ်ခိးကွၢ်လၢ်ဝဲ တၢ်ရဲၣ်တၢ်ကျဲၤအံၤလီၤ. ဆၢကတီၢ်အဂၤနာ်က့ အဝဲသ့ၣ်ဃ့ကွၢ်ဝဲ JW ကွဲၤဟူဖျါ အတၢ်ရဲၣ်တၢ်ကျဲၤအံၤလီၤ.” ဒီပုၢ်ဝဲၢ်မုၣ်ရိး လၢအအိၣ်လၢ နဲးကၠံရံယါ စ့ၢ်ကီးတဲဝဲလၢ “လၢအပူၤကွံာ်န့ၣ်​ ယကွၢ်တၢ်ကစီၣ်ထီဘိ, ဘၣ်ဆၣ်, အခဲအံၤ ယကွၢ်က့ၤ JW ကွဲၤဟူဖျါ တၢ်ရဲၣ်တၢ်ကျဲၤလီၤ. ဖဲယကွၢ်တၢ်ကစီၣ်အခါ ယသးထီၣ်တၢ် ခီဖျိတၢ်လၢယထံၣ်တဖၣ်အဃိ ဒီးတဘျီတခီၣ်​ တုၤဒၣ်လဲာ် ယသွံၣ်ထီၣ်လီၤ. ဘၣ်ဆၣ်​ မ့မ့ၢ် JW တၢ်ဂီၤမူန့ၣ်​ ဟ့ၣ်ဂံၢ်ဟ့ၣ်ဘါယၤ ဒီးမၤသးခုယၤဒိၣ်မး. တၢ်ရဲၣ်တၢ်ကျဲၤအံၤမ့ၢ်ဝဲ တၢ်ဆိၣ်ဂ့ၤလၢ အဟဲလၢယဟိဝၤယွၤ အအိၣ်နီၢ်နီၢ်လီၤ.”

ကဝီၤအပှၤကွၢ်တၢ်တဂၤလၢ အအိၣ်လၢ ကီၢ်မိၣ်စဲဘံးန့ၣ်​ ပာ်ဖျါထီၣ်ဝဲလၢ ပှၤထီထီၣ်​ တၢ်ပီးတၢ်လီလၢ ဘီမုၢ်ဘျီၣ်ဒိၣ်ဝံၤအလီၢ်ခံ ဒီပုၢ်ဝဲၢ်တဖၣ်​ ဟဲဆိဝဲ တနၣ်ရံၣ်​ မ့တမ့ၢ် တနၣ်ရံၣ်ဘျဲၣ်​ ဒ်သိးကကွၢ်ဝဲ JW တၢ်ဂီၤမူ အတၢ်ရဲၣ်တၢ်ကျဲၤ တချုးလၢတၢ်အိၣ်ဖှိၣ်ထီၣ်ဒံးဘၣ်လီၤ.

လၢကလံၤထံး အၤဖြံၤကၤ, ဝ့ၢ်ကၠိၤဟဲနံးစ်ဘၢၤန့ၣ်​ ဖဲ ၂၀၁၉ ဟီၣ်ခိၣ်ဒီဘ့ၣ်​ တၢ်အိၣ်ဖှိၣ်ဖးဒိၣ်​ အတၢ်စံၣ်တဲၤတဲလီၤလၢအရ့ဒိၣ်​ ဒီးပှၤပၢဆှၢတၢ်ကမံးတံာ်တဂၤ အတၢ်စံၣ်တဲၤတဲလီၤန့ၣ်​ ဘၣ်တၢ်ရၤလီၤအီၤလၢ တၢ်လီၢ်ခွံတီၤ ခီဖျိလၢ ကွဲၤဟူဖျါ တၢ်ရဲၣ်တၢ်ကျဲၤအံၤလီၤ. ဒီပုၢ်ဝဲၢ် စဖူမံၤလံၤလံၤ လၢအမၤတၢ်လၢ လီၢ်ကဝီၤ တၢ်ဂီၤမူဝဲၤကျိၤ, ကလံၤထံး အၤဖြံၤကၤ အဝဲၤတြၢ်န့ၣ်​ တဲဝဲလၢ “လၢအပူၤကွံာ်န့ၣ်​ တၢ်စံၣ်တဲၤတဲလီၤတဖၣ်​ ပရၤလီၤအီၤ ခီဖျိ အ့ထၢၣ်နဲးလီၤ. အ့ထၢၣ်နဲးမ့ၢ်ဂ့ၤမး ပှၤကွၢ်အီၤသ့ ဒီးတၢ်လၢာ်ဘူၣ်လၢာ်စ့ၤ အါဝဲစ့ၢ်ကီးလီၤ. ခဲအံၤပသူ JW ကွဲၤဟူဖျါ အတၢ်ရဲၣ်တၢ်ကျဲၤအဃိ တၢ်လၢာ်ဘူၣ်လၢာ်စ့ၤစှၤလီၤ ဒီးပှၤကွၢ်အီၤန့ၢ် ဘၣ်ဆၢဘၣ်ကတီၢ်လီၤ.”

ပစံးဘျုးဘၣ်သုဒိၣ်မး, မ့ၢ်လၢသုဟ့ၣ်လီၤ တၢ်မၤဘူၣ်လၢတၢ်သူၣ်အိၣ်သးအိၣ်အပူၤအဃိ ဒီပုၢ်ဝဲၢ်လၢ အၤဖြံၤကၤတဖၣ်​ ကွၢ်ဝဲ JW ကွဲၤဟူဖျါ အတၢ်ရဲၣ်တၢ်ကျဲၤသ့ဝဲလီၤ. သုဟ့ၣ်လီၤ တၢ်မၤဘူၣ်လၢ ကျဲအါဘိ ဒ်အဘၣ်တၢ်ပာ်ဖျါထီၣ်အီၤလၢ donate.jw.org အပူၤအဃိ ပသးခုစံးဘျုးဘၣ်သုဒိၣ်မးလီၤ.