ဘၣ်ဃးဒီးတၢ်ဝံသးစူၤန့ၣ် လံာ်စီဆှံတဲဝဲဒ်လဲၣ်
ဖဲ ၁၉၉၅ န့ၣ် ဘၣ်ဃးဒီး တၢ်ဝံသးစူၤန့ၣ် ယူၢ်နဲးစကိၤ တဲဝဲလၢ “ပှၤမ့ၢ်အိၣ်ဒီး တၢ်ဝံသးစူၤမၣ် ဟီၣ်ခိၣ်န့ၣ် တၢ်မုာ်တၢ်ခုၣ်ကအိၣ်ဝဲ.”
ခီဖျိလၢ ပှၤတအိၣ်ဒီး တၢ်ဝံသးစူၤဘၣ်အဃိ ပှၤတၢ်ပာ်ကဲ တအိၣ်လၢၤဘၣ် ဒီးသူၣ်ဟ့သးဟ့လိာ်အသး. ဒီးပှၤမ့ၢ်အိၣ်ဒီး တၢ်ပာ်သူၣ်ပာ်သးဒ်န့ၣ်န့ၣ် ပှၤကတဲဆါတၢ်, ကကွၢ်ဒိၣ်ဆံးအါစှၤတၢ် ဒီးကမၤဆူၣ်မၤစိးတၢ်.
ဘၣ်ဃးဒီး တၢ်ဝံသးစူၤန့ၣ် ပှၤအါဂၤ တၢ်ထံၣ်အိၣ်ဝဲအါမံၤ. ပှၤတနီၤ ဆိကမိၣ်ဝဲလၢ ပှၤလၢအအိၣ်ဒီး တၢ်ဝံသးစူၤန့ၣ် အဝဲကဘၣ်တူၢ်လိာ် တၢ်လၢပှၤဂၤမၤဝဲခဲလၢာ်. ဘၣ်ဃးဒီး တၢ်ဝံသးစူၤန့ၣ် ပှၤတနီၤ အတၢ်ထံၣ်အိၣ်ဝဲ ဒ်လံာ်စီဆှံ တဲဝဲအသိး. အဝဲသ့ၣ်ထံၣ်ဝဲလၢ ပှၤတဂၤဂ့ၤတဂၤဂ့ၤ အိၣ်ဒီးတၢ်သဘျ့လၢ ကဃုထၢတၢ်. ဒီးအဝဲသ့ၣ်ပာ်ကဲဝဲ ပှၤဂၤအတၢ်ထံၣ် ဒီးအတၢ်စူၢ်တၢ်နာ်. ဒီးပှၤတၢ်ထံၣ် မ့ၢ်တဒ်သိးဒီးအီၤဘၣ်သနာ်က့ အဝဲသ့ၣ် ပာ်ကဲဝဲဒံး.
လၢဟီၣ်ခိၣ်ချၢအံၤ ဒ်သိးပှၤကအိၣ်ဒီး တၢ်ဝံသးစူၤနီၢ်ကီၢ်အဂီၢ် လံာ်စီဆှံမၤစၢၤဝဲသ့ဧါ.
ဘၣ်ဃးဒီး တၢ်ဝံသးစူၤန့ၣ် လံာ်စီဆှံ ဟ့ၣ်ကူၣ်ပှၤဒ်လဲၣ်
လံာ်စီဆှံ ဟ့ၣ်ဂံၢ်ဟ့ၣ်ဘါဝဲလၢ ပကအိၣ်ဒီးတၢ်ဝံသးစူၤ. လံာ်စီဆှံ တဲဝဲလၢ “သုတမ့ၢ် ပှၤလၢအခိၣ်ကိၤဘၣ်န့ၣ် မ်အအိၣ်ဖျါထီၣ်လၢ ပှၤခဲလၢာ် အမဲာ်ညါတက့ၢ်.” (ဖံလံးပံၤ ၄:၅) လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ ပကဆိကမိၣ်န့ၢ်တၢ်လၢ ပှၤဂၤအဂီၢ် ဒီးရ့ဒီးအဝဲသ့ၣ်ဂ့ၤဂ့ၤ. ပှၤလၢအမၤထွဲ လံာ်စီဆှံ အတၢ်ဟံးစုနဲၣ်ကျဲအံၤန့ၣ် အတၢ်ထံၣ် မ့ၢ်တဒ်သိးဒီးပှၤဂၤ မ့တမ့ၢ် အမ့ၢ်တတူၢ်လိာ် ပှၤဂၤအတၢ်ထံၣ်သနာ်က့ အပျဲဝဲလၢ ပှၤဂၤကမၤဝဲဒ် ပှၤတၢ်ထံၣ်အိၣ်ဝဲအသိး
ပှၤဟီၣ်ခိၣ်ဖိတဖၣ် ကဘၣ်အိၣ်ဒီး တၢ်သကဲာ်ပဝး ဒ်လဲၣ်န့ၣ် ကစၢ်ယွၤပာ်လီၤန့ၢ်အဝဲသ့ၣ် တၢ်သိၣ်တၢ်သီ. လံာ်စီဆှံ တဲဝဲလၢ “ပှၤကညီဧၢ, တၢ်လၢအဂ့ၤ မ့ၢ်မနုၤလဲၣ်န့ၣ် ယဟိဝၤယွၤ တဲသုဝံၤလံ.” (မံကၤ ၆:၈) လံာ်စီဆှံ ပာ်ဖျါထီၣ်ဝဲ ကစၢ်ယွၤ အတၢ်ဟံးစုနဲၣ်ကျဲ လၢကမၤစၢၤဝဲ ပှၤဟီၣ်ခိၣ်ဖိတဖၣ် ဒ်သိးအဝဲသ့ၣ် ကအိၣ်မူဘၣ် လၢအဂ့ၤကတၢၢ်အဂီၢ်.—ယၡါယၤ ၄၈:၁၇, ၁၈.
ကစၢ်ယွၤ တဟ့ၣ်ပှၤတၢ်ခွဲးတၢ်ယာ်လၢ ပကစံၣ်ညီၣ်ပှၤဂၤဘၣ်. လံာ်စီဆှံတဲဝဲလၢ “ပှၤလၢအဟ့ၣ်လီၤ တၢ်သိၣ်တၢ်သီ ဒီးပှၤလၢ အစံၣ်ညီၣ်တၢ်န့ၣ် အိၣ်ထဲတဂၤလီၤ. . . . မ့မ့ၢ်နၤန့ၣ် လၢနကစံၣ်ညီၣ် ပှၤလၢနဃၢၤအဂီၢ် နမ့ၢ်မတဂၤလဲၣ်.” (ယၤကိာ် ၄:၁၂) ကစၢ်ယွၤဟ့ၣ်ပှၤ တၢ်သဘျ့လၢ ပကဃုထၢတၢ်. ဒီးပအိၣ်ဒီးမူဒါလၢ ပတၢ်ဃုထၢအဃိ.—၅ မိၤၡ့ ၃၀:၁၉.
ဘၣ်ဃးဒီး တၢ်ယူးယီၣ်ပာ်ကဲန့ၣ် လံာ်စီဆှံ တဲဝဲဒ်လဲၣ်
ဘၣ်ဃးဒီး တၢ်ယူးယီၣ်ပာ်ကဲန့ၣ် လံာ်စီဆှံတဲဝဲလၢ “ယူးယီၣ်ပာ်ကဲ ပှၤအကလုာ်ကလုာ်.” (၁ ပ့းတရူး ၂:၁၇) အဃိ ပှၤလၢအမၤထွဲ လံာ်စီဆှံ အတၢ်သိၣ်တၢ်သီတဖၣ်န့ၣ် ပှၤမ့ၢ်နာ်တၢ်ဒ်လဲၣ်ဂ့ၤဒ်လဲၣ်ဂ့ၤ ပှၤမ့ၢ်အိၣ်မူ ဒ်လဲၣ်ဂ့ၤဒ်လဲၣ်ဂ့ၤ အဝဲသ့ၣ်ပာ်ကဲ ပှၤကိးဂၤဒဲး အတၢ်ဃုထၢ. (လူၤကၣ် ၆:၃၁) ဘၣ်ဆၣ် အခီပညီ တမ့ၢ်လၢအဝဲသ့ၣ် ကတူၢ်လိာ် ပှၤဂၤအတၢ်ထံၣ် ဒီးအတၢ်စူၢ်တၢ်နာ် ကိးမံၤဒဲးန့ၣ်ဘၣ်. ဒီးအခီပညီတမ့ၢ် စ့ၢ်ကီးလၢ အဝဲသ့ၣ် ကဆီၣ်ထွဲ ပှၤဂၤအတၢ်ဆၢတဲာ် ကိးမံၤဒဲးန့ၣ်ဘၣ်. အဝဲသ့ၣ် ကွၢ်လိဝဲ ယ့ၣ်ၡူးအဃိ အရ့ဒီးပှၤဂၤဂ့ၤဂ့ၤ ဒီးအတမၤဝဲ ဒ်သိးအတပာ်ကဲ ပှၤဂၤဘၣ်န့ၣ်ဘၣ်.
ဘၣ်တဘျီ ယ့ၣ်ၡူးတဲတၢ်ဒီး ပိာ်မုၣ်တဂၤလၢ အတၢ်ဘူၣ်တၢ်ဘါ တဒ်သိးဒီးအီၤဘၣ်. တကးဒံးဘၣ် ပိာ်မုၣ်တဂၤအံၤ အအိၣ်ဃုာ်ဒီး ပိာ်ခွါလၢ တမ့ၢ်အဝၤဘၣ်. အဃိ ယ့ၣ်ၡူးတဘၣ်သူၣ်ဘၣ်သးဝဲ အလုၢ်လၢ်သကဲာ်ပဝးဘၣ် သနာ်က့ ယ့ၣ်ၡူးတဲတၢ်ဒီးအီၤလၢ တၢ်ယူးယီၣ်ပာ်ကဲအပူၤ.—ယိၤဟၣ် ၄:၉, ၁၇-၂၄.
ဒ်ယ့ၣ်ၡူးအသိး ခရံာ်ဖိတဖၣ် အိၣ်ကတဲာ်ကတီၤအသးလၢ ကတဲဘၣ်ပှၤဂၤ လၢအတၢ်စူၢ်တၢ်နာ်လၢ ပှၤလၢအသးအိၣ် ဒိကနၣ်တၢ်တဖၣ်အအိၣ်. သနာ်က့ ဖဲအဝဲသ့ၣ်တဲဝဲအခါ တဲဝဲလၢ “တၢ်ပာ်ကဲဒိၣ်မး.” (၁ ပ့းတရူး ၃:၁၅) လံာ်စီဆှံ သိၣ်လိခရံာ်ဖိတဖၣ်လၢ တဘၣ်မၢဆူၣ် ပှၤဂၤလၢ ကအိၣ်ဒီးတၢ်ထံၣ် ဒ်သိးဒီးအဝဲသ့ၣ်ဘၣ်. လံာ်စီဆှံတဲဝဲလၢ ခရံာ်အပျဲၢ်အဘီၣ်တဖၣ်န့ၣ် “တလိၣ်အ့ၣ်လိာ်အသးဘၣ်. အကဘၣ်မ့ၢ် ပှၤလၢ အသူၣ်ကပုာ်လုးသးကဖီလီ လၢပှၤခဲလၢာ်အဖီခိၣ်.” ဒီးလၢပှၤသ့ၣ်တဖၣ်န့ၣ်အကျါန့ၣ် ပၣ်ဃုာ်ဒီး ပှၤလၢ အတၢ်စူၢ်တၢ်နာ် တဒ်သိးဒီးအဝဲသ့ၣ်ဘၣ်တဖၣ်.—၂ တံၤမသ့း ၂:၂၄.
ဘၣ်ဃးဒီးတၢ်သးဟ့န့ၣ် လံာ်စီဆှံတဲဝဲဒ်လဲၣ်
လံာ်စီဆှံတဲပှၤလၢ “ဂုာ်ကျဲးစၢး အိၣ်ဃူအိၣ်ဖိးဒီး ပှၤခဲလၢာ်တက့ၢ်.” (ဧ့ၤဘြံၤ ၁၂:၁၄) ပှၤလၢအဂုာ်ကျဲးစၢး အိၣ်ဃူအိၣ်ဖိးဒီးပှၤဂၤန့ၣ် တသးဟ့တၢ်ဘၣ်. ဒီးအဝဲတမၤတၢ်လၢ အထီဒါလိာ်သးဒီး အနီၢ်ကစၢ်အတၢ်ထံၣ်ဘၣ်. အဝဲဂုာ်ကျဲးစၢးဝဲလၢအဂ့ၤကတၢၢ် ဒ်သိး ကအိၣ်ဃူအိၣ်ဖိးဒီးပှၤဂၤအဂီၢ်. (မးသဲ ၅:၉) လံာ်စီဆှံ ဟ့ၣ်ဂံၢ်ဟ့ၣ်ဘါ ခရံာ်ဖိတဖၣ်လၢ ကအဲၣ်အဒုၣ်အဒါတဖၣ် ခီဖျိ အဝဲသ့ၣ် ကဘၣ်ရ့ဒီး ပှၤလၢရ့ဒီးအဝဲသ့ၣ် အၢအၢသီသီတဖၣ် ဂ့ၤဂ့ၤ.—မးသဲ ၅:၄၄.
လံာ်စီဆှံ တဲဝဲလၢ ကစၢ်ယွၤ “သးဟ့ဝဲ” ဒီး “သးဘၣ်အၢဝဲ” တၢ်မၤလၢအမၤဘၣ်ဒိ ပှၤဂၤအမံၤအသၣ် ဒီးအမၤဘၣ်ဒိဆါပှၤဂၤ. (ကတိၤဒိ ၆:၁၆-၁၉) လံာ်စီဆှံတဆၢအံၤ သူဝဲတၢ်ကတိၤလၢ အမ့ၢ် “သးဟ့” န့ၣ် အဲၣ်ဒိးပာ်ဖျါထီၣ်ဝဲလၢ ကစၢ်ယွၤ တဘၣ်သူၣ်ဘၣ်သးဝဲ တၢ်မၤလၢ အအၢအသီတဖၣ် နီတစဲးဘၣ်. လံာ်စီဆှံ ပာ်ဖျါထီၣ်ဝဲလၢ ကစၢ်ယွၤန့ၣ် သးအိၣ်ပျၢ်ပှၤတၢ်ကမၣ် ဒီးအသးအိၣ်မၤစၢၤဝဲ ပှၤလၢ အအဲၣ်ဒိးဆီတလဲအတၢ်အိၣ်မူ ဒီးအိၣ်မူဒ် အတၢ်သိၣ်တၢ်သီအသိးတဖၣ်.—ယၡါယၤ ၅၅:၇.
ဘၣ်ဃးဒီး တၢ်ဝံသးစူၤ ဒီးတၢ်ယူးယီၣ်ပာ်ကဲန့ၣ် လံာ်စီဆှံတဲဝဲဒ်လဲၣ်
တံတူး ၃:၂- “တဘၣ်မ့ၢ်ပှၤလၢ အခိၣ်ကိၤဘၣ် ဒီးကဘၣ် ပာ်ဖျါထီၣ် တၢ်သူၣ်စူၤသးစူၤ လၢပှၤခဲလၢာ်အဖီခိၣ် ထီဘိလီၤ.”
ပှၤလၢအခိၣ်တကိၤဘၣ်န့ၣ် ပှၤဂၤတၢ်ထံၣ် မ့ၢ်တဒ်သိးလိာ်အသးဒီးအီၤဘၣ် သနာ်က့ အကပာ်ဖျါထီၣ် တၢ်သူၣ်စူၤသးစူၤ. အဃိ ကမၤစၢၤအဝဲသ့ၣ် ခံကပၤလၢာ် ဒ်သိးကပာ်ကဲလိာ်သး.
မးသဲ ၇:၁၂- “အဃိ ကယဲၢ်တၢ်လၢ သုအဲၣ်ဒိးလၢ ပှၤဂၤကမၤသုန့ၣ် မၤအဝဲသ့ၣ်ဒ်န့ၣ် စ့ၢ်ကီးတက့ၢ်.”
ပဝဲသ့ၣ်တဖၣ်န့ၣ် ပှၤမ့ၢ်ပာ်ကဲပှၤ ဒီးပှၤမ့ၢ်ပာ်ကဲပတၢ်ထံၣ် ဒီးပတၢ်တူၢ်ဘၣ်န့ၣ် ပသးခုဒိၣ်မး. ဒ်သိး နကသ့ၣ်ညါအါထီၣ်လၢ နကဘၣ်မၤထွဲ ယ့ၣ်ၡူးအတၢ်သိၣ်လိတခါအံၤ ဒ်လဲၣ်အဂီၢ် ဖးကွၢ်တၢ်ဂ့ၢ်လၢ အမ့ၢ် “တၢ်သိၣ်တၢ်သီလၢ အလုၢ်ဒိၣ်ပှ့ၤဒိၣ်န့ၣ် မ့ၢ်မနုၤလဲၣ်.”
ယိၤၡူ ၂၄:၁၅- “သုကဘူၣ်ထီၣ်ဘါထီၣ်ယွၤ” မတဂၤလဲၣ်န့ၣ် “ဃုထၢလၢ သုနီၢ်ကစၢ်တက့ၢ်.”
ပမ့ၢ်ပာ်ကဲ ပှၤဂၤအတၢ်ခွဲးတၢ်ယာ်လၢ ကဃုထၢတၢ်လၢအနီၢ်ကစၢ်န့ၣ် ပကအိၣ်ဒီး တၢ်ဃူးတၢ်ဖိး.
မၤတၢ် ၁၀:၃၄- “ကစၢ်ယွၤ တကွၢ်ဒိၣ်ဆံး အါစှၤတၢ်ဘၣ်.”
ကစၢ်ယွၤ တကွၢ်ဒိၣ်ဆံးအါစှၤ ပှၤပိာ်မုၣ်ပိာ်ခွါ, တၢ်ဆဲးတၢ်လၤ, ထံကီၢ်, ကလုာ်ဒူၣ် ဒီးပှၤဒိၣ်ထီၣ်တၢ်လီၢ် နီတဘျီဘၣ်. အဃိ ပှၤလၢအအဲၣ်ဒိးကွၢ်လိ ကစၢ်ယွၤန့ၣ် အကပာ်ကဲဝဲ ပှၤတဂၤဂ့ၤတဂၤဂ့ၤ.
ဃဘးကူာ် ၁:၁၂, ၁၃- “[ကစၢ်ယွၤ] ဝံသးစူၤ တၢ်အၢတၢ်သီ တကဲဘၣ်.”
ကစၢ်ယွၤ အတၢ်ဝံသးစူၤန့ၣ် အိၣ်ဒီးအပတီၢ်. အဝဲတဟ့ၣ်အခွဲးလၢ ပှၤအၢပှၤသီတဖၣ် ကမၤအၢမၤသီတၢ် လီၤစိၤဘၣ်. ဒ်သိးနကသ့ၣ်ညါအါထီၣ် တၢ်ဂ့ၢ်အံၤအဂီၢ် ကွၢ်တၢ်ဂီၤမူလၢအမ့ၢ် ဘၣ်မနုၤအဃိ ယွၤပျဲတၢ်နးတၢ်ဖှီၣ်အခွဲးလဲၣ်.
ရိမ့ၤ ၁၂:၁၉- “အးလီၤလၢ ကစၢ်ယွၤအစုပူၤလၢ အကပာ်ဖျါထီၣ် အတၢ်သးဒိၣ်တက့ၢ်. တၢ်ကွဲးအသးအိၣ်ဝဲလၢ “ယဟိဝၤယွၤ တဲဝဲလၢ ‘တၢ်ဟ့ၣ်ကၣ်န့ၣ် မ့ၢ်ယတၢ်လီၤ, ယကဟ့ၣ်ကၣ်တၢ်လီၤ.’ ””a
ယဟိဝၤယွၤတဟ့ၣ်ပှၤ တၢ်ခွဲးတၢ်ယာ်လၢ ပကဟ့ၣ်ကၣ်တၢ်ဘၣ်. အဝဲကမၤလီၤမၢ်ကွံာ်ဝဲ တၢ်တတီတလိၤ ဖဲတၢ်ဆၢကတီၢ်လၢ အဝဲပာ်ပနီၣ်ဝဲဘၣ်အခါ. ဒ်သိး နကသ့ၣ်ညါအါထီၣ် တၢ်ဂ့ၢ်အံၤအဂီၢ် ဖးကွၢ်တၢ်ဂ့ၢ်လၢအမ့ၢ် “ပှၤလၢအတူၢ်ဘၣ် တၢ်တတီတလိၤတဖၣ် ဃ့တၢ်မၤစၢၤန့ၣ် ကစၢ်ယွၤကဒိကနၣ်ဝဲဧါ.”
a ယဟိဝၤန့ၣ် မ့ၢ်ဝဲ ကစၢ်ယွၤအမံၤ. (စံးထီၣ်ပတြၢၤ ၈၃:၁၈) ကွၢ်တၢ်ဂ့ၢ်လၢအမ့ၢ် “ယဟိဝၤန့ၣ် မ့ၢ်မတၤလဲၣ်.”