တၢ်ပှ့ၤဒိၣ်ထီၣ်အဃိ ပကြၢးမၤဒ်လဲၣ်
တူၢ်လိာ် တၢ်အိၣ်သး
တၢ်ပှ့ၤဒိၣ်ထီၣ် ကယီကယီ သနာ်က့ ပမ့ၢ်န့ၢ်ဘၣ်အါထီၣ် လါလဲန့ၣ် ဘၣ်သ့ၣ်သ့ၣ် ပတသ့ၣ်ညါလၢ တၢ်ပှ့ၤဒိၣ်ထီၣ်ဘၣ်. ဘၣ်ဆၣ် ဖဲတၢ်ပှ့ၤဒိၣ်ထီၣ်အခါ လါလဲမ့ၢ်အိၣ် ဒ်လီၢ်လီၢ်န့ၣ် ပှၤလၢ အဘၣ်ကွၢ်ထွဲ အဟံၣ်ဖိဃီဖိတဖၣ် ကဘၣ်ယိၣ်တၢ် ဒီးသးကိၢ်တၢ်.
တၢ်ပှ့ၤဒိၣ်ထီၣ်န့ၣ် ပဆီတလဲတသ့ဘၣ်. ဘၣ်ဆၣ် ပမ့ၢ်တူၢ်လိာ် တၢ်အိၣ်သးအံၤန့ၣ် အကကဲထီၣ် တၢ်မၤစၢၤလၢပဂီၢ်.
ဘၣ်မနုၤအဃိ ပဘၣ်တူၢ်လိာ် တၢ်အိၣ်သးလဲၣ်
တၢ်ပှ့ၤဒိၣ်ထီၣ်ဘၣ်ဆၣ် ပှၤလၢအတူၢ်လိာ် တၢ်အိၣ်သးအံၤန့ၣ် . . .
အကပာ်အသးမုာ်မုာ်. ပမ့ၢ်ပာ်ပသးမုာ်မုာ်န့ၣ် ပဆိကမိၣ်ထံတၢ်ကန့ၢ် ဒီးပဆၢတဲာ်တၢ်ကဘၣ်.
အကမၤတၢ်လၢ အကြၢးမၤဝဲ. အဒိ အကဟ့ၣ် တၢ်အဘူးအလဲ ဒီးကသူအစ့ သ့သ့ဘၣ်ဘၣ်.
အတတဲအါတၢ်ဒီး အဟံၣ်ဖိဃီဖိ ဘၣ်ဃးဒီး စ့အဂ့ၢ်ဘၣ်.
အတသူလၢာ်ဂီၤစ့ဘၣ် ဒီးအကဘၣ်ပှ့ၤ တၢ်အရ့ဒိၣ်မနုၤလဲၣ်န့ၣ် အကသ့ၣ်ညါဝဲ.
နမၤမနုၤသ့လဲၣ်
သးအိၣ်ဆီတလဲသး ဒ်တၢ်အိၣ်သးအိၣ်ဝဲအသိး. ဖဲတၢ်ပှ့ၤဒိၣ်ထီၣ် ချ့မးအခါ မ့ၢ်သ့န့ၣ် တဘၣ်သူလၢာ်ဂီၤစ့ အါအါတဂ့ၤ. ပှၤတနီၤန့ၣ် အသူစ့အါန့ၢ်ဒံး စ့လၢအအိၣ်ဒီးအီၤ အဃိ အတၢ်အိၣ်သး နးဒိၣ်ထီၣ်. လၢခံန့ၣ် အဝဲသ့ၣ် သးလီၤဘှံး. နမ့ၢ်အိၣ်ဒီး ဟံၣ်ဖိဃီဖိန့ၣ် နကအဲၣ်ဒိး ကွၢ်ထွဲအဝဲသ့ၣ် ဒီးမၤလၢပှဲၤန့ၢ် အတၢ်လိၣ်ဘၣ်. ဘၣ်ဆၣ် သ့ၣ်နီၣ်ထီၣ်လၢ တၢ်လၢအဝဲသ့ၣ် လိၣ်ဘၣ်ဝဲ အါန့ၢ်ဒံး တၢ်အဂၤန့ၣ် မ့ၢ်ဝဲ နတၢ်အဲၣ်, တၢ်ဆၢကတီၢ် ဒီးတၢ်ကဟုကယာ်.
ပှၤတနီၤန့ၣ် အသူစ့အါန့ၢ်ဒံး စ့လၢအအိၣ်ဒီးအီၤ အဃိ အတၢ်အိၣ်သး နးဒိၣ်ထီၣ်