တၢ်ဒုးတၢ်ယၤ ဒီးတၢ်ထီဒုၣ်ထီဒါ မၤဘၣ်ဒိပှၤကိးဂၤဒဲး
“စးထီၣ်လၢ ဟီၣ်ခိၣ်တၢ်ဒုး ခံဘျီတဘျီ ဝံၤအလီၢ်ခံ တၢ်သဘံၣ်သဘုၣ် လၢအလီၤပျံၤလီၤဖုး ဟဲအါထီၣ်ဝဲကွ့ၢ်ကွ့ၢ်. ဒီးပှၤလၢအတူၢ်ဘၣ်တၢ် ခီဖျိလၢ တၢ်သဘံၣ်သဘုၣ် တဖၣ်အံၤအဃိန့ၣ် ကအိၣ်ဝဲ အကကွဲၢ် ခံကထိအဃိ အိၣ်ဝဲ ပှၤဟီၣ်ခိၣ်ဖိ လွံၢ်ပူတပူညါ.”
ဘီမုၢ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ် အပှၤမၤစၢၤတၢ် အမံနၤ ကၠ့ၤ မိၤဟါမဲး, လါယနူၤအါရံၤ ၂၆, ၂၀၂၃.
တၢ်လီၢ်တနီၤန့ၣ် ဖျါဒ်သိးဒီး တၢ်မုာ်တၢ်ခုၣ်အိၣ်ဝဲ ဘၣ်ဆၣ် တၢ်ဒုးတၢ်ယၤ ဟဲကဲထီၣ်အသး သတူၢ်ကလာ်သ့. ဒီးပှၤတဂၤ မ့ၢ်အိၣ်ယံၤဒီး တၢ်ဒုးတၢ်ယၤ ဟဲကဲထီၣ်အလီၢ် သနာ်က့ အကထံၣ်ဘၣ် တၢ်ကီတၢ်ခဲလၢ ကျဲတဘိဘိဒံး. တကးဒံးဘၣ် တၢ်ဒုးမ့ၢ်ဝံၤ ဘၣ်ဆၣ် တၢ်ကီတၢ်ခဲ ကဆဲးအိၣ်ဝဲ ဖးယံာ်ဒံး. ပကကွၢ်သကိး တၢ်အဒိတနီၤ–
တၢ်အီၣ်တၢ်အီကၤ. ဟီၣ်ခိၣ်ဒီဘ့ၣ်တၢ်အီၣ်တၢ်အီ အတၢ်ကရၢကရိ ပာ်ဖျါထီၣ်ဝဲလၢ “တၢ်သၣ်ဝံၤလီၤဒိ အိၣ်ထီၣ်န့ၣ် အါတက့ၢ် အကဲထီၣ်သး ခီဖျိလၢ တၢ်ဒုးတၢ်ယၤအဃိ. ဒီးပှၤအါတက့ၢ်လၢ အတၢ်အီၣ်တၢ်အီ အိၣ်တယၢဘၣ်န့ၣ် အဝဲသ့ၣ်အိၣ်ဝဲလၢ တၢ်ဒုးတၢ်ယၤ ကဲထီၣ်အလီၢ်.”
တၢ်ကီတၢ်ခဲ အိၣ်ထီၣ်လၢ နီၢ်ခိ ဒီးသးအတၢ်တူၢ်ဘၣ် တကပၤ. တၢ်ဒုးတၢ်ယၤ မ့ၢ်ဟဲကဲထီၣ်လၢ တၢ်လီၢ်တတီၤတီၤန့ၣ် ပှၤလၢအအိၣ်လၢ တၢ်လီၢ်အဂၤတတီၤ ဘၣ်ယိၣ်တၢ် ဒီးသူၣ်ကိၢ်သးဂီၤတၢ်. ပှၤလၢအအိၣ်လၢ တၢ်ဒုးဟဲကဲထီၣ်အလီၢ်န့ၣ် ထံၣ်ဘၣ် တၢ်လီၤဘၣ်ယိၣ် လၢနီၢ်ခိတကပၤ တကးဒံးဘၣ် မၤဘၣ်ဒိစ့ၢ်ကီး အဝဲသ့ၣ်လၢ သးအတၢ်တူၢ်ဘၣ် တကပၤ. ဘၣ်ဆၣ် ညီနုၢ်န့ၣ် ပှၤတဖၣ်အံၤ တဒိးန့ၢ်ဘၣ် တၢ်ကူစါယါဘျါ လၢလၢပှဲၤပှဲၤဘၣ်အဃိ လီၤသးအုးဒိၣ်မး.
ပှၤဘၣ်ဃ့ၢ်မှံဟးဖျိး ခီဖျိလၢတၢ်ဒုးအဃိ. ဖဲလါစဲးပတ့ဘၢၣ် ၂၀၂၃ န့ၣ် ဘီမုၢ်စၢဖှိၣ်ကရၢလၢ ပှၤဘၣ်ကီဘၣ်ခဲဖိအဂီၢ် ပာ်ဖျါထီၣ်ဝဲလၢ ခီဖျိလၢ တၢ်ဒုးအဃိ ပှၤအိၣ်လၢ ဟီၣ်ခိၣ်ဒီဘ့ၣ်ညါ လၢအဘၣ် ဃ့ၢ်မှံဟးဖျိး ဒီးပှၤမၢဆူၣ်အီၤလၢ ကပာ်တ့ၢ်ကွံာ်အဟံၣ်န့ၣ် အနီၣ်ဂံၢ်အိၣ်ဝဲ ၁၁၄ ကကွဲၢ်ဘျဲၣ်.
တၢ်ကီတၢ်ခဲ အိၣ်ထီၣ်လၢ တၢ်ဖံးအီၣ်မၤအီၣ် (စံပွါယ့). ခီဖျိလၢ တၢ်ဒုးအဃိ စံပွါယ့ တၢ်ကီတၢ်ခဲ အိၣ်ထီၣ် ဒီးတၢ်ပှ့ၤဒိၣ်ထီၣ်န့ၢ်ဒံး လၢညါ. ဒီးခီဖျိလၢ ပဒိၣ်တဖၣ် သူဝဲကျိၣ်စ့လၢ တၢ်ဒုးတၢ်ယၤအဂီၢ် အါန့ၢ်ဒံး အသူဝဲလၢ တၢ်အိၣ်ဆူၣ်အိၣ်ချ့ ဒီးတၢ်ကူၣ်ဘၣ်ကူၣ်သ့ အဂီၢ်အဃိ ပှၤအါဂၤ ထံၣ်ဘၣ် တၢ်ကီတၢ်ခဲ. တကးဒံးဘၣ် ဖဲတၢ်ဒုးဝံၤအလီၢ်ခံ တၢ်ဟးဂူာ်ဟးဂီၤလၢ ပှၤကဘၣ် ဘှီဂ့ၤထီၣ်က့ၤအီၤန့ၣ် လၢာ်ဝဲကျိၣ်စ့ ဒီဒူၣ်ညါ.
တၢ်ကီတၢ်ခဲ အိၣ်ထီၣ်လၢ ခိၣ်ဃၢၤန့ဆၢၣ်. ခီဖျိလၢ ခိၣ်ဃၢၤန့ဆၢၣ် ဟးဂီၤလၢ တၢ်ဒုးတၢ်ယၤအဃိ ပှၤအါဂၤ ထံၣ်ဘၣ်တၢ်ကီတၢ်ခဲ. ထံဘၣ်အၢ, ကလံၤတကဆှီဘၣ် ဒီးဟီၣ်ခိၣ်ညၣ် တဂ့ၤဘၣ်အဃိ တၢ်အိၣ်ဆူၣ်အိၣ်ချ့ အတၢ်ကီတၢ်ခဲ ကဲထီၣ်အသး အကလုာ်ကလုာ်. ဒီးတၢ်ဒုးမ့ၢ်ဝံၤ သနာ်က့ မ့ၣ်ပိၢ်လၢ အအိၣ်တ့ၢ်ဒံး လၢဟီၣ်ခိၣ်လာ်န့ၣ် ကဲထီၣ်တၢ်လီၤဘၣ်ယိၣ်လၢ ပှၤသးသမူအဂီၢ်.
ခီဖျိလၢ တၢ်ဒုးတၢ်ယၤအဃိ တၢ်ဟးဂူာ်ဟးဂီၤအါမး ဒီးကျိၣ်စ့လၢာ်ဒီဒူၣ်.