Yinki mutindu balukutakanu ya beto kelutilaka?

Ntangu Baklisto ya ntete vuandaka sala balukutakanu na bau, bavuandaka mingimingi kuyimbila miyimbu, kusambila, kutanga masonukua mpe kubangula yau; kansi, milulu vuandaka ve. (1 Bakorinto 14:26) Nge kemona ti na balukutakanu ya beto diaka, yau kevuandaka mpenza mutindu yina.

Malongi kekatukaka na Biblia mpe yakesadisaka. Kimvuka mosimosi kekutakanaka na kilumbu ya sabala to ya lumingu samu na kuwa diskur ya Biblia; yau kezingilaka miniti 30. Yau kemonisaka mutindu Biblia ketubilaka mambu yina metadila luzingu ya beto mpe ntangu na beto. Muntu mosimosi kekindusuaka ti yandi landa na Biblia na yandi. Na manima ya diskur, beto kevuandaka na Ndongokolo ya “Nkengidi,” yina kezingilaka wola mosi, mpe muntu nionso lenda pesa bamvutu na biuvu ya disolo yina mekatuka na Nkengidi ya ndongokolo. Ndongokolo yango kesadisaka beto tosadila malongi ya Biblia na luzingu na beto. Disolo kaka yina, kimvuka mosimosi kati na bimvuka kuluta 110 000 kelongukaka yau na yinza mvimba.

Yau kesadisaka beto na kukudisa mayele ya beto ya kulonga. Beto kekutanaka diaka kilumbu mosi na katikati ya sabala samu na balukutakanu tatu beto kebokilaka Luzingu mpe Kisalu ya Baklisto, yina mekatuka na Mukanda ya Lukutakanu Luzingu mpe Kisalu ya Baklisto ya konso ngonda. Ya ntete, Bima ya ntalu ya Mpova ya Nzambi, kesadisaka beto na kumesana na kitini mosi ya Biblia yina kimvuka kukitangilaka. Kitini ya zole, Kukipesa na Kisalu ya Kusamuna kele na bambonosono kesadisaka na kusolula na bantu na Biblia. Mpangi mosi kepesaka malongi samu na kusadisa beto na kukudisa mayele ya beto ya kutanga mpe ya kutuba. (1 Timoteo 4:13) Kitini ya nsuka, Luzingu ya Baklisto kesadisaka beto na kubakusa mpenza mfunu ya kusadila bansikudukusu ya biblia konso kilumbu. Yau kesalamaka diaka na biuvu mpe bamvutu, samu na kubakusa Biblia na mudindu.

Kana nge mekuiza na balukutakanu ya beto, nge keyangalala na kumona mutindu malongi ya Biblia yina nge kelanda kevuanda kitoko mpenza.​—Yezaya 54:13.

• Yinki mambu nge kekuwa kana nge mekuenda na balukutakanu ya Bambangi ya Yehova?

• Na yinki lukutakanu nge kesepela kukuiza mbala yina kena kuiza?