Abrahami mpe Sara zitisaka Nzambi

Pembeni ya mbanza ya Babele, yavuandaka na mbanza mosi na nkumbu ya Ure, kisika bantu vuandaka sambila banzambi mingi yankaka ya luvunu, na kisika ya kusambila Yehova. Kasi yavuandaka na bakala mosi na Ure yina vuandaka sambila kaka Yehova. Nkumbu na yandi vuandaka Abrahami.

Yehova tubilaka Abrahami: ‘Katuka na buala na nge mpe bika bampangi na nge, mpe kuenda na yinsi yina munu kemonisa nge.’ Na manima Nzambi lakaka Abrahami: ‘Nge kekuma dikanda mosi ya nene, mpe munu kesala mambu ya mbote samu na bantu mingi ya ntoto ya mvimba na nzila na nge.’

Abrahami zabaka ve kisika yina Yehova vuandaka tinda yandi, kasi yandi tudilaka Yehova ntima. Na yau Abrahami, nketo na yandi Sara, tata na yandi Tera, mpe Loti muana ya mpangi na yandi, bakangaka bima na bau mpe babandaka kusala vuayaje ya yinda samu na kuzitisa Nzambi.

Abrahami vuandaka na bamvula 75 ntangu yandi mpe dibuta na yandi kumaka na yinsi yina Yehova zolaka bamona. Nkumbu ya yinsi yango vuandaka Kanana. Kuna Nzambi sololaka na Abrahami mpe yandi pesaka yandi nsilulu yayi: ‘Yinsi yayi nionso nge kena kumona nzinganzinga na nge, munu kepesa yau na bana na nge.’ Kasi Abrahami mpe Sara kumaka bambuta mpenza mpe bavuandaka na muana ve. Na yau yinki mutindu Yehova kokisaka nsilulu yango?