Kiminu na yandi memekama

Abrahami longaka muana na yandi Yisaka kuzola Yehova mpe kutudila bansilulu nionso ya Yehova ntima. Kasi ntangu Yisaka kumaka na bamvula kana 25, Yehova lombaka Abrahami sala diambu mosi ya mpasi mpenza. Yinki diambu?

Nzambi tubilaka Abrahami: ‘Melomba nge, baka muana na nge ya bakala kaka mosi mpe pesa yandi lokola nkayilu na mongo mosi na yinsi ya Moria.’ Abrahami zabaka ve samu na yinki Yehova lombaka yandi yandi sala mutindu yina. Kasi yandi zitisaka Yehova.

Na sunkasunka ya kilumbu yina landaka, Abrahami bakaka Yisaka mpe bisadi na yandi zole samu na kukuenda na Moria. Na manima ya bilumbu tatu, bamonaka bamongo ya yinsi yango na ntama. Abrahami tubilaka bisadi na yandi bavingila, samu yandi mpe Yisaka bamekuenda pesa nkayilu. Abrahami pesaka Yisaka bankuni samu yandi nata, mpe yandi mosi yandi simbaka mbele. Yisaka yuvusaka tata na yandi: ‘Wapi kibulu yina beto kepesa nkayilu?’ Abrahami tubaka: ‘Muana na munu, Yehova kepesa yau.’

Ntangu bakumaka na mongo yango, batungaka meza ya nkayilu. Na manima Abrahami kangaka Yisaka maboko mpe makulu na bansinga mpe yandi lekisaka yandi na zulu ya meza yango ya nkayilu.

Abrahami nangunaka mbele. Na ntangu yango, mbasi ya Yehova bokilaka yandi kukatuka na dizulu: ‘Abrahami! Kusala ve muana yimbi! Ntangu yayi munu mendima ti nge kele na kiminu na Nzambi samu nge vuandaka pene ya kupesa muana na nge lokola nkayilu.’ Na manima, Abrahami monaka muana dimeme mosi ya bakala yina bampoka na yau kangamaka na mua bayinti. Yandi zibulaka Yisaka bansinga na nsualu mpe na kisika na yandi, yandi pesaka muana dimeme yango ya bakala lokola nkayilu.

Banda kilumbu yango, Yehova kumaka bokidila Abrahami nkundi na yandi. Nge mezaba samu na yinki? Samu Abrahami vuandaka sala nionso yina Yehova vuandaka lomba yandi, ata ntangu yandi vuandaka bakusa ve samu na yinki Yehova vuandaka lomba yandi yandi sala yau.

Yehova vutukilaka nsilulu na yandi na Abrahami: ‘Munu kesakumuna nge, mpe munu kekumisa bana na nge mingi.’ Yazola monisa ti Yehova kesakumuna bantu nionso ya mbote na nzila ya dibuta ya Abrahami.