Bakokisaka ve nsilulu na bau

Yehova tubilaka Moize: ‘Monte na mongo kisika munu kele. Munu kesonika bansiku na munu na batablete ya mabanga mpe munu kepesa nge yau.’ Moize monteke na mongo mpe yandi vuandaka kuna bilumbu 40 mpipa muini. Ntangu yandi vuandaka kuna, Yehova sonikaka Bansiku Kumi na batablete zole ya mabanga mpe yandi pesaka yau Moize.

Na manima ya mua ntangu, Bayisaele kanisaka ti Moize sundolaka bau. Batubaka na Arona: ‘Beto zola muntu mosi tuadisa beto. Sadila beto nzambi!’ Arona tubaka: ‘Beno pesa munu wolo na beno.’ Yandi ziulumunaka wolo yango mpe yandi salaka kiteke ya muana ngombe. Bantu tubaka: ‘Muana ngombe yayi nde Nzambi yina bimisaka beto na Ezipito!’ Babandaka kusambila muana ngombe ya wolo yango, mpe basalaka feti. Basalaka yimbi? Ee, samu balakaka ti bakesambila kaka Yehova. Kasi ntangu yayi bakokisaka ve nsilulu na bau.

Yehova vuandaka mona diambu yina vuandaka salama, mpe yandi tubilaka Moize: ‘Kita kisika bantu kele. Bazitisa munu ve mpe bakena kusambila nzambi ya luvunu.’ Moize kitaka na mongo na batablete yango zole.

Ntangu yandi kumaka pene ya kan, Moize kuwaka bantu kena kuyimbila. Na manima, yandi monaka bakena kukina mpe bakena kufukamina muana ngombe. Moize fuemaka ngolo. Yandi lozaka batablete yango zole na ntoto, mpe yapanzanaka. Yandi panzaka kiteke yango kondua kuvingila. Na manima yandi yuvusaka Arona: ‘Yinki mutindu bantu mendimisa nge nge sala diambu ya yimbi ya mutindu yayi?’ Arona tubaka: ‘Kufuema ve. Nge mezaba mutindu bantu yayi kele. Bazolaka munu sadila bau nzambi, yau yina munu tulaka wolo na bau na tiya mpe yabimisaka muana ngombe yayi!’ Yalombaka ve Arona sala plina. Moize vutukaka na mongo mpe yandi lombaka Yehova nlemvukila bantu yango.

Yehova nlemvukilaka bantu yina vuandaka pene ya kuzitisa yandi. Yavuandaka mpenza na mfunu Bayisaele landa lutuadusu ya Moize?