APANDISI C

Mutindu ya kutuadisa ndongokolo ya Biblia na kusadilaka Zinga mvula na mvula na kiese!

Bampangi sambilaka mingi mpe batadilaka na dikebi mambu yina fueti vuanda na Zinga mvula na mvula na kiese! Samu na kubakila mpenza mukanda yango mambote, sadila mayele yayi melanda ntangu nge kena kutuadisa bandongokolo ya Biblia.

Tekila ndongokolo

1. Bongisaka na dikebi nionso. Ntangu nge kena kusala yau, kanisa bansatu, luzingu, mpe bindimeli ya nlonguki na nge. Kanisa na zulu ya konso diambu yina lenda vuanda mpasi samu na yandi na kubakusa to kusadila. Tadila mutindu mambu yina kele na kitini “Sosa” lenda sadisa nlonguki na nge, mpe vuanda pene ya kusadila yau, mutindu yamelombama, na ntangu ya ndongokolo.

Na ntangu ya ndongokolo

2. Beno banda mpe beno sukisa na kisambu, katula kaka kana nlonguki memanga.
3. Kutuba mingi ve. Tula makanisi na nge na mambu yina kele na mukanda, mpe bika nlonguki na nge tuba.
4. Kana beno mebanda kitini ya yimpa, beno tanga mambu yina metadila kitini yango mpe beno tubila ndambu ya bayintu ya diambu ya malongi ya kitini yango.
5. Kana beno memanisa kitini mosi, sadila kitini mvutukulu samu na kusadisa nlonguki na nge yandi bika zimbakana bakedika yina yandi melonguka.
6. Ntangu nge kena kulonguka konso dilongi na nlonguki na nge:
1. Beno tanga paragrafe.
2. Beno tanga baverse nionso yina bamesonika “Tanga.”
3. Beno tanga baverse yankaka kana yakele na mfunu ya kusala yau.
4. Beno tala bavideo nionso yina bamesonika “Tula” (kana beno kele na yau).
5. Yuvusa nlonguki biuvu nionso.
6. Lomba nlonguki na nge yandi tala foto yina kele na kitini “Kota na mpinda,” mpe lomba nlonguki tubila yau.
7. Sadila ankadre “Lukanu” samu na kusadisa nlonguki yandi zaba kana yandi kena kukuenda na ntuala na kimpeve. Nge lenda kindisa yandi yandi sadila lukanu yina kele vana, to yandi kukitudila balukanu yankaka, to yandi sala nionso zole.
8. Yuvusa nlonguki na nge kana yandi sepelaka na mosi ya masolo to bavideo ya kitini “Sosa” ntangu yandi vuandaka bongisa.
9. Beno meka kumanisa kulonguka konso dilongi kaka na mbala mosi.

Na manima ya ndongokolo

7. Tatamana kukanisa nlonguki na nge. Sambila Yehova sakumuna mutindu nlonguki na nge kena kukuenda na ntuala mpe yandi pesa nge nduenga samu nge zaba mutindu ya kusadisa yandi.