Samu na yinki nkumbu ya Yehova kele na mfunu mingi samu na Yesu

1-2. (a) Yinki Yesu salaka na mpipa ya nsuka tekila bakufua yandi? (b) Yinki biuvu beto ketadila na disolo yayi?

YAVUANDAKA na mpimpa ya kilumbu ya jeudi 14 Nisana ya mvula 33 N.B., mpe yakumaka pene samu bateka Yesu, basambisa yandi, bapesa yandi kitumbu, baniokola yandi, mpe bakufua yandi. Yandi katukaka kumanisa kudia madia mosi ya spesiale na shambre mosi ya zulu kintuadi na bantumua na yandi ya kukuikama. Na manima ya madia yango, Yesu tubilaka bantumua na yandi bampova mosi ya kukindisa. Mpe ntangu fioti tekila bakatuka na shambre yango ya zulu, Yesu salaka kisambu mosi ya mfunu mpenza. Ntumua Yoane sonikaka kisambu yango; yakele na Yoane kikapu 17.

² Yinki mutindu kisambu yango kena kumonisa mambu yina vuandaka tungisa Yesu na ntangu yango? Yinki diambu vuandaka na mfunu samu na yandi ntangu yandi vuandaka awa na ntoto? Beto tubila bamvutu ya buivu yango.

“MUNU TUBILAKA BAU NKUMBU NA NGE”

3. Yinki Yesu tubaka samu na nkumbu ya Yehova, mpe yinki yazolaka monisa? (Yoane 17:6, 26)

³ Na kisambu na yandi, Yesu tubaka: “Munu tubilaka bau nkumbu na nge.” Ya kedika, Yesu tubaka mbala zole ti yandi tubilaka banlonguki na yandi nkumbu ya Yehova. (Tanga Yoane 17:6, 26.) Yinki yandi zolaka tuba? Yandi tubilaka bau nkumbu mosi yina bazabaka ve? Banlonguki ya Yesu vuandaka Bayuda, na yau bazabaka deja nkumbu ya Nzambi, Yehova. Nkumbu yango kele bambala kuluta 7 000 na Masonukua ya Ebre. Na yau, Yesu vuandaka tubila mpenza ve nkumbu ya Nzambi; kasi, yandi zolaka tubila bau nde Nzambi ya yinki mutindu Yehova kele. Yesu sadisaka banlonguki na yandi bazaba Yehova mbote, yazola tuba bazaba balukanu na Yandi, bisalu na Yandi, mpe bikadulu na Yandi, na mutindu yina muntu mosi ve lendaka kanisa.

4-5. (a) Yinki mutindu nkumbu ya muntu lenda kuma na mfunu mingi na meso na beto? Pesa kifuani. (b) Na yinki mutindu Balonguki ya Yesu kuizaka zaba nkumbu ya Yehova?

⁴ Na kifuani, kanisa ti nkulutu mosi ya kimvuka na beno na nkumbu ya David kele doktere. Mpe nge mezaba mpangi yango banda bamvula mingi. Kasi kilumbu mosi yamelomba basala nge operasion. Bamenata nge na nsualu na opitale kisika mpangi yango kesalaka, mpe yandi mesadila mayele na yandi ya kimunganga samu na kuvukisa luzingu na nge. Na ntangu yango nge mekuma kuzola mpangi yango mingi kuluta, mpe kana nge mekuwa nkumbu na yandi, nge kekanisa na diambu yina yandi sadilaka nge. David kele kaka diaka ve nkulutu yina nge mezaba; kasi yandi mekuma diaka doktere yina vukisaka luzingu na nge.

⁵ Mutindu mosi, Banlonguki ya Yesu zabaka deja nkumbu ya Yehova. Kasi nkumbu yango kumaka na mfunu mingi kuluta samu na bau na manima ya kuwa malongi ya Yesu. Samu na yinki beto lenda tuba plina? Samu Yesu monisaka kimuntu ya Tata na yandi na bampova mpe na bisalu na yandi nionso. Na yau, bantumua ya Yesu kuizaka “zaba” Yehova mbote kuluta na kuwaka mutindu Yesu vuandaka longa mpe na kutalaka mutindu yandi vuandaka sadila bantu yankaka mambu.​—Yoa. 14:9; 17:3.

“NKUMBU NA NGE, YINA NGE MEPESA MUNU”

6. Na yinki mutindu Yehova pesaka Yesu nkumbu na Yandi? (Yoane 17:11, 12)

⁶ Na kisambu na yandi, Yesu sambilaka samu na banlonguki na yandi, na kutubaka: “Tanina bau samu na nkumbu na nge, yina nge mepesa munu.” (Tanga Yoane 17:11, 12.) Yazola monisa ti nkumbu ya Yesu kumaka Yehova? Ve. Simba ti ntangu Yesu tubilaka nkumbu ya Yehova, yandi tubaka “nkumbu na nge.” Na yau nkumbu ya Yehova kumaka ve nkumbu ya Yesu. Kasi yinki Yesu zolaka tuba ntangu yandi tubaka ti Yehova pesaka yandi nkumbu na yandi? Ntetentete, Yesu vuandaka monisi mpe Ntubidi ya Yehova. Yandi kuizaka na nkumbu ya Tata na yandi mpe yandi salaka bisalu ya kilendo na nzila ya nkumbu yango. (Yoa. 5:43; 10:25) Diaka, nkumbu ya Yesu zola monisa “Yehova kele luvuluzu.” Ya kedika, nkumbu ya Nzambi kele mpenza na nguizani na nkumbu ya Yesu.

7. Samu na yinki Yesu lendaka tuba na nkumbu ya Yehova? Pesa kifuani.

⁷ Na kifuani, kana ambasadere mosi kele monisi ya n’yadi mosi, yandi lenda tuba na nkumbu ya n’yadi yango. Na yau, bampova ya ambasadere yango kevuanda na kilendo mutindu mosi na bampova ya n’yadi yango. Mutindu mosi, Yesu vuandaka monisi ya Yehova mpe yandi vuandaka tuba na bantu na nkumbu ya Yehova.​—Mat. 21:9; Luka 13:35.

8. Samu na yinki Yehova tubaka ti nkumbu na yandi vuandaka “na kati” ya Yesu ata tekila yandi kuiza na ntoto? (Kobima 23:20, 21)

⁸ Biblia kebokidilaka Yesu “Mpova” samu Yehova sadilaka yandi samu na kutubila bambasi mpe bantu mambu yina Yandi vuandaka na nsatu bazaba mpe basala. (Yoa. 1:1-3) Kondua ntembe Yesu vuandaka mbasi yina Yehova tindaka samu na kutanina Bayisaele ntangu bavuandaka na dezere. Ntangu Yehova tubilaka Bayisaele bazitisa mbasi yango, yandi tubaka: “Samu nkumbu na munu kele na kati na yandi.”a (Tanga Kobima 23:20, 21.) Nkumbu ya Yehova vuandaka “na kati” ya Yesu samu yandi kele monisi ya Yehova mpe yandi kele muntu ya ntete yina kekotilaka mpe kesantisaka nkumbu ya Tata na yandi.

“TATA, PESA NKUMBU NA NGE NKEMBO”

9. Yinki memonisa ti nkumbu ya Yehova vuandaka na mfunu samu na Yesu?

⁹ Mutindu beto mekatuka tubila yau, ata tekila Yesu kuiza na ntoto, nkumbu ya Yehova vuandaka na mfunu mingi samu na yandi. Yakele diambu ya kukamua ve ti nkumbu ya Yehova vuandaka na nguizani mpenza na mambu nionso yina Yesu vuandaka sala ntangu yandi vuandaka na ntoto! Pene ya nsuka ya kisalu na yandi awa na ntoto, Yesu lombaka Yehova: “Tata, pesa nkumbu na nge nkembo.” Na mbala mosi, Tata na yandi pesaka mvutu na ndinga mosi ya ngolo yina katukaka na dizulu: “Munu mepesa yau nkembo mpe munu kepesa yau diaka nkembo.”​—Yoa. 12:28.

10-11. (a) Yinki mutindu Yesu pesaka nkumbu ya Yehova nkembo? (Tala diaka foto.) (b) Samu na yinki yalombaka kusantisa mpe kukotila nkumbu ya Yehova?

¹⁰ Yesu diaka pesaka nkumbu ya Tata na yandi nkembo. Na yinki mutindu? Mosi ya mitindu yango vuandaka kutubila bantu yankaka bikadulu mpe bisalu ya kukamua ya Tata na yandi. Kasi yandi salaka diaka mambu yankaka. Yalombaka kusantisa nkumbu ya Yehova mpe kukotila lokumu na yandi.b Yesu monisaka ti yavuandaka na mfunu ntangu yandi longaka banlonguki kisambu ya kifuani. Yandi tubaka: “Tata na beto ya dizulu, nkumbu na nge santisua.”​—Mat. 6:9.

¹¹ Samu na yinki yalombaka kusantisa mpe kukotila nkumbu ya Yehova? Samu na bilanga ya Edeni, Satana tubaka luvunu samu na Yehova Nzambi. Satana tubaka ti Yehova vuandaka muntu ya yimbi mpe Yandi vuandaka suekila Adamu mpe Eva diambu mosi ya mbote. (Eba. 3:1-5) Satana tubaka diaka ti mutindu ya Yehova ya kusala mambu vuandaka ve ya mbote. Mambu ya luvunu yina Satana tubaka bebisaka lokumu to nkumbu ya Yehova. Na manima, na bilumbu ya Yobi, Satana tubaka ti bantu yina kesadilaka Yehova kesadilaka yandi kaka samu na bima yina balenda baka na Yandi. Muntu yango ya luvunu tubaka ti bantu kezolaka ve Yehova mpe baketatamana ve kusadila Yandi kana bamekutana na banzomono. (Yobo 1:9-11; 2:4) Yalombaka ntangu samu na kumonisa nani kele muntu ya luvunu, Yehova to Satana.

“MUNU KENA KUPESA LUZINGU NA MUNU”

12. Yinki Yesu vuandaka pene ya kusala lokola yandi vuandaka zola nkumbu ya Yehova?

¹² Lokola Yesu vuandaka zola Yehova, yandi vuandaka na nsatu ya kusala nionso yina yandi lenda samu na kusantisa mpe kukotila nkumbu ya Yehova. Yesu tubaka: “Munu kena kupesa luzingu na munu.” (Yoa. 10:17, 18) Ya kedika, yandi vuandaka ata pene ya kufua samu na nkumbu ya Yehova.c Bantu zole ya ntete ya kukoka, Adamu mpe Eva pesaka Nzambi mukongoni mpe baponaka ndambu ya Satana. Na lusuasanu na bau, Yesu vuandaka pene ya kukuiza na ntoto mpe kumonisa nzola na yandi samu na Yehova. Yesu salaka yau na kuzitisaka Yehova na mambu nionso yina yandi vuandaka sala mpe kutuba. (Ebr. 4:15; 5:7-10) Yandi taninaka kukuikama luzingu na yandi ya mvimba tii na lufua na yandi na yinti ya mpasi. (Ebr. 12:2) Na mutindu yango, yandi monisaka nzola na yandi samu na Yehova mpe samu na nkumbu na Yandi.

13. Samu na yinki Yesu vuandaka mutu yina mebonga mpenza samu na kumonisa ti Satana vuandaka muntu ya luvunu? (Tala diaka foto.)

¹³ Mambu nionso yina Yesu salaka monisaka ti Satana nde kele muntu ya luvunu, kasi Yehova ve! (Yoa. 8:44) Yesu zabaka Yehova mbote kuluta muntu nionso yankaka. Kana yavuandaka ata na kedika mosi na luvunu yina Satana tubaka samu na Yehova, Yesu zolaka zaba yau. Kasi, Yesu vuandaka na nzengolo ya kukotila nkumbu ya Yehova. Ata ntangu yamonanaka lokola Yehova mesundola yandi, Yesu vuandaka pene ya kufua na kisika ya kumanga kuzitisa Tata na yandi ya nzola.​—Mat. 27:46.d

“MUNU MEMANISA KISALU YINA NGE PESAKA MUNU”

14. Yinki mutindu Yehova pesaka Yesu n’sendo samu na kukuikama na yandi?

¹⁴ Na kisambu yina Yesu salaka na mpipa ya nsuka tekila yandi kufua, yandi tubaka: “Munu memanisa kisalu yina nge pesaka munu.” Yandi tulaka ntima ti Yehova kepesa yandi n’sendo samu na kukuikama na yandi. (Yoa. 17:4, 5) Mpe Yesu vuandaka na bamfunu ya mbote ya kutudila Tata na yandi ntima. Yehova bikaka nzila ve ti yandi bikana na biziami. (Mis. 2:23, 24) Yandi futumunaka Yesu mpe yandi pesaka yandi kisika ya mfunu kuluta na dizulu. (Flp. 2:8, 9) Nsukansuka, Yesu bandaka kuyala lokola Ntinu ya Kimfumu ya Nzambi. Yinki mambu Kimfumu yango kekokisa? Kitini ya zole ya kisambu ya Yesu metubila beto: “Kimfumu na nge kuiza. Lukanu na nge [Yehova] salama mpe na ntoto, lokola na dizulu.”​—Mat. 6:10.

15. Yinki mambu yankaka Yesu kekokisa?

¹⁵ Ntama mingi ve, Yesu kenuanisa bambeni ya Nzambi mpe yandi kekufua bantu ya yimbi na Armagedoni. (Em. 16:14, 16; 19:11-16) Ntangu fioti na manima na yau, yandi keloza Satana na “dibulu ya mpinda,” kisika yina yandi kevuanda diaka na dikoki ya kusala ata kima mosi ve. (Em. 20:1-3) Yesu kevutula kiyenge mpe yandi kesadisa bantu bavutuka ya kukoka na Luyalu na yandi ya bamvula 1 000. Yandi kefutumuna bantu ya kufua. Yandi kesala ti ntoto ya mvimba kuma paradiso. Lukanu ya Yehova kekokisama!​—Em. 21:1-4.

16. Yinki mambu kesalama na nsuka ya Luyalu ya bamvula 1 000?

¹⁶ Yinki mutindu luzingu kevuanda na nsuka ya Luyalu ya bamvula 1 000? Disumu mpe kukondua kukoka kevuanda diaka ve. Bantu kevuanda diaka ve na nsatu ya kulomba nlemvo samu na masumu na bau na nzila ya nkudulu; bakevuanda diaka ve na nsatu ti muntu to nganga-nzambi sadisa bau samu bavuanda na nguizani ya mbote na Yehova. Mpe “mbeni ya nsuka, lufua [yina Adamu kotisaka], kekatulua ngolo.” Biziami kebikana mpamba. Bantu ya kufua kevutuka na luzingu. Bantu nionso na ntoto kekuma ya kukoka.​—1 Ko. 15:25, 26.

17-18. (a) Yinki mambu kesalama na nsuka ya Luyalu ya bamvula 1 000? (b) Yinki Yesu kesala ntangu yandi kekuma na nsuka ya luyalu na yandi? (1 Bakorinti 15:24, 28) (Tala diaka foto.)

¹⁷ Yinki mambu yankaka kesalama na nsuka ya Luyalu ya bamvula 1 000? Na ntangu yango, diambu mosi ya spesiale kesalama. Bantembe na diambu metadila kusantisa nkumbu ya Yehova kevuanda diaka ve. Na yinki mutindu? Na bilanga ya Edeni, Satana tubaka ti Yehova kele muntu ya luvunu mpe Yandi kele n’yadi yina mekondua nzola. Banda ntangu yango, nkumbu na yandi kesantisuaka mbala na mbala na bantu yina kepesaka yandi lokumu mpe kezitisaka yandi. Na yau, na nsuka ya Luyalu ya bamvula 1 000, Yehova kebaka lokumu na mutindu ya kukoka. Mpe Yehova kemonisa puelele ti yandi kele Tata ya nzola.

¹⁸ Nsukansuka mambu yina Satana tubaka kemonana ya luvunu samu na mvimbamvimba. Yinki Yesu kesala ntangu yandi kekuma na nsuka ya luyalu na yandi? Yandi kelanda kifuani ya Satana mpe yandi ketombokila Yehova? Ve! (Tanga 1 Bakorinti 15:24, 28.) Yesu kevutula Kimfumu na maboko ya Tata na yandi. Yandi kekukikitisa na luyalu ya Yehova. Ya kedika, na lusuasanu na Satana, Yesu kendima kuvutula kimfumu na yandi nionso na Yehova samu yandi kezolaka yandi.

19. Yinki mfunu nkumbu ya Yehova kele na yau samu na Yesu?

¹⁹ Yakele ve diambu ya kukamua mutindu Yehova ndimaka kupesa nkumbu na Yandi na Yesu! Yesu monisaka ti yandi vuandaka monisi ya kukoka ya Tata na yandi. Na yau, yinki mfunu nkumbu ya Yehova kele na yau samu na Yesu? Yakele na mfunu mingi samu na Yesu kuluta konso kima yankaka. Yandi vuandaka pene ya kufua samu na nkumbu yango, mpe yandi kevuanda pene ya kuvutula bima nionso na Yehova na nsuka ya Luyalu ya bamvula 1 000. Yinki mutindu beto lenda landa kifuani ya Yesu? Beto ketubila mvutu ya kiuvu yango na disolo melanda.