Ndima nlemvo ya Yehova

1-2. Yinki Yehova kesalaka kana beto mebalula mpenza ntima na masumu na beto? (Tala diaka foto ya kuvertire.)

NTINU Davidi vuandaka na kiadi ya ngolo samu na masumu yina yandi salaka na ntama. (Nz. 40:12; 51:3, bampova ya zulu ya kikapu) Kasi, yandi balulaka mpenza ntima, mpe Yehova nlemvukilaka yandi. (2 Sa. 12:13) Davidi vuandaka na kiese ntangu yandi bakusaka ti Yehova nlemvukilaka yandi.​—Nz. 32:1.

² Mutindu mosi na Davidi, beto lenda vuanda na kiese kana Yehova memonisina beto ntima kiadi. Yakele diambu ya kubomba kuzaba ti Yehova kendimaka kunlemvukila masumu na beto, ata kana yakele masumu ya nene. Yandi kenlemvukilaka beto kana beto mebalula mpenza ntima, beto mefunguna masumu na beto, mpe beto mesala nionso yina beto lenda samu beto bika vutukila yau! (Mas. 28:13; Mis. 26:20; 1 Yoa. 1:9) Mpe yakele diambu ya kukindisa kuzaba ti Yehova kenlemvukilaka mpenza masumu na beto, mpe yakekumaka kutu lokola beto salaka yau ata fioti ve!​—Ezk. 33:16.

3-4. Yinki mutindu mpangi mosi ya nketo kukimonaka na manima ya kubaka mbotama, mpe yinki beto ketubila na disolo yayi?

³ Kasi na bantangu yankaka, bantu yankaka lenda vuanda na mukakatano ya kundima ti Yehova nlemvukilaka bau. Beto tadila kifuani ya Jennifer, yina yundukaka na kedika. Ntangu yandi vuandaka ntuenia, yandi kumaka na ndiatulu ya yimbi mpe yandi vuandaka suekila yau bibuti na yandi. Bamvula mingi na manima, yandi vutukilaka Yehova mpe nsukansuka, yandi kokisaka mambu yina kelombamaka samu na kubaka mbotama. Yandi metuba: “Na ntama, munu vuandaka kukipesa mingi na kusosa bima ya yinza, na kusala pite, na kunua malavu mingi, mpe munu vuandaka muntu ya nganzi ya ngolo. Na makanisi na munu, munu zabaka ti lokola munu lombaka nlemvo mpe munu balulaka ntima, munu kumaka ya kuvedila na nzila ya nkayilu ya Klisto. Kasi munu vuandaka koka ve kukindimisa ti Yehova nlemvukilaka munu.”

⁴ Na bantangu yankaka, yakevuandaka mpasi samu nge kukindimisa ti Yehova menlemvukilaka masumu na nge ya ntama? Zaba ti Yehova kele na ntima kiadi, mpe yandi zola ti beto vuanda na kiyenge mutindu mosi na Davidi. Na disolo yayi, beto ketubila samu na yinki beto fueti ndima nlemvo ya Yehova mpe mambu yina lenda sadisa beto samu beto ndima yau.

SAMU NA YINKI BETO FUETI NDIMA NLEMVO YA YEHOVA?

5. Satana kezolaka beto kukindimisa na yinki diambu? Pesa kifuani.

⁵ Kana beto kena kundima ti Yehova menlemvukilaka beto, beto lenda kubua ve na mosi ya bantambu ya Satana. Kuzimbakana ve ti Satana kesalaka nionso samu na kupekisa beto kusadila Yehova. Samu na kukokisa lukanu na yandi, yandi kesosaka kundimisa beto ti Yehova lenda nlemvukila ve masumu na beto. Beto tubila bakala mosi ya Korinti yina bakatulaka na kimvuka samu na pite. (1 Ko. 5:1, 5, 13) Na manima, ntangu yandi balulaka ntima, Satana vuandaka na nsatu ti bampangi ya kimvuka bika nlemvukila bakala yango mpe babika yamba yandi na kimvuka. Diaka, Satana vuandaka na nsatu ti bakala yango yina balulaka ntima kanisa ti Yehova nlemvukilaka ve masumu na yandi​—samu kana yandi ‘mekukikotisa na kiadi ya ngolo,’ yandi lendaka lemba kusadila Yehova. Satana soba ve balukanu na yandi to mayele ya yimbi yina yandi kesadilaka. Kasi “beto mezaba mbote mayele na yandi.”​—2 Ko. 2:5-11.

6. Yinki lenda sadisa beto samu beto lemba kukipesa foti?

⁶ Kana beto mendima mpenza ti Yehova menlemvukila beto, beto lenda vutukila kiese na beto. Kana beto mesala disumu, beto kekukimonaka yimbi. (Nz. 51:17) Kukimona plina kele yimbi ve samu kikansasa na beto lenda tinda beto beto sala mambu yina lenda sadisa beto beto soba ndiatulu na beto. (2 Ko. 7:10, 11) Kasi kana beto kena kukipesa kaka foti na manima ya kubalula ntima, beto lenda lemba kusadila Yehova. Nzokande, kana beto mendima ti Yehova menlemvukila beto mpenza, beto lenda lemba kukipesa foti. Na manima, beto lenda banda kusadila Yehova na kikansasa ya kuvedila mpe na kiese ya ngolo, mutindu Yehova kezolaka beto sadila yandi. (Kol. 1:10, 11; 2 Tim. 1:3) Kasi, yinki mutindu beto lenda kukindimisa ti Yehova menlemvukilaka beto?

YINKI LENDA SADISA BETO SAMU BETO NDIMA NLEMVO YA YEHOVA?

7-8. Yinki mambu Yehova tubilaka Moize samu na yandi mosi, mpe yamendimisa beto yinki diambu? (Kobima 34:6, 7)

⁷ Kanisa na mambu yina Yehova metuba samu na yandi mosi. Na kifuani, tala mambu yina Yehova tubilaka Moize na mongo ya Sinai.a (Tanga Kobima 34:6, 7.) Atako Yehova kele na bikadulu mingi ya mbote, yandi ponaka kutubila Moize ti yandi kele “Nzambi ya nlemvo mpe ya ntima kiadi.” Nge mekanisa ti Nzambi ya mutindu yayi lenda manga kunlemvukila kisadi na yandi mosi yina mebalula mpenza ntima na masumu na yandi? Yandi lenda manga ve! Kana Yehova memanga kunlemvukila kisadi yango, Yandi kevuanda Nzambi ya kinkesi mpe ya ntima yimbi​—bikadulu yina Yehova lenda monisa ata fioti ve.

⁸ Beto lenda kukindimisa ti Yehova kefingisa nkumbu na yandi ata fioti ve, samu yandi kele Nzambi ya kedika. (Nz. 31:5) Na yau, beto lenda ndimina mambu yina yandi ketubaka. Kana nge memona ti nge kena kutatamana kukipesa foti samu na masumu na nge ya ntama, kukiyuvusa: ‘Munu kendimaka ti Yehova kele mpenza na nlemvo mpe na ntima kiadi, mpe yandi kenlemvukilaka konso nsumuki yina mebalula ntima? Kana nge kendimaka yau, nge diaka nge lenda kukindimisa ti Yehova menlemvukilaka nge.’

9. Yinki lenda monisa mpova kunlemvukila? (Nzembo 32:5)

⁹ Kanisa na mambu yina Yehova metuba na Biblia samu na nlemvo na yandi. Na kifuani, beto tala na Biblia mutindu Davidi tubilaka nlemvo ya Yehova. (Tanga Nzembo 32:5.) Davidi tubaka: ‘Nge nlemvukilaka banzimbala ya masumu na munu.’ Mpova ya Ebre yina bamebangula na “kunlemvukila” lenda monisa “kunanguna,” to “kunata.” Yazola monisa ti ntangu Yehova nlemvukilaka Davidi, yandi nangunaka masumu na yandi mpe yandi nataka yau ntama. Davidi kumaka na kiese ntangu yandi zabaka ti Yehova nlemvukilaka yandi mpenza. (Nz. 32:2-4) Beto diaka beto lenda mona kiese ya mutindu yina. Kana beto mebalula mpenza ntima na masumu na beto, beto fueti tatamana ve kunata kizitu ya foti ya masumu na beto yina Yehova nangunaka mpe yandi nataka ntama na beto.

10-11. Bampova yandi “kesepelaka kunlemvukila” melonga beto yinki samu na Yehova? (Nzembo 86:5)

¹⁰ Tanga Nzembo 86:5. Na verse yayi, Davidi metuba ti Yehova “kesepelaka kunlemvukila.” Samu na bampova yango, mukanda mosi yina kesasilaka Biblia metuba samu na Yehova ti: “[Yandi] kele muntu yina ‘kenlemvukilaka’​—yakele ‘kimuntu na yandi.’” Samu na yinki yandi kele plina? Kitini ya verse yango yina melanda metuba: “Nge mefuluka na nzola ya kukuikama samu na bantu nionso yina kebokilaka nge.” Mutindu beto longukaka yau na disolo meluta, nzola ya Yehova ya kukuikama nde kesalaka ti yandi sala nguizani ya ngolo mpe ya mvimbamvimba na bisadi na yandi ya kukuikama. Na yau, na nzila ya nzola na yandi ya kukuikama, yandi “kenlemvukilaka na ntima ya mvimba” bansumuki nionso yina mebalula ntima. (Yis. 55:7, nyp.) Kana nge kena kukakatana samu na kundima nlemvo ya Nzambi, nge lenda kukiyuvusa: ‘Munu kendimaka ti Yehova kele Muntu yina kenlemvukilaka, mpe yandi kesepelaka kunlemvukila bantu nionso yina mebalula ntima mpe yina kesosaka nlemvo na yandi? Na yau, munu fueti ndima ve ti yandi menlemvukilaka munu ntangu munu lombaka yandi nlemvo?’

¹¹ Kuzaba ti Yehova mezaba mbote kimuntu na beto ya masumu lenda bomba beto. (Nz. 139:1, 2) Diambu yango memonana puelele na bankunga yankaka ya Davidi yina lenda sadisa beto samu beto ndima nlemvo ya Yehova.

KUZIMBAKANA VE DIAMBU YINA YEHOVA KEZIMBAKANAKA VE

12-13. Na kutadila Nzembo 103:14, yinki Yehova kezimbakanaka ve samu na beto, mpe yaketindaka yandi na kusala yinki?

¹² Tanga Nzembo 103:14. Davidi metuba ti Yehova “kezimbakanaka ve ti beto kele fundufundu.” Na bampova yango, Davidi mesasila mosi ya bamfunu yina kesalaka ti Yehova sepela kunlemvukila bisadi na yandi yina mebalula ntima: Yandi mezaba ti bakele bansumuki. Samu beto bakusa yau mbote, beto tadila mbotembote bampova yango ya Davidi.

¹³ Davidi metuba ti Yehova “mezaba mbote mutindu yina beto mesalamaka.” Yandi salaka Adamu “na fundufundu ya ntoto.” (Eba. 2:7) Na yau, yandi mezaba mutindu bantu mesalamaka mpe mambu yina bakevuandaka na yau nsatu. Na kifuani, bakevuandaka na nsatu ya kudia, ya kuleka, mpe ya kupema. Ata bantu ya kukoka kevuandaka na nsatu ya mambu yango. Kasi, ntangu Adamu mpe Eva salaka disumu, kuvuanda fundufundu kumaka na nsasulu yankaka. Lokola beto kele bana na bau, beto butukaka bantu ya masumu mpe yaketindaka beto na kusala mambu ya yimbi. Yehova kesukaka kaka ve na kuzaba ti beto kele bantu ya masumu; kasi mutindu Davidi metuba yau, yandi ‘kezimbakanaka’ yau ve. Mpova ya Ebre yina bamesadila awa lenda monisa kusala diambu mosi ya mbote. Na nkufi, bampova ya Davidi zola tuba: Yehova mezaba ti na bantangu yankaka beto kesala banzimbala, mpe kana yandi memona ti beto mebalula mpenza ntima, yandi kemonisinaka beto ntima kiadi mpe yandi kenlemvukilaka beto.​—Nz. 78:38, 39.

14. (a) Yinki lenda sadisa beto beto kukindimisa ti Yehova kenlemvukilaka beto? (Nzembo 103:12) (b) Yinki mutindu kifuani ya Davidi memonisa ti Yehova kenlemvukilaka mpenza na ntima ya mvimba? (Tala ankadre “Na yinki mutindu Yehova kezimbakanaka ntangu yandi kenlemvukilaka?”)

¹⁴ Yinki lenda sadisa beto beto kukindimisa ti Yehova kenlemvukilaka beto? (Tanga Nzembo 103:12.) Davidi metuba ti ntangu Yehova kenlemvukilaka, Yandi ketulaka masumu na beto ntama “mutindu kaka kisika muini kebimaka kele ntama mpenza na kisika yakelekaka.” Mutindu beto mezaba yau, kisika muini kebimaka kele ntama mpenza na kisika yina yakelekaka. Yamelonga beto yinki samu na masumu yina Yehova menlemvukila? Mukanda mosi yina kesasilaka Biblia mesasila verse yango mutindu yayi: “Kana bametula disumu na beto ntama mutindu yina, beto lenda kukindimisa ti nsudi na yau, kidimbu na yau, to dikanisi na yau mpe kevuanda diaka ve.” Kanisa ntete, nsunga ya madia to ya kima mosi lenda sala ti beto kanisa diambu mosi ya ntama. Kasi ntangu Yehova kenlemvukilaka, yakevuandaka lokola nde ata nsudi to kidimbu kebikanaka ve yina ketinda yandi yandi kanisa diaka disumu yango mpe yandi tangila beto yau.​—Ezk. 18:21, 22; Mis. 3:19.

15. Yinki beto lenda sala kana beto kena tatamana kumona lokola Yehova menlemvukilaka ve masumu na beto ya ntama?

¹⁵ Yinki mutindu bampova ya Davidi yina kele na Nzembo 103 lenda sadisa beto beto ndima nlemvo ya Yehova? Kana beto ketatamanaka kumona lokola Yehova menlemvukilaka ve masumu na beto ya ntama, beto lenda kukiyuvusa: ‘Munu kena kuzimbakana diambu yina Yehova kezimbakanaka ve​—yazola tuba, munu kena kuzimbakana ti yandi mezaba ti munu kele muntu ya masumu, mpe yandi kenlemvukila munu kana munu mebalula ntima? Munu kena kutula kaka makanisi na diambu yina Yehova mezimbakanaka deja​—yazola tuba, munu kekanisaka kaka na masumu yina Yehova menlemvukilaka mpe ketadilaka diaka ve?’ Yehova ketulaka ve makanisi na masumu yina beto mesalaka na ntama. Beto diaka, beto fueti tula ve makanisi na masumu yango. (Nz. 130:3) Kana beto kena kundima ti Yehova menlemvukilaka beto, yakesadisa beto samu beto bika kukimona lokola beto menata mambu mpe beto ketatamana kusadila Yehova na kiese.

16. Pesa kifuani mosi yina kena kumonisa kivonza ya kutatamana kukanisa banzimbala yina beto mesalaka na ntama. (Tala diaka foto.)

¹⁶ Beto tadila kifuani mosi. Kutatamana kukipesa foti samu na masumu yina beto mesalaka na ntama kele lokola muntu yina kena kunata ntomabilu kasi yandi kena kutala kaka rétroviseur. Na bantangu yankaka yakevuandaka mbote kutala rétroviseur; samu yalenda sadisa nge samu nge tina bivonza yina kele na manima. Kasi samu na kukuenda na ntuala kondua kivonza, nge fueti tala nde na ntuala. Mutindu mosi mpe, na bantangu yankaka kukanisa na banzimbala yina beto mesalaka na ntama lenda sadisa beto beto baka malongi mpe beto vuanda na nzengolo ya kuvutukila yau ve. Kasi kana beto metula makanisi na beto kaka na banzimbala na beto ya ntama, kikadulu yina ya kukipesa foti lenda pekisa beto kusadila Nzambi mbote bubu yayi. Na kisika ya kusala plina, beto fueti tula makanisi na nzila yina kele na ntuala na beto. Beto kele na nzila yina kena kunata na yinza ya yimpa yina Nzambi lakaka, kuna mambu ya yimbi “kekanisama diaka ve.”​—Yis. 65:17; Mas. 4:25.

TATAMANA KUNDIMISA NTIMA NA NGE

17. Samu na yinki beto fueti tatamana kundimisa ntima na beto ti Yehova kezolaka mpe kenlemvukilaka beto?

¹⁷ Beto fueti tatamana kundimisa ntima na beto ti Yehova kezolaka beto mpe kenlemvukilaka beto. (1 Yoa. 3:19) Samu na yinki? Samu Satana kelemba ve kusosa kundimisa beto ti Yehova lenda zola beto ve to yandi lenda nlemvukila beto ve. Yavuanda yinki mutindu, yandi kele kaka na lukanu mosi​—kutinda beto beto lemba kusadila Yehova. Beto zaba ti Satana ketatamana kusala bangolo samu yandi mezaba ti yandi mebikana kaka na mua ntangu ya fioti. (Em. 12:12) Beto fueti bika ve ti yandi nunga!

18. Yinki nge lenda sala samu nge kukindimisa ti Yehova kezolaka mpe kenlemvukilaka nge?

¹⁸ Samu nge kukindimisa mingi ti Yehova kezolaka nge, sadila makanisi yina beto tubilaka na disolo meluta. Samu nge kukindimisa ti Yehova menlemvukilaka nge, kanisa na mambu yina Yehova metuba samu na yandi mosi. Kanisa diaka na mambu yina Yehova metuba na Biblia samu na nlemvo na yandi. Kuzimbakana ve ti yandi mezaba ti nge kele muntu ya masumu. Na yau, yandi kemonisina nge ntima kiadi. Mpe kuzimbakana ve ti kana yandi menlemvukila, yandi kenlemvukilaka na ntima ya mvimba. Mutindu mosi na Davidi, kana nge mesala plina, nge kendima mpenza ti Yehova kele na ntima kiadi, mpe nge ketuba: “Matondo Yehova, samu nge menlemvukila ‘banzimbala ya masumu na munu’!”​—Nz. 32:5.