Kumisa nguizani na nge na Yehova ngolo

KONSO mvula, mameme mingi ya mfunu kevutukaka na kimvuka ya Buklisto. Kanisa ntete na ‘kiese mingi yina kevuandaka na dizulu’ kana muntu mevutuka! (Luka 15:7, 10) Kana nge mekatuka kuvutuka na kimvuka, nge lenda ndimisama ti Yesu, bambasi, mpe Yehova kele na kiese ya kumona nge nge mekuma diaka mosi na bantu na kati ya kimvuka. Kasi, lokola nge kena kukumisa diaka nguizani na nge na Yehova ngolo, nge lenda kutana na mambu ya mpasi. Yinki kele ndambu ya mambu yango ya mpasi, mpe yinki lenda sadisa nge?

YINKI KELE MAMBU YA MPASI?

Bampangi mingi kenuanisaka banguilu ya yimbi na manima ya kuvutuka na kimvuka. Mbala yankaka nge kena kubakusa mutindu Ntinu Davidi vuandaka kukimona. Ata na manima ya kubaka nlemvo ya Yehova samu na masumu na yandi, yandi tubaka: ‘Banzimbala na munu melutila munu.’ (Nk. 40:12; 65:3) Kana muntu mevutukila Yehova, yandi lenda tatamana kukitungisa to kumona nsoni samu na bamvula mingi. Isabelle, bimisamaka na kimvuka banda bamvula 20.a Yandi metuba: “Munu vuandaka kukimona ti yavuandaka mpasi samu munu ndima ti Yehova lenda nlemvukila munu.” Kana nge kena kulemba nzutu, nguizani na nge na Yehova lenda buela lemba. (Bin. 24:10) Kubika ve nzila ti yakumina nge.

Bantu yankaka kekukitungisaka ti balenda vuanda na dikoki ve ya kusala diambu yina melombama samu bavuanda diaka na nguizani ya mbote na Yehova. Na manima ya kuvutuka na kimvuka, Antoine tubaka: “Munu kukimonaka ti munu zimbakanaka mambu nionso yina munu longukaka mpe yina munu vuandaka sala tekila munu bimisama na kimvuka.” Lokola bantu yankaka kevuandaka na banguilu ya mutindu yina, balenda vuanda na mukakatano samu na kukipesa mpenza na mambu ya kimpeve.

Na kifuani, kana mupepe ya ngolo mebebisa yinzo ya muntu mosi, yandi lenda lemba nzutu kana yandi mebanda kukanisa ntangu mpe kisalu ya ngolo yina yakelomba samu na kutunga yau diaka. Mutindu mosi diaka, kana disumu ya nene bebisaka nguizani na nge na Yehova, nge lenda kukimona ti kubongisa diaka kimpeve na nge kelomba bangolo mingi. Kasi nge fueti sala yau nge mosi ve.

Yehova kena kulomba beto: ‘Ntangu yayi, beno kuiza mpe beto bongisa mambu kati na beto.’ (Yez. 1:18) Nge salaka ngolo samu na ‘kubongisa mambu.’ Yehova kezolaka nge samu na ngolo yina nge salaka. Kanisa ntete: Lokola nge vutukilaka Yehova, yandi lenda sadila nge lokola kifuani samu na kumonisa Diabulu ti yandi kele muntu ya luvunu!—Bin. 27:11.

Na kuvutukilaka Yehova, nge monisaka ti nge zola kupusana penepene ya Yehova, mpe yandi melaka ti yandi diaka yandi kepusana penepene na nge. (Yak. 4:8) Kasi, yakele mbote ti bantu yankaka mona ti nge mevutuka diaka na kimvuka. Kasi nge fueti sala diaka mambu mingi yankaka. Nge fueti tatamana kukumisa nzola na nge ngolo samu na Tata mpe Nkundi na nge Yehova. Yinki mutindu nge lenda sala yau?

KUKITUDILA BALUKANU YINA NGE KEVUANDA NA DIKOKI YA KUKOKISA

Meka kukitudila balukanu yina nge kevuanda na dikoki ya kukokisa. Kuzimbakana ve ti mambu ya ngudi yina nge longukaka samu na Yehova mpe samu na nsilulu na yandi ya Paradiso—yasoba ve. Kasi ntangu yayi yakena kulomba nge vuanda na mumeseno mosi ya mbote, na kifuani, kusamuna mbala na mbala, kukuenda na balukutakanu, mpe kulutisa ntangu kintuadi na bampangi. Tadila balukanu yayi melanda.

Sololaka na Yehova mbala na mbala. Tata na nge mezaba ti kana nge kena kutatamana kukitungisa samu na diambu ya yimbi yina nge salaka, yalenda vuanda mpasi samu na nge nge sambila yandi. (Bar. 8:26) Kasi, ‘tingama na bisambu,’ zabisa Yehova ti nge kele na nsatu nge na yandi beno vuanda mpenza bankundi. (Bar. 12:12) Andrej kena kuzaba diaka ti: “Muvuandaka na banguilu ya kukitungisa ngolo mpe ya nsoni. Kasi na manima ya konso kisambu, munu vuandaka kukimona mbote. Munu kumaka na kiyenge na makanisi.” Kana nge kena kuzaba ve mutindu ya kusambila samu na diambu yango, tadila bisambu ya kubalula ntima yina Ntinu Davidi salaka, nge kekuta yau na Nkunga 51 mpe Nkunga 65.

Longukaka Biblia mbala na mbala. Yakesadisa nge nge vuanda na kiminu ya ngolo mpe yakesadisa samu nzola na nge na Yehova kula. (Nk. 19:7-11) Felipe metuba: “Lokola munu vuandaka ve na programe ya mbote ya kutanga mpe kulonguka Biblia, yasalaka ti munu lemba mpe mubika Yehova. Munu memanga kuvutukila diaka nzimbala yango, na yau munu bakaka nzengolo ya kusalaka ndongokolo ya munu mosi ya Biblia samu ya tanina munu.” Nge lenda sala kaka mutindu yina. Kana nge kele na nsatu ya lusadusu samu na kuzaba mambu yina nge kelonguka, nge lenda lomba lusadusu na nkundi mosi yina kele na nguizani ya mbote na Yehova samu yandi sadisa nge.

Kumisa nguizani na nge na bampangi ngolo. Bampangi yina kevutukaka na kimvuka kekukitungisaka ti bampangi yankaka kebanda sepela na bau ve. Larissa metuba: “Munu vuandaka mpenza na nsoni. Munu kukimonaka munu sadilaka bampangi na munu yimbi. Banguilu yango zingilaka mpenza.” Ndimisama ti bankulutu mpe bampangi yankaka yina kele ya kuyela na kimpeve kele na nsatu ya ngolo ya kusadisa nge nge kumisa kimpeve na nge ngolo. (Tala ankadre “Yinki bankulutu lenda sala?”) Bakele na kiese lokola nge mevutuka na kimvuka, mpe bazola nge vuanda na kiese!—Bin. 17:17.

Yinki lenda sadisa nge nge vuanda penepene na kimvuka? Kukipesa na mambu yina bampangi kesalaka—kuendaka na balukutakanu mpe kuendaka mbala na mbala na kisalu ya kusamuna. Yinki mutindu mambu yango kesadisa nge? Felix metuba: “Kimvuka vuandaka sosa munu vutuka. Munu kukimonaka ti munu kele na valere. Bau nionso sadisaka munu munu kukimona ti munu kele na kati ya dibuta, ti Yehova menlemvukila munu, mpe munu tatamana kusadila Yehova.”—Tala ankadre “Yinki nge lenda sala?”

KUBIKA VE!

Satana ketatamana kubimisina nge “bampasi” kumeka kulembisa nge lokola nge kena kumeka kukumisa nguizani na nge na Yehova ngolo. (Luka 4:13) Vuanda pene ya kukumisa nguizani na nge na Yehova ngolo banda bubu yayi.

Samu na mameme na yandi, Yehova mepesa nsilulu: ‘Munu kesosa yina mezimbana, munu kevutula yina kena kutelengana, munu kekanga babandi na yina meluala, mpe munu kepesa yina melemba kinkesa.’ (Eze. 34:16) Yehova sadisaka bantu mingi yankaka bakumisa nguizani na bau na yandi ngolo. Ndimisama ti yandi zola sadisa nge nge tatamana kukumisa nguizani na nge na yandi ngolo kuluta.

Yinki bankulutu lenda sala?

Bankulutu kevuandaka na kiyekua ya mfunu na diambu metadila kusadisa bampangi yina mevutuka na kimvuka samu bakumisa diaka nguizani na bau na Yehova ngolo. Tala yina bankulutu lenda sala samu na bampangi yina mevutuka na kimvuka.

Beno ndimisa bau. Ntumua Paulo zabaka ti muntu yina mebalula ntima lenda ‘kuwa kiadi mingi mpenza.’ (2Bk 2:7) Yandi lenda banda kukipesa ntangu nionso foti mpe kulemba nzutu. Paulo zabisaka kimvuka: ‘Beno fueti nlemvukila yandi na ntima ya mvimba mpe kubomba yandi.’ Bampangi yina mevutuka na kimvuka kele na nsatu bandimisa bau ti Yehova mpe bampangi na bau Baklisto kezolaka bau mingi. Kana bankulutu kena kupesa bau bafelisitasion mpe kusadisa bau ntangu nionso, balenda lemba ve nzutu.

Beno sambila kintuadi na bau. ‘Lilombo ya muntu ya lunungu kevuandaka ngolo mingi.’ (Yak. 5:16) Larissa, yina beto tubilaka na ebandeli, metuba: “Munu tubilaka bankulutu bantembe mpe kubanga na munu. Basambilaka samu na munu. Mpe na manima munu bakusaka ti bankulutu fueminaka munu ve. Bavuandaka na nsatu ya kusadisa munu munu vutula nguizani na munu na Yehova.” Theo metuba: “Bisambu ya bankulutu ndimisaka munu ti Yehova kezolaka munu mpenza mpe yandi ketalaka nde mambu ya mbote yina munu kesalaka, kasi kaka ya yimbi ve.”

Beno kumisa bau bankundi na beno. Bampangi yina mevutuka na kimvuka kele na nsatu ya bankundi. Nkulutu mosi na nkumbu ya Justin metuba: “Sosa diluaku ya kubima kintuadi na bau na kisalu ya kusamuna mpe, yina meluta mfunu, kuendaka tala bau na bayinzo na bau. Yakele mpenza na mfunu kuvuanda bankundi na bau!” Henry, nkulutu yankaka metuba: “Kana bampangi yankaka na kimvuka kena kumona bankulutu kena kusala kinkundi na bampangi yina mevutuka na kimvuka, bau diaka bakesosa kusala mutindu yina.”

Beno sadisa bau balonguka. Nkundi yina kele ya kuyela na kimpeve lenda sadisa muntu yina mevutuka na kimvuka samu yandi vuanda na mumeseno ya mbote ya kulonguka. Nkulutu mosi na nkumbu ya Darko metuba: “Munu kesepelaka kusolola na bau masolo ya kukindisa yina munu kebakaka na ndongokolo ya munu mosi ya Biblia mpe kumonisa bau kiese yina munu kebakaka na kulonguka Biblia. Munu kekubamaka diaka samu na kulonguka kintuadi na bau disolo mosi ya kukindisa.” Clayton, nkulutu yankaka metuba: “Munu kekindisaka bau basosa na kati ya Biblia masolo ya bantu yina kutanaka na mambu yina mekokana na ya bau mpe dilongi yina balenda baka.”

Beno vuanda bamvungi ya mbote. Bantu yina kevutukaka na kimvuka, tadilaka bankulutu lokola bazuzi. Ntangu yayi, bafueti tadila bankulutu lokola bamvungi. (Yer. 23:4) Vuanda pene ya kuwa bau mpe pene ya kupesa bau felisitasion. Sololaka na bau mbala na mbala. Tala yina nkulutu mosi na nkumbu ya Marcus yina kekuendaka tala mingi mameme metuba: “Beto kekabulaka na bau dibanza mosi ya Biblia, beto kepesaka bau felisitasion, mpe beto kendimisaka bau ti beto kesepelaka na bau samu na ngolo yina basalaka samu na kuvutuka na kimvuka, mpe beto kemonisaka bau ti Yehova diaka kesepelaka na bau. Na manima ya konso viziti beto kezabisaka bau dati yina beto kevutuka diaka.”

a Na disolo yayi, beto mepesa bau bankumbu yankaka.