Sadisa banlonguki ya Biblia babaka nzengolo ya kusadila Yehova

1-2. (a) Samu na yinki banlonguki ya Biblia yankaka kekakatanaka samu na kubaka nzengolo ya kusadila Yehova? (b) Yinki mambu Yesu monisaka banlonguki na yandi yina beto ketubila na disolo yayi?

NGE vuandaka kakatana samu na kukuma Mbangi ya Yehova? Mbala yankaka nge vuandaka banga ti bantu yina nge kesalaka na bau, bankundi na nge, to bantu ya dibuta na nge telemina nge. To mbala yankaka nge vuandaka kanisa ti nge kekoka ata fioti ve kuzitisa bansikudukusu ya Nzambi. Kana yakele mutindu yina, nge lenda bakusa banguilu ya banlonguki ya Biblia yina kena kukakatana samu na kubaka nzengolo ya kusadila Yehova.

² Yesu tubaka ti wonga ya mutindu yina lenda pekisa muntu kukula na kimpeve. (Mat. 13:20-22) Kasi yandi sundolaka ve bantu yina kakatanaka samu na kulanda yandi. Kutu, yandi monisaka banlonguki na yandi mutindu ya kusadisa bantu yango (1) bamona mambu yina kena kupekisa bau bakula na kimpeve, (2) bakudisa nzola na bau samu na Yehova, (3) batula Yehova na kisika ya ntete na luzingu na bau, mpe (4) banunga mikakatano na bau. Yinki mutindu beto lenda sadila mambu yina Yesu tubilaka banlonguki na yandi ntangu beto kena kusadila mukanda Zinga mvula na mvula na kiese! samu na kusadisa nlonguki ya Biblia yandi baka nzengolo ya kusadila Yehova?

SADISA NLONGUKI NA NGE YA BIBLIA YANDI MONA MAMBU YINA KENA KUPEKISA YANDI KUKULA NA KIMPEVE

3. Yinki mambu vuandaka pekisa mbala yankaka Nikodeme samu yandi kuma nlonguki ya Yesu?

³ Nikodeme, mfumu mosi ya nene ya Bayuda, vuandaka na mukakatano samu na kukuma nlonguki ya Yesu. Kaka bangonda kana 6 na manima ya ntangu yina Yesu bandaka kisalu na yandi, Nikodeme ndimaka ti Yesu vuandaka monisi ya Nzambi. (Yoa. 3:1, 2) Kasi, Nikodeme ponaka kukutana na Yesu na kinsueki samu yandi ‘vuandaka banga Bayuda.’ (Yoa. 7:13; 12:42) Mbala yankaka yandi vuandaka kanisa ti yandi kezimbisa kisika na yandi ya lokumu kana yandi mekuma nlonguki ya Yesu.a

4. Yinki mutindu Yesu sadisaka Nikodeme samu yandi bakusa mambu yina Yehova vuandaka lomba yandi sala?

⁴ Nikodeme zabaka Nsiku ya Moize, kasi yandi vuandaka na nsatu ya lusadusu samu na kubakusa mambu yina Yehova vuandaka lomba yandi. Yinki mutindu Yesu sadisaka yandi? Yesu ndimaka kupesa ntangu na yandi samu na kusolola na Nikodeme atako yavuandaka na mpipa. Mpe Yesu tubilaka Nikodeme puelele mambu yina yandi fueti sala samu na kukuma nlonguki. Yalombaka yandi balula ntima na masumu na yandi, yandi baka mbotama na maza, mpe yandi monisa kiminu na Muana ya Nzambi.​—Yoa. 3:5, 14-21.

5. Yinki mutindu beto lenda sadisa nlonguki ya Biblia na kumona mambu yina kena kupekisa yandi yandi kula na kimpeve?

⁵ Ata kana nlonguki ya Biblia kena kubakusa mbote Masonukua, mbala yankaka yandi lenda vuanda na nsatu ya lusadusu samu yandi mona mambu yina kena kupekisa yandi kusadila Yehova. Kisalu ya kinsuni, to kutelemina ya dibuta lenda pekisa yandi yandi kukitudila balukanu ya kimpeve. Na yau, bakaka ntangu ya kusadisa nlonguki na nge. Nge lenda bokidisa yandi samu beno kudia mua kima to beno tambula kintuadi. Na maluaku yango, mbala yankaka yandi lenda tubila nge mitungisi na yandi. Kindisa nlonguki na nge yandi sala bansobolo ya mfunu, samu na kusepedisa nge ve, kasi nde samu yandi monisa nzola na yandi samu na Yehova.

6. Yinki mutindu nge lenda sadisa nlonguki ya Biblia yandi baka kibakala ya kubaka nzengolo ya kusadila Yehova? (1 Bakorinti 16:13)

⁶ Kana nlonguki ya Biblia kena kukindimisa ti Yehova kesadisa yandi samu yandi zitisa bansikudukusu ya Biblia, yandi kekuma na kibakala ya kusadila mambu yina yandi kena kulonguka. (Tanga 1 Bakorinti 16:13.) Kiyekua na nge lenda vuanda mutindu mosi na ya nlongisi ya kalasi. Kanisa ntete ntangu nge vuandaka na kalasi, yinki nlongisi nge vuandaka zola mingi kuluta? Kondua ntembe, yavuandaka nlongisi yina vuandaka sadisa nge na ntima yinda nionso nge zaba ti nge kele na makoki ya kusala mambu yina nge kele na nsatu ya kusala. Mutindu mosi, nlongisi ya mbote ya Biblia kelongaka kaka ve mambu yina Nzambi kelombaka beto kasi yandi kendimisaka diaka nlonguki na yandi ti na lusadusu ya Yehova yandi lenda sala bansobolo ya mfunu na luzingu na yandi. Yinki mutindu nge lenda sala yau?

SADISA NLONGUKI NA NGE YA BIBLIA YANDI KUDISA NZOLA NA YANDI SAMU NA YEHOVA

7. Yinki mutindu Yesu sadisaka bantu yina vuandaka kuwa yandi samu bakudisa nzola na bau samu na Yehova?

⁷ Yesu zabaka ti nzola samu na Nzambi nde ketinda banlonguki na yandi basadila mambu yina bavuandaka longuka. Mbala mingi yandi vuandaka longa mambu yina kesadisa banlonguki na yandi bakudisa nzola na bau samu na Tata na bau ya dizulu. Na kifuani, yandi fuanikisaka Yehova na tata yina kepesaka bima ya mbote na bana na yandi. (Mat. 7:9-11) Mbala yankaka ndambu ya bantu yina vuandaka kuwa Yesu vuandaka ve na batata ya nzola. Kanisa mutindu mbala yankaka bantu yango kukimonaka ntangu Yesu pesaka kifuani ya tata mosi ya ntima kiadi yina yambaka muana na yandi yina vutukaka, yina salaka mambu mingi ya yimbi. Yasadisaka bau bamona ntima kiadi ya Yehova samu na bantu.​—Luka 15:20-24.

8. Yinki mutindu nge lenda sadisa nlonguki na nge ya Biblia yandi kudisa nzola na yandi samu na Yehova?

⁸ Nge diaka nge lenda sadisa nlonguki na nge ya Biblia yandi kudisa nzola na yandi samu na Yehova na kutubilaka yandi bikadulu ya kitoko ya Yehova. Na konso ndongokolo, sadisaka yandi yandi mona nguizani yina kele kati na mambu yina yandi kena kulonguka mpe nzola ya Yehova. Ntangu beno kena kutubila nkudulu, monisa yandi mutindu yametadila yandi. (Rom. 5:8; 1 Yoa. 4:10) Kondua ntembe, nlonguki na nge kezola Yehova mingi kana yandi kena kubakusa mutindu Yehova kezolaka yandi mingi.​—Gal. 2:20.

9. Yinki sadisaka bakala mosi na nkumbu ya Michael na kusala bansobolo?

⁹ Beto tadila kifuani ya Michael, yina kezingaka na Indonésie. Yandi zabaka kedika banda bumuana kasi yandi bakaka ve mbotama. Ntangu yandi kumaka na bamvula 18, yandi kuendaka na buala yankaka samu na kuvuanda shofere ya ntomabilu ya nene. Na manima yandi kuelaka kasi yandi bikaka dibuta na yandi na Indonésie samu na kutatamana kusala na buala yankaka. Na ntangu yango, nketo na yandi mpe muana na yandi ya nketo bandaka kulonguka Biblia mpe kukula na kimpeve. Na manima ya lufua ya mama na yandi, Michael bakaka nzengolo ya kuvutuka na buala na yandi samu na kutanina tata na yandi mpe yandi ndimaka kulonguka Biblia. Ntangu bavuandaka tadila kitini “Kota na mpinda” ya dilongi 27 ya mukanda Zinga mvula na mvula na kiese!, yasimbaka mpenza ntima ya Michael. Ntangu yandi kanisaka na mutindu Yehova kukimonaka na kutalaka Muana na Yandi kena kuniokuama, Michael dilaka. Yandi kudisaka butondi na yandi samu na nkudulu mpe yandi salaka bansobolo samu na kubaka mbotama.

SADISA NLONGUKI NA NGE YA BIBLIA YANDI TULA YEHOVA NA KISIKA YA NTETE NA LUZINGU NA YANDI

10. Yinki mutindu Yesu sadisaka banlonguki na yandi ya siekle ya ntete samu batula kisalu ya Yehova na kisika ya ntete? (Luka 5:5-11) (Tala diaka foto.)

¹⁰ Banlonguki ya siekle ya ntete ya Yesu ndimaka na nsualu ti Yesu vuandaka Masiya yina lakamaka, kasi bavuandaka na nsatu ya lusadusu samu na kutula kisalu ya Yehova na kisika ya ntete. Petelo mpe Andre vuandaka deja banlonguki ya Yesu samu na mua ntangu ntangu Yesu lombaka bau balanda yandi na kisalu ya ntangu nionso. (Mat. 4:18, 19) Bavuandaka sala kisalu ya kuloba bambizi, mbala yankaka kintuadi na Yakobo mpe Yoane. (Mrk. 1:16-20) Ntangu Petelo mpe Andre “sundolaka bafile na bau,” kondua ntembe babakaka bankubukulu samu na mabuta na bau ntangu bavuandaka landa Yesu. Yinki tindaka bau na kutula kisalu ya Yehova na kisika ya ntete? Disolo yina kele na mukanda ya Luka metubila beto ti Yesu salaka kimangu yina kudisaka kiminu na bau na dikoki ya Yehova ya kukokisa bansatu na bau.​—Tanga Luka 5:5-11.

11. Yinki mutindu beto lenda sadila masolo na beto samu na kukumisa kiminu ya nlonguki na beto ngolo?

¹¹ Beto lenda sala ve bimangu mutindu Yesu salaka yau, kasi beto lenda tubila masolo ya mutindu Yehova sadisaka bantu yina tulaka Yandi na kisika ya ntete na luzingu na bau. Na kifuani, nge kena kuzaba diaka mutindu Yehova sadisaka nge ntangu nge bandaka kukuenda na balukutakanu? Mbala yankaka yalombaka nge kutana na mfumu na nge ya kisalu mpe nge sasila yandi samu na yinki nge kebanda sala diaka ve na manima ya bawola ya kisalu kana yakepekisa nge kukuenda na balukutakanu. Ntangu nge kena kutubila nlonguki na nge ya Biblia masolo na nge, sasila yandi mutindu kiminu na nge kumaka ngolo na kumonaka lusadusu ya Yehova ntangu nge bakaka nzengolo ya kutula nsambudulu na yandi na kisika ya ntete.

12. (a) Samu na yinki beto fueti kuendaka na bampangi ya kusuasana samu na kulonguka Biblia na muntu? (b) Yinki mutindu nge lenda sadila bavideo samu na kulonga mbote nlonguki na nge ya Biblia? Pesa kifuani.

¹² Nlonguki na nge ya Biblia kebaka diaka mambote na kuwaka mutindu Baklisto yankaka tulaka kisalu ya Yehova na kisika ya ntete. Na yau, kuendaka na bampangi ya kusuasana samu na kulonguka na yandi Biblia. Lombaka bau batubila mutindu bazabaka kedika mpe mambu yina basalaka samu na kutula kisalu ya Yehova na kisika ya ntete na luzingu na bau. Diaka, bakaka ntangu kintuadi na nlonguki na nge samu na kutala bavideo yina kele na kitini “Kota na mpinda” to kitini “Sosa” ya mukanda Zinga mvula na mvula na kiese! Na kifuani, ntangu beno kena kutubila dilongi 37, nge lenda tubila bansikudukusu yina kele na video Yehova kekokisa bansatu na beto.

SADISA NLONGUKI NA NGE YA BIBLIA YANDI NUNGA MIKAKATANO NA YANDI

13. Yinki mutindu Yesu bongisaka banlonguki na yandi na kutelemina yina balendaka kutana na yau?

¹³ Yesu vuandaka tubila banlonguki na yandi mbala na mbala ti bantu yankaka ketelemina bau, ata mpe bantu ya mabuta na bau. (Mat. 5:11; 10:22, 36) Na nsuka ya kisalu na yandi, Yesu luengisaka banlonguki na yandi ti balenda kufua bau. (Mat. 24:9; Yoa. 15:20; 16:2) Yandi kindisaka bau bavuanda ya kukenga na kisalu na bau ya kusamuna. Yandi tubilaka bau bazonzisa ve bantu yina kena kutelemina bau mpe bavuanda mayele samu batatamana kusamuna.

14. Yinki mutindu beto lenda sadisa nlonguki na beto ya Biblia yandi kukibongisa na kutelemina yina yandi lenda kutana na yau? (2 Timote 3:12)

¹⁴ Beto lenda sadisa nlonguki na beto yandi kukibongisa samu na kutelemina yina yandi lenda kutana na yau na kusasilaka yandi mambu yina bantu yina kesalaka na yandi, bankundi na yandi, mpe bampangi na yandi ya dibuta lenda tuba. (Tanga 2 Timote 3:12.) Bantu yankaka yina kesalaka na yandi lenda vueza yandi samu yandi kena kuzitisa malongi ya Biblia. Bantu yankaka, ata mpe bampangi na yandi ya dibuta, lenda vueza bindimeli na yandi yina mesimbama na Biblia. Kana beto kena kubongisa banlonguki na beto ya Biblia kondua kuvingila, bakevuanda ya kubongama mbote kuluta ntangu bakekutana na kutelemina.

15. Yinki lenda sadisa nlonguki ya Biblia yandi nunga kutelemina ya dibuta?

¹⁵ Kana nlonguki na nge kena kukutana na kutelemina ya dibuta, kindisa yandi yandi kanisa samu na yinki bampangi na yandi kena kufuemina yandi. Mbala yankaka bakena kukanisa ti bavunaka yandi, to bakele kaka na makanisi ya yimbi samu na Bambangi ya Yehova. Ata Yesu mpe kutanaka na mambu ya mutindu yina na bantu ya dibuta na yandi. (Mrk. 3:21; Yoa. 7:5) Longa nlonguki na nge ya Biblia yandi vuanda na ntima yinda mpe na mayele ya kutuba na bantu yankaka, yavuanda mpe na bantu ya dibuta na yandi.

16. Yinki mutindu beto lenda sadisa nlonguki ya Biblia yandi tubila bindimeli na yandi na mayele nionso?

¹⁶ Ata kana bantu ya dibuta na yandi kena kusepela na kedika, yakevuanda mbote nlonguki ya Biblia bika sasila mambu nionso na mbala mosi. Kana yandi mesala plina, yalenda lembisa bantu ya dibuta na yandi mpe yalenda sala ti balemba kusolola na yandi mambu ya Biblia. Na yau, kindisa nlonguki na nge ya Biblia yandi tubila bindimeli na yandi na mutindu yina kesala ti bandima diaka kusolola na yandi masolo ya Biblia na bilumbu kena kuiza. (Kol. 4:6) Mbala yankaka yandi lenda kindisa bantu ya dibuta na yandi bakota na site na beto jw.org. Yakesadisa bau balonguka bau mosi mambu mingi yina metadila Bambangi ya Yehova.

17. Yinki mutindu nge lenda sadisa nlonguki na nge na kununga makanisi ya yimbi yina bantu yankaka lenda vuanda na yau samu na Bambangi ya Yehova? (Tala diaka foto.)

¹⁷ Nge lenda sadila masolo yina kele na jw.org na kitini “Biuvu yina bantu keyuvusaka mingi” samu na kusadisa nlonguki na nge yandi bongisa bamvutu ya pete na biuvu yina bampangi ya dibuta to bankundi na yandi ya kisalu lenda yuvusa yandi. (2 Tim. 2:24, 25) Na nsuka ya konso dilongi ya mukanda Zinga mvula na mvula na kiese!, beno tadilaka kitini “Bantu yankaka metuba.” Kindisaka nlonguki na nge ya Biblia yandi pesaka bamvutu na bampova na yandi mosi. Kukakatana ve kupesa yandi makanisi samu na mutindu yandi lenda bongisa diaka mbote bamvutu na yandi. Kusadila makanisi yango lenda sadisa yandi yandi kotila bindimeli na yandi na kibakala nionso.

18. Yinki mutindu nge lenda kindisa nlonguki na nge samu yandi kuma nsamuni? (Matai 10:27)

¹⁸ Yesu kindisaka banlonguki na yandi basamunina bantu nsangu ya mbote. (Tanga Matai 10:27.) Kana nlonguki ya Biblia mebanda kutubila kiminu na yandi kondua kuvingila, yandi kelonguka na nsualu nionso kutudila Yehova ntima. Yinki mutindu nge lenda sadisa nlonguki na nge ya Biblia yandi kukitudila lukanu yango? Kana bamepesa luzayisu ya kampanye ya kisalu ya kusamuna na kimvuka, kindisa nlonguki na nge yandi kanisa na mambu yina yandi lenda sala samu yandi kuma nsamuni. Sasila yandi samu na yinki bantu mingi kemonaka ti yakevuandaka pete kubanda kusamuna na bantangu ya bakampanye. Yandi lenda kukitudila diaka lukanu ya kubanda kusala badevuare na lukutakanu ya katikati ya sabala. Kana yandi kena kusala bangolo samu na kukokisa balukanu yango, yandi kelonguka kusasila bindimeli na yandi na mutindu ya mbote kuluta.

TUDILA NLONGUKI NA NGE YA BIBLIA NTIMA

19. Yinki mutindu Yesu monisaka ti yandi vuandaka tudila banlonguki na yandi ntima, mpe yinki mutindu beto lenda landa kifuani na yandi?

¹⁹ Tekila Yesu vutuka na dizulu yandi tubilaka banlonguki na yandi ti bakevuanda diaka kintuadi na yandi. Bavuandaka bakusa ve ti Yesu vuandaka tubila kukuenda na bau na dizulu. Kasi yandi vuandaka tula makanisi na kukuikama na bau, kasi ve na kukondua kubakusa na bau. (Yoa. 14:1-5, 8) Yandi zabaka ti bavuandaka na nsatu ya ntangu samu na kubakusa mambu yankaka, na kifuani kivuvu ya kuzinga na dizulu. (Yoa. 16:12) Beto diaka beto lenda monisa banlonguki na beto ya Biblia ti beto ketulaka ntima ti bakele na nsatu ya kusepedisa Yehova.

20. Yinki mutindu mpangi mosi ya nketo na Malawi monisaka ti yandi vuandaka tudila nlonguki na yandi ntima?

²⁰ Beto kevuandaka na kivuvu ti banlonguki na beto ya Biblia kele na nsatu ya kusala mambu yina kele mbote. Tala kifuani ya mpangi ya nketo Chifundo, yina kezingaka na Malawi. Yandi bandaka kulonguka Biblia na mukanda Zinga mvula na mvula na kiese! na mama mosi na nkumbu ya Alinafe yina vuandaka sambila na dibundu ya Katoliki. Ntangu bamanisaka dilongi 14, Chifundo yuvusaka nlonguki na yandi makanisi na yandi na diambu metadila kusadila bifikula na nsambudulu. Alinafe fuemaka mpe yandi tubaka: “Yakele diambu yina metadila kaka munu mosi!” Chifundo kanisaka ti Alinafe kelemba kulonguka Biblia. Kasi na ntima yinda nionso, yandi tatamanaka kulonguka na Alinafe, na kivuvu ti na ntangu yina mebonga yandi kebakusa diambu yango. Mua bangonda na manima, Chifundo yuvusaka yandi kiuvu yina kele na dilongi 34: “Yinki mutindu ndongokolo na nge ya Biblia mpe ya Nzambi ya kedika, Yehova, natinaka nge mambote?” Chifundo metuba ti na mvutu ya Alinafe: “Yandi tubilaka mambu mingi ya mfunu, mosi na yau vuandaka ti Bambangi ya Yehova kesalaka ve mambu yina Biblia mepekisa.” Ntangu fioti na manima, Alinafe lembaka kusadila bifikula mpe yandi bakaka mbotama.

21. Yinki mutindu beto lenda sadisa nlonguki ya Biblia samu yandi vuanda na kibakala ya kubaka nzengolo ya kusadila Yehova?

²¹ Atako Yehova nde kele muntu “yina kekudisaka,” beto kele na kiyekua ya kusadisa nlonguki ya Biblia samu yandi kula na kimpeve. (1 Ko. 3:7) Beto kesuka kaka ve na kulonga yandi mambu yina Nzambi kena kulomba yandi yandi sala. Kasi beto kesadisa yandi yandi kudisa nzola ya mpinda samu na Yehova. Beto kekindisa yandi diaka yandi monisa nzola na yandi na kutulaka kisalu ya Yehova na kisika ya ntete. Mpe beto kelonga yandi mutindu ya kutudila Yehova ntima ntangu yandi kena kukutana na kutelemina. Kana beto kena kutubila yandi ti beto ketudilaka yandi ntima, beto kesadisa yandi yandi vuanda na kibakala ya kubaka nzengolo ya kusadila Yehova.