Kubasika

10 Na yawu Yehova zonzaka na Moyize: “Kwenda na sika ya Faraoni, samu mu me bika ti ntima ya yandi mpe bantima ya bisadi ya yandi kuma ngolo, samu mu sala bidimbu ya munu na mantwala ya yandi, 2 mpe samu nge zabisa bana ya nge mpe mitekolo ya nge mpasi yina mu talisaka Ezipte, mpe bidimbu yina mu salaka na kati ya bawu; mpe ya tsyeleka, beno ke zaba ti mu kele Yehova.”

3 Na yawu Moyize na Aroni kwendaka na sika ya Faraoni mpe zonzaka na yandi: “Yayi ni mambu yina Yehova Nzambi ya Baebre me zonza, ‘Tii wapi ntangu nge ke manga kutumama na munu? Bika dikanda ya munu, ba kwenda sadila munu. 4 Kana nge manga kaka kubika dikanda ya munu ba kwenda, mbasi mu ke filisa makonko na bwala ya nge. 5 Ba ke fuluka tii na ntoto ya bwala mpe ntoto ke talana dyaka ve. Ba ke kudya bima yina mvula ya matadi bebisaka ve, bima yina mvula yango bikilaka beno. Ba ke kudya bayinti ya beno nyonso yina ke kulaka na bilanga. 6 Ba ke fulusa bayinzo ya nge, bayinzo ya bisadi ya nge nyonso, mpe bayinzo nyonso ya Ezipte. Batata na bankooko ya beno me talaka ve ntete mambu ya mutindu yayi banda ntangu yina ba ke na bwala yayi tii bubu yayi.’” Ntangu yandi manisaka kuzonza, yandi balukaka mpe basikaka na yinzo ya Faraoni.

7 Bisadi ya Faraoni zonzaka na yandi: “Tii wapi ntangu muntu yayi ke bika ve kukwamisa beto?* Bika ba kwenda sadila Yehova Nzambi ya bawu. Tii ntangu yayi nge ke na talaka ve ti Ezipte me kufwa?” 8 Na yawu ba zonzaka na Moyize na Aroni na kuvutuka na sika ya Faraoni. Yandi zonzaka na bawu: “Beno kwenda sadila Yehova Nzambi ya beno. Kasi banani ke kwenda?” 9 Moyize vutulaka: “Beto ke kwenda na bantwenya ya beto, biboba ya beto, bana ya beto ya babakala, bana ya beto ya bakento, mameme ya beto, mpe bangombe ya beto, samu ti beto ke sadila Yehova mukembo.” 10 Yandi zonzaka na bawu: “Kana mu ndima kubika beno beno kwenda na bana ya beno, ya tsyeleka Yehova ke na beno. Faso mu ke na talaka beno, beno ke na sosaka kusala mambu ya yimbi. 11 Ve! Kaka babakala lenda kwenda kusadila Yehova, mpamba ve ni yawu beno lombaka.” Na yawu ba bingisaka bawu na mantwala ya Faraoni.

12 Na manima Yehova zonzaka na Moyize: “Tamba diboko ya nge na zulu ya Ezipte samu na kubokila makonko, ba kwiza na bwala mpe ba kudya matiti nyonso ya bwala, nyonso yina mvula ya matadi bikaka.” 13 Na mbala mosi Moyize tambaka yinti ya yandi na zulu ya Ezipte, mpe Yehova salaka ti mupepe ya esti fula na bwala kilumbu yango ya muvimba mpe mpimpa ya muvimba. Ntangu suka kumaka, mupepe ya esti nataka makonko. 14 Makonko kwizaka na Ezipte nyonso, mpe ya vandaka na bisika nyonso ya bwala. Ya vandaka mpasi mingi. Makonko mingi ya faso yayi vandaka nabunu ya talana, mpe ya ke talana dyaka ve. 15 Ba fulusaka bwala nyonso, mpe ba kumisaka bwala mpimpa. Ba manisaka matiti nyonso ya bwala mpe bambuma nyonso ya bayinti yina mvula ya matadi bikaka. Ata dikasa mosi ya mubisu bikanaka na zulu ya bayinti to na matiti ya bilanga ya bwala nyonso ya Ezipte.

16 Na yawu Faraoni bokilaka mbangu-mbangu Moyize na Aroni mpe zonzaka: “Mu me sala disumu na ntadisi ya Yehova Nzambi ya beno mpe na ntadisi ya beno. 17 Mulemvo, beno lemvokila disumu ya munu mbala yayi, mpe beno bondila Yehova Nzambi ya beno samu yandi katula kwandi mpasi ya lufwa yayi na zulu ya munu.” 18 Na yawu yandi* basikaka na yinzo ya Faraoni mpe bondilaka Yehova. 19 Yehova balulaka mupepe, mpe ya kumaka mupepe ya ngolo ya westi. Ya nataka makonko ntama mpe losaka yawu na Mubu ya Mbwaki. Ata dikonko mosi bikanaka na bwala nyonso ya Ezipte. 20 Kasi Yehova bikaka ti Faraoni sala yintu ngolo, mpe Faraoni bikaka ve ti bantu ya Izraele kwenda.

21 Na manima Yehova zonzaka na Moyize: “Nanguna diboko ya nge na zulu samu bwala ya Ezipte kuma na kati ya kitombi, kitombi mosi ya ngolo mingi.” 22 Na mbala mosi Moyize nangunaka diboko ya yandi na zulu, mpe bwala nyonso ya Ezipte kumaka na kati ya kitombi mosi ya ngolo na kati ya bilumbu tatu. 23 Ba vanda lenda ve kutala bampangi, mpe ata muntu na kati ya bawu bikaka yinzo ya yandi na kati ya bilumbu tatu. Kasi bantu nyonso ya Izraele vandaka na nsemo bisika yina ba vanda vandaka. 24 Na yawu Faraoni bokilaka Moyize mpe zonzaka na yandi: “Beno kwenda sadila Yehova. Kaka mameme ya beno mpe bangombe ya beno ke bikana awa. Beno lenda kwenda ya beno na bana ya beno.” 25 Kasi Moyize vutulaka: “Ni nge mosi muntu ke pesa beto* minkayulu mpe makabu ya kuyoka, mpe beto ke pesa yawu na Yehova Nzambi ya beto. 26 Beto ke kwenda na bibulu ya beto. Ata kibulu mosi* ke bikana, samu ti beto ke sadila bibulu ya nkaka samu na kusambila Yehova Nzambi ya beto. Ni ntangu beto ke kuma kuna beto ke zaba wapi bibulu beto ke pesa samu na kusambila Yehova.” 27 Na yawu, Yehova bikaka ti Faraoni sala yintu ngolo, mpe Faraoni ndimaka ve ti ba kwenda. 28 Faraoni zonzaka na yandi: “Zimbana na meso ya munu! Kumeka dyaka ve kusosa kutala kizizi ya munu, samu ti kilumbu yina nge ke tala dyaka kizizi ya munu, nge ke kufwa.” 29 Na yina Moyize zonzaka: “Mambu ve, mu ke sosa dyaka ve kutala kizizi ya nge.”