Kubasika

8 Na manima Yehova zonzaka na Moyize: “Kwenda na sika ya Faraoni mpe zonza na yandi, ‘Yayi ni mambu yina Yehova me zonza: “Bika dikanda ya munu, ba kwenda sadila munu. 2 Kana nge manga kaka kubika ba kwenda, mu ke fulusa bwala ya nge na batsyula. 3 Nzadi ya Nile ke fuluka na batsyula. Ba ke basika na Nile mpe ba ke kota na yinzo ya nge, na shambre ya nge, na zulu ya mfulu ya nge, na bayinzo ya bisadi ya nge mpe ya bantu ya nge, na bafure ya nge, mpe na kati ya banzungu ya nge ya kubudila pate. 4 Batsyula ke kwiza na zulu ya nge, na zulu ya bantu ya nge, mpe na zulu ya bisadi ya nge nyonso.”’”

5 Na manima Yehova zonzaka na Moyize: “Zonza na Aroni, ‘Baka yinti ya nge mpe tamba yawu na zulu ya bamwila, ya banzila ya maza ya Nile yina ba fungulaka, mpe ya badyanga, mpe basisa batsyula samu ba fulusa bwala ya Ezipte.’” 6 Na yawu, Aroni tambaka diboko ya yandi na zulu ya bamaza ya Ezipte, mpe batsyula bandaka kubasika mpe kufulusa bwala ya Ezipte. 7 Kasi banganga-nzambi yina ke salaka maji sadilaka bansalulu ya bawu ya mpimpa samu na kusala mambu ya faso mosi. Bawu mpe basisaka batsyula na bwala ya Ezipte. 8 Na yawu, Faraoni bokilaka Moyize na Aroni mpe zonzaka na bawu: “Beno bondila Yehova samu yandi katula batsyula na zulu ya munu mpe bantu ya munu, samu mu zola kubika dikanda ya beno kwenda pesa Yehova minkayulu.” 9 Na yawu, Moyize zonzaka na Faraoni: “Ni nge me fwana kuzonzila munu na wapi ntangu mu me fwana kubondila Nzambi samu yandi katula batsyula na zulu ya nge, ya bisadi ya nge, ya bantu ya nge, mpe ya bayinzo ya nge. Batsyula ke bikana kaka na Nzadi ya Nile.” 10 Yandi vutulaka: “Mbasi.” Na yawu Moyize zonzaka na yandi: “Ya ke salama mutindu nge me zonza, samu nge kwiza zaba ti ya ke ve na muntu mutindu Yehova Nzambi ya beto. 11 Batsyula ke katuka na zulu ya nge, ya bayinzo ya nge, ya bisadi ya nge, mpe ya bantu ya nge. Ya ke bikana kaka na Nile.”

12 Na yawu Moyize na Aroni katukaka na mantwala ya Faraoni, mpe Moyize bondilaka Yehova samu na batsyula yina yandi* filisaka na sika ya Faraoni. 13 Na yina, Yehova salaka mutindu Moyize lombaka, mpe batsyula bandaka kufwa na kati ya bayinzo, na balupangu mpe na bilanga. 14 Ba vanda kutika yawu na bikunku mingi, mpe bwala bandaka kubasika nsunga. 15 Ntangu Faraoni talaka ti bamambu vanda me bonga, yandi kubisaka ntima ya yandi,* mpe mangaka kuwa Moyize na Aroni, kaka mutindu Yehova zonzaka yawu.

16 Na yawu Yehova zonzaka na Moyize: “Zonza na Aroni, ‘Nanguna yinti ya nge mpe bula fundu-fundu ya ntoto, mpe ya ke kuma bangungu na bwala nyonso ya Ezipte.’” 17 Ba tumamaka. Aroni nangunaka yinti ya yandi mpe bulaka fundu-fundu ya ntoto, mpe bangungu kwizaka na zulu ya bantu mpe bibulu. Fundu-fundu nyonso ya ntoto kumaka bangungu na bwala nyonso ya Ezipte. 18 Banganga-nzambi yina ke salaka maji mekaka mpe kusala yawu, mpe kubasisa bangungu na nzila ya bansalulu ya bawu ya mpimpa, kasi ba lembanaka. Bangungu vandaka kaka na zulu ya bantu mpe bibulu. 19 Na yawu banganga-nzambi yina ke salaka maji zonzaka na Faraoni: “Ya ke musapi ya Nzambi!” Kasi Faraoni vanda bika ve kusala yintu ngolo,* mpe yandi kuwaka ve bawu, kaka mutindu Yehova zonzaka yawu.

20 Na manima Yehova zonzaka na Moyize: “Telama na suka-suka mpe kwenda na mantwala ya Faraoni. Yandi ke vanda na nzila samu na kukwenda na maza. Nge fwana zonza na yandi, ‘Yayi ni mambu yina Yehova me zonza: “Bika dikanda ya munu, ba kwenda sadila munu. 21 Kasi, kana nge manga kubika dikanda ya munu kwenda, mu ke filisa banzinzi yina ke tatikaka na zulu ya nge, na zulu ya bisadi ya nge, na zulu ya bantu ya nge, mpe na kati ya bayinzo ya nge. Bayinzo ya Ezipte ke fuluka na banzinzi yango, mpe ntoto yina ba* ke dyatilaka ke fuluka na yawu. 22 Na kilumbu yango, mu ke bumba ntoto ya Goshene, kisika yina dikanda ya munu ke na zingaka. Banzinzi yango ke vanda ve kuna, mpe na mambu yayi nge ke zaba ti munu Yehova, mu kele awa na kati ya bwala. 23 Mu ke sala luswaswanu na kati ya bantu ya munu na ya nge. Kidimbu yayi ke talana mbasi.”’”

24 Yehova salaka mutindu yina, mpe bikunku ya nene ya banzinzi yina ke tatikaka kotaka na yinzo ya Faraoni, na bayinzo ya bisadi ya yandi mpe na bwala nyonso ya Ezipte. Banzinzi yayi bebisaka bwala nyonso. 25 Nsuka-nsuka, Faraoni bokilaka Moyize na Aroni mpe zonzaka: “Beno kwenda pesa Nzambi ya beno minkayulu, kasi beno sala yawu kaka awa, na kati ya bwala.” 26 Kasi Moyize vutulaka: “Ya ke simba ve, samu minkayulu yina beto ke pesa na Yehova Nzambi ya beto ke nganzi samu na bantu ya Ezipte. Kana bantu ya Ezipte tala beto kupesa minkayulu yina ke nganzi na meso ya bawu, ba ke bula ve beto matadi? 27 Beto ke sala nzyetolo ya bilumbu tatu na ntoto ya kuyuma, mpe kuna beto ke pesa Yehova Nzambi ya beto minkayulu, kaka mutindu yandi zonzaka na beto.”

28 Faraoni zonzaka: “Mu ke bika beno kwenda pesa minkayulu na Yehova Nzambi ya beno na ntoto ya kuyuma, kasi beno kwenda ve ntama mingi. Beno bondila Nzambi ya beno samu na munu.” 29 Na yawu, Moyize vutulaka: “Awa, mu me bika nge. Mu ke bondila Yehova mpe mbasi banzinzi ke katuka na zulu ya Faraoni, ya bisadi ya yandi mpe ya bantu ya yandi. Kasi Faraoni me fwana kusakanina* dyaka ve beto na faso yandi ke na mangaka kubika dikanda ya beto kwenda pesa minkayulu na Yehova.” 30 Moyize katukaka na mantwala ya Faraoni mpe bondilaka Yehova. 31 Na yawu Yehova salaka mutindu Moyize lombaka. Banzinzi bikaka Faraoni, bisadi ya yandi mpe bantu ya yandi. Ata mosi bikanaka. 32 Kasi mbala yayi mpe, Faraoni kubisaka dyaka ntima ya yandi, mpe yandi bikaka ve ti dikanda ya Izraele kwenda.