Kubanda

37 Yakobi tatamanaka na kuzinga na bwala ya Kanana, kisika yina tata ya yandi zingaka mutindu nzenza.

2 Yayi ni disolo ya Yakobi.

Ntangu Yozefi vandaka na bamvula 17, ntwenya ya bakala yayi vanda bumbaka kikunku ya bibulu kintwadi na bana ya Bila mpe bana ya Zilpa, bakento ya tata ya yandi. Mpe Yozefi kwendaka zonza na tata ya bawu, bamambu ya yimbi yina bampangi ya yandi vanda sala. 3 Izraele vanda zolaka mingi Yozefi kuluta bana ya yandi nyonso ya babakala samu yandi vandaka mwana yina yandi kuzwaka na buboba, mpe yandi bakaka kinkuti mosi ya yinda mpe ya kitoko mpe pesaka Yozefi yawu. 4 Ntangu bampangi ya yandi talaka ti tata ya bawu vanda zolaka yandi kuluta bampangi ya yandi nyonso, ba bandaka kuyiina yandi, mpe ba vanda zonzilaka dyaka ve na yandi na faso ya mbote.

5 Na manima, Yozefi salaka ndosi mpe yandi zonzaka yawu na bampangi ya yandi, mpe ba kuzwaka dyaka mambu ya kuyiina yandi. 6 Yandi zonzaka na bawu: “Mulemvo, beno kuwa ndosi yayi yina mu me sala. 7 Beto vanda kutika matiti ya ble na bikunku na bilanga ntangu kikunku ya munu telamaka mpe bikanaka ya kutelama, mpe bikunku ya beno zungaka kikunku ya munu mpe fukamaka na mantwala ya yawu.” 8 Bampangi ya yandi zonzaka na yandi: “Nge zola zonza ti nge ke vanda mfumu ya beto mpe ti nge ke yala na zulu ya beto?” Na yawu, ba kuzwaka dyaka mambu ya kuyiina yandi samu na bandosi ya yandi mpe na mambu yandi zonzaka.

9 Na manima yandi salaka dyaka ndosi ya nkaka, mpe yandi zonzaka yawu na bampangi ya yandi: “Mu me sala ndosi ya nkaka. Ya mbala yayi, ntangu na ngonda na bambwetete 11 me fukama na mantwala ya munu.” 10 Na manima, yandi zonzaka mpe yawu na tata ya yandi mutindu yandi zonzaka yawu na bampangi ya yandi, mpe tata ya yandi ngalaka yandi mpe zonzaka na yandi: “Yinki zola zonza ndosi ya nge yayi? Ya zola zonza kwandi ti munu, mama ya nge, mpe bampangi ya nge ke kwiza mpe ke fukama na ntoto na mantwala ya nge?” 11 Mpe bampangi ya yandi kumaka na kimbanda ya mingi samu na yandi, kasi tata ya yandi bumbaka bamambu yayi.

12 Bampangi ya yandi kwendaka dikisa bibulu ya tata ya bawu pene ya Shekeme. 13 Na manima, Izraele zonzaka na Yozefi: “Bampangi ya nge ke na bumbaka bibulu pene ya Shekeme, mpila yina ve? Kwiza, mpe bika mu filisa nge na sika ya bawu.” Na yawu, yandi vutulaka: “Munu yandi yayi!” 14 Na manima, Yakobi zonzaka na Yozefi: “Mulemvo, kwenda mpe tala kana bampangi ya nge ke mbote. Tala kana bibulu ke mbote, mpe kwiza zonza na munu.” Na yawu, katuka na dibenga ya Ebroni, yandi filisaka yandi, mpe yandi kwendaka na Shekeme. 15 Na manima, bakala mosi talaka yandi ntangu yandi vanda tambula na bilanga. Bakala yango yufulaka yandi: “Yinki nge ke na sosaka?” 16 Yandi zonzaka na yandi: “Mu ke na sosaka bampangi ya munu. Mulemvo, zonza na munu, wapi kisika ba ke na bumbaka bibulu?” 17 Bakala yango vutulaka: “Ba kwendaka. Mu kuwaka bawu kuzonza, ‘Beto kwenda na Dotane.’” Na yawu, Yozefi landaka bampangi ya yandi mpe yandi kutaka bawu na Dotane.

18 Ntangu ba talaka yandi na ntama, tekila yandi kuma kisika ba vandaka, ba bandaka kusala mfundu samu na kufwa yandi. 19 Na yawu, ba bandaka kuzonza bawu na bawu: “Beno tala! Muntu ya bandosi ke na kwizaka. 20 Beno kwiza, bika beto kufwa yandi mpe beto losa yandi na mosi ya mabulu ya maza yayi, mpe beto ke zonza ti kibulu ya brusu me kudya yandi. Na yawu, beto ke tala yinki ke kumina bandosi ya yandi.” 21 Ntangu Rubeni kuwaka yawu, yandi sosaka kuvuukisa yandi na maboko ya bawu. Na yawu, yandi zonzaka: “Beto kufwa ve yandi.” 22 Rubeni zonzaka na bawu: “Beto kumwangisa ve menga. Beto losa yandi na dibulu yina ke na ntoto ya kuyuma, kasi beto kutalisa ve yandi mpasi.” Yandi vanda sosa kuvuukisa yandi na maboko ya bawu mpe kuvutula yandi na tata ya yandi.

23 Kaka na ntangu Yozefi kumaka na bampangi ya yandi, ba katulaka yandi kinkuti ya yandi, kinkuti ya kitoko mpe ya yinda yina yandi vandaka ya kulwata, 24 mpe ba simbaka yandi mpe ba losaka yandi na dibulu ya maza. Na ntangu yina, dibulu vandaka ve na kima na kati, ya vandaka ve na maza.

25 Na manima ba vandaka samu na kudya. Ntangu ba nangunaka meso, ba talaka nkonga ya Baismaelite yina vanda katuka na Galade. Bashamo ya bawu vanda nata labdanume, balsame, mpe bampusu ya yinti ya nsunga ya kitoko, mpe ba vanda kulumuka na Ezipte. 26 Na yawu Yuda zonzaka na bampangi ya yandi: “Yinki beto ke kuzwa kana beto kufwa mpangi ya beto mpe beto bumba lufwa ya yandi? 27 Beno kwiza, bika beto tekisa yandi na Baismaelite, mpe beto sala ve yandi yimbi. Ya ke mpangi ya beto, musuni ya beto.” Na yawu, ba kuwaka mpangi ya bawu. 28 Mpe ntangu bantu ya mumbungu ya Madyani vanda luta, ba basisaka Yozefi na dibulu ya maza mpe ba tekaka yandi na Baismaelite na bambongo 20 ya arza. Babakala yango nataka Yozefi na Ezipte.

29 Na manima, ntangu Rubeni vutukaka na dibulu ya maza mpe talaka ti Yozefi vandaka ve na kati ya dibulu ya maza, yandi pasulaka bilele ya yandi. 30 Ntangu yandi vutukaka na bampangi ya yandi, yandi gangaka: “Mwana ke dyaka ve! Yinki mu ke sala?”

31 Na yawu, ba bakaka kinkuti ya yinda ya Yozefi, kufwaka nkombo ya bakala, mpe tulaka kinkuti yango na kati ya menga ya nkombo. 32 Na manima, ba filisaka kinkuti ya yinda mpe ya kitoko na tata ya bawu mpe zonzaka: “Ni yayi beto me kuzwa. Tala mbote-mbote kana ya ke kinkuti ya yinda ya mwana ya nge to ve.” 33 Na manima, Yakobi talaka yawu mbote-mbote mpe gangaka: “Ya ke kinkuti ya yinda ya mwana ya munu! Kibulu ya brusu me kudya yandi! Yandi me zenga Yozefi na bitini-bitini!” 34 Na yawu, Yakobi pasulaka bilele ya yandi mpe lwataka ngoto* na luketo mpe dilaka mwana ya yandi bilumbu mingi. 35 Bana ya yandi nyonso ya babakala mpe ya bakento vanda meka kubondila* yandi, kasi yandi mangaka ba bondila yandi, mpe zonzaka: “Mu ke kulumuka na ndyamu* na kudilaka mwana ya munu!” Mpe tata ya yandi tatamanaka na kudila yandi.

36 Bantu ya Madyani tekisaka Yozefi na Ezipte na Potifare, yina vandaka kisadi ya Faraoni mpe mfumu ya bakengidi ya yandi.