Samu na yinki nge fuana tatamana kulonguka?

1. Wapi mambote nge kezua kana nge metatamana kulonguka Biblia?

Ntembe kele ve, malongi ya ntetentete ya Biblia yayi nge melonguka mekudisa luzolo na nge na Yehova. Nge fuana sala ngolo samu luzolo yango yakita ve. (1 Piere 2:2) Kivuvu ya nge samu na luzingu ya mvula na mvula mesimbama na ngolo yina nge kena sala ya kutatamana kulonguka Mpova ya Nzambi mpe kupusana penepene na yandi.​—Tanga Yoane 17:3; Yude 21.

Ntangu nzayilu na nge samu na Nzambi kena kubuelama, kiminu ya nge mpe kekuma ya ngolo mingi. Kiminu ya nge kesadisa nge nge yangidika Nzambi. (Baebre 11:1, 6) Yau ketumisa nge nge vilula ntima mpe nge sala nsobolo ya nene na luzingu ya nge.​—Tanga Bisalu 3:19.

2. Wapi mutindu nzayilu ya Nzambi yayi nge mezua lenda natina bayankaka mambote?

Nge mosi nge ketala ti nge fuana zonzila bayankaka mambu nge melonguka, samu beto nyonso keyangalalaka kutubila nsangu ya mbote. Ntangu nge kena kutatamana kulonguka Biblia, nge kezaba mutindu ya kusadila yau samu na kutubila kiminu yina nge kele na yau samu na Yehova mpe nsangu ya mbote.​—Tanga Baroma 10:13-15.

Bantu mingi kebandilaka ntete kutubila nsangu ya mbote na bankundi to bampangi ya bau. Sala yau na nduenga. Na kisika ya kuzonzila bantu ti dibundu ya bau kele ya luvunu, tubila bau bansilulu ya Nzambi. Mpe, kuzimbana ve ti bantu ketulaka dikebi mingi ni na bikadulu ya nge ya mbote, kansi na bampova ya nge ve.​—Tanga 2 Timote 2:24, 25.

3. Nguisani ya wapi mutindu nge lenda vuanda na yau na Nzambi?

Kulonguka Mpova ya Nzambi kesadisa nge nge zaba diaka mingi mambu ya Nzambi. Nsukansuka, nge kekuma na nguisani ya mbotembote na Yehova. Nge lenda kuma kutu muntu ya dibuta na yandi.​—Tanga 2 Bakorinto 6:18.

4. Wapi mutindu nge lenda tatamana kukuenda na ntuala?

Nge lenda kuenda na ntuala na mambu ya Nzambi kana nge metatamana kulonguka Mpova na yandi. (Baebre 5:13, 14) Lomba Mbangi ya Yehova mosi longuka na nge mukanda Qu’enseigne réellement la Bible? Ntangu nge kena tatamana kulonguka Mpova ya Nzambi, luzingu na nge kekuma mbote mingi ya kulutila.​—Tanga Nkunga 1:1-3; 73:27, 28.

Nsangu ya mbote mekatuka na Yehova Nzambi ya kiese. Nge lenda pusana penepene na yandi kana nge mepusana penepene na bantu na yandi. (Baebre 10:24, 25) Kana nge metatamana kusala ngolo samu na kuyangidika Yehova, nge kele na nzila samu na kubaka luzingu ya kedikakedika, yazola tuba luzingu ya mvula na mvula. Kupusana penepene na Nzambi kele diambu melutila mbote yina nge lenda sala.​—Tanga 1 Timote 1:11; 6:19.