DISOLO YA KULONGOKA 15
NZIMBU 30 Tata ya munu, ndiku ya munu, Nzambi ya munu
‘Kilengi ya beto ni kuvanda pene-pene na Nzambi’
‘Kilengi ya munu, ni kuvanda pene-pene na Nzambi.’—NKU. 73:28.
NA BUNKUFI
Beto ke tala mutindu beto lenda vanda pene-pene na Yehova mpe bambote yina beto ke kuzwa na kusala yawu.
1-2. a) Yinki beto ke na nsatu ya kusala samu na kukuma ndiku ya muntu? b) Yinki beto ke zonzila na disolo yayi?
NGE ke na ndiku ya ntima? Yinki nge salaka samu beno kuma bandiku? Ya lenda vanda ti nge lutisaka ntangu na yandi, ya sadisaka nge na kuzaba bamambu ya mpasi yina yandi kutanaka na yawu, bamambu yina yandi ke zolaka mpe yina yandi ke zolaka ve. Nge kwiza tala ti, yandi ke na bifu ya mbote yina nge lenda landa. Ya nataka nge na kuzola yandi.
2 Kukulisa kindiku na muntu ke lombaka ntangu mpe bangolo. Beto mpe me sala bangolo mpe me lutisa ntangu samu na kukuma na kindiku ya ngolo na Yehova. Na disolo yayi, beto ke tala mutindu beto lenda kuma dyaka pene-pene na Nzambi ya beto mpe bambote yina beto ke kuzwa na kusala yawu. Na kubanda, beto tala samu na yinki ya ke mbote samu na beto na kuvanda dyaka pene-pene na ndiku ya beto ya kulutila mbote, Yehova.
3. Samu na yinki ya ke mfunu na kuyindula na bamambu ya mbote yina lenda kumina beto ntangu beto ke vandaka pene-pene na Yehova? Zonzila yawu.
3 Ntembe ve, nge ke na kundima ti kuvanda ndiku ya Yehova ke mbote. Kasi, kana beto yindula mbote-mbote samu na yinki ya ke mbote na kusala yawu, ya lenda nata beto na kutatamana na kuvanda pene-pene na yandi. (Nku. 63:6-8) Na kifwani, beto zaba ti samu na kuvanda na mavimpi ya mbote, beto me bonga kudya mbote, kulala mingi, kusala sport mpe kunwa maza mingi. Kasi, bantu mingi ke tulaka ve dikebi na bamambu yayi, mpe ke kipeke ve mavimpi ya bawu. Kana beto baka ntangu mingi ya kukanisa na bambote yina bifu yayi ke sala na mavimpi ya beto, ya ke sala ti beto bika ve kusala yawu. Kaka mutindu mosi, beto zaba ti kukuma pene-pene na Yehova ke mbote samu na beto, kasi kuyindula na bambote yina kusala yawu lenda natina beto, lenda sala ti beto bika ve kuvanda pene-pene na ndiku ya beto.—Nku. 119:27-30.
4. Yinki muntu yina sonikaka Nkunga 73:28 zonzaka?
4 Nkunga 73:28 ke zonzaka: “[Kilengi] ya munu, ni kuvwanda pene-pene na Nzambi. [Yehova] Mfumu kele kiswamunu ya munu, mu ke mwangisa nsangu na mambu nyonso yina yandi me sala.” Muntu yina sonikaka Nkunga 73 vandaka mulevi yina vanda salaka na tempelo ya Yehova mutindu muyimbidi. Ntangu yandi sonikaka Nkunga yayi, ya lenda vanda ti yandi lutisa mwa ntangu na kusadila Yehova na kukwikama nyonso. Ata faso yina, yandi zimbanaka ve ti “kuvwanda pene-pene na Nzambi” ke mfunu samu na yandi mpe na bampangi. Wapi yina ke mwa bambote yina beto lenda kuzwa na kuvanda pene-pene na Nzambi?
“KUVWANDA PENE-PENE NA NZAMBI” KE PESAKA KILENGI
5. a) Samu na yinki kuvanda pene-pene na Yehova ke pesaka kilengi? b) Mutindu ke zonzaka yawu Bingana 2:6-16, wa’ faso ndwenga yina Yehova ke pesaka ke sadisaka beto mpe ke bumbaka beto?
5 Kuvanda pene-pene na Yehova ke pesaka beto kilengi. (Nku. 65:4) Ya tsyeleka, bamambu ke mingi yina ke lakisaka yawu. Na kifwani, ntangu beto ke tangaka bamambu yina Yehova ke zonzaka na beto na Biblia mpe ke tumamaka na yandi, beto ke kumaka na ndwenga. Mpe ndwenga yango ke bumbaka beto na bamambu ya yimbi mpe ke salaka ti beto kubwa ve na mutambu ya kusala bamambu ya yimbi. (Tanga Bingana 2:6-16.) Ni na yawu, Biblia ke zonzaka: ‘Kyese na muntu yina me kuzwa ndwenga mpe na muntu yina me kuzwa luswasukusu.’—Bin. 3:13.
6. Yinki salaka ti muntu yina sonikaka Nkunga 73 vandaka dyaka ve na kilengi?
6 Ya tsyeleka, ata bandiku ya Yehova bantangu ya nkaka ba ke vandaka na mawa. Muntu yina sonikaka Nkunga 73 vandaka dyaka ve na kilengi samu yandi kumaka na makanisi ya yimbi. Samu na yandi bantu ya yimbi vandaka na luzingu ya mbote ata ti ba vanda tumama ve na misiku ya Nzambi. Ya vanda sala yandi mpasi mpe yandi bandaka kulula luzingu ya bawu. Samu na yandi, bantu ya yimbi yayi, vandaka kuma kaka bamvwama, vandaka na mavimpi ya mbote mpe vandaka tala ve mpasi. (Nku. 73:3-7, 12) Kutala yawu mpe kukanisa mingi na yawu, vanda kwamisa yandi mingi. Ya nataka yandi na kutala ti bangolo nyonso yina yandi vanda sala samu na kusadila Yehova vandaka kaka ya mpamba. Na mawa nyonso, yandi zonzaka: “Ya tsyelika, mu me sala kisalu ya mpamba na kuvedisa ntima ya munu, ya tsyelika, mu me sukula mpe maboko ya munu samu na kulakisa ti mu me sala ve yimbi.”—Nku. 73:13.
7. Ntangu beto ke vandaka na mawa, yinki beto me fwana kusala samu na kubumba kilengi? (Tala mpe kizizi.)
7 Ata ti yandi vandaka na mawa mingi, yandi salaka kima samu na kusoba faso ya yandi ya kukanisa. Yandi “kotaka na Yinzo ya [Santu] ya Nzambi,” kuna Yehova sadisaka yandi na kusoba makanisi ya yandi. (Nku. 73:17-19) Ntangu beto ke vandaka na mawa, Yehova ndiku ya beto ya kulutila mbote zaba bamambu yina ke na kwamisaka beto. Kana beto sambila yandi samu yandi twadisa beto mpe beto ndima lubakusu yina yandi ke pesaka beto na nzila ya Biblia mpe ya kimvuka, beto ke kuzwa ngolo yina beto ke na yawu nsatu samu na kukanga ntima. Ata ntangu yina beto ke na mawa ya kulutila, Yehova lenda pesa beto ngolo mpe kuzunisa ntima ya beto.—Nku. 94:19.a
Mulevi yina sonikaka Nkunga 73 ke ya kutelama na “yinzo ya santu ya Nzambi” (Tala paragrafe 7)
“KUVWANDA PENE-PENE NA NZAMBI” KE PESA BETO KIVUVU MPE LUZINGU YA MBOTE
8. Wapi yina ke bamambu zole ya nkaka ya mfunu yina ke na lakisaka ti kuvanda pene-pene na Nzambi ke mbote?
8 Ya ke na bamambu zole ya nkaka ya mfunu yina ke na lakisaka ti kuvanda pene-pene na Nzambi ke mbote samu na beto. Ya ntete, ya ke pesa beto luzingu ya kitoko. Ya zole, ya ke pesa beto kivuvu ya matsyeleka na yina me tadila bilumbu ya mantwala. (Yer. 29:11) Beto zonzila mosi na mosi ya yawu.
9. Samu na yinki kuvanda pene-pene na Yehova ke pesaka luzingu ya kitoko?
9 Kuvanda pene-pene na Nzambi ke pesa beto luzingu ya mbote. Bubu yayi, bantu mingi ke zonzaka ti Nzambi kele ve. Na yawu, ba zaba ve samu na yinki bantu kele awa na ntoto mpe ba ke kwikilaka ti na mantwala luzingu ke vanda dyaka ve. Kasi na nzila ya kulongoka ya beto ya Biblia, beto ke na kundima ti “Nzambi kele mpe ti yandi ke pesaka [difuta] na bayina ke sosaka yandi.” (Ebr. 11:6) Dyaka, Yehova yidikaka beto na makoki ya kusadila yandi. Mpe ntangu beto ke salaka yawu, beto ke vandaka na luzingu ya kitoko.—Det. 10:12, 13.
10. Mutindu ke zonzaka yawu Nkunga 37:29, wapi nsilulu Yehova pesaka samu na ba yina ke tudilaka yandi ntima?
10 Samu na bantu mingi, luzingu ke suka kaka na kusosa kisalu, kukwelana, kubuta mpe kubumba mbongo yina ke sadisa bawu na mantwala. Ba zaba ve bansilulu yina Nzambi pesaka samu na mantwala. Kasi beto bisadi ya Yehova, beto ke tulaka kivuvu ya beto na yandi. (Nku. 25:3-5; 1 Tim. 6:17) Beto ke tulaka ntima na Nzambi yina ke ndiku ya beto mpe na bansilulu ya yandi. Na kati ya bansilulu yango, beto ke na bweso ya kukembila yandi samu na ntangu nyonso na paradiso. Ni na yawu, Nkunga 37:29 ke zonzaka: “Bantu ya kudedama ke byadila yinsi, bawu ke zinga kuna bantangu nyonso.”
11. Yinki ke salamaka ntangu beto ke vandaka pene-pene na Nzambi mpe yinki ya ke salaka yandi?
11 Ya ke na bamambu mingi ya nkaka yina ke salamaka ntangu beto ke vanda pene-pene na Nzambi. Na kifwani, Yehova salaka nsilulu ya kulemvokila masumu ya ba yina ke pene-pene na yandi ntangu ba ke balulaka ntima. (Iza. 1:18) Na yawu, beto ke ve na nsatu ya kutatamana na kuvanda na manyongo ya masumu yina beto salaka na ntama. (Nku. 32:1-5) Dyaka, beto ke na kilengi ya kusepelisa Yehova. (Bin. 23:15) Ya lenda vanda ti nge ke na kanisaka na balusakumunu ya nkaka yina kuvanda pene-pene na Nzambi ke natina nge. Kasi, yinki nge lenda sala samu na kutatamana kuvanda pene-pene na Nzambi?
TATAMANA NA “KUVWANDA PENE-PENE NA NZAMBI”
12. Yinki beto salaka samu na kuvanda pene-pene na Nzambi?
12 Tekila beto kuzwa mbotokolo, beto me sala bamambu mingi samu na kukuma ndiku ya Yehova. Beto me longoka matsyeleka na yina me tadila Yehova Nzambi na Yesu Kristo, beto me balula ntima, beto me lakisa ti beto ke na kiminu na Nzambi, mpe beto me sala nyonso yina beto lenda sala samu na kutumama na yandi. Kasi, samu na kuvanda dyaka pene-pene na Nzambi, beto me fwana kutatamana na kusala bamambu yayi.—Kol. 2:6.
13. Wapi yina ke bamambu tatu yina lenda sadisa beto na kutatamana na kuvanda dyaka pene-pene ya Yehova?
13 Yinki lenda sadisa beto na kutatamana na kuvanda kaka pene-pene na Yehova? 1) Beto me fwana kutatamana na kutanga mpe kulongoka Biblia. Ntangu beto ke tangaka Biblia, beto zola suka ve kaka na kulongoka bamambu ya fioti-fioti na yina me tadila Nzambi. Beto me fwana kusosa kuzaba, wapi yina ke luzolo ya Nzambi samu na beto mpe kubika malongi ya Biblia twadisa beto. (Efe. 5:15-17) 2) Beto me fwana kukumisa kiminu ya beto ngolo na kuyindulaka na bafaso mingi yina Yehova ke na lakisaka mosi na mosi ya beto luzolo. 3) Beto me fwana kutatamana kuyiina bamambu yina Yehova ke yiinaka mpe kuvanda ntama na bantu yina ke salaka yawu.—Nku. 1:1; 101:3.
14. Mutindu ke zonzaka yawu 1 Bakorinto 10:31, wapi mwa bamambu yina beto lenda sala konso kilumbu samu na kusepelisa Yehova? (Tala mpe bizizi.)
14 Tanga 1 Bakorinto 10:31. Ya ke mfunu samu na beto na kusala bamambu yina ke sepelisa Yehova. Bamambu yango ke suka kaka ve na kusamuna mpe na kukwenda na balukutakanu. Beto me fwana mpe kusala bamambu yina ke sepelisaka Yehova konso kilumbu na luzingu ya beto. Na kifwani, beto ke sepelisa Yehova ntangu beto ke zonzaka matsyeleka na mambu nyonso mpe beto ke kabulaka bampangi bima yina beto ke na yawu. (2 Kor. 8:21; 9:7) Yandi zola mpe ti beto tala luzingu mutindu dikabu ya kitoko. Na yawu, beto sala keba na faso ya beto ya kudya, ya kunwa, mpe kusala bamambu yina ke sadisa beto na kukipe mavimpi ya beto. Ntangu Yehova ke talaka bangolo yina beto ke salaka samu na kusepelisa yandi, yandi ke zolaka dyaka beto ya kulutila.—Luke 16:10.
Kuvanda ekenge ntangu beto ke nataka, kusala sport, kudya mbote samu na kukipe mavimpi ya beto mpe kuvanda na kifu ya kuyambaka bampangi ke mwa bamambu yina ke sepelisaka Yehova (Tala paragrafe 14)
15. Wa’ faso Yehova zola ti beto bakila bantu ya nkaka?
15 Yehova ke lakisaka ntima ya mbote na bantu nyonso, ya vanda na ba yina ke sadilaka yandi to ve. (Mat. 5:45) Yandi zola ti beto mpe lakisa ntima ya mbote na bantu nyonso. Na kifwani, yandi ke na lombaka na beto “na kuzonzaka ve yimbi ya muntu, na kuswanaka ve, . . . na kulakisaka lembami na bantu nyonso.” (Tite 3:2) Mambu yayi, ke na nataka beto na kutala ve bantu yina ke sambilaka ve Yehova mutindu bantu ya mpamba. (2 Tim. 2:23-25) Kubakila bantu nyonso na ntima ya mbote, ke sala ti beto vanda kaka pene-pene na Yehova.
VANDA “PENE-PENE NA NZAMBI” ATA TI NGE ME SALA FOTI YA NENE
16. Yinki vandaka na muntu yina sonikaka Nkunga 73 na manima ya mwa bantangu?
16 Kasi, yinki ya kusala na manima ya mwa ntangu yina nge salaka foti, nge ke na talaka ti Yehova zola dyaka ve nge? Kuzimbana ve ti mambu ya mutindu yayi, kuminaka mpe muntu yina sonikaka Nkunga 73. Yandi zonzaka: “Kaka fyoti bikanaka, mu zola syelumuka. Kaka fyoti bikanaka, mu zolaka bula dibaku.” (Nku. 73:2) Yandi ndimaka ti yandi kumaka na “kyadi,” “vwandaka zaba dyaka ata kima,” mpe “vwandaka mutindu kibulu” na mantwala ya Yehova. (Nku. 73:21, 22) Yandi zonzaka kwandi samu na foti ya munu, Yehova ke sepela dyaka ve na munu?
17. a) Ntangu muntu yina sonikaka Nkunga 73 vandaka na mawa ya kulutila yinki yandi salaka? b) Wapi kileso beto lenda benda na mambu yina kuminka yandi? (Tala mpe bizizi.)
17 Muntu yayi, yina sonikaka Nkunga 73 vanda kanisa ti Yehova bikaka yandi. Kasi makanisi yango vandaka na yandi kaka na kati ya mwa ntangu fioti. Ata ti yandi vandaka na mawa ya kulutila, yandi zabaka ti yandi vandaka na nsatu ya kuvanda pene-pene na Yehova. Yandi sonikaka: “Kasi ntangu nyonso, mu ke kaka na nge. Nge me simba munu na diboko ya kibakala. Nge ke na twadisa munu na malongi ya nge, mpe nge ke yamba munu na nkembo ya nge.” (Nku. 73:23, 24) Beto mpe ntangu bafoti yina beto salaka na ntama ke na lembisaka beto to kiminu ya beto ke na lembaka, beto lomba ngolo na Yehova. (Nku. 73:26; 94:18) Ata ti beto me sala disumu ya nene, beto lenda vutuka na Yehova mpe kuvanda na kundima ti yandi ke ya kubongama na “kulemvokila.” (Nku. 86:5) Ntangu beto ke vandaka na manyongi ya kulutila, ya ke mbote na beto na kuvanda pene-pene na Nzambi ya beto.—Nku. 103:13, 14.
Ntangu beto ke talaka ti beto me kuma ya kulemba na kimpeve, beto me bonga kuvanda dyaka pene-pene na Yehova na kusambilaka yandi mingi mpe na kusalaka bangolo na kuvanda na balukutakanu nyonso (Tala paragrafe 17)
“KUVWANDA PENE-PENE NA NZAMBI” SAMU NA NTANGU NYONSO
18. Samu na yinki ya ke ve na bandilu na kukuma pene-pene na Yehova?
18 Beto lenda tatamana na kuvanda pene-pene na Yehova samu na ntangu nyonso, mpe kulongoka kaka bamambu mingi na yina me tadila Yehova. Biblia ke zonzaka ti “ata muntu mosi ve lenda bakula . . . mbote-mbote” banzila ya Yehova, ndwenga ya yandi mpe luzabu ya yandi.—Rom. 11:33.
19. Wapi kivuvu Bankunga ke na pesaka beto?
19 Nkunga 79:13 ke zonzaka: “Beto bantu ya nge, beto mameme ya nge, yina nge ke dikilaka beto ke kembila nge bantangu nyonso, bambandu na bambandu, beto ke yimbila nge mikunga ya nzitusu.” Kana nge tatamana na kuvanda pene-pene na Nzambi, nge mpe lenda vanda na kundima ti nge ke kuzwa balusakumunu ya ntangu nyonso. Mpe nge lenda zonza na kundima nyonso: ‘Nzambi kele ngolo ya munu mpe dikabu ya munu ya bantangu nyonso.’—Nku. 73:26.
NZIMBU 32 Soola mpe kangama na Yehova
a Bantu yina ke kaka na manyongi ya kulutila mpe mawa lenda vanda na nsatu ya munganga samu na kusadisa bawu. Samu na kuzaba dyaka mingi, tanga Yinzo ya Kengidi No. 1 ya 2023 na lumputu.