Kuvanda pene-pene na bampangi ke mbote samu na beto!

1-2. Na yinki Yehova ke tulaka mingi dikebi mpe yinki yandi ke na nsatu ti beto sala?

YEHOVA ke tulaka dikebi na mutindu yina beto ke bakilaka bampangi. Yesu longaka ti beto me fwana kuzola bampangi ya beto mutindu beto mosi. (Mat. 22:37-39) Na kati ya bawu, ya ke mpe na ba yina ke kwikilaka ve na Yehova. Ntangu beto ke lakisaka bawu ntima ya mbote, beto ke landaka kifwani ya Yehova yina ke “basisaka ntangu na zulu ya bantu ya yimbi mpe ya mbote, mpe yandi ke nokisaka mvula na zulu ya bantu ya lunungu mpe na ba yina ke ve bantu ya lunungu.”—Mat. 5:45.

² Ata ti Yehova ke zolaka bantu nyonso, kasi yandi ke zolaka mingi-mingi ba yina ke tumamaka na yandi. (Yoa. 14:21) Yandi zola ti beto vanda mutindu yandi. Ni na yawu, yandi zonzaka na beto na ‘kuzolasana mingi’ na bampangi ya beto mpe kuvanda na “luzolo ya ngolo.” (1 Pi. 4:8; Rom. 12:10) Luzolo yango ke mutindu luzolo yina ke na kati ya bantu ya dikanda mosi to ya bandiku ya ntima.

3. Yinki beto me fwana kuzimbana ve na yina me tadila luzolo?

³ Kaka mutindu beto ke salaka bangolo samu na kukipe yinti samu ya kula mbote-mbote, beto mpe me fwana kusala bangolo samu na kukulisa luzolo ya beto samu na bampangi. Ni na yawu, ntumwa Polo zonzaka na bakristo: “Beno tatamana na kuzolasana mutindu bampangi.” (Ebr. 13:1) Yehova zola ti beto tatamana na kukulisa luzolo ya beto samu na bampangi. Na disolo yayi, beto ke tala samu na yinki beto me fwana kuvanda pene-pene na bampangi ya beto mpe mutindu beto lenda tatamana na kusala yawu.

SAMU NA YINKI BETO ME BONGA KUVANDA PENE-PENE NA BAMPANGI

4. Mutindu ke na lakisaka yawu Nkunga 133:1, yinki lenda sadisa beto na kubika ve na kusepela na kindiku ya beto na bawu? (Tala mpe bizizi.)

⁴ Nkunga 133:1 ke zonzaka: “Ya kele mbote, ya kele kitoko mingi samu na bampangi na kuvwandaka kisika mosi!” Beto ke na kabulaka dikanisi mosi na muntu yina sonikaka Nkunga yayi, yina zonzaka ti ya ke “mbote” mpe “kitoko mingi” na kuvanda na kindiku na ba yina ke zolaka Yehova. Kana beto me mesana na kutala yinti ya kitoko, ya lenda kumina beto na kutala yawu mutindu kima ya mpamba. Mutindu mosi mpe ya lenda kumina beto na kutala dyaka ve kitoko ya bumosi yina beto ke na yawu, samu ti ya lenda vanda ti beto ke talanaka na bampangi ya beto bambala mingi na kati ya lumingu. Yinki lenda sadisa beto na kubika ve na kusepela na kindiku ya beto na bawu? Luzolo ya beto na bawu ke kula kana beto yindula na yina mosi na mosi ya bawu ke na salaka samu na kimvuka mpe samu na beto.

5. Yinki luzolo yina beto ke na yawu samu na bampangi ya beto lenda sala na bantu ya nkaka?

⁵ Ntangu bantu ya nkaka ke kwizaka mbala ya ntete na balukutakanu ya beto, ya ke simbaka mingi ba ntima ya bawu na kutala luzolo yina beto ke na yawu samu na bampangi. Bantangu ya nkaka, kutala yawu lenda nata bawu na kundima ti ba me kuzwa matsyeleka. Yesu zonzaka: “Na yina bantu nyonso ke zaba ti beno ke bilandi ya munu, kana beno ke na luzolo na kati ya beno.” (Yoa. 13:35) Beto tala mambu yina kuminaka Chaithra, yina vandaka na université mpe vanda longoka Biblia na mbangi mosi ya Yehova. Yandi ndimaka kuvanda na lukutakanu ya nene. Na nsuka ya kilumbu ya ntete ya lukutakanu, yandi zonzaka na mulongi ya yandi: “Nabunu bibuti ya munu yamba munu na maboko. Kasi na lukutakanu ya beno, kaka kilumbu ya ntete bantu 52 me kwiza yamba munu na maboko! Mu me tala luzolo ya Yehova na nzila ya dikanda ya yandi. Mu zola kuvanda na kati ya dikanda yayi.” Chaithra bikaka ve na kukula na kimpeve mpe na 2024 yandi kuzwaka mbotokolo. Ya tsyeleka, ntangu bantu ya malu-malu ke talaka bifu ya beto ya mbote mpe luzolo yina beto ke lakisaka na bampangi, ya ke nataka bawu na kusadila Yehova.—Mat. 5:16.

6. Wa ’faso kuvanda pene-pene na bampangi ke bumbaka beto?

⁶ Kuvanda pene-pene na bampangi ya beto lenda bumba beto. Ni na yawu, ntumwa Polo zonzaka na bakristo: “Beno kindisa bampangi beno na beno konso kilumbu, samu ti masumu nata ve muntu mosi na kati ya beno na kukuma na ntima ngolo.” (Ebr. 3:13) Kana beto me kuma ya kulemba, to ti beto me banda kutengama na nzila ya lunungu, Yehova lenda sadila mosi ya bampangi ya beto na kutala yawu mpe kusadisa beto na kuvanda na nzila ya mbote. (Nku. 73:2, 17, 23) Ntembe ve, ya ke sepelisaka beto mingi na kuzwa malongi ya mutindu yayi.

7. Wa’ faso luzolo ke kwelanaka na bumosi? (Bakolose 3:13, 14)

⁷ Beto ke dikanda yina ke salaka bangolo na kulakisa luzolo beto na beto. Kusala yawu ke natinaka beto balusakumunu mingi. (1 Yoa. 4:11) Na kifwani, luzolo ke nataka beto na ‘kutatamana na kukanga ntima beto na beto’ mpe ya ke sadisaka na kuvanda na bumosi na bampangi. (Tanga Bakolose 3:13, 14; Efe. 4:2-6) Na yawu, kilengi yina beto ke vandaka na yawu na balukutakanu ya beto, ba lenda kuzwa ve yawu na mabuundu ya nkaka na yinza.

BETO PESA LUKUMU BETO NA BETO

8. Wa’faso Yehova ke sadisaka beto na kubumba bumosi beto na beto?

⁸ Ata ti beto ke kaka bantu ya masumu, bumosi yina beto ke na yawu na yinza nyonso ke mambu ya ngitukulu yina kaka Yehova lenda sala. (1 Kor. 12:25) Biblia ke zonza na beto ti ‘Nzambi ke longaka beto na kuzolasana.’ (1 Tes. 4:9) Ya zola zonza ti Yehova ke sadilaka Biblia samu na kuzonza na beto yinki beto me bonga kusala samu na kuvanda pene-pene beto na beto. “Nzambi ke longaka” beto ntangu beto ke longokaka Biblia mpe ke sadilaka bamambu yina beto me longoka. (Ebr. 4:12; Zaki 1:25) Ni yawu Bambangi ya Yehova ke salaka bangolo na kusala.

9. Yinki Baroma 12:9-13 ke na longaka beto na mutindu ya kulakisa lukumu beto na beto?

⁹ Wa’ faso Biblia ke longaka beto na kuvanda pene-pene beto na beto? Beto tala mambu yina Polo zonzaka na yina me tadila yawu na Baroma 12:9-13. (Tanga.) Yandi me zonza: “Na yina me tadila kupesa ba ya nkaka lukumu, beno vanda bantu ya ntete.” Yinki ya zola zonza? Beto me bonga kubaka mantwala samu na kulakisa bampangi “luzolo ya ngolo” na kulemvokilaka bawu na ntima mosi, kuyambaka bawu mpe kuvanda na kifu ya kukabulaka bawu. (Efe. 4:32) Nge me bonga ve kuvingila ti bampangi kwiza pene-pene ya nge. Nge lenda vanda muntu “ya ntete” na kusala yawu. Mpe nge ke tala ti bamambu yina Yesu zonzaka ke ya tsyeleka. Ntangu yandi zonzaka: “Kilengi ya kukabula ke lutilaka ya kuzwa.”—Bis. 20:35.

10. Wa’ faso beto lenda vanda bantu yina ke “pesaka lukumu beto na beto”? (Tala mpe kizizi.)

¹⁰ Na manima ya kuzonza na beto na kuvanda bantu ya ntete ya kulakisa lukumu na bampangi, Polo bwelaka: “Beno sala mingi, kasi beno kuvanda ve na bubolo.” Muntu yina ke salaka mingi ke na tiya mpe ke salaka bangolo na kisalu. Mpe ntangu ba ke pesaka yandi kisalu ya kusala, yandi ke lungisaka yawu na faso ya mbote. Bingana 3:27, 28 ke zonzaka na beto: “Kumanga ve kusala mambu ya mbote na bantu yina nge me fwana kusala yawu kana nge ke na makoki ya kusala yawu.” Na yawu, ntangu beto ke talaka ti mpangi ke na nsatu ya kima, beto ke salaka nyonso yina beto lenda sala samu na kusadisa yandi. Beto ke vingilaka ve samu na kusala yawu mpe beto ke zonzaka ve ti muntu ya nkaka ke sala yawu samu na beto.—1 Yoa. 3:17, 18.

11. Yinki lenda sadisa beto na kuvanda pene-pene na bampangi?

¹¹ Faso ya nkaka yina beto lenda lakisa ti beto ke pesaka bampangi lukumu ke ntangu beto ke lemvokilaka bawu na mbangu. Baefeze 4:26 ke zonzaka: “Beno kubumba ve nkele tii ntangu ke kota.” Samu na yinki? Mutindu Verse 27 ke zonzaka: “Beno kupesa ve nzila na Satana.” Na Biblia, bambala na bambala, Yehova ke zonzaka na beto na kulemvokila bampangi. Bakolose 3:13 ke zonzaka na beto na ‘kutatamana . . . kulemvokila bampangi na ntima nyonso.’ Ya tsyeleka, kulemvokila bafoti ya bampangi ke faso ya mbote ya kukuma pene-pene na bawu. Ntangu beto ke salaka yawu, beto ke sadisaka “na kubumba bumosi ya mpeve na kati ya kizunu.” (Efe. 4:3) Na bunkufi, kulemvokila ke bumbaka bumosi mpe ke nataka na kizunu.

12. Wa’ faso Yehova lenda sadisa beto na kulemvokila bampangi?

¹² Ya tsyeleka, ya lenda vanda mpasi na beto bantangu ya nkaka na kulemvokila ba yina me lwalisa beto. Kasi beto ke lenda na lubakusu ya mpeve ya Nzambi. Na manima ya kuzonza na beto na kuvanda “na luzolo ya ngolo samu na bampangi” mpe ‘kusala mingi,’ Biblia ke zonzaka na beto: “Bika mpeve ya santu pesa beno ngolo.” Ya zola zonza ti Nzambi ke pesaka beto mpeve ya yandi ya santu yina ke salaka ti beto vanda na manzangu. Mpeve ya santu lenda sadisa beto na kulakisa bampangi luzolo ya ngolo mpe kulemvokila bawu na ntima nyonso. Na yawu, beto bondila Yehova na ntima mosi na kusadisa beto.—Luke 11:13.

“BAMAMBU YINA KE KABULAKA FWANA KUVANDA VE NA KATI YA BETO”

13. Yinki lenda nata beto na kukabuka?

¹³ Kimvuka ke vukisaka “bantu ya mutindu nyonso,” yina me katuka na bisika mingi. (1 Tim. 2:3, 4) Beto ke bakaka ve mikanu mosi na yina me tadila bilele, faso ya kukipe bansuki, mavimpi to bansaka. (Rom. 14:4; 1 Kor. 1:10) Kana beto sala ve keba, bamambu yayi lenda nata beto na kukabuka na bampangi. Samu ti “Nzambi ke longaka beto na kuzolasana,” beto me fwana ve kusala matalana ti mikanu ya beto me lutila ya bampangi.—Filp. 2:3.

14. Samu na yinki beto me fwana kusala bangolo ya kuvanda muntu yina ke kindisaka?

¹⁴ Kuvanda muntu yina ke kindisaka ntangu nyonso lenda sadisa na kubumba bumosi na kati ya kimvuka. (1 Tes. 5:11) Ntama mingi ve, bantu mingi yina kotaka madidi me vutukila kuvanda na balukutakanu. Mpe ba yina ba katulaka na kimvuka me vutuka na Yehova. Beto me fwana kuyamba bawu na luzolo nyonso! (2 Kor. 2:8) Beto tala mambu yina kuminaka mpangi mosi ya kento yina kotaka madidi na kati ya bamvula 10, ntangu yandi vutukaka na Yinzo ya Kimfumu. Yandi me zonza: “Bantu nyonso vanda pesa munu mbote na kilengi nyonso mpe na tiya.” (Bis. 3:19) Yinki mwa bifu ya fioti yayi salaka yandi? Yandi me zonza: “Mu vanda tala mutindu Yehova vanda sadisa munu na kuvanda dyaka na kilengi.” Kana beto sala bangolo na kuvanda muntu yina ke kindisaka, Kristo lenda sadila beto samu na kukindisa “ba yina nyonso ke na talaka mpasi mpe ke na nataka kilo ya mingi.”—Mat. 11:28, 29.

15. Wapi yina ke faso ya nkaka ya kubumba bumosi ya beto? (Tala mpe kizizi.)

¹⁵ Faso ya nkaka ya kubumba bumosi ni kuzaba bamambu yina beto ke zonzaka. Yobi 12:11 ke zonzaka: “Dikutu ke swasikisaka ve mbote mambu, mutindu yinwa ke swasikisaka madya?” Mutindu muntu yina ke lambaka ke mekaka ntete madya samu na kuzaba kana ya me bonga tekila yandi pesa yawu na bantu ya nkaka, beto mpe me fwana kukanisa tekila beto zonza mambu. (Nku. 141:3) Na yawu, beto sala bangolo ya kuvanda kaka na dikanisi ya kuzonza bamambu yina ke tungaka, ke kindisaka mpe yina ke natina “lusakumunu na bantu yina ke kuwa yawu.”—Efe. 4:29.

16. Mingi-mingi, banani me fwana kuvanda na nzonzolo yina ke kindisaka?

¹⁶ Babakala ya kukwela mpe bibuti zola zimbana ve ti ya ke mfunu na kuvanda na nzonzolo yina ke kindisaka. (Kol. 3:19, 21; Tite 2:4) Bakuluntu mpe me fwana kuvanda na nzonzolo yina ke kindisaka mpe na lembami samu ti ba ke mimvungi ya mameme ya Yehova. (Iza. 32:1, 2; Gal. 6:1) Biblia ke zonzaka: “Mambu yina ba ke zonzaka na ntangu ya mbote ke vandaka mbote!”—Bin. 15:23.

BETO “FWANA KUVWANDA NA LUZOLO YA TSYELIKA”

17. Yinki beto lenda sala samu luzolo ya beto na bampangi katuka na ntima?

¹⁷ Ntumwa Yoane ke na kindisaka beto na kuvanda ve, “na luzolo ya yinwa to ya binzonzi. Kasi beto fwana kuvwanda na luzolo ya tsyelika yina ke na kutalana na bisalu.” (1 Yoa. 3:18) Beto zola ti luzolo ya beto samu na bampangi katuka na ntima. Wa’ faso beto lenda sala yawu? Kulutisa ntangu mingi na bawu ke sala ti beto kuma dyaka pene-pene na bawu mpe beto ke zolasana ya kulutila. Beto lenda yidika mpe bamambu samu na kulutisa ntangu na bawu, ya lenda vanda na balukutakanu to na kisalu ya kusamuna. Beto lenda baka mpe ntangu ya kukwenda tala bawu. Ntangu beto ke salaka yawu, beto ke lakisaka ti ‘Nzambi ke longaka beto na kuzolasana.’ (1 Tes. 4:9) Ya ke nata beto na kutala na beto mosi ti “ya kele mbote, ya kele kitoko mingi samu na bampangi na kuvwandaka kisika mosi!”—Nku. 133:1.