Kumekama na mongo ya Karmele

Bamfumu mingi ya yimbi yalaka na kimfumu ya makanda 10 ya Izraele, kasi Ahabi vandaka mosi ya bamfumu yina salaka mambu ya kulutila yimbi. Yandi kwelaka kento mosi ya ntima ya yimbi yina vanda sambilaka Baale. Nkumbu ya yandi vandaka Yezabele. Ahabi na Yezabele fulusaka bwala na lusambu ya Baale mpe ba kufwaka bambikudi ya Yehova. Yinki Yehova salaka? Yandi filisaka mbikudi Eli na nsangu ya kupesa na Ahabi.

Eli zonzaka na mfumu Ahabi ti samu na mambu ya yandi ya yimbi, mvula ke noka ve na Izraele. Na kati ya bamvula kuluta tatu, bima vanda mena ve mpe bantu vandaka na nsatu. Na manima Yehova filisaka dyaka Eli na sika ya Ahabi. Mfumu zonzaka na Eli: ‘Nge kele muntu ya muvusu! Nyonso yayi ke foti ya nge.’ Eli vutulaka: ‘Ni munu ve muntu me sala ti mvula noka dyaka ve na Izraele. Ni nge muntu me sosa yawu na kusambilaka Baale. Beto sala faso yayi, vukisa bantu ya bwala ya nge mpe bambikudi ya Baale na zulu ya Mongo ya Karmele.’

Bantu vukanaka na zulu ya mongo mpe Eli zonzaka: ‘Beno kanisa nani beno ke soola. Kana Yehova ke Nzambi ya tsyeleka, beno landa yandi. Kana ni Baale, beno landa yandi. Mu ke meka beno na mambu yayi. Bambikudi 450 ya Baale ke bongisa munkayulu mpe ke bokila nzambi ya bawu, munu mpe ke bongisa munkayulu mpe mu ke bokila Yehova. Nzambi yina ke pesa mvutu na tiya, ni yandi Nzambi ya tsyeleka.’ Bantu ndimaka.

Bambikudi ya Baale bongisaka munkayulu ya bawu. Ba lutisaka kilumbu ya muvimba na kubokilaka nzambi ya bawu: ‘O Baale, pesa beto mvutu!’ Samu Baale vanda pesa ve mvutu, Eli vanda seka bawu. Yandi zonzaka: ‘Beno bokila yandi na ndinga ya ngolo. Ntangu ya nkaka yandi ke na lalaka mpe ya ke na lombaka ti muntu vumbula yandi.’ Nkokila kumaka, bambikudi ya Baale vanda bokila kaka yandi. Kasi mvutu vandaka kaka ve.

Eli tulaka munkayulu ya yandi na kisika ya minkayulu mpe yandi mwangisaka maza na zulu ya yawu. Na manima yandi sambilaka: ‘O Yehova, mulemvo, bika ti bantu zaba ti nge ke Nzambi ya tsyeleka.’ Na mbala mosi, Yehova filisaka tiya yina katukaka na mazulu mpe ya yokaka munkayulu. Bantu gangaka: ‘Yehova ke Nzambi ya tsyeleka!’ Eli zonzaka: ‘Beno kanga bambikudi ya Baale!’ Na kilumbu yina, ba kufwaka bambikudi 450 ya Baale.

Ntangu dituti ya fioti basikaka na zulu ya mubu, Eli zonzaka na Ahabi: ‘Mupepe ya ngolo ke na kwizaka. Bongisa pusu-pusu ya nge mpe kwenda na yinzo.’ Zulu kumaka ndombe, mupepe bandaka mpe mvula ya ngolo bandaka kunoka. Nsuka-nsuka, ntangu yina ba lutisaka yina mvula vanda noka dyaka ve, manisaka. Ahabi vanda nata pusu-pusu ya yandi na mbangu nyonso. Na lubakusu ya Yehova, Eli kimaka mbangu kulutila pusu-pusu ya Ahabi! Bampasi ya Eli manisaka kwandi? Bika beto tala yawu.