Yehova kindisaka Eli

Yezabele kuwaka mambu yina kuminaka bambikudi ya Baale, mpe yandi dasukaka mingi. Yandi filisaka nsangu na Eli: ‘Mbasi nge ke kufwa mutindu bambikudi ya Baale.’ Eli kumaka na boma mingi mpe yandi kimaka na ntoto ya kuyuma. Yandi sambilaka: ‘Yehova, mu ke na lendaka dyaka ve. Mu kufwa ya munu kaka.’ Eli vandaka ya kulemba mingi. Na yawu, yandi lalaka na yisi ya yinti.

Mbazi vumbulaka yandi mpe zonzaka na yandi na malembe: ‘Vumbuka mpe kudya.’ Eli talaka pene-pene, dimpa na zulu ya matadi yina vandaka tiya mpe diyuki ya maza. Yandi kudyaka mpe kunwaka maza, yandi vutukaka na pongi. Mbazi vumbulaka dyaka yandi mpe zonzaka: ‘Kudya. Nge ke na nsatu ya kuzwa ngolo samu na nzyetolo ya nge.’ Eli kudyaka dyaka. Na manima yandi salaka nzyetolo ya bilumbu 40 mpe bampimpa 40 tii ntangu yandi kumaka na Mongo ya Orebi. Kuna Eli kotaka na kati ya ditadi ya nene samu na kulala. Kasi Yehova sololaka na yandi. Yandi zonzaka: ‘Yinki nge ke na salaka awa Eli?’ Eli vutulaka: ‘Bana ya Izraele me kufwa nsilulu yina ba salaka nge. Ba me mwangisa bisika ya nge ya minkayulu mpe me kufwa bambikudi ya nge. Ba ke na sosaka mpe kufwa munu.’

Yehova zonzaka na yandi: ‘Kwenda mpe telama na mongo.’ Na kubanda, mupepe mosi ya ngolo lutaka na mongo. Na manima, ntoto ninganaka mpe tiya landaka. Nsuka-nsuka, Eli kuwaka ndinga mosi ya malembe. Yandi kangaka kizizi na kinkuti ya yandi mpe telamaka na ngaanda ya ditadi ya nene. Na manima Yehova yufulaka yandi samu na yinki yandi kimaka. Eli zonzaka: ‘Mu me bikana kaka munu mosi.’ Kasi Yehova zonzaka na yandi: ‘Nge kele ve kaka nge mosi. Ya ke ntete na bantu 7 000 ya Izraele yina ke na sambilaka munu. Kwenda mpe tula Elize mutindu mbikudi na kisika ya nge.’ Na mbala mosi, Eli kwendaka sala mambu yina Yehova zonzaka na yandi. Nge kanisa ti Yehova ke sadisa ve nge kana nge sala mambu yina yandi ke na sosaka nge sala? Ee, yandi ke sadisa nge. Bika beto zonzila mambu yina salamaka ntangu mvula vanda noka dyaka ve na kati ya bwala.